Debrúzate. Programa de Roteiros polo Condado

Horarios do Debrúzate a San Cibrán

2009-07-15T00:34:00.001-07:00

O próximo domingo 19 de xullo realizarase un novo Debrúzate, desta vez até o alto do monte de San Cibrán, en Guláns.

O percorrido arrancará de Ponteareas, da Praza da Igrexa, ás 09:30h, e irarse até Moreira pola beira do Tea para comezar a subir por Cristiñade e Guláns. O percorrido é de dificultade alta, cunha extensión aproximada de 14 quilómetros.

Ao remate do percorrido xantarase, por conta propia, na área recreativa que está no cumio do monte.

Contamos contigo!
Ven a coñecer o noso patrimonio!!
Debrúzate con nós!!!

Debrúzate a San Cibrán

2009-07-03T04:42:00.000-07:00

Tarde calurosa no Debrúzate a Fozara

2009-07-01T01:38:00.000-07:00

Foi unha tarde certamente calurosa, pero moi agradable.

A primeira parte do percorrido, a través do Castro de Fozara, fíxose moi ben pola sombra das árbores e a segunda foi excepcional, polo paseo á beira do Tea até as pozas das Pías. Alí xa foi o momento de refrescarnos todos...todos á auga!!

E agora xa imos pensando no próximo, a San Cibrán, o día 19 de xullo.

Debrúzate a Fozara, 20 de xuño

2009-06-07T23:38:00.001-07:00

Aquí está o novo percorrido previsto, a Fozara o día 20 de xuño.

Visitaremos o Castro de Fozara e as Pozas do Río Tea. Patrimonio cultural e natural, unha vez máis xuntos.

Os horarios previstos son os seguintes:

Quedamos ás 18:00h na Estación de Autobuses de Ponteareas ou ás 18:30h no campo de fútbol de Fozara.

O percorrido é de dificultade media-baixa.

Máis información nos próximos días.

Pese a choiva, éxito do Debrúzate a Ribadetea

2009-05-25T08:57:00.000-07:00

A pesar da choiva e da tarde pouco apetitosa que se presentou o pasado sábado, foron case 50 as persoas que nos acercamos até Ribadetea, para descubrir parte do noso patrimonio, material e natural.

Está escondido baixo séculos de transformacións, de todo tipo, pero alí segue, na súa posición privilexiada, este Castro da Croa, que debeu ser lugar de destacada importancia "porque non se protexe tanto algo que non ten valor", dicía Rafa Gutiérrez.

O Castro da Croa conta cun interesantísimo conxunto de foxos e parapetos, bordeando en todos os ventos ao recinto habitado, excepto na beira do Tea, e crese que foi explotación mineira de gran valor.

A visita, en parte condicionada pola choiva, e tormenta, resultou agradable a pesar de todo. ´

Saíndo do campo de fútbol de Ribadetea, visitamos as inmediacións da Croa, subindo ao recinto habitado hai máis de dous mil anos, para logo volver pola beira do Tea, momento que se corresponde coa imaxe.

Dámos desde aquí as grazas aos asistentes e animámosvos, xa, a participar nos próximos percorridos.

Nota de prensa sobre o Debrúzate a Ribadetea

2009-05-17T09:46:00.000-07:00

Nota de prensa, 16 de maio de 2009

A ORGANIZACIÓN TEN XA PREVISTOS OS PERCORRIDOS DE XUÑO E XULLO
O Castro da Croa e o Río Tea en Ribadetea serán o destino do próximo Debrúzate

As asociacións Adenco, Galiza Nova e MZS organizan un novo roteiro dentro do programa Debrúzate, que se desenvolverá o próximo sábado 23 de maio, con saída ás 16:00h da Estación de Autobuses de Ponteareas, ou ás 16:30h no Campo de Fútbol de Ribadetea.

O Castro da Croa está ás beiras do Río Tea e conta cunha estructura singular e pouco habitual, ao atoparse fortificado con paredes de máis de 25 metros de altura. Semella unha torre no medio do monte, franqueado por un dos seus ventos polas augas do Tea.

Este asentamento castrexo, descoñecido por moitos, atópase sen excavar e está rodeado, á súa vez, polos restos dunha explotación aurífera romana, da que quedan restos evidentes.

