Artebielsa

Paradiso d'a musica

2008-06-24T07:46:00.000-07:00

Cuan ya o mundo
siga canso de parolas
sin danze y sin amor,
bendrá allora la Parola.

Pero ya será musica. Será
la salbazión d'o mundo.
Zielos más que azuls serán
ta cutio ubiertos,
pero ya no bi abrá más parabolas.
Chesús alentará la suya musica,
Chesús amostrará con musica,
con parolas danzans.

Chesús, sembrarás
a tuya musica sobre a Tierra;
a bida crexerá.
Sembrarás cantas
sobre toz os leitos d'a nuei,
sembrarás danzes d'amor,
ritmos d'amor,
mensaches como luminarias.
Albas terrestres puyarán
enta os paradisos d'a musica.

Chesús, tocarás
con os didos d'a musica tuya
feridas y tristuras. Sanará
o mundo. Naxerá
l'árbol d'a bida en os altos
paisaches polidismos. Brollarán
auguas goyosas dende o chardín
secreto, gotas cantarán.
Fablará tot
en o idioma d'a musica.

Chesús, o mundo bibió en a guambra
en iste mundo de parolas no danzans,
as parolas no rematoron nunca
con l'odio y a desasperanza.

Pero tu bendrás, trabesarás
a nuei con a tuya Parola d'amor,
con a tuya musica d'amor, besarás
con os tuyos labios corazons.

Chesús, cuan ya os trigos
sigan prestos ta la cullita,
cuando ya tot solamén reclame
una polideza sin mentira, caminarás
de nuebo sobre sasos y camins
d'una nueba Galilea. Serán
segatos con compasión os campos.
Y tot será perdón.
Será un cutiano canto
tot amor.

Siñor,
cuan ya o mundo siga canso
de parolas sin ritmo y sin encanto,
bendrá allorá la Parola tuya
sobre a Tierra, danzará
sobre o tiempo y os espazios,
recullirás as tuyas luminarias, puyarán
en estrela eterna, brilarán
zielos sin d'engaño
en cada corazón, s'ubrirá o sagrato
paradiso d'a musica.

Chuan Chusé Bielsa

Amanexer

2008-06-18T20:47:00.000-07:00

Cuan acucuta o sol, os domingos,
as abenitas son tan luengas, bueitas.
Puedestar que bella bielleta
escobe as zeras
emporquiatas de papers coloriatos
y recuerdos.

Cuan o sol acucuta, os domingos,
ya son desfeitos os nuestros risos,
ya no zorrupamos con os labios
beires emplitos de colors,
no besamos ya más labios
(con a fruizión con a que o nino
da muesos en a carne molsuda d'as fragas).

Cuan a nuei desfá
las luminetas d'o suenio, os domingos,
esparde guambra sobre guambra,
guambras negras, guambras blancas
de lunas, de silenzios y d'oblidos.
Bi ha una ausenzia de conzienzia
en os espazios dormindo.
Allora las carreras grans tan grisas
as petenan soledaz,
ye o país inestable d'os capinos,
dondían os capinos
por o sulero en pinganetas d'a ziudá.
En ziga-zagas ban imbadindo
lo reino sagrato d'os autos,
pordemás os semaforos clucan
os suyos güellos berdes.
As abenitas son una mar
bandiando-se en o frío, os capinos
nabatiando en a grisalla.

Cuan acucuta o sol, os domingos,
No bi ha más amistanza ni más güembro
que parez duras y farolas
(os maniquís badallan
dende os aparadors petrificatos,
sin un sonriso),
y no bi abrá más leito güei
que un cantón tristo
u o disprezio d'o sofá, a o canto d'o ritmo
d'o reloche. Capinos,
ta busatros son istas parolas,
ta busatros que no replecaz o porqué
d'a inebitable luminaria d'o maitín,
a suya seriosidá amadrugando
y crebando tot o intimo,
o suyo escarnio, y tos s'antuellan fieras güei
as boiras tintatas de rosa
de l'amanexer.

As discotecas han zarrato as ninetas,
os suyos güellos enritatos,
o día s'ha trasquito un danze dibino,
bi yéranos un sólo cuerpo
baxo a plebida que arruxiaba ritmos
y luzetas, nos capuzábanos en os peitos
de l'oblido, tot i tinglaba d'oblido,
a discoteca penumbrosa
yera la nuestra casa allora
(Minneapolis, Gruta, Stella),
agora ya no en tenemos de casa, a boira,
abonico, abonico,
nos ha ito arredolando,
como un destino.

Mesachas, mesachas nos ez dixato,
nos bandiábanos fa un inte
en os buestros cuerpos,
¡ó diosas!,
nos remullábanos en a buestra frescor,
pensábanos que o buestro conuerto yera eterno,
que as buestras caras, os buestros mobimientos,
yeran a polideza buscata d'a eternidá.
Nos ez dixato
cullebriando como lo fumo, yéraz tiempo,
toz yera tiempo en a espelunga d'ilusión
d'a discoteca. I beyébanos tinglar
piedras preziosas dende o teito
y en os beires y ninetas,
pero yera tiempo tot.

Mesachas, mesachas,
en marchar no nos ez dito tan sisquiera:
"Adiós-amigos-
adiós-ya-ye-tan-tardi".
Ya ye tan tardi. Ez fuyito con o tiempo,
nos ez albandonato, ez marchato
cara enta lo día y enta casa.
Nusatros no, nusatros no en tenemos
de casa, nusatros no imos
enta lo día (a suya luz nos nafra).
Nusatros no, nusatros no tenemos
un milimetro d'amor an emparar a fren.
Agora recorremos muertos os cantons,
insultamos con altos chilos a lo tiempo
y a la bida que s'escola en agafar-la.

Cuan acucuta o sol, os domingos,
baila con nusatros a desasperanza
en a pista graniza d'as plazas,
y flors y fuens y estatuas
alufran o nuestro baile esfilorchato.
¡Ó, estamos muertos!,
ha naxito lo sol y estamos muertos.
A nuei ye rematata,
l'ha amortata o día que s'arrigue,
y naxe ta chen que bibe "como cal",
pero no-no-no ta nusatros,
o nuestro reino ye un reino
de suenios y fracasos y altos-negros
unibersos,
os tuyos peitos y a tuya lei, luna,
y no ista luz solar de lampa espullando
a nuestra indefensión, polizía
engalzando lo misterio.

Y sin aturar rechiramos
un rayet de luz de fantasía,
un rafe que nos empare de glarimas.
No sapemos ta do ir,
no sapemos qué fer.
As carreras y abenitas
son estatas tacatas por o día.
Todas as guambras coloriatas
han marchato enta atros mundos.
Y a luz d'a reyalidá, abonico, abonico,
nos ba rosigando y emplindo de feridas,
paxaricos engabiatos,
laminatos y afogatos y crematos
por o sol.

