demain je brule

جمهوريات الهندي

2009-07-10T20:06:00.001+01:00

مانيوال زيلايا رئيس الهندوراس المنتخب ديمقراطيا في 2006 ، عجبتو الرئاسة و كرسي الرئاسة و ألعاب الرئاسة ، و حسّ اللي دورة رئاسية وحدة ما تكفيهش باش يواصل المسيرة و يتمّ نعمتو على مواطني الهندوراس الأفاضل .
و كيما يعمل البعض من عصابة الـ22 ، حبّ يعمل استفتاء يبدّل بيه الدستور و يكمّل ما تيسّر من الدورات الرئاسية ...
و لكن هيهات...تجري الرياح بما لا يشتهي سفينة الرئيس ...
و دار عليه الجيش و تمّ إيقافو و من بعد تمّ رميه (كما ترمى النفايات) على الحدود مع كوستاريكا ...و قالولو يرحم من زار و خفف

العبرة من الخبر هذاية ، انّ للكرسي مضار عديدة يصعب حصرها ، و اللي ما يلتزمش بالكتيّب متاع استعمال الكرسي فمن الوارد جدّا انّو يصاب بعديد من الأمراض النفسية و العضوية اللي يصعب الشفاء منها ، و منها بالخصوص الادمان على الاستفتاءات و تحوير القوانين و الدساتير و التشريعات و تحويلها الى قطع من لعبة ليقو او الى عجينة متاع صلصال في يد فرخ من فروخ التحضيري ،
و من اعراض مرض الكرسي الاخرى ، المناشدات و مسيرات العرفان و التأييد و الدعم و المساندة و الموافقة الدائمة (بالاغلبية) و توحيد الالوان و ضمّها في لون واحد معروف ، و القضاء على كل الالحان الناشزة و الحفاظ على اللحن الوحيد و الصوت اليتيم المكرر الذي حفظه الجميع عن ظهر قلب و يتوق الكثير الى سماع لحن غيره ...
و من الاضرار الثانوية كذلك للجلوس المطوّل هو تضخّم المؤخّرة و اكتسابها طبقات عظيمة من الشحوم و الزوائد والدهون ، و من ثمة تحوّلها لمسكن للطفيليات و مرتع للكائنات الانتهازية و الفيروسات و البكتيريات المسببة للتعفّن و تغيّر لون الانسجة و تحوّلها للون واحد .
الله يفكّـنا من الكراسي و يجيرنا من شرّ الكراسي و اصحاب الكراسي و يبعّدهم علينا (هوما و كراسيهم و رافلهم و بوليسهم و صناديقهم و ابواقهم و ابواق صناديقهم و صناديق ابواقهم ) بعد السماء عن الارض و السماح عما سلف (في الصحة و المال) ...
اللهمّ آمين

نرجعو للخبر ، بلغنا انو سي زيلايا عمل اتصالاتو قبل ما يقدم على العمْلة متاعو على خاطر من غير المعقول انو يقبل على خطوة كيما هاذي من غير ما يسأل اهل الذكر. و اهل الذّكر هنا هوما اخواننا و ابناء عمومتنا من عصابة الـ22 ، اصحاب الخبرة في الميدان و اللي يعتبرو من المجدّدين في مجال القوانين الدستورية و اشكال النظام الجمهوري (و هذا بشهادة الخبراء في كافة انحاء العالم ) ، و من جملة ما بلغنا كذلك انو فيهم شكون ضحك عليه و استغرب منو اللجوء للاستفتاء بعد 3 سنوات فقط في حين انو الاستفتاء في البلاد المذكورة لا يكون الا بعد اكثر من ثلاثين سنة على اقل تقدير .
و قالو حرفيا : "... شبيك زلعت روحك يا زيلايا ، عملت 3 سنين و تحب تعمل استفتاء ؟؟؟ ريتني آنا ؟؟ الدورة اللي تشيّح عليها في ريقك نجيبها بـزوز مسيرات و ماتش كورة ..."
(بدون تعليق)

الا انّو السيّد المتحدّث نسى (او تناسى) انو يندر في العالم باش تلقى كيما العريبة في الوفاء و البقاء على العهد و الحفاظ على الماء و الملح و العشرة الطيّبة، و ايمانيوال زيلايا مشى في بالو اللي شعب الهندوراس ما يبعدش برشة على جمهور أمينة و فاطمة بوساحة و نور شيبة و يسهل باش ينجّم يعدّيها عليه، الا انو الواقع اثبتلو العكس...
و اثبت كذلك انو فمة شعوب كانت مسخرة العالم و مهزلة التاريخ ...و دول كانت تحكم فيها شركة متاع غلّة ... دول وهمية كانت موضع تندّر بين البلدان و تتحارب على خاطر ماتش متاع كورة ... فاتتنا بمراحل.
الدول و الشعوب هذية الكل فاقت على ارواحها ، و قالت لا للفيلم اللي حبّ زيلايا يعدّيهولهم.
و قعدنا احنا راقدين ... نشخرو ... من كروشنا الضخمة المتضخّمة الممتلئة بالكسكسي و المقرونة و دجاج الحاكم...

الا انو فمة مؤشّر باهي و مبشّر بقرب الفرج ... احنا زادة وصلنا (بشوية تأخير ) لمرحلة الحرب على خاطر الكورة ...

خير من بلاش
ّ

ملاحظة في نفس السياق:
موقع محرّك البحث المعروف (قوقل) فيه عادة حلوة تقضي بتغيير رسم الصفحة الرئيسية حسب الاشخاص (الشخصيات التاريخية) اللي تولدت و الا ماتت او توصلت لاختراع او اكتشاف مهم في نفس التاريخ.
عندي قرابة الثلاثة سنوات مواظب على المرور عبر موقع القوقل بشكل يومي و مانتذكرش القوقل أرّخ لحدث أو ذكر شخصية عندها علاقة بواحد من امة الثلاثمائة مليون ...
الاكيد انو العيب موش في القوقل

شخصية اليوم (10 جويلية 2009) هي عالم الفيزياء الكرواتي نيكولا تسلا

العزوزة هازّها الواد (2) : البــكاء علـى فــقيد الأمـّــــة

2009-07-03T18:04:00.001+01:00

الصّور من مجموعة الفايسبوك للبكاء على ملك البوب

Free From 404

2009-07-01T14:15:00.002+01:00

الجولة 17

2009-06-28T21:00:00.001+01:00

افتقدت المدوّنات مؤخّرا شخصية عمّار المحبوبة و المحترمة على نطاق واسع بين جموع المدوّنين ، و في الوقت اللي تصوّر فيه البعض انو ربما خرج للتقاعد او اعفي من مهامّه (و انتقل الى مهامّ اخرى) ، اتضح انو كان موجود في البلوقسفير الا انو متفرّغ للمواجهة من نوع خاص مع مدوّنة "صحفي تونسي" (متاع الصحفي زياد الهاني) .
بعد كل مرّة يقوم فيها عمار بحجب المدوّنة يقوم الصحفي زياد الهاني بإصدار نسخة جديدة من مدونتو (بإضافة رقم النسخة للعنوان الالكتروني) .و وصلنا اليوم للنسخة عدد 17 من نفس المدوّنة.
يقول القائل اذا كان المدوّنة المعنية فيها تجاوز للقانون ، كالسبّ و الثلب و المغالطة و نشر اشاعات تهدف لتعكير الصفو العام ، و التعاطف مع تنظيمات و جماعات تخريبية و القيام بعمليات الاستقطاب و التجنيد للجماعات الارهابية و خدمة بعض الاطراف الاجنبية اللي تتربّص بوطننا (العزيز)، و قد يكون فيها محتوى مخلّ بالاخلاق و الاعراف و القيم كالتشجيع على الاستغلال الجنسي للأطفال و تصوير الاساءة للحيوانات او حتى تلويث البيئة و المساهمة في الاحتباس الحراري،
فمن الاجدر في بلاد يسودها القانون كيما بلادنا انو يتحال السيّد كاتب المدوّنة على القضاء و ينال جزاؤ العادل. و يتم فسخ المدوّنة المعنية تماما من ارشيف الواب، لأنو بصراحة ما يساعدناش وجود مدوّنات اجرامية ذات محتوى خطير تنغّص علينا أفراحنا الدائمة و جودة الحياة اللي ننعمو بيها الدائم. و من التقصير ترك صاحب المدوّنة يمرح في الطبيعة بكل حرّية.
أما إذا كان مافماش في المدوّنة المذكورة (اي مدونة الصحفي التونسي) اي اخلال بالقانون ، و كل ما فيها انّو السيّد يقوم بمهمتو ( واجبو) الصحفي بكل حرفية (بـما تتطلبو الحرفية من هامش متاع حرّية )، فمن غير المعقول انو يتواصل المسلسل (التركي -المكسيكي ) متاع الحجب ، خاصّة انّو فتح حساب البلوقر ما يتكلّف شيء (يرحم والدين القوقل) و اعادة نشر المدوّنة ما يكلّفش صاحبها اكثر من بضعة دقائق.

حاصيلو عمّار برهن مرّة اخرى على صحّة راس و صحّة رقعة ما صاروش... و واضح اللي هو و المساندين (الرسميين )متاعو هوما الخاسرين من مواجهة من النوع هذا .
و هنا قاعدين نتبّعوا فين باش توصل الحكاية
و هذا العنوان متاع النسخة سبعطاش من مدونة زياد الهاني:
http://journaliste-tunisien-17.blogspot.com

العزوزة هازّها الواد

2009-06-27T11:22:00.003+01:00

توانسة ينظمون تظاهرات افتراضية على الانترنات (الفايسبوك) دعما للمحتجّين على نتائج الانتخابات في إيران

تدوينة صيفية

2009-06-24T21:46:00.002+01:00

غرناطة:
(زوز إطارات يضربوا في النوم عندهم سنوات - قهوة قليلة الحرفاء في حومة قليلة الحركة - المكان المثالي لتجنّب عيون الرافل التي لا تنام)
دخل للقهوة يلقى صاحبو يتفرّج في التلفزة، فيها برنامج وثائقي على تاريخ العرب في اسبانيا .
شاورلو بيديه و قالو " هيّا .. هاو سايي "
صديقو قام ( و ماعينوش باش يسيّب البرنامج) : " برجولية شي كبير اسبانيا ،اشبيلية ، قرطبة ، غرناطة ، قصر الحمراء...اييييه آش خصّ ندبّر مشية لإسبانيا "
صاحبوا (يحطّ السّـاشي متاع الجعّة فوق الموتور و يخلي بلاصة لصاحبو وراه) :" ديما تحلم ؟؟؟ تحبّ تمشي لإسبانيا ؟؟هاو باش نهزّك لقصر الحمراء بيدو ..."

(في حي شبه مهجور - دار ياجور في طور البناء - مبعد ما شربوا شطر الموجود في الساشي)
"آش قولك ... تفرّج ...شوف ...اما خير ... قصر الحمراء و الا دار الياجور ؟؟؟ (يشير للجدران متاع الياجور المنقوب) هاي الحضارة الاسلامية... هاي اثار العرب ... هاو المعمار ...
"بربّي قيلني ...فكّني..."
"هاهاهاها شوف هاك الزخارف ...شوف الفنّ ... شوف الفيناس متاع البناي اللي بناها الدّار ... زعمة مولاها قدّاش صرف عليها ..."
(يجبد السيقارو الاخير و يتذكّر الاحلام و الطموحات الكبيرة اللي كان يحلم بيها و يقارنها بقصر الياجور)" الدّخان وفى ...شوف منين ندبّرو الدخّان ..."
صاحبو يعمل روحو ما سمعوش و يواصل:" انتي ماهو عامل لاتر ( آداب) هات اعطينا يا خويا شويّة شعر مالعتيق و الا تعرفش كيفاش هيا نمثّلو ...انتي ابن زيدون و انا ولادة ... ميسالش"
"ولاّدة ؟؟ " ( يتنهّد و يتذكّر وحدة مالبنات اللي تعدّاو قدّامو ) " انتي ولاّدة ؟؟؟ " ( يحلّ علبة اخرى يشرب شطرها فرد نفس) " ولادة مشات ... ولادة راحت ... مشات مع الماشين و ركبت البي ام و المرسيداس مستحيل كان مازالت ترجع ..."
صاحبو ديما يضحك ... ياقف فوق كعبة ياجور :" ابك ... ابك ... كالنساء ملكا لم تحافظ عليه كالرّجال ..."

ملاعبيّة المنتخب يكوّروا ... في الكاليبسو:

حاجة بركة حبّيت نعرفها شكون الملاعبي (الصنديد) اللي حسب جريدة الصباح "كان مرفوقا بـ4 فتيات" ... اينعم 4 فتيات ... و انا نقول شبيهم الجماعة يلعبوا بالتقسيط المريح قدام نيجيريا ، كاينّهم عاملين مزيّة على شعب العشرة مليون ... و هوما على ما يبدو يدخّروا في مجهوداتهم لما أهمّ...

بين الصديق القديم و الصديق الجديد ...الصحبة صحبة و النيّة يجيبها ربّي :
النهارين عملت تحيين لقنوات البارابول ، فاكتشفت قناة اخبارية جديدة إسمها "روسيا اليوم " ، وهي في الحقيقة قناة متميّزة من حيث نوعية الاخبار و الحرفية متاع المقدمين و المراسلين و معدّي البرامج . الا انّو اكثر حاجة جلبت انتباهي هو شعار القناة " روسيـا اليوم : مشروع جديد من صديق قديم " ... يحبو يقولو اللي روسيا متاع اليوم هي امتداد للإتحاد السوفياتي و يذكّرو في العريبة بالعشرة الطيّبة و الماء و الملح اللي بيناتهم ... و لاحظت كذلك انو نسبة كبيرة من البرامج هي برامج تاريخية و تهتم بتاريخ الاسلام و المسلمين في روسيا و الاتحاد السوفياتي و تاريخ المراسلات بين خلفاء بغداد و ملوك و قياصرة روسيا .

