PiT Photography in Tamil தமிழில் புகைப்படக்கலை

முன்னேறிய 15 'வாண்டுகள்'..

2009-11-25T12:41:00.013+05:30

அன்பு நண்பர்களே,
வாண்டுகள் தலைப்பு கொடுத்தவுடன் கொஞ்ச நாட்களில் ஒரு போட்டோவும் வராததை கண்டு கொஞ்சம் வெறுத்து தான் போனேன். அதே சமயம் சில நிபந்தனைகளை தளர்வு செய்த பின் இவ்வளவு படம் வரும் என்றும் நினைக்கவில்லை. அதற்கு அனைவருக்கும் என் நன்றி.

வந்திருந்த படங்கள் அனைத்திலும் வாண்டுகள் இருந்தாலும் 3 படங்கள் இந்த தலைப்புக்கு கீழ் வருமா என்று யோசிக்க வைத்தது..

amal
prakash
ramachandran.

இந்த படங்களை பார்த்தால் வாண்டுகள் என்று சொல்வதை விட,மிகவும் பரிதாபத்திற்குரியவர்களாக தான் தெரிகிறது..

பொதுவாக வாண்டுகள் எனும்போது அவர்களின் சேட்டையை வைத்தே அந்த பெயர். மேலே இருப்பவர்களின் பரிதாப நிலையில் அவர்களின் சேட்டையை எங்கே பார்ப்பது ?

இந்த படங்கள் `street photography, life on streets`போன்றவற்றிற்க்குக்கு கீழ் வருமே தவிர,வாண்டுகள் தலைப்புக்கு வராது என்பது எனது கருத்து.

குழந்தைகளின் தனிப்பட்ட பிரச்சனைகள் என்பது வேறு, உணவு,உடை,கல்வி,குழந்தை தொழில் போன்ற வாழ்க்கை பிரச்சனைகள் என்பது வேறு..

ஒரு குழந்தை குறும்பு அல்லது அடம் பண்ணி, சாப்பாட்டிற்க்கு வழியில்லாமல் அழுவதற்க்கும் நிறைய வித்தியாசம் உள்ளது..

குறும்பு பண்ணி அழற குழந்தைகளை படம் எடுக்கலாம்,அது வாண்டுத்தனம். ஆனா இந்த மாதிரி சோகம் அப்படி ஆகாதுங்க.

இந்த மாதிரி படம் எடுக்கும் போது, நம்மால சில நடைமுறை காரணங்களால் அவர்களுக்கு உதவி பண்ணுவதற்க்கு வழியில்லாமல் போகலாம்,அந்த மாதிரி நேரத்தில்,அவ்ர்களை நாம் சிரிக்கவாவது வைக்கலாம். அப்படி சிரிக்க வைத்து, படம் எடுத்து அவர்களுக்கு காட்டினால் எவ்வளவு சந்தோஷப்படுவார்கள். அல்லது அவர்களது போட்டோவை print போட்டு தரலாம்..கண்டிப்பாக அவர்கள் மிகவும் சந்தோஷப்படுவார்கள்.

அப்புறம் valli simhan மற்றும் yaar yaar.. இந்த படங்களை எப்படிங்க எடுத்துக்கிறது? அந்த வாண்டுகளே இப்போ பெரிய வாண்டுகளுக்கு அம்மா அப்பாவா இருப்பாங்களே என்ன சொல்றீங்க. படமும் சுத்தமா தெளிவின்றி இருக்கிறது.

கடைசி பத்து....

VANDOKAL(over exposure)
SRINI (poor composition,அழும் குழந்தை,flash அதிகம்)
SELVA(poor composition,poor exposure)
GURUPANDI(poor composition,subject எங்கே?)
THIRUMAL(poor processing,focus)
TULSI GOPAL(poor shot,poor focus,)
ARURAN(தேதி,குழந்தையுடன் பெரியவங்க இருப்பது,தெளிவின்மை)
ARUN(இதெல்லாம் லொள்ளு)
GOPAL(harsh flash,nothing special)
DAS(poor focus,flash)

தயவு செய்து நிறைய பயிலவும்.. நீங்கள் கற்றுக்கொள்ளவேண்டியது நிறைய உள்ளது..உங்கள் படங்கள் அனைத்தும் இன்னமும் அருமையாக எடுத்திருக்க முடியும். ஏற்கனவே சொன்னது தான். உங்களால் முடியும். நிறைய எடுத்துப் பழகுங்க.

கடைசி 10 க்கு அப்புறம் வெளியேறியவர்கள்....

படங்கள் தலைப்புக்கு ஏற்றபடி இருந்தாலும்,குறைகள் சில இருப்பதால் வெளியேறியவைகள்.....அரையிறுதிக்கு கிட்டதட்ட நெறுங்கிய படங்களும் உண்டு,அவைகளுக்கு மட்டும் இங்கேயே comment கொடுத்துள்ளேன்..

DHANU
NAGAPPAN( வெளிநாட்டுல போட்டோ புடிக்கிறது கஷ்டம் தான்,படம் நன்றாக இருந்தாலும் blur அதிகமாக உள்ளது)
VANDU
BUHAIRAJA
PMT
MANIVASAGAM(படம் நன்றாக இருந்தாலும் composition சிறப்பாக இல்லை)
SIVARK
BOOPATHI(same as manivasagam)
DUDE
MATHAN
VISA
RAGU
GB
MATHANLAL
MURALI
KAAVIYAM
ARULRAJ
VIJAY
NANDAKUMAR
VINOD
ராஜேஷ்
VENNILA MEERAN
MUTHULETCHUMI
MAN(I)MATHAN
SEEMACHU
KAMAL
JEYA
BHARATHI
OPPAREE
NARAYANAN( அழகான pose, blur அல்லது out of focus)
KARTHIKEYAN ( same as nagappan)
RAMALAKSHMI ( படம் தெளிவாக இருந்தாலும்,simple ஆக உள்ளது)
RAGU
NATARAJ

இன்னும் நல்லா படம் எடுங்க...இதெல்லாம் பத்தாது நண்பர்களே... மத்தவங்க பாத்து மெரண்டு போகனும். ரெடியா இருங்க அடுத்த போட்டிக்கு

அரையிறுதிக்கு முன்னேறியவர்கள்....

Udayabaskar

Truth

Tjay

Senthil

S.M.Anbu Anand

Rajesh Natarajan

Nirmala Devi.R

Nila's Mom

MQN

Karthikero

Karthik

Karthi

Sathiya

Adith

Ayilyan

விரைவில் முதல் மூன்றுடன் சந்திக்கிறேன்...

-கருவாயன்..

ஷார்ப்போ ஷார்ப்பு.

2009-11-24T07:00:00.000+05:30

படங்களை UnSharpMask கொண்டு தெளிவாக செய்வது பற்றி ஏறகனவே ஒரு முறை இங்கே பார்த்து இருக்கிறோம். இந்த இடுகையில் Manny Librodo பிரபலமாக்கிய முறையை பார்க்கப் போகிறோம். உங்களின் படங்களை ஒளிவட்டம் ( halos), மற்றும் அதிக இரைச்சல் இல்லாமால் தெளிவாக ஆக்க இந்த முறை மிகவும் பயன்படும்.

இந்தப் படம் உதாரணதிற்கு .

வழைமை போலவே படத்தை கிம்பில் திறந்து நகலெடுத்துக் கொள்ளுங்கள்

Filters->Enhance-> UnsharpMask தெரிவு செய்துக்கொள்ளுங்கள்.

Radius=40 Amount=0.18 Threshold =0

மீண்டும் ஒரு முறை UnSharpMask

இந்த முறை Radius=0.3 Amount=1.5 Threshold =0

படம் தெளிவாக ஆகி இருக்கும்.

அடுத்து Edit->Fade Unsharp Mask

Opacity= 100 என்ற அளவை மாற்றாமல்

Mode -> Darken Only என்று மாற்றிக் கொள்ளுங்கள்

இனி இதே அளவை மீண்டும் ஒரு முறை Lighten Only க்கு செய்ய வேணும்.

எளிதாக Filters-> Repeat UnsharpMask

Edit->Fade UnsharpMask .
இந்த முறை Mode -> Lighten Only

அவ்வளவு தான். அனுஷ்க்கா இன்னும் அநியாத்திற்கு அழகாக தெளிவாக ஆகி இருப்பார். படத்தை கிளிக்கி பெரிதாகப் பார்த்தால் வித்தியாசம் தெளிவாகத் தெரியும்.

அவ்வளவுதான் . அனைவரும் Mannyக்கு ஒரு நன்றி போட்டுக்கொள்ளவும்.

சுருக்கமான வழிமுறை.

1. Duplicate Layer
2. UnSharpMask 40 0.18 0
3.UnSharpMask 0.3 1.5 0
4. Edit->Fade Mode:Darken Only
5. UnsharpMask 0.3 1.5 0
6. Edit->Fade Mode: Lighten Only
7. Flatten image

சில நீட்சிகள்

2009-11-17T01:01:00.000+05:30

புகைப்பட ஆர்வலர்களுக்கான இலவச நீட்சிகள் FireFox உலாவியில் பல இருக்கின்றன. நான் அதிகம் பாவிக்கும் இரண்டு இங்கே

TinEye :

புகைப்படங்களை தேடுவதற்கான நீட்சி இது. ஒரு படத்தை அல்லது படத்துக்கான நிரலை அளித்தால், இதே போன்ற படங்களை வலையில் தேடித் தரும்.படத்துக்கான Google என்று கூறலாம். உதாரணதிற்கு எனது இந்தப் படத்தை இங்கே தேடினால், ஆறு இடங்களில் சுட்டு போட்டு இருக்கிறார்கள் என்று காட்டுகிறது .

இவர்கள் மேல் திருட்டு வழக்குப் போடலாமா என்று யோசித்துக் கொண்டு இருக்கிறேன் :-)

FireShot:

பிகாஸாவில் Screen Shot எடுப்பது பற்றிய இடுகை இங்கே. இது அதை விட எளிது. FireFoxல் இருந்து நேரடியாக எடுத்துக் கொள்ளலாம்.

சில அழகான பிற்சேர்க்கைகளும் செய்ய முடியும்.

உள்ளரங்கு புகைப்படக் கலை 001

2009-11-10T19:00:00.001+05:30

நல்ல சீரிய சூரிய ஒளியில் இயற்கை அழகை புகைப்படப் பெட்டியில் பிடிப்பது எல்லோருக்கும் பிடித்தமான ஒன்று. அதே நேரம் இரவின் அழகையும் பிடிக்கலாம். நட்சத்திரங்கள், ஜொலிக்கும் விளக்குகள் என நிறைய இருக்கிறது.

ஆனால் உள்ளரங்கில் எடுக்கப்படும் புகைப்படத்தின் தரம் எதிர் பார்த்த அளவு வருவதில்லை. முக்கிய காரணம் போதுமான வெளிச்சம் கிடைக்காதது.

சில படங்கள் ரொம்ப கறுத்து ஒன்றுமே தெரியாமல் போகும். இல்லாட்டா கை நடுங்கி நாலு பெக் அடிச்சிட்டு அப்புறமா எடுத்த மாதிரி இருக்கும். அதை சரி செய்ய ஃப்ளாஷ் அடிச்சா போச்சு... உள்ளதும் போச்சுடாங்கற கதையா போய்டும்.

ஆனால் இதையெல்லாம் சமாளிச்சு இருக்கும் வெளிச்சத்தை மேம்படுத்தி அல்லது இயன்ற அளவுக்கு தேவையான வெளிச்சத்தை உருவாக்கி வீட்டினுள்ளும் அருமையான படங்களை எடுக்க முடியும்.

ஏற்கனவே விளம்பரங்கள் போட்டிக்கு வந்த படங்களின் தரத்தையும் நினைவுக் கூர்ந்து பார்க்கலாம். வெளியில் எடுக்கும் புகைப்படத்தை விடவும் வீட்டில் எடுக்கும் புகைப்படத்திற்கான ஒளியை நம்மால் கட்டுப்படுத்தி தேவையான அளவு மட்டுமே புகைப்படம் எடுக்கப் போகும் பொருளின் மீது விழச்செய்ய முடியும்.

நம்புங்கள் நம்மால் முடியும்...

இங்கே நாம் விவாதிக்கப் போவது

இருக்கும் ஒளியை எப்படி மேம்படுத்தி உபயோகிப்பது
Portrait & Tabletop photography
வீட்டிலேயே தேவையான ஒளிக்கருவிகளை செய்து கொள்வது & உபயோகிக்கும் முறைகள்.
கண்ணாடி பொருட்களை புகைப்படமெடுக்கும் நுணுக்கம்
நகை, சிறு பொருட்கள் ( மொபைல் போன், எலெக்ட்ரானிக் கேட்ஜட் )
லைட் பெயிண்டிங்.

விடுபட்டவை ஏதும் இருப்பின் பின்னூட்டத்தில் சொல்லவும். இந்தத் தொடரை வெறும் "மற்றுமொரு பாடமாக" இல்லாமல், நீங்களும் பங்கெடுத்து செயல்பட்டால் மட்டுமே வெற்றிகரமாக அடுத்த கட்டத்திற்கு கொண்டு செல்ல முடியும். சொல்லப்படுபவகளை முயற்சித்து பார்த்து அதற்கேற்ப வரும் பின்னூட்டங்களே இது போன்ற பதிவுகளை அடுத்தக் கட்டத்துக்கு கொண்டு செல்ல உதவும் காரணிகள்.

அடுத்த பதிவு - குறைந்த விலையில் சிறு பொருள்களைப் படம் பிடிக்க லைட் டெண்ட் அமைப்பது எப்படி ? ( செய்முறை விளக்கங்களுக்கான படங்களுடன் வருவதால் சற்றே தாமதம் ஆகலாம். நிதானித்தருள்க )

கூடிய விரைவில் சந்திப்போம். அதுவரை....

சில படங்கள் :)

ஃபெராரி - ஜீவ்ஸ் :.
செர்ரீஸ் - ஆனந்த்:.

கோக் - கைப்புள்ள:.

என்ன தவம் செய்தனை.. யசோதா - ஜீவ்ஸ்:.

LG Cookies - Jeeves :.

Yeaaay... Lets start the wheel rolling.....

2009 நவம்பர் மாத போட்டி, நிபந்தனைகள் சில தளர்வுகள்....

2009-11-10T18:02:00.008+05:30

அன்பு மக்களே,

சிரமத்திற்கு மன்னிக்கவும்.. நான் சொன்ன மாதிரியே எல்லோரும் கண்டபடி திட்டியிருப்பீங்க... ஆனா,இவ்வளவு சீக்கிரம் நடக்கும்னு நெனைக்கவே இல்லை.. நான் முன்ன பின்ன வெளியே போயிருந்தா குழந்தைகளை படம் பிடிப்பது கஷ்டம்னு கொஞ்சமாவது தெரிஞ்சிருக்கும்.. இப்போ நல்லாவே புரிஞ்சுகிட்டேன்..

அதனால,கொஞ்சம் நிபந்தனைகளை மட்டும் தளர்த்திக்கொள்ளலாம் என்று முடிவுக்கு வந்துள்ளோம்..

தலைப்பு வாண்டு(கள்) தான், அதனால, ஒரு வாண்டு இருந்தாலும் பரவாயில்லை..கண்டிப்பா நீங்க ஒரு குழந்தையையாவது படம் எடுத்திருப்பீங்க..இந்த தலைப்பு உங்களுக்கு சிரமம் இருக்காது என்று நினைக்கிறேன் மக்களே...

ஆனா மக்களே, எங்க வீட்ல நானும் ஒரு குழந்தை மாதிரி தான்,அப்படின்னு உங்க photoவை அனுப்பீடாதீங்க...

ஆகவே,மீசை வெச்ச குழந்தைகளும்,தாவணி போட்ட தீபாவளிகளும் கண்டிப்பா கிடையாது...

மேலும்,இது வரையில் அனுப்பியவர்களுக்கும் இன்னொரு வாய்ப்பு தருகின்றோம்..
அவர்களும் இன்னொரு முறை அனுப்பலாம்..ஏனென்றால்,அவர்கள் இதை விட நல்ல படமும் வைத்திருக்கலாம்..

அதுவுமில்லாமல், மேலும் 5 நாட்கள் நீட்டிப்பு செய்கிறோம்,எனவே போட்டிக்கு புகை படங்களை அனுப்ப வேண்டிய கடைசி தேதி:20-11.2009

சில சாம்பிள்கள்...

என்ன மக்களே,இப்போ உங்களுக்கு சந்தோஷம் தானே... புதுசு புதுசா அசத்துங்க...

கலரடிக்கலாம் வாங்க !

2009-11-05T00:02:00.000+05:30

கருப்பு வெள்ளைப் படங்களுக்கு கலரடிப்பது ( Tinting) மிகப் பிரபலம். பொதுவாக Sepia tone படங்களை நிறையப் பார்த்து இருப்பீர்கள். இதுபோன்ற படங்களை எளிதாக கிம்பில் செய்வதுப் பற்றி இங்கே.

படத்தை கிம்பில் திறந்து பின்ணணி லேயரை நகலெடுத்துக் கொள்ளுங்கள். உங்களின் படம் வண்ணப்படமாக இருந்தால் அதை முதலில் கருப்பு வெள்ளைக்கு மாற்ற வேண்டும். அதற்கு எளிதான வழி Colors->Desaturate...

Luminosity தேர்ந்து எடுத்துக் கொள்ளுங்கள். படம் கருப்பு வெள்ளைக்கு மாறி இருக்கும்.

இனி Colors-> Colorize... தெரிவு செய்யுங்கள்.

இங்கே மாற்றுவதற்கு மூன்றுப் பகுதிகள் இருக்கும். Hue, Saturation மற்றும் Lightness.

Sepia க்கு மாற்ற Hue = 36, Saturation =20 Lightness=0 என்று தெரிவு செய்துக் கொள்ளுங்கள். உங்களின் தேவைக்கு ஏறப மாற்றிப் பாருங்கள்.

