C.S. ROI SOGA DE LOBEIRA

Dia da Pátria: em Movimento por umha Terra Livre e o Socialismo!

2009-07-17T01:29:00.000-07:00

O Dia da Pátria desde a História
O nacionalismo galego nucleado arredor das Irmandades da Fala (1916-1931) fixou, nos anos vinte do passado século, a data na que hoje celebramos o nosso dia grande: o 25 de julho.

O denominado num início Dia de Galiza e, ao pouco, Dia da Pátria, estivo centrado desde primeiras horas na reclamaçom para o país de um status de soberania usurpado no marco de um processo histórico.

As velhas e velhos patriotas de inícios do século XX denunciavam, pedagogicamente, como se tratava de recuperar umha independência eclepsida polo imperialismo castelhano (transformado co tempo em imperialismo espanhol).

Aqueles activistas davam conta de como a finais da Idade Média o expansionismo castehano-aragonês dera coa queda de umha Galiza livre, normalizada, trás a sistemática perseguiçom da nossa estrutura social, política e económica, liquidando a aristocrácia galega e submetendo ao nosso povo a interesses foráneos. Explicitavam aqueles como desde aquela altura se introduciram os preconceitos -que gerárom um colectivo complexo de inferioridade- em relaçom ao próprio, destacando os clixés xenófobos sobre o nosso idioma. Estes últimos chegam até os nossos dias.

Na actualidade
Após cinco séculos de domínio espanhol sobre a nossa Terra, após cinco séculos de colonizaçom, o certo é que seguimos a 'ser' e a 'estar'. O facto de que estejamos a viver umha nova sacudida, umha nova onda espanholista deriva em grande medida disto. E é que o espanholismo fica frustrado, mália sua força no nosso país, por nom dar concluido com suceso o seu programa.

Como bem afirmara Daniel Castelao no Sempre em Galiza [em referência aos espanhois] :

Sodes uns imperialistas fracassados!

Com a nossa acçom diária, com o nosso compromisso subscrevemos as palavras e sentir do de Rianjo. Reafirmamo-nos na loita contra aqueles e aquelas que querem fazer do nosso país 'umha verdadeira colónia da Corte', como denunciavam os insurrectos que no 1846, nomeadamente Antolim Faraldo, propiciavam um heróico movimento patriótico e progressista armado.

Igual que aqueles e tantas outras, orgulhosamente trabalhamos por umha Pátria Livre e chamamos a todas as nossas convizinhas e convizinhos a que participem dos actos ligados ao Día da Pátria.

Neste senso, desde a nossa Sociedade Cultural organizamos o vindeiro dia 23 umha série de actividades que em breve publicitaremos neste nosso e vosso sítio electrónico.

Agardamos-te em Movimento por umha Terra Livre e o Socialismo!

CONTA ATRÁS

2009-03-30T04:16:00.000-07:00

Anunciavamos hai tempo que mudavamos de emprazamento físico no que desenvolver as nossas actividades. Atendia esta determinaçom à necesidade de procurar um espaço que resultase máis cercano, confortável e, em definitiva, óptimo para o nosso labor.

Hoje podemos afirmar que em breve estará disponível a nova ubicaçom na que poderás volver desfrutar das aulas de formaçom que estavamos a ofertar, assi como seminários, conferências, roteiros polo monte... para sócias/os e nom asociadas/os organizadas desde o C.S. Roi Soga de Lobeira.

En breve apresentaremos a nossa programaçom de primavera, na que combinaremos a formaçom com o lazer e o desfrute do nosso entorno natural.

Manteremos-te informada/o...

Conquistando um novo espaço!

2008-09-01T00:34:00.001-07:00

Nestes dias provavelmente comprobarás que deixamos a que foi a nossa ubicaçom até o passado mes de agosto.

A ideia de sermos máis aptos para máis públicos, fazendo do nosso Centro Social umha casa comúm de galegos e galegas, fai que em breve tenhamos um novo espaço físico no que aprender a tocar a pandeireta, a desenvolver canto tradicional, visionar bom audiovisual , falar com quem paga a pena ou ler um bom livro...

Cumpridamente daremos conta da apertura do novo espaço nesta nossa janela electrónica.

Saúde e Terra!

25 de JULHO, DIA DA PÁTRIA!

2008-07-19T09:06:00.000-07:00

Máis um ano, estamos diante do Dia Nacional de Galiza: o 25 de Julho. Desque nos anos vinte os nacionalistas das Irmandades da Fala instituiram esta data como Dia da Pátria, Galiza celebra este fito no ano a partir da reivindicaçom da sua realidade nacional.

