Il prin blog di archeologjie par furlan

Mandi!

2008-08-14T11:33:00.003+02:00

Us saludi par cualchi zornade, o voi in feriis a chì a viodi chest e chest! Si cjatìn cuant che o torni! Maman a ducj! =)

La fadie di jessi archeolic

2008-08-11T13:33:00.003+02:00

Ta chescj dîs al è vignût fûr un dibatit sul Gazetin tra il prof. Gianfranco Ellero e la prof.se Paola Cassola Guida de Universitât dal Friûl su lis condizions dal tumul di Sant Svualt, sgjavât tal 2002 e dopo lassât un pôc al so destin. Al è di dî però che chest al è un probleme che si presente puntualmentri intun sgjâf archeologic, za a son pôcs i bêçs par sgjavâ (il plui des voltis cence paiâ chei che a lavorin...), ae fin i sîts a vegnin lassâts a mieç propite par chest probleme. Us met intai prins doi coments i intervents.

Irlande

2008-08-10T13:07:00.001+02:00

E je une tiere maraveose, o speri di podê lâ a visitâle il plui prest pussibil...

Ancje sul Diari!

2008-08-09T18:00:00.001+02:00

Cuntun tic di braure =) us segnali la presince dal “vuestri blog di archeologjie preferît” ancje sul cuindisinâl “Il Diari” dai 6 di Avost, diret di Mauro Tosoni, intun articul di Stefano Gasti. Grazie a ducj! =)
(Mi viodês ancje inte foto insiemit cun Rovul! )

Il sigjîl di Corado

2008-08-09T11:15:00.001+02:00

Di gnûf Atimis in prime pagjine par une straordenarie scuvierte intal sît dal Cjistiel Superiôr; un sigjîl di aur blanc apartignût a Corado I di Atimis, cjavalîr che al vivè propit intal cjistiel par presidiâ la zone. Il so non al jere za cognossût inte zone di Cividât e in chê di Aquilee come un prôt e cun incarics di rilêf. Il repert, in otim stât di conservazion al figure di une bande un Diu Pari cun simbui di podê, di chê altre l’imperadôr dal Imperi Roman di Orient cun dongje la scrite “Alexio Despote”. Di là di chest impuartant ritrovament ancje altris reperts: une monede di bronç, piçui pês, rescj di ciotolis par past, vues di bestiis, dâts par zuiâ e tocs di une golaine.
(Inte foto un esempli di sigjil)

Interviste su Radio Onde Furlane

2008-08-09T00:10:00.006+02:00

No podarês mai imagjinâ ce muse che o ai fat cuant che mi à telefonât "niepopodimanculchè" Mauro Missana, il mitic diretôr di Radio Onde Furlane!!!
Mi à clamade par domandâmi di fâ une interviste te sô trasmission "Ator ator". Il teme de interviste al jere fevelâ dal gno blog.
Vonde cjacaris, ve ca la regjistrazion e lis fotos fatis su la Tumbare cul om di Merêt, che al è stât batiât "Rovul".
Un grazie di cûr a Mauro Missana! =)

Gardaland!

2008-08-07T22:10:00.000+02:00

Dopo lis faturis universitaris mi soi finalmentri gjoldude une biele zornade di divertiment a Gardaland! O ai tirade sù une strache mostre ma al è stât diviertentissim! =)