Sepia மட்டும் அல்ல உங்களுக்குப் பிடித்தமான வண்ணத்தாலும் படத்தை மாற்றிக் கொள்ளலாம். உதாரணதிற்கு

Hue= 230 Saturation=32 Lightness =0

Hue= 352 Saturation=64 Lightness =0

அவ்வளவுதான் வேலை.

விளையாடிப் பார்த்து அடுத்த முறை வெறும் கருப்பு வெள்ளைக்கு மற்றும் மாற்றாமல், இந்த முறையிலும் கலரடித்துப் பாருங்கள்.

படம்பிடித்தல் - அ முதல் ஃ வரை...

2009-11-01T21:08:00.001+05:30

உள்ளூர் நூலகத்தில், National Geographicன் 'The Ultimage Field Guide to Photography' என்ற புத்தகம் கண்ணில் பட்டது. புகைப்படத் துறையின் ஜாம்பவான்கள் சிலர், கூட்டாக, உபயோகமான நுட்பங்களை வெளியிட்டிருக்கும் புத்தகம் இது.

ஆ முதல் ஃ வரை எல்லாத்தையும் வெவரிச்சிருக்காங்க. பாதி தான் பொரட்டிருக்கேன். மீதிப் பாதி பொரட்டரதுக்குள்ள, அங்கே படித்து அறிந்து கொண்ட சில 'டிப்ஸை' இங்கே அள்ளி வீசலாம்னு தோணிச்சு.
அதான், புக்கை மூடி வச்சுட்டு தட்டச்ச வந்துட்டேன். மொத்தமும் அங்கேருந்து உருவினது இல்லை. இடை இடையே சொந்த சரக்கும் கலந்து விட்டிருக்கேன்.

அ. கேமரா வாங்குவது பற்றி...

இதை PiTலும் நல்லா அலசியிருக்கோம். படிக்காதவங்க படிச்சுக்கோங்க.
உங்க பட்ஜெட் எந்த அளவுக்கு பெருசா இருக்கோ, அந்த அளவுக்கு ஆராய்ச்சி பண்ணுங்க. ஆராய்ச்சி பண்ண சில முக்கிய தலங்கள் இவை:
http://photographyreview.com, http://camerareview.com,
http://decresource.com,
http://imaginc-resource.com,
http://steves-digicams.com

ஆ. Point & Shoot கேமரா வைத்திருப்பவர்களுக்கு...

நல்ல படங்கள் எடுக்க DSLRதான் வேணும்னு அவசியம் இல்லை. குறைந்த விலையில் கிட்டும் பாயிண்ட் & ஷூட்டும் ஓ.கே.
கைக்கடக்கமா குட்டியா இருக்கரதால இந்த கேமராவின் ஒரே ப்ரச்சனை, கெட்டியா பிடிச்சு, ஸ்டெடியா படம் எடுக்கரது கஷ்டம்.
எனக்குத் தெரிஞ்ச ஒரு பெருசு படம் புடிக்க சொன்னா, கேமரா க்ளிக்கரை மட்டும் அழுத்தாமல், மொத்த கேமராவையும் க்ளிக்கி ஒரு ரெண்டடி வரைக்கும் கேமராவ ஆட்டுவாரு. படம் ஷேக்காகித் தான் வரும், இப்படி எடுத்தா. முடிந்தவரை, இரண்டு கையிலும் ஸ்டெடியா புடிச்சு, அலுங்காம குலுங்காம எடுக்கப் பழகிக்கங்க. கிட்டார் கத்துக்கும்போது சொன்னாங்க, சும்மா ஒக்காந்து டிவி பாக்கும்போதும், கை விரல்களை கிட்டார் வாசிப்பது போல் ப்ராக்டீஸ் பண்ணிக்கிட்டே இருக்கணும். அப்பத்தான், விரல் திடமாகும்னு. அதே மாதிரி, நீங்களும் ஆள்காட்டி விரலை பென்ச்சில் க்ளிக்கிக்ட்டே இருங்க. அந்த ஒரு விரல் மட்டும்தான் ஆடணும், மொத்த உடலும் அல்ல.

உங்கள் கேமராவில் இருக்கும் digital zoomஐ பயன் படுத்தாமல் இருத்தல் நலம். optical zoom உபயோகித்து படம் புடிச்சு, அப்பரம் தேவைப்பட்டா க்ராப் பண்ணிக்கோங்க. digital zoom கொண்டு எடுக்கும்போது, படத்தின் தரன் குறைஞ்சிடும்.

உங்க கேமராவின் வேகம் என்ன, எவ்ளோ சீக்கிரமா அது படம் எடுக்க முடியுங்கரத, ப்ராக்டீஸ் பண்ணி தெரிஞ்சுக்கோங்க. அதன் வேகத்துக்கு ஏத்த மாதிரி, குழந்தையை ஃபோட்டோ எடுக்கும்போடோ வேர ஏதாவது, அசையும் பொருளை எடுக்கும்போதோ உங்களை நீங்க தயார் படுத்திக்கலாம். focus lock (half press) எப்படி பண்றதுங்கரதும் அவசியம். க்ளிக்கரை முழுசா அமுக்காம பாதி அமுக்கினா, நீங்க எடுக்கவிருக்கும் படம் ஃபோக்கஸ் ஆயிடும், அப்பரமா, குழந்தை சிரிக்கும்போது, மீதிப் பாதி அமுக்கிட்டா, நீங்க நெனச்ச படம் கெடச்சிடும். முழு க்ளிக்கும் ஒரே வீச்சில் பண்ணினா, குழந்த சிரிச்சு முடிச்சு, 'இப்ப என்னா பண்ணுவ?'ன்னு வில்லங்கமா பாக்கும்.

இ. அடிப்படைகள்:

பிட்டில் ஏற்கனவே இதை அலசி ஆராஞ்சாச்சு. முதலில் இவைகளை படிக்காதவங்க படிச்சுடுங்க.
general tips,
Focal Length, F-Stop, DOF,
White balance,
Histogram,
Metering

ஈ. DSLR டிப்ஸ்:

ISO - இது உங்க கேமராவின், sensitivity/கிரஹிப்புத் தன்மையை நிர்ணயிக்கும்.
நல்ல வெயில் இருக்கும் இடங்களுக்கு 100ம்,
வெளிச்சம் குறைவான இடங்களுக்கு 400ம்,
இருள் சூழ்ந்த இடங்களில் 800 அல்லது 1600ம் உபயோகிக்கணும்.
வெளிச்சம் கம்மியாக ஆக, ISOவை கூட்டணும்.
ஆனால், ISO கூட்ட கூட்ட, உங்கள் படங்களின் தரம் கம்மியாகிடும். noise ஜாஸ்தி ஆயிடும், ஞாபகம் இருக்கட்டும்.

'Sunny f/16'ன்னு ஒண்ணு சொல்றாங்க. மேலே உள்ள பாடங்கள் படிச்சிருந்தீங்கன்னா உங்களுக்கு aperture/Fstopன்னா என்னான்னு தெரிஞ்சிருக்கும். வெளியில் பரந்து விரிந்த இயற்கை காட்சிகளை படம் பிடிக்கும்போது, உங்கள் ISOக்கு ஏத்த மாதிரி ஷட்டர் ஸ்பீடு அமைக்கணும்.
அதாவது, fstop f/16 (landscapeக்கு குட்டி அபெர்ச்சர் தேவை) வைத்து, ISO 200 வச்சிருந்தீங்கன்னா, ஷட்டரின் வேகம் 1/200 வைக்கணும்.
ISO 400 வச்சிரூந்தீங்கன்னா, ஷட்டரின் வேகம் 1/400.

ஒரு போர்ட்ரெய்ட் படம் எடுக்க 1/60 லிருந்து, 1/250 வரை ஷட்டர் வேகம் இருக்கலாம்.
ஓடும் வஸ்துக்களை ஷார்ப்பாக எடுக்க 1/1000 வைத்துக் கொள்ளலாம்.
1/60ஐ விட கம்மியாக எடுக்க வேண்டிய நிர்பந்தம் வந்தால், ட்ரைபாடு இல்லாமல் எடுக்காதீர்கள். படம் ஷேக்காகம வரது கஷ்டம்.

- உ டு ஃ தொடரும்,

2009 நவம்பர் மாத போட்டி அறிவிப்பு..

2009-10-30T13:48:00.018+05:30

அன்பார்ந்த பெரியோர்களே தாய்மார்களே ப்ளாக்கால பெருங்குடி மக்களே..வணக்கம் .

மொத தடவ உங்களையெல்லாம் போட்டியாளரா இல்லாம நடுவரா சந்திக்கிறதுல ரொம்ப சந்தோசம் ..கிட்டத்தட்ட ஒரு வருசமா போட்டோவ மட்டும் அனுப்பிட்டு, மற்ற போட்டோவை எல்லாம் ஒழுங்கா பார்க்காம , ரிசல்ட்ஐ மட்டும் பார்த்துகிட்டு,நம்ம போட்டோ வெற்றி பெறலைன்னா , ரொம்ப ஈசியா நடுவர கண்டபடி திட்டிட்டு போயிடுவேன்.. ஆனா அது எவ்வளவு தப்புன்னு இப்ப தான் ரொம்ப நல்லாவே உறைக்குது .. நமக்குன்னு ஒரு பொறுப்பு வரும் போது தான் நடுவரா இருக்கிறது எவ்வளவு சிரமம்ன்னு நல்லாவே புரியுது
அதுக்கு பரிகாரமா தான் இந்த மாசம் நானும் திட்டு வாங்கலாம்ன்னு வந்திருக்கேன்...

பொதுவா நம்ம எல்லோருக்கும் மறக்க முடியாத நாட்கள்,அழகான நாட்கள், அப்படின்னா உடனே நமது மழலை பருவம் தான் கண்டிப்பா தோணும்.. வெயில் படத்துல வர மாதிரி கண்டபடி நண்பர்களோடு சுற்றி திரிந்த அந்த நாட்களை எவ்வளவு தான் பெரிய ஆளா இருந்தாலும் கண்டிப்பா மறக்கவே முடியாது.. நாம பண்ணின சேட்டைகள்,குறும்புகள் பத்தி இன்னிக்கு நெனச்சாலும் பேசிக்கிட்டே இருக்கலாம்.

இப்போ இருக்கிற இருக்கமான சூழ்நிலைகள்ல, கொஞ்சம் தெரியாத்தனமா பார்க்காம போய்ட்டா கூட அதையே மனசுல வெச்சுக்கிட்டு கண்டபடி கற்பனை பண்ணி கொஞ்சம் கொஞ்சமா வளர்ந்து தெரு சண்ட வரைக்கும் போனதுண்டு..

ஆனா இந்த சின்ன பசங்கல்லாம் ,ரத்தம் வர்ற அளவுக்கு அடிச்சிக்கிட்டு அடுத்த பத்தாவது நிமிசமே சிரிச்சு சந்தோசமா பழசையெல்லாம் மறந்துட்டு தோல் மேல கை போட்டுக்கிட்டு சந்தோசமா நாட்களை `இப்படி தாண்டா வாழனும்ன்னு` நமக்கு புரிய வெப்பாங்க ..

நாம பல படங்கள்ல பார்த்திருப்போம் ,ரெண்டு குடும்பம் தீராத பகையோட இருக்கும் , அந்தந்த வீட்டு குழந்தைங்க கொஞ்சம் கொஞ்சமா குறும்பு பண்ணி, குடும்பத்த சேர்த்து வைக்கும்.. அதுக்கு சமீபத்திய உதாரணம் `பசங்க` படம்.

அவங்க தான் இந்த மாச தலைப்பு, பசங்கன்னு வெச்சா பொண்ணுங்க கோவிச்சுக்குவாங்க,

அதனால,இந்த மாச தலைப்பு `வாண்டுகள்`

வாண்டுகள்,சில சாம்பிள் படங்கள்..

குறும்பு,

(கருவாயன்)

அச்சம்,

(கருவாயன்)

விளையாட்டு,
(கருவாயன்)

சிரிப்பு,
(கருவாயன்)

நக்கல்,
(கருவாயன்)

பாசம்,
(கருவாயன்)

குதூகலம்,
(கருவாயன்)

வெட்கம்
(கருவாயன்)

மகிழ்ச்சி,
(கருவாயன்)

வாண்டுகளின் சிரிப்பு,கோபம்,கேலி,கிண்டல்,குறும்பு,நக்கல்,சோகம்,இன்னும் என்னென்லாம் முடியுமோ அத்தனையும் படம் பிடித்து அசத்துங்க..

இதுக்கு ஒரே ஒரு புது விதிமுறை தான், ஒன்றுக்கும் மேற்பட்ட வாண்டுகள் தான் இருக்கனும்..கண்டிப்பாக ஒரு குழந்தை மட்டும் இருக்க கூடாது.

ஒரு சில ஆலோசனைகள்,கட்டாயம் கிடையாது...

1. முடிந்த அளவு வாண்டுகள் மீதே கவனம் இருக்கும் படி பார்த்துக்கொள்ளுங்கள்.
2. தேதிகள் போட்டோவில் பதிவு ஆகாமல் பார்த்துக்கொள்ளுங்கள்.
3. முடிந்த அளவு flash இல்லாமல் படம் பிடிக்கவும்..
4. முடிந்த அளவு இயற்கையாக இருக்கட்டும்.அப்போ தான் படம் சிறப்பாக வரும்.
5. முடிந்த அளவு வெளியே போய் எடுத்தால் ரொம்ப நல்லா வரும்,flashம் தேவை இருக்காது.

போட்டிக்கான மாதாந்திர விதிமுறைகள்

ஆகவே உங்கள் பொன்னான படங்களை `வாண்டுகள்`சின்னத்தில் கள்ள ஓட்டு போடாமல் வாக்களிக்குமாறு பனிவன்புடன் கேட்டுக்கொள்கிறேன்..

நன்றி,வணக்கம்
கருவாயன்.

PiT அக்டோபர் 2009 - மோசமானவங்கள்லேயே முக்கியமானவங்க!

2009-10-28T10:38:00.011+05:30

"ஏய்! எல்லாரும் பாத்துக்கங்க, நான் கூட ரவுடி தான்"னு நாமே வலுக்கட்டாயமா போய் ஜீப்புல ஏறிக்காம, "டேய் ரவுடி! வந்து ஜீப்புல ஏறுய்யா"னு நமக்கு மரியாதை குடுத்து ஜீப்புல ஏற சொன்னா எப்படி இருக்கும்? PiT மாதாந்திர போட்டிகள்ல டாப் 10ல என்னோட படம் ஒரு ரெண்டு மூனு முறை இடம்பிடிச்சப்போ எனக்கு அப்படி தான் இருந்தது. புரொபஷனல் குரியர் ரேஞ்சுக்குப் படம் எடுக்கறவங்க மத்தியில நம்ம படமும் தேர்வாகியிருக்கேன்னு நெனக்கறப்போ ரொம்ப சந்தோஷமா இருக்கும். அதே மாதிரி சந்தோஷத்தை இந்த மாசப் போட்டியில டாப் 15இல் தேர்வான நீங்களும் அனுபவிச்சிருந்தீங்கன்னா என் சார்பா உங்களை நீங்களே 'சேம் பின்ச்' பண்ணிக்கங்க.

ரைட்டு. இந்த மாதப் போட்டி தலைப்பு பொம்மைகள். இந்த தலைப்புல நாங்க எதிர்பார்த்தது இதெல்லாம் தான்.
1. - காட்சியமைப்பு.
2. - தெளிவு
3. - இடர்பாடுகள்/கவனச்சிதறல்கள் இல்லாமை
4. - தேர்ந்தெடுக்கப்பட்ட வெளிச்சம் / வெளிச்சத்தை கையாண்ட முறை
5. - பார்த்த உடனே " அட" சொல்ல வைக்கும் க்ரியேட்டிவிடி

டாப் 15இல் இடம்பிடிச்ச ரவுடிங்க எல்லாருமே மோசமானவங்க தான்னாலும், மோசமானவங்கள்லேயே முக்கியமான அந்த மூனு பேரோட படங்களை இப்போ பாப்போம். தேர்வாகியுள்ள இந்தப் படங்களை அதுகளைப் பெத்தவங்க என்ன நெனச்சு எடுத்தாங்களோ தெரியாது, ஆனா எங்களை வெகுவாக ரசிக்க வைத்ததுடன் வித்தியாசமான சில விஷயங்களைச் சொல்ல முடிந்ததாகவும் நாங்க நெனைக்கிறோம்.

முதல் இடம் : MQN

டாப் 15இல் இருந்து முதல் இடத்தைப் பிடித்த இப்படத்தைத் தேர்ந்தெடுக்க அதிக நேரம் பிடிக்கவில்லை. இருவரும் ஒருமனதாகத் தேர்ந்தேடுத்துவிட்டோம். புகைப்பட ஆர்வலர்கள் பலரும் இப்படத்தில் இருந்து கற்றுக் கொள்ள வேண்டிய விஷயங்கள் உள்ளன. கறுப்பு பேக்ரவுண்ட் படத்தின் வண்ணத்தை எவ்வாறு மெருகேற்றுகிறது என்று கவனிக்கவும். அடுத்தது ஒளியமைப்பு. கரடியின் முகம் மட்டும் பளிச்சென்று தெரிவதை கவனிக்கவும். நம் கவனம் கரடியின் மீது செல்லவேண்டும் என்பதற்காக மிகக் கவனமாக ஃபோகஸ்சும் செய்திருக்கிறார். கரடி பொம்மைகள் என்றதும் பொதுவாக cute, chubby போன்ற பதங்கள் தான் நினைவுக்கு வரும். ஆனால் இப்படத்தைப் பார்க்கும் போது confident என்ற பதம் தான் என் நினைவுக்கு வருகிறது. தன்னம்பிக்கையுள்ள ஒரு இசை கலைஞனாக இக்கரடி பொம்மையை நாங்கள் பார்க்கிறோம். இப்படத்தைப் பற்றி ஒரு வரியில் சொல்ல வேண்டுமானால் "புது ராகம் படைப்பதாலே நானும் இறைவனே!".

