Skribitaj Pensoj

Nova libro en hispana lingvo

2009-12-06T14:18:00.019-05:00

La ĵus pasintan unuan de Decembron estis lanĉita en la kolombia ĉefurbo, Bogoto, nova libro¹, kun titolo: "Jaque al terror - Los años horribles de las FARC" ("Ŝakigo al Teruro - La hororaj jaroj de FARK"). Temas pri verko skribita far la kolombia eksministro pri defendado —kaj nun kandidato al prezidenteco— Juan Manuel Santos.

En la 1990aj jaroj, la minaco de la krima grupo FARK kontraŭ la kolombia socio ŝajnis nehaltigebla. Post kunsidoj pacocelaj dum la regado de Andrés Pastrana Arango (1998-2002), nesukcesaj pro la cinika konduto de la krima grupo, la nova prezidento, Álvaro Uribe Vélez, estis ricevita en 2002 kun granda espero far la kolombia popolo pro lia senhezita decido batali la terorisman grupon per sia sekurecpolitiko "Demokratia Sekureco". Dum la du sinsekvaj prezidentecoj de Uribe, ekde la jaro 2002 ĝis nun, post tri aliaj ministroj de defendado, la plaj sukcesa tempo en la lukto kontraŭ la menciita krima grupo estis tiu sub la ministreco de Juan Manuel Santos Calderón (2006/07 - 2009/05).

La libro rakontas la travivaĵojn de Santos kiel gvidanto de la nacia defendado kaj, ekzemple: kiamaniere dum lia 3-jara periodo falis tri el plej gravaj membroj de la sekretariejo de FARK (ekzemple: Operaco Fenikso) plus kelkaj estroj de ĝia financo, la sukcesa trompo por liberigo de ostaĝoj (Operaco Ŝakigo), la multaj batalantoj de la grupo kiuj decidis ĝin forlasi akceptintaj kampanjon de la registaro por reeniri la civitanan vivon. ktp.

Resume, la libro pritraktas kiamaniere la kolombia armeo portis la kriman grupon al la plej malbona momento de ties ekzisto, al stato horora por ties membroj.

La prologon de la libro skribis la meksikia verkisto Carlos Fuentes.

Vere, mi aĉetos la libron dum la semajno kiu nun komenciĝas.

¹ Santos, J. M. Jaque al terror: Los años horribles de las FARC,
352 paĝoj, Eldonejo Planeta → kolombia filio, Bogoto, 2009,
[ISBN: 9789584223029]

Forgesita datreveno !

2009-12-04T13:35:00.005-05:00

La pasintan 28an de Novembro mi forgesis skribi blogafiŝon por celebri akurate la 5-jaran datrevenon de tiu ĉi blogo, kiel mi faris plurfoje kiam tiudate plenumiĝis nova jaro.

Ja, la 28an de Novembro de la jaro 2004 mi komencis mian blogadon per simpla salutmesaĝo.

Kiam mi pensas pri tempopaso, mi opinias ke kiam ni pensas pri tiuj jaroj nur kiel plimalpli abstraktaj nombroj —kiel kutime ni faras— ni ne bone perceptas la daŭron. Kaj mi pensas ke tial estas utile, por plenpercepti la signifon de iu daŭro, kompari tiun daŭron kun fenomenoj aŭ procezoj kiuj estas konataj far ni, kompreneble, je skalo akorda kun la pritemata daŭro-tempo. Do, ekzemple, por la ĝisnuna daŭro de mia blogo, imagi ke iu naskiĝis la tagon kiam mi komencis blogi, ŝi estus hodiaŭ infanino 5-jara. Signifa aĝo tiu de mia blogo :)

Venonta nesukceso pri la monda klimato

2009-11-29T18:16:00.014-05:00

Far: Bruce Bueno de Mesquita, Revuo Foreign Policy, Nov. 2009, p. 77. (ankaŭ trovebla en La Reto)
Tradukinto el la angla: Luis Guillermo Restrepo Rivas.
[Nur komencaj resumaj alineoj de la artikolo]

« Ĉu vi volas scii kio okazos pri la klimatŝanĝiĝo?
Estas la mondo renkontiĝonta ĉi tiun Decembron ĉe la Kopenhaga pintokunveno, aŭ ĉe iu estonta dato, kaj forigonta laŭregule sufiĉon da forcejo-efikaj gasoj kiuj estas varmiĝantaj la planedon por varmigi la koron de Al Gore?

Mi ne estas sciencisto pri klimato, sed mi estis faranta miajn proprajn kalkulojn, kaj mi povas diri al vi la respondon: Verŝajne ne. Malgraŭ la ekscitiĝo, la konferenco pri klimatŝanĝiĝo de la U. N. en Kopenhago estas destinata al malsukceso. Jen kio okazos anstataŭe:

Dum la venontaj pluraj jardekoj, la mondaj gvidantoj alprenos normojn pri emanoj pli rigorajn ol tiuj proponitaj —kaj plejparte ignoritaj— en la Protokolo de Kioto de 1997. Sed vera subteno por pli forta regularo falos. Ĉe la jarcentomezo, la devigaj normoj pri emanado ekzistontaj estos multe sub tiuj fiksitaj en Kioto, malproksimaj de la celoj por karbon-dioksido kaj aliaj forcejo-efikaj gasoj metitaj por pridiskuto far mondaj gvidantoj en Kopenhago. Kaj ĉe la tempo kiam 2100 disvolviĝos, la politika volo por pli fortaj regularoj estos sekiĝinta preskaŭ tute.
La kialoj estas multaj, sed ili sumiĝas jene: La hodiaŭaj emerĝantaj povoj kiel Brazilo, Barato, kaj Ĉinio simple ne toleros gravajn limigojn de siaj emanoj, kaj la homamaso favora al reguligo en Usono kaj Eŭropo ne estos sufiĉe forta por altrudi ties manojn.»

Datreveno morgaŭa: 45 jarojn ekde eliro de Mariner 4a

2009-11-27T13:23:00.010-05:00

La 28an de Novembro de 1964 okazis la lanĉon de la usona sondilo Mariner 4a, kiu atingis mejloŝtonon en la kosma esplorado kiam, la 14an de julio de 1965, sukcese alproksimiĝis ĝis malpli ol dek mil kilometroj de la surfaco de la planedo Marso, pri kiu atingis fotojn kaj diversajn mezurojn per registriloj (i. a.: magnetometro, kaptiloj por pulvoro kaj plasmo, teleskopo por kosma radiado, jonigo-ĉambro, kaj Geiger-mezurilo).