Cjastelîr de Gradiscje

2008-08-05T11:22:00.005+02:00

Uns dos setemanis indaûr o soi stade a scavâ intal cjastelîr de Gradiscje che si cjate a Codroip, dongje dal Parc des Risultivis. Il cjastelîr al è un borc fortificât, a voltis cun mûrs o cun rialçaments di tiere, di forme elitiche o cuadrangolâr, cun al interni struturis abitativis di tipo sempliç, fatis sù cun materiâi deperibii. Cheste tipologjie di insediament al è tipic de aree istriane, de Dalmazie, dal Venit e dal Friûl - Vignesie Julie. La datazion si coloche inte ete dal Bronç di mieç (XV secul p.d.C.) e e durà sù par jù un mileni.
La campagne di sgjâf di chest an, direte di Piero Tasca de Socjetât Furlane di Archeologjie, e à permetût di ricostruî la vite intal cjastelîr; l'abitât al jere costituît di barachis cu la struture puartant in len e il cuviert di stran e pantan. Si è calcolât che i abitants a fossin sù par jù un centenâr e che si dedicassin al arlevament di pioris e cjavris; chest si è podût dî par vie che a son stâts cjatâts struments adats ae tiessidure (fusaiolis, o ben dai pês par tignî la lane). Di lôr però no si cognòs la lenghe, duncje no je ancjemò ben clare la origjin.
Ducj i reperts tirâts fûr chest an cumò a laran in restaur, po dopo a vignaran metûts intal museu di Codroip.
(In mancjance di une foto dal cjastelîr de Gradiscje us met chê dal cjastelîr di Savalons - Merêt di Tombe -)

Museu su la Tumbare

2008-08-04T09:32:00.003+02:00

L’intenzion e je chê di rindi visitabil il sît de Tumbare, (la struture di chest gjenar plui grande di Italie) come che cun fuarce al sosten il Comun di Merêt; cumò il progjet al è intes mans dal assessôr regjonâl Roberto Molinaro, che intant al à dât l’ok pe spese di cirche 6.000 euros par fâ il calc e il prelêf dal scheletri. Si è capît aromai che chel dai tumui al è un percors culturâl di preservâ e studiâ a font, carateristic de nestre regjon e leât ai teritoris confinants (Istrie, Dalmazie, Venit).

Ancjemò scuviertis in Friûl!

2008-07-31T12:23:00.004+02:00

Cheste e je une istât fertil pe archeologjie furlane! Dopo la ecezionâl scuvierte di Merêt ancje a Atimis i sgjâfs sul cjstiel superiôr a àn dât impuartants risultâts. Intun scoladôr di fat e je vignude in lûs une bole di aur blanc, forsit riferibile a Alessio Prin di Costantinopoli; secont lis ricostruzions dai archeolics al sarès un titul nobiliâr conferît a Corrado Prin di Atimis tor l’an 1095. La scuvierte e permet di fâ lûs sui contats cun l’Imperi d’Orient di cui che in ta chê volte al viveve a Atimis, di sigûr une classe nobiliâr di alte levadure. La campagne di sgjâf e je puartade indevant, aromai di 10 agns in ca, de Societât Furlane di Archeologjie cun i Museus Civics di Udin.

Cjartine cui tumui

2008-07-29T13:07:00.005+02:00

Chi in bande us ai metût la cjartine cu la localizazion dai tumui identificâts inte nestre regjon. A son segnalâts ancje chei sgjavâts fint cumò a Merêt e a Sant Svualt.

La tombe di Rovul

2008-07-28T09:58:00.004+02:00

Aromai la notizie è à fat scalpôr, une scuvierte masse impuartante che à scjassât dut il setôr archeologjic regjonâl, e no dome. Rovul (inte foto "cun me"!) cussì al è stât batiât il muart, al è di sigûr il plui vecjo furlan che si sedi cjatât fint cumò, vivût cirche 4.000 agns fa. Di une prime analisi efetuade sul scheletri, conservât une vore ben, al veve tra i 17 e i 18 agns, alt 1.50 m., no son stadis rilevadis malatiis particolârs, dome une fuarte usure dai dincj, dovude probabilmentri a une diete coriacee. Il cuarp al jere stât vuluçât intune piece e forsit dopo metût dentri une casse di len. La sepolture e je situade a cirche 80 cm sot il nivel dal teren atuâl; po dopo parsore e fo stade costruide dute la struture in clap, tiere e argjile, fint a rivâ a une altece di plui o mancul 6 m. Altris aprofondiments vignaràn dâts dopo che i vues vignaràn mandâts a analizâ in doi, forsit trê, laboratoris di datazion cul metodi dal carbonio-14.