O percorrido é de dificultade baixa e durante a súa execución daranse as oportunas explicacións polo arqueólogo e socio de Adenco Rafael Gutiérrez. A pouca dificultade e a lonxitude do percorrido fano apropiado para nenos e maiores.

CALENDARIO DE DEBRÚZATES
A organización de Debrúzate xa ten datas para as dúas próximas citas. Serán o 20 de xuño, día no que se visitará o Castro de Fozara e a zona das Pías do Río Tea, conxugando o patrimonio castrexo e a Rede Natura 2000, e o 19 de xullo, co maior Debrúzate até o momento, partindo de Ponteareas e rematando en San Cibrán, onde organizará un xantar popular, con 14 quilómetros de extensión, visitando as parroquias de Angoares, Moreira e Cristiñade.

Galiza Nova, MZS e Adenco deseñan así un programa de actividades para os próximos meses que intenta, na medida das posibilidades dos organizadores, suplir a carencia de actividades lúdicas e culturais no Concello de Ponteareas, ao tempo que se pon en valor o noso patrimonio, en todas as súas vertentes.

Cartel dos seguintes debrúzates

2009-05-06T09:41:00.000-07:00

Aquí está o cartel do seguinte debrúzate...

Calendario de novos percorridos

2009-05-06T05:06:00.000-07:00

Xa temos aquí o calendario dos próximos Debrúzates. A tres meses vista, para que preparedes as vosas axendas e que saiades con nós a desfrutar do noso patrimonio natural, cultural e inmaterial.

O primeiro dos percorridos será o 23 de maio, por Ribadetea. Visitaremos o Castro da Croa, nunha visita guiada a través dunha explotación aurífera romana ao pé do Río Tea. Unha visita imprescindible, como todas, para coñecer o noso patrimonio, rico e variado.

Os seguintes Debrúzates serán o 20 de xuño, a Fozara, e o 19 de xullo, nun gran Debrúzate, entre Ponteareas e o monte de San Cibrán, onde celebraremos un xantar popular. Pero destes outros percorridos iremos informando pouco a pouco.

Traballando nos novos percorridos

2009-04-13T01:47:00.000-07:00

Despois dos meses de inverno, xa estamos preparando os novos percorridos. Estamos cerrando os últimos detalles e en breve presentaremos o programa de roteiros a tres meses vista, para que vaias reservando os días na túa axenda!!

Non desesperes!!

Que é Debrúzate? Un post que explica o que pretendemos

2009-01-16T00:18:00.000-08:00

A INICIATIVA PRETENDE PÓR EN VALOR O NOSO PATRIMONIO A TRAVÉS DE VISITAS GUIADAS
DEBRÚZATE: descubrindo o noso patrimonio cultural, natural e inmaterial
As organizacións Adenco, Galiza Nova e Mzs, iniciaron en abril de 2008 unha actividade, Debrúzate, coa vista posta no futuro, pero coa partida no pasado. Debrúzate nace como un convite de fin de semana, desexa botar unha ollada pola ventá do noso País e é o noso desexo abrir as contras e deixar que a nosa riqueza patrimonial e paisaxística nos asolague.

É a nosa querencia percorrer aqueles puntos máis interesantes e atractivos das nosas parroquias, tanto dende o punto de vista arqueolóxico como medioambiental. Hoxe, despois de ter efectuado xa cinco roteiros guiados por espazos diferentes, algúns moi coñecidos e outros non tanto, o balanzo é enormemente positivo.

Aínda queda moito por ver pero está no ánimo da organización continuar adiante tanto tempo como a sociedade pontareá o demande, seguramente outro ano máis, de maneira que poñamos ao alcance de todos os que se sumen a estas camiñadas lugares que doutro xeito case con seguridade non visitarían.

O espírito e a filosofía que inspira á esta iniciativa non é outro que o de dar a coñecer a enorme e variada riqueza patrimonial e medioambiental que existe no termo municipal de Ponteareas. Os 125 quilómetros cadrados que suman as vinte e catro parroquias do noso concello albergan unha inxente cantidade de vestixios arqueolóxicos, de elementos etnográficos, de mostras propias da arquitectura popular, de lugares cun alto valor medioambiental .

Os percorridos que se organizan dende DEBRÚZATE non buscan máis que divulgar e promocionar aquilo que temos máis perto e que en moitas ocasións é un perfecto descoñecido. A difusión do noso patrimonio facilitará que o gran público sexa coñecedor do que ten máis perto, do seu valor intrínseco e da importancia de que se conserve e poña de actualidade. A sociedade demanda, cada vez máis, o acceso e a comprensión desa riqueza cultural e é consciente da necesidade da súa protección.