Kvankam ankaŭ la tiama Sovetunio sendis sondilojn cele al Marso (sondiloj "Марс" (Mars)) ekde 1960, neniu el ili sukcesis atingi tian proksimecon.

Tamen, Mariner 4a nur alproksimiĝis al la planedo. La unua sondilo kiu orbitis Marson estis Mariner 9a, lanĉita la 30an de majo de 1971.
La unua sondilo kiu suriĝis milde en la surfacon de Marso estis Viking 1a, la 20an de junio de 1976, lanĉita la 20an de Aŭgusto de 1975. Kvin jarojn antaŭe —kaj 38 jarojn antaŭ hodiaŭ— la 27an de Novembro de 1971, la sovetunia Mars 2a estis klopodanta fari suriĝon tian, sed frakasiĝis kontraŭsurfacen je 6 km/s.
Kaj la unua sondilo kiu trairis sur la surfaco de Marso estis Sojourner (Misio "Mars Pathfinder"), lanĉita la 4an de Decembro de 1996.

Kaj nun la genaro de maizo

2009-11-24T18:14:00.003-05:00

Interesa scienca novaĵo raportiia lastatempe (anglalingva revuo Science, 2009.11.20) estas la vicrivelado pri la genaro de maizo. La baza tasko estis eltrovi la situojn de pli ol 32000 genoj de maizo (subspecio nomita B73).
La esploro por vicrivelado, 15-jara ĝis nun, estas apogita per interesiĝo de la usona Nacia Asocio de Maizo-kultivantoj, esprimita en 1994.

Krom la esploristoj kiuj atingis la vicriveladon, ankaŭ pluraj aliaj esploristaroj tuj prilaboras interesajn malkovrojn rilatajn; ekzemple, unu grupo komparis la genvicon de la maizo B73 kun tiu de subspecio EDMX 2233 (konata en Meksiko per la hispanlingva nomo Palomero Toluqueño) kaj trovis genajn efikojn de selektiva kultivado far la homo.

Ne nur estas interesa la afero, kaj la ekspluatado de la novaj scioj, pro la graveco de maizo kiel nutraĵo kaj kiel fonto de biobrulaĵo, sed, ankaŭ la sperto kaj teknikoj uzitaj por la esplorado de ĝia genaro, utilos por venontaj similaj atingoj pri tritiko kaj hordeo, i. a.

Ho, Kiel pasas la tempo!

2009-11-23T13:39:00.006-05:00

Antaŭa blogafiŝo pri tiu eksprezidento:

La najbara frenezulo kontraŭ la nuboj

2009-11-18T22:30:00.003-05:00

Ekde serendipa informiĝo al teleologia informiĝo

2009-11-16T12:54:00.015-05:00

Mi pensas ke la plej grava ŝanĝo en la maniero kiel ni informiĝas pri afero en la ĉiutaga vivo, ŝanĝo kiu evidentiĝas per Interreto, estas la pasado ekde informiĝo serendipa (= hazarda, ne specife serĉita) al informiĝo teleologia (= vole serĉita kun iu celo).

Ekzemplo de la unua estas kiam vi legas ĝeneralinteresan sekcion de ĵurnalo, eble ĉar foje en ĝi aperas informoj interesaj por vi —tamen, povas okazi ke hodiaŭ nenio el ĝia enhavo interesas vin—. Feliĉe, dum via foliumado aperas artikolo pri la kuraciva efiko de iu frukto sur iun malsanon, kaj tio vekas en vi sufiĉan interesesiĝon por ĝin legi.

Tiel, via penso kelkgrade estas stirita ne far via volo sed far la komunikilo, ĉar estis la ĵurnalo (la intereso de la verkinto) kiu faris ke vi pensu pri iu frukto kaj iu malsano.

Nun, imagu ke en iu medio/komunikilo (Interreto estas la plej proksima al ĉi tiu idealaĵo) ekzistas ĉiuj informoj kiujn iu homo dezirus prilerni, kaj ke vi havas facilan, malmultekostan, kaj tujan aliron al tiu riĉega medio. Tiam, kvanta diferenco fariĝas kvalita diferenco (kiel ofte okazas kiam iu kvanto varias grandskale). En tiu ĉi situacio, antaŭ preskaŭ senfinaj temoj, eblecoj de informiĝo, estas vi kiu devas elekti, laŭvole, la temon pri kiu vi informiĝos. Vi devas fiksi prioritatojn pri la temoj, por ne perdiĝi sencele.

Informiĝo antaŭ multegaj ebloj, similas al agado, antaŭ multegaj eblaj agoj, kaj tial mi finas tiun ci blogafiŝon per citaĵo el la libro Mastery ("Majstreco"), far George Leonard, paĝoj 128-129:

« Fiksu viajn prioritatojn:
Antaŭ ke vi povas uzi vian potencialan energion, vi devas decidi kion vi faros per ĝi. Kaj faranta iun ajn elekton, vi alfrontas abomenan fakton: moviĝanta en unu direkton, vi devas rezigni ĉiujn ceterajn. Elekti unu celon estas forlasi tre grandan nombron de aliaj eblaj celoj. Amiko mia, dudeknaŭ-jara kaj ankoraŭ serĉanta celon en la vivo, diris: "Nian generacion oni edukis kun la ideo teni niajn elekteblojn malfermataj. Tamen, se vi tenas ĉiujn viajn elekteblojn malfermataj, damne! vi ne povas fari ion" Estas problemo: Kiel povas iu elekto, iu celo, egaliĝi kun la eblecoj enhavataj en ĉiuj ceteraj?
Ĉi tiu maltrankviliga ekvacio koncernas ĉion ekde vivdaŭraj celoj al tio kion vi faros en la sekvontaj dek minutoj. Ĉu vi purigos tiun senordan vestoŝrankon aŭ vi komencos legadi tiun novan libron aŭ vi skribos tiun leteron? Luksa vivstilo orientita al konsumado multobligas la elekteblojn kiujn vi alfrontas. Televido faras tion eĉ pli komplika. Per propono de senfinaj eblecoj, ĝi tentas vin elekti neniun, sidi fiksrigardanta en senfina perplekso, komatiĝi. Hezitemo estigas neagadon, kio estigas malaltan energion, melankolion, malesperon.
Fine, liberiĝo venas per la akcepto de limoj. Vi ne povas far ĉion, sed vi povas fari unu aferon, kaj poste alian kaj alian. Koncerne energion, preferindas fari malĝustan elekton ol neniun. Vi povus komenci per listigo pri viaj prioritatoj — por la tago, por la semajno, por la monato, por la vivdaŭro. Komencu modeste. Listigu ĉion kion vi volas fari hodiaŭ aŭ morgaŭ. Fiksu prioritatojn disigante la erojn laŭ kategorioj A, B, kaj C. Almenaŭ, plenumu la erojn A. Provu la samon kun longatempaj celoj. Prioritatoj ŝanĝiĝas, kaj vi povas ŝanĝi ilin iam ajn, tamen la simpla registro pri ili en nigro kaj blanko aldonas klarecon al via vivo, kaj klareco kreas energion.»