O C.S . Roi Soga soma-se aos actos que por todo o país se están a celebrar co galho desta efeméride, nomeadamente a manifestaçom que o nosso dia grande percorrerá as ruas compostelás, sob a chamada da unidade cívica Causa Galiza.

Dias antes, no C.S. Roi Soga o sábado 19 de julho desenvolverá-se umha festa na que distintas imagens de diverssos Dia da Pátria amenizaram visualmente o acto.

Este encontro desenvolverá-se coincidindo co primeiro aniversário do C.S. Comezará o acto a apartir das 22.00hrs, logo dumha juntança da Permanente do Centro.

Agardamos-te!!

Aproveitamos para te convidar, para convidar a todas e todos os nossos sócios e simpatizantes, a pór em sítio visível umha bandeira galega de cara a rua, acto simbólico de orgulho nacional.

Saúde e Terra!!

NA GALIZA, EM GALEGO!!

2008-05-17T06:30:00.000-07:00

Nom é discutível que no nosso país hai um idioma. É máis, se seguimos a poder afirmar que somos umha naçom é por obra e graça do nosso idioma. Este esta historicamente gerado por um grupo humano diferenciado que habita desde hai milénios neste velho chao, qual é a Galiza...

Do resto de características da nossa naçom cada vez menos fica... e das que restam (por desaparecer, se o orgulho e razóm nom imperam), folcrorizadas andam...

No Roi Soga desenvolveremos, nesta linha, umha série de documentários em galego sob a iniciativa da organizaçom juvenil patriótica Galiza Nova. O conteúdo dos trabalhos audio-visuais é de sobrado interesse!!

Para além do dito, convidasmos-te a que te manifestes em favor do idioma, e de jeito extraordinário, neste dia das nossas Letras. Aliás, lembramos que manhá, 18 de maio, polas ruas da capital galega cidadáns e cidadás livres manifestaremo-nos em favor da nossa língua. Agardamos ver-te em Compostela berrando: Na Galiza, em Galego!!

VENEZUELA e O MURO NESTA FIM-DE

2008-04-15T01:14:00.000-07:00

Esta fim-de teremos diversas actividades n'O ROI. E, coma vém sendo habitual, a combinaçom entre compromisso e lazer presidirám os nossos actos.

À Sexta a partir das 20.00hrs projectaremos um documentário, sob a lenda Venezuela bolivariana: pobo e loita da IV Guerra Mundial. Este reflecte a manipulaçom dos média no que atinge ao processo revolucionário em Venezuela. Evidência-se neste trabalho como som os média, os meios de comunicaçom de massas, umha das principais armas usadas polo capitalismo para artelhar e dar cobertura a guerras, ocupaçons e Golpes de Estado, legitimando toda injustiça que, ao longo do planeta benefície os interesses económicos duns poucos faze aos direitos da maioría. Logo do documentário fará-se umha rolda de intervençons a respeito do mesmo.

A partir das 22.00hrs a música fará-se c'O ROI e será a que amenice o Centro Social...

O Sábado a partir das 20.00hrs haverá umha nova projecçom. Será o mítico The Wall, de Pink Floyd. Este data do 1982 e fica dirigido polo británico Alan Parker, baseado no álbume do mesmo nome.

Agardamos por ti... E lembra, todo projecto, sugestom ideia que tenhas podes olhar de desenvolvé-la n'O ROI, um espaço para criar contestando e contestar criando!!

SOBRAM AS PALAVRAS....

2008-04-07T05:18:00.000-07:00

Prova de ingénio:

quantos seres humanos há nesta imagem?

****

****^

****

***

Tirado de http://www.galizalivre.org/index.php?option=com_content&task=view&id=1203&Itemid=1

UM NOVO ESPAÇO DE DISIDÊNCIA E CONSTRUCÇOM: ATURUXO

2008-04-01T06:16:00.000-07:00

Logo de anos de trabalho, as moças e moços, os homes e as mulheres que integram a sociedade Aturuxo venhem de abrir um Centro Social. Recentemente inaugurado em Boiro, é lugar referencial para o trabalho pola normalizaçom do país...

*****

****

*****

Aturuxo conta com vários audiovisuais nos que as suas integrantes amosam o seu evoluir.

Para monstra este:

Máis informaçom no seu completo blogue:

http://www.agal-gz.org/blogues/index.php/aturujo

CICLO SOBRE A REALIDADE INTERNACIONAL

2008-03-26T06:14:00.000-07:00

O vindeiro venres, 28 de março, a partir das 22.30hrs inicia-se um ciclo de projecçons, conferências, debates e encontros sobre a realidade internacional.