O noso único interese é buscar, e acadar, a implicación emocional e afectiva das persoas, en atopar fórmulas ou modelos que contribúan a unha maior eficacia dos esforzos e das accións encamiñadas precisamente a protexer, conservar e difundir o patrimonio cultural, sexa material ou inmaterial.

Con esta actividade de pleno contacto e interacción co entorno que nos rodea achegámonos un pouco máis ao coñecemento e respecto polo que forma parte do noso acervo cultural, por aquilo que nos identifica dende o pasado pero tamén que nos coloca nunha posición de futuro.

Percorridos xa realizados
Abril de 2008- Debruzate á Cillarga (Ribadetea)- túmulos megalíticos e entorno paisaxístico.
Xuño de 2008-Debrúzate a Angoares- xacementro castrexo, peto de animas, río Tea e río Uma.
Xullo de 2008-Debrúzate ao castro de Troña (Pías)- castro de Troña.
Novembro de 2008- Debrúzate aos Muíños de Couso (Guláns)- patrimonio etnográfico recuperado.
Xaneiro de 2009- Debrúzate as Chans do campo do Mouro (Guillade)- necrópole megalítica, apiarios.

Imaxes do Debrúzate ás mámoas de Guillade

2009-01-12T00:12:00.000-08:00

Inauguración dos Muíños de Couso

2009-01-08T00:35:00.000-08:00

Por alí fixemos un Debrúzate. Agora toca o acto oficial. Se queredes participar, estes son os horarios:

DOMINGO 11 DE XANEIRO DE 2009

10:30h.- Presentación e intervencións das autoridades

11:30h.- Visita guiada aos muíños

13:00h.- Aperitivo e viño

ORGANIZA: ASOCIACIÓN CULTURAL SAN MARTIÑO DE COUSO

Chan do Campo do Mouro, Guillade

2009-01-05T03:19:00.000-08:00

Horarios definitivos:

Ás 15:45h, na Estación de Autobuses de Ponteareas
Ás 16:00h, percorrido guiado pola necrópole megalítica da Chan do Campo do Mouro, en Guillade.

Debrúzate con nós!

Debrúzate a Guillade, sábado 10 de Xaneiro

2009-01-02T02:59:00.000-08:00

O próximo sábado 10 de Xaneiro terá lugar o primeiro Debrúzate do 2009, á parroquia de Guillade, rica en patrimonio cultural, inmaterial e natural.

En Guillade volveremos ao mundo megalítico, visitando un impresionante campo de mámoas, pouco coñecidas, pero que nos acercaran a unha forma de vida que deixou a súa pegada nas nosas terras con estas tumbas comunais case descoñecidas.

O punto de encontro será a estación de autobuses de Ponteareas ás 16:00h, para dirixirnos a Guillade a continuación.

Esperámoste!

Adenco, Galiza Nova e MZS

Boas Festas, bo 2009, bos debrúzates!!

2008-12-22T03:45:00.000-08:00

Desde os colectivos que organizamos Debrúzate, desexámosche unhas felices festas para ti e para a túa familia!

Bo 2009!!!

Vémonos nos Debrúzates!!

Adenco, MZS e Galiza Nova

Os muíños xiraron en Couso

2008-11-18T10:03:00.000-08:00

O pasado sábado os muíños volveron a xirar nunha preciosa tarde en Couso. Desfrutamos dunha fantástica visita guiada a un muíño case único, cun rodicio vertical de case catro metros de diámetro e que se puxo en funcionamento para nós durante a visita. É o muíño da molinera.

Queremos darlle ás grazas publicamente á Asociación Cultural San Martiño de Couso polo bo trato recibido e o tempo que invertiron en nós, ensinándonos todo o que levan feito no lugar. Grazas!

Os restantes muíños tamén foron visitados e desfrutados, para rematar coa subida ao Castelo, en Cans, onde puidemos imaxinar o castelo que noutro tempo houbo alí e contemplar o Aloia, o Galleiro e o Galiñeiro. Impresionaba a beleza do atardecer ao lado do famoso penedo do pianista.

E agora xa estamos traballando no seguinte, seguramente ao campo megalítico de Guillade-Ponteareas.