La libreton de S-ro Leonard mi rekomendas, ĝi estas nun elŝutebla [PDF] el:
- Mastery.

Ĉu Pi estas 4 anstataŭ 3.14159... ?

2009-11-14T11:39:00.005-05:00

Estu cirklo kun diametro D=1, al kies rando estas tanĝanta la lateroj de cirkaŭanta kvadrato.
Do, la perimetro de la kvadrato estas 4xD=4.
Nu, transformu ni la 4 angulojn de la kvadrato, konservante iliajn ortecojn, kiel movante internen segmentojn A kaj B. La perimetro restas 4.
Daŭrigu ni la saman procedon kiel montras la bildo. La perimetro daŭre restadas 4.
Ĉe la limo, la antaŭa perimetro de la kvadrato samas al la circkla perimetro, kaj ĝi estas 4: Do, Pi=π, rilatumo inter la perimetro de cirklo kaj ties diametro estas 4.

Vi facile komprenos ke per la sama procedo eblas montri ke: En ortangula triangulo, la hipotenuzo estas egala al la simpla sumo de la du katetoj, malsimile ol la Pitagora Teoremo

La ŝajne simpla pasado ĝis la (nefinia) limo [→ ∞] estas io atentinda zorgeme, kiel en la paradokso pri Akilo kaj la testudo.

Ni devas gardi nin pro danĝera frenezulo najbara

2009-11-12T13:12:00.008-05:00

Humuro por la 11a de Novembro

2009-11-11T13:25:00.004-05:00

Plia duakta teatraĵo de Hugo Chávez

2009-11-09T19:05:00.006-05:00

Claude Lévi-Strauss

2009-11-08T13:37:00.006-05:00

La pasintan 30an de oktobro mortis Claude Lévi-Strauss.
Kompreneble, pri tio en la amaskomunikiloj (kiel -mi rememoras- okaze de la morto de Peter Ducker en novembro de 2005) ne estis tiom da bruo kiel okaze de la morto de Michael Jackson.

Claude Lévi-Strauss, unu el plej grandaj intelektuloj de la 20a jarcento, estis Franca antropologo kies laboro en etnologio estigis la evoluadon de strukturismo kiel metodo por kompreni socion kaj kulturon. Li naskiĝis en juda intelektulara familio en Bruselo, Belgio, en 1908. Lia patro estis artisto.

Lévi-Strauss studis leĝon kaj filozofion ĉe la Universitato la Sorbonne en Parizo. Li tiame instruis en mezlernejo. En 1935, li aliĝis al Franca kultura misio irante al Brazilo kiel vizitanta profesoro ĉe la Universitato de San-Paŭlo, kie li instruis de 1935 ĝis 1939. Dum ĉi tiuj jaroj, li faris kelkajn ekspediciojn en la Amazonan pluvarbaron por fari gentoesploran kamplaboron. En 1939, Lévi-Strauss revenis al Francio por helpi en la penado de la Dua Mondmilito, sed li fuĝis al NovJorko post kiam Francio estis invadita far Germanio. Dum la cetero de la milito, li instruis en la Nova Lernejo por Socia Esplorado, kie li formis profesiajn rilatojn kun Franz Boas kaj Roman Jakobson.

Lévi-Strauss revenis al Parizo en 1948. Li ricevis doktorecon de la Sorbonne post kiam li proponis kiel liaj tezoj "La Familio kaj Socia Vivo de la Nambikwaraj Indiĝenoj" kaj "La Elementaj Strukturoj de Parenceco". Tiu ĉi lasta laboraĵo estis publikigita en 1949 kaj tuj priaklamita kiel grava kontribuaĵo al antropologio de parenceco. En 1959, li akceptis la katedron pri socia antropologio ĉe la Supera lernejo de Francio (Collège de France). Ĉirkaŭtiame li eldonis la verkon "Struktura Antropologio", kolekton de eseoj pri strukturismo. Li ankaŭ klopodis evoluigi antropologion kiel studobjeko en Francio per kreo de studlokoj tiutemaj, interalie la Laboratorion por Socia Antropologio. Ĉi tiu estis ankaŭ la hejmo de la revuo "L’Homme", kiu eldonadis antropologiajn esplorojn.

Lévi-Strauss estis elektita en la Francan Akademion en 1973. Li ricevis la Premion Meister-Eckhart por Filozofio en 2003.

Lévi-Strauss aplikis strukturan analizon al studo mitologio. Li provis respondi la demandon pri kial mitoj el la tuta mondo estas tre similaj. Li trovis la respondon ne en ilia enhavo sed en ilia strukturo.

La heredaĵo el li inkluzivas lian teorion pri kiel laboras la homa menso, kio povus esti lia plej grava scienca kontribuaĵo. Li argumentis ke homoj progresas ekde natura stato al kultura stato ĉar ekzistas leĝoj aŭ mekanismoj en siaj cerboj. Tio signifas, ke homoj vere ne posedas liberan volon sed ke ili estas la produktoj de mekanikaj evoluaj fortoj.

—————
Fonto anglalingva:
Birx, H. J. (eldonisto): Encyclopedia of Anthropology, ISBN 0761930299, Eldonejo Sage, 2006, paĝoj 2137-2138.

Dek jarojn poste

2009-11-07T13:12:00.013-05:00

Hodiaŭ mi pubilikigas artikolon far S-ro Fernando Londoño Hoyos, kolombia advokato kaj eksministro pri ŝtato kaj justeco.

DEK JAROJN POSTE
Far: Fernando Londoño Hoyos
[Tradukita en Esperanton far Luis Guillermo Restrepo Rivas]

« Malantaŭe restas la senfinaj paroladoj, la malĝentilaĵoj, la neklaraj promesoj kaj la blankaj mensogoj. Dek jarojn post la inaŭguro de Hugo Chávez kiel prezidento de Venezuelo, al la popolo restas nur fronti sian ruinigan realaĵon.