O C.S. Roi Soga vai ir gradualmente tratando a situaçom de distintos realidades e países do globo a respeito do plano cultural, social, económico, político, etcétera. O início vai-no ocupar a área de América do Sul. Neste senso, tratará-se sobre a intervençom dos EE.UU. na devandita área a travês da "School of the Americas".

A programaçom concretiza-se na projecçom, o vindeiro venres, do concerto que em directo ofereceu Fermín Muguruza no Zócalo (México) na primavera passada, como apertura do ciclo. Logo, o sábado 29, a partir das 20.30hrs projectará-se un audiovisual que desenvolve o que é a noutrora denominada Escola das Américas. O documentário dará pé a umha posta em comum sobre o imperialismo norteamericano.

Expo 'O exílio galego em Venezuela"

2008-02-22T04:03:00.001-08:00

Vém-se de inaugurar a exposiçom "O exílio galego em Venezuela" no C.S. Roi Soga. Sob a presença do seu autor, Xurxo Martínez Crespo, realizou-se umha rolda de imprensa na que se deu conta do processo de elaboraçom da obra. Esta recolhe a rica, mais dura, realidade da comunidade galega exiliada, apôs o golpe militar reaccionário comandado por Francisco Franco, em Veneçuela.

A exposiçom consta de 22 paineis nos que hai um conjunto elevado de imagens a travês da que se recria a realidade devandita; estes estám acompanhados por uns textos que desenvolvem a temática em questom, tratada de geito exquisito pola entidade que edita o trabalho, a Fundaçom para o Estudo e a Divulgaçom da Questom Social e Sindical na Galiza (FESGA).

A exposiçom estará n'O Roi até o 1 de março. Nesa data, e no marco da ceia de confraternidade que se desenvolverá no C.S., pechará-se a exposiçom projectando-se um audiovisual que realizou a entidade responsável do trabalho exposto.

O horário da exposiçom para ser visitada é de 18.30hrs e 20.30hrs martes, xoves e sábados.

ACTO-CEIA DE CONFRATERNIDADE

2008-01-28T03:59:00.000-08:00

Tal e como nas datas prévias ao fim-de-ano indicavamos, as perssoas que integramos o Centro Social (C.S.) Roi Soga imos desenvolver um acto/encontro de confraternidade.

O 1 de março celebraremos o novo ano e faremos balanço do que vém de rematar. Para além disto, intercambiaremos impressons a respeito das nossas actividades, inquedanças, preocupaçons...

O acto iniciará às 19.30hrs com umha intervençom da mao da Permanente do C.S., logo, fará-se umha apresentaçom das novas incorporaçons ao projecto, assi como das actividades que no segundo trimestre de ano se desenvolverám.

Para rematarmos o acto, clausurará-se a exposiçom "O exílio galego em Venezuela", procendendo a umha ceia (5€) a continuaçom. A guinda porá-a umha foliada na que participarám alunas e alunos do curso de pandeireta que se imparte n'O Roi.

A entrada é livre para quem quiger participar. Aníma-te e achega-te!!
Inscriçons no correio-e roisogadelobeira@gmail.com

ANTI-CONSUMISMO NA GALIZA

2008-01-10T08:05:00.000-08:00

Coincidindo com datas nas que o consumismo feroz especialmente fai do supérfluo normal necessidade, no nosso país apresentou-se umha iniciativa anti-consumista a ter presente. Tal e como informa o portal galego do que tiramos a nova, http://www.galizalivre.org/, sob a denominaçom "Maus-Modos [Guerrilha Teatral]" desenvolveu-se em Ourense umha acçom, agardamos que prolegómeno de moitas outras, de denúncia anti-consumista.

"Um louco com camisa de força nom para de berrar, obsessionado, que há que comprar sem pausa. Um par de namorados avança a duras penas por entre as lojas com a carga de uns trinta pacotes imensos que lhes caem continuamente das maos. Na entrada do Centro Comercial, umha mulher viste casaco de peles e roupa cara mas, rodeada de sacos das principais lojas de marca cheias de artigos recém adquiridos, pede dinheiro com a cabeça baixa e a mao tendida, explicando que ainda lhe faltam "um casaco novo e um colar". A sua companheira move-se entre o pessoal, reclamando um donativo "para umhas férias a Marina d'Or". Como telom de fundo, o som monótono e repetitivo de mais umha pessoagem que, encima dumha TV e através dum alto-falante, nom para de recitar textos de mensagens publicitárias....ante um televidente completemente idiotizado. Ainda, duas empregadas do Ponte Vella param à clientela para lhe fazer um incisivo questionário titulado: "Há vida fora do Centro Comercial?"... tal e como indicam em http://www.galizalivre.com/ .

