veenaapponavan

எடைச் சீட்டு

2009-11-13T23:32:00.000-08:00

சிறுமியின் எடைச் சீட்டு
வெளி வரும் முன்னால்
ரயில் வந்து விட்டது.
அம்மாவின் கை பிடித்து
ஏமாற்றத்துடன்
ரயில் ஏறினாள் சிறுமி.
தொண்டையில்
சிக்கிக் கொண்ட காசுடன்
வண்ணமயமாக விழித்தபடி
அவளை வழியனுப்பி வைத்தது
இயந்திரம்.

(c) veenaapponavan@yahoo.com

ஜில் என்று

2009-11-13T23:08:00.000-08:00

மழை வேண்டி
மாரியம்மனுக்கு
1008 இளநீர் அபிஷேகம்.
காலி இளநீர்க் காய்களை
வீட்டுக்குக்
கொண்டு போகும் சிறுமி
என் காலில்
இளநீர்த் துளி
சிந்திப் போகிறாள்
ஜில் என்று.
(c)veenaapponavan@yahoo.com

காற்றில்...

2009-10-28T05:11:00.000-07:00

கைத்தொலைபேசியில்

அவள் அழைப்பு

மெளனமாக அதிரும்போதெல்லாம்

மின்விசிறியின் காற்றில்

அசைந்து ஒலி எழுப்புகிறது

ஓயாமல் பேசும் அவள்

பரிசளித்த மணிக்கொத்து.

நட்சத்திரக் குறியிட்ட தற்கொலைக் கவிதை

2009-09-20T06:12:00.000-07:00

தற்கொலைக்கான உத்தேசம் இல்லையெனினும்
கவிதை பிடித்திருந்ததால்
அதன் பக்கத்தில் நட்சத்திரக் குறியிட்டு
பத்திரிகையை மூடி வைத்தேன்.
குளித்து விட்டு வந்தவுடன்
அதை எடுத்து
அந்தப் பக்கத்தில் இருந்த
இன்னும் இரண்டு கவிதைகளுக்கும்
நட்சத்திரக் குறியிட்டேன்.
அப்படியும் திருப்தி வராமல்
பக்கம் முழுதும் ஆங்காங்கு
நட்சத்திரம் வரைந்து
ஸ்டேப்ளர் பின்னுக்கு மேல்
ஒரு பிறை நிலவை வரைந்தேன்.
கீழே ஒரு மலைத்தொடர் இருக்க வேண்டும்
என்று தோன்றியது.
அதை வரைந்து
அப்புறம் கூட்டம் கூட்டமாக
மரங்களை வரைந்து
நடுவில் ஒரு நதியையும் ஓட விட்டேன்.
நிம்மதியாக வெளியே போனேன்.
இரவு மறுபடியும் அதைப் பிரித்தேன்.
மலைத்தொடர் மேலும்
மரங்களின் நடுவிலும்
குட்டி யானைகள்
நடந்து கொண்டிருந்தன.
அம்மா பள்ளிக்கூடத்தில் படித்த போது
வரையக் கற்றுக் கொண்ட யானைகள்.
(c) veenaapponavan@yahoo.com

எளிமையான நேரம்

2009-09-18T19:30:00.000-07:00

சின்ன முள்ளும் பெரிய முள்ளும்
வித விதமான கோணங்களில் அமைந்து
வேறு வேறு நேரங்களைக் காட்டும்
படங்கள் நிறைந்த புத்தகத்தைப்
பிரித்து வைத்து
மகளுக்கு நேரம் பார்க்க
சொல்லிக் கொடுக்க ஆரம்பித்தாள்,
ரயில் பயணத்தின் போது.
குட்டி குட்டி இட்லிகளை
சாப்பிட்டு முடித்த மகளுக்கு,
இருப்பதிலேயே
எளிமையான நேரத்தில் இருந்து
ஆரம்பித்தாள்.
சின்ன முள் ஒன்பதிலும்
பெரிய முள் பன்னிரண்டிலும்
இருக்கும் படத்தைப் பார்த்த மகள்
ஒன்பது மணி, பன்னிரண்டு நிமிஷம்
என்று சொன்னாள்.
நேரம் பார்த்தலின் விதிகளை
அறிய முயன்ற களைப்பில்
சோர்ந்து உறங்கியவள்
கொஞ்ச நேரத்திலேயே
குட்டி இட்லி ஒன்பதிலும்
பெரிய இட்லி பன்னிரண்டிலும்
நிற்கும் கனவிலிருந்து விழித்து
குழப்பமாக உட்கார்ந்திருந்தாள்.