Tiu elementa streĉo de kritika konscio devus esti farita antaŭlonge. Sed la amasoj flamiĝintaj en la stratoj pensas malmulte. Longe antaŭ Chavez, tion eltrovis Mussolini kaj Hitler, tiuj du mastroj nesuperitaj pri la arto pritrakti tumultojn.

La psikologio de homamasoj estas entuziasmiga fako de politika scienco. Ĉar malfacilas kompreni ke riĉa popolo toleru sian trenadon al la keletaĝo de mizero sen provi proteston, sen lasi eĉ registron.

Sed tiel okazas la aferoj. Inter vakuaj paroladoj kaj histrionaj grimacoj, Fidel Castro portis la kubanojn ĝis la randon de senhaveco kaj tion rimarkis nur tiuj kiuj kuraĝis spiti la danĝerojn de furiozanta maro prefere ol elporti la deliraĵojn de abomeninda megalomaniulo.

Sed nun nia afero estas la Venezuelo de Hugo Chávez. Tiu, kiu nur havis spacon por aŭdi paroladojn de la plej malbona gustumado, vesti sin per ruĝaj ĉemizoj kaj kriegi sloganojn kontraŭ la satanisma imperio, kontraŭ la riĉuloj, kontraŭ la pastroj, kontraŭ la najbaroj, kontraŭ ĉiuj. Kio restas finfine?
Nu io simila kiel kutime. Se en unu el siaj finaj pedagogiaj penoj Castro instruis la kubanojn pri la uzo de riza kuirpoto, tiu lasta novaĵo el ĝia groteska teknologio, Chávez devigiĝis instrui kiamaniere bani sin en tri minutoj.
Kompreneble ke ne ekzistas akvo. Ĉar dum dek jaroj ne estis loko por konstrui akvo-rezervejojn kie konservi ĝin por la someroj antaŭvideble longaj. La kvazaŭ-senfinaj naftaj rimedoj foriris por apogi balotadojn de kundiboĉuloj, por konsenti ŝtelojn far la "Boli-burĝaro" kaj por neimagebla karnavalo de nekompetenteco kaj neefikeco.

Tamen ian konsolon devas havi la venezuelanoj. Okazas ke ilia angoroo ne limiĝas al manko de akvo por sin bani, sed ke ankaŭ ili ne havas elektron por laborado, por kuirado, por alfronti la neelteneblan varmon per iom da klimatizo. Ĉar la lando plej riĉa je nafto en la tuta kontinento, mankante akvo, ankaŭ ne konstruis termoelektrajn centralojn. Nek akvo, nek elektro. Tio estas la perfekta kombino de malbonaĵoj por malesperigi iun ajn, sed precipe la simptomo de terura bilanco de ĉi tiu anstataŭigo de publika administra sistemo per la komunisma folkloro reganta.

Nehavante akvon por sin bani nek elektran energion por supervivi en ĉi tiu jarcento de industriigo kaj teknologio, venezuelanoj havos tempon por mediti kion okazis al ili. Kaj ili rimarkos kun hororo ke sia nafto-produktado estas plonĝinta. Ke siaj havenoj, siaj ŝoseoj, siaj flughavenoj estas tiuj samaj de dek jaroj antaŭe, sed dek jarojn pli maljunaj. Ke tiu sia estas la lando kun plej alta inflacio en Ameriko kaj la vivtena kosto fine sufokos ilin. Ke ili jam produktas nenion kaj devas aĉeti ĉion se ili ne volas vidi malplenajn la bretojn de siaj vendejoj. Ke el siaj internaciaj monrezervoj nenion restas, kaj el tiom multe da blufado nur aperas en la bilanco ultrasonaj aviadiloj kiuj ne utilas por kapti la ŝteliston, la rabiston, la pasantan murdinton, kiuj estas la solaj veraj malamikoj en ĝia drameca perspektivo de aferoj.

Venezuelo estas vekanta el sia longa inkubo. Kaj eĉ ene de la simpleco de la ĉavez-ismaj homamasoj, ili komprenos ke mankas akvo ne pro naĝo-basenoj de riĉuloj, kaj energio ne pro klimatizo de butikaroj. Kaj ili eltrovos ke dum ili kriegis surstrate oni prirabis sian tutan landon, la plej riĉa de tiu ĉi Ameriko.»

—————
La Hora de la Verdad, Ĵaŭdo 5a de novembro de 2009
Ligiloj:
Originala hispanlingva artikolo:[ 1 ]
En la blogo de la venezuela ĵurnalistino Martha Colmenares:[ 2 ]
En la blogo Viva Venezuela Libre:[ 3 ]
En la blogo Debate Nacional - Desarrollo:[ 4 ]

Iomete pri demokratio

2009-11-04T12:26:00.007-05:00

En blogafiŝo de Beĉjo, mi legis:
"... ekzistas diversaj argumentoj favore al demokratio kiel pli efika regada metodo kompare al aliaj formoj de la socia regado."
Mi intencis skribi komenton, pri tiu aserto, tamen mi ne sukcesis (mi ne scias kial la komento ne aperis), do mi decidis skribi tie ĉi.

Mi opinias ke demokratio eble havas plurajn virtojn, aŭ avantaĝojn kompare kun aliaj formoj de socia regado, tamen ke "efikeco" ne estas unu el tiuj avantaĝoj. Mi opinias ke "libereco" de la socianoj estas ja virto de demokratio, kaj ke precize pro tio, tiu sama libereco —danke al kio multaj opinias, partoprenas kaj intermetiĝas en decidoj malfruigante ilin— sapeas efikecon, malhelpas ĝin. Tiel, ekzemple diktaturo, pro ĝia unueco (eĉ se perforta unuecigo, nelibera) estas pli efika ol demokratio por atingi celon.

Mi kredas ke la efikeco de demokratio devas esti eble mezbona, pro la proksimuma konsisto de la kvalitoj de la socianoj:

Mi opinias ke alia "virto" de demokratio estas ke ĝi klopodas kontentigi plimulton el la socianoj —kio ankaŭ, flanke, ne helpas veran efikecon por atingi celon.

Kvar monatoj da eksprezidenteco

2009-10-28T13:16:00.009-05:00

Hodiaŭ mi rememoras sinjoron Manuel Zelaya.
Ĉu vi rememoras pri li?
Li estis prezidento de Honduro —tiu kun ĉapelo— kaj hodiaŭ li kompletigas kvar monatojn kiel eksprezidento.