زدت قعدت نتجوّل بين القنوات فاكتشفت عدد كبير من القنوات من نفس النوعية (اي نفس التوجّه ) ، قنوات اخبارية ، قنوات اقتصادية ، فنّية ... تشترك كلّها في محاولات التقرّب من المشاهد العربي . من جملتها قناة "كوريا تي في" اي قناة كوريا (الجنوبية تحديدا ) اللي تتخصص في بثّ موسيقى البوب الكورية ، الا انها في الفواصل تبثّ ومضات تعدد مزايا التكنولوجيا الكورية و تفوّقها في صناعة السيارات و الهواتف الجوالة و قطاع الانشاءات الضخمة (بناء الابراج و ناطحات السحاب و السدود و الطرقات و الجسور) و تزيد تجيبلك شكون يعدد فوائد التعاون العربي الكوري و تاريخ العلاقات الكورية العربية اللي يرجع الى اكثر من الف سنة (و الله اعلم ) ... و عندها شعار زادة ما يبعدش برشة على الشعار الروسي : "صديق و شريك جديد"

new friend and partner

حتّى من التشاد (مع احترامي للاخيّان التشاديين) عاملة قناة فضائية و تقدّم برامج بالعربية و تعدد كذلك روابط الصداقة و الاخوة اللي تربطها بالعالم العربي ...

و لا حظت كذلك انو القناة الفرنسية الاخبارية (فرنسا 24) زادت مساحة البثّ باللغة العربية من 4 ساعات لـ10 ساعات و نفس الشيء للقناة الحكومية الالمانية "دوتش فالا" , و اعتماد قناة الاورونيوز على اللغة العربية مع بقية اللغات الاوروبية في البثّ الحيّ صوتا و كتابة ، و كي نزيدهم قنوات الاصدقاء (القدم) كيما البي بي سي العربية و قناة الحرّة و "السي ان بي سي الاقتصادية" و قناة الـ "ام تي في آرابيا" و السي ان ان و شبكة الفوكس اللي عاملة اتفاقية مع شبكة روتانا متاع الوليد بن طلال ، و قنوات الـ إم بي سي (الـثانية و الرابعة و الاكشين خصوصا) المتخصصة في اعادة كل ما يبثّ في التلفزيونات الكبرى الامريكية ، و نحسبوا معاهم القنوات المشبوهة و اللي امورها ماهياش كيما القنوات العراقية و قناة العربية و بعض القنوات المصرية ... فالمجموع يمثّل نسبة كبيرة من جملة القنوات المتاحة للمشاهد العربي ... لكن السؤال في خضمّ الفوضى الاعلامية هاذي ، شنوة اللي صار باش العالم الكل يهتمّ فجأة بالناطقين بلغة النايلسات ؟؟ و وينهم المعنيين بالامر ؟؟ وينهم الـ 300 مليون عربي ؟؟ (فمة 10 ملاين مكانهم معروف و هوما شطر فاصع مالرافل و شطر يسخّن في البندير لنوفمبر الجاي ) اما وينهم البقية ؟ ويني القنوات العربية ؟؟... الله اعلم

تكنولوجيات:

طائرة الـ بي 2 (عند الامريكان ) هي قاذفة استرتيجية بعيدة المدى ، قادرة على قصف اهدافها في معظم بلدان العالم انطلاقا من قواعدها في الولايات المتحدة دون التزوّد بالوقود ، وهي تتميّز كذلك بكونها خفيّة اي لا يمكن اكتشافها او تعقبها بأجهزة الرادار ...
أمّــا البي 2 في بلادنا فهي قاذفة (كذلك) وهي خفيّة ايضا بل ان الذباب الأزرق لا يعرف اليها سبيلا ، فهي السجلّ لكل اعمالنا و نوايانا ما ظهر منها و ما بطن ...
الا انّها ليست كبقية القاذفات تقذف القنابل ، فهي تقذف الناس (في السجون) و تقف شاهدة عليهم ، و قيل انها تقف احيانا حجر عثرة في طريق المقذوف فتمنعه من الشغل و تحكم عليه بالبطالة حتى ينال الرّضى ، و قدينال رضى الخالق و لا ينال رضى الحاكم بامره في الأرض .

قاد المالح ، باتريك برويال ... و البقية:
المالح قالك انضمّ للتشكيلة متاع الفنانين و الوجوه العامة الفرانساوية المتضامنة مع أسرة الطفل جلعاد شاليط ... و كي العادة نفس اللحن الحزين متاع التعاطف مع (الضحية ) الاسرائيلي ... و كإنّو (جلعاد) موش جندي و مافمّاش حالة حرب و ماكانش في ارض محتلة وقت اللي تمّ أسرو (على فكرة انا نكره برشة كلمة الاختطاف لانّ الجندي في الحرب لا يختطف بل يؤسر ، حتى لوكان شدّوه راقد في الجبهة )
حاصيلو المتتبّع لاخبار حثالة الفنانين من نوع باتريك برويال و جاد المالح يقلّك اللي حماس هي قوّة الاحتلال و انّو مجرمي حماس هوما اللي مشاو لدار الطفل جلعاد و خطفوه عنوة من حضن امّو و بوه ...
و كي العادة يتم تهويل الخسائر في الجانب الاسرائيلي و تسويقها اعلاميا لدرجة انو يتمّ قبولها من الجمهور و تولي حاجة بديهية غير قابلة للنقاش في حين انها مهزلة في واقع الامر، لأنو حتى فترة قريبة ، وقت اللي كانت الحرب حرب ، و كانت الصراعات متوازنة و الضحايا من الشيرتين ، كان من غير المعقول و غير المقبول تنظيم مسيرات و تظاهرات تضامنية مع كل اسير حرب يتم اسرو ...
و من غير المقبول كذلك اخلاقيا و انسانيا و بكل المعايير التضامن مع المحتلّ (الجانب الاقوى) و التشفّي في الشعب الاعزل (الجانب الاضعف) و اعتبار قتلاه و اسراه خارجين عن القانون و اتهام كل من يتضامن معاهم بأنو ارهابي و خوانجي .

محاكمات :
حملة الرافل الحالية يرجعها البعض الى خطة (وطنية) تهدف لتمشيط الشريحة العمرية متاع الـ18 - 35 سنة ، و غربلتها بدقة شديدة للبحث عن خلايا مسلـّـحة قد تكون موجودة في البلاد او دخلت اليها من الجزائر ، خاصّة و انّ وزير العدل تحدّث عن محاكمة مسلّحين في ولايات الوسط و الجنوب الغربي و قال وقتها (27 ماي 2009 ) اللي المجموعات هذية معندهاش علاقة بالجماعة السلفية متاع سليمان و انها تنتمي لتنظيم القاعدة في بلاد المغرب العربي
" ...ورفض الوزير وجود أيّة مقارنة بين مجموعتي «سليمان» وقفصة موضّحا أن المجموعة الأولى «ارهابية» وخضعت لقانون محاكمة الارهاب في حين أن المجموعة الثانية فإنها قد أحيلت بتهم ارتكاب العنف.
ولاحظ الوزير أن المجموعة التي حُوكمت مؤخرا في سيدي بوزيد ومن بين أفرادها امرأة ليست لها صلة بمجموعة «سليمان» وهي تهم مجموعة تسللت الى الجزائروبدأت في تلقي تدريبات ضمن جماعة القاعدة للمغرب العربي، وبخصوص المرأة المورّطة في القضية فإنها أحيلت بسبب مساعدتها في جمع الأموال ومساعدة زوجها في الهروب الى الجزائر."

من موقع صحيفة الشروق

فالسؤال اللي يطرح نفسو إذا كان فمة تهديد ارهابي فلوقتاش نعتمدو سياسة التعتيم و الساشي الاكحل ، وقتاش بربي باش نبلغو سنّ الرشد و تتمّ معاملتنا كراشدين؟؟؟

و إذا صحّت نظرية الرافل للبحث عن ارهابيين محتملين ، هل من المقبول استغلال الواجب الوطني و اعتماده كحجّة لاغراض اخرى قد يكون من ضمنها ترويع الشباب و حرمانه من ممارسة حياته الطبيعية ؟؟؟

نيوتن ... نكتة قديمة :

ثمّة نكتة قديمة عن اسحاق نيوتن (مكتشف نظرية الجاذبية) تفترض انّه لم يكن انقليزيا ، و أنّه لم يكن موجودا اصلا تحت شجرة التفاح الشهيرة وقت سقوط تفاحة الجاذبية ، و ان الشخص "المقيّل" تحت شجرة التفّاح لم يكن بريطانيا و لا يابانيا او صينيا ، و انّه كان عربيا أصيلا (و انّه كان على الارجح فاصعا من الخدمة و لاجئا من جحيم البيروات الى حديقة التفاح ) و يتم التساؤل في نهاية النكتة عن مصير العلم و العالم بوجود ذلك الشخص في ذلك المكان الخطير.
الاكيد ان "سيدي العربي" عندما يتنبه لوقوع التفاحة على رأسه ( المثقلة بتنباك الشيشة ) ، سينتفض قائما ثمّ يعود للنوم من جديد على امل اكمال حلم من احلامه الكثيرة ( و المستحيلة) ... فهو لم يتعلّم السؤال او التساؤل في اي من الامور ، بل تعلّم انّ السؤال الى غير الله مذلّة (و تأويلها ان لا يشغل نفسه بأمور لا تعنيه لا من قريب و لا من بعيد)
أما إذا كان العربي من بلاد الفرح الدائم و مواطنا متخما بجودة الحياة كمواطنينا الاكارم ...
فمن شبه المتأكد أنه سيسبّ جدّ والدين التفّاح أينما كان ، في الاسواق المركزية و الاسواق الاسبوعية و سيلعن كذلك تفاح سوق سيدي البحري و تفاح باب الفلة والتفاح الذي يباع على الارصفة و الانهج على (البراوط) و تفاح تركيا و تفاح سبيبة رخيص الثمن ...و اليوم الذي غرست فيه البلدية تفاحة مكان الكلتوسة غير المثمرة و الاكيد كذلك انو سيسبّ الجلالة في مناسبتين على الاقلّ...ثمّ يلتقط التفاحة و يأكلها و إذا كانت بالحجم الكافي فالارجح ان يعود بها الى المنزل ، فيأكل نصفها و يضع الباقي في الفريجيدار، و يرتاح بذلك من مصروف شراء الغلّة.
أما مصير العلم و العالم و الجاذبية و النظريات التالية في علم الفيزياء فتلك حكاية اخرى...

مسكين الدينار :
لطيفة نفت في الكويت اشاعة بكائها على صدّام لحظة اعدامه ... و قالت حرفيا "كيف أبكي عليه، ومن بصماته السوداء غزو الكويت " و كأنّ صدّام في حاجة لـ دموع لطيفة الممزوجة بالماكياج اللبناني او انو طلب منها في الوصية متاعو باش تبكي عليه و الا تغنّيلو رائعة من الروائع متاعها .
انا نشكّ انّو لطيفة و امثال لطيفة و حتى جمهور لطيفة مازال يملك القدرة على البكاء أصلا ...
الوحيد اللي واضح انّو بكى (للي فدّ) في الحكاية كلّها هو الدينار الكويتي .

رافل و أنفلونزا الخنازير

2009-06-22T21:13:00.002+01:00

تونس 22 جوان 2009 (وات) أعلن مصدر مأذون من وزارة الصحة العمومية ان مصالح المخبر المرجعي الوطني اكدت اصابة مواطنين تونسيين اثنين عائدين من الولايات المتحدة الامريكية بفيروس //اى اتش1 ان1// .

وأضاف ان السلط الصحية المعنية قد اتخذت لفائدتهما ولذويهما كل التدابير الوقائية والعلاجية المنصوص عليها ضمن الخطة الوطنية لمجابهة جائحة الانفلونزا موضحا أن المواطنين المذكورين يخضعان لمتابعة طبية وهما في صحة جيدة .

وبين نفس المصدر ان اكتشاف هذين الحالتين يؤكد نجاعة المنظومة الوطنية للترصد والمراقبة الوبائية التي تم تركيزها منذ اعلان منظمة الصحة العالمية عن أولى الحالات في العالم .

آخر سيقارو

2009-06-20T12:05:00.000+01:00

توقّفت الـباڤـا أمام المقهى ...
القى النادل بالطبق من يده ، و غادر من الباب الخلفي ...
نزل الأعوان من الباڤـا و دخلوا المقهى ...
"بــطاقات التعريف !!! أيّـا بطاقة التعريف ...من غادي ... تراه بطاقات التعريف ..."
بعد جمع هويات كل الموجودين في المقهى
"...الناس الكل تطلع للباڤـا !!!"
صعد المقهى في الباڤـا و بقي صاحب المقهى يجمع "الشيش" غير مدفوعة الثمن.