(c) veenaapponavan@yahoo.com

மூக்கில்

2009-09-03T18:52:00.000-07:00

சினிமாப் பத்திரிகையில் இருந்த
நடிகைகளின் மூக்கின் மேல்
வட்டப் பொட்டு
வரைந்து கொண்டிருந்த
சிறுமியை
மூக்கில் மச்சம் கொண்ட
அவள் அம்மா வந்து
அதட்டிக் கூட்டிப் போனாள்.

(c) veenaapponavan@yahoo.com

ராதாநகர் வீடு

2009-08-13T20:57:00.000-07:00

நாற்பது வருஷம் குடியிருந்த வீடு

இடிந்து விழுமோ என்ற பயத்தில்

புதுவீட்டுக்குக் குடிவந்தோம்

ஒரு மழை நாளில்.

தபால் நிலையத்தில் முகவரி மாற்றத்தைப்

பதிவு செய்துவிட்டு

ரேஷன் அட்டையையும் மாற்றிக் கொண்டோம்.

'அந்த வீடு' என்று சொல்லப்

பழகிக் கொண்டோம்.

'பழைய வீடு' என்றும் சொல்லலானோம்.

ரயில் நிலையத்தில் இருந்து

வீட்டுக்கு வரும் வழியில்

பழைய வீடு இருக்கும்

சந்தைப் பாராமல்

கட்டாயமாகத் தலை திருப்பி

விஷ்ணு பேக்கரியைப் பார்க்கவும்

பழகிக் கொண்டோம்.

அந்த வீட்டுத் தென்னைமரத்தில் காய்த்த

தேங்காய்கள் வந்தன அவ்வப்போது.

வாசலில் இருந்த வேப்பமரம்

மின்கம்பியை உரசுகிறது

என்று புகார் சொல்ல

சிலர் வந்தார்கள் ஒரு முறை.

போன வாரம் ஊருக்குப் போயிருந்தபோது

ஒரு நாள் அதிகாலையில்

'அந்த வீடு அப்படியே கிடக்கிறதே'

என்று மெதுவாக ஆரம்பித்தாள் அம்மா.

'தானாக இடிந்து யார் மேலாவது

விழுந்து வைத்தால் என்ன செய்வது'

என்று கவலைப்பட்டாள்.

'சரி. சீக்கிரம் இடித்து விடலாம்.

அப்புறம் நிதானமாக கட்டிக்கொள்ளலாம்'

என்றேன்.

அந்த விடிகாலைக் குளிரில்

எங்கள் ராதாநகர் வீடு

வேப்பமரம் , தென்னைமரங்களுக்கு நடுவே

புதிதாகப் பெயர் வைக்கப்பட்ட

குழந்தையைப் போல

மெதுவாகப் புரண்டு படுத்தது.

போக்குவரத்தின் திசை

2009-08-05T03:03:00.000-07:00

எதிர்பாராமல்
சாலையில் கடந்து போன
சித்தியைப் பார்த்த குழந்தை
ஆட்டோ உள்ளே இருந்து கூவுகிறாள்.
வண்டி நிற்குமுன்
ஆட்டோ பின்னால் இருக்கும்
சின்ன ஜன்னல் வழியாக
தன குட்டிக்கையை நீட்டி
சித்தியை அழைக்கிறாள்.
பரபரப்பான போக்குவரத்து
அவள் கை நீட்டும் திசையில்
சென்று மீள்கிறது ஒரு கணம்.
(c) veenaapponavan@gmail.com

பாபு இறந்து விட்டார்

2009-07-23T17:51:00.000-07:00

இரவு 9 மணி அளவில்

மின்வண்டி பல்லாவரத்தை நெருங்கும்போது

என் சக பயணிக்கு

அலைபேசியில் தகவல் வந்தது.