Kiam aperis Esperanto

2009-10-21T12:25:00.053-05:00

En julio de 1887, Zamenhof publikigis sian lernolibron pri Esperanto.

Ankaŭ en julio naskiĝis la fizikisto Gustav Hertz (nevo de Heinrich Hertz), kaj almenaŭ du gravaj pentristoj: en Belorusio, Marc Chagall, kaj en Francio, Marcel Duchamp.

Tri monatojn antaŭe, Helen Keller, tiam 7-jara, ekkomencis superi siajn blindecon kaj surdecon, helpe de Anne Sullivan. Ankaŭ tiam en Usono naskiĝis Leonard Bloomfield, grava lingvisto.

Tiam, Maria Skłodowska (poste Marie Curie), naskita en Varsovio, estis junulino preskaŭ 20-jara kaj laboranta kiel privata instruistino de infanoj.
Antoni Grabowski, pola inĝeniero pri kemio, 30-jara, poligloto, eklernis Esperanton kaj fariĝis verkanto en la nova lingvo. Ankaŭ 30-jara estis Konstantin Ciolkovskij, pioniro de raketoj kaj kosmonaŭtiko. La pola verkisto Henryk Sienkiewicz estis 31-jara, same kiel Sigmund Freud. La pola kuracisto kaj pedagogo Janusz Korczak estis infano 10-jara, kaj la pola logikisto Jan Łukasiewicz, estis 8-jara, preskaŭ samaĝa kiel Albert Einstein.

La sekvantan monaton, en Vieno, naskiĝis Erwin Schrödinger, kiu estis disvolvonta ondo-mekanikan formon de kvantuma mekaniko.

Tri monatojn post la apero de la libro, mortis la 63-jara fizikisto Gustav Robert Kirchhoff, dum en Usono, la 25-jara sinjoro Dorr Eugene Felt atingis patenton pri sia komputilo "Comptometer"; en Ĉinio naskiĝis la fama milita kaj politika estro Ĉiang Kai-ŝek, kaj en Svislando, Charles-Édouard Jeanneret-Gris, kiu estis konota kiel la arkitekto Le Corbusier.

Kvar monatojn post la apero de la libro, naskiĝis angla aktoro, kiun la mondo konis kiel Boris Karloff, dum en Germanio naskiĝis Erich von Manstein, granda strategiisto de Hitler dum la dua mondmilito.

Ankaŭ en 1887:

La rezultoj de la eksperimento de Michelson kaj Morley, farita en julio, estis publikigataj, verŝajne pruvantaj ke la rapido de lumo estas sendependa de moviĝo, kion interpretas la Speciala Relativeco de Einstein.

La fizikisto Heinrich Hertz, tiam 30-jara, rimarkis ke elektre ŝargita objekto perdas ŝargon pli facile se ĝi ricevas ultraviolan lumon, kaj publikigis siajn rimarkojn pri fotoelektra efiko kaj produktado kaj ricevo de elektromagnetaj ondoj en la revuo Annalen der Physik.

Emile Berliner, 35-jara, atingis patenton pri la gramofono, kaj Adolf Eugen Fick, germana fiziologo 59-jara, elpensis la kontaktlenson (malmolan; poste la molan faris Otto Wichterle).

Friedrich Wilhelm Nietzsche, 42-jara, publikigis verkon Zur Genealogie der Moral (Pri la genealogio de l' moralo) kaj novan eldonon de Die fröhliche Wissenschaft (La ĝoja scienco) kun aldona kvina parto.

Kulturhistoriisto Victor Hehn publikigis verkon "Gedanken über Goethe" (Pensoj pri Goethe), legota far Nietzsche, kiu trovas en ĝi konfirmon por iuj siaj antaŭe esprimitaj opinioj.

La skota verkisto Arthur Conan Doyle, 28-jara, publikigis sian unuan novelon pri Sherlok Holmes: A Study in Scarlet (Studo en Skarlato)

Oni publikigis (post lia morto en 1882) la membiografion de Charles Darwin, kion li verkis en 1876.

Friedrich Engels, 66-jara, publikigis sian verkon Anti-Düring, kritika verko pri la penso de Eugen Karl Dühring, kaj akorda kun la penso de Karl Marx.

Bertrand Russell estis junulo 15-jara, dum sia iela kolego Gottlob Frege, estis 38-jara (kaj jam pasis 8 jarojn ekde la publikigo de sia Begriffsschrift (Konceptskribo)).

La hispana (katalunia) arkitekto Antoni Gaudí, 35-jara, faris la unuajn plandesegnojn por la Palau Episcopal d'Astorga (Episkopa Palaco de Astorga, en Leono, Hispanio).

La franca poeto Arthur Rimbaud, 32-jara, estis loĝanta en nordorienta Afriko.

La hispana Santiago Ramón y Cajal, tiam 35-jara, malkovrinto de la interŝalta morfologio de neŭronoj, lasis sian profesoran dungon en la urbo Valencio kaj ekinstruis en la Universitato de Barcelono.

Aleksandro Uljanov, la plej maljuna frato de Lenin (Vladimir Iliĉ Uljanov), estis ekzekutita pro lia partopreno en komploto celanta mortigi la rusan caron Alexandron la 3-a.

Naskiĝis en Usono Conrad N. Hilton, kiu estis fondonta la hotelaron kiu portas sian familinomon "Hilton", kaj praavo de Paris Hilton.

En Londono naskiĝis la biologo kaj verkisto Julian S. Huxley, frato de Aldous Huxley.

Naskiĝis en Italio la kristana pastro Sankta Pio el Pietrelcina.

Naskiĝis en Hindujo, la mirinfano Ramanujan (Srinivasa Aiyangar Ramanujan), matematikisto kun elstara menskapablo por nombroteorio kaj rilataj fakoj de matematiko.

En Brazilo naskiĝis Heitor Villa-Lobos, fama komponisto.

Naskiĝis en Japanio Ĉuiĉi Nagumo, admiralo de la imperiestra maristaro, kiu komandis la atakon kontraŭ Pearl Harbor dum la dua mondmilito.

Mortis la rusa kompinisto Aleksandr Borodin.

La rusa komponisto Nikolaj Rimskij-Korsakov verkis Каприччио на испанские темы ("Kapriĉo pri hispanaj temoj", aŭ simple "Kapriĉo Hispana").

Ekfunkciis en Berlino, Germanio, la "Physikalisch-Technische Reichsanstalt" (Fiziko-Teknika Imperia Instituto), iniciata i.a. far Werner von Siemens kaj estrata far Hermann von Helmholtz: Unua "nacia laboratorio", poste imitata en Usono ("National Bureau of Standards"), Britio ("National Physical Laboratory"), kaj aliaj landoj.