في مركز الأمن كان الجميع محشورين في الممرّ الضيّق ، ينتظرون حكم الكمبيوتر.
بعد ثلاثة ارباع السّاعة أخرج أحدهم من جيبه سيجارة بيضاء (كريستال) و أشعلها ...
خرج أحد الاعوان
" شكون شعّل السيقارو ؟؟؟ ايّا يا ولدي طفّـي هاك السيقارو!!!"
جذب المواطن نفسا اخيرا ... و أطفأ السيجارة بكل عناية على الجدار... على أمل إشعالها مرّة اخرى...بعد الخروج من الممرّ الضيّق.
"قتلك طفّي السيقارو ... يا خرا ... ما قتلكش جيّفو !!!"
اقتطع المواطن الجزء المحترق من السيجارة و رماه على الارض ، و أعاد العقب السليم إلى جيبه.
"شبيه ربّـك ما تفهمش !! تحب نـ***** أمك توّة ؟؟ قتلك طفّي السيقارو معناها طفيّ السيقارو !!"
أدخل العون يده في جيب المواطن ، انتزع منه عقب السيجارة و رماها على الارض ...ثم سحقها بحذائه

حذائهوجم كل من كان في كولوار مركز الشرطة ...و تحلـّقوا حول عقب السيجارة و شكّلوا الحضبة المعتادة.
أما صاحب السيجارة فقد اعاد جيب سرواله إلى مكانه ، بعد ان كادت يد عون البوليس تقتلعه من جذوره...
ثمّ انضمّ الى المتحضّبين يشيّع الفقيدة العزيزة عليه الغير مكتملة ، كبقية أحلامه ، و قال محدّثا نفسه:" آخّر سيقارو"

انتهاء دورة جوان التاريخية

2009-06-17T11:15:00.003+01:00

للتوضيح اودّ ان اشير الى انّ المقصود بدورة جوان ليس دورة الباكالوريا او امتحان النوفيام بل هي دورة التجنيد القاسية التي لم تشهد البلاد لها مثيلا منذ سنوات

أودّ أن أبشّر الشباب الراقد ( في غرف المنازل ) منذ ايام ، المعتكف في المخابئ المظلمة و الباردة ، الشباب الذي هجر المقاهي و افتقدته الجدران و العتبات و الاسواق و الـ ديار التي لا تزال في طور البناء ... بأنّ ساعة الفرج قد حانت و آن اوان الخروج الى الشمس و انّ الحياة قد عادت الى سالف عهدها ، إلــى حين...الى دورة سبتمبر.

و بهذه المناسبة السعيدة اودّ ان اوجّه تهاني الحارّة الى كل الناجين ، الذين هربوا (بجلودهم) من هذا الرافل البغيض ، كما اوجّه تحية خاصّة للإخوة المجنّدين الذين (ربما) يقرؤون هذه التدوينة وراء اسوار الثكنة و أذكّرهم بأن تمضية صيف تونسي (متاع الـ40 درجة فما فوق) بالزيّ العسكري و الحذاء العسكري الثقيل له نكهة مميزة (لا تنسى)...

و اوجّه كذلك التحيّة الاخوة الذين استعملوا الفايسبوك و التويتر كوسيلة استخباراتية لكشف مواقع الدوريات و التحذير من مغبة المرور عبر بعض المناطق الخطرة.

أما الصحفي الهزيل الذي هتف بحياة الرافل فلا املك الا ان اشكره كذلك على مستواه الجيّد في ضرب البندير و التطبيل ، كما أكبر فيه حماسه الشديد للرّافل و شماتته في ابناء بلده المحشورين (كالأغنام) في سيّارات (الباقة) ، و مغالطته الرأي العام بقوله انّ رافل هذه الايام مظهر حضاري يطالب المواطنون باستمراره بقية العام.
و في نهاية الأمر سي الماطري بن صميدة، فالأيام (قال الراجل) كما النّاس ، تذهب و تجيء ، يوم يذهب و يوم يأتي ، فلا انت باق بالصحيفة (اياها) و لا من تجتهد في التطبيل له باق بمكانه.
و كذلك تتوالى حملات الرافل و تمضي السنوات من اعمار المرفّلين ، و لن يتذكر الناس سوى الضحالة و الرداءة و النوايا المنحطة و المريضة لصحفيينا و لن يجدوا من خصال الصحافة لدى صحفيينا الا بنديرا مهترئا و طبلا اكل عليه الدهر و لم يشرب بعد.

مصدر الصور مدونة مصعب بن رحومة (مشكور)
ةMossaab Rhouma: يحيا الرّافل

العيب فيه هوّ

2009-06-15T23:12:00.001+01:00

زوز أصحاب يمشيوا في الشارع، عرضتهم بنيّة ، كيما البنات الكل لابسة دجين و مريول ، ممكن طالبة في الجامعة ، ممكن تخدم ، ، ممكن قاعدة في الدّار ...
- تفرّج ، شوف هاك المشية ، هاك الستيل ، هاك الاحترام ...والله بنية تعمل الكيف
- احترام ؟؟وين ترا فيه الاحترام ؟؟ الشّعر مسيّب للريح و تقلّي احترام ؟؟ ملّا...

سكت صاحبو ، و تلفّت وراه شيّع البنيّة بعينيه ...و كملو ثنيتهم.

عرضتهم بنيّة أخرى ، تشبّه للبنيّة الاولى ، تقريبا نفس الطول ، نفس المشية ، نفس اللبسة (دجين و مريول) أمـّا حاطة فوق راسها فولارة ...
- آه ، وهاذي ؟؟؟ محترمة و الا لا ؟؟اش قولك ؟؟
- أمممممم ...ملا احترام
- هاي مغطية شعرها
- و برّة مغطية شعرها ...ما ريتش البقية ؟؟؟ السروال مسكين باش يطرشق ... و المريول قريب يقول الشفاعة ...مسكين ماعادش ينجّم
-توة فين المشكلة بالضبط ؟؟ قلت الشعر لا و الفولارة لا ؟؟؟ امالا اش تحب ؟؟
- مانحبّ شيء ...اما انا انسان نعتقد أنو المراة ما يلزمش تجلب الفتنة في الشارع... المراة ما يلزمهاش تخلي العينين تلصلص في جرّتها، ما يلزمهاش تكون مغرية ...

صاحبو المسكين بلع السكينة بدمّها و سكت ...و اقتنع اللي المراة ما يلزمهاش تكون مصدر اغراء ... و كمّل معاه.

هوما يمشيو و عرضتهم مرا (او هكذا ظهرلهم) ، يمكن سايحة من بلاد عربية ، ممكن شخصية متاع مسلسل تاريخي و الا بطلة من بطلات الكاميرا الخفية متاع رمضان الجاي ... لابسة (حاجة) واسعة ...كحلاء ... حاطة فوق راسها فولارة ...طويلة عريضة... في الاكحل كذلك .... و شيء ما يظهر ... ما تعرفش الكائن هذاية لا ذكر لا انثى ... ماتعرفش عمرها ... في العشرين لا في الخمسين ... هي تمشي و هاك الخمسين ميترو قماش اللي فوقها طايرين مع النسمة ...

- شبيها هاذي ؟؟؟ تقول درابو متاع دخلة الدربي... (يتلفت لصاحبو) شنوة رايك ؟؟ زيد قلي تعملك في الفتنة و الإغراء ... حتى هاذي مغرية ؟؟
(صاحبو يطلّع عينو و يهبّطها يتأمل في الدرابو الاكحل اللي قدّامو ، فـينتبه لليد البيضاء الخارجة من تحت السواد ، و يبقى يثبّت في البياض و النعومة متاع اليد)
- أعوذ بالله من ها العشوية الكلبة ... كلّها جرايرك ...و الا انا اش مدخّلني في الدّورة و المحواس في الكياسات ... من مصيبة لمصيبة ...
- عجايب !!!ماتقوليش حتى هاذي زادة عندها في الفتنة و الحسن و الجمال ؟؟؟
- اللهم لا تؤاخذنا بما فعل السّفهاء منــّا ...

ة

حول الرّافل و القوّات المسلّحة التونسية

2009-06-12T23:10:00.004+01:00

كاريكاتور من مدونة

Debat Tunisie

الرافل ... كلمة (قال الراجل) ملأت الدنيا و شغلت الناس ...كلمة تنفر منها الانفس و تقشعر لسماعها الابدان (...) كلمة مفزعة ...مرعبة ...كابوس يقضّ مضجع شباب البلاد (بطـّالة و موظفين) ...
وين تمشي تسمع ... رافل ...هاي مرفـّلة ...ماعادش تمشي للقهوة ... ردّ بالك يشدّوك ...وينو فلان ؟؟ ...ماسمعتش بيه ؟؟ ... المسكين هزّوه ...
حتّــى ماللعب و الفدلكة ولاو كان بالرّافل و على الرّافل و مواقع الترفيل و آخر أخبار المرفّلين ... و يكفي باش تسمع مزحة ثقيلة من نوع "تره بطاقات التعريف ... " و الا تسمع صيحة بعيدة في آخر النهج "ايا اطلع للباقة ..." و الا تشوف واحد لابس بالأخضر ، باش تحسّ بالغربة الشديدة و تحسّ اللي حكايات جودة الحياة و الأمن و الأمان لكلّها مشات (في خبر كان) و أنك تواجه في مصيرك وحدك و لا من مجيب و لا من نصير ... و تحسّ بفطور البارح و فطور اليوم و فطور الأسبوع اللي فات يتّحدوا مع بعضهم و يعملوا ثورة داخلية يصعب التحكّم فيها و احسن حاجة تعملها وقتها انّك تطلق ساقيك للريح و تطير (عجاجة) و في بعض الحالات تلجأ لأقرب دورة مياه تستردّ فيها معنوياتك.
فالرّافل اللي تعرفو بلادنا هذه الأيام أثـّر في الحياة العامّـة و تسبب بصفة ملحوظة في خلوّ بعض الشوارع و الأسواق من الجنس الخشن ; و خلّى جموع البطالة من الشباب يتجنّبوا القهاوي و الاماكن العامة اللي ممكن يكون فيها عرضة للرافل. حتى جموع الموظفين الـموش معرّسين و اللي اعمارهم اقل من 35 سنة زادة زادة نقّصوا من الظهور في الاماكن العامة و من التجوال على القدمين .

حقيقة منعرفش الاسباب اللي خلاتهم يرجعوا للصيغة الحالية متاع تطبيق قانون الخدمة العسكرية ، و مانيش متأكد زادة اللي المشاهد هاذية (الباقة المكتظة بالشباب ) مازالت تليق بالمجتمع التونسي اللي حسب وسائل الاعلام متاعنا قالّـك ولى نموذج في الرقي ّ و السلوك الحضاري و احترام حقوق الانسان و الحرص على كرامة المواطنين...
انسان يخرج من دارو الصباح و ما يعرفش في الليل يبات في دارو و الا في مركز الامن و الا يهزوه رأسا للثكنة ...منعرفش هذا يندرج في أيّ إطار و حسب أيّ منطق يعيشو الانسان الخوف و الرّعب من أداء الواجب .
فمّة شكون يقلّك اللي هذا منطقي و معقول طالما فمة شكون ما خدمش الجيش و هو يعتبر (فاصع) و مخالف لقانون الخدمة العسكرية و ربما صدرت في حقو احكام غيابية من المحكمة العسكرية ... لكن هلى انو القبض على المارّة بصفة عشوائية و غربلتهم على قارعة الطريق هو الحل ؟؟؟
أنا معنديش بصراحة حتى تصوّر لحلول ممكنة ، ربّما كانت فمة صيغ اخرى لتطبيق القانون متاع التجنيد ...صيغ متلائمة مع العقلية السائدة في مجتمعنا و مستوى احترام القانون و الوعي بالحقوق و الواجبات .
على خاطر (للأسف ) من المستبعد و من غير المعقول و غير المقبول في بلادنا انو الشابّ (او الشابّة) لا طاح لا دزّوه يقدّم روحو طوعا لمركز التجنيد و يقوم تسوية وضعيتو سواء بأداء الخدمة فعليا او بالقيام بالتعيينات الفردية او بالاستظهار بما يوجب الاعفاء من الخدمة ، هذية حكاية تنجم تصير في دول فيها المواطن يعرف حقوقو و واجباتو...
كيما في موضوع الآداءات ، في رأس العام تلقى ملايين الفرنسيس شادّين الصفّ باش يقدّموا تصريحات الدّخل متاعهم و يسوّوا وضعياتهم الجبائية ، لدرجة انهم في السنوات الاخيرة التجؤوا للتصريح الالكتروني للتخفيف من الازدحام على شبابيك مصلحة الاداءات. تصوّروا حاجة كيما هكة تتعمل في تونس ؟؟ تصوّروا يزيدو يعطيو شوية هامش للمواطن في خلاص الاداء المتخلّدة في ذمتو ؟؟ الأكيد انو ما يمشي باش يخلّص كان (سامحوني في الكلمة) المهبول او اللي حاجتو بورقة من القباضة و كان اللي ملزوم باش يسجّل او عقد او شيء من هذا القبيل ... التونسي ما يشد الصفّ كان باش يقصّ تسكرة باش يروّح و الا باش يجبد ماندا و الا يجبد الشهرية و ساعات باش ياخذ كسكروت و الا بيزّا ، و حتى الطوابير اللي نشوفوها في خلاص الفواتير ترجع أساسا للخوف من قيام المصلحة المعنية بقطع الماء او الضو او الاتصالات بقدر ماهي سلوك واعي متاع مواطن منظّم و فاهم حقوقو و واجباتو.