Chuan Chusé Bielsa

Nota.- Poema escrito orichinalmén en aragonés fa muito tiempo, en 1994. Yera inedito dica agora y se publica en iste blog por primera begada.

Orazions

2008-05-24T06:01:00.000-07:00

Qué bibas as torres
     de Teruel
Qué bibas en a carne seca
     de Teruel
Qué elegans os collars
En o cuello aspro de a tierra
     de Teruel
Qué bibos os ombres zaguers
Debantando as colors de milenta
Lunas y cruzes en l'aire fredo
     de Teruel
Qué suenios agonicos d'aljezes y recholas
Qué orazions espullatas enta o dios
De todas as edaz, qué dios berdadero
Entre a soledá funda y roya
     de Teruel

Teruel, as tuyas torres bibas
Son l'anima de o tuyo cuerpo de carne
Teruel, aima dica o fundo de o misterio
A inmensa luminaria de zeramicas en o zielo
A tuya orazión perfeuta

Teruel, Teruel
¡En l'orizón sólo se retallan as tuyas torres!

Chuan Chusé Bielsa

Nota.- Poema orichinal en aragonés. Fue publicato anteriormén en a portalada d'o lumero 82 d'a rebista "Fuellas" (Uesca, Consello d'a Fabla Aragonesa), correspondién a marzo-abril de 1991.

Alhambra

2008-05-21T19:22:00.000-07:00

Fa ya bel tiempo se fizo en tot o mundo una mena d'enquesta popular ta eslechir as nuebas marabillas d'o mundo feitas por a man de l'ombre, y d'entre todas as que i surtisen, a GRAN MARABILLA d'o mundo.

Cal que reconoxca que no paré guaire cuenta en os chiquez detalles d'ixe concurso. Manimenos, sí que iba rezebindo informazión de forma azidental sobre os molimentos eslechitos y aquels atros que iban rematando seyendo eliminatos. Yera prou claro que solamén se trataba d'un chuego, ya que establir diferens categorías no teneba guaire sentiu en iste caso, tan sólo yéranos debán d'un bonico entretenimiento.

Lochicamén, as marabillas que rematoron "finalistas" estioron as que cuasi toda la chen s'asperaba en primeras: as Piramides de Guiza, a Gran Muralla china, o Taj Mahal, Petra...

Me parixe recordar que a propuesta que dende o Estato Español se presentó a iste "concurso" estió l'Alhambra de Granada, por debán de "candidatas" como a Sagrada Familia u El Escorial.

Plegó un inte en que tresbatié o filo d'os esdebenimientos en o prozeso d'a eleuzión, y solamén apercazaba informazions esfilorchatas que no me'n permiten agora fablar con seguranza. Creigo que como nueba GRAN MARABILLA d'o mundo "surtió" en primer puesto Petra, pero torno a repetir, no soi siguro de tot. Y creigo que mesmo l'Alhambra no dentró a formar parti d'ixe radita colla de nuebas marabillas.

Pero, cal dizir-lo, iste chiquet articlo no tien a intinzión d'informar puntualmén sobre aquel concurso.

Solamén me cuacarba socherir que cadaguno de nusatros tamién poderba fer A SUYA lista con AS SUYAS marabillas d'o mundo. Serba, tamién en iste caso, un atro chuego, como sin denguna duda no yera más que un chuego a eleuzión d'a que somos charrando.

En o mío caso, bi ha molimentos que me dixan literalmén sin parolas, en contemplar-los y en prebar de charrar d'els, que me leban a un terreno an abita o eszelso, un relichioso misterio. Serba o caso d'o Taj Mahal, por exemplo. U de Petra, ye de dar. Pero serba iste tamién o caso de molimentos más desconoxius ta o gran publico, a lo menos difuera d'Aragón, como as torres mudéxars de Tergüel. Ya fa tarcual añadas bibié durante bels meses en ista ziudá. Y puedo dizir que m'enamoré d'ixas torres, mesmo en fazié de poemas, y dica güe contina ixe amor. Remero cómo, dimpués de paseyar por as carreras y abenitas, perén remataban os míos pasos a o canto d'ellas, güellando-las en silenziosa adorazión, felizmén engabiato en a suya machia.

Cadaguno de nusatros tien as suyas particulars midas ta balurar a polideza. Y todas en son bien respetables. En o mío caso, si tenese que trigar bel molimento en tot o mundo que faiga que o mío esprito esclate d'almirazión, que recreye en el toz os paradisos que emos bibiu u que asperamos poder bibir, iste molimento serba chustamén, conchuntamén con as torres teruelanas... l'Alhambra de Granada. En ella poderba resumir-se tot o que busca o mío ser sanzero, ella bien poderba representar ta yo un simbolo de tot o que aimo y tot o que considero poliu y de balura. L'Alhambra tien y amuestra Poder interior, ye como lo chardín edenico de l'asperanza. Poseye a infinita y serena umildá d'o berdaderamén gran. Como lo mudéxar de Tergüel...

L'Alhambra poderba representar perfeutamén o paradiso, tamién ta yo, que soi cristiano, pero ubierto a toda sinzera espiritualidá. Tamién yo poderba ser de raso feliz dondiando por os ambitos zelestes y as cambras d'ensuenio de l'Alhambra, leyendo meditatibamén bersiclos d'o Corán, paseyando por o Patio de los Leones, repensando sobre altas berdaz en a Sala de las Dos Hermanas, u sentindo una musica de gotetas en o Generalife, u aguaitando lo silenzio d'as auguas en o Patio de los Arrayanes u en El Partal, oblidato d'o tiempo, como si s'esen aturato ta cutio as suyas sayetas. Ixo serba como prebar un siñalín d'o Paradiso, un trozet de Paz, un Paradiso que ye o dreito de naximiento y o destino ta tot ser que ha abitato, abita y abitará la nuestra Tierra.

O Taj Mahal, u a basilica d'o Pilar, u as torres mudéxars de Tergüel, u l'Alhambra de Granada... tot forma parti d'un Amor que ha preso forma y que, a pesar de todas as tristuras y toz os misterios, siñala un camín de polideza y meditazión, d'asperanza.

Chuan Chusé Bielsa

2008-05-19T10:40:00.000-07:00

Montalbos - Andorra-Sierra d'Arcos
Foto de Chuan Chusé Bielsa

Gatica

Enterré a la mía quiesta gata
en o puesto más bonico d’a Tierra,
a o canto d’a noguera solitaria
y en o marguin d’o biñero biello,
sin fruitos y zeleste.
Aquí son una pregaria
as calmas
luminarias d’o lusco.
Aquí l’aire ye un perfume
d’espligo y tremonzillo.
Aquí crexen
as flors más majas,
repolidas.