La rusa verkisto Anton Ĉeĥov ricevis Puŝkin-premion (memore de Aleksandr Puŝkin) pro sia verko "В сумерках" ("Ĉe krepusko").

Guy de Maupassant verkis "Le Horla" ("La Horlo"), kiu montris lin kiel majstro de hororaj rakontoj.

Naskiĝis la poeto kaj diplomato konata kiel Saint-John Perse (vera nomo: Marie-René-Auguste-Alexis Saint-Léger.

La itala verkisto Luigi Pirandello komencis studadon en la U. de Palermo (tiame U. de Romo)

Naskiĝis en Salcburgo, Aŭstrio, la poeto Georg Trakl.

La marksisto Karl Kautsky publikigis du verkojn: biografion pri F. Engels kaj alian pri la ekonomia principaro de Karl Marx, verko kiu fariĝis la norman enkondukon tiuteman.

Émile Zola publikigas "La Terre", malgaja portretado de kamparana vivo en Francio.

En Londono, dum la aŭtuno de 1887 senlaboruloj marŝis plende, la registaro malpermesis tiajn marŝojn kaj kontraŭstaris ilin per la polico, okazis la t. n. "Sanga Dimanĉo" la 13an de Novembro.

Augustus Desiré Waller, brito, publikigis unuajn rezultojn de sia sistema esploro pri la elektra agado en la koro, per signaloj prenita el la surfaco de la korpo per elektromezurilo inventita far Gabriel- Jonas Lippmann, tio estis komenco de la evoluado de elektrokorregistriloj.

En Litovio naskiĝis Reuben Leon Kahn, kiu elpensis ekzamenon pri sifiliso, surbaze de antaŭa far August von Wassermann.

En Pollando (tiam rusa) naskiĝis Samuel Warner, kiu adaptos sonregistradon al bild-filmoj, kaj kune kun siaj fratoj Harry, Albert kaj Jack, faris kompanion Warner Bros. (Fratoj Warner) por kino-produktado.

La Franca mararmeo finkonstruis la ŝipon Sfax, sian unuan protektitan krozŝipon de 4560 tunoj.

Mortis la eminenta ĉilia maramea oficiro kaj heroo Carlos Arnaldo Condell, en kies memoro pluraj chiliaj ŝipoj portas lian nomon.

Emile Durkheim, fondinto de akademia sociologio en Francio, estis nomumata unua lekciisto pri "socia scienco kaj pedagogio" en Franca universitato, ĉe Bordeaux.

Woodrow Wilson (estonta prezidento de Usono) publikigis en Junio influhavan skribaĵon "La studo de administrado", kie li argumentis ke politiko kaj administrado povus kaj devus esti disigataj, kaj ke tiel administrado povus esti analizata kaj efektivigata en maniero plene scienca.

Naskiĝis Charles Richard Fairey, fondonto de kompanio Fairey Aircraft, fabrikanto de militaviadiloj, kiel la Fairey Swordfish (Spadfiŝo) kiu en la dua mondmilito atakis la germanan batalŝipon Bismarck kaj sukcese partoprenis en la Batalo ĉe Taranto.

Julius Hirschberg, fama germana okulkuracisto kaj historiisto pri kuracado, publikigis vortaron "Wörterbuch der Augenheilkunde", pri okulkuracado.

Theodore Roosevelt publikigis biografian verkon: "Life of Thomas Hart Benton", pri usona senatano.

En Argentino, industriistoj kaj estroj de komercaj entreprenoj ekformis Industrian Unuiĝon (90 jarojn poste ĝi transformiĝos per kunfandigo de du konfederacioj).

En Argentino naskiĝis Bernardo Alberto Houssay, sciencisto kiu atingis la Nobel-Premion pri medicino en 1947, kune kun aliaj du sciencistoj, pro ilia laboro pri diabeto.

En Ĉilio naskiĝis Joaquín Edwards Bello, aŭtoro de realismaj romanoj pri la urba vivo.

Oni fondas la Nacian Muzeon de Kostariko, en San-Joseo; ĝenerala muzeo kun kolektoj de antaŭkolumba, kolonia, respublika, kaj religia arto, plus aliaj vidindaĵoj.

En Nikaragvo naskiĝis Luis Abraham Delgadillo, verkisto, edukisto, orkestrestro kaj eminenta komponisto.

En Paragvajo fondiĝis la Partio "Colorado" (Kolorado).

En Pollando naskiĝis Arthur Rubinstein, mondfama pianisto.

En Bulgario, Stefan Stambolov, unu el plej gravaj "fondantoj de nova Bulgario" estis nomumita ĉefministro.

En Vukovar (nun en Kroatio) naskiĝis Leopold Ružička, ricevonto Nobel-Premion pri Kemio en 1939.

Naskiĝis la germana instruisto, roman-verkisto kaj poeto Ernst Wiechert, kiu publike kontraŭstaris naziismon ekde 1933.

Naskiĝis Erich Mendelsohn, grava arkitekto germana, influhava en la arkitekturaj skoloj "esprimisma" kaj "funkciisma".

En Norvegio, industriaj laboristoj fondis la Laborisman Partion (Arbeiderparti).

En Kievo naskiĝis Aleksandr Arĥipenko, avangarda artisto, skulptisto kaj grafikisto.

En Bruĝo oni ekkonstruis la Provincan Juĝejon (Provinciaal Hof), sidejo de la registaro de Okcidenta Flandrio.

En Francio naskiĝis Pierre Jean Jouve, verkisto, poeto, romanisto kaj kritikisto.

En Germanio naskiĝis Wolfgang Kohler, psikologo kaj fenomenologo, unu el la pioniroj en la kreado de Geŝtalt-psikologio.

En Novjorko naskiĝis Ruth Benedict, unu el plej gravaj homoj en la evoluado de usona kultura antropologio.

Mortis Gustav Theodor Fechner, germana eksperimenta psikologo, pioniro pri eksperimenta psikologio kaj fondinto de psikofiziko, proponanto de la logaritma rilato inter la fizika intenseco de stimulo kaj ties sensacio en homo.

Vortaretojn de indiĝenaj lingvoj de okcidenta regiono (nuna "Chocó" [ĈokO]) de Kolombio publikigis tri eksterlandaj esploristoj, ĉiu aparte: C. P. Etienne en Ĝenevo, Louis Alphonse Pinart en Parizo kaj F. A. Simons en Germanio.