இரண்டாம் இடம் : TJay

ஒரு பொருளைப் படம் பிடிக்கும் போது அது இருக்கும் சூழ்நிலையையும் காட்ட வேண்டும், ஆனால் அதனால் அப்பொருளின் மீது பார்ப்பவரின் கவனமும் குலையாமல் இருக்க எப்படி படம் எடுக்க வேண்டும் என்பதற்கு இப்படம் ஒரு மிகச் சிறந்த எடுத்துக்காட்டு. இரவு நேரத்தில் ஒரு குழந்தை தூங்காமல் உட்கார்ந்து கொண்டிருக்கிறது போன்றான இப்படத்தில், பின்புறத்தில் உள்ள மின்விளக்கு, குழந்தை பொம்மையின் மீதான நம் கவனத்தைத் திசை திருப்பாமல் படத்திற்கு வலு சேர்ப்பதை கவனிக்கவும். Backgroundஐ out of focus ஆக்கியிருப்பதன் மூலம் foregroundஇல் பொம்மை அழகாகத் தோன்றுவதை கவனிக்கவும். இதை "Background blurring" என்று சொல்வார்கள். குழ்ந்தை தலையைக் கவிழ்ந்து இரவு நேரத்தில் உட்கார்ந்திருப்பது ஒரு 'eerie feeling'ஐக் கொடுக்கிறது. குழந்தை நிமிர்ந்து பார்த்தால் என்ன செய்யுமோ என்று. 'பிள்ளை நிலா' அப்படிங்கிற பேருல பேபி ஷாலினி நடிச்ச படம் ஒன்னும் ஞாபகத்துக்கு வந்துச்சு.

மூன்றாம் இடம் : Udayabaskar மற்றும் Truth

இந்தப் படத்தில் காட்சியமைப்பு அருமை. சந்தோஷமான முகம் கொண்ட ஒரு குரங்கும் ஒரு குழந்தையும் மகிழ்ச்சியாக இருப்பது போன்ற ஒரு படம். ஒரு நண்பனின் தோளில் சாய்ந்து கொண்டிருப்பது போல குரங்கு சாய்ந்து கொண்டிருப்பது மிக அழகு. படத்தில் ஒரு சில இடங்களில்(முக்கியமான் இடங்களில் அல்ல) ஃபோகஸ் குறைவது போல இருப்பதை தவிர்த்திருந்தால் படம் இன்னும் சிறப்பாக இருந்திருக்கும். இப்படத்தைப் பார்த்ததும் எங்களுக்குச் சொல்லத் தோன்றியது "தோழா! தோழா! தோள் கொடு கொஞ்சம் சாய்ஞ்சுக்கனும்"

இந்த மாதப் போட்டியில் நிறைய பிள்ளையார் படங்கள் வந்தன. அதற்கு காரணம் பிள்ளையாரை "friendly neighbourhood" தெய்வமாகப் பலரும் பார்ப்பதாக இருக்கக் கூடும் :) ஆனால் டைட் க்ளோசப்பில் அழகிய நயனத்தைக் காட்டும் இந்த 'நயன்தாரா பிள்ளையார்' Truth அவர்களுக்கு கூட்டு மூன்றாவது இடத்தைப் பெற்று தருகிறார்.

சிறப்பு கவனம் : அமல்.

ஒவ்வொரு முறையும் உங்களின் காட்சியமைப்பு முறை பிரமாதப் படுத்துகிறது அமல். வாழ்த்துகள். கூடிய சீக்கிறம் உங்களை பிட்டில் சேர்த்துடனும்.

ஸ்பெஷல் பாராட்டு : பிரியதர்ஷன். MQN மாதிரி கொஞ்சம் வெளிச்சத்தை சரியா புடிச்சிருந்தீங்கன்னா.. முதல் படமா இது தான் வந்திருக்கும். சிரத்தையுடன் கூடிய உங்கள் உழைப்புக்கு எங்கள் குழுவின் பாராட்டுகள். இந்தப் படம் எப்படி எடுக்கப்பட்டது என்பதற்கான விளக்கம் இங்கே

இப்போ மோசமான மத்த பதினோரு பேர் - இவர்கள் ஏன் முதல் மூன்றுக்கு வரவில்லை என்பதற்கான காரணம் - மேலே குறிப்பிட்ட அஞ்சு பாயிண்ட்டுல ஒன்றோ அல்லது சிலவோ குறைவதுடன் நடுவர்களின் இரசனைக்கு ஏற்ப இல்லாமல் போயிருக்க வேண்டும். ஆனால் இவை அனைத்துமே அருமையானவை. இவர்கள் பட்டைத் தீட்டப் படக் காத்திருக்கும் வைரங்கள். வாழ்த்துக்கள் நண்பர்களே!

Aadav		Amal
Jeya		Kamal
Nila's Mom
Nundhaa		Oviya
Priyadarshan		Rajesh Natarajan
Ramalakshmi		Thulasi Gopal
From PiT Oct 2009 - பொம்மைகள்

முதல் மூன்றிடங்களைப் பெற்றவர்கள் படங்களை எடுத்த முறையை பகிர்ந்து கொண்டால் மற்றவர்களுக்கும் உதவியாக இருக்கும்.

மோசமானவங்கள்லேயே முக்கியமானவங்க, மோசமானவங்க இவங்கள்லாம் எப்படி இப்படி எல்லாம் படம் எடுக்கிறாங்கன்னு நெனச்சு ஆச்சரியப்பட்டு இந்த மாசம் தேர்வாகாதவங்க யாரும் மோசம் போயிட்டதா மட்டும் நெனச்சிடாதீங்க. காலங்கள் மாறும் காட்சிகள் மாறும் நீங்களும் மோசமானவங்களா மாறி 'லந்து பண்ணும்' காலமும் வரும். அதை மட்டும் மறந்துடாதீங்க. இந்த மாதப் போட்டியில் கலந்து கொண்டு சிறப்பித்த அனைவருக்கும் எங்கள் வாழ்த்துகளும் நன்றிகளும்.

முதல் மூன்றிடங்களைப் பெற்றவர்கள் படங்களை எடுத்த முறையை பகிர்ந்து கொண்டால் மற்றவர்களுக்கும் உதவியாக இருக்கும்

ISO - சிறு குறிப்பு

2009-10-26T22:21:00.023+05:30

வணக்கம் மக்கா,
வழக்கமா நாம படம் எடுக்கும் போது அபெர்ட்சர்(aperature) மற்றும் மூடுதிரை வேகம்(shutter speed) ஆகியவற்றை கருத்திற்கொண்டு எடுப்போம், இப்போ மூனாவதா ஒரு விடயத்தை பற்றி பாப்போம்.

ISO என்றால் (சர்வதேச நியதிகள் நிறுவனம் -International Organization for Standardization) .இவங்க பல பொருட்களின் அளவு, வடிவம், தரம், செந்தர வரையேடுகள்(standards) மற்றும் செயல் வழிமுறைகளை முறைப்படுத்தும் பணியினை செய்கிறார்கள். புகைப்படகலையில் ISO என்பது ஒளிபெட்டியின் உணரியின்(sensor) உணர்திறன்(sensitivity) அளப்பீடு. ISO அதிகரிக்க அதிகரிக்க உணரியின் ஒளி கிரகிக்கும் திறன் கூடுகிறது. இதனால் குறைந்த ஒளியில் கூட முக்காலி இல்லாமல் படம் எடுக்கலாம். பொதுவா ISO பின்வரும் அளபீடுகளில் இருக்கும் (100, 200, 320, 400, 640, 800, 1600 ....). ISO 100 என்பது அடிப்படை அளவு, இந்த ISO வில் தான் பெரும்பான்மையான நேரங்களில் படம் எடுப்போம்.

நீங்க ஒரு மீன்காட்சியகத்திலோ அல்லது உள்அரங்கு மேடை நிகழ்ச்சிகளை படம் பிடிக்கிறீர்கள் என்று வைத்துக்கொள்வோம். இவை இரண்டுமே ஒளி குறைவான இடங்கள். ISO 100 வச்சு படம் எடுக்கும்போது மூடுதிரை வேகம் மிக குறைவா தான் இருக்கும்( <>ஒளி இரைச்சல் அதிகமாக இருக்கும். DSLR ஒளிபெட்டியில் சத்த அளவு குறைவு. சத்தத்தின் அளவு ஒளிபெட்டியின் உணரியின் படத்துணுக்கு(pixel) அளவை பொருத்தது. படத்துணுக்கு அளவு சிறியதாக இருந்தால் படங்களில் ஒளி இரைச்சல் அளவு கூடும். (அதிகம் மெகாபிக்சல் உள்ள காமிராக்களில்[குறிப்பா பாயிண்ட் அண்ட் சூட்] படதுணுக்கின் அளவு குறைவாக இருக்கும், இதனால் ஒளி இரைச்சல் அதிகம் வரும்) பொதுவா ISO 100 வைத்தே படம் எடுங்கள். ஒளி குறைபாடு இருக்கும் போது மற்ற அதிக ISO அளவுகளை பயன் படுத்துங்கள். சிறிது ஒளி இரைச்சல் படங்களில் இருந்தால் கவலை படவேண்டாம். படங்களில் சத்தத்தை நீக்கும் இலவச மென்பொருட்கள் இணையத்தில் இருக்கின்றன. சில சமயங்களில் நல்ல ஒளி இருந்தும் கூட ISO கூட்டி வைக்கும் சூழ்நிலை ஏற்படும். விளையாட்டு நிகழ்ச்சிகளை படம் எடுக்கறவங்களுக்கு மூடுதிரை வேகம் 1/1000, 1/2000 இப்படி தேவை படும்(சிறு சிறு அசைவுகளை படம் பிடிக்க). உங்களுடைய ஒளிபெட்டியின் ISO செயல் முறைகளை அறிந்து கொண்டு முயற்சி செய்து பாருங்கள். கவனத்தில் வைத்து கொள்ள கூடிய ஒன்று இருக்கு. முதல் நாள் ISO அதிகம் வச்சு படம் எடுத்துட்டு அடுத்த நாள் காலையில் நல்ல வெளிச்சம் இருக்கும்போதும் கூட ISO அளவை மாத்த மறந்துட்டு ஒளி இரைச்சல் உள்ள படங்களை எடுக்க நேரிடலாம். அதனால் ஒவ்வொரு முறை ஒளிபெட்டியினை பயன் படுத்தும்போதும் ISO அளவினை சரி பார்த்துக் கொள்ளுங்கள். மற்றுமொரு விடயம், இப்பொழுது வரும் காமிராக்களில் "ஆட்டோ ISO" என்ற நுட்பம் வருகின்றது. இதன் பயன் என்னவென்றால், குறைந்தப்பட்ச மூடுதிரை வேக அளவை குறிப்பிட்டால், சூழ்நிலைக்கு ஏற்றாற்போல் ஒளிபெட்டி தானே ISO அளவுகளை மாற்றி அமைத்து கொண்டுவிடும். "Long Exposure" போன்று முக்காலி உதவியுடன் படம் எடுக்கும் போது இந்த "ஆட்டோ ISO" வை நிறுத்தி விடுங்கள். இன்னும் வேற எதாவது இருந்தா பின்னூட்டத்துல சொல்லுங்க. நன்றி !

PiT அக்டோபர் 2009 - முதல் குட்டைப் பட்டியல்

2009-10-26T14:00:00.011+05:30

இந்த மாதப் போட்டியில் முதல் சுற்றில் தேர்வான படங்களைப் பாக்கறதுக்கு முன்னாடி ஒரு விஷயம் சொல்லனும்னு நெனைக்கிறோம்ங்க. புகைப்படம் எதுக்கு எடுக்கறோம்னு யோசிச்சு பாத்திருக்கீங்களா? இரண்டு கண்களால் காண முடியாததை எதையும் நாம புகைப்படமா எடுக்கறதில்லை. அதுவும் நாம எடுக்கற புகைப்படம் மாதிரியே ஏற்கனவே யாராவது எடுத்து தான் வச்சிருப்பாங்க. அப்படியிருந்தும் நாமெல்லாம் புகைப்படம் எடுத்துக்கிட்டுத் தான் இருக்கோம். நாம எடுக்கற புகைப்படத்தைப் பாத்து நல்லாருக்குன்னு நாலு பேரு பாராட்டத் தான் செய்யறாங்க. ஏன்? புகைப்படம் எடுக்கறது ஒரு கலை - Work of Art. மற்ற கலை வடிவங்களை மாதிரியே தான் இதுவும். உதாரணத்துக்கு சினிமாங்கிற கலையை எடுத்துக்குவோமே. இருபத்தஞ்சு வருஷத்துக்கு முன்னாடி வந்த படத்தோட கதையை மறுபடியும் கொஞ்சம் வேற மாதிரி சொன்னா ரசிக்கத் தான் செய்யறோம். ஆக ரசனைங்கிறது சினிமா, இசை, புகைப்படக்கலைன்னு எல்லா விஷயத்துலயும் நமக்கு தேவைப்படுது. எந்த ஒரு கலை வடிவமும் மக்களோட ரசிப்புத்தன்மையை ரசனையை வளர்க்கனும். அப்போ தான் அது கலை. எனவே நம்முடைய ரசனையையும் அடுத்தவர்களுடைய ரசனையையும் வளர்த்துக் கொள்ள/வளர்ப்பதற்காக நாம புகைப்படம் எடுக்கறோம்னு சொல்லலாம்ங்களா? சரியா?

சும்மா படம் எடுக்கறதே ரசனையை வளர்க்கன்னு சொல்லும் போது, ஒரு போட்டிக்குன்னு கொடுக்கப்பட்ட தலைப்புல புகைப்படம் எடுக்கும் போது எப்படி இருக்கனும்? போட்டியில பங்கு கொள்ளற ஒவ்வொருத்தரும் தன்னோட சிறப்பான புகைப்படங்களைத் தேர்வு செய்து போட்டிக்கு அனுப்பும் போது போட்டி ரொம்ப பலமா இருக்கும். போட்டியில பங்குபெறவங்களுக்குத் தங்களோட படம் ஒரு வேளை தேர்வு ஆகலைன்னா ஏன் தேர்வாகலைன்னு தெரிஞ்சுக்கற ஆர்வம் கண்டிப்பா இருக்கும். நான் இதே போட்டிகள்ல போட்டியாளரா இருக்கும் போது என்னோட படம் ஏன் தேர்வாகலைன்னு தெரிஞ்சுக்கற ஆர்வம் இருந்தது. ஆனா போட்டிக்கு வர்ற மொத்தப் படங்களின் எண்ணிக்கையைப் பார்க்கும் போது ஒவ்வொரு படத்துக்கும் கருத்து சொல்லறதுங்கறது கொஞ்சம் கஷ்டமான காரியம் தான்னு இப்போ எனக்கு புரியுது. இருந்தாலும் ஒவ்வொருத்தரும் ஒவ்வொரு நம்பிக்கையில, மனசுல ஒவ்வொரு கருத்தை வச்சிக்கிட்டு படம் எடுத்துருப்போம். உங்களோட அந்த நம்பிக்கைக்கு மரியாதை பண்ணும் பொருட்டு புகைப்படம் எடுக்கறப்போ கவனத்துல கொள்ள வேண்டிய விஷயங்களைப் பத்தி இந்த மாதப் போட்டி படங்களையே உதாரணமா வச்சிப் பார்ப்போம். ஏற்கனவே போட்டிகளில் ஜெயிப்பது எப்படின்னு நம்ம PiT தளத்துலேயே பதிவு போட்டிருக்காங்க. இருந்தாலும் அதை உதாரணத்தோட சொன்ன நல்லாருக்கும்னு உடம்பை ரணகளம் ஆக்கிக்கற ஒரு முயற்சில ஈடுபட்டிருக்கோம். அதுக்கு முன்னாடி ஒரு ஷார்ட் கமெர்ஷியல் பிரேக் எடுத்துக்கிட்டு இந்த மாதப் போட்டியில் தேர்வான முதல் பதினைஞ்சு படங்களை ஆங்கில அகர வரிசையில் பாத்துட்டு வந்துடுங்க.

Top 15

1.Aadav		2. Amal .
3 . Jeya		4. Kamal
5. MQN		6. Nila's Mom
7. Nundhaa		8. Oviya
9. Priyadarshan		10. Rajesh Natarajan
11. Ramalakshmi		12. Thulasi Gopal
13. Tjay		14. Truth
15. Udayabaskar
From PiT Oct 2009 - பொம்மைகள்

உங்க படம் என்ன சொல்லுது?

ஒவ்வொருத்தரும் ஒவ்வொரு நம்பிக்கையில, ஒரு கருத்தை மனசுல வச்சிப் படம் எடுத்துருப்பாங்கன்னு சொன்னோமில்லையா? நம்ம படம் மூலமா நாம சொல்ல வந்த கருத்து அல்லது நாம காட்ட நெனச்ச கருப்பொருள் பாக்கறவங்களோட ரசனையை எப்படி தூண்டுச்சுன்னும், அவங்களை எப்படி சென்று சேர்ந்துச்சும்னும் தெரிஞ்சுக்கனுமில்லியா? நம்ம படத்தைப் பத்தி பாக்கறவங்க என்ன உணருறாங்கன்னு எப்படி தெரிஞ்சுக்கறது?
தெரிஞ்சுக்கனும்னா எத்தனை பேரைப் போய் கேக்க முடியும்? பாக்கறவங்க எல்லாரையும் போய் கேக்கறதுங்கறது நடக்கக் கூடிய காரியமா? அதை தெரிஞ்சுக்க ஒரு வழி இருக்குங்க. போட்டிக்குப் படத்தை எடுக்கறீங்கல்லியா? எடுத்து முடிச்சுட்டு போட்டிக்கு அனுப்பறதுக்கு முன்னாடி நீங்க எடுத்த படத்தை ஒரு முறை பாருங்க. அதை பாத்துட்டு உங்க படத்தைப் பத்தி உங்களுக்கு என்ன தோனுதுன்னு ஒரு வரி ஒரு பேப்பர்ல எழுதுங்க...இல்லை மனசுல நெனச்சுக்கங்க. இப்போ நீங்க நெனச்சது/பேப்பர்ல எழுதுனதுக்கும் போட்டிக்குக் கொடுக்கப்பட்ட தலைப்புக்கும் எந்தளவுக்கும் சம்பந்தம் இருக்கும்னும் பாருங்க.