Un nino, inozén,
izirba : "Quereba a la gateta mía
como a cosa en iste mundo".
O poeta diz o mesmo.
Ye o suyo destino
ser libre como lo zierzo y amar l’Alma
misteriosa que ha feito niedo
en cadaguno d’os sers bibos.

Cosa ye o cuerpo dimpués d’a muerte
y, sin dembargo, serba bien polito
que as mías zenisas, bel día, fuesen esparditas
en o puesto más bonico d’a Tierra,
a o canto d’a mía gateta parda y blanca,
sobre a piedra que corona o suyo cuerpo muertezico,
a o canto d’a noguera
que se banta en o silenzio tanimientres ora
enta lo zielo,
a o canto d’o biñero con fruitos
solamén de belleza y d’infinito,
allá do a bida crexió
con amor y con paz, muito luen
d’o caos d’o mundo, muito amán
d’o branquil d’o paradiso.

Como un nino que, inozén,
aimaba y agora se cariña
d'a suya gatica,
o poeta fa o mesmo.
Ye o suyo destino
biachar libre en o Esprito
enta l’Alma dibina que ha feito niedo
en cadaguno d’os sers bibos.

Chuan Chusé Bielsa

2008-05-08T03:21:00.000-07:00

FALSA A O CANTO D'A MAR

Pintura orichinal de Chuan Chusé Bielsa

Olio sobre tabla

54'3 x 65'2 zm

Obra en benda

2008-04-14T03:36:00.000-07:00

Mon sagrato de Piagordo (foto feita por Chuan Ch. Bielsa)

Entre as radizes y o infinito

Son dos as estrelas
que guidan o mío camín.

Bi ha la estrela enrunata
baxo tierra, umilde,
arrodiata de radizes u de sangre.
Como simién u corazón.
Son as parolas aragonesas
que perén ban con yo,
que pronunzioron aquels
con os que perén bibo,
anque marchoron luen,
albas d’amor.

Parolas aragonesas en o camín
enta l’oblido.
Parolas-radizes, estrelas d’a tierra,
parolas biellas, dispreziatas,
afogatas en o fango y en o escuro,
como en profundidaz abisals.
Beluns piensan que son fieras.
Ta yo
no bi ha parolas más bonicas
en os inlumerables mundos.

¿Y l’atra estrela?
O mío deseyo d’infinito,
cariños d’a Luz
biba eternamén.
Estoi enamorato
d’o infinitamén alto
amagato
en o infinitamén umilde.
Enamorato de l’unico que esiste.

Abitán de dos mundos,
son dos os astros
que me guidan y dan lumbre,
a bida ye un biache entre unibersos
y cadaguno triga las estrelas.
Allá en o alto d’os zielos interiors,
¡cuántas estrelas
de compasión, polidas,
altismas,
iluminando lo Camín enta l’Amor!

Chuan Chusé Bielsa

2008-04-09T04:31:00.000-07:00

DE RADIZES Y ESTRELAS

A begadas, quedamos seduzitos por camins lexanos.

A begadas, güellamos a os nuestros piez y nos beyemos enfangatos en a tierra y as radizes. Ye a tierra que pisoron os nuestros abampasatos, aquels que charraban con as parolas que encara ricuerdo, y que güe ya no prenunzia cuasi dengún.

A begadas, sentimos una cansera de radizes, pensamos que no son guaire útils ta las alas que quieren marchar enta toz os deseyos y destins.

Pero dimpués tornamos a nusatros mesmos, ubrimos os güellos, y beyemos as carreras que abitamos. Cuasi tot ha cambeato. Pero bi ha presenzias arradigatas a l’amor en cualsiquier cantón que conoxemos. Banto los güellos, y beigo los mons con as suyas chiquetas faxas albandonatas, ribazadas baxo ribazadas. Allá nos ricordamos a nusatros mesmos, ninos, en a costera, columbrando dende alto os paisaches que perén emos aimau, aguaitando a yayo treballando con o zaguer aladro, a zaguera somera, en o campet estreito, a o canto d’os abismos.

De tot ixo, ¿qué remane? Si alcaso bellas parolas dando as bocadas, una frescor apenas besitata de ricuerdos. Ubro los güellos. L’airera bandea almendreras y oliberas en a soledá... Cada árbol teneba un nombre que güe a chen tasamén emplega: laurelero, manzanera, perera, zerezera, azarollera, niespolera, presquero, alberjero... Uno poderba pensar-se que güe a chen reniega d’ixos nombres. En bi eba mils y mils que agora son morindo. A nusatros nos amostroron ixos nombres. Os biellos no en conoxeban d’atros. Y a tierra os charra encara, creigo, en as barellas d’os impeltes muertos.

En a biblioteca d’a memoria alientan ixos nombres, encara. A begadas me’n boi luen d’els sin de parar cuenta, a begadas creigo que ya no pertenexen a iste mundo, que ya no pueden serbir ta guaire cosa. Pero, en l’inte, ¡qué silenzio y qué chelor y qué angunia siento en o más fundo cuan o paisache, como un mirallo, me ritorna la suya güellada trista! No, ya no sé u no puedo bibir sin ixas parolas que s’amortan, como si alexando-me d’ellas perdese l’amorosidá y o ricuerdo de toz os que tanto me quison y que tot lo me dioron, tot m’amostroron.

A begadas marchamos, sin pensar, enta o esbarafundio d’as taragañas d’o mundo. A begadas dispreziamos as radizes, nos arreguimos de radizes, nos sentimos entollaus en as radizes. A begadas querérbanos desenreligar-nos de muitas cosas y marchar bolando enta un zielo iluminau por estrelas y luzetas de deseyos. Pero son estrelas tamién as radizes, y as más alteras y bonicas, ixo replecamos dimpués d’añadas y feridas. Tamién as radizes nos guidan como a nautas en l’amplisma escureldá d’os misterios. En a mar d’a eternidá nos asperan as radizes, tot l’amor que emos iu dando y que nunca s’ha perdiu.

Dica la fin, bibiré con as parolas que ya apenas dengún charra, que ya no sé si belún emplegará. Cuan o día m’arribe de morir, me’n iré con estrelas de radizes, firmamentos de radizes.

Y creigo que en a lengua oblidada, con as parolas que ya cuasi dengún quiere, bendrán a rezebir-me aquels a os que en ista bida tanto aimé. Y sisquiá charremos ya ta cutio, eternamén, ixa lengua de radizes en o eterno paradiso d’os suenios.