Charles Algernon Parsons prezentis malgrandan jakton kun vaporturbino (patentita far li 3 jarojn antaŭe), la Turbinia, en Mararmea Ekspozicio ĉe Spithead okaze de festo por Jubileo de la Reĝino Viktoria.

John Boyd Dunlop inventis la unuan praktikan pneŭon, blovŝveligitan radbendon, por triciklo de sia filo kaj provis ĝin (patentis ĝin la sekvantan jaron).

John Boyd Dunlop inventis la unuan praktikan pneŭon, blovŝveligitan radbendon, por triciklo de sia filo, provis ĝin, kaj patentis ĝin la sekvantan jaron.

Tolbert Lanston patentis en Usono mekanikan kompostsistemon Monotype.

George C. Blickensderfer inventis la porteblan tajpilon.

La japana registaro vendis la Ŝipkonstruejon de Nagasaki al la kompanio Mitsubishi .

En Usono, altlernejo fondita en 1701 fariĝis "Universitato Yale".

En Parizo oni komencis la dujaran konstruadon de la Eiffel-Turo.

Vizito al la granda bovino "Manuela"

2009-10-18T12:08:00.008-05:00

Dank'al invito de mia amiko Manuel F. Hernández, hieraŭ mi kaj alia amiko kiu ankaŭ kunlaboris pri la mekanika dizajno de la granda bovino ([1], [2]), havis la okazon viziti la bovinon jam en sia celita loko. La bovino situas en agrabla kampara amuzparko [3], kie la vizitantoj povas spiradi puran aeron, lerni pri lakto-produktado, rajdi ĉevalojn, spekti kantistojn, manĝi, aĉeti memorigaĵojn, rigardi birdojn, ktp... kaj —kompreneble— "vojaĝi" ene de la granda bovino.

En tiu-ĉi eta fotoraporto, mi montras nur la grandan bovinon, kaj ne aliajn partojn de la parko. Kaj bedaŭrinde, sed kompreneble, oni ne permesas foti ene de la bovino:

↑ La bovino elstaras en ebenigita monteto.

↑ La bovino rigardita el apuda restoracio kie ni tagmanĝis.

↑ Maldekstra flanko de la bovino. Sub ĝi, mia amiko Sergio aspektas eta.

↑ Sergio ne estas malalta, sed apud bovina krurego ...

↑ Sergio sub la bovina mamo.

↑ La bovina buŝo estas ene de dometo kien la spektontoj eniras por esti "manĝataj".

↑ Post travivi la simuladon en la stomako, la spektintoj malsupreniras kvazaŭ "lakto".

↑ La spektintoj eliras el la "mamo-lifto".

↑ Sub la kolo de la bovino, oni vidas ĉi-tion.

15a Kolombia Kongreso de Esperanto

2009-10-09T10:35:00.006-05:00

Verŝajne laŭ historiaj registraĵoj, en la jaro 1909 aperis esperantistaj grupoj en kelkaj kolombiaj urboj, kaj estis presita bulteno "Kolombia Stelo". Do, la 15a Kolombia Kongreso de Esperanto, kiu komenciĝas hodiaŭ en nia nacia ĉefurbo, Bogotá [Bogoto], havas tian specialan signifon marki la unuan jarcenton de la Internacia Lingvo en mia Lando.
Mi nur bedaŭras ke mi ne povas tie ĉeesti, deziras sukceson al la kongresantoj kaj esperas ke tio helpu iel al plua diskonigo de Esperanto en la kongresurbo kaj en la lando.

Plej granda bovino de la mondo jam funkcias

2009-10-07T13:48:00.008-05:00

Mi blogis pri ĝi dum ĝia konstruado [Plej granda bovino de la mondo], do mi taksas devo rakonti al miaj legantoj ke tia bovino, nomata "Manuela", fine estis portita el la konstruejo al ĝia fina loko, en la laktoprodukta municipo "San Pedro de los Milagros" (Sankta Petro de la mirakloj), kaj ĝi estis inaŭgurita la pasintan sabaton.

Jen artikolo (hispanlingva) en ĵurnalo El Colombiano, la plej grava el nia urbo:
- Manuela, una vaca en la Vía Láctea.
Jen artikolo (hispanlingva) en ĵurnalo El Mundo, dua el nia urbo:
- Manuela llegó a San Pedro.
Jen artikolo (hispanlingva) en retejo de televidkanalo RCN:
- Vaca robótica enseña cómo produce leche.

La bovino estas elpensita kaj farita de mia amiko Manuel Fernando Hernández Trujillo, kiu ankaŭ scipovas Esperanton.

Plua enketo pri kolombia prezidento elektota en 2010

2009-10-04T16:38:00.024-05:00

La pasintan 2an de junio, mi blogis pri la sama temo, laŭ rezultatoj de enketo farita fine de majo de 2009; jen ligilo: [blogafiŝo]. Nu, la pasintan vendredon 2an de oktobro, oni publikigis novan enketon pri la elektota prezidento. La ĉefa kialo por fari novan enketon estis, krom la 4-monata pliproksimiĝo de la elekto (30a de majo de 2010), estas la ĵusfaritaj elektoj de la oficialaj kandidatoj de la du ĉefaj partioj oponantaj al la nuna registaro: Liberala kaj "Poluso Demokrata Alternativa". Tiuj elektoj forigis la prezidentigeblecon de kelkaj antaŭkandidatoj.

Nun mi ne ripetos detalojn pri kiuj mi skribis en la pasinta samtema blogafiŝo.

Pro tio, ke la ebleco de reelekto de la nuna prezidento ankoraŭ eksistas —kvankam kun malfacilaĵoj pro tempo kaj plenumendaj juraj paŝoj—, la enketo konsideris denove du scenoj: kun kaj sen elektebleco de Álvaro Uribe Vélez. Rrigardu tion kio okazas laŭ la nuna enketo, se la prezidento povas kaj volas esti kandidato: Li atingus 63% el la voĉdonoj popolaj (pli ol la 57% de kvar monatoj antaŭe!), kaj la ceteraj kandidatoj 8% aŭ malpli. La dua estas Gustavo Petro, kiu nun estas la elektita kandidato de la "Poluso Demokrata Alternativa" oponanta al la nuna registaro, sed tre malproksime de Uribe:

Novaĵo estas ke la tria, kun 4% el la voĉdonoj estas Rafael Pardo Rueda, kiu en la antaŭa enketo eĉ ne aperis, sed nun li estas la elektita kandidato de la Liberala partio. Li estas ekonomikisto kun pluaj studoj pri urba kaj regiona planado kaj internaciaj rilatoj, pli "akademia" ol "de publika placo". Li estas serioza homo kiu jam rolis en pluraj gravaj postenoj: Konsilanto pri nacia sekureco, ministro pri nacia defendado kaj senatano. Li ankaŭ estis konsilanto de la OAŜ, partoprenanto en la pacigo de Gvatemalo, kaj direktoro de novaĵ-agentejoj.