Maus-Modos conta com um sítio electrónico, aínda em desenvolvimento, baixo o domínio http://www.galizalivre.org/www.mausmodos.blogspot.com .

ENCONTRO DE CONFRATERNIDADE!

2007-12-14T02:28:00.000-08:00

O frio próprio das datas nas que ficamos nom fai que o C.S. Roi Soga pare as súas actividades...

Ao contrário, estamos a intensificar a nossa grelha de actividades para começos do vindeiro ano. Estas sumarám-se aos cursos de montage audiovisual ou pandeireta, entre outros, que já estamos a desenvolver e que ao longo do último mes encetamos, para rematarem no verao vindeiro.

Aliás, antes de fim-de-ano desenvolveremos um acto de confraternidade do que em breve terás novas...

POLA AUTODETERMINAÇOM!

2007-11-26T03:48:00.000-08:00

A Galiza como grupo humano diferenciado tem sido em diverssos intres históricos reconhecida como tal, como naçom. Em Berna, no 1933, tivo este reconhecimento pola Sociedade de Naçons a partir das gestons realizadas pola militáncia do Partido Galeguista deslocada a aquela localidade suiça. Contodo, o nosso país nom tem ainda atingida a sua plena soberania e, como conseqüência, tampouco o grau de ben-estar que nos corresponde à maioría social; sendo na prática apéndices dum Estado que nos desprécia e maltrata, a modo colonial, como despensa de produtos naturais básicos e mao-de-obra.

É por isto polo que segue a ser necesário trabalhar em favor da nossa emancipaçom nacional, e é por isto polo que o movimento autodeterminista, do que fazemos parte, segue a desenvolver um trabalho intenso para aumentar o seu peso social, numha linha mantida contra vento e maré desde hai máis de século e médio. Nestes parámetros, fica convocada umha MANIFESTAÇOM que percorrerá as ruas de Vigo o vindeiro 6 de dezembro. A entidade da que parte a iniciativa é a unidade cívida CAUSA GALIZA.

Dias antes, o vindeiro 1 de dezembro, sábado, o C.S. Roi Soga, assi como Galiza Nova, desenvolveremos um CONCERTO pola AUTODETERMINAÇOM! Neste encontro, que se desenvolverá no IES Companheiro Daniel de Noia (Campo de San Alberto, oficialmente) a partir das 22.00hrs diverssos grupos musicais da nossa bisbarra cantarám a favor da indepêndencia nacional, para além de se dar umha intervençom política denunciando o marco jurídico-político de submetimento no que fica a Galiza.

Agardamos ver-vos a todas e a todos no concerto!

Saúde e Pátria!

INSCRIÇOM DE CURSOS JÁ ABERTA!

2007-10-27T05:03:00.000-07:00

Na passada semana publicitamos diante de diverssos meios de comunicaçom a apertura dos cursos do Centro Social.

Umha ampla oferta é a que apresentamos para tentarmos satisfazer as demandas de todas e todos vós... polo momento estám a ter um grande éxito pandeireta, gaita, montage audivisual...

Lembra que temos tamém aulas de francês, electricidade e jardineiria doméstica, guitarra acústica, teatro para cativas/os e adultas/os, pintura de relaço/expressom corporal...

Olha o cartaz e inscribe-te!

+ INFO roisogadelobeira@gmail.com

JÁ FICA ACTIVO O HORÁRIO DE OUTONO NO C.S.

2007-09-28T00:54:00.000-07:00

Umha vez rematamos a etapa estival, a chegada do tempo outoniço obriga a cambiar de hábitos, dinámicas... No Centro Social Roi Soga adequamos o nosso horário a esta realidade. Desde hoje, 28 de setembro, o C.S. ficará permanentemente aberto as Sextas/Venres e Sábados de 19.00hrs a 24.00hrs e os Domingos de 11.00hrs a 14.00hrs. Para além deste horário, o C.S. abrirá-se ao longo da semana en franjas de hora e média coincidindo cos cursos e seminários que se irán desenvolvendo... fica à espreita!

INÍCIO DA GRELHA DE CURSOS 2007-2008

2007-09-10T02:39:00.001-07:00

Este vindeiro outono será o primeiro para o C.S. Roi Soga de Lobeira. Neste novo curso está previsto desenvolver umha série longa de actividades. Desde as máis lúdicas até aquelas encaminhadas a fornecer de certas destrezas e conhecimentos a quem quiger adquiri-los. Desde a informática até a música popular galega, do desenho gráfico à electricidade ou a ediçom audiovisual... Neste senso, a finais de mes apresentará-se a grelha de cursos que se ofertarám desde O ROI. Nesta altura está-se a manter contacto coas sócias e sócios para verificar as aulas e cursos que som os máis solicitados e assi desenvolver aqueles que máis interesse suscitem... Se quigeres envia um correio-e a roisogadelobeira@gmail.com para fazer a tua sugestom!