உதாரணத்துக்கு Sriniயோட இந்த படத்தை எடுத்துக்குவோம்.

இந்த படத்தைப் பார்த்ததும் என் மனசுக்குத் தோனுறது - "சாலையோரத்தில் இரு குழந்தைகள் பொம்மைகளை விற்கிறார்கள்." ஆனா நீங்க போட்டிக்குப் படத்தை அனுப்பும் போது நெனச்சது வேற எதாச்சும் இருக்கலாம். இந்த படத்துல சாலை, இரு பெண் குழந்தைகள், மரம், விளம்பரப் பலகை என போட்டிக்குத் தொடர்பில்லாத பல பொருட்கள் இருக்கின்றன. அப்பொருட்களோடு பொம்மைகளும் இருக்கின்றன. பொம்மைகளைப் பற்றி நீங்கள் சொல்ல விரும்புவது என்னவென்று பார்ப்பவருக்குக் குழப்பம் வரும். இந்த விஷயத்தில் benefit of doubt எப்போதும் பார்வையாளருக்குத் தான் :) பொம்மைகளின் அழகு, அவற்றின் வண்ணங்கள், சிரிக்கிற மாதிரி, அழுகிற மாதிரி எதாவது உணர்ச்சிகள் காட்டுகின்றன என்றால் அதை எல்லாம் பார்வையாளருக்குத் தெரிவிப்பதற்கு நீங்கள் பொம்மைகளுக்கு மிக அருகாமையில் செல்ல வேண்டும். எனவே தான் போட்டி அறிவிப்பு பதிவில் கீழ்கண்ட இவ்வழிமுறைகளைக் கூறியிருந்தோம்.

//2. உங்கள் பொம்மைகள் ஏதாவது உணர்வுகளை உணர்த்த முயற்சிக்கிறதான்னு பாருங்கள். அதை புகைப்படத்தில் சொல்ல முயற்சியுங்கள்.
3. பொம்மைகளின் backgroundகளின் மீது கவனம் செலுத்துங்கள். Backgroundகளை எளிமையாக வைத்திருக்க முயற்சியுங்கள். படத்துக்கு வலு சேர்க்காத பொருட்களை உங்கள் படத்தில் வர அனுமதிக்காதீர்கள்.//

கீழே உள்ள விவியனின் படத்திலும் கிட்டத்தட்ட இதே குறைபாடு தான் -

"ஒரு சிறுவன் பொம்மைகளோடு விளையாடுகின்றான்". என்பதே உங்கள் படத்தில் இருந்து எங்களுக்கு கிடைக்கும் கருத்து. ஆகவே போட்டியின் கருப்பொருளான பொம்மைகளை உங்கள் படத்தில் முதன்மை படுத்துங்கள். உங்கள் படத்தைப் பார்க்கும் போது சிறுவனின் மீது பார்வையாளனின் கவனம் செல்லவே கூடாது. உங்கள் படத்தைப் பார்த்து நீங்களே ஒரு வாக்கியத்தினைக் கூறும் போது பொம்மைகளைப் பற்றிய கருத்துகள் மட்டுமே வருமாறு கவனமாகப் பார்த்து கொள்ளுங்கள். அப்படி போட்டி தலைப்புடன் அதிகமாக ஒத்து வராத வார்த்தைகள் உங்கள் வாக்கியத்தில் வருமேயானால் உங்கள் படம் போட்டி தலைப்பிலிருந்து வெகுவாக மாறுபடுகிறது என அறிந்து கொள்ளவும்.

நாம இந்த பதிவுல பார்த்தது போட்டிக்குன்னு எடுக்கற படங்கள் தேர்ந்தெடுக்கப்படாததற்கான மிக முக்கியமான காரணங்களுன் ஒன்றான "போட்டித் தலைப்புக்கு ஏற்றாற் போல் படம் இல்லாதிருத்தல்" பற்றி. இது மாதிரி பல காரணங்கள் இருக்கு. ஆனா எல்லாத்தையும் ஒரே பதிவுல சொல்லறதுங்கிறது கொஞ்சம் கஷ்டமான விஷயம். அதனால ஒவ்வொரு மாசமும் இந்த முயற்சியைத் தொடரலாம்னு எதிர்பார்க்கறோம்.

இந்த மாதப் போட்டியில் தேர்ந்தெடுக்கப்படாத வேறு சில படங்களும் அதற்கான காரணங்களும் கீழே.

அ. போட்டி தலைப்புக்கு ஏற்றாற் போல இல்லாதிருத்தல்
1. Mathan
2. Madhan.S.
3. Vivian
4. Srini

ஆ. படத்தில் குறுக்கீடுகள், வெளிச்சம் இல்லாமை, ஃபோகஸ் போதாமை
1. Goma
2. Somayajalu Shastri
3. Gowthaman
4. Jackie sekar
5. karthik_49870043
6. Nanani
7. MohanKumar

இ. தட்டையான ஒளியமைப்பு/காட்சியமைப்பு
1. Vasanth
2. Valli simhan
3. Oppaaree
4. Mathanlal
5. Murugesh
6. Kavaiprabhakaran
7. Boopathi
8. Jovin
9. Manivasagam
10. அருண்
11. Gadha
12. Kaaviyam
13. Nagappan
14. Nandhakumar
15. Rajesh.
16. Thiva
17. Vedivaal

ஈ. கீழுள்ள படங்கள் நன்றாக இருந்தும் சில காரணிகளால் முதல் பதினைந்துக்குள் வர இயலவில்லை.

1. Karuran - Background Distraction makes it to looks like tight cropping and deviating the concentration.
2. Manivannan - hmm... Selective lighting is good but too much of dead space on the frame.
3. Narayanan M - Background distortion
4. PMT - Pretty tight cropping
5. Parthasarathi - Probably contrasting background would have give nice perspective ? & bit more concentration needed with lighting on glossy surface like this
6 . S.M.Anbu Anand - Tho' it looks good on first look but overall Many distraction.
7. Sathiya - I really miss this in top 15. Lil wider angle with covering dog tail aswell would have made this shot perfect. Some what it gives incomplete feeling
8. TJ Vinodh - Nice try Vinodh. but it doesnt have punch which it needs for final 15

கலந்து கொண்டு சிறப்பித்த அனைவருக்கும், முதல் பதினைந்துக்குள் வந்தவர்களுக்கும், மீண்டும் மீண்டும் முயற்சித்து தங்களின் வெற்றிப் பாதைகளை சீரமைஇத்துக் கொண்டு வரும் அனைத்து போட்டியாளர்களுக்கும் குழும வாசகர்களுக்கும் குழுமம் சார்பில் நன்றியும் வணக்கமும்.

கூடிய விரைவில் முதல் மூன்றோடு சந்திப்போம்.

PiT-அக்டோபர் 2009-போட்டி படங்களின் அணிவகுப்பு

2009-10-18T11:25:00.009+05:30

இழைநய அமைப்பு சேர்ப்பது எப்படி ?

2009-10-13T06:19:00.002+05:30

இழைநய அமைப்பு சேர்ப்பது எப்படி ?

முதலில் கூகுளாண்டவரிடம் சரணடைந்து இலவச textures தேடி வைத்துக் கொள்ளுங்கள். ( free Textures என்று தேடினால் ஏராளமாய் இலவசமாய் கிடைக்கும். )

தேவையான ப்டத்தை கிம்பில் திறவுங்கள் .

இனி இதற்கு தோதான படத்தை தேர்ந்து எடுக்க வேண்டும். உதாரணதிற்கு நான் இந்த கருங்கல் படத்தை எடுத்துக்கொண்டேன்.

இனி கருங்கல் படத்தை முழுவதுமாய் நகலெடுத்து, ஒரு புதிய லேயராய், மூலப் படத்தில் உருவாக்கி்க் கொள்ளுங்கள் ( Ctrl +A, Ctrl +C, Ctrl+V. நமக்கு நன்றாக தெரிந்த cut and paste தான் ). இனி கருங்கல் படம் தேவை இல்லை, அதை மூடி விடலாம்.

இனி இந்த லேயரை படத்தோடு இணைய வைக்க வேண்டும். லேயர் Mode Overlay என்று மாற்றிக் கொள்ளுங்கள் . ( இங்கே கொஞ்சம் விளையாடிப் பார்க்க வேணும். உங்களின் படத்துக்கு Soft light, Hard light, Multiply. Screen என்று எது சரியாகத் தோன்றுகிறதோ அதற்கு மாற்றிக் கொள்ளுங்கள் ).

விளைவு அதிகம் போலத் தோன்றினால் opacity குறைத்துக் கொள்ளுங்கள்.

அவ்வளவுதான் மொத்த வேலை. இனி வரும் பகுதிகள், மேலும் மெருக்கூட்டவே.

படத்திற்கு ஒரு சிவப்பு சாயல் வர, ஒரு புதிய லேயரை சிவப்பு வண்ணத்தால் நிரப்பி, அதை Color mode க்கு மாற்றி தேவைக்கு ஏற்ப அதன் opacity குறைத்துக் கொண்டேன்.

இந்த முறை , வண்ணப்படத்தில் மேற்கூறிய முறைகளை செய்யாமல், படத்தை முதலில் கருப்பு வெள்ளைக்கு மாற்றிக் கொண்டேன்.

விளையாடிப் பாருங்கள்.

மேலும் சில எடுத்துக்காட்டுக்கள்:

அக்டோபர் 2009 மாத போட்டி - பொம்மை(கள்)!

2009-10-02T23:36:00.014+05:30

Show case லே வைக்கிற பொருட்கள், பிள்ளைகள் விளையாடும் கிலுகிலுப்பை, உங்ககிட்டே இருக்கும் சாமி /ஆசாமி பொம்மை எல்லாமே இதுக்கு உட்படும். கண்ணுல பட்ட பொம்மைகளை எல்லாம் க்ளிக்கித்தள்ளுங்க. அதையும் வித்தியாசமான கோணத்துல உங்க கற்பனை குதிரையை பறக்க விட்டு செய்யுங்க.

வீட்டுக்கு வெளிய வந்துட்டா வேனுமட்டுக்கு நிறைய வெளிச்சம் கிடைக்குது. ஆனா வீட்டுக்குள்ள இருக்கிற வெளிச்சத்தை வச்சு புகைப்படம் எடுக்கிறதுங்கறது கொஞ்சம் சவலான விஷயம் தான். ஒரு முறை அமல் எடுத்த விளம்பரம் போட்டிக்கான புகைப்படத்தை பார்க்கும் போது நல்லா இருந்துச்சு. சிலர் இதை நெட்டுல இருந்து சுட்டு போட்டுட்டார்னு கூட கமெண்ட் போட்டாங்க. ஆனா அவர் எடுத்த முறையை விளக்கமா போட்டிருக்கார் இங்கே

என்னடா இவன் பொம்மைகள்னு தலைப்பு குடுத்துட்டு வேற எதைப் பத்தியோ பேசிட்டிருக்கானேன்னு யோசிக்க வேண்டாம். அந்த பதிவை முக்கியமாக சொல்லக் காரணம் உள்ளரங்கில் எடுக்கும் புகைப்படத்திற்கான ஒளியமைப்பு எப்படி செய்திருக்கிறார் என்று உணர்த்துவதற்காகத் தான்.!

இப்போ சில சாம்பிள் பொம்மை படங்கள்.

ஜீவ்ஸ்

கைப்புள்ள

திருமுருகன்

நல்ல பொம்மை படங்கள் எடுக்க என்னென்ன பண்ணலாம்.
1. மனித முகங்களைப் போர்ட்ரைட்(Portrait) படம் எடுக்க என்னென்ன செஞ்சீங்களோ அதெல்லாம் இங்கேயும் செய்து பார்க்கலாம் - உதாரணமா நல்ல க்ளோசப் ஷாட்கள் எடுக்கறது.
2. உங்கள் பொம்மைகள் ஏதாவது உணர்வுகளை உணர்த்த முயற்சிக்கிறதான்னு பாருங்கள். அதை புகைப்படத்தில் சொல்ல முயற்சியுங்கள்.
3. பொம்மைகளின் backgroundகளின் மீது கவனம் செலுத்துங்கள். Backgroundகளை எளிமையாக வைத்திருக்க முயற்சியுங்கள். படத்துக்கு வலு சேர்க்காத பொருட்களை உங்கள் படத்தில் வர அனுமதிக்காதீர்கள்.
4. உங்கள் பொம்மைகளை வீட்டினுள் படம் எடுக்கிறீர்கள் என்றால், படம் எடுப்பதற்கு போதுமான வெளிச்சம் இருக்கிறதா என்பதை உறுதி படுத்திக் கொள்ளுங்கள். முடிந்தால் வீட்டின் வெளியில் தோட்டத்தில் அல்லது பூங்காவில் நல்ல வெளிச்சத்தில் முயன்று பாருங்கள்.
5. பொம்மைகளுக்கு அழகு சேர்ப்பவை வண்ணங்கள். அவ்வண்ணங்கள் நேர்த்தியாக உங்கள் படத்தில் தெரிவதற்கு உங்கள் கேமராவின் வைட் பேலன்சை(White Balance) பரிசோதித்துக் கொள்ளுங்கள். நீங்கள் படம் எடுக்கும் சூழலுக்கு ஏற்ப உங்கள் கேமராவின் white balance செட்டிங்கைத் தேர்ந்தெடுக்கவும்.
6. எப்போதும் போல, இம்முறையும் பொம்மைகளை வெவ்வேறு கோணங்களில் இருந்து படம் எடுத்து முயற்சி செய்து பாருங்கள். உதாரணமாக உங்கள் பொம்மையை கீழிருந்து மேல் நோக்கி படம் எடுத்துப் பார்த்தீர்கள் ஆனால் ஒரு 'larger than life' இமேஜ் கிடைக்கும். அது உங்கள் பொம்மையைப் பிரமாண்டமாக இருப்பது போல் காட்டும்.
7. பிகாசா, கிம்ப், ஃபோட்டோஷாப் முதலிய மென்பொருட்களைக் கொண்டு உங்கள் புகைப்படங்களை மெருகேற்றிப் போட்டிக்கு அனுப்ப முயற்சியுங்கள்.

சிரத்தையுடன் எடுக்கப் படும் படங்கள் எப்போதும் அதற்கான பலனைத் தராமல் இருப்பதில்லை. போட்டியில் பங்குகொண்டு கலக்குங்கள். வாழ்த்துகள்.

PiT மாதாந்திர போட்டி விதிமுறைகள்

படம் அனுப்ப வேண்டிய கடைசி தேதி : அக்டோபர் 17 ஆம் தேதி, 23:59 IST

இம்மாத நடுவர்கள் : ஜீவ்ஸ், கைப்புள்ள

போட்டி விதிமுறைகள்

சில்லவுட் - செப்டம்பர் மாத போட்டி முடிவுகள்.

2009-09-30T19:57:00.011+05:30

“கேள்வி கேக்கிறது ரொம்ப ஈசி, பதில் சொல்பவனுக்கு தானே அதோட கஷ்டம் தெரியும்” ன்னு வடிவேலு சொல்வது சரியாத்தான் இருக்கு. போட்டியிலே கலந்துக்கிறது ரொம்ப-ரொம்ப ஈசி, அதிலேருந்து மூணே மூணு சூப்பர் படத்தை மட்டும் செலெக்ட் பண்ண சொல்லறது ஆகாசத்திலே மின்னர நட்சத்திரங்களிலே மூணை மட்டும் சொல்லுங்கிறா மாதிரி இருந்துச்சு. நானும் நந்துவும் நொந்து நூடுல்ஸாயிட்டோம்.

எல்லாத்தையும் பெப்பெரப்பேன்னு பரத்திப் போட்டு பார்த்ததும் மலைச்சுப்போயிட்டோம். அடங்கொக்கமக்கா . . . ஆழம் தேரியாம காலை விட்டுட்டோமான்னு ஒரு சந்தேகம் லேசா தலைதூக்கிச்சு. . ஹ்ம்ம். என்ன ஆனாலும் புலியை முறத்தாலையே விரட்டியடிச்ச பாரம்பரியம் இல்லையா..(பாட்டீ நீ பண்ணின வேலை.. இப்பொ பாரு என் நிலமைய...) இதுக்கெல்லாம் பயந்துருவோமா என்ன... (பாட்டி உள்ளேயிருந்து எக்கோ).. கோதாவிலே இறங்கியாச்சு. . முடிவை சொல்வதுக்கு முன்னாடி எங்களுடைய சில observations.

சத்தியா : - சூப்பர் டைமிங்க், இன்னும் சூப்பர் செட்டிங்ஸ். தூரத்திலே இருக்கும் படகுகளும், 2 மீனவர்களும். ஒத்தையா நிக்கிற தென்னமரம் எல்லாம் அம்சமா இருக்கும. சில்லவுட்டிலையும் தப்பு சொல்ல முடியாது. ஆனா என்ன படத்தை க்ளிக்கர அவசரத்திலே தென்னைமரம் உச்சியிலே வெட்டுபட்டு இருக்கிறதை கவனிக்கலை போல இருக்கு. ஒருவேளை, இதே நேரத்திலே க்ளிக்கிய மத்த படங்களிலே தென்னைமரம் முழுசாக்கூட வந்திருக்கலாம், ஆனா நீங்க போட்டிக்குன்னு இதை அனுப்பிட்டீங்க. அதாங்க உங்க படம் தேர்வாகலை. இல்லைன்னா நான் உங்க படத்த்க்கு டோட்டல் சரண்டர்.