Dopo 4.000 agns!

2008-07-23T16:16:00.004+02:00

Sot il tumul de Tumbare di Merêt di Tombe finalmentri, dopo 3 agns di ricercjis, al è vignût in lûs il scheletri sepulît sot di cheste imponenete costruzion, datade al III mileni p.d.C. Il sgjâf, puartât indevant dal grup di archeologjie protostoriche de Universitât di Udin e diret de prof. Paola Guida cu la prof. Elisabetta Borgna e la dott. Susi Corazza, al à dât i risultâts sperâts, fasint lûs su chest fenomen dai tumui funeraris presints in grant numar te nestre regjon. Cheste e je pardabon une scuvierte impuartante par cui che al studie no dome protostorie ma dute la dissipline archeologjiche. Come che o viodês, no je vere che cui che al studie archeologjie dopo al à di “scugnî lâ vie” o “viagiâ” o pies inmò “restâ cence lavôr”; chi in Friûl, se si vûl, pussibilitâts a’nd’è, bastarès che lis autoritâts si sveiassin e tirassin fûr i bêçs par valorizâ un teritori che nol à nuie di invidiâ a chês altris regjons talianis!

Un antîc massacri

2008-07-22T10:09:00.001+02:00

A Talheim, inte Gjermanie sud-ocidentâl, tra il 1983 e il 1984 e fo scuvierte une fuesse comune cun dentri i rescj di 34 individuis di etât comprendude tra i 2 e i 60 agns. Cetancj di lôr a vevin brutis feridis intal cjâf, prove di une muart di sigûr violente.
Al inizi si crodeve che al fos un episodi leât ae invasion de Gjermanie di bande di trupis romanis o barbarichis; ma ultins studis a àn rivelât che il sît al risalìs ae ete neolitiche, duncje tor il 5.000 p.d.C.
Chest di sigûr al ribalte la false crodince che lis primis comunitâts di contadins a fossin trancuilis e pacifichis. Cun di plui lis analisis sui rescj a àn confermât la mancjance di feminis adultis; duncje e je une fuarte pussibilitât che il maçalizi al sedi stât atuât in seguit a un scuintri par caparâsi lis feminis e garantîsi cussì une dissendence.
Cjapât dal mensîl di archeologjie "Archeo" n.7, an XXIV.

2000!

2008-07-21T20:25:00.003+02:00

Grazie a ducj! =)

Conseis pal Istât

2008-07-20T22:38:00.002+02:00

Istât par tancj e je sinonim di relax e leturis sot dal ombrelon, e alore ve ca cualchi consei, secont il gno modest parê: L’Alchimista e Veronica decide di morire, ducj doi di Paulo Coelho, un grant autôr moderni de scriture semplice e scorevule che al sa dâ impuartants insegnaments di vite.

Studis archeologjics su Qatna

2008-07-19T13:12:00.003+02:00

Al è stât publicât il volum, curât dal prof. Bonacossi, che al dâ cont de cunvigne internazionâl davuelzude a Udin tal 2004, dulà che al jere stade ricostruide la storie dal sgjâf di Qatna, important insediament dal Vicin Orient antîc. Us ricuardi che il sgjâf al è za di cualchi an puartât indevant cun suces de Universitât di Udin.

Aperitîf archeologjic!

2008-07-14T14:11:00.000+02:00

Il mês di Lui o podês unî l’aperitîf cu la culture! Eh sì, difat a Aquilee son stât organizâts, ogni vinars aes 17.30, dai incuintris cun degustazions di vin e percors culturâi! Bon divertiment! =)

Contaminazions

2008-07-13T14:53:00.000+02:00

Interessantissime esposizion museâl intal Museu Archeologjic dal Cjistiel di Tor a Pordenon. Il percors das oparis dal artist contemporani Elio Armano si disvilupe traviers lis variis salis alestidis (de preistorie al rinasciment) permetin un dialic tra l’ambient museâl, viodût come istituzion vive e vierte a diviersis propuestis, e chel de art moderne, ae cuâl si dâ dignitât museâl. La mostre e sarà viarte fint al 8 di dicembre cui seguent oraris: vinars, sabide e domenie des 15 aes 19 (di Otubar des 15 aes 18), domenie ancje des 10 aes 12.