ÉXITO DAS I JORNADAS DE FORMAÇOM

2007-08-15T03:14:00.000-07:00

A passada fim-de-semana desevolverom-se com grande participaçom as I Jornadas de Formaçom e Lezer. Por volta de cem pessoas participarom -entre moças e moços inscritos no encontro e aquelas que pontualmente se achegarom a algum dos actos celebrados- ao longo de tres dias nas jornadas sob a lenda "formando-nos para libertar Galiza".

Tal e como estaba previsto as Jornadas encetarom a sexta feira (venres), 10 de agosto, com umha ponência sobre "Consumismo e Lezer alternativo" da mao do historiador e activista do soberanismo Antom Santos. Nesta intervençom tentou-se dar conta da necessidade de fugir dos mecanismos e meios de "diverssom" que o sistema fornece à mocidade neste eido e que favorecem a alienaçom das moças e moços. Após esta intervençom, seguida dumha posta em comum desenvolveu-se umha ceia de confraternidade tendo como remate umha "foliada regueifeira".

O sábado 11, a partir das 11.30hrs, o arqueólogo Vítor Barbeito, do Centro de Interpretaçom Arqueológica do Barbança, sito nas proximidades do Castro de Neixóm, deu umha conferência introdutória a respeito da questom arqueológica no nosso país. Após da intervençom de Barbeito encetou-se umha caminhada desde o C.S. Roi Soga pola zona do Páramo e na altura de Argalo fixo-se um alto para que aquel "in situ" dera conta do património arqueológico galego diante da Anta da Cova da Moura. Despois prosegui-se a caminhada até a praia das Gaivotas (Porto do Som) onde se principiou um torneio de futvôlei.

Cara às 19.30hrs projectou-se o audiovisual "Línguas Cruzadas" da autoria de Maria Eanes a trevês do qual se reflexiounou sobre a situaçom da nossa lingua. A posta em comum estivo ilustrada e guiada polo lingüísta Eduardo Maragoto, quem trataou a distintos níveis sobre a espanholizaçom do nosso país assi como dos prejuiços existentes respeito o galego.

Após umha ceia e foliada as e os participantes marcarom cara o lugar habilitado para a durmida, em quanto o dia seguinte agardava o peche, altamente emotivo, das Jornadas...

O Domingo, 12 de agosto tocou a clausura das Jornadas. No 32 aniversário da morte em combate de José Ramóm, "Moncho", Reboiras, principou a manhá com umha charla sobre o nosso compatriota e o soberanismo galego na altura de 1964-1975. Da mao de Ugio-Breogám Diéguez percorreu-se a biografia de Reboiras. Este acto contou coa presença de Manuel e Sara Reboiras, irmao e sobrinha, respeitivamente, de Moncho. A charla foi seguida da inauguraçom da Sala "Moncho" Reboiras no C.S. de Noia convertindo-se esta num encontro altamente emotivo acompanhado polo canto do Hino Nacional.

De seguido as e os participantes destas Jornadas trasladarom-se a Imo onde tributarom umha homenage a Reboiras. Diante de onde se acham os seus restos Charo Lôpes, do C.S. Aturujo de Boiro, leu um contundente, brilhante e altamente, outra-volta, emotivo texto composto para a ocasiom. O acto rematou co canto do Hino Nacional e da Internacional.

Manifesto 12 agosto
[lido no cimetério de Imo]

O tricórnio esmagado (nos meus sonhos sempre ganham os bos). Mas com sonhos nom se ganham batalhas. Quando os pensamentos nom nascem em palavras o silenço é o homicida da revoluçom. E as palavras tenhem que erguer punhos, e os punhos tenhem que empunhar fouces. O mal nom é ente abstracto que fabrica e vende armas a nenos, que tortura algemados de goenlhos, que oprime povos...

Há muitos sentimentos estando aquí, ante a tumba dum galego que é semente. A carragem polo seu assasinato, a admiraçom polo seu esforço, a solidariedade coa sua luita... Que estejamos aquí 32 anos depois nom é umha simples homenagem à sua memória, nom é umha louvança a velhos heróis e mártires doutro tempo. Resulta vital falar da vigencia da luita, este mesmo ano vivimos a grêve do naval em vigo, onde tambem o Moncho estivo trabalhando em “Asteleiros Barreras” comprometido coa luita sindical, e vemos que pasarom os anos mas nom houbo mudanças substanciais. Nem nos convencem após anos de autonomismo. Neste ano vimos Ferrol em pé contra de Reganosa, escuitamos berrar desde Compostela que Galiza nom se vende, comezou o movemento estudantil contra o proceso de Bolonha... Nom queremos ser cúmplices. Temos que berrar, quando nos oprime a verdade no peito.