Chuan Chusé Bielsa

2008-04-01T16:54:00.000-07:00

Aguaitando a la mía gatica

Aguaitando a la mia choben gata una cosa repleco.

Aguaitando a la mía gatica bibindo en o susiego. Cosa creba irremeyablemén o suyo mundo. Perfeuta serenidà. Dengún reconcome. Denguna delera. Solamén reposar en a calma, ya siga aprofeitando un amorosiador solezico cuan fa bueno u bien, d'ibierno, catando fito-fito, sin cantiar-se, as flamas d'o fogaril, en una lexana casetica en o yermo.

Aguaitando a la mía gatica repleco que m'he equibocato. Nos emos equibocato muitos, creigo. No bibimos en o país d'a serenidà. ¿Alcaso no ye ixo lo que más importa?. Espleitar fundamén de lo más simple, d'os paradisos senzillos, d'a caloreta que ta l'anima de baldes ufre a contemplazión, d'una capeza fresqueta y d'un corazón alentando en a paz.

Comprendo agora que m'he equibocato. Si escomenzase una atra begada, creigo que darba asabelas cosas, talmén tot, por bibir en a calma d'o silenzio y d'a meditazión. No comprarba as complexidaz inútils d'o mundo, os inutilmén lumerosos trastes d'o mundo, con as as suyas luminetas falsas d'oro.

Con qué seguranza lo digo: "M'he equibocato". Con qué seguranza lo beigo, con qué tristura güello enta os días que marchoron y que bien pudon ser una atra cosa. Si arrullase en un muntón as oras no bien emplegatas construyirba piramides; piramides sin orizons, ni estrelas, ni renaximientos.

Nos apegamos pordemás a ochetos y aparienzias, nos cargamos con muchilas chigans d'obligazions. Nos tornamos en esclabos de por bida ta bien poqueta cosa. Nos cal satisfer nezesidaz, pero lo que femos ye multiplicar-las sin aturar. Y tanimientres, lo que más importa remane amagato, lo que atorga a la bida a suya nobleza queda en intes que pudon aber estau grans y que dixemos pasar y trafeguemos cambeando-los por estapenzias. ¡Cuántas cosetas grans y buenas s'esbafón y s'esbafan de contino en o buedo d'o no bibito!

Güello a la mía gata en a suya perfeuta paz, en a suya intelichenzia sin mida, y lo que he dito se torna en cualcosa que puede mesmo palpiar-se, reflesión de grilla. Güello a la mía gata choben que, sin nezesidà de garra escuela, esliche a bida millor en cada inte, sin faramallas.

Sí, m'he equibocato, y como diziba Leonardo da Vinci, beigo agora millor que nunca que o tiempo "s'esbariza sin ser notau, a amagatons, y ba asinas engañando a os mortals". Dios mío, Dios mío.

Chuan Chusé Bielsa

2008-03-25T19:05:00.001-07:00

M'INTERESA

Muitos días ya sin dengún post. Curioso: he pensato y elaborato bels articlos ta incluyir-los y dica agora no lo he feito. Me trobo zagueramén inmerso en un ambién contemplatibo, interesato por cosas que no sé si interesan a muita chen, y manimenos sospreso y alticamato cada día por bellas notizias apercazatas cuasi sin querer-lo, d'astí y d'allá, en os partes. Son as feridas que nafran a contemplazión. As eternas feridas d 'o mundo. O cordón que nos aune a o melico d'os nuestros chirmans.

Bellas begadas tamién me sosprendo cuan reconoxco que ya no m'interesan guaire cosetas que ban emplir muitos entusiasmos en a mía bida, esportes (fútbol...) por exemplo.

¿Qué m'interesa, doncas? Ta empezipiar: un paisache solitario an encara se sienta o pulso en calma d'una bida berdadera, un autentico miraglo en meyo de l'artifiziosidá que lo ba imbadindo tot poquet a poquet. Creigo que, afortunadamén, tanimientres bibamos, encara quedará bel paisache bonico por istas tierras, pleno de polideza y soledá. ¡Qué suerte! Ixo ye o zielo. Poder acudir-ie con un buen libro u con un lienzo ta pintar, u con un corazón ta escuitar. Á... Poder espleitar d'o silenzio... Ixo ye o paradiso. Dios ye ixo. Dios ye astí. Encara.

M'interesan as zibilizazions muertas, por exemplo. Me faszina la zibilizazión echipzia. En cuentas de beyer bella canal de telebisión, repaso muitas begadas documentals sobre l'antigo Echipto. U bien amilloro, beyendo zintas clasicas, o inglés que no m'amostroron en a escuela (a mía chenerazión estió d'as zagueras que s'ilustró en a lengua franzesa). Pero continan interesando-me fablas romanicas minorizatas (como l'oczitano) que no han teniu a suerte d'o inglés, u que mesmo poderban tener en o esdebenidero, si no se i mete remeyo, o destino trachico de l'antiga lengua echipzia.

M'interesa... Atra begada contaré más en profundidá qué m'interesa... Aragón, por exemplo, un Aragón mitico que ya no sé si esiste. Aragón poderba estar, ta yo, un barello en ixa calma ta lo esprito d'a que charro, con trigos que bandea una bisa de silenzio, con una luminaria de tardada presidindo lo que somos. Ta yo Aragón son paisaches que aimo y aragonés, molimentos que aimo y aragonés, alma aragonesa y aragonés. Si no bi ha aragonés en o mío barello silenzioso yo ya no repleco Aragón, yo ya no trobo Aragón. Cadaguno tien os suyos bagaches de parolas y de suenios, as suyas mitolochías, o suyo cantón de ricuerdos en o más fundo, a o canto de bella basa berda, en l'ortal, por exemplo, tot embolicato ya en as boiras d'un pasau remotismo...

Aragón... ye l'Aragón que m'amostroron os míos yayos, a os que adoré. Un Aragón pleno de dignidaz, un Aragón pleno de parolas con sabor a tierra. Un Aragón que ya solamén aguaito en una lumbre interna, en un fogaril de cariños.

M'interesa... Un atro día contaré tot ixo que m'interesa agora, dimpués d'as añadas... M'interesan muitismas cosas, todas coloriatas por una luzeta umil de contemplazión.

Sí, m'interesa la contemplazión. Ye dizir, un progreso autentico.

Y l'ombre y a bida m'interesan como a un enamorato. Con clarors y foscors (anque a begadas duelan).

Y, sí, m'interesa ixe silenzio d'o que charro an s'amaga tot lo que ye d'interés ta l'alma, tot lo que berdaderamén importa.