A vore!

2008-07-13T12:53:00.002+02:00

Doman, lunis ai 14 di Lui, o tachi a sgjavâ a Codroip inte zone dal Parc des Risultivis, par zontâ un pocje di esperience in sîts protostorics.

Cjastelîr de Gradiscje

Il sît, localizât inte zone des risultivis di Codroip e logât suntun grun di tiere, al conserve lis olmis di un cjastelîr, frecuentât intal Bronç resint-finâl I (1300-1100 p.d.C.) e tal Bronç finâl III-Fier iniziâl (1000-800 p.d.C.). Dal abitât si conserve il rilêf residuâl dal tiereplen sui lâts orientâl e ocidentâl e strichis di stratificazions protostorichis disturbadis in divierse misure di intervents agraris di ete romane. Intes precedentis campagnis di sgjâf (2004-2007) a son stadis viertis des trinceis esplorativis che a àn intercetât tocs di stratificazions protostorichis su lis clevis margjinalis; in particolâr scarics ceramics e olmis struturâls databilis tra il Bronç Resint Evolût e Bronç Finâl 1. Inte campagne 2008 si proviôt la prosecuzion de esplorazion des evidencis struturâls e dal jemplament dal fossâl interni. Lis ricercjis, che si davuelzaran dai 30 di Jugn ai 25 di Lui, a son organizadis dal Museu di Codroip in colaborazion cu la Societât Furlane di Archeologjie -sezion Friûl di Mieç- cu la direzion di Costanza Brancolini e Giovanni Tasca. I partecipants a saran impegnâts sot la vuide di operadôrs esperts intes operazions di: individuazion e delimitazion, pulizie, documentazion in plante e sezion di US; lavade e prime sistemazion dai reperts ceramics; documentazion e classificazion preliminâr dai reperts.

Serade cui Chieftains!

2008-07-12T14:34:00.004+02:00

Ce figade! O ai stât a viodi un concierton pardabon biel! O ai di ameti di no sedimi mai interessade ae musiche folk, ma nosere o ai assistût a un spetacul dulà che mi soi propite divertude e che mi à permetût di cognossi un gnûf (par me) gjenar di musiche. Inte biele cornîs dal zardin su in cjistiel a Udin a sunavin il grup “La Sedon Salvadie”, oviamentri autoctons =) e dopo di lôr un grant grup irlandês “The Chieftains”, considerâts i esponents de vere musiche irlandese! Biel! Biel! Biel! =)

barbara

2008-07-11T12:18:00.003+02:00

E mancjave dome une persone speciâl che e je lontan ma che o sai che e jere dongje di me cul pinsir...mandi stele, si viodìn prest! =)

dotore dal bus dal cul!

2008-07-11T11:15:00.008+02:00

Je ai fate ancje jo!!! No rivi inmò a crodiiii! Un grazie di gnûf a ducj chei che a son vignûts a sostignîmi, i miei parincj, lis mês compagnis di universitât (che o ringrazi ancje pal “biel” travestiment, ve possino...) e ai amîs e amiis che mi an sopuartade cu lis mês paranois! Une bussade grandonone a ducj!! E grazie ancje pai regai...! ;)

LAUREADE!!

2008-07-10T23:44:00.001+02:00

Jo o ai inmò di realizâ ce che mi è sucedût vuê, ma mi pâr, des fotos che dome cumò o ai cjalât, che o jeri propite jo chê cu la corone di orâr sul cjâf che lave ator par Udin! =)

cence peraulis...

2008-07-09T14:14:00.002+02:00