அனு & நந்தகுமார் :-

அனு, உங்க படத்திலே சூரியன் கண்ணுக்குள்ள டார்ச் அடிக்கிரா மாதிரி இருக்கு. இது ஒருவிதமான glare ஐ குடுக்குது. இது மட்டும் இல்லை, We find that your picture has dispersed subjects. அதாவது, beach umbrella லேயிருந்து குட்டிபாப்பா வரைக்கும் சொல்லறாமாதிரி தனியா தெரியிர சில்லவுட் எதுவுமே இல்லை. ஆனால், opposite side லே ஒரு அற்புதமான கோம்போசிஷண் ஒளிஞ்சிருக்கிரதை கவனிச்சீங்களா?? கொஞ்சூண்டு சூரியன், ஓடிவர பாப்பா, எதையோ சாப்பிடுரதிலே மும்மரமா இருக்கும் மக்கள்ஸ், இவங்களை மட்டும் கட்டம் கட்டியிருந்தா என்னமா இருந்திருக்கும்.

நந்தகுமார், இது அந்த மாட்டுக்கார வேலன் தானே! மாட்டை எல்லாம் ஓட்டிட்டு, இவர் தனியா சைக்கிள்ளே போரார். ரைட்டா?.நீங்க தேர்வு செஞ்ச லொகேஷண் & angle சூப்பர். உங்க சப்ஜக்ட் elevation லே இருக்கிராமாதிரி க்ளிக்கினது நல்லா அமைஞ்சிருக்கு. ஆனால், ரொம்ப தூரத்திலெயிருந்து எடுத்ததாலோ என்னமோ, கும்மிருட்டுக்கு நடுவிலே, சைக்கிள்காரர் பொட்டு மாதிரி தெரியிரார். நீங்க பார்த்த clarity எங்க கண்ணுக்கு புலப்படலை. ஒருவேளை, இவரை நடுநாயகமா வைக்காம, ஓரத்திலே வச்சு, மரம் & விழுதுகளை கட்டம் கட்டியிருந்தா காட்சி முழுமையா மனசிலே நிறஞ்சிருக்கும்ன்னு நினைக்கறேன்.

உங்க ரெண்டு பேர் படமும் சூப்பர், ஆனால் அதிலே மத்தவங்களுக்கு எதை காட்டணும்ன்னு நீங்க தான் முடிவு பண்ணணும். Try to look at the same frame from a different perspective.

இரவுகவி :-
picturesque settings ங்கிறதுக்கு அற்புதமான படம். “ கம்பன் வீட்டு கட்டுத்தறியும் கவிபாடும்” ங்கிறா மாதிரி, இந்த படத்தை பார்த்ததுமே கவிதை தானா வரும். அவ்வளவு நேர்த்தியான படம். பட்.. கட்டம் கட்டின விதம் தான் கொஞ்சம் நெருடலா இருக்கு. Bunt edges அல்லது patterned framing இது ரெண்டிலே ஏதாவது ஒண்ணு மட்டும் வச்சிருந்தாலே படம் எங்கேயோ போயிருக்கும். ஆனால், ரெண்டுமே இருக்கிறது கவனத்தை ஜோடியிலேயிருந்து திசைதிருப்புரா மாதிரி இருக்கு. சூரியன் கொஞ்சம் அதிகப்படியா ஆரெஞ்ச் பவுடர் பூசிகிட்டாரோ?

நடுவர்களின் சிறப்பு கவனம் பெற்ற படம் :- MQN

Indoor silhouette, rather unique perspective. உண்மைய சொல்லுங்க. வீட்டுக்குள்ளேயே சில்லவுட் எடுக்க முடியும்ன்னு எத்தனை பேர் யோசிச்சிருப்பீங்க?. சூப்பர்ங்க. ஆனால் ஒரு சின்ன நெருடல், உங்க படம் ஒவ்வொரு மானிடர்ல ஒவ்வொரு மாதிரி தெரியுது. என்னோட வீட்டு மானிடர்ல, கொலுசு டிசைன்வர நல்லா தெரியுது.. ஆனா ஆபீஸ் மானிடர்ல, இது ஒரு பெர்பெக்ட் சில்லவுட். நந்துவுக்கு இதே தான் சொல்லரார். (படு அட்டகாசமான படம், கொஞ்சம் டீடெய்ல் தெரியறமாதிரித்தான் இருக்கு.ஒவ்வொரு மானிட்டருக்கும் கொஞ்சம் இது மாறுது. என் ஆஃபீஸ் மானிட்டரில் கொஞ்சம் நல்லாவே டீடெய்ல் தெரியுது. வீட்டில் அவ்வளவா தெரியல)போட்டி ஆரம்பத்துல ப்ராக்டிகலா இப்படி ஒரு ப்ரச்சனை வரும்ன்னு சில்லவுட்டில் லேசான ஒளி வித்தியாசத்தை ஒரு தவறா எடுத்துக்க வேண்டாம்ன்னு நெனச்சிருந்தோம். ஆனா இந்த படம் அந்த லேசான அளவை தாண்டிட்டதா தோணுச்சு.. but all said and done, absolutely brilliant composition & mind blowing perspective.

சில்லவுட் மூன்றாவது நட்சத்திரம்
ஜெயகுமார் :-

Leading lines ங்கிர concept நமக்கெல்லாம் இப்போ ஓரளவுக்கு தெரிஞ்சிருக்கும். இதையே ஜெயக்குமார் மாத்தி யோசிச்சிருப்பாரோன்னு தோணவைக்கிர படம். A tunnel is a line from the outside, a line is a tunnel from the inside. ங்கிரதை துல்லியமா எடுத்துக்காட்டும் படம். இது மட்டும் அல்ல, காட்சி அமைப்பும் .. இருட்டிலிருந்து வெளிச்சத்துக்கு போகும் மனிதன்கிர எண்ணத்தை வரச்செய்யுது. மாத்தி யோசிச்சிருக்கீங்க, புதுமையான கண்ணோட்டம் . . . வாழ்த்துக்கள் ஜெயகுமார்.

சில்லவுட் ரெண்டாவது நட்சத்திரம்
ஒப்பாரீ : -

படு வித்தியாசமான சப்ஜெக்ட். சில்லவுட்டுக்கு யாரும் சிலந்தியை கற்பனை செய்ய சான்சே இல்லை. அதுவும் சிலந்தி கூடுடன். பேக்ரவுண்டும் நச்சுன்னு இருக்கு. சிலந்தி வலை பின்னும்போது எடுத்தீங்களா.. ஒரே ஒரு காலிலே இருக்கும் ஷேக் கனகச்சித்திதமா வந்திருக்கு. வினோதமான சப்ஜக்ட், . . . வாழ்த்துக்கள் ஒப்பாரீ

சில்லவுட் முதல் நட்சத்திரம்
காவியம் :

மைனசும் மைனசும் சேர்ந்தா பிளஸ்ஸாயிடும்னு கணக்கு ட்டீச்சர் சொல்வது இந்த படத்துக்குத்தான் பொருந்தும்ங்கிறது என் அபிப்பராயம்.. பல போட்டிகளில் தொடுவானம் கோணலா இருந்தாலே ரிஜெக்ட் பண்ணிடுவாங்க. அதே மாதிரி abrubt ஆ இருக்கும் leading lines ஐயும் தள்ளிடுவாங்க. ஆனால் இங்கே .Skewed horizon is balanced by the incomplete leading line (fence). இவர் இன்னொண்ணையும் வித்தியாசமா செஞ்சிருக்கார். சாதாரணமா இந்த மாதிரி ( ஆறு - கடலை பார்க்கும் ஜோடி ) படங்களில் நீளமான கம்பி வேலிகளின் முடிவில் சப்ஜெக்ட் இருக்கும். லீடிங் லைன்ஸ் மாதிரி. இங்க உல்டாவா இருக்கு. என்னதான் Rule of third, Skewed horizon, leading lines ன்னு ஆயிரம் வரைமுறைகள் சொன்னாலும், இது எதுவுமே இல்லாமலும் அற்புதமான படத்தை எடுக்க முடியும்ங்கிறதுக்கு காவியத்தின் இந்த படம் அற்புதமான எடுத்துக்காட்டு.. அட்டஹாசமா இருக்கு.. வாழ்த்துக்கள் காவியம்.

ஒண்ணு கவனிச்சீங்களா.. இந்த முறை தேர்வான மூணு பேருமே மாத்தி யோசிச்சிருக்காங்க( எங்கங்க ரூம் போட்டீங்க ). 3D லே Leading lines ஐ குடுத்த ஜெயகுமார், பசக்ன்னு நசுக்கிர சிலந்திப்பூச்சியை டக்குன்னு படம் புடிச்ச ஒப்பாரீ, எல்லா ரூல்ஸையும் மொத்தமா தூக்கிப்போட சொல்லும் காவியம்.. இவங்க படம் எல்லாமே, சொல்லித்தர பாடம் ஒண்ணு தான்.. Theory is different, Practical is different, and Implementation is a totally different ball game altogether.

சின்னஞ்சிறு உலகம் - வழிமுறைகள் பகுதி 1

2009-09-28T11:15:00.012+05:30

வணக்கம் மக்கா,
நான் ஏற்கனவே சொல்லியபடி மேக்ரோ படங்களை நம்முடைய சாதாரன லென்ஸின் மூலம் கூட எடுக்கலாம். குறிப்பாக நம்முடைய லென்ஸின் "Minimum Focusing Distance" மாற்றி அமைக்க முடிந்தால், பொருட்களின் மிக அருகில் போகஸ் செய்து மேக்ரோ படங்கள் எடுக்க முடியும். சில வழி முறைகளை கீழே.

1.) Diopters(க்ளோஸ் அப் லென்ஸ்)

இந்த முறை மிகவும் எளியது. உங்களுடைய லென்ஸின் பில்டர் அளவிற்கு(52mm, 58mm, 62mm, 68mm, 77mm etc) ஏற்ப ஒரு க்ளோஸ் அப் லென்ஸ் வாங்கி நம் லென்ஸின் முன்னால் பொருத்தி விட வேண்டும் அவ்வளவு தான். இப்படி செய்வதால் நம் லென்ஸின் "Minimum Focusing Distance" அருகில் மாறி அமைந்து விடும். ஆட்டோ போகஸ் கூட வேலை செய்யும். மேலும் மற்ற காமிரா உற்பத்தியாளர்களின் க்ளோஸ் அப் லென்சை கூட பயன் படுத்தலாம். எடுத்துக்காட்டாக நிகான் லென்சில் கானான் க்ளோஸ் அப் லென்சை பொருத்தலாம்.

2). Extension Tubes (எக்ஸ்டன்சன் டுயுப்):

இந்த முறையில் உங்கள் லென்ஸின் இறுதிக்கும், காமிராவில் லென்ஸ் மாட்டும் இடத்திற்கும் இடைவெளியை உண்டாக்க வேண்டும். எக்ஸ்டன்சன் டுயுப்களில் வெறும் ஓட்டை தான் இருக்கும், கண்ணாடி பகுதி எதுவும் இருக்காது. இவற்றின் மூலம் இடைவெளியை ஏற்படுத்தலாம். இடைவெளி அதிகரிக்க, அதிகரிக்க பொருட்களின் அளவு காமிரா சென்சாரில் பெரிதாக இருக்கும். இந்த முறையில் "Minimum Focusing Distance" மாற்றம் இருக்காது. இந்த எக்ஸ்டென்சன் டுயுப்கள் பல அளவில் கிடக்கும் (12mm, 20mm, 36mm etc). இவற்றை ஒன்றாக கூட சேர்த்து மாட்டலாம். எல்லா எக்ஸ்டென்சன் டுயுப்களிலும் ஆட்டோ போகஸ் வேலை செய்யாது. "Kenko" எக்ஸ்டென்சன் டுயுப்களில் ஆட்டோ போகஸ் வேலை செய்யும், மற்ற டுயுப்களை பார்க்கும் பொது விலையும் குறைவு. (எக்ஸ்டென்சன் டுயுப்களின் குறை என்னவென்றால், வெறும் லென்சை பயன் படுத்தும் பொது கிடைக்கும் ஒளி அளவை விட கம்மியாக இருக்கும், இதனால் ஷட்டர் வேகம் கொஞ்சம் குறையும்.)

மற்ற வழி முறைகள் விரைவில்...

சில்லவுட் – பத்துக்கு பதிலா பதினஞ்சு

2009-09-25T10:03:00.011+05:30

A "failed attempt" is always better than "No Attempt" அப்படீன்னு எங்க இங்க்லீஷ் டீச்சர் சொல்லுவாங்க. இது ஏதோ நம்ம மனசை தேத்த மிஸ் சொல்லறாங்கன்னு நாங்க எல்லாரும் பேசிக்குவோம். அதுவும் Essay writing competition லே நம்ம கட்டுரை முதல் ரவுண்டை கூட தாண்டாதப்போ போட்டியை வேடிக்கை பார்க்கரது மட்டுமே செய்யும் கும்பல் இருக்கே.. அவங்க ஒட்டுமொத்தமா நம்மள ரவுண்டுகட்டி " என்னமா கண்ணு... புட்டுகிச்சா? " ன்னு கேக்கும்போது.. போட்டியிலே தேர்வாகலையேங்கிர வருத்தத்தை விட, இப்படி நம்மை அவமான படுத்தறாங்களேன்னு மனசுக்குள்ளே புகையும். போட்டியும் வேணாம், ஒரு மண்ணும் வேணாம்ன்னு தோணும். அப்போ அந்த பக்கம் வந்த எங்க இங்கலிஷ் மிஸ் கிண்டல் பண்ணின கும்பலை பார்த்து விட்ட டோஸ் தான் இது. (அப்புறம் வந்த Essay Writing competition லே செலெக்டானேனா இல்லையான்னெல்லாம் கேக்கப்படாது.. மிஸ் கிட்டே சொல்லிக்குடுப்பேன்.. ஆமா !)

எட்டாங்கிளாஸிலே மிஸ் சொன்னது, பிட்டிலே சேர்ரதுக்கு முன்னே ஏதோ ஒரு மூலையிலே மங்கிக்கிடந்துது. ஆனா பிட்டிலே மாசாமாசம் போட்டிக்கான படங்களை பார்க்கும்போது ஒரு வாசம்னானும் திருவாசகமா சொன்னாங்கன்னு நினைக்கத்தோணுது. இந்த மாத சில்லவுட் போட்டிக்கு அனுப்பின எல்லா போட்டியாளர்களுக்கும் வாழ்த்துக்கள். சுத்தமா கலந்துக்காத்தவங்களைவிட நீங்க எவ்வளாவோ மேல் (பீமேல்).

சரி, தேர்வான முதல் 15 படங்களை பார்ப்போமா !!.

மொத்தம் வந்த 58 படங்களில், 15 படங்களை மட்டும் முன்னிறுத்த நாலு காரணம் உண்டு. ஒண்ணு, எல்லா போட்டியிலேயும் சொல்லரா மாதிரி – தலைப்போட சரியா ஒத்துப்போகலை. ரெண்டாவது, கம்பி – குச்சி மாதிரியான distractions. சில பேரோட படங்களிலே light கம்மியா இருக்கும் போது படத்திலே "கறுப்படிக்குமே" , அதுமாதிரியான படங்களை சில்லவுட்ட்னு தப்பா நினைச்சுடாங்க. (வருத்தப்படாதீங்க, இனிமே சரியான சில்லவுட் எதுன்னு கத்துக்கிட்டா போச்சு). மூணாவது, ஒரிஜினல் 'பரவாயில்லாமா இருக்கு', படத்தை எடுக்கும் போது இருந்த உண்மையான சூழலை அதே மாதிரி கொண்டுவரணும்ன்னு நினைக்கிறாங்க. அதுக்காக GIMP / Photoshop லெ ரொம்பவே மெனக்கெட்டிருக்காங்க. ஆனால், மேக்கப் போடும் போது எங்க நிறுத்தணும்ன்னு தெரியாம திணறியிருக்காங்க. அதனாலேயே அங்க அங்க திட்டுதிட்டா பவுடர் வந்து படத்தோட அழகையே மாத்திடுச்சு.சிலரோட படத்திலே கிராப் & பிரேமிங்க பண்ணினா நல்லா இருந்திருக்கும், பண்ணாம விட்டுட்டாங்க. ( மேக்கப் போடாலும் தப்பு - போடலைன்னாலும் தப்புன்ங்கிரா மாதிரி இருக்கில்லே).. மேக்கப் போடணும், ஆனா அளவோட நிறுத்தணும், அதான் பாயிண்ட்

Not Revelent to Topic

Arun.jbg
VALLISIMHAN
Malten.jpg
jaya.jpg
somayajula.sastry
S.M.Anbu Anand
Ashok
Sri

Distractions / blur / கறுப்படித்திருப்பது / Noise/ glare

Vaasi
gurupandi.jpg
Knbpsa
Goma
Sriram
Tulasi
Ramalakshmi
Gnanaprakash
Nundhaa
Parthasarathy
Nilofer Anbarasu
Thiva
jwaharclicks .jpg

Missed out due lack of cropping & framing

Manivannan
Vennila meeran
Gaanaprakash
Kamal (Noise on the edges)
Prem G
Madan

Brilliant for ecards, but seems to loose an edge somewhere

Nila's Mom
Venkiraja
T Jay
Aadav
Karthi

எல்லாம் சரிதான், தேர்வான 15 படங்கள் + இங்கே பட்டியலிட்டிருக்கும் 33 படங்கள். மிச்சம் 10 படம் என்ன ஆச்சு?.. இதுக்கு என்கிட்டே பதில் இல்லை. இந்த 10 படங்கள் எந்த வரிசயிலேயுமே வரலை. முதல் சுற்றில் தேர்வான 15 படங்களும் இந்த 10 படத்தை தூக்கி சாப்பிடு ஏப்பம் விட்டுடுச்சு.. அம்புட்டுத்தேன். அடுத்த பதிவுல வின்னர்ஸு யாரு பார்க்கலாம்.