பாபு எறந்துட்டாரு என்று.

அவருடன் கூட வந்தவர்

மெதுவாகத் தலையை ஆட்டி

அந்தத் தகவலை ஏற்றுக் கொண்டார்.

அவர் மனைவி சேலைத் தலைப்பால்

தன வாயை மூடிக் கொண்டார்.

அவர்களின் பயணத் திட்டம் மாற்றப்பட்டு

அப்படியே அரசு மருத்துவமனைக்குப் போக

முடிவானது.

கையெழுத்து கிய்யெழுத்து போட்டு

பாடியை வாங்குவதற்குள் விடிந்து விடும்

என்றார் கூட வந்தவர்.

அலைபேசியில் சாந்திக்கும் சரவணனுக்கும்

தகவல் சொன்னார் முதலில்.

அப்படியே நைட் டியூட்டிக்குக்

கிளம்பிக் கொண்டிருந்த வேலுவை

கூட்டு ரோட்டுக்கு வந்து டாக்ஸி பிடித்து

கையோடு குமாரையும் கூட்டிக் கொண்டு

ஆஸ்பத்திரிக்கு வந்து விட சொன்னார்.

சாவியை முதலாளியிடம் கொடுத்து விட்டு

உடனே வருவதாக சொன்னான் வரதன்.

வேணியின் எண்

ஒலித்துக் கொண்டிருந்த இடைவேளையில்

'எவ்வளவோ அட்வைஸ் பண்ணேன். கேட்டாரா'

என்று சொன்னார் கூட வந்தவரிடம்.

சேகரிடம் கொஞ்சம் பணம் எடுத்து வரச் சொன்னார்.

இதற்கிடையே மதி அவரை அழைத்து

பாபுவைப் பற்றிக் கேள்விப்பட்டது

உண்மையா என்று விசாரித்தான்.

வேணி குடும்பத்துடன்

மொட்டை மாடியில் படுத்திருப்பாள்,

அவளுக்கு காலையில்

சொல்லிக் கொண்டால் போதும்

என்று முடிவானது.

பார்க் ஸ்டேஷன் வந்ததும்

எப்போதும் போல்

கூட்டத்தைத் தவிர்க்க

ரயில் நிற்கும் முன் இறங்கி ஓடாமல்

கூட்டத்துக்கு நடுவில் மெதுவாகப் போனேன்.

ஆறுதலாக இருந்தது.

விளம்பர இடைவேளைக்கு நடுவே

2009-05-29T00:56:00.000-07:00

பித்துப் பிடித்த மனநிலையின்
உச்சத்தில் பிறந்த
கவிதைகளின் தொகுப்பு என
கவிஞன் சொல்லி இருந்தான்
தன் முன்னுரையில்.
இடம், தேதி குறிப்பிட்டு
முடித்திருந்த
அந்த முன்னுரைக்குக் கீழே
கவிதைகள் வெளியான
இதழ்களின் பெயர்களும்,
புத்தகத் தயாரிப்பில்
உறுதுணையாக இருந்த
நண்பர்களின் பெயர்களும்
பட்டியலிடப்பட்டு இருந்தன.
ஒழுங்கு கலைந்த மனத்தின்
பேச்சாக விரிந்த
கவிதைகளுக்கு நடுவே
புத்தகத்தின் பெயரும்,
பக்க எண்ணும்,
கவிஞன் பெயரும்
ஓயாமல் வந்து கொண்டிருந்தன
விளம்பர இடைவேளைகளைப் போல.

(C) veenaapponavan@yahoo.com

கைப்பிடி கனவு

2009-05-24T06:09:00.000-07:00

மடித்து வைத்துத் தூங்கிய
கைகளின் அழுத்தம்
தோளில் குழந்தையைச் சுமந்த
கனவாக வெளிப்பட,
புரண்டு படுத்தவள்
அறைத்தோழியை
கொஞ்சிச் சிரிக்கிறாள்.