Chuan Chusé Bielsa

2008-02-26T19:14:00.000-08:00

Debuxo de Chuan Chusé Bielsa

Serba poliu

Serba poliu
poder creyer, encara,
en un futuro mainifico
en ista Tierra.
Serba poliu
poder creyer, como antismás,
en bonicas utopías,
u en rutas d’asperanza, Zipango,
u en promesas d’esdebenidero,
u en esbiellatos y gloriosos
esperantos.
Serba poliu
poder creyer, con muita fe,
en epocas d’amplos orizons
u en una paz pleniza d’oro.

Serba poliu
poder bibir os días en un planeta rebutién
d’escoscaus paisaches,
con albas altizas como amors, con almas
creyando tot ixo que ye de dentro y tien balura.
Serba poliu
poder bibir dillá
d’a simpla superbibenzia,
luitar por descubrir con as naus nuestras
un mundo birchen ("toda la nuei
se sintioron pasar paxaros"),
un continén pleno de luz
en a mar gran d’o corazón.
Serba poliu
marchar a la busca, encara,
d’una frescor de chobentú,
d’a fuen interna d’os suenios,
sentir a la fin as suyas auguas
recreyando, como en disiertos,
a radiz d’o mundo.

Chuan Chusé Bielsa

2008-02-09T15:03:00.000-08:00

PAISACHE DE MEDITAZIÓN

Pintura orichinal de Chuan Chusé Bielsa

Olio sobre tabla

60'6 x 73 zm

2008-02-01T15:13:00.000-08:00

EGO SUM

Pintura orichinal de Chuan Chusé Bielsa

Olio sobre tabla

60'7 x 89'5 zm

Franz Marc, pintor d'a pureza

2008-01-20T01:50:00.001-08:00

Gato pintato por Franz Marc.
Franz Marc fue miembro y co-fundador
d'o grupo espresionista chermano "Blauer Reiter" (O caballero azul).

Franz Marc (1880-1916), durante toda la suya bida, fue un buscador d'a pureza y a berdá. En primeras, istas cualidaz no las bido en o ser umano. Asinas que prebó de trobar-las en os animals, a os que beyeba en cualsiquier caso más inozens, más puros. Toz podemos almirar as suyas mainificas pinturas en as que beyemos caballos azuls, cans, gatos... Ya conoxerás que Adolf Hitler esplizitamén condenó los caballos azuls de Franz Marc, considerando-los "arte dechenerato"...

Franz Marc murió choben. A la fin d'a suya carrera, os suyos pensamientos sobre l'arte sofrioron importans cambeos, perén amostrando una eboluzión enta l'abstrazión, y de bella traza albadonando un poquet as suyas ideyas anteriors sobre a pureza en o mundo natural. Ye en iste inte cuan as formas d'animals desaparixen cuasi enteramén d'os suyos cuadros. L'orizón de Marc yera un contino recloxidar d'a pureza (solamén en o suyo costau moral u espiritual, ixo ye claro). Manimenos, no contó con o tiempo sufizién ta retaliniar definitibamén y lebar a la prautica o suyo conzeuto ultimo sobre l'arte y a bida.

Cadaguno de nusatros tien as suyas preferenzias sobre pintors (u pintaires), pinturas, mobimientos artisticos... En o mío caso, cal que diga: me cuaca muitismo Franz Marc.

Chuan Chusé Bielsa

2008-01-09T09:53:00.000-08:00

Pintura a l'olio de Chuan Chusé Bielsa

YES ALBA

Y yo que creyeba os míos güellos
güellos ta o yermo,
a mía casa de piedras amarillas
besando lo silenzio,
una finestra con beires decoratos por o polbo,
cruz robinata de fierro.
Y yo que creyeba la casa mía
casa ta os muertos,
y yo que creyeba la cambra mía
fosqueta sin deseyo,
alufrando ta siempre purnetas bandiatas en a luz
d’un sol sin de tiempo.
A mía casa en a fin de toz os cabos,
a mía falsa escobata por zierzos,
a mía falsa enta todas as tardadas,
besitata por bersos.
Y yo creyeba,
yo creyeba o mía día feito.

Yo que creyeba,
yo que creyeba...

Nunca no eba bista
una güellada como a tuya,
nunca no eba bistos
luz-maitín-güellos
que ban naxendo,
labios-mexiellas-eternidá fresqueta
que ban crexendo
como alba que brolla entre pueyos.
¿De dó biens?
¿De qué mundo-rosada iluminato?
Nunca no eba bista una polideza
como a tuya.
¿Qué aurora de luz ye a tuya casa de misterio?
¿Por qué o sol d’a tuya fren
puede emplir y arruxiar d’oro
a falsa ya en o escuro y en o bueito?
¿Qué dios abita en as ninetas d’os tuyos güellos?
I s’ubren todas as flors de l’amanexer.
¿Qué estrel de día nuebo
brila y sonrisa agora en iste zielo?
Por el oblido
a mía casa arrodiata d’allagars amarillencos,
a sabor y o tauto
d’as crebazas d’o disierto,
y siento una boz secreta y funda
dizindo: “Abrás tu tamién o tuyo suenio”.
He oblidato a mía muerte,
yo que creyeba os míos labios xutos ta besos,
xutos ta siempre,
yo que creyeba las mías mans
aspras t’amorosiar güembros,
que creyeba o mío danze
danze sin d’ocheto.

Yo que creyeba,
yo que creyeba...

S’entrebeyeban parellas con chuegos d’amors
entre tascas y flors en os chardins,
s’oloraban fuens y besos de parellas,
bebeban en amor besos.
I feba o día goyo,
día crexendo,
pero lo mío día ya iba enta ibiernadas,
pero lo mío día
día d’agüerro,
y sentiba la sabor en os güesos
de todas as tardadas comtemplatas en silenzio,
y amorosiaba las clarors cansas
con as que chuga o sol zaguero
en os cantons d’as falsas.
Pero a luz de maitín d’os tuyos güellos,
como una albada,
esbeilando lo mío reloch quieto,
como rayadas u estreletas blancas
puyando por o barandau d’a escura casa
enta la falsa sin de besos.
O mío día crexe,
muerte morindo y alba naxendo,
y acarizio sobre a yerbeta fresca
o tuyo femenino cabello negro,
y beso los labios tuyos pintatos
de delicato rosa
baxo churros multicolors de luz,
allá en alto biacha un luzero.
Y apoyo lo güembro mío
contra lo tuyo güembro
y como augua beso y bebo
a tuya piel sentindo lo bater mistico
d’o Misterio.
¿De dó biens?
¿Amán de qué astro abitas y quí te dio a luz?
Yo no en sé cosa.
No eba bista denantes ixa luz en unos güellos,
ixos güellos retallatos
y a o mesmo tiempo
acubillando espazios,
unibersos.
Nunca no eba bista una feminidá
como a tuya.
O tuyo amanexer alumbró lo mío corazón
tot sanzero,
bines enta yo y te güellé,
oblidé o yermo,
m’inundés d’augua luminosa,
dixé a mía casa,
oblidé as nueis,
todas as nueis d’o mundo,
oblidé as desasperanzas,
todas as desasperanzas en o mundo.
Bines enta yo y te miré.
Y me’n lebés enta o tuyo día.