//டிஸ்கி
தேர்வு செய்யப்பட்ட படங்கள் எல்லாமே நடுவர்களின் மனதுக்கு சரியானதாக தோன்றியவையே. ஒவ்வொருவருக்கும் ஒவ்வொரு பார்வை இருக்கும். இதுவே வேறு நடுவர்களாக இருக்கும் பட்சத்தில் இந்த தேர்வில் சில மாறுதல்கள் இருக்கலாம் துல்லியமான அளவீடுகள் புகைப்படத்துக்கு இல்லை. அதன் படி நீங்கள் நல்ல படம் என நினைத்த படங்கள் தேர்வு செய்யப்படாமல் இருக்கலாம். அதுக்காக டென்சன் ஆயிடாதீங்க. எதுவா இருந்தாலும் பேசி தீத்துக்கலாம்.//

அக்டோபர் மாத போட்டிக்கான முக்கிய அறிவிப்பு:-பொம்மை(கள்)

2009-09-24T10:25:00.004+05:30

அக்டோபர் 2009 மாத போட்டிக்கான தலைப்பு – பொம்மை(கள்)

Show case லே வைக்கிர சாமான், பிள்ளைகள் விளையாடும் கிலுகிலுப்பை, உங்ககிட்டே இருக்கும் சாமி / ஆசாமி பொம்மை எல்லாமே இதுக்கு உட்படும். மனுஷப்பயலுவ மூஞ்சியே தெரியப்பட்டாது, ஓகே வா !! படம் புடிக்க நேரமே கிடைக்கைலேன்னு உதார் விடரதெல்லாம் அக்டோபர் மாத போட்டியிலே நடக்காது. கண்ணுக்கு பட்டத்தை , மனசுக்கு தோணினதை க்ளிக்கித்தள்ளுங்க. தலைப்பை இன்னும் ஜோரா விரிவு படுத்தி ஒண்ணாம் தேதி பதிவு உண்டு. நடுவர்கள் யாருங்கிரதையும் அப்போதான் சொல்லப்படும்.

தலைப்பு தான் சொல்லியாச்சே!! இப்பவே அனுப்பலாம்ன்னு மட்டும் நினைக்காதீங்க. போட்டிக்கு படங்களை Oct 1 – 15 மட்டும்தான் எடுத்துப்போம். 1 ஆம் தேதிக்கு முன்னாடி வர எல்லா படமும் ஒட்டுமொத்தமா ரெஜெக்ட் தான். பொறுத்தார் பூமி ஆள்வார்.

புகைப்படக்கலையில் 99 + 1

2009-09-19T18:12:00.005+05:30

Genius is 99% perspiration and 1% inspiration அப்படின்னு ஆங்கிலத்தில் ஒரு சொல்லாடல் இருக்கிறது. அப்படி சொன்னவரு விஞ்ஞானி தாமஸ் ஆல்வா எடிசன். இந்த கருத்து புகைப்படக்கலை கத்துக்கறவங்களுக்கும் பொருந்தும்ங்க. என்ன ஒரே ஒரு வித்தியாசம் புகைப்படக்கலையில் வெற்றி இல்ல தேர்ச்சி என்பது 99 சதவீதம் ஊக்கத்தினாலும்(inspiration) 1 சதவீதம் உழைப்பினாலும்(perspiration) ஆனது. புகைப்படக்கலையில் வெற்றி பெற உழைப்பை விட ஊக்கம் தான் மிக முக்கியமான காரணிங்கறது என்னோட எண்ணம். இங்கே வெற்றி என்று சொல்றது, படிக்கிறவங்க எப்படி எடுத்துக்கறாங்கங்கிறதை பொறுத்தது. அந்த விவாதம் இப்போ நமக்கு வேணாம். இந்த ஊக்கம் எங்கேருந்து எப்படி கெடைக்கும்? ரொம்ப சுலபம்ங்க. நம்மளை நாமே ஊக்கப்படுத்திக்க வேண்டியது தான். அட போங்க பாஸ்! உபயோகமா எதோ சொல்லப் போறீங்கன்னு பார்த்தா புகைப்படக்கலை கத்துக்க சுயமா ஊக்கப்படுத்திக்கனுமாமில்ல? சொந்தமா ஊக்கப்படுத்திக்கனும்னா இவ்வளோ நாளைக்கு நாங்களே பண்ணியிருக்க மாட்டோமா? எவ்வளவு முயற்சி பண்ணாலும் நான் எடுக்கற படம் எனக்கே திருப்தியா அமைய மாட்டேங்குது...ஒரு போட்டியில பங்கெடுத்துக்கிட்டேன்னா எத்தனை முறை முயற்சி செஞ்சாலும் முதல் பத்துல கூட என் படம் வர மாட்டேங்குது. நீங்க சொல்றதெல்லாம் வெறும் jargon மாதிரி தான் தெரியுது. சுயமா ஊக்கப்படுத்திக்கிறதை தவிர எதாவது வேலைக்காவற உருப்படியான வழியைச் சொல்லுங்க அப்படின்னு படிக்கிற நீங்க சொல்லலாம். அப்படி சொன்னீங்கன்னா அப்போ கண்டிப்பா மேல படிங்க. நம்மளை மாதிரி ஆளுங்களுக்காகத் தான் இந்த பதிவு.

பாஸ்! நீங்க நினைக்கிறது எல்லாமே நியாயம் தான். நம்மள்ல பல பேர் ஒரு நிமிஷத்துல எதோ ஒரு ஆசையில ஒரு உந்துதல்ல புதுசா எதையாச்சும் ஒன்னை ஆரம்பிப்போம். அதுக்கப்புறம் அதை தொடர முடியாம தவிப்போம். ஆரம்பிச்ச விஷயத்துக்கு காசும் நெறைய செலவழிச்சிருப்போம். காசையும் செலவழிச்சிட்டு தொடரவும் முடியலையேன்னு குற்றவுணர்வால் தவிப்போம். உதாரணத்துக்குச் சொல்லனும்னா உடம்பு குண்டாவுது, நாளை காலையிலிருந்து ஜாக்கிங் போகலாம்னு ஒரு உந்துதல்ல 3000 ரூபாய்க்கு டிராக் சூட், 2000 ரூபாய்க்கு ரீபாக் ஷூ, ஜாக்கிங் பண்ணும் போது களைப்பு தெரியாம இருக்க பாட்டு கேக்கலாம்னு ஒரு ஐயாயிரத்தைப் போட்டு ஐபாட் இதெல்லாத்தையும் வாங்கி வச்சிட்டு காலைல அஞ்சரை மணிக்கு அலாரம் அடிக்கும் போது அதை ஒவ்வொரு பதினஞ்சு நிமிஷத்துக்கும் அணைச்சிட்டு இழுத்து போத்திட்டு தூங்குவோம். வரிக்கு வரி சேம் ப்ளட் சொல்லறீங்களா? வெல்கம் டு தி சுய முன்னேற்ற புத்தகத்தைத் தலைக்கு வச்சு தூங்குவோர் க்ளப். இதே உதாரணம் ஒரு விஷயத்தைத் தொடங்கிட்டு அதை தொடர முடியாம தவிக்கிறவங்க எல்லாத்துக்கும் பொருந்தும். ஆனா மத்த விஷயங்களை விட புகைப்படக்கலையைக் கத்துக்கறதுக்குச் சொந்தமா ஊக்கம் கொடுத்துக்கறது அதாவது inspire ஆகறது ரொம்ப சுலபம். இதையெல்லாம் சொல்லறதுக்கு எனக்கு என்ன தகுதி இருக்குன்னு கேக்கலாம். ஏன்னா பேசிக்கலி ஐ ஆம் எ சோம்பேறி. இந்தப் பதிவை எழுதறதுக்கே பல நாள் எடுத்துக்கிட்டேன். அதோட மேல சொன்ன எல்லா விஷயமும் எனக்கும் பொருந்தும். இன்னும் கத்துக்குட்டியான என்னை மாதாமாதம் நடக்கும் புகைப்படப் போட்டியில் பங்கெடுத்துக் கொள்ள முடியாத படி ஆப்பு வைத்து PiT ஆசிரியர் குழுவில் சேர்த்துக்கிட்ட காரணம் இதையெல்லாம் நான் எடுத்துச் சொல்லுவேன்னு தான் இருக்குமாக்கும் :). நான் இதுவரை புகைப்படக்கலையில் கத்துக்கிட்டதெல்லாம் An&, ஜீவ்ஸ் என் கல்லூரி நண்பன் திருமுருகன் இவங்களெல்லாம் குடுத்த ஊக்கத்தின் காரணமாகத் தான்.

புகைப்படக்கலையில் சீனியர்கள் சிலரின் ஊக்கத்தினால் நான் கத்துக்கிட்ட சில விஷயங்களைப் பத்தி இந்தப் பதிவுல சொல்லறேன். புகைப்படம் எடுக்கற டெக்னிக்கைப் பத்தி நான் ஒன்னும் சொல்லப் போறதில்லை.

1. நல்லது எதுன்னு தெரிஞ்சிக்கனும்
திரைப்பட இசையமைப்பாளர்களைப் பேட்டி எடுக்கும் போது "உங்களுக்கு எந்த இசையமைப்பாளரின் இசை பிடிக்கும்"னு கேட்டா என்ன பதில் சொல்லுவாங்கன்னு கவனிச்சிருக்கீங்களா? "முன்னோர்களின் இசை"ன்னு ஒரு politically correct பதிலையோ "நான் அடுத்தவங்க இசையைக் கேக்கறதில்லை"ன்னு ஒரு ஓப்பனான பதிலோ வரும். அதுக்கு காரணம் அடுத்தவங்க இசையைக் கேட்டா அந்த இசையோட தாக்கம் நாம உருவாக்கப் போற இசையில வந்துடுமேங்கிற எண்ணம் தான். ஏனென்றால் இசையமைப்பது creativeஆன ஒரு வேலை. புகைப்படம் எடுப்பதும் creativeஆன வேலை தான். ஆனா நல்ல புகைப்படம் எடுக்க கத்துக்கனும்ங்கிற ஆர்வம் உள்ளவர்கள் இசையமைப்பாளர்களோட உதாரணத்தைப் பின்பற்றுனா வேலைக்காகாது. "நல்ல புகைப்படம்"னு சொல்றேனே அதை அடையாளம் கண்டுகொள்வது எப்படி? ஏற்கனவே மத்தவங்க எடுத்து வச்சிருக்கற புகைப்படங்கள் இருக்குமில்லையா அதை பாக்கனும். இதனால் பலன் இருக்குமான்னு கேட்டீங்கன்னா என் அனுபவத்துலேருந்து கண்டிப்பா உண்டுன்னு தான் சொல்வேன். மற்ற புகைப்படங்களோட தொடர்ச்சியா நம்ம படங்களை ஒப்பிட்டுப் பாத்துக்கிட்டே இருந்தோம்னா நம்மளோட லெவல் என்னன்னு நமக்கு தெரியும், அதோட கண்டிப்பா நாளடைவுல நாம எடுக்கிற படங்கள்ல நல்ல மாற்றம் தெரியும். நிற்க. புதுசா புகைப்படம் எடுக்க வந்தாலும் ஏற்கனவே படம் வரையற ஆற்றல் இருக்கறவங்களோட புகைப்படங்களைப் பாத்தா ரொம்ப சூப்பரா இருக்கும். ஏன்னா புகைப்படக்கலையில் மிக முக்கியமான கூறுகளில் ஒன்றான காட்சியமைப்பு பத்தி அவங்களுக்கு ஏற்கனவே தெரிஞ்சிருக்கும். எந்த காட்சியை எப்படி படமா வரைஞ்சா நல்லாருக்கும்ங்கிற அனுபவம் அவங்களுக்கு ஏற்கனவே இருக்கும். அதையே சுலபமா உபயோகிச்சு அருமையான படங்களா எடுப்பாங்க. நான் மேல சொல்லிருக்கற உத்தி இந்த மாதிரியானவங்களுக்கில்லை. நம்ம படம் நல்லாருக்கா நல்லாருக்கான்னு எப்பவும் ஒரு சந்தேகம் இருக்கும் பாருங்க சில பேருக்கு? என்னைப் போல் ஒருவனான அந்த மாதிரியானவங்களுக்குத் தான்:) சரி. அடுத்தவங்க எடுத்து வச்சிருக்கற நல்ல படங்களைப் பார்ப்பது எப்படி? www.flickr.com னு ஒரு வலைதளம் இருக்கு கேள்விபட்டுருக்கீங்களா? உலகின் தலைசிறந்த புகைப்படக்கலை வல்லுநர்கள் பலரின் படங்களும் அங்கே இருக்கு. ஒரு யாஹூ ஐடி இருந்தா போதும், நீங்க கூட அதுல இலவசமா ஒரு கணக்கைத் துவங்கிடலாம். ஒரு நாளிலேயே பல லட்சம் படங்கள் அத்தளத்தில் வலையேற்றப்படுகின்றன. அவ்வளவு படங்களிலிருந்து ஒரு நாளைக்கு 500 படங்களைத் தேர்வு செய்து அவற்றை ஆர்வத்தைத் தூண்டும் புகைப்படங்கள் என்று வகைப்படுத்துகிறார்கள். இத்தகைய படங்களை வகைப்படுத்துவதற்காக(Categorising) அவர்கள் பயன்படுத்தும் சொல் "Interestingness" என்பது. இப்படங்களை 'Explore' எனும் பக்கத்தில் நமது பார்வைக்கு வைக்கிறார்கள். அந்தப் படத்தின் மீது க்ளிக் செய்தால் அப்படத்தினை எடுத்தவரின் சொந்த ஃப்ளிக்கர் வலைப்பக்கத்துக்கு நம்மை இட்டுச்செல்லும். கீழே எக்ஸ்ப்ளோர் பக்கத்தில் இடம்பிடித்த ஒரு அருமையான சில்லுவெட் படம்.

http://www.flickr.com/explore

ஒரு நாளைக்கு 500 படங்களைத் தேர்ந்தெடுப்பார்கள் என்று சொன்னேன் இல்லையா? ஃப்ளிக்கர் தளத்தில் 'Last 7 days interesting' என்ற சுட்டியைச் சுட்டினால் கடந்த 7 நாட்களில் "Interestingness"இல் பகுக்கப்பட்ட, 500 Explore படங்களில் தேர்வு செய்யப்பட்ட ஒரு சிலதை நமது பார்வைக்குத் தருவார்கள். அதில் கீழே இருக்கும் 'Reload' எனும் பொத்தானை அழுத்தினால் ரேண்டமாக வேறு சில படங்கள் வலைப்பக்கத்தில் தெரியும்

http://www.flickr.com/explore/interesting/7days

இப்படங்களில் ஒரு சிலவற்றின் தேர்வு குறித்து ஒரு சிலருக்கு மாற்று கருத்துகள் இருக்கலாம். அதாவது இந்தப் படம் 500இல் ஒன்னா தேர்வாகற அளவுக்கு ஒன்னும் அவ்வளவு சிறப்பா இல்லையேன்னு. ஃப்ளிக்கர் காரர்கள் இப்படங்களை ஒரு அல்காரித்தத்தைக் கொண்டு ஆட்டோமேட்டிக்காகத் தேர்ந்தெடுக்கிறார்கள். ஆனாலும் பெரும்பாலான படங்கள் உயர்தரமான படங்களாகத் தான் இருக்கும். நான் தினமும் ஒரு பத்து நிமிஷம் Last 7 days interesting படங்களைப் பார்ப்பேன். எந்த மாதிரி படங்கள் எடுக்கலாம் என்று வெகுவாக ஐடியாக்கள் கிடைக்கும். இந்த மாதிரியான படங்கள் எடுத்தது எப்படி? எப்படிங்கிற தேடல் கண்டிப்பா ஆரம்பமாகிடும்.

2. உள்ளுவதெல்லாம் உயர்வுள்ளல்
Explore படங்களைப் பாத்தாச்சு. பாத்துட்டு அப்படியே வுட்டுடறதா? அந்த மாதிரி படங்களை நாமும் எடுக்க முயற்சி செய்யனும். Eiffel Tower படத்தைப் பாத்தேன், அந்த மாதிரி படம் எடுக்க நான் எப்படி பாரிசுக்குப் போறதுன்னு லந்து பண்ணப்பிடாது. Eiffel Tower படத்தை பல பேரும் எடுத்துருப்பாங்க. ஆனா அது Exploreஇல் இடம்பிடிக்குதுன்னா அதுக்கு எதாச்சும் ஒரு காரணம் இருக்கும். அது என்னன்னு கண்டுபிடிக்கனும். அதிகம் பேர் பார்த்திராத கோணத்தில் ஈஃபிள் கோபுரத்தை அவர் படம்பிடித்திருப்பார். அதே மாதிரி நம்ம கோயில் கோபுரங்களில் ஒன்றை எடுத்தா எப்படி இருக்கும்னு முயற்சி செஞ்சி பாக்கணும். அப்புறம் இன்னொரு முக்கியமான குறிப்பு. ஒரு காட்சியை ஒரே ஒரு படம் எடுத்துட்டு விட்டுடக் கூடாது. பல கோணங்களிலும் பல படங்கள் எடுக்க வேண்டும். ஒரு படத்துல ஃபோகஸ் சரியா இருக்காது, இன்னொன்னுல வெளிச்சம் அதிகமா விழுந்துருக்கும், இப்படின்னு பல படங்கள் சொத்தையா தான் வரும். ஆரம்ப காலங்களில் ஒரே காட்சியை இருபது படம் எடுத்தா அதுலே ஒன்னு தான் கொஞ்ச சுமாரா வரும். அதனால மனம் தளரப் படாது. எல்லாருக்கும் ஆரம்பத்துல அந்த பிரச்சனை இருக்கும் தான். ஆனாலும் ஊக்கம் இருந்துச்சுன்னா இந்த ஒரு சதவீத உழைப்பு பெருசாத் தெரியாது.

"ஐ நல்லாருக்கே" அப்படின்னு மேல சொன்ன மாதிரி எக்ஸ்ப்ளோர் படங்களை க்ளிக் செய்து படம் எடுத்தவரின் வலைப்பக்கத்துக்குப் போனீங்கன்னா அவர் எந்த கேமராவை உபயோகிச்சு படம் எடுத்துருக்காருன்னு தெரிஞ்சிக்கலாம். இதுவும் படமெடுத்தவர் காட்ட விருப்பப்பட்டாத் தான் தெரியும். ஆனா பெரும்பாலானவங்க அதை மறைச்சிருக்க மாட்டாங்க.