الخدمة العسكرية والجيش التونسي:
البارح ، صديقة في الفايسبوك قالت شبيه الراجل ما يخافش من الحبس و بالعكس يفتخر بالحبس (الحبس للرجال) في حين أنو يتفجع و يتبدّل لونو وقت اللي يسمع بالرافل ...و قعدت المسكينة باهتة من فزع رجالات (مستقبل) البلاد من التجنيد،

وهي على ما يبدو تحمل فكرة باهية على الجيش و ممكن مغرومة بأفلام الحرب و بطولات الامريكان في اوكيناوا و شجاعة المصاروة في حروب السويس، و رفقة السلاح و مشاهد البطولة و الرجولة و فداء الراية و الوطن ... و كل المشاهد النبيلة اللي تترافق مع كلمة القوّات المسلّحة و نشيد الجيش سور للوطن . و السؤال اللي يطرح نفسو ، ماهي علاقة الجيش التونسي بالقوّات المسلّحة ؟؟ و هل الجيش التونسي هو فعلا سور للوطن و الا هو جيش من بنّائي الأسوار و الطرقات و الجسور و قنوات المياه ؟؟؟
هل انّ المجنّد اللي باش يعدّي عامو فعلا باش يتلقّى تدريب عسكري ؟؟ زعمة عندو الفرصة باش يمسّ السلاح و يهزّ السلاح و يدرّب على السلاح ؟؟؟

F - 5 Tiger الطائرة المقاتلة الأكثر تطورا في سلاح الجوّ التونسي - تعود الى اوائل الستينات و يمتلك منها سلاح الجوّ قرابة العشرة مقاتلات

أنا يحكيلي صديق تطوّع قبل سنوات في الجيش و عدّى عامو في ثكنة كبيرة جنوب العاصمة ، أنو ما يعرفشي من السلاح كان البندقية النمساوية رديئة الصنع الشتاير و امضى معظم الوقت في الاشراف على طابور متخصص في رعي الاغنام و ريّ الزيتون و الاشجار المثمرة و حكالي زادة نهارة اللي الفيلق الفلاحي مروّح من المهمّة الزراعية متاعو يلقى انو الثكنة مستنفرة بسبب زيارة احد القادة الكبار في الجيش و تم اخراج دبابة للاحتفاء بقدومو ، فقعد يوصفلي في حالة المجندين المساكين و الذعر الشديد اللي أصابهم وقت اللي شافو الدبابة (و للتوضيح الدبابات التونسية تعتبر وديعة و مسالمة مقارنة بالمصايب الزرقة اللي عند الدول الأخرى و حتى المجاورة )
فالجيش التونسي هو حسب ما يقولو في وسائل الاعلام جيش تنموي يساهم في المجهود التنموي و في المشاريع الكبيرة في البلاد ...وهذا موش عيب لو تمّ الاعتراف به و اقراره أما يقلّك الجيش سور للوطن و قوات مسلّحة و دفاع و ردع و كفاءة و اقتدار و مبعد يهزّ الشباب باش يعدّيو عام خدمة (شاقّة) و لا صوردي لا خرّوبة فهذا غير مقبول لانو الفكرة حسب رأيي فيها استغلال لفكرة و مفهوم الدفاع عن الوطن لتحقيق اغراض اخرى ، اقتصادية ربّما او سياسية او حتى اجتماعية بتأخير سنّ المطالبة بالعمل سنة على الأقلّ .

بالنسبة للشباب اللي باش يخلّصوا (التعيينات الفردية) هذيكة قصّة اخرى و موضوع آخر ، كيف كيف فيه برشة اجحاف و فيه استعمال لفكرة الدفاع عن الوطن كقناع لعمليات اخرى مانيش باش ندخل فيها مراعاة لمشاعر عمّار (نحّييه بالمناسبة)

UH - 1 طائرة هليكوبتر تعود كذلك الى فترة الستّينات - تذكّر بحرب الفياتنام و افلام بلاتون و appocalypse now
يمتلك منها جيش الجو كذلك قرابة العشرة وحدات

و انا بصراحة نستغرب الحفاظ على ما يسمّى بالجيش التونسي لحدّ السّاعة ، فالجيش التونسي من اوّلو كان جيش ضعيف التسليح ضعيف التدريب و القدرة ، و لا يمكن الاعتماد عليه و في المعارك القليلة اللي ممكن خاضها هي معركة بنزرت و معارك الجنوب التونسي قبل اكثر من 40 سنة اللي ماكانتش معارك متكافئة ، مانجّموش نحكموا على الأداء متاعو.

أكيد الحكاية ماتكون كان اشهار في الفايسبوك

و منعرفش كان الضعف في التسليح و التجهيز و التدريب راجع لحجم البلاد ووزنها الاقتصادي و السكاني و الا هو في حدّ ذاتو خيار و اتجاه مشات فيه حكومة الاستقلال عمدا ، خاصّة بعد المحاولة الانقلابية متاع أوّل الستينات اللي كان فيها برشة قيادات من الجيش، اللي ربما كوّنت لدى بورقيبة القناعة بانو تونس ما يلزمهاش مؤسسة عسكرية قويّة. و من الملاحظ كذلك انو الجيش التونسي ماكانش امتداد لجيش تحرير او قوّة مقاومة حاربت الاستعمار و رغم ما يقال في عيد تونسة الامن و يوم الجيش فالجيش التونسي تكوّن حول نواة من الجنود و الضبّاط اللي كانو تابعين للجيش الفرنسي و حتى القادة اللي كانو منتمين للمقاومة (الفلاقة) تمّ اعدام بعضهم (ساسي الاسود و الأزهر الشرايطي ) و التخلي عن البعض الآخر ليبقى الجيش التونسي مرتبط بالجيش الفرنسي (و من بعد بالجيش الامريكي ) تدريبا و تسليحا ليوم الناس هذا .

بورقيبة يتحدّث عن محاولة الانقلاب متاع أوّل الستّينات

و في الوقت اللي بلاد كيما تونس تحتفظ بقوة للامن الداخلي كافية جدّا للحفاظ على الامن العام و مع العلاقات الدولية الطيبة مع دول الجوار (شمال و جنوب المتوسّط) فالابقاء على مؤسسة ضعيفة و من المستبعد قيامها بدورها المنتظر منها يعتبر (حسب رايي) خيار غير مجدي و الـ400 مليون دينار اللي يتصرفو سنويا (حسب الويكيبيديا) على صيانة القوات التونسية ربما من الاجدر توجيهها لمشاريع تنموية اخرى (كالنهوض بالجهات اللي قعدت متخلّفة على ركب جودة الحياة) خاصّة انو خطر التوترات الاجتماعية (بعد احداث الحوض المنجمي) يعتبر اكبر بكثير من التهديدات الخارجية.

دبابة من نوع فيات(...) او ما يسمّى بالدبابة الشعبية ، تمّ استخدامها ضدّ جماعة سليمان Fiat-Otobreda 6614

الخدمة العسكرية للجنس اللطيف:
في سنة 2003 تمت اقرار اجراء يفرض على الفتيات التونسيات أداء الخدمة العسكرية بصيغتيها (الخدمة الفعلية و التعيينات الفردية ) ، و تمّ الـ (ترويج) للإجراء كالأوّل من نوعه في المنطقة و في الدول العربية و الاسلامية و بطبيعة الحال وقع استعمال الاعلان المذكور لمعاودة التذكير و التأكيد على المكانة الرائدة للمرأة التونسية و تقدّم البلاد في مجال المساواة بين المرأة و الرجل.
لهنا نلقى تصريح لرئيسة احدى الجمعيات النسائية تعبّر فيها على موقفها من القرار ، اللي مالقاتش اش تقول في الموضوع ، فالتجأت للفزّاعة متاع العادة ، قاتلك اللي القرار هذاية باش يعمل مشاكل مع الاسلاميين في تونس اللي باش يعارضوه ، و من شيرة اخرى قالت اللي هوما (أي نساء الجمعية ) ضدّ هذا القرار لانهم ضدّ الحرب ...
هكذا بكل بساطة ، لأنهم ضدّ الحرب ... و من وقتاش تعترف الجيوش بمواقف الافراد من الحرب ؟؟ و شكون قال اللي احنا (الشباب الفاصع من الرافل) ماناش ضدّ الحرب. اذا كان الحكاية بالسهولة هاذية ماهو نمشي للمركز متاع التجنيد نقلهم انا ضدّ الحرب و توفى المسألة . حاصيلو المنطق متاع الجمعيات النسوية في بلادنا منطق (فيه برشة عوج) و يلزمو شكون يفك الشفرة متاعو ، يحبّوا المساواة مع الرجال اما موش في كلّ شيء كان في الجيش لا .
و انا لتوّة مانيش عارف علاش و وقتاش تمّ التخلي عن الموضوع خاصة انو بدات الاجراءات العملية لتطبيق القرار كتخصيص ثكنة للجنس اللطيف و تخصيص اطار نسائي في مجملو للإشراف على المجنّدات . الا انو توة في 2009 و مافمة شي في الموضوع.

حاصيلوموضوع الجيش مازال مفتوح (على الاقل بالنسبة ليا) للزوز سنوات القادمة و مبعد نعبر الخط الاخضر (خط الـ35 ) و ربي انشالله يسلكهالنا الفترة هاذي ، و بالمناسبة نتمنّى انو خونا البرباش يسلّكها كذلك خاصّة انو التدوينة اللي كتبها (يوميات تونسي شدو الرافل) و اللي فسّخها فيما بعد وصلت للجماعة (باش ماتقولوش راهو مافماش شكون يقرا المدوّنات) و على ما يبدو فالسلطات العليا جبدت وذنين السيّد اللي اطلق سراح صديقنا البرباش و الله اعلم اشنوة ينتظر البرباش بيدو ههههههه

البرباش يعدّي في عامو

الذكرى الأولى لأحداث الرديف

2009-06-07T23:08:00.002+01:00

بعد مرور سنة كاملة على احداث الرديّف ، و رغم الضحايا و الخسائر المادّية ، و رغم شهور المظاهرات و الاعتصامات و استنزاف قوات الامن ، فإنّ الوضع مازال على ماهو عليه ، فلا جديد في الحوض المنجمي ، لم يتغيّر شيء غير الحصار وجحافل البطالين و البنى التحتية المهترئة و الجو المشبع بالبخّارة و قوات الأمن ... و بكاء الاطفال المحرومين من آبائهم

سابع بركة عليكم...حرّية التعبير

2009-06-04T20:50:00.000+01:00

للمتباكين على حرّية التعبير نقلّهم مبروك عليكم الوقفة الجديدة (و على ما يبدو الأخيرة ) من أجل الحرّية . و أيّ حرّية ؟؟
نقلّهم هنيئا لكم حرّية التعبير ...
و مبروك عليكم انتهاء مشاكلكم التدوينية و النفسية و الاجتماعية ..فرد ضربة
هنيئا لكم حريّة التعبير متاع الكلام الزايد...
هنيئا لكم حرّية التعبير متاع التحريض و خطاب الكراهية
هنيئا لكم حرّية التعبير متاع الضّحالة و الغرور الغير محدود
هنيئا لكم حرّية التعبير متاع التسامح و قبول الرأي المخالف
هنيئا لكم الموضوعية و قوة الحجّة و الشجاعة في اتخاذ المواقف و التعبير على المبادئ

حاصيلو كيما قالولي برشة قرّاء اوفياء للمدوّنة، المسألة هاذي خذات أكثر من وقتها ، لذلك قبل ما نقلب الصفحة ، نقول لحلف الغباء اللي عمل الانتفاضة الثانية متاعو بعد انتفاضة مدوّنة النضال ضدّ الطابور الخامس ،مبروك عليكم الوقفة التاريخية متاعكم ، استناو توة يسجهالكم التاريخ و ... لن يمرّوا !!!!!

و بربي كليمة في الآخر للـضفدعة المغرورة متاع لافونتان اللي قريب باش تتطرشق مالغرور نقلها اللي قلة التربية و قلة الحياء اللي ريتها في المدونة متاعها و الانحطاط الاخلاقي و التخصص في السب و الشتم يخليها فعلا المدونة الاولى في تونس في مجالها ، و التدجيل على القراء اللي مازال يبهرهم الكلام الزايد و التفنن فيه ما يحطهاش في موقف لتقييم و الحكم على الآخرين . و مافماش اخطر من ثنائية الجهل و الغرور.

نغلق القوس (اللي كبر شويّة) و نرجع للنشاط العادي متاع المدوّنة

لكن قبل نحبّ نورّي للقرّاء بعض النماذج من حرية التعبير اللي وقفت عليها الجماعة:

حرّية السبّ و الشتم و الاتهامات الباطلة

نموذج لقبول الرأي المخالف و ثقافة الحوار

حرب غزّة الأخيرة و رحلة البحث عن مبرر لمناصرة اهالي غزّة

احد الردود المتضامنة مع الشّهداء ...تسامح و احترام غير محدود لعقائد الآخرين

سبّان الدّين و الأفكار و الحضارة العربية الاسلامية من سبل الاصلاح

مستوى راقي للحوار

قوة الحجّة في التعبير على المبدأ

حول الحملة الافتراضية المزعومة

2009-06-03T13:06:00.004+01:00

مادام مازالنا في الهدرة متاع مصيبة البلوقوسفار حلبودة ، اللي كشف على مستواه الحقيقي بتدوينة فيها كل انواع الشتم و السبّ للمدونين. و حتى كي نصحو رفيق الدرب السيتوايان (اللي بالمناسبة يظهر كي هالة الركبي كان وقت الزازة و العرعور) باش يفسّخها فإنّو ما استجابش و اختار الحفاظ عليها شاهد على مستواه و مستوى مدونتو.