Os centros sociais parecem hoje umha resposta, um meio para fazer ouvir às pessoas silenciadas, para criar outras tendências, para oferecer outras espectativas, e sobre todo para tomar um papel activo. Para participar, para ver que podemos. É frustrante ser só espectadora do espectaculo que nos montam, jogando cada quatro anos à democracia escrevendo siglas numha papeleta.
Tambem para relacionarmo-nos, para falar coa gente, para criar laços, redes, para volvermo-nos poderosas. A autoorganizaçom é imprescindível para actuar.

Podemos rememorar dende os mártires de Carral até Reboiras, un home que luitou polo que considerou justo, como luitarom outros antes e como hoje se continua a luitar. Que chegou pola sua militáncia até as últimas conseqüencias, que deve ser para nós um exemplo. Mas tambem cumpre valorar o mártir colectivo, que marchou fóra, que se desangrou nas corredoiras, que aturou a humilhaçom. Assim coma ao heroi colectivo, que se ergueu, que se botou ao monte, que berrou, que lhe cuspiu na cara ao cacique e ao ministro de Madrid. O povo que berra lume! E resiste e resposta.

A guerra nom a ganha um so home, debemos valorar o que fixo Reboiras, mas tambem debemos pensar em todo o que nos deixou por fazer. Se consideramos justa a sua causa. Se é legítima a luita polo nosso direito a decidir sobre nós e na nossa casa. Já estamos fartas de termos que marchar, de termos que calar. Se nom o querem entender teremos que ensinar-lhes os dentes, porque nom nos enganam.

Há muitas frontes. O estado espanhol, como principal mandariqueiro nos nossos asuntos.
E logo o capitalismo:
Porque o Corte Inglés diz-me que o amor é proporcional ao número de quilates do ouro dum anel
A valia pessoal vai puntuada e descrita no Curriculum Vitae
A beleça consegue-se com Loreal
O prestígio determína-o a marca do teu carro
A saúde das tuas filhas vai dentro dum iogur de soia trasgénica
O bisom é um tipo de abrigo para a tempada outono-inverno.
E a felicidade guarda-se num bolso de Chanel

Mas, o Corte Inglés é um mentireiro.
Ou é que nom me queres mai, Quando me regalas bicos de valor incalculável?
E a beleça voa no falar, no olhar e nas carbalheiras
E a cultura máis grande, a dum povo, nom passa exame
E tamén levo umha saca chea de pretígio no pacote de atrás da minha bicicleta
E pedaleo saudavelmente sen aporte extra de bífudus.
Os bisoms fóra dos andeis da peletaria tenhem vida própria.
Ademais, nom podo, de ningumha maneira, levar a felicidade guardada.

Mas resulta dificil falar de revoluçom nestes dias, co ruído da televisom sempre de fondo. Pero temos que comprometer-nos. Continuar na defensa da terra. Amarrar-nos aos carvalhos. Comprometer-nos na defensa da língua. Berrar só em galego. Esigir os direitos do Povo Travalhador. Queimar as ETTs. Agarrar aos machos polas orelhas, que nom queremos ser princesas. Saber o que pasou, recuperar a memória. Falar cos velhos. Temos que resistir o afogo repressivo. Vivir a realidade Erguérmo-nos. Participar, Acçom directa... Apagar dumha vez a televisom.

Moncho Reboiras, a luita continua.

1º CICLO DE CINEMA

2007-08-09T05:45:00.000-07:00

Entre as diversas actividades que estám na agenda do C.S. Roi Soga fica o desenvolvimento de ciclos de cinema. A travês destes achegaremos obras cinematográficas a partir das que reflexionar, debater mais tamém pasar un cacho de tempo agradável entre amigas e amigos.

Desta vez, som tres as películas que pasamos do director e músico sérbio Emir Kusturica (1954, Saraievo)...

+Info deste autor em http://pt.wikipedia.org/wiki/Emir_Kusturica .

ANIMAI-VOS E PARTICIPADE DO CICLO DE CINEMA!