Chuan Chusé Bielsa

Nota.- Poema escrito orichinalmén en aragonés fa muito tiempo, en 1994. Yera inedito dica agora y se publica en iste blog por primera begada.

2008-01-07T16:38:00.000-08:00

ANQUE TARDI : ¡BUENA AÑADA 2008!

Sí, ye zierto, ya somos de pleno en o nuebo año, ya fa bels días que lo emos enguerau.

Pero me cal, interiormén, dizir-lo, breumén, sin retolicas, dende l'arca d'o corazón:

Que en ista añada podaz aconseguir as cosas que tos puedan empentar en o biache enta la buestra felizidá. Y que ixe mesmo biache siga muito feliz.

Tos deseyo un gran camín de paz, amor y prosperidá. Ixe ye o camín que merexe a pena, como busatros sabez millor que dengún.

¡Entabán con os buestros suenios! ¡Sobrebuén 2008!

Chuan Chusé Bielsa

2008-01-07T16:07:00.000-08:00

A FABLA D'A POESÍA

Ya fa bel tiempo que no escribo guaire en iste blog. Diferens treballos han feito que no lo aya atendiu como cal.

Tampó ultimamén he escribo guaire cosa, literariamén, en aragonés. Reconoxco que en iste tiempo nuestro que nos ha tocau bibir, fer omenaches meditatibos de cabo cuan a o silenzio puede estar una autibidá muito parellana a escribir ringleras de bersos, a capuzar-se en as auguas d’a poesía. A un poema li calen paisaches buedos ta alentar, un poema ye una orazión en silenzio.

O silenzio... Cuan me trobo en contemplazión funda sobre un tiempo calmo, boi trenando poemas que no escribo y que l’orizón azulenco más bonico, tintau de rosa, muito luen, reclama. Mentalmén foi dos, nueu bersos que no emplenan dengún espazio birchen. O campo s’aduerme biachando ya cara la tardada, a gata s’aduerme tranquileta entre rayadas cansas (y no aspera as malas nuebas d’o parte). O campo, eslanguiu, fa tamién poemas que no escribe.

Poderba dizir, prebando d’estar sinzero (poeta) : escribo ta busatros, chen que ya no i soz aquí, que ya bibiz en o Silenzio. Bibimos de cutio, a cada inte, con os que marchoron d’iste país que tanto quison, tanto como con os que encara i son fisicamén a o costau nuestro.

As biellas parolas aragonesas, a bonico, tamién se’n ban por as carreras biellas d’Andorra, se’n ban enta l’altizo zielo misterioso. Y do empezipia o campo, y os camins biellizos, y as faxas sustenidas por as grans ribazadas, tot plora una ausenzia que fa tantismo mal en l’alma. Plora la tierra y plora l’aire cuan ya no charra l’amor, cuan ya no bi ha mans que amoroseen una fuella, una azarolla u mesmo un zarpau de polbo. Se’n ba amortando un mundo milenario, se’n ban amortando as parolas. Queda o calibo y o silenzio.

Sí, un poema ye una orazión en silenzio.

Escribo ta busatros, chen d’antismás, yayos, ninos, mesaches, chobenzanos, chen de fierro debán de todas as tronadas... que abitaz en esprito en os paisaches que adoré en a mía infanzia. As parolas buestras se’n marchoron con una airera salbache que furtaba recuerdos, ya no las charra o zierzo u a tardada.

Yaya Chuana, si escribo ye ta tu, si guardo lo mío aragonés como un tresoro, ye por tu. Tu yes o simbolo de tot o qu’encara aimo. Tu yes o simbolo d’a tierra que abité. O simbolo d’o Silenzio que nunca no s’amorta, a presenzia eterna en a bancada a o canto d’as flamas que perén creman.

A nuestra lengua estió, a nuestra lengua ye a fabla d’o Silenzio, a fabla d’a Poesía.

Chuan Chusé Bielsa

2007-12-26T20:06:00.000-08:00

FLOR D'UDUMBARA

Pintura orichinal de Chuan Chusé Bielsa

Olio sobre tabla - Bendiu

55'2 x 60 zm

2007-12-19T16:46:00.000-08:00

Debuxo de Chuan Chusé Bielsa

Corazón feito de rosas

Canso d’os chardins d’as flors
chelatas, te seguiré a tu, amiga,
enta o tuyo corazón pleno de rosas.

Guarda o chardín d’o tuyo corazón
a rosa unica ta os güellos
fatigatos, o tiempo no desfá en o chardín tuyo
tot ixo que has sembrato.

Están as tuyas rosas perén frescas, as gotas
que las besan están enamoratas.
Están as tuyas rosas, amiga,
bibindo en a inozenzia
d’a frescor d’a fontaneta
eternamén. Fragans,
perén en goyo y calma.

En o más fondo d’o tuyo corazón posés
a tuya alianza,
escosqués y ordenés todas as cambras,
os tuyos chardins internos,
ta que i naxese l’amor.
Perfumés a tuya alma.

¡Qué rosada de luz infinita, en plegar l’alba,
amorosió as rosas!
¡Qué amor polidismo brolló ta siempre
en a fuen d’o chardín d’o tuyo corazón!

Chuan Chusé Bielsa

2007-12-19T15:13:00.000-08:00

LUZETAS D'O PARADISO

Pintura orichinal de Chuan Chusé Bielsa

Olio sobre tela - Bendiu

81 x 100 zm

2007-12-17T15:06:00.000-08:00

AGORA

Se diz asobén, y ye zierto: o millor que se puede fer ta esfender una lengua minorizada ye... emplegar-la AGORA. No ye que sigan inútils os discursos, as buenas intinzions, os proyeutos, pero no bi ha duda, o millor discurso ye fer uso AGORA d’as parolas y a cultura que consideramos de balura, ixe ye o “discurso en aizión” que cal.

Caldrá dizir bien altero que una lengua milenaria tien muitisma balura, que una cultura milenaria tien muitisma balura, que merexen esfender-sen, prener-sen en gran considerazión.