نحب نوضّح حاجة:
شنية حكاية الحملة على حلبودة ؟؟؟ شكون قال اللي فمة حملة ؟؟ شكون نظمها ؟؟
و الا على خاطر الكلاندستان كتب تدوينتين في نفس الموضوع ولات فمة حملة تدوينية و اسبوع تدويني ؟؟
التوضيح هذا لازم على خاطر حلبودة على ما يبدو لجأ للأسلوب اللي يتقنو وهو اسلوب البكاء و النواح و استجداء التعاطف و لعب دور الضحية . و للنّاس اللي جاو يعفّسوا هكاكة ماهمش فاهمين الحكاية نقوقللهم اللي مافماش حملة ضد حلبودة...على خاطرو ما يستحقّش الاشهار اللي تعملو و حملة كيما هاذي فمة اسباب ما أهم ّ تستحق تنظيمها.
و للناس اللي تحب الفرجة في العرك الافتراضي و فاهمين القصة اما عاملين رواحهم موش فاهمين (مانيش باش نذكرهم يعرفو رواحهم و فيهم شكون عندو مشاكل نفسية متاع عزلة اجتماعية ) نقــلّهم اللي موش في مصلحة اي كان نطيحو للمستويات هاذي . و الميساجات اللي جاتني على الفايسبوك مازالت في الحفظ و الامان و الكلام اللي فيها زادة مازال موجود دون زيادة و لا نقصان.
و الناس اللي عاملين "حملة مضادّة" و جايبين ارواحهم نقلّهم فكرتوش شوية قبل الاندفاعة هاذي ؟؟ حسبتوهاش شوية على الاقل ؟؟
لفائدة اشكون الحملة ؟؟ و ضد اشكون ؟
و تدوينة كيما اللي عملها (خليل) هي ابرز مثال ، توة يقول فيها اللي فمة
"حملة كاملة على مدون أعزل خاطر سمى روحو مسلم سابق، خاطر عندو آراء ضد الإسلام."
مانعرفش شنوة يقصد بالأعزل ، زعمة بقية المدوّنين عندهم قنابل و رشاشات يدوّنو بيها ؟؟ و يزيد يقلك على خاطر عندو آراء ضدّ الاسلام ، وين شافها هاذي ؟
يا خليل بربي تعمل مزية فهمني فيها هاذي منين جبتها و في اناهي تدوينة لقيتها ، و في أي مدوّنة ؟ على خاطر هذا يتسمى (كذب) و (مغالطة) و الكذب و المغالطة ماعندهم وين يوصّلو
و المدوّنة اللي عملت تعليق زادة تقول فيها اللي " هذى وقفة للحرية تتحسبلك ، يا ريت المدونين الكل يفهمو كيفك"
الحقيقة تعليق مضحك و يوضح انو اللعبة الافتراضية و الانغماس فيها يوصل لمستويات خطيرة ، توّة مافهمتش انا الوقفة هاذي كيفاش باش تتحسب ؟؟ شكون باش يحسبها ؟؟ لفائدة شكون و قدّام اشكون ؟ و الاهم ضدّ اشكون ؟؟
حسب المدونة (عربية) ها الوقفة التاريخية هاذي باش تدخل للتاريخ و يسجلها التاريخ اما ضدّ شكون ؟؟ ضدّ الكلاندستان ؟؟ ضدّ حرّية التعبير ؟؟؟
تعليق غير مفهوم نتمنى انو عربية تزيد توضّحوا شوية.

حاصيلو ... باش منطوّلش برشة ، انا متوقّع مالأوّل السيّد هذا باش يذرف دموع التماسيح و يرمي روحو شهيد حرّية التعبير .
و هاذية حاجة عادية و منستغربهاش منو
الا اني نأكّد على حقّي في حرّية التعبير و رفضي للقيود اللي حطّها عاشور و برشة مدوّنين ، و المضايقات اللي يسبب فيها لكل المدوّنين و عشرات التدوينات التفاعلية اللي كتبها لسبّ الرأي الآخر و نعته بعديد النعوت و الاوصاف القبيحة ، و اتهامه الجميع بالارهاب ، و اتهامه الجميع بالجهل و التخلّف، و السخرية من معتقدات الناس ، و اطلاقه المزاعم الكاذبة ضدّ كل المدوّنين اللي يخالفوه في الرأي، و السخرية و التهكّم من كل محاولات الحوار الجدّي. فكيفاش نجّمو نشوفو اشكال متاع حرية تعبير في جوّ مشحون كيما هذا ؟؟ و في وجود مضايقات من الشخص هذا ؟؟ تي حتّى الحاكم و الوكالة التاونسية للانترنات اذا لقاو رأي مخالف ما يعجبهمش يقصّوا الموقع جملة وحدة و بضربة وحدة من غير مضايقات و تهديدات و شتم كيما اللي يعمل فيه ها الحلبودة .

و في التدوينات الاخيرة أنا طالبت بحقي في حرية التعبير و مارست حقّي في حرّية التعبير ، و مايهمنيش في ردود الأفعال و لو انّي نعتذر من قرّاء المدوّنة اللي لقاو ارواحهم مجبرين على متابعة مسلسل لا علاقة لهم به على خاطر اغلبهم ما يعرفش المدوّن هذا و ماذابية يعرفوه و يكتشفوه على حقيقتو و يكفيه الإشهار المجاني متاع 3 أو 4 تدوينات.

قصّة عاشور ناجي

2009-06-02T17:55:00.004+01:00

(تتمّة للتدوينة السّابقة)
برشة قرّاء للمدوّنة و لمدوّنة الصّديق قصّة اونلاين يتساءلو على الشخصية الافتراضية متاع "حلبودة شوالق" ، شكونوا حلبودة؟؟ علاش اسمو حلبودة ؟؟ و علاش الشوالق ؟؟

حلبودة هذا مدوّن (تونسي) خوانجي ...اينعم خوانجي و داعية كيفو كيف دعاة السلفية (الجهلة منهم خصوصا) و لو انو ماعندوش سلاح لكن هذا موضوع آخر ... فـ كان فيما مضى يدوّن في مدوّنة تحمل اسم (حمقستان) ...بعد ما لقى اللي الطريقة الأولى موش جايبة نتيجة (على خاطر السيّد عكس بقية المدوّنين ، يلزمو يستظهر بنتيجة و يقدّم ملخّص للنشاط متاعو ) قلت اللي بعد ما يأس مالطريقة الاولى بدّل السياسة و بدّل اسمو من عماد الحبيب للمسلم السّابق ... و بدات مرحلة جديدة من الحكايات الغريبة و التدوينات المتناقضة ...اللي بقدرة قادر كانت تحظى دائما باكبر قدر من التصويت في مجمّع التدوين ، و هاذي حكاية كشفها البرباش في مدوّنتو و فضح الخفايا متاع التصويت و رهاناتو ، خاصة انو كيما قلت السيّد هذا يحبّ نتائج ملموسة ما ينجمش يقيّمها كان بالتصويت في المجمّع متاع التي ان بلوغ . يقول القايل علاش السيّد مصرّ على نفس الموضوع و نفس السياق ؟؟

ديما يحكي على "اهل الذمّة " ، مافهمتش علاش...زعمة شنيّة العلاقة ؟؟ مسلم سابق يحكي على اهل الذمّة ...و أهل الذمّة هم من اليهود و النصارى، فما علاقة اللاديني بـأهل الذمّة ؟؟ ربّما يقصد المتاجرة بالذمم و بيعها (للشيطان) ... منعرفوش .

حلبودة ديما يحكي على حقّ اليهود في دولة على أرض فلسطين ، أي أنهم أصحاب الأرض الشرعيون ... كيف كيف مافهمتش علاش يمجّد ظهور دولة قائمة على أساس عرقي و ديني... زعمة هاذي هي العلمانية ؟؟ يطلعشي علماني سي حلبودة ؟؟ شوفو معايا تره ...ثبّتو ... تطلع عليه الجبّة متاع العلمانية ؟؟ شنوّة ؟؟ كبيرة ؟؟ كبيرة عليه ؟؟ اذن حلبودة بعيد على العلمانية .

حلبودة يمجّد انجازات الامريكان في العراق و افغانستان ...و في حرب غزّة لا يبدي تأثّرا بضحايا الفلسطينيين فقط لأن حماس و قادة حماس تسببوا بالحرب...منطق غريب ... شماتة و تشفي بلا حدود أمام صور الضحايا و المحروقين بالفوسفور الأبيض ...

هذا هو حلبودة ايها السيّدات و السّادة
هذا هو المدوّن التونسي
خوانجي ... ماهوش لاديني و ماهوش علماني ...و يحبّ الديمقراطية متاع الفوسفور الابيض ... كيفاش تجي هاذي خوانجي وهو يقول انو مسلم سابق ؟؟؟ زعمة يطلعشي ................ ؟؟؟
حاصيلو هاذية تدوينة من السلسلة الاسبوعية الجديدة متاع التدوين التفاعلي ... و كيما قاعدين برشة عباد عاملين في البلوقسفير انا زادة باش نخصّص شويّة وقت للكارثة هذا و باش نخصصلو في كل اسبوع تدوينة ...هكاكة بلاش ...هديّة من عندي ... و توة يجي الوقت تكتشفو فيه الحقيقة الكاملة متاع سي الشوليقة هذا ... اصبروا معانا كل شيء في وقتو

العشاء الأخير

2009-05-31T21:27:00.003+01:00

العشاء الاخير - نسخة القرن 21

مادمنا صرفنا صرفنا ، و مازلنا في التدوين التفاعلي و توزيع التدوينات على مستحقّيها ، نحب نقول للمدوّن اللي سمّاه صديقنا قصة اونلاين "حلبودة": المسرحية وفات و الجمهور راهو فدّ ... و روّح...لذلك ماذابيك كمّل تعشّى (العشاء الاخير) و انطلق ... موش لازم تظهر بعد اربعين يوم...

تدوينة خاصة بالمدوّنين...فقط

2009-05-29T20:27:00.007+01:00

كيما قلت في العنوان ، هاذية تدوينة موجّهة للمدوّنين دون غيرهم لذلك نعتذر لقرّاء المدوّنة من غير المدوّنين

انا في التدوينة هاذية باش نعبّر على رأيي الشخصي في التدوين و المدونات بذكر الأسماء (المستعارة) متاع المدونين...(موش كيما (جرت العادة ) في السبّ الافتراضي ، و لو انو التدوينة هاذي مافيهاش سبان )
يزّي من اللغة الغير مباشرة ، و اللغة متاع رميان المعنى من بعيد لبعيد ،المرة هاذية باش نقول رأيي بكل وضوح ...اللغة اللي عادة نلجألها باش نتجنّب مقصّ عمار موش باش نستعملها لا لشيء الا لأنو يكفينا رقيب واحد و موش لازم نعيّشو بعضنا في خوف مستمرّ من رقابة بعضنا البعض .
ملاحظة اخرى تهم التعليق :باب التعليق باش يكون كان للمسجّلين في بلوقر ، اي لا مجال للانونيم ومرحبا بالجميع.
ملاحظة اخيرة : انا مانيش نتبّع بالقدى في اللي يصير في البلوقوسفار و خاصة المدونات الجديدة و المعارك الافتراضية الجانبية و باش نحاول نتحدّث على الشي اللي ريتو و اللي تبّعتو.

توة كي قريت التدوينة متاع سمسوم ( البلوغسفار : التّغيير ) و كذلك نصّ ولادة ( هل وصل الإرهاب للبلوغسفار ؟؟؟ ) في نفس السياق تذكرت البلوقوسفار في السنوات الماضية و العادات (الحميدة ) اللي تكونت لدى المدونين كيما تنظيم الايام التدوينية (لحرية التعبير و غيرها)... المستوى الراقي للحوار ، التضامن بين المدونين ، الاحترام ، الفهم الصحيح لعملية التدوين ، الحرية اللامحدودة ، الرغبة في التخلص من الرقابة الذاتية و تحدي رقابة الرقيب ، هاذية كلها كانت تميّز البلوقوسفار و المدونين في الفترة الماضية.

توّة تحل تي آن بلوقس ، شنوة تلقى ؟؟ عاشور ناجي يمجّد في وفاء سلطان و اسرائيل و ديمقراطية اسرائيل و حكومة اسرائيل ... و في جرّتو مجموعة من الشخوص الافتراضية معظمها من العربية السعودية و من مصر ، قال شنوة علمانيين ، نهار كل و هوما يعديو في الدعاية للفيديوات المسيحية و متاع الميميري تي في ... من جهة اخرى العيّاش قالك القرآن غالط و الاسلام راهو حكاية فارغة ... براسطوس رجع و كيف كيف ، يحكي على الصحيحين و عايشة زوجة الرّسول و اغتصاب مقنن ...
ويني الحرّية ؟؟ وينو الرأي الحرّ ؟؟ ويني التعددية ؟؟؟ نفس الموضوع و نفس النقاش و نفس النصوص تعاد و تكرر من نفس المصادر... و اللجوء للتصويت الوهمي في التي ان بلوقس للظهور دائما في صفحة النصوص الاكثر شعبية و اعطاء فكرة خاطئة عما ينشر في البلوقوسفير التونسي، و الحرص على استعمال وسائل (بيداغوجية) في نصوص التدوينات ، كيما الحروف الكبيرة و الملوّنة باحجام مختلفة ، منعرفش للتأكيد و التلقين و إلا لانعدام الثقة في المستوى متاع المتلقي اي قارئ المدوّنة اللي ربّما تفوتو المعاني الكبيرة متاع النص التدويني.
المجموعة المذكورة لفوق ولات متخصصة في التدوين التفاعلي ، و يكفي انو تظهر تدوينة جديدة في مدونة النضال ضد الطابور الخامس او مدونة طارق الكحلاوي باش تقوم القيامة و يمرّ اسبوع تدويني تعيس مافيه كان السبّ والشتم و النصوص الضحلة اللي لا نفع من ورائها...حرب غزّة ... الاسلاموفوبيا ... الطابور الخامس ... الارهاب الفكري...عقلية رئيس القبيلة و الفرس...و لغة اخرى كثيرة مقرفة (مثيرة للاعصاب)...
مانيش عارف علاش الاصرار و الاستماتة على التدوين التفاعلي ؟؟؟ و تضييق الخناق على بقية المدوّنين ؟
التدوين تحوّل الى عملية إعتياش (كيما النباتات الطفيلية) من نصوص الآخرين، و ولى فنّ في مضايقة و قمع الرأي الآخر و محاصرته (مخطئا كان او على صواب)...
فإذا كان تشوفوا اننا جهلة و سقط متاع و أشباه أميين اعذروا جهلنا و خلوّنا كيما كنا جاهلين...
اذا كان تحبّوا تحلّولنا عينينا و تفيّقونا بحقيقة اننا نعيشو في بلاد خوانجية (كيما ايران و افغانستان) و يلزم نوليو علمانيين كيفكم ، مارسي ، تونس منذ الاستقلال و هي خوانجية ، و باش تبقى كيما هكة لمبعد ما تموتو ...زايد تعبو في ارواحكم
إذا كان تحبّوا تدخّولنا كيما عاشور لنادي المعجبين (فان كلوب) متاع اسرائيل و ديمقراطية اسرائيل ...كيف كيف ...مارسي هو عنّا الدروس متاع الدعاية القزوردي ... نكمّلو دروسنا و مبعد نقراو عندكم ما فيها باس.