JORNADAS DE FORMAÇOM E LEZER

2007-08-01T03:26:00.000-07:00

Umha das principais actividades do C.S. Roi Soga é a formaçom. Nesta orde de cousas, e junto aos C.S A Fouce (Bertamiráns) e Aturujo (Boiro), desenvolverám-se entre os dias 10, 11 e 12 de agosto as primeiras Jornadas de Formaçom e Lezer "Formando-nos para libertar Galiza" que som, em grande medida, herdeiras daquelas "jornadas Alexandra Bóveda para a reflexión e o debate" que hai anos se desenvolviam na bisbarra da Ría de Muros e Noia sob a participaçom da A.S.C. Roi Soga de Lobeira.

Estas novas jornadas combinam a formaçom co necesário lezer. Serám várias as ponéncias que se desenvolverám, desde a desfeita do nosso entorno natural até a história do nacionalismo galego, pasando por umha reflexom profunda sobre a realidade genérica do tempo de lezer na actualidade e as alternativas ao "desfrute" consumista do tempo livre...

Aliás, nas jornadas haverá espaço para as projecçons audiovisuais, as foliadas, os jogos populares e o desporto. A este último respeito, desenvolverá-se um encontro de futvôlei, aberto a todos os centros sociais do país, na noiesa praia de Testal, assi como caminhadas polo monte, (re) conhecendo o rico património arqueológico da zona.

As Jornadas pecharám-se o 12 de agosto, data na que se lembrará a Xosé Ramón, Moncho, Reboiras no seu 32 cabodano, procedendo-se a inaugurar a sala que leva o seu nome no marco do C.S. Roi Soga. Apôs a inauguraçom marchará-se até Imo onde se lhe tributará umha homenage na terra que viu nascer hai 57 anos a um dos cadros máis significativos do soberanismo galego do último terço do século XX.

As jornadas tenhem umha inscriçom de 10 € que inclui as ceias do 10 e 11

PROGRAMA DETALHADO

Sexta-feira (venres) 10 de agosto

Começo das jornadas às 20:00hrs.Charla sobre lazer (problemas e alternativas)

Ceia de apresentaçom. Foliada regueifeira

Sábado 11 de agosto

Às10:00 Charla sobre o deterioro do litoral galego. Roteiro (8kms) polo Páramo com umha parada em Argalo, onde fica a Anta da Cova da Moura. Fará-se umha introduçom ao património arqueológico galego. Fim do roteiro na Praia de Testal (Noia), lá campionato de futvôlei.

A partir das 16.30hrs encontro de jogos populares populares no passeio marítimo de Noia. A partir das 18.00hrs projecçom do documentário "Línguas Cruzadas" e palestra sobre a questom lingüística na Galiza

Domingo 12 de agosto

Às 10.30hrs Palestra sobre a história do nacionalismo (1960-1975) e de Moncho Reboiras. Inauguraçom da "Sala Moncho Reboiras" no C.S. de Noia. Roteiro (7kms) desde Rialinho (Dodro) até Imo e homenagem no cimetério desta localidade a Reboiras a partir das 14.00hrs. Volta a Rialinho e jantar popular.

Estam incluidas todas as comidas (almorços, jantares e ceias) e as durmidas das duas noites (necesário trazer um saco de durmir).

Todo polo módico preço de 10 euros, agardamos-vos a tod@s em Noia!!!!

+ info 650.87.70.46 ou 629.31.12.68

Éxito na inauguraçom do Centro Social Roi Soga

2007-07-23T05:35:00.000-07:00

O sábado 21 de julho desenvolveu-se com grande éxito a inauguraçom do C.S. Roi Soga de Lobeira. No marco d'O Roi congregarom-se por volta de 100 perssoas que arrouparom o projecto que encarna na bisbarra da Ria de Muros-Noia o devandito C.S.

Iniciou-se a jornada, conduzida por Iago Figueiras, coa projecçom do trabalho audiovisual que recolhe o processo de posta em andaina do espáço físico onde fica o C.S. para, despois, intervir o responsável d'O Roi, Ugio-Breogám Diéguez. Este, numha sua intervençom política, deu conta de que o Centro Social, assi como a rede de Centros existente no país, vém a remoçar o tecido social e cultural reivindicativo do país, entroncando co que representara a partir do 1975 a Fronte Cultural da Assembleia Nacional-Popular Galega -AN-PG- (na que militarom várias e varios integrantes d'O Roi)... Um remoçamento cos pés na chao, para tomar pulo que asegure umha nova e produtiva etapa para o soberanismo galego.

Apôs esta intervençom cantou-se o hino nacional e principiou-se a foliada que durou até a madrugada.