Bibimos ficaus en tiempos d’esbarafundio, de confusión . Grans patrimonios de toda mena son en periglo, y no reziben l’aduya que amenestan ta preserbar-sen ta las chenerazions esdebenideras. Bonicos paisaches, a mesma salú d’a naturaleza, a superbibenzia d’espezies animals y bechetals, molimentos istoricos... tot merexe una güellada d’aprezio y una aizión ta mirar de guaranziar que as chens que han de benir puedan trobar-sen con uns espazios polius, abitables, con una Tierra con culturas bien bibas y dibersas.

¿O patrimonio natural? Cal esfender-lo AGORA, con chiquetas u grans aizions, cadaguno en a mida d’as suyas posibilidaz en puede fer cualque cosa. ¿As nuestras lenguas tradizionals? Cal esfender-las AGORA, charrar-las AGORA. Ixo sí, si nos peta, si las queremos, si consideramos que son un erenzio que merexe a suya superbibenzia, si pensamos que son un tresoro infinito.

As chenerazions futuras bien abrán de poder tener o goyo de contemplar polius paisaches, una fauna y flora ricas. Y no solamén tienen o dreito d’ixe goyo estetico, sino que en iste caso una naturaleza sana ye una condizión “sine qua non” ta la mesma esistenzia d’una bida umana digna.

D’a mesma traza, tamién ixas chenerazions tienen o dreito a poder optar a formar parti d’a _dica agora_ gran dibersidá cultural d’o mundo. Ye indezén e irresponsable beyer aspeutos positibos en a desaparizión de fablas y culturas chiquetas, no ye azeutable no prener midas AGORA _tan y mientres bi ha tiempo _ ta fer tot o posible por preserbar ixe grandismo erenzio, ta pribar que s’amorte.

No sería positiba, por exemplo, a muerte d’a cultura y lengua tibetanas, suplantadas por a cultura y lengua chinas, como no sería guaire positibo t’Aragón no poder contar ya en un esdebenidero no tan lexano con a suya lengua tradizional y milenaria, l’aragonés.

As chenerazions futuras merexen o legau d’un mundo cultural y biolochicamén rico y diberso.

Y ta fer-lo posible, cadaguno de nusatros, y con mayor razón as instituzions que nos representan, cal que faigamos aizions AGORA, cal que tratemos con considerazión a naturaleza AGORA, cal que charremos as nuestras lenguas minorizadas AGORA. Si ye que queremos dixar un planeta plenizo de dibersidá do merexca la pena bibir. Cal autuar AGORA. Porque en a enrebullada confusión d’o mundo, parexe como si tot o reyalmén importán quedase en un segundo plano.

Tot o que fa la bida polida y posible, y funda, merexe a nuestra güellada amorosa y a nuestra obra AGORA.

Chuan Chusé Bielsa

2007-12-12T15:11:00.000-08:00

Debuxo de Chuan Chusé Bielsa

CON ELLA

Si bel diya morise a mía
Lengua enferma
Dixaz-me ya con ella. L'anima
Con ella.
Si bel diya morise a mía
Lengua enferma
Ise o mío destino entre silabas.
Si no bi ese un inte nuebo
Ta parabras...
Tampó no ta sons eternas.
Y biacharba con ella enta imposibles
Naximientos, ausén enta impotenzias.
Si no bi ese un inte nuebo
Ta rispuestas, remana muto ya
Con ella.
Si bel diya caye en o camín a mía
Lengua enferma,
Como un biello que camina solitario
Y sin de fuerzas besa o suenio,
Sisquiera sienta o polbo en os míos labios
Escribindo parabras de consuelo.
Que as zertifique l'aire y las se lebe
Enta orizons esconoxitos. O mío aliento
Con ella.
Sabez, a mía lengua estió lo mio amor
Seguro, sostenió a mía bida entre preguntas,
Cambeó en tierra amata las tristuras
Y me dixó l'aniello do brila lo ricuerdo
De a istoria de os mios güelos.
Sabez, sisquiera bi aiga un puesto chiquet
En a fuesa de galacsias,
Sisquiera la posibilidá d'un dios perdito
Que faiga posible a prenunzia d'una perdita
Parabra suya.

Chuan Chusé Bielsa

Nota.- Poema orichinal en aragonés. Fue publicato anteriormén en o lumero 80 d'a rebista "Fuellas" (Uesca, Consello d'a Fabla Aragonesa), correspondién a nobiembre-abiento de 1990, contando con una ilustrazión de Francho Nagore.

2007-11-29T16:26:00.000-08:00

Pero agora, o Silenzio

Creigo que en o Silenzio
se troba una Parola.

Ye fázil xublidar
as nueis con estrelas machicas
an abita tot ixo que encara
ye posible.

Os autos implen,
rodando, lo mundo;
as telebisions, perén
enchegadas, no aturarán un inte
en a suya charrameca;
s’enrebullan, y no en paramos cuenta,
unos zaga d’atros, os pensamientos,
no son libres,
y charramos y charramos,
a begadas, sin cansera,
sin ascuitar lo que caldría,
sin ubrir guaire o corazón,
sin o buedo nezesario d’os aljibes.

Pero agora callamos y dexamos
que dentre, como una boladeta
d’aire en a falsa adormida,
un Ricuerdo d’orichen.

Pero femos Silenzio agora
sobre o tiempo,
como fan as falsas meditando
baxo lo zielo azulenco, an sólo bibe
un mundo calmo,
u baxo as nueis plenizas de luzetas.

Pero acullimos o Silenzio agora,
y en un inte a paz se banta,
podemos agora
sentir, dizir
una Parola,
podemos charrar
con as estrelas.

Chuan Chusé Bielsa

2007-11-26T16:14:00.000-08:00

Debuxo de Chuan Chusé Bielsa

LENGUA MÁS AIMATA

porque l'aire de os garmos estió
a suya reyal cambra
(a suya corona alta)

porque a suya canta la cantón
y la besón tronadas
(la sintión as flors perditas)

porque a suya casa sólo estió
a pobra espelunga de as fadas
(a suya luz candeletas de suenios)

por ixo
a mía lengua
lengua más aimata

porque as suyas bozes dixón d'estar
tan sólo bozes
y en l'ausenzia y l'aunión con tot
en sieglos y sieglos de silenzio
se barrechoron con a boira y con o sol
con as olors de as plebidas en a tierra
con as obellas en as flamas
y en a sete de o camín
con o riso d'un nino con pilotas de trapos
(as suyas bozes crexioron
como a flor de nieu
en os zinglos oblidatos)

porque a suya boz estió
boz d'agora y de presén y d'infinito
y no de mugas ni de fuerza
ni de foscos pensamientos