நீங்க ரொம்ப ஆசையா பாத்த படம் Nikon D80 அல்லது Canon EOS 50D மாதிரியான உயர் ரக DSLR கேமராக்களைக் கொண்டு எடுக்கப்பட்டது எனத் தெரிந்து விரக்தியின் உச்சத்துக்கே போயிட்டீங்களா? DSLRஇல் எடுக்கப்பட்ட படங்களை நம்முடைய பாயிண்ட் அண்ட் ஷூட் கேமராவிலேயே எடுக்க முயற்சி செய்ய வேண்டும். அப்போ தான் நம்ம கேமராவால் என்ன முடியும் என்று தெரிந்து கொள்ள முடியும். DSLRஆல் மட்டும் தான் இத்தகைய படங்கள் எடுக்க முடியும், நம்ம கேமராவால் இதெல்லாம் எடுக்க முடியாது என நாமாகவே முடிவு செஞ்சிக்கக் கூடாது. உங்க கேமராவால் என்ன முடியும் என்பதையும் கண்டு கொள்ளவும் ஃப்ளிக்கர் தளம் உதவி செய்கிறது. Camera Finder என்ற பக்கத்தில் உங்களிடம் உள்ள கேமரா மாடல் ஃப்ளிக்கர் தளத்தில் எத்தனை பேரால் உபயோகிக்கப்படுகிறது என்றும் தெரிந்து கொள்ளலாம். உதாரணத்திற்கு உங்களிடம் Canon கேமரா இருக்கிறதென்றால், Canon மாடல்களிலேயே உங்கள் மாடலுடைய ரேங்க் என்னன்னும் தெரிஞ்சுக்கலாம்.

http://www.flickr.com/cameras
Canon Powershot A100 என்ற மாடல் 2002ஆம் ஆண்டு வெளியிடப்பட்ட ஒரு மாடல். 175 கேனான் மாடல்களில் இக்கேமரா 143ஆம் இடம் தான் பிடித்துள்ளது.

http://www.flickr.com/cameras/canon/powershot_a100

இக்கேமராவைக் காட்டிலும் அதிக உபயோகங்களையும்(features) உயர்ந்த தொழில்நுட்பத்தையும் கொண்ட கேமராக்கள் இப்போது சந்தைக்கு வந்து விட்டன. ஆயினும் இக்கேமராவால் எடுக்கப்பட்ட Interesting படங்களைப் பாருங்கள். இந்த மாதிரியான படங்களையாச்சும் நாம எடுத்துருக்கோமான்னு நம்மளை நாமளே கேட்டுக்கனும். ஆம்னு பதில் வந்துச்சுன்னா, நீங்க புகைப்படம் எடுக்க ஆரம்பிச்சு நல்லா வளர்ந்துட்டீங்கன்னு அர்த்தம். DSLR எனும் அடுத்த கட்டத்துக்கு நீங்க தாராளமாகப் போகலாம். இல்லைங்கிற பதில் வந்துச்சுன்னா நீங்க உங்க கேமராவோட முழு பலத்தையும் சரியாத் தெரிஞ்சுக்கலைன்னு அர்த்தம். முதல்ல உங்க கேமராவோட மேனுவல் புத்தகத்தைப் படிங்க. உங்க கேமராவோட முழுத் திறனையும் கண்டு கொள்ளுங்கள். நிறைய படங்களை எடுங்கள். டிஜிட்டல் தானே? காசா பணமா? புடிக்கலைன்னா சுலபமா டெலீட் செஞ்சிடலாம். 100 படம் எடுத்து ஒன்னு தான் உங்க மனசுக்குப் புடிச்ச மாதிரி வந்திருக்கிறது என்றாலும் கவலை படாதீங்க. அதுவும் ஒரு நல்ல துவக்கம் தான். பத்தாயிரம்-பதினைஞ்சாயிரம் போட்டு கேமரா வாங்கி வேஸ்டா போச்சேங்கிற குற்றவுணர்வுலேருந்து முதல்ல விடுபடுங்க.

இன்னும் சில குறிப்புகளோட இன்னொரு பதிவுல உங்களைச் சந்திக்கிறேன். வணக்கம்.

DSLR உத்திகள் - Zoom Burst

2009-09-17T22:25:00.002+05:30

பள்ளிப் பிராயத்திலும் கல்லூரிப் பிராயத்திலும் கையில் கேமரா இருந்ததில்லை. வேலைக்கு போக ஆரம்பித்த பிறகும் கூட கேமராவை உடனே வாங்க முடியவில்லை. அலுவலக விஷயமாய் முதல் முறை டில்லி செல்லும்போது, அங்கிருந்து ஆக்ரா பயணித்து தாஜ்மகாலை காண ஒரு நண்பனுடன் ஒரு குட்டி டூர் அடித்த போதும் கூட கேமரா கையில் இல்லை.
அவசரத்துக்கு அங்கே வாசலில் ஒருவர் 100ரூவாய்க்கு வாடகைக்குக் கொடுத்த ஒரு கோனிகா காமெராதான் உதவியது. ஆனா, அதிலும் படம் எடுத்து கழுவிப் பாத்தா எல்லாமே மங்கலா தான் வந்திருந்தது. அந்த கடுப்புலதான் சொந்தமா கேமரா வாங்கும் அவா எழுந்து, அப்பரமா சிங்கைக்கு போன போது அங்கிருக்கும் முஸ்தாஃபாவில், முதல் வேலையாய் யாஷிகா பாயிண்ட் & ஷூட் வாங்கி வைத்தேன்.

ஆனாலும் கூட சில மாசத்துல, அடுத்தவர்களின் SLR பாக்கும்போது, மோகம் அதிகமாயி வெம்பி வேதனையாயிடுச்சு. கடல்தாண்டி இங்கண அமெரிக்க வாழ்வை துவங்கியதும், முதலில் வாங்கியது, அழகிய Nikon SLR தான். ஒழுங்கா படம் எடுக்க வருதோ இல்லியோ, பாலு மகேந்திரா மாதிரி, அந்த லென்ஸை சொழட்டி சொழட்டி இடது கையால் லென்ஸை தாங்கி, குணிஞ்சு வளஞ்சு க்ளிக்கும் சுகமே சுகம்.

குறிப்பா, கிருச்சுக்காக்னு ஷட்டர் சத்தம், கேட்பதர்க்கு ரொம்பவே ரம்யம். இது கையில் வந்தப்பரம், யாஷிகா பாயிண்ட் & ஷூட், பொம்மை கேமரா மாதிரி ஆகிப் போச்சு. இப்போ சென்னையில், கேட்பாராற்றுக் கிடக்கிறது. Nikonல் இருந்து டிஜிட்டலுக்கு மாறும்போது, DSLRக்கு போக முடியவில்லை. டப்பு ரொம்ப ஜாஸ்தியாயிருந்தது.
வேர வழியில்லாமல், இதிலும் ஒரு Canon பாயிண்ட் & ஷூட்டுடன் வாழ்க்கை நகரத் துவங்கியிருந்தது.

ஆனாலும், க்ருச்சுக்காக் ஷட்டர் சத்தம் கேட்காமல் ரொம்ப நாள் தள்ள முடியாமல், DSLRஐ வாங்கித் தொலைத்தாயிற்று.

DSLR செலவு செய்ததுக்கு உருப்படியா உபயோகிக்கணும்னு முடிவு பண்ணிதான், சுய பரிசோதனையில் கொஞ்சம் கொஞ்சமா விஷயங்களை கத்துக்க ஆரம்பிச்சது.
DSLRன் சக்தியே, Manualல் வித விதமாய் பல விஷயங்களை எடுக்க முடிவது தான். ஆனாலும், நான் Autoவை விட்டு வர ரொம்ப காலமாயிற்று. PiT உந்துதலினால் ஓரளவுக்கு பயிற்சியும் முயற்சியும் திருப்திகரமாக முன்னேறிக் கொண்டிருக்கிறது.

எனக்கு ரொம்பவே பிடித்தது, AEB (Auto exposure bracket) செட்டப்பில், ஒரே காட்சியை மூன்று exposureகளில் க்ளிக்கி, அதை பின்னர் கலந்து செய்யும் HDR படங்கள் தான்.

DSLR நமக்குத் தரும் சுதந்திரத்தை இன்னும் நல்லா பயன் படுத்தணும் என்ற அவா சமீபத்தில் எழுந்தது. இணையத்தை அலசிய போது, சிலது கண்ணில் பட்டது.
பட்டதை இங்கு கொட்டலாம் என்று முடிவு.
(யப்பாடி, இவ்ளோ பெரிய பில்டப்பா?)

முதல் முயற்சியாக, உங்களுடன் பகிர இருப்பது, Zoom Burst என்னும் ஈஸி உத்தி (டெக்குனிக்கு).

இதன் செய்முறை:
அ. கேமராவை ட்ரைபாடில் பொருத்திக் கொள்ளுங்கள்.
ஆ. Zoom Burst ஆக்க நினைக்கும் சப்ஜெக்ட்டை கட்டம் கட்டுங்கள்.
இ. உங்க ஷட்டர் வேகம் அட்லீஸ்ட் 1 நொடியாவது வைக்க வேண்டும். 1 நொடி நேரம் திறந்து வைப்பதால், வெளிச்சம் குறைவாக கேமராவுக்குள் அனுமதிக்க, குட்டி அபெர்ச்சரை (பெரிய F எண்) தேர்ந்தெடுத்துக் கொள்ள வேண்டும் அல்லது குட்டி ISOவை (100) தேர்ந்தெடுத்துக் கொள்ளுங்க. கேமரா லைட் மீட்டரில் காட்சியின் ஒளி சரியா இருக்குமாறு Fஐயும், ISOவையும் கூட்டிக் கொறச்சு பாருங்க.
ஈ. இப்போ க்ளிக்குங்க
உ. க்ளிக்கியதும், ஷட்டர் திறந்து மூடுவதர்க்குள். உங்கள் ஜூமை சீராக திருகுங்கள். உள்ளிருந்து வெளியோ, வெளியிருந்து உள்ளேயோ, அது உங்க இஷ்டம்.

ஷட்டர் திறந்திருக்கும்போது, இப்படி ஜூமை திருகுவதால், உங்க சென்சாரில் பதியும் படம், 'வித்யாசமாய்' வரும்.

இது ஒரு தபா பண்ணிப் பாத்தீங்கன்னா, அப்பரமா, நீங்களே வித விதமா வித்யாசமான சப்ஜெக்ட்டை தேடிப் பிடித்து ஷூட்டுங்க. ஏதாவது ஒண்ணு 'நச்'னு வர வாய்ப்பிருக்கு.

சேம்ப்பிள்ஸ் சில:

1) ஜீவ்ஸின் Zoom Burst:

2) Fatmanwalking from flickr

3) என் முயற்சி:

4) முரளி என்பவ்ரின் ஜூப்பர் படம் ஃப்ளிக்கரில் பார்க்க இங்கே சொடுக்கவும்.

DSLR இல்லாதவங்க என்ன பண்றதுன்னு தலையை சொறிய வேண்டாம். இருக்கவே இருக்கிறான் Gimpபன்.

An& அண்ணாச்சி கேட்டதும் கொடுத்தார்.
கிம்ப்பில் இந்த ஜூம் பர்ஸ்ட் செய்ய
Filter -> Blur -> Motion Blur -> Zoom செய்து மகிழலாம்.

இனி என்ன? கோடு போட்டாச்சுல்ல? ரோட்ட போட்டுடலாம்ல?
போட்டு உங்க ஜூம் பர்ஸ்ட்டை பதிவேத்திச் சொல்லுங்க.

நன்னி!

சில்லவுட் - செப்டம்பர் மாத போட்டி

2009-09-16T09:06:00.004+05:30

இந்த மாதம் சில்லவுட் ன்னு அறிவித்திருந்தோம். கல்லாவுலே மொத்தம் 58 படம் சேர்ந்திருக்கு. அதென்னமோ தெரியலை.. பரீஷைக்கு முந்தின வாரம் தான் எல்லார் வீட்டிலேயும் (படிக்கிர வயசிலே பசந்த இருக்காங்கன்னு சொல்லரா மாதிரி) சொல்லி வச்சா மாதிரி ராத்திரி 2 – 3 மணிக்கெல்லாம் அலாரம் கேக்கும். அதே மாதிரி பிட்டிலேயும் கடைசீ 72 மணி நேரத்திலே தான் அதிகப்படியான சப்மிஷண் வந்திருக்கு. இதிலே இருந்து என்ன தெரியுதுன்னா.. போட்டி அறிவிச்சதும், பரண்லே இருந்து தூசு தட்டாம, எல்லாரும் ரூம் போட்டு யோசிச்சு, வேலை மெனக்கெட்டு க்ளிக்கி அனுப்பியிருக்கீங்கன்னு. பிட் போட்டியிலே பிரைஸ் வாங்கிரது ஒரு பக்கம் இருந்தாலும்.. போட்டிக்கு படம் அனுப்பணும்ன்னு வரும் போது.. தனிப்பட்ட முயர்ச்சி எடுக்கறீங்க பாருங்க.. இதிலேயெ நம்ம பசங்க ஜெயிச்சிட்டாங்க.

இன்னையோட போட்டிக்கான படம் அனுப்ப வேண்டிய கெடு முடியுது. இந்த முறை அனுப்ப மறந்து போனவங்க அடுத்த 1 – 15 தியதியை செல்பேசியில் ரிமைண்டர் போட்டு வச்சுக்குங்க. ( நோட்டு புக்கை நாய் கவ்விடுச்சுன்னு சொல்லரா மாதிரி செல் பேசி இல்லங்கிர கதை எல்லாம் இங்கே செல்லாது ).

போட்டிக்கு படம் அனுப்பின 58 பேருக்கும் ஒரு வேண்டுகோள். உங்களுக்கு நேரம் இருக்கும் போது, படத்தை எங்கே & எப்போ & எந்த கேமேரா ( Location , Time & Camera Model ) எடுத்தீங்கன்னு சொன்னா நல்லா இருக்கும். ' நல்ல' கேமரால தான் "சூப்பர்" படம் எடுக்கலாம்ங்கிர எண்ணம் பல பேருக்கு இருக்கு. " சூப்பர் " படங்களில் கேமராவின் பங்கு இருந்தாலும், குறிப்பிட்ட காட்சியை பார்ப்பவர் கண்களிலே தான் படத்தின் அம்சம் நிறைஞ்சு இருக்கு. இவர் பார்ப்பதை நமக்கெல்லாம் எடுத்துக்காட்டும் கருவி தான் கேமரா.

மத்தபடி எதுவும் சொல்லரதுக்கில்லை. எல்லாரும் ஆன்ஸர் ஷீட்டை சப்மிட் பண்ணிட்டீங்க. பரீஷை முடிஞ்சுதுன்னு எல்லாரும் ஜாலியா ஏதாவது படத்துக்கு போங்க.. (நானெல்லாம் அப்படித்தான், செமிஸ்டர் முடிஞ்சதும் அடுத்த ரெண்டு நான் சினிமா கட்டாயம் உண்டு).. இன்னும் ரெண்டு வாரத்திலே எல்லா சப்மிஷனையும் கரெக்க்ஷண் பண்ணி நோட்டீஸ் போர்டிலே போடுவோம். அது வரை என்ஜாய் !

இந்த மாத போட்டியில் பங்குபெறும் படங்களின் அணிவகுப்பை இங்கே பார்க்கலாம்.

சின்னஞ்சிறு உலகம் - "மேக்ரோ"

2009-09-14T13:18:00.014+05:30

வணக்கம் மக்கா,
எல்லோரும் எப்படி இருக்கீங்க? நம்மோட புகைப்பட பொட்டியில பலவற்றை படம் பிடிக்குறோம். பெரிய, பெரிய கட்டம் ஆகட்டும், மனிதர்கள் ஆகட்டும், விலங்கு மற்றும் பறவைகள் ஆகட்டும் எல்லாத்தையும் பிடிக்குறோம். இவற்றிற்கும் "மேக்ரோ" புகைப்படங்களுக்கும் என்ன வித்யாசம் ? எளிமையாக சொல்லனும்னா மிக சிறியவற்றை படம் பிடிக்கறது தான் மேக்ரோ. மேக்ரோ புகைப்படத்தின் உண்மையான விளக்கம் என்னவென்றால் "உங்கள் புகைப்பட பேட்டியின் உள்ள சென்சார்/பிலிம் அளவே உள்ளவற்றை புகைப்படமாக பதிவு செய்வது". எடுத்துகாட்டாக உங்க காமிராவின் சென்சார் அளவு 23.6mm x 15.8mm என்று வைத்து கொள்வோம். அதே அளவு உள்ளவற்றை முழுப்படமாக எடுத்தால் அது மேக்ரோ என்றாகிறது. இதை 1:1 மேக்ரோ என்று அழைப்பார்கள்.

இன்னும் புரியாதவர்களுக்கு, கீழே உள்ள படம் 200mm சாதரண லென்ஸ் உதவியுடன் எடுக்கப்பட்டது.

அதே பூ 200mm மேக்ரோ லென்ஸ் உதவியுடன் 1:1 அளவில் எடுக்கப்பட்ட படம் கீழே. இந்த படத்தில் காணப்படும் பூவின் பகுதின் அளவும், என்னுடைய காமிரா சென்சார் அளவும் (23.6mm x 15.8mm) ஒன்று தான்.

இந்த பூவின் உண்மையான அளவை தெரிந்து கொள்ள கீழே உள்ள படம் பயன் படும் என்று நினைக்குறேன்.

படங்களை பார்த்தாச்சா ? முதலில் எழும் கேள்வி என்னவென்றால் மேக்ரோ மற்றும் சாதரண லென்ஸ் இவற்றுக்கிடையில் இவ்வளவு வேற்றுமையா ? அது ஏன் ?