Inauguraçom Centro Social em Noia

2007-07-20T01:24:00.001-07:00

Logo de meses de trabalho pom-se a andar o Centro Social Roi Soga de Lobeira. A casa comum do soberanismo na bisbarra da Ria de Muros e Noia abrirá as suas portas o vindeiro sábado 21 a partir das 20.00hrs.

O programa de actos, conducido por Iago Figueiras, consta da projecçom dum audiovisual, da autoria de Roi Ribeira, no que se amosa como tem sido o desenvolvimento de adequaçom do baixo onde fica ubicado o C.S., umha intervençom política a cárrego de Ugio-Breogám Diéguez, responsável do Centro, e umha actuaçom musical/foliada seguida dumha ceia de confraternidade. Os actos de inauguraçom ficam abertos a quem quiger participar deles sendo a ceia de balde.

O C.S. Roi Soga consta dumha superfície de 250m2 dividiva em dous andares e distintos espaços. Presidido polo Escudo da Galiza desenhado por Castelao, sob a lenda "Denantes Mort@s que Escrav@s", o C.S. conta com umha área de exposiçons, umha sala de leitura e formaçom -Sala Moncho Reboiras-, umha outra sala para o debate, conferências e audiovisuais -Sala Carlos Varela-, um cenário para obras teatrais, umha área de conexión sem fios à internet, assi como umha ampla cafetaria concerto. O C.S. fica ubicado na Rua Travessia nº3 de Noia.

Xantar de confraternidade, 29 de Abril

2007-04-10T01:20:00.001-07:00

Para o vindeiro 29 de abril a Coordenadora Galega de Roteiros, a Gentalha do Pichel e a Asociación Sócio-Cultural Roi Soga de Lobeira organizamos un xantar de confraternidade en Noia. Este acto enmárcase dentro da camiñada polo Río Tambre que se desenvolverá ao longo da fin de semana do 28 e 29 de abril e ao que asistirán persoas de diversos pontos do país. O prezo é de 12 €.

Quen quixer participar do mesmo pode porse en contacto coa organización no número de teléfono 629.31.12.68 ou correo-e roisogadelobeira@gmail.com.

Anímate e participa!

Camiñada polo río Tambre, 28 e 29 de Abril

2007-04-10T01:10:00.000-07:00

A Coordenadora Galega de Roteiros, o Centro Social A Gentalha do Pichel e a Asociación Sócio-Cultural Roi Soga de Lobeira artellamos unha camiñada ao longo do río Tambre. Unha chea de actividades serán as que se artellen para garantir o máximo coñecimento do meio ao longo do cal discorrerá a camiñada.

O sábado 28, o roteiro partirá desde Negreira (9.30hrs) cara Noia a onde se chegará á tardiña (20.30hrs). Contodo, haberá que estar ás 9.00hrs diante da Casa do Concello de Ames, en Bertamiráns, para partir cara a capital da Barcala. A dificuldade deste roteiro é media-alta.

Logo da chegada a Noia haberá unha festa cara ás 23.00hrs.

O domingo 29, cara ás 11:30hrs sairase desde o casco urbano de Noia cara o Monte San Lois, onde se aprofundará na riqueza medio-ambiental da zona e as agrasións que esta está a padecer. Para ás 15:00hrs fica organizado un un xantar (12 €) de confraternidade, onde música do país e xogos tradicionais acompañarán ás e aos excursionistas.

Após o xantar e un merecido descanso, arredor das 17:00hrs haberá unha camiñada urbana na que se falará da historia do nacionalismo xuvenil no primeiro terzo do século XX e, nomeadamente, dos Ultreia, nascidos en Noia no 1932.

En todo caso, poñemos ao teu servizo un teléfono, o 629.31.12.68, e un correo-e, o roisogadelobeira@gmail.com , por se quixeres máis información.

Remozando o proxecto!

2007-04-09T09:46:00.001-07:00

Ao longo dos últimos seis anos a Asociación Sócio Cultural Roi Soga de Lobeira desenvolveu diversos actos. A entidade entrou desde o verán do 2006 ao inicio do 2007 nunha fase de debate e reflexión interna para actualizar a súa presenza, obxectivos e prioridades. Nesta orde de cousas, criouse este espazo web, a través do cal manter unha canle permanente de comunicación co conxunto social. Aliás, a aposta clara pola confluencia con outras entidades nun espazo físico, común, a partir do cal tomar pulos novos, foi o outro grande acordo tomado após o tempo de reflexión. Agardamos que te sumes a esta nova fase do asociacionismo de base na Ría de Muros e Noia. Na imaxe acto celebrado en defensa do Río Vilacoba (Lousame) e en contra da construción dunha central hidroeléctrica coorganizado pola Roi Soga de Lobeira no 2001.