porque como un sabio bibió siempre
en a suya armita sin deseyos
(cosa no querió saper en o mundo
d'aizions locas
cosa de os que matan u os que odian)

porque por no querer fer mal
prefirió cuasi morir
y no ferindo fuyir de tot imperio
(soniaba solamén
con naxer un día de as zenisas)

porque a suya gran literatura
se siente y está escrita
en pobres mases espaldatos
en alpartatos sasos
en as remors de o zierzo y de l'ausín
en a canta fresqueta de l'alto río birchen
en a cleta querata d'una borda albandonata
en o sarrio salbache y en o paxaro libre
y en as crebazas de as planas biblicas d'Aragón

porque estioron pastors y altarias
y selbas abitatas por a machia
o suyo naxedero de parolas

porque a mía lengua estando alta
se tornó umilde como bal
a más baxa y a más funda de as bals
(as suyas parolas son parolas d'augua biba
puyando dende a radiz de a nuei)

porque a mía lengua
s'abaxó dica lo escarnio
de tantas y tantas lenguas bien bestitas
y as suyas parolas estando as más politas
endurón dignas o fuet y tanto fiero riso

porque cuasi a mía lengua
s'abaxó dica l'oblido
por ixo
   por ixo
a mía lengua
lengua más aimata
sí
   aragonés
   d'a mía alma
lengua más aimata

Chuan Chusé Bielsa

2007-11-21T18:33:00.000-08:00

PARTI FEMENINA

Ricuerdo perfectamén cómo de nino, con os amiguicos d’o barrio (u bico), cuan bi eba bel partiu de fútbol en a telebisión _en blanco y negro_ an chugaba o nuestro equipo, o rebulizio y goyo yeran bien grans. Cada begada que o equipo d’os nuestros amors marcaba bel gol no podébanos aturar un inte en os nuestros posiellos, blincábanos, chilábanos... y si a la fin ganábanos empezipiaba una fiesta chenuina en a casa an nos ébanos achuntau, que dimpués continaba por as chiquetas carreras sin de gudrón, fendo partizipes a toz os que i trobábanos d’o nuestro enfuelgo. Yo creigo que ixe bico nuestro, en ixas epocas, yera un chiquet reino d’a felizidá.

Cal reconoxer que, de chicorrons, yéranos nusatros en ixe barrio d’os Paretons tarcual rabalers, enredadors, dolens. De todas trazas, a chen mayor no teneba que endurar guaire o nuestro fastioso petenar; bi eba encara eras y ortals, dembas y terrenos buedos a o canto d’as casas. As yayas nos mandaban a muir cardelinas, y nos diziban que marchásenos enta puestos sin de chen a dar murga. Y nos n’íbanos sin rispostiar cosa, sin fer espazenziar a las buenas mullers, porque ixo sí, en aquels tiempos os ninos tenébanos respeto a la chen ya dentrada en años.

As ninas d’o bico, allora, no teneban dengún interés por o fútbol, ni martiriziaban a dengún pobre mixiner, ni feban espazenziar tanto a la chen gran, ni discurriban de contino a prosima barrabasada. Más bien bibiban en un mundo prou más intimista, con os suyos chuegos más tranquilez, más zibilizatos, con uns unibersos más complexos, plenos d’una fantasía más sotil.

Pasaban as añadas. Os mozez rezebíbanos una educazión concreta, y as mozetas una atra, prou esferenziata. A yo me siguiban cuacando as cosetas que se suposa que han de cuacar a os ombres, teneba la güellada y l’autitú que parexeba que eba de tener un ombre en tantismas cuestions. Anque bella coseta en o mío interior se'n yera bochando, chino chano. Sí, como un exemplo ta zitar, me siguiba cuacando asabelo lo fútbol, pero ya s’eba esbafau cualsiquier siñalín d’euforia esterior cuan o mío equipo ganaba bel partiu. Y ya eba rematau toda muestra de gusto por os exerzizios de cuasi-bandalismo. Agora m’aturaba con as biellas en os carasols, me cuacaba muito sentir as suyas charradas en castellano-aragonés. Y si bella begada me trobaba con bel gataz biello, rezebiba las mías morisquetas, ya no caleba que fuyise abentau por as barderas.

Y poquet a poquet, m’iba retantando más ixe mundo complexo, pleno d’as colors d’un machico caleidoscopio, que podería pensar-se que no yera de yo, ixe mundo suposadamén femenino que perén aguaitaba dende luen. Sí, yo yera un ombre-ombre (se diz asinas, creigo) , m’eban educato ta priorizar una parti d’o mío ser y amagar-ne una atra, pued’estar muito más interesán, a parti femenina que tot ser umano tien; manimenos poquet a poquet iba descubrindo ixa parti, contemplando toz os suyos cantons y ariestas, balurando tota la suya parti funda, pero tamién os suyos aspectos más ludicos, incluso os más topicos.

Con o tiempo a mía sensibilidá se’n ye ida en buena parti enta ixe país que suposadamén no yera lo de yo. Ye posible que ni tan sisquiera siga o mundo reyal d’o femenino, ye posible que siga o mundo ideyal d’o femenino que toz lebamos dentro. Igual tiene, a mía bida se’n ye ida desplazando a bonico, a begadas con prous treballos y retizenzias, enta un mundo ta o que no se m’educó, y que agora aimo.

O fútbol, por zierto, ye un espectaclo que ziertamén puede ser marabilloso, pero quedo perplexo yo mesmo cuan ya ni tan sisquiera me preocupo por os resultaus d’os partius d’o mío quiesto equipo de nineza. U constato cómo as motos u os autos no me faszinan como un ocheto de culto u estatus, u cómo no me cuaca cosa dengún chuego u actibidá an interbienga la biolenzia. U cómo, en literatura y atras muitas cosas, me seduze una determinada bisión que muitas begadas ye espresata con una boz femenina.

¡Á! Y me cuacan muito a estetica, y as rebistas femeninas. Y os perfumes, y l’aromaterapia. ¡Cómo puede cambear tot con o tiempo! ¡Cómo ha cambeato aquel nino que marchaba con a suya colla d’amiguicos enta las eras ta chugar, dimpués d’aber estau carrañau _y con razón_ por as biellas bestidas de negro! Aquella infanzia mitica... con as suyas milenta olors. Ricuerdo a la mía chirmana chiqueta, en a suya cambreta feita de poesía, en as suyas carreras feitas de poesía, en o suyo Nadal iluminato. Ricuerdo cómo no replecaba guaire o suyo mundo pleno de sotilezas. Sí, ¡cómo puede cambear tot con o tiempo!

Chuan Chusé Bielsa