(c) veenaapponavan@yahoo.com

மாரியம்மன் வேப்பமரம்

2009-05-21T23:08:00.000-07:00

மாரியம்மன் கோயில் வேப்பமரம்
எங்கள் வீட்டுப் பக்கமாக
சாய்ந்து வளர்ந்திருக்கிறது.
இலை, பூ பறிக்க வேண்டுவோர்
வீட்டு கேட்டை அசைத்து
குரல் கொடுத்துவிட்டு
மாடிப்படி ஏறுகிறார்கள்.
குழந்தைகளுக்கு
அவர்கள் கை காட்டிய பூக்களைப்
பறித்துக் கொடுத்தேன் நேற்று.
அதை மாரியம்மனிடம் காட்டி
அவள் அருளை
அதில் ஏற்றிக் கொண்டு போனார்கள்.
களை ஏறி
ஒளி வீசிக் கொண்டிருந்தாள் மாரி.

(c) veenaapponavan@yahoo.com

தேடப்படும் தீவிரவாதி

2009-05-11T03:13:00.000-07:00

சென்னை சென்டிரல் ரயில் நிலையத்தின்
மெட்டல் டிடெக்டர் வாயிலுக்குள்
வலது கால் வைத்து உள்ளே நுழைந்தேன்.
நூற்றுக்கணக்கானவர்கள்
கடந்து கொண்டிருந்த இடத்தில்
என்னை மட்டும் சோதனைக்கு அழைத்தாள்
போலீஸ்காரி.
பையையும், பயணச்சீட்டையும்,
அடையாள அட்டையையும் சோதித்து
விவரங்களைப் பதிவு செய்து கொண்டு
விடுவித்தாள் என்னை.
அடுத்த வாரம் அதே மாதிரி
ரயில் நிலையத்துக்குள் நுழைந்த போது
நானாகவே என் பையை
அவளிடம் நீட்டினேன்.
என்னை அடையாளம் கண்டு கொண்டவள்
புன்னகைத்து 'போ' என்று
கை காட்டி விட்டாள்.
தேடப்படும் தீவிரவாதிகளின்
பட்டியலில் இருந்து
என் பெயர் நீக்கப்பட்ட சந்தோஷத்தில்
மூன்றாவது நடைமேடையை நோக்கி
உற்சாகமாக நடந்தேன்.

(c) veenaapponavan@yahoo.com

என்னிடம் பெரிதாக

2009-05-01T20:15:00.001-07:00

'வாழ்க்கை எப்படிப் போகிறது'
என்று கேட்டான்
ரொம்ப நாள் கழித்து
சாட்டில் வந்த நண்பன்.
முன் தினம்
சரவணபவனில்
பெரிய தோசை வேண்டும்
என்று அடம் பிடித்து வாங்கி
சாப்பிட முடியாமல்
முழித்துக் கொண்டிருந்த
சிறுமியைப் பற்றி சொன்னேன்.
'அப்புறம் பார்க்கலாம்' என்று
மறைந்து போனான்.
என்னிடம் பெரிதாக
எதையேனும்
எதிர்பார்க்கிறார்களோ.

(c) veenaapponavan@yahoo.com

K அலைவரிசை

2009-04-23T04:50:00.000-07:00

K அலைவரிசை
சரியாகத் தெரியவில்லை
என் தொலைக்காட்சியில்.
படமும் ஒலியும்
இடைவிடாமல்
குதித்துக் கொண்டிருந்தன.
அதனால்
அதைத் தவிர்த்து விட்டு
பிற அலைவரிசைகளில் மட்டும்
உலவிக் கொண்டிருந்தேன்.
குப்பைகள் நிறைந்து
தூசி படிந்து
மின்விளக்கு பழுதாகி
நான் புழங்காமல்
இருக்கும் அறைக்குள்
குதித்தபடியே
சென்று மறைந்தது
K அலைவரிசை