Kaj se la nuna prezidento ne povas esti reelektata por tria sinsekva periodo (ekzemple, ĉar registara instanco aŭ supera kortumo malaprobas la okazigon de la referendumo, aŭ se la referendumo aprobita kaj farita ne atingas la pli ol 7 milionoj da voĉdonoj popolaj) aŭ se li ne volas esti kandidato, rigardu tion kio okazas tiam laŭ la nova enketo:

En tiu sceno, sen Álvaro Uribe, la du kandidatoj "uribe-ismaj" atingas la plimulton el la voĉdonoj, sed malpli ol kvar monatojn antaŭe: Juan Manuel Santos 11% (antaŭe 19%) kaj Andrés Felipe Arias 11% (antaŭe 12%). Kun procento egala al tiuj du, aperas Gustavo Petro.
Estas rimarkinde ke Juan Manuel Santos, kiu —kiel mi skribis en la antaŭa samtema artikolo—, ankoraŭ ne laboradis kampanjon, atingus iel "pasive" 11% da voĉdonoj. Tamen, ĉi-semajne, dum li, kiel eksministro pri defendado ricevis honorigon, diris ke li restis proksimume kvar monatojn tiel, post sia rezigno kiel ministro, sed ke ekde la dimanĉo 4a de oktobro (hodiaŭ) li faros aktivan kampanjon.

Ankoraŭ mankas 8 monatojn por la elekto, kaj ankoraŭ estas multaj sendecidaj homoj: 9% se Uribe estas kandidato kaj 19% se Uribe ne estas kandidato.

En la bildoj mi ne montras procentojn de: aliaj kandidatoj kun etaj procentoj, homoj dirintaj ke ili ne voĉdonos, homoj dirintaj ke ili voĉdonos blanke, nek homoj dirintaj ke ili ankoraŭ ne decidis.

11a Robotika Olimpiko

2009-10-03T11:00:00.006-05:00

Beadŭrinde, mi ne povas plenumi mian promeson de la blogafiŝo "Juĝanto por robotika olimpiko ankaŭ ĉi-jare" [20090909] pri pluraj fotoj de la evento, ĉar mi ĉeestis nur por mia tasko kiel juĝanto, do, malfacilas atenti respondece ĉion kaj samtempe foti. Mi ne povis ĉeesti la ceterajn programerojn kiel simpla rigardanto. Supre aperas kelkajn el la musoj kiuj estas trofeoj por la venkintoj (krom la monaj premioj). Tiu muso estas la simbolo de la evento.
Pro mia ŝato pri homoidaj robotoj, mi volas ke la venontan jaron la organizantoj inkluzivu kategorion de etaj dukruraj, piedirantaj, homoidaj robotoj. La organizantoj ŝatas la ideon, sed mi devas redakti kiel propono regularon por tia konkuro. Mi nun laboras pri tio, unue per simpla konkuro, kun taskoj ne tro malfacilaj, ĉar homoidaj robotoj ankoraŭ estas strangaĵo en mia lando, sed iam ni devas prilabori tiajn robotojn, kaj konkuro povas utili por puŝi la studentojn esplori kaj disvolvi tion.

Humuremo inter fizikistoj

2009-09-28T12:56:00.021-05:00

La fizikisto William Thomson, pli konata kiel "Lord Kelvin" ekde 1892, estis amiko kaj kunlaboranto de kolego Peter Guthrie Tait, kaj en sia multa korespondado ili subskribis la leterojn respektive kiel T kaj T'.
La fizikisto James Clerk Maxwell, ankaŭ amiko kaj kunkorespondanto subskribis: dp/dt , ĉar en libro far Tait "Sketch of Thermodynamics"^[1], de 1868, en la paĝo 91a, rilate al la dua leĝo de termodinamiko, aperas ekvacio:

El kio oni atingas: dp/dt = JCM, kvazaŭ komencliteroj de James Clerk Maxwell!
Ankaŭ, alia simbolo kiun la triopo utiligis estis: T'' por aludi al fizikisto John Tyndall. Tait, kiu malŝatis fizikiston Tyndall, iam klarigis ke T'' nomis "kvanton de dua ordo".

NOTOJ:

FONTO: Sánchez Ron, José Manuel: "Historia de la Física Cuántica", p. 35a, Crítica, Barcelono, 2001 [ISBN 8484322491].

[1] La historian libron "Sketch of Thermodynamics" elŝuteblas el Interreto, el archive.org. Jen mallongigita ligilo: http://u.nu/53yc3, [pdf, 16.6MB]

Juĝanto por robotika olimpiko ankaŭ ĉi-jare

2009-09-24T12:22:00.009-05:00

Bone, ankaŭ ĉi-jare, kiel plurfoje antaŭe, oni invitis min por esti unu el la juĝantoj en la "Robotika Olimpiko" organizita far grupo de la universitato UPB en mia urbo. Mia juĝa tasko estos la vendredon 2-an de oktobro, sed eble mi ankaŭ ĉeestos por rigardi la okazaĵojn de la sabato 3-a. Mi montros fotojn tie ĉi.

Jen ligiloj al miaj samtemaj blogafiŝoj de antaŭaj jaroj:

2004: [1] - [2] - [3] - [4]
2005: [1] - [2] - [3]
2006: [1] - [2]
2007: [1] - [2]
2008: [1]

La "MELeaito"

2009-09-22T16:57:00.004-05:00

Kvankam tiu ĉi blogo estas (ĉiam) en Esperanto, por hodiaŭ mi metas ion hispanlingvan, amuzan, rilate la eksprezidenton de Honduro, kiun kelkaj en sia lando nomas "MEL", kaj kiu estas en la hodiaŭaj novaĵoj pro sia lasta malprudenta agado (helpe de Hugo Chávez eniri kaŝe en Honduron -aŭ ĉu en "Brazilon" ene de Honduro?).
Ke miaj legantoj esperantistoj pardonu min kaj ĝuu almenaŭ la ritmon, se ili ne komprenas la hispanan lingvon.