خلاصة القول اللي يعتقدو انو المدونة هي منبر و بوق من ابواق (الدعاية) للتأثير في القرّاء و احداث تغييرات اجتماعية فكرية كبيرة راهم غالطين و ماهمش فاهمين التدوين
و اللي يتصوّرو انهم بحساب مجاني في البلوقر ولاو من الشخصيات العامّة (بأسمائهم المستعارة) و ربما دخلو التاريخ...زادة يغلطو ياسر
المدوّنين اللي في بالهم انو كيف تكتب عليهم صحيفة ذات توجّه سياسي معين كيما صحيفة الطريق الجديد متاع حركة التجديد ولاو يتبعو الشأن العام للبلاد و نساو انو مافماش قطوس يصطاد لربي ، و انو الصحيفة المذكورة تعدّي في التدوينات اللي تخدم توجّه الحزب متاعها ضمن حدود معينة و محاذير مفروضة من رقابة عمار 4004.
المدوّنين اللي يعانيو في الدنيا من العزلة (الفكرية) (لهنا مانيش نقصد الزبراط لأنو عندنا حكاية خاصة حول موضوع مشابه على الفايس بوك لذلك باش ما يوقعش الالتباس نقول اللي الزبراط غير معني بكل ما ورد في هذه التدوينة ) و يتبنى افكار بعيدة ياسر على الواقع التونسي و فشلت منذ عشرات السنين في ايجاد قاعدة كبيرة في المجتمع ، فكان المجتمع الافتراضي بالنسبة ليه بمثابة الدواء ، اللي خرّجو من العزلة و خرّج برشة اخرين كيفو ، و كانت فرحة اللقاء و التضامن الكبير و محاولة تلافي الخيبات في الواقع .
انا لهنا نحكي على جماعة اليسار (موش كيما قال البي تي بي يميني يجبد شوية على اليسار ) نحكي على اليسار التونسي اللي على عكس الحركات الراديكالية في العالم قعد في بلاصتو و مانجمش يتطور و يمشي لقدام...في العالم طلعت حركات تطالب بالتنمية العادلة و حركات تنادي بمصالحة التنمية مع البيئة و اقامة شروط عادلة في التجارة بين البلدان...في حين اليسار التونسي الكل كبّش في موضوع واحد هو الحرب على الإسلام ... و هذا موضوع آخر.

بحيث انا في نهاية الامر مانيش ندافع على تيار فكري محدد،و او دين محدد ... بالعكس ، انا ندافع على روحي من الدمغجة و الدعاية و لغة "لن يمرّو يا صديقي " (هاذية قالها مرة براسطوس او ارتيكولي لأحدهم نسيت اشكونو ههه الجماعة يتصوّرو رواحهم في حرب حقيقية و مواقع و خنادق و جيوش فرانكو دزّت عليهم هههه)... انا يا سيدي ندافع على حرّيتي...على اعصابي من سياسة القمع...نحاول نحقق اللي عجزت عليه (و عجز عليه الجميع) في الدنيا وهو التعبير بكل حرية و التعبير بدون قيود و لا حدود و لا محاذير .
وصل الواحد في فترة من الفترات انو كي يجي باش يكتب حاجة يتفكر الرقابة (موش متاع الرقيب) لكن نتفكر رقابة المدونين متاع قمع الرأي الآخر و خاصة المدوّن عاشور ناجي اللي يسمّيه قصّة اونلاين (حلبودة) نقلك فكّني و اخطاني و نبطل ما نعبـّرش.
و هذا موش شعوري وحدي بل شعور اغلب المدوّنين الأخرين اللي اختفاو في الفترة الحالية و كانوا يمثّلو ثراء و عمق و تنوّع البلوقوسفار , كيما زياد المحيرصي و طارق الكحلاوي و طارق الشنيتي و سمسوم و و القوفرنور و فريرايس .
لهنا تذكرت كيفاش الجماعة المذكورة اعلاه او واحد منهم (اظنه براسطوس او أرتيكولي) طلع بحكاية النعجة و لية الكبش , حول انضمام المدونين لطارق الكحلاوي و مساندته في آرائه حول الاسلاموفوبيا ...و كانّ تقاسم الافكار و الآراء و المشاغل مع شخص آخر هو بالضرورة الولاء و التبعية ... كانّ العلاقة ماتنجم تكون كان عمودية حتى في المجتمع الافتراضي ...ثمّ لو افترضنا انو فمة تأثر و اعجاب بأحد المدوّنين ...ويني المشكلة ؟؟؟
طارق الكحلاوي و زياد المحيرصي و طارق الشنيتي و العديد اللي نسيتهم يمثّلوا قصص نجاح و هذا حبينا و الا كرهنا...قصص نجاح لشباب توانسة آمنوا بقدراتهم و وصلوا لمستويات مشرّفة (تشرّف البلاد ككل) ...وينو العيب في الاقتداء بيهم (هذا لو افترضنا دائما ان نظرية عاشور ناجي متاع شيخ القبيلة صحيحة) ؟؟
و السؤال اللي يطرح نفسو ...هل انّ السيّد هذا (عاشور او براسطوس او ارتيكولي و البقية اللي نسيت اسماؤهم ) يرتقي لمستوى طارق الكحلاوي المدوّن و طارق الكحلاوي الدكتور في جامعة روتجرز...
صعيب ياسر الاجابة على هذا السؤال لأنو التخفّي وراء اسماء مستعارة يأكد عكس ذلك ، و اذا كان فعلا فمّة نظريات جديدة و افكار في الفلسفة و العلوم و تفسير النصوص الدينية و تفكيكها فمن غير المعقول نشر هكذا افكار بإسم مجهول .

في الجهة المقابلة نلقاو زوز مدوّنات هوما مدونة النضال ضد الطابور الخامس و مدوّنة قصّة اونلاين . و باش نكون واضح و صريح ، اذا كان باش نختار بين الجهتين فإني باش نختار الجهة هاذي.
مدوّنة ضد الطابور الخامس جات كتنفيس عن غضب العديد و كحركة طبيعية للتعبير على رفض القمع الفكري و سياسة (ماكش معانا راك خوانجي و اعتماد البعبع الاسلامي لإيصال مضامين مشبوهة في معظمها كتمجيد انجازات الاحتلال في العراق و ابداء الاعجاب بديمقراطية اسرائيل ) و اللي يقول العكس فهو ارهابي بالضرورة و خوانجي.
و بالمناسبة برشة مدونين كالبي تي بي و الزبراط و عاشور ناجي و ازواو الصومنديل اوراغ و ولادة و فررر صاحب مدونة المطرقة محتارين حول هوية عبرات و علّيسة و تانيت (المشرفات على مدونة النضال ضد الطابور الخامس) و فيهم شكون قال اللي هوما من جنس الذكور و لهنا نسأل شنوة الفرق ؟؟ ذكور او من اناث او من كائنات مرّيخية اين الاشكال ؟؟ اش يغيّر في الموضوع ؟؟ اشكون قال اللي شخصيات المدونين باسماء مستعارة هي على نفس الجنس المذكور في البروفيلات متاعهم ؟؟؟ ياخي اللي يحل حساب في البلوقر يلزم يمدّ مضمون ولادة (عندو اقل من 3 اشهر) ؟؟ ما فهمتش علاش الاصرار هذا الكل على معرفة الواقفين وراء المدونة المذكورة ، و رغم التخمينات العديدة فما تجرّا حتى واحد منهم باش يقدّم اسماء لمدونين او غير مدوّنين ينجمو يكون هوما مدونات النضال ضد الطابور الخامس ...
مانيش فاهم علاش الستراس هذا الكل ، خصوصا انو مدونين كيما البي تي بي و الزبراط و ولادة و المطرقة ليسو معنيين بتدوينات النضال ضد الطابور. وهو في نهاية الامر خيار، كل حدّ يختار الحفظ على سرية هويتو و معلوماتو الشخصية من عدمها ، و اللي يحب يعرف هوية عليسة و تانيت و عبرات ماعليه كان يبدأ بنزع قناعه اوّلا.

انا با ننهي التدوينة نقول للجميع انو التدوين راهو موش خدمة ناخذو عليها في الشهرية ، و اذا كان ولّات فيها وجيعة راس و قلق وفمن الاجدر انو الواحد ينسحب كيما عملوا برشة مدونين و نخليوها واسعة و عريضة للاستحقاق 2009 و المدون نوفل المصري و المدونين الوطنيين الشرفاء .و المستفيد الوحيد هو عمار الرقيب اللي ارتاح مالهرج من غير ما يستعمل المقص ..البركة في مقص المدونين

و ماذابية كذلك انو الغائبين و المغادرين (ازواو الصومنديل الاوراغ ، مريومة ، طارق الكحلاوي ، طارق الشنيتي، سمسوم ، فرفر ، زيزو و اللي نسيتهم ) يرجعو خلي تصفى القلوب و تتنحى الخلافات الكل خاصة انو الاكيد انو نقاش كيما هذا يلزم يكون بصفة مباشرة موش بطريقة التعليقات و النصوص المختصرة باش يتم تجنب الفهم الخاطئ و حصر مواضع الاختلاف و مناقشتها بطريقة متحضرة من غير حساسيات و من غير احكام مسبقة و من غير قمع

في البيع و المبايعة

2009-05-27T17:10:00.001+01:00

فعل المبايعة في العربية فعل أصيل و عريق عراقة هذه الأمّــة البيّوعة البائعة عرضها للقاصي و الدّاني...فالبيعة تعود لفعل البيع , فنقول باع يبيعُ بيعــًا و "بيعة" و نقول ايضا باع بشطر السّوم اي باع بالخسارة و عمل بروموسيون بلغة السوق ،أو باع (سيّارة زوجته) أي عاقبها عقابا شديدا و نكّل بها تنكيلا منكرا (و العياذ بالله). و من فعل البيع نقول كذلك البْيوع فتسمع التجار في شمال البلاد و جنوبها يرددّون "ماثمّاش بْيوع" اي أنّ التجارة كسدت و بارت و ضاقت سبلها .

كما كانت العرب قديما تستعمل فعل المبايعة من بايعَ يبايعُ أي عاهد و بارك و أقسم يمين الولاء (الدّائم) و ناشده و كبّش فيه حتى يبقى مكانه الى يوم الدّين.
و منها بيعة الرضوان "...إذ يبايعونك تحت الشّجرة فعلم ما في قلوبهم ..." اذ عاهد القوم رسولهم على الدفاع على الإسلام و نصرته حتى تعلو رايته في الأرض. و بيعة شيوخ العروش و قبائل العربان لعلي بن غذاهم ثائر ماجر و فارسهم لإسقاط الحكومة و التخلص من جور الباي و ظلمه ...قبل ان يدورو في الحياصة و يتركوه في نفر قليل حتى تمكن منه الباي و اخمد الثورة.

و نقول ايضا في نفس السياق ابتاع اي اشترى (اكثر من حاجته) و ترك في كارفور ما أمامه و ما وراءه ، و باع نفسه بثمن بخس فتحوّل الى سلعة لها ثمنها في السوق فهو بائع و مباعٌ في نفس الوقت ، و بيّوع.

و من المصطلحات التي يستعملها اهالي بلاد الكنتول في حياتهم اليوميّة كلمة تحمل اعمق المعاني و يندر ان توجد كلمة لها نفس الثراء و العمق و الدقّة في النعت و الوصف وهي الـ بـِـيعة. وهي تستعمل دلالة على المشاكل و المعضلات التي يكون سببها السّلع (البائتة) من الناس، و مما يروى ان اعرابيا من المطلوبين (الروشارشي) وقع في يد الأمير و أمر بضرب عنقه فضرب كفّا بكفّ و قال "مــلاّ بِيعة ..." أي ملاّ حصْلة و الحصْـلة كما يصفها صاحب لسان العرب هي "الوقعة السوداء" التي لا فكاك منها.
و تسمع احيانا سائق سيّارة التاكسي عندما يغرق في جحيم السيركولاسيون في غرغور القايلة يقول "ملاّ بِيعة..." أي "ملا وحلة" و "ملاّ بنقة" و ماهذا المأزق الذي لا ارى منه مخرجا.
وعندما يكون المدرّس مستغرقا في الدرس (و جايب ماعندو) و يسمع احد التلاميذ الملاعين ينشد اغنية الفيراج "زادمين ...زادمين..."فلا يملك الا ان يرمي الطباشير من يده و يشعل سيجارة خارج القسم مرددا "ملاّ بِيعة "اي "ملا كورة اش عملت فينا" وهي تعني ايضا بلغة المثقفين "ماهذا الدمار يا الاهي".