(c) veenaapponavan@yahoo.com

அம்மாச்சி

2009-04-22T21:29:00.000-07:00

படுத்த படுக்கையான அம்மாச்சி
ஓயாமல் பேசிக்கொண்டே இருந்தாள்.
தன் கல்யாணம் எப்படி நடந்தது என்பதைத்
திரும்பத் திரும்ப
மூன்று நாட்களுக்கு சொன்னவள்
நான்காம் நாள்
தன் பேத்தியை அழைத்து
பக்கத்தில் உட்கார வைத்து
பின் கழுத்தில் குங்குமம்
வைத்துக் கொள்வதைப் பற்றி
எடுத்து உரைத்தாள்.
கவிதை எழுதும் பழக்கமுள்ள பேத்தி
இப்போதும் சிலசமயம்
சிமிழில் இருந்து
விரலால் தொட்டு
குங்குமத்தை எடுத்து
மெதுவாக
கையை பின்னால் கொண்டு போகிறாள்.
பின்னால் போனதும்
அது அவள்
அம்மாச்சியின் கையாகி விடுகிறது.

(c) veenaapponavan@yahoo.com

இணைப்புகள்

2009-04-09T08:03:00.000-07:00

இணைப்புகள் எல்லாம்
உபயோகத்தில் உள்ளதாக
அறிவித்தவளின் குரல்
மிகவும் மெல்லிசாய்க்
கேட்டது.
ஒருவேளை
துணி மடித்து வைத்தவாறே
பேசுகிறாளோ என்னவோ;
நான் அழைத்த எண்ணில்
இருப்பவளைப் போலவே.

(c) veenaapponavan@yahoo.com

ஏப்ரல் ஒன்று

2009-04-02T18:14:00.000-07:00

முட்டாள்கள் தினத்தன்று காலை
தயங்காமல் உன்னிடம்
என் காதலைச் சொன்னேன்.
'நானே சொல்லலாம் என்றிருந்தேன்' என்றாய்.
'இன்று ஏப்ரல் ஒன்று' என்ற வாக்கியம்
என் காதல் பேச்சுக்குப் பின்னால்
கத்தியைப் போல்
மறைத்து வைக்கப்பட்டிருந்தது.
'எனக்கும் தெரியும் இன்று ஏப்ரல் ஒன்று' என்ற
வாக்கியத்தின் பின்னால் மறைந்து கொண்டு
நீயும் காதல் பேசினாய்.
இந்த உரையாடலின் ஒரு பகுதி
என்றாவது நம் கனவில் வரக்கூடும்,
புதிய திரைப்படத்தின்
ட்ரெயிலர் காட்சியைப் போல.

(c) veenaapponavan@yahoo.com

மழை நிலா

2009-03-28T18:15:00.000-07:00

மழையில்
நிலா பார்த்த
இரவில்
நிலவில்
மழை பெய்யும்
கனவொன்று
கண்டேன்.

(c) veenaapponavan@yahoo.com

மந்த்ராலயம்

2009-03-27T11:16:00.000-07:00

1
--
காத்திருப்புகளால்
நெய்யப்பட்டிருக்கிறது
இந்தப் புண்ணியத்தலம்.

2
--
துங்கபத்ரையில்
பரிசல் ஓட்டுபவன்
'சுற்றி விடட்டுமா' என்று
பயணிகளிடம் கேட்டு
பரிசலை சுற்றி விடுகிறான்.
சுற்றி நிற்கும் வரை
கழியை வெளியே எடுத்துக்
காத்திருக்கிறான்.

3
--
இருநூறு வருஷங்களுக்கு முன்னால்
மலைக்குப் பக்கத்தில்
மண் பரப்பி வைத்துவிட்டுத்
தூங்கினார் பீமய்யா.
மலையில் இருந்து
அந்த மண்ணில் குதித்து
பாத அளவு கொடுத்துவிட்டுப்
போனான் அனுமன்.
பீமய்யாவின் பரம்பரையினர்
ஐந்து வருஷங்களுக்கு ஒரு முறை
அனுமனுக்கு புது செருப்பு
செய்து கொடுத்து வருகின்றனர்.
இரவில் செருப்பு தேய
மலையில் அலைகிறான் அனுமன்.