மேக்ரோ மற்றும் சாதரண லென்ஸ் இவை இடையே உள்ள முக்கிய வேற்றுமை "Minimum Focusing Distance". (அதாவது எவ்வளவு அருகில் உங்கள் லென்சினால் போகஸ் செய்ய முடியும் ?). மேக்ரோ லென்சில் இந்த தூரம் மிகவும் குறைவு(என்னுடைய சாதாரன 200mm லென்சின் Minimum Focus Distance 5 அடி, 200mm மேக்ரோ லென்சின் MFD 1.6 அடி). அதனால் உங்கள் காமிரா சென்சாரில் சிறியவற்றை கூட முழுவதும் பரப்பி படம் பிடித்து விடலாம்.

மேலும் மேக்ரோ லென்ஸ் சாதாரன லென்சை விட ஷார்ப்னஸ் மற்றும் தெளிவு அதிகம்.
ஆனால் மேக்ரோ லென்சின் பலகீனம் நம் பர்ஸை பதம் பார்ப்பது :( . பெரும்பாலும் நமக்கு 1:1 அளவில் மேக்ரோ படங்கள் தேவை படாது. 1:2, 1:4 கூட போதும். கீழே உள்ள படம் சாதாரன 200mm லென்ஸ் உதவியுடன் தான் எடுக்கப்பட்டது (ஆனால் வேறு சில வழிமுறைகளை பயன்படுத்தி).

வரும் வாரங்களில் சாதாரன லென்சின் மூலம் மேக்ரோ படம் எடுக்கும் வழிமுறைகளை காண்போம்.

இப்போ சில குறிப்புகளை பாப்போம்.
* பெரும்பாலும் நாம லென்சை சப்ஜெக்டுக்கு அருகில் சென்று படம் பிடிப்பதால் DOF மிகவும் மெலிதாக இருக்கும், அதனால aperature கொஞ்சம் கம்மி பண்ணி வைங்க (f/9, f/16, f/25)

* இப்போ aperature கம்மி பண்றதால ஷட்டர் வேகம் கம்மி ஆகிடும். அதனால முடிஞ்ச வரைக்கும் முக்காலி பயன் படுத்துங்க

* முக்காலி பயன் படுத்த முடியாத நேரங்களில், ISO கூட்டி படம் எடுங்க. அப்போ கொஞ்சம் ஷட்டர் வேகம் அதிகமா இருக்கும்.

* அப்புறம் DOF மெலிதாக இருப்பதால், உங்க சப்ஜடையும், சென்சாரையும் Parallela வச்சுக்கோங்க. அப்பத்தான் உங்க சப்ஜெடின் எல்லா பாகமும் தெளிவா வரும்.

வேறு எதாவது விளக்கம் வேணும்னா பின்னூட்டத்தில் சொல்லுங்க.
நன்றி ! வணக்கம் !

சின்னஞ்சிறு உலகம் - முன்னுரை

எந்த கேமரா தாங்கி என்னோட கேமராவுக்குத் தேவை ?

2009-09-11T01:59:00.000+05:30

Source : http://www.freephotosbank.com/9358.html
கேமராவுக்கு முக்காலி (ட்ரைபாட்) தேர்வு செய்வது எப்போதுமே சற்றே சிரமமான விஷயம் தான். எவ்வளவு தான் ஆராய்ச்சி செய்து எதைத் தேர்ந்தெடுத்தாலும் அட.. இதை விட நல்லதை தேர்ந்தெடுத்திருக்கலாமே என்ற எண்ணம் வருவதை தவிர்க்க முடியாது.

பொதுவாக ட்ரைபாட் தேர்ந்தெடுக்கும் போது கவனிக்க வேண்டிய சில.

* அரங்கத்தில் உபயோகிக்கவா, பொதுவெளியில் உபயோகிக்கவா ?

வெளியில் உபயோகிக்கப்படும் தாங்கிகளுக்கு பொதுவாக மண்ணில் நன்றாக ஊன்றி நிற்பதற்கேற்றவாறு முள் போன்ற அமைப்பு காலில் இருக்கும். உள்ளரங்கம் என்றால் இரப்பரில் வழுக்காதவாரு ஸ்திரமாக நிற்கும் வகையில் இருக்கும். இரண்டில் எது உங்களின் அதிகபட்ச தேவையோ அதற்கேற்றார் போல் தேர்ந்தெடுக்கவும்.

* எவ்வளவு எடை தாங்கும் ? உங்களிடம் உள்ள அதிக பட்ச எடை கூடிய லென்ஸுடன் கூடிய கேமராவின் எடை, மற்றும் லென்ஸ் எவ்வளவு நீளம் வரும். கேமரா முன்னால் சாயாமல் அதை தாங்குமா ?

குறைந்தது இரண்டு கிலோ எடை தாங்கக் கூடியதாக இருத்தல் நலம். லென்ஸுடன் கூடிய கேமராக்கள் அதிலும் டெலி ஜூம் வைத்த லென்ஸுகள் கொண்ட கேமராக்கள் அதிகம் எடை வரும். தாங்கி அதை ஸ்திரமாகத் தாங்க வேண்டும். இல்லாவிட்டால் கால்கள் வளைந்தோ/உடைந்தோ முதலுக்கே மோசமாகலாம் அல்லது ஸ்திரத்தன்மை இழந்து முன்பின் சாய்ந்துவிடலாம்.

* எந்த அளவு உயரம் தேவை, பொதுவாக எது போன்ற புகைப்படத்துக்கு உபயோகிப்பீர்கள் ?

இது முக்கியமான ஒன்று. உங்களின் உபயோகம் எதுபோன்றது என்பதைப் பொறுத்தது. மேக்ரோ போட்டோ எடுப்பவர்களுக்கு, கட்டிடம், இயற்கை காட்சிகள், போர்ட்ரைட் என ஒவ்வொன்றிற்கும் ஒரு உயரம் தேவைப் படுகிறதல்லவா ? பொதுவாக குறைந்தபட்ச உயரமாக மூன்றடியில் இருந்து ஆறடி வரைக்கும் அமைக்கும் வகையில் கிடைக்கும். மேக்ரோ போட்டோகிராபிக்கு இன்னும் குறைந்த உயரத்தில் ஸ்திரமானவைகளும் கிடைக்கும்.

Source : http://www.123rf.com/photo_420928.html

* கியருடன் கூடியதா ? பால் ஹெட் கூடியதா ? அல்லது வெறுமனே கேமராவை அமர்த்தக் கூடியதா ?

கியருடன் கூடியது என்றால் பனாரம / இயற்கை காட்சிகள் மற்றும் போர்ட்ரைட் க்கு நன்றாக இருக்கும்.
பால் ஹெட் இருந்தால் நகர்தல் மிக மென்மையாகவும் அதே நேரம் பிடிப்பு அழுத்தமாகவும் நழுவாமலும் இருக்கும். பெரும்பாலும் வைல்ட் லைஃப் போட்டோகிராபிக்கு இது நன்றாக இருக்கும்.

* உங்களின் பயணத்துக்கு ஒத்துவருமா ? சில ட்ரை பாட்கள் 3 - 4 கிலோவுக்கும் வரும். அதை தோளில் சுமந்துக் கொண்டு சுத்த முடியுமா ?

ரொம்ப சீரியஸான உபயோகம் இல்லாதவங்க, கைக்கடக்கமான, மினி ஸ்பைடர் வகை குட்டி ட்ரைபாடை வாங்கி வைத்துக் கொள்ளுங்கள். அவசரத்துக்கு எடுத்துச் செல்ல, மற்ற வகை பெரிய ட்ரைபாடுகளை விட இவை மிக உபயோகமானவை. இவ்வகைகள், point&shoot கேமராக்களுக்கும், கனம் குறைந்த (பெரிய லென்ஸ்கள் இல்லாத) DSLRக்கும் உபயோகிக்க முடியும்.

* ட்ரைபாட் க்காக உங்களின் அதிகபட்ச பட்ஜட் எவ்வளவு ?

சுமார் ஐநூறில் இருந்து பத்தாயிரத்துக்கும் அல்லது இன்னமும் அதிகபட்ச விலைக்கும் கிடைக்கிறது.

* ஒற்றைக் கால் தாங்கியா ? முக்காலியா ? எத்தனை கைப்பிடி தேவை

உங்களின் உபயோகத்திற்கு ஏற்றவாரு தேர்ந்தெடுக்க வேண்டும். ஒற்றைக் கால் தாங்கி பெரும்பாலும் தன்மீது சாய்த்து வைத்துக் கொண்டு எடுக்க வேண்டும்.

* எந்த மெட்டீரியலில் செய்யப் பட்டிருக்கிறது ?

அலுமினியம், கார்பன் ஃபைபர் அல்லது இரும்பு என பலவகையிலும் கிடைக்கிறது

அப்பாடா... லிஸ்ட் முடிஞ்சுடுச்சான்னு கேக்கறீங்களா ? ... அட யோசிச்சதுல நினைவுக்கு வந்தது இது. அடுத்து வெளிச்சத்தை எப்படி க்ரியேடிவா உபயோகிக்கறதுன்னு பாக்கலாம். அதுவரைக்கும் .. ஜூட்டேய்

கருப்பு வெள்ளை silhouette

2009-09-02T00:30:00.002+05:30

இந்த மாதிரியான கருப்பு/வெள்ளை படங்களை பார்த்து இருப்பீர்கள்.

Ipod விளம்பரங்களில் நிறைய இதுப் போலப் பயன்படுத்தி இருப்பார்கள்.

இதை கிம்பில் சில நொடிகளில் செயவது பற்றி இங்கே.

படத்தை வழக்கம்போல கிம்பில் திறந்து பின்ணனி லேயரை நகலெடுத்துக் கொள்ளுங்கள்.

இனி, Colors -> Threshold தெரிவு செய்யுங்கள்.

Threshold உரையாடல் பெட்டியில் கவனிக்க வேண்டிய விஷய்ங்கள். இடது பெட்டியில் 127 மற்றும் வலது பெட்டியில் 255 என்றும் இடையில் ஒரு சிறிய ஒரு கருப்பு முக்கோணமும் இருக்கும். Pixel Value 127 ம் அதுக்கு குறைவான அளவுகளும் கருப்பாகவும், 127க்கும் 255க்கும் இடைப்பட்ட Pixel கள் வெள்ளையாகவும் மாறியிருக்கும். அதாவது சரிபாதி கருப்பாகவும் , சரிபாதி வெள்ளை நிறமாகவும் படம் மாற்றப்பட்டு இருக்கும்.

முக்கோணத்தை வலதுப் பக்கம் நகர்த்தினால், கருப்பின் அளவு அதிகரிக்கும்.

முக்கோணத்தை இடதுப் பக்கம் நகர்த்தினால், வெள்ளையின் அளவு அதிகரிக்கும்.

உங்களுக்குத் தேவையான இடத்தில் நிறுத்திக் கொள்ளுங்கள்.

மிக மிக எளிதான முறையில் படம் தயார்.

சரி, இதே முறையை பயனபடுத்தி எப்படி Ipod விளம்பரங்கள் செய்வது ?

இதோ இப்படித்தான்

ப்டத்தை கிளிக்கி பெரிதாக்கி பாருங்கள். நான் செய்தது இதுதான். முதலில் threshold உபயோகப்படுத்தி கருப்பு வெள்ளைக்கு மாற்றிக் கொண்டேன். சரியாக இல்லாத இடத்தில் பின்னர் கருப்பு/வெள்ளை நிறத்தை ஒரு புதிய லேயரில் நிரப்பிக்கொண்டேன். பின்னர் மஞ்சள் நிறத்தை புதிய லேயரில் நிரப்பி Multiply mode க்கு மாற்றினால் முடிந்தது வேலை.

செப்டம்பர் மாத போட்டி அறிவிப்பு

2009-08-29T17:31:00.024+05:30

வணக்கம் மக்கள்ஸ்,
ஒரு பள்ளிகூடத்தில் படிச்ச பையன் அதே ஸ்கூலுக்கு வாத்தியா வந்த கதைதான் என்னுதும்,முழுக்க முழுக்க PIT தயாரிப்பான நானும் PITன் மூத்த உறுப்பினர் தீபாவும்தான் இந்த மாசத்துக்கு நடுவர்கள் .என்னது போட்டிதலைப்பை இன்னும் சொல்லலையா?

silhoutte இத தமிழ்ல்ல என்னன்னு சொல்ல? :( நிழற் படம்னு சொல்லலாமா ஆனா தப்பா புரிஞ்சுக்கற அபாயம் இருக்கே. அதனால silhoutteன்னே வெச்சுக்குவோம்.உச்சரிப்பு எப்படியெப்படியோ சொல்றாங்க. பாமர உச்சரிப்பான சில்லவுட்டையே வெச்சுக்குவோம்.( இல்லைனா எனக்கு சொல்றதுகுள்ள நாக்கு சுலுக்குதுங்க:( )

பின்னனி வெளிச்சமாகவும் படத்தில் உருவத்தில் எந்த விவரங்களும் இல்லாமல் அவுட்லைனை மட்டும் உருவத்தை யூகிக்கும் படி டார்க்காக எடுக்கும் படங்கள் சில்லவுட் என மிக சுருக்கமாக வைத்துக்கொள்ளலாம். மற்றபடி உதாரண படங்களை பார்த்தாலே உங்களுக்கு புரிந்துவிடும். மற்றபடி உங்கள் படத்தில் எந்த விபரங்களும்(டீடெய்ல்ஸ்) இல்லாமல் பார்த்துக்கொள்ளுங்கள்

Exposure1/1000 F11 ISO 100

silhoutte சில குறிப்புகள்.

சில்லவுட் உண்மையில் ரொம்ப ஈசிங்க.சாதாரணமா எடுக்கும் படத்தின் ஆக்சுவல் ஷட்டர் ஸ்பீடை இன்னும் அதிகப்படுத்திவிட்டாலே போதும் சில்லவுட் ரெடி.

சாதாரணமா சப்ஜெக்டைவிட பேக்ரவுண்ட் வெளிச்சமாக இருந்தாலோ. சூரிய ஒளியோ வேறு ஒளியோ கேமராவை பார்த்து விழும்போது போது சப்ஜெக்டைசாதாரணமான மோடில் ( ஆட்டோ, ப்ரொகிராம்) படமெடுத்தாலே அது சில்லவுட்டாகத்தான் வரும். கேமராக்கள் சாதாரணமாக ஒளி அதிகம் உள்ள இடத்தின் ஒளியைதான் கணக்கில் எடுக்கும் ( ஸ்பாட் மீட்டரிங் தவிர)

Exposure1/4000 F8 ISO 100
சூரிய உதயம் or அஸ்தமனத்தின் போதும், சூரியன் மறைந்த பின் அடிவானத்தில் உண்டாகும் வெளிச்சத்தின் பின்னனியில் எடுக்கப்படும் சில்லவுட்டுக்கள் மனத்தை மயக்கும்.அந்த பின்னனியில் ஒருவரையோ அல்லது பலரையோ குதிக்க விட்டு சில ஆக்சன் ஷாட்டுக்கள் முயற்சி பண்ணலாம்.ஏனெனில் வெளிச்சப்புள்ளியை கணக்கில் எடுப்பதால் ஷட்டர் ஸ்பீடு வேண்டிய அளவுக்கு மேலேயே கிடைக்கும். படம் ஷேக் ஆகாது.
சூரிய உதய அஸ்தமன பேக்ரவுண்டுகள் அழகான படத்திற்கான பாதி வேலைகளை செய்துவிடும்.

மற்றபடி மதிய வேளையோ எந்த வேளையோ ஷட்டர் ஸ்பீடைமட்டும் அதிகப்படுத்தி சில்லவுட் எடுக்கலாம். ஆனால் நல்ல ஐடியாக்களையே முழுதும் சார்ந்திருக்க வேண்டி வரும்.வேண்டுமெனில் சூரியனுக்கு எதிர் திசையை பயன்படுத்தி நீலவானம் + மேகங்களை பேக்ரவுண்டாக வரவைக்கலாம்.

DSLRகேமராவாக இருந்தால் போகசிங் பேக்ரவுண்ட் மேல் விழாமல் சப்ஜெக்ட்ட் மேல் விழ வைக்க, ஸ்பாட் மீட்டரிங் வைத்துக்கொண்டு சப்ஜெக்ட் மேல் ஹாஃப்ப்ரஸ் செய்து போகஸ் ஆனபின்பு பிரேமுக்குள் வெளிச்சமான இடத்தை நோக்கி போகஸிங் பாயிண்ட் வரவையுங்கள்.
சப்ஜெக்ட் போகஸ் ஆனபின்பு படத்தை எடுக்கும்போது எந்த இடத்தில் போகசிங் பாயிண்ட் இருகிறதோ அந்த இடத்து ஒளிக்கு தகுந்தபடி மீட்டரிங் எடுத்துக்கொள்ளும். சூரிய அஸ்தமனத்தில் இதை முயற்சித்தால் அற்புதமான படங்கள் கிடைக்கும்.

நிலவொளியில் மற்றும் இரவொளியிலும் சில நல்ல சில்லவுட் படங்கள் எடுக்கலாம்.

Exposure 1/5 F4.8 ISO 650
இதையெல்லாம் தவிர சாதாரணமாக எடுத்த படத்தை எப்படி பிற்தயாரிப்பின் மூலம் silhoutte படமாக மாற்றுவதுன்னு அடுத்த போஸ்ட்ல டீட்டெய்லா நம்ம ஆனந்த் அண்ணாச்சி விளக்குவாரு. ஆனா மக்களே அத படிச்சுட்டு ஆல்ரெடி எடுத்து வெச்ச படத்த பிபி பண்ணி அனுப்பிடாதீங்க. ஃப்ரெஷ்ஷா ஒரு படம் எடுங்க.புதுசா படம் எடுக்க எடுக்கதாங்க இன்னும் மெருகேர முடியும்.
நம்ம நந்தகுமார் எடுத்தப்படத்தை பாருங்க.. சூப்பரா இருக்கில்லே!
(ஹை!.. இது ஆல்ரெடி ப்ரைஸ் வாங்கின படம்.. சோ நோ ரீ-எண்ட்ரீ )

PiT மாதாந்திர போட்டி விதிமுறைகள்

படம் அனுப்ப வேண்டிய கடைசி தேதி : 15 ம் தேதி, 23:59 IST

போட்டி விதிமுறைகள்