و نصل في النهاية للبَيْعة اي العهد و الميثاق و الولاء الدائم لأولي الامر وهي بِيعة مولّية" اي تمشي الى الخلف باضطراد ...وهي انواع :
فثمة من يحبّ بَيْعة واحدة...مدى الحياة ، اي ان تبيعه الناس انفسها دفعة واحدة إلى أجل غير مسمّى.
و هناك من يحبّ التكرار و الاجترار و تفصيل التفاصيل على مقاسات و اوزان و احجام البيّوعة من ذوي الشأن في البلاد.
فيبتاع رضى الناس بالتقسيط المريح...و يجدد البيعة بالزازة و العرعور كل بضعة سنوات ...و يهلّ هلال هالة الركبي بلسانها المشقوق. فتمجّد الارقام و تعدّها و تعددها و تحصيها ملايين و دنانير و ملاليم...وهي بذلك تحثّ الناس على البيْعة.
و للبيّوعة (كما ورد في كتاب العبر لابن خلدون) مقاسات و أطوال و أوزان...فثمّة القصير القريب من الأرض اللذي لا خوف منه و لاهم يحزنون...و ثمّة الأخرس الذي قطع لسانه و اجم نفسه بيده ، فهو يرى العوج بعينه و لكنّه لا ينطق و لا يتكلم و لا يقول 'هنا بئر" الا بعد ان تقع الفاس في الرأس ، وهو ايضا مأمون الجانب لا خوف منه ولا خطر.
و ثمة الصنف الاخير من البيّوعة وهو صنف الحلزون و دود الارض ، العاجز ، الملقى تحت الأقدام و على الأرصفة ، فهو عاجز لا يردّ البلاء عن نفسه و لا عن غيره، فهو مهضوم الجانب ابدا ، غير مهاب لا من الصغير لا من الكبير، و يعزى بقاؤه الى حدّ اليوم (على قيد الحياة) لصحّة الرقعة و شدّة صحّة العين و الوقاحة.

اما اوزانهم (جميعا) فهي اخفّ من وزن الريشة ، و اقل شانا من ذلك بكثير ، وهم "يميحون" مع الأرياح و مع كل هبّة نسيم ، فلا جدوى منهم و لا خير يرجى منهم و لا من اتباعهم و مأجوريهم .
نجّانا الله و إياكم من شرّ البيعة و البيّوعة و السلام

مثل معبّر : المـــاء اللي ماشي للسّدرة

2009-05-25T22:06:00.002+01:00

السدرة مسكينة عطشانة ... مذمومة ...محرومة ...الماء ماشي للزيتونة قاللك الزيتونة اولى بيه...و الخير ...و الهناء ...
الماء مشى للزيتونة ...زيتونة ماترواش ... زيتونة ماتشبعش...زيتونة ما تحشمش ... زيتونة كرشها اكبر من بحورات نابل و قليبية و المهدية و بنزرت و قابس و جربة و جرجيس و قرقنة , زيتونة يدّها اعلى من جبل الشعانبي ... و جبل عرباط و جبل وسلات ...زيتونة مشحاحة ...ديما تاخذ و ما سمعناش بيها مرّة اعطات حاجة و الا خلات ... الجراد ساعات يسخف على العباد، و يخليلهم حاجة في جرّتو.

سّدرة مسكينة ... ديما راضية... ديما ساكتة ... مسلّمة مستسلمة ...سلّمت في الماء ...سلّمت فالنسمة ...و نسات طعم الماء و نسات طعم الكلمة ...يا حسرة منين كانت خضراء و يقولولها يبارك في ترابك يا الخضراء

Cinema en Tunisie - اسماعيل

2009-05-23T19:00:00.001+01:00

خلال الأيام الأخيرة أتحفنا صديقنا القوفرنور (وعدد من الأصدقاء طارق، عمروش و بدر الدين ) بمجموعة من الأفلام (هي الحقيقة مقاطع من أفلام) متميّزة فيما يشبه السينيكلوب الافتراضي. الشيء اللي رجّع النفحة و الغرام بالسينما (الحلوّة) .

فتذكرت كتاب الصديق إسماعيل (وهو كذلك سينمائي و مؤسس نادي السينما سينيفيس Cinéfils في قاعة الحمراء ) اللي كتبو اواخر سنة 2008 و عنوانو Cinema en Tunisie و ما اتيحتلي الفرصة باش نقراه كان في الفترة الاخيرة . و حبّيت نحكي عليه في المدونة باش نقدّمو للأخيّان القرّاء و كذلك للأصدقاء في نادينا (البسيط) للسينما على الفايسبوك.

كتاب السينما في تونس Cinéma en Tunisie هو حسب المؤلّف محاولة للبحث عن إجابات حول واقع السينما في تونس من خلال الموسم السينمائي 2007/2008 و اعتماد الانتاجات السينمائية متاع الموسم هذا كـ "منظار " ينظر من خلاله للسينما التونسية و تاريخها و يأسس من خلاله للدراسات القادمة اللي باش يقوم بها في نفس الموضوع. مثلا فيلم المنصف كحلوشة متاع نجيب بالقاضي يقدمو إسماعيل في سياق الحديث عن السينما الوثائقية في تونس و التجارب التونسية في هذا النوع من الأفلام (رغم أنو في نهاية الأمر يخلص بالقول انو "المنصف كحلوشة " ماهوش فيلم وثائقي ..)

و هذا موقف يتحسب للمؤلف كعديد المواقف الصريحة الأخرى حول عديد الأفلام الأخرى و خاصة موقفو من فيلم "آخر فيلم" متاع النوري بوزيد و الطرح البسيط متاعو لقضية التطرف الديني و موضوع الإرهاب و التمثيلية الساذجة و السخيفة لمقاطع المايكينغ اوفف (هاذية قلتها انا موش اسماعيل) اللي يعتبر انّها لا تستجيب لشروط هذا النوع من المشاهد اللي يلزم تكون "عفوية" و يقوم باخراجها حدّ آخر غير مخرج الفيلم بنفسو ... و فمة زادة في الكتاب برشة مواقف أخرين تعبّر حقيقة على واقع السينما و تحط الامور في بلاصتها ، فالصحافة و البرامج التافهة متاع تونس سبعة و الجوائز متاع مهرجان قرطاج ما تنجمش تخبي الواقع الأزمة اللي يمر بيه الفنّ السابع في بلادنا، و إسماعيل قال في الكتاب اللي يلزم يتقال و اللي (واحد من ناس) و العديد من محبي السينما و متتبعي السينما في بلادنا حبّوه يتقال و يوصل .

فـالأكيد كذلك انو اسماعيل في الكتاب المذكور اختار ثنيتو و طريقو ، طريق "النضال الثقافي militantisme culturel " على حد تعبيرو ، اي السباحة عكس التيّار و اثارة المواضيع اللي يخاف منها الجميع و بصراحة لقيت جرأة كبيرة بعمري ما ريتها قبل في كتاب تونسي مرخّص له و تم نشرو في تونس، يقول في الصفحة 107 (في سياق الحديث على لجوء المثليين لقاعات السينما للهروب من رفض المجتمع و لإيجاد فضاء بعيد على "العينين" ينجمو ياخذو فيه راحتهم ):

« Orwell a démontré depuis longtemps que tout système fasciste tends à annihiler la charge libidinale vitale et le désir sexuel libérateur en chacun »

و يقول كذلك في الصفحة 109 في نفس السياق :

« Les cités dortoirs que des émirs du golf nous préparent à grands coups de milliards de dollars n’ont rien à envier au totalitarisme et au fascisme de cités décrites dans certains romans ou films de science fiction, elles ne s’en distinguent que par la luxure, la vanité, l’indécence et la vulgarité. Dans ces cités dortoirs la pensée, l’art et la culture, c'est-à-dire la liberté, sont impérativement, systématiquement et organiquement exclus (pour ne pas dire interdits) au profit du divertissement, l’argent et l’absence (c'est-à-dire l’aliénation).

و المقصود بالنظام الفاشي واضح و لا يحتاج لتفسير، و ما يخفاش كذلك النقد اللاذع و الصريح للخيارات الرسمية و التوجهات المستقبلية للبلاد.

في اخر الكتاب يقدم إسماعيل نظرتو لمستقبل الفضاءات السينمائية في فقرة بعنوان "المواخيرbordels "، فيقول انو في أوائل القرن العشرين كانت بعض دور الدعارة في أوروبا تعرض مشاهد جنسية لإثارة الحرفاء (و شحذ الهمم متاعهم) و اللي تحول فيما بعد لسينما البورنوغرافيا ، في حين انو توة في القرن 21 (بعد ميات سنة) تحوّلت قاعات السينما في بلادنا (أو ما تبقّى منها) لفضاءات تستقطب العشاق والمحبّين و الباحثين عن اللذّة ، حيث انو في القاعات الشبه خالية تطوّر قطاع الخدمات الجنسية (بالتعاون مع مضيّفات الاستقبال في القاعات) و يكفي انك تدفع حق تذكرة السينما و فوقها 5 و الا عشرة الاف و تستمتع بزوز فنون في نفس الوقت ، الفنّ الأصلي الأصيل (الصّحيح) و الفن السابع. .. و لو انو إسماعيل لهنا عندو نظرة خاصة للموضوع حيث يعتبر انو الجنس بمقابل مادّي و الجنس مقابل وعود (زائفة) بالزواج هو نفس الشيء و يستغرب هروب الفئة الاولى (المحبين ) من القاعات مع ازدهار الخدمات المدفوعة الأجر. و يخرج في نهاية الأمر بخلاصة أن الأوضاع انقلبت من أوائل القرن العشرين وقت اللي كانت دور الدعارة تستعمل السينما لجلب الحرفاء ، و أوائل القرن الـ21 في بلادنا وقت اللي ولات قاعات السينما تلجأ للدعارة للحفاظ على بقائها.

حاصيلو كتاب تحفون برشة و جريء برشة و نشجعكم باش تاخذوه و تقراوه ، و منستغربش انو ماخذاش حظو في الصحافة بمختلف انواعها للاسباب المذكورة، و من سخرية القدر انو الاذاعة التجارية الاردأ و الاتعب في البلاد هي (على حد علمي الوحيدة) اللي استدعات المؤلّف و عملتلو انترفيو على الهواء.

Ps:ماتقولوش عاد الي الكلاندستان ولى يعمل مالطبقة المثقفة و يعمل تقديمات للمؤلّفات الجديدة ، و ما تظنّوش كذلك اني خذيت فلوس مقابل التدوينة هاذي ، بالعكس حتى الكتاب شريتو (بـ10 الاف كاملين ههههه)

من حكم في ماله فما ظلم

2009-05-22T11:07:00.000+01:00

كنّا في تدوينات سابقة حكينالكم على سيدنا السّلطان ، الحاكم بأمره في بلاد الكنتول ,لهنا و لهنا و لهنا و لهنا و لهن ا... و هاذية ليوم حلقة جديدة و مغامرة جديدة من مغامرات مولانا السلطان ، أعزّه الله و أذلّنا ، ابقاه الله و افنانا (عن بكرة ابينا) ، افلسنا الله و اغناه و اغنى اهله و ذويه و من والاه و من اتبعه و من فرش له نفسه (حصيرة عربي) ليطأها عند الدخول و عند الخروج ...اللهم آمين
البقية

الحاجب يجري في الكولوار... شادد ماصّو كبير في يدّو... و يصيح
"وينو سيدنا ؟؟ وينو سيدنا ؟؟؟"
يلقى جاريّة شادّة في 1100 في يدها و تكتب في ميساج
"يا طفلة وينو سيدك السلطان ؟؟"
من غير ما تهزّ راسها "قبيلة ريتو داخل للتوالات "
يجري الحاجب للتوالات متاع القصر ... يدزّ الباب ... ما فمّة حدّ
يخرج لبرّة ، يعرضو الجرديني: " يا حاجب ...يا حاجب ..."
الحاجب : "اشنوة زادة ؟؟ آش تحبّ؟؟"
الجرديني : "انتي ماهو متثقّف و قاري في الجامعة بربّي شدّ التاليفون و قيّدني في سرفيس "سمّعني" ... حطّلي غناية إليسّا "
الحاجب: " بسم الله المانع الستّار ... شنية هاذي إليسّا انس و الا جان ؟؟ "
الجرديني :"آه حقّا نسيت ، احنا توّة في عهد الدولة العباسية ، منعرفوش إليسّا ...باهي مالا ، حطلي غناية من غنايات اسحاق الموصلي "

ياخذ الحاجب التاليفون من عند الجرديني و يحطّلو الكود متاع الغناية ، و في نفس الوقت يسألو:
"قلّي بربّي ...تعدّاش قدّامك سيدنا أبقاه الله؟؟"
الجرديني :" توّة كي تعدّى قدّامي خارج من التوالات...يظهرلي ماشي يستقبل في وفد من الوفود"

من حينو يجري هاك الحاجب للقاعة متاع الاحتفالات ... و فعلا ...يلقى وفد يستنّى ...
مجموعة من الاشخاص منظرهم و مظهرهم و هيأتهم العامة لا توحي بالثقة ...قدامهم بين الخمسين و الستّين قفص ، كلّها عصافر... كنالوات ، ببغاوات ، دجاج ، حمام ، عصفور متاع زيتون ، عصفور متاع جبل ، عصفور متاع ماء، عصفور متاع صحراء ، انواع غريبة أوّل مرّة يشوفها الحاجب ... حتى من النعام زادة جابوه في اقفاص كبيرة .

الجماعة كي شافو الحاجب (في بالهم هذاكة هو السلطان) قاموا و طبّسوا رؤوسهم و قدّم زميمهم القدّام و صفّق بيدّو ثلاثة مرّات. فبدات هاك الطيور و الدواجن اللي في الاقفاص تنشد النشيد السلطاني في لحن نشاز يوتّر الأعصاب.
الحاجب تفاجأ ، و وقف في بلاصتو ( بطريقة لا إرادية) و طبّس راسو (كالعادة وقت النشيد السلطاني) ، إلا انو تدارك الموقف ، و وقّف السمفونية و سألهم :" ريتوش سيدنا السلطان؟؟؟"
قاملو واحد آخر من الجماعة ، على ما يبدو شاعرهم ، و انطلق :" تسأل على سيدنا السلطان ؟؟ سيدنا السلطان في كل مكان ...يحكم فيها إنس و جان .... سيدنا نحبّوه و معنّاش مزيّة ... و نشدّو جرّتو في كل ثنيّة ..."
الحاجب:" بربّي سألتك سؤال حلّيتلي فيها عكاظية ؟؟"
الشاعر -يواصل بانفعال شديد - : "سيدنا ...يااااا سيدنا ... انت الشمس و القمرة ... انت الفم ... و احنا الثمرة ... " (و يبدأ يبكي بالدموع) "يا ااااا مولانا ، يااااا سيدنا ...... كوووولنا ...... كووووولنا في كرشك ...كولنا بالشفاء و بــالهناء...."
في الاثناء برشة من الحاضرين يمسحوا دموعهم تفاعلا مع الموقف و تضامنا مع شاعرهم و تأثّرا بالصورة الشعرية المتميّزة.