4
--
காய்ந்த
வெற்று நிலங்களுக்கு அப்பால்
சூரியன் சிகப்பாக
மறைய ஆரம்பித்த போது
விடுதியைக் காலி செய்து விட்டு
புறப்பட்டேன்.
ரயில் நிலையத்துக்குப்
போகும் வழியில்
கான்க்ரீட் கூரைக்குக்
கீழிருந்த கோயில் மாடுகள்
மற்றுமொரு சூரிய அஸ்தமனத்தை
மங்கலாகப்
பார்த்துக் கொண்டிருந்தன.

5
--
காத்திருப்புகளால்
நெய்யப்பட்டிருக்கிறது
இந்தப் புண்ணியத்தலம்.

(c) veenaapponavan@yahoo.com

தனிமையின் விளிம்பு

2009-03-26T18:53:00.000-07:00

கிண்ணத்தில் அளந்து
தட்டில் கவிழ்க்கப்பட்ட
அளவுச் சாப்பாட்டின்
வட்ட விளிம்பில்
பிரதிபலிக்கிறது
என் தனிமை.

(c) veenaapponavan@yahoo.com

உன் வார்த்தை

2009-02-27T17:29:00.000-08:00

கையில் பிடித்த மீன் போல
துள்ளுகிறது உன் வார்த்தை.
சில சமயம்
கை நழுவி
கடலில் கலந்து விடுகிறது.
சில சமயம்
என் கூடையில் சேர்ந்து
செத்துப் போகிறது.

(c) veenaapponavan@yahoo.com

தயங்கி தயங்கி

2009-02-27T17:26:00.000-08:00

அம்மாவின் கை பிடித்து
மெதுவாகப் படி இறங்குகிறது
குழந்தை.
சீராகப் போய்க் கொண்டிருந்த
காலம்
சற்று தயங்கித் தயங்கி
முன்னகர்கிறது.

(c) veenaapponavan@yahoo.com

அழைக்காதே

2008-12-20T04:32:00.000-08:00

விளையாடிக் கொண்டிருந்த
கீழ்வீட்டுக் குழந்தையின் கையில்
புது தாயத்து மின்னியது.
என்ன விஷயம் என்று கேட்டேன்
அவள் அப்பாவிடம்.
ஊரில் இருந்த
அவர் மனைவியின் தங்கை
காமாலையில் இறந்து போய் விட்டாளாம்.
அவளுக்கு இந்தக் குழந்தை மேல்
ரொம்ப பிரியமாம்.
ஊருக்குப் போனால் இரண்டு பேரும்
எப்போதும் சேர்ந்தே இருப்பார்களாம்.
குழந்தையைக் குளிப்பாட்டுவாளாம்.
இடுப்பில் வைத்துக் கொண்டு
ஊர் முழுக்க சுற்றி வருவாளாம்.
அநியாயமாக இறந்து விட்டாள் பாவம்.
தாயத்து பற்றி ஒன்றும் சொல்லவில்லையே என்று
நினைத்துக் கொண்டே மேலே வந்தேன்.
சொல்லி விட்ட மாதிரியும் இருந்தது.
அதோடு விட்டு விட்டேன்.

(c) veenaapponavan@yahoo.com

மேஜிக்

2008-12-20T04:31:00.000-08:00

மேடையில் ஒருவனை
மேஜை மேல் படுக்க வைத்து
இரண்டு துண்டாக வெட்டினார்
மேஜிக் நிபுணர்.
அப்புறம்
மேடையிலேயே மாரடைத்து
மயங்கி விழுந்தார்.
பார்வையாளராக இருந்த
மருத்துவர் மேடை ஏறினார்.
வினோத விளக்குகளின் ஒளியில்
நிபுணரின் மரணத்தை உறுதி செய்தார்.
அந்த மேஜையை
ஓரக்கண்ணால் பார்த்துக் கொண்டே
கீழிறங்கினார்.

(c) veenaapponavan@yahoo.com