الحاجب : "بارك الله فيكم يا جماعة ،استناو التلفزة...توة نبعثلكم التلفزة ، الليلة بإذن الله تتعداو في اخبار الثمانية"
و يخليهم و يخرج و هو يعاود في قلبو :"لا حول و لا قوة الا بالله ... اذا كان ها البلاد فلحت في حاجة ، راهو في الكذب و النفاق"

و يعدّي هاك الحاجب ساعة اخرى وهو يجري من بقعة لبقعة يفركس في السلطان. هاو رئيس الحرس يتبّع فيه و يلاحظ التحركات الغير عادية متاعو... هو وصل بجنبو وهو ناداه
" آآه حاجب ..." و يلوي فممو على جنب و يغمز بعينيه " آآه شنوة ؟؟ شبيك ؟؟ شفمّة ؟؟"
الحاجب:" سيدنا السلطان ... من الصباح و انا نمفركس فيه و ما لقيتوش"
رئيس الحرس يعدّي "جهاز كشف القنابل" على جبّة الحاجب و سروالو و حتى شاشيتو و بلغتو ،
و يجبد الجهاز (التالكي ولكي) : "من رئيس الحرس لغرفة العمليات ...السلطان مفقود ...نأكّد ...السلطان ضاع ...اينعم ...السلطان بيدو ...السلطان راح"
و في لحظة طلع الحرس السلطاني و قوة المماليك من كل مكان ، و انتشروا في كل مكان

الحاجب مسكين ، تعب من الجري و حسّ بالجوع...قاللك ناخذ بوز و نعمل تحريشة في الكوجينة متاع القصر و مبعد نستأنف البحث.
دخل للكوجينة (الماصو ديما في يدّو) ، ما لقاش لا كبير الطباخين لا المساعدين متاعو...يسمع التلفزة تخدم...

وقف ...خزر ...ثبّت ...

يلقى السلطان...

في زي رياضي يتفرّج في قناة المسابقات على النايل سات

بنية شبه عريانة تشطح و تصيح:" ايه هو اسم البلد اللي لو قريناه من اليمين للشمال يبقى صحّ ، و لو قريناه برضه من الشمال لليمين بيبقى صحّ ؟؟؟ ايه هو البلد ده ؟؟؟ اتصل دلوقتي و حتفوز بمية الف دولار ...مية الف دولار ...بس اتصل و جاوب على السؤال..."

السلطان شادد التليفون الملكي و يطلب ...
يتلفّت...ينتبه للحاجب
"عرفتها يا حاجب ... و الله طلّعتها ... هاذي ما تطلع كان ليبيا ..."
الحاجب يتمنّى انو يسبّ السلطان و يقلّو (يا جبري) الا انو يتذكّر انو مازال يعيش في القرون الوسطى و الكلمة هاذي مازالت مطلعتش ، فيخاطب السلطان بلغة ذالك الزمان و يقلّو: " اعزّكم الله و ابقاكم يا مولاي ، انتم اعلم منّي بذلك"

السلطان (يضحك) : "غريب امر هذه الرعيّة و هذا الشعب ....100 الف دولار في مسابقة بيدونة كيما هكة؟؟؟ و لتوّة تجيني برقيات و مطالب الاعانة الاجتماعية ؟؟ تي هاي الفلوس ... هاي الملاين في متناول الجميع ...شعب بهيم و مصطك و يقلّك الفقر ظالم ...بربّي ذكّرني نعيّط للشيخ كبير مؤدّبي الصبيان نسألو شبيه المستوى الثقافي متاع الرعية..."
الحاجب:"لوكان ماجاش شعب مصطّك ما يخليك انتي تحكم فيهم"
السلطان (التليفون في وذنو) :" نعم ؟؟؟؟ شنوة قلت يا حاجب ؟"
الحاجب:"قتلك ابقاك الله يا مولانا"
السلطان:"صحّيت ، صحيت يا حاجب، ايجا تره ورّيني كيفاش نعرف الصولد ؟؟ يظهرلي الكارطة مشات..."
الحاجب:" استبشر يا مولاي ، من اليوم ماعادش تخمم في الكارطة و الكوارط و الصولد و الروشارج "
السلطان:"عجايب ؟؟ قلي تره كيفاش ؟؟"
الحاجب (يلوّح بالماصو في الهواء) :" هاو الصحيح يا سيدنا ، هاذية مسابقة ديوان التاليفونات متاع المملكة ، يحبّوا يبيعوها للبراني "
السلطان (ما يكبطي كان كلمة مسابقة) : "شنيّة ؟؟؟ مسابقة ؟؟؟؟ ياااا مسابقة .... قلي ...قلي يا حاجب شنوة السؤال ؟؟؟ "
الحاجب:" من غير اسئلة ، هاذي مسابقة من غير سؤال "
السلطان:" مالا شنية الجائزة ؟؟ و الا قلي زادة فمة مسابقة من غير جائزة "
الحاجب (يشير بيدو للطفلة في التلفزة) :" يا سيدنا الجائزة كبيرة ...كبيرة ياسر ...هاذي تسوى مئات المرات الجائزة متاع التلفزة"
السلطان (عينيه تلمع و ريقتو تسيل): " اااه مالا قيّدني انا لوّل ، و قيّد السلطانة هي الثانية ...و قيّد ولي العهد هو الثالث..."
الحاجب:"و البقية ؟؟ و الشعب ؟؟ و الرعية ؟؟ فيهم اشكون يحب يشارك ..."
السلطان (يحلّ ايديه و يضمّها لصدره) :" كل حدّ حرّ في متاعو ، البلاد متاعي و هوما يدبّرو روسهم في بلاد اخرى "
الحاجب (بلهجة الناصح المحذّر) :" يا مولانا ربما يعملو فتنة و ثورة في البلاد ؟؟ "
السلطان (يضحك ):" يزّي يا راجل قالو ثورة ... ابعث شكون يجيبلي الطفلة متاع الميات الف دولار ، اعمللهم المسابقة هذيكة لهنا و زيدهم في الجائزة و سههللهم في السؤال ...انا قبيلة ليبيا طلعتها بعد ساعة تخمام..."
الحاجب:" صحيح يا مولانا ...عندك حق ...كل شي متاعك و من حكم في ماله فما ظلم"

ة

المسلمين باش يحكموا العالم من غير حرب

2009-05-17T21:06:00.002+01:00

فيديو مجهولة المصدر قاعدة تلقى رواج كبير على اليوتوب و الفايس بوك و برشة مدونات.حسب اللي عملوا الفيديو قالك اللي المسلمين باش يولّوا الاغلبية في الدول الغربية ،و قاللك زادة اللي نمط الحياة و العادات الاجتماعية (المسيحية) و الارث الثقافي الغربي بكلّو باش يمشي في خبر كان , و فرانسا و بريطانيا و المانيا و كندا كلها باش تولي دول اسلامية بعد اقل من 100 سنة ، و يستشهد بتصريح للقذافي يقول فيه اللي الاسلام باش ينتصر في اوروبا من غير مدافع و الا سيوف ، و قاللك زادة اللي امريكا و بفضل الهجرة اللاتينية هي الوحيدة اللي باش تنجّم تقاوم المدّ الاسلامي. (و منعرفش لهنا علاش الإسلام ديما ينظروا كخطر داهم أو وباء يجب إيقافو ، علاش ما يتقالش نفس الشيء على البوذية و الهندوسية اللي تلقى زادة اقبال كبير من طرف المواطن الغربي ).
حصيلو حكايات لا راس لا ساس , و معلومات مغلوطة و احصاءات خيالية (تصوّرو قالك النمو الديمغرافي في بعض البلدان الاسلامية يوصل لـ8 % اللي هو معدّل خيالي و مستحيل)و حتى تصريح القذافي زادة حسب ما شفت هو غير صحيح .
بحيث الفيديو هاذي خطرها موش على العباد اللي عندها القدرة على التحليل و الموضوعية الكافية لمعرفة الغث من السمين ، لكنّها تلقى رواج و صدى طيّب عند البسطاء من الناس ، فأنا كي نحط روحي في بلاصة مواطن كندي منخفض التعليم و الوعي ، منجّم كان نصدّق المعلومات الواردة و بالعكس نخاف على اولادي من خطر العدو المتربّص بعاداتنا و تقاليدنا و دين اباءنا و اجدادنا, خاصّة و انو في آخر الفيديو يقلك اللي "اولادنا باش يعيشو في عالم مختلف تماما عن العالم اللي نعرفوه".و حسب الفكرة هاذي و برشة افكار مسبّقة ، و حسب الأفكار اللي تكوّنت عندي كمواطن غربي عن الاوضاع في العالم الاسلامي ، اكيد نتصوّر اولادي عايشين في مدن صحراوية متخلّفة ، و بناتي لابسين الأسود و راكبين الجمال في بلاد يسودها القمع و الخوف والارهاب و انعدام الحريات.*
و من جهة أخرى الفيديو هاذي و امثالها ينجّم يكونلهم نفس التأثير عند الطرف المقابل (المسلمين) ، كيف كيف اي شخص ماهوش ملقّح بدرجة كافية ضد فيروس المغالطة و الدعاية الكاذبة (الخبيثة) ما ينجّم كان يصدّق و يستعمل الفيديو لخدمة اغراض اخرى، كيما الفيديو متاع فايسبوك اللي عملتها مدوّنة تسمي روحها (التنصير فوق صفيح ساخن) و اللي يكفي انو تعرف انو اللي عملها اسمو "ابو حمزة" باش تعرف الباقي.

من ناحية اخرى نلقى فيديو اخرى تعملت لتصحيح المعلومات و كشف الاخطاء الفضيعة و تحذير الناس من تصديقها ، تستند في معظم المعلومات الواردة فيها لموقع مكتب احصاءات السّكان المعروف بجدّيتو.

حجب مدونة العمروش ، هاذي البداية و مازال ...الحساب في المطار

2009-05-14T14:36:00.005+01:00

كما كان متوقّعا فقد تعرّضت مدونة العمروش الى الحجب الكامل (من داخل و خارج تونس) , و ذلك اثر قيامه بتحقيق حول قيام أحدهم بشراء فيلا فخمة في كندا. "انشالله هذاكة حدّ الباس" و نرجو ان لا تتطوّر الأمور إلى ما لا يحمد عقباه خاصّة و أن خونا العمروش ينوي العودة الى تونس خلال هذه الصائفة.
لذلك فإني اهيب بعمّار و زملاء عمّار و اعراف عمّار (رؤسائه) بالعفو عن العمروش و ارجاع مدوّنته و اعطائه ضمانا بالعودة الى ارض الوطن (في ظروف طيّبة) , كما اتوجّه الى الصديق عمر بنصيحة , عليه بطلب الاعتذار من السيّد صاحب منزل كندا عما سلف منه من سوء النيّة و قذف و ثلب مجانيين (...) , كما عليه ان يتعهّد بعدم العودة لمثل هذه الاعمال مستقبلا فالبحث في املاك الناس و ارزاقهم و التدخّل في شؤونهم الخاصّة غير مقبول في العالم الافتراضي كما في العالم الحقيقي , كما عليه ان يفهم أن الغنى و الفقر بيد الخالق عزّ و جلّ, فالشعب التونسي (ككل الشعوب التاعبة) ولد فقيرا ، و سيبقى فقيرا حتى يرث الله الارض و من عليها, و صاحب فيلا كندا و من معه وُلدوا و في افواههم (مغارف) ذهبية .
لذلك من الطبيعي ان يمتلكوا الفيلات و القصور (داخل و خارج البلاد) و من الطبيعي ان ندفع الضرائب و لا نسائلهم عن مصيرها , و من غير الطبيعي القول او التفكير بعكس ذلك.
فهذه هي حرّية التعبير و هذه هي بلادنا ...
و عاشت سويعة سبور ...

ملاحظة : ليس لمدونة غدوة نحرق و لا للكلاندستان اية علاقة (و لا اية مصلحة) بعملية حجب مدوّنة العمروش (لا من بعيد و لا من قريب) , و قد قمت بتوضيح ذلك في تدوينة الجمعة . و ذلك بغاية التوضيح فقط لا بـنيّة توجيه اهتمام (جماعة الـ404 ) نحو مدونة العمروش.
و قد ارتأيت ان ذلك أسلم لكلينا (انا و العمروش) فهو في نهاية الأمر مواطن بلجيكي من رعايا جلالة الملك ألبار الثاني , في حين ان العبد الفقير لله , مواطن بسيط يعيش في ارض الوطن و قريب من مراكز الأمن و في متناول الدوريا ت الامنية بمختلف اصنافها.
زيادة على ذلك ، تجدر الاشارة الى أنّ علاقة عمّار بمدوّنة غدوة نحرق هي علاقة ودّ و احترام متبادل و لا تشوبها شائبة... و ربّي يدوم العشرة

تحيين:
بعد تعليقات الاصدقاء اتضح ان عملية الحجب تشمل فقط مستعملي الانترنات من تونس

à tout ceux qui se sentent mal cet après midi

2009-05-12T16:03:00.001+01:00

Veuillez installer Flash Player pour lire la vidéo

Moby - Why does my heart feel so bad sélectionné dans Musique et Clips

le foot chez nous , un fléau qui continue de tuer ...

2009-05-12T11:20:00.005+01:00

Adawia "Aston villa" mort de joie après le match Esperance - Wydad de Casablanca au Maroc