Consulta o blog nos próximos días para manterte informado.

Horarios do Debrúzate a Couso

2008-11-12T02:15:00.000-08:00

Xa temos os horarios definitivos do Debrúzate a Couso.
Teremos dous puntos de encontro, con media hora de diferencia. Como agora os días son moito máis cortos, os horarios adiántanse algo.

Ás 15:30h na Estación de Autobuses de Ponteareas, para os que non teñan coche e para compartilo e non levar demasiados vehículos.

Ás 16:00h nos Muíños de Couso, lugar de partida da actividade.

Vémonos no Debrúzate!

Debrúzate a Couso. 15 de Novembro

2008-11-06T02:27:00.000-08:00

O próximo sábado 15 de Novembro reiniciaremos os roteiros encadrados en Debrúzate. Desta vez, logo de verán e comezando esta nova tempada, visitaremos Couso, un barrio con entidade propia dentro de Guláns.
Desfrutaremos, como sempre, da natureza e do noso patrimonio, visitando os muíños recén rehabilitados no lugar, nun fermoso regato na zona.
Estade atentos que nos próximos días colgaremos os horarios da actividade.

Descansando no verán...

2008-07-29T08:48:00.000-07:00

Imos a deixar pasar estes días de calor (ou iso era antes e agora pode ser que chova ou faga frío?) para volver con máis ganas aínda en Setembro. Estamos, pese ao calor, traballando en novas iniciativas, en roteiros máis interesantes se cabe, máis novidades de cara á próxima tempada de Debrúzate.

Esperamos e desexamos que aproveites o verán para coñecer os nosos fermosos lugares, a nosa paisaxe natural e cultural e que non faltes ás próximas edicións.

Contamos contigo. Debrúzate con nós!!

Debruzámonos a Troña

2008-07-15T09:19:00.001-07:00

A visita guiada ao Castro de Troña estaba claro que era apetecible. Foi o primeiro roteiro monográfico que facíamos, mesmo un domingo pola mañá, pero a resposta do público, foi, como o de até agora, moi positiva. Ducias de persoas acercáronse a descubrir unha xoia do castrexo galego, primeiro á charla e logo ao Castro, subindo polo via crucis (pero non de xeonllos!)

A charla, magnificamente guiada por Rafa Gutiérrez, abriu boca do que nos esperaba no cumio do monte. Un castro de medias dimensións con lugares realmente sorprendentes, como as escaleiras das pequenas rúas, o petroglifo, ...

Descubrimos tamén a lenda da serpe de Troña, acercámonos a un xeito de vida difícil de imaxinar, fai máis de 2000 anos. Intentamos trasladarnos ao tempo no que non había especies alóctonas que dificultasen a privilexiada visión que dende o Castro tiñan os seus moradores. Preguntamos que comía esa xente, como vivía, como eran as súas casas, se eran uns pobos combativos ou non, ...

En definitiva, acercámonos a unha cultura que deixou unha considerable pegada na nosa Terra e que aínda hoxe podemos desfrutar, cando non, literalmente descubrir.

Agora Debrúzate esperará ao Outono para retomar os roteiros guiados por outros lugares, por outras parroquias de Ponteareas, para descubrir o noso patrimonio natural e cultural.

Contamos contigo!!

Ven en bici ao Debrúzate a Troña!!

2008-07-07T01:57:00.000-07:00

Unha viaxe ao pasado no vehículo do futuro!

O domingo 13 de Xullo, como complemento do Debrúzate en si mesmo, programouse unha marcha en bici até Pías, dende Mondariz Balneario.

A saída está prevista para as 10:45h dende o aparcamento do Colexio Cemar, na saída de Mondariz Balneario. Será un agradable e corto paseo até o Teleclube de Pías, onde se realizará a charla previa á visita guiada ao Castro de Troña.

Dende a organización animámosvos a acercarvos en bici ao Debrúzate. Se sodes de Mondariz ou Mondariz Balneario, é o medio de transporte ideal para esta actividade!

Vémonos na bici, vémonos no Debrúzate!!

Programa do Debrúzate a Troña

2008-07-03T09:33:00.000-07:00

O próximo domingo 13 de Xullo debruzarémonos a Troña. O programa será máis completo que nos anteriores Debrúzates, completándose cunha charla introductoria.
A visita pretende acercar o mundo castrexo á xente en xeral e, en particular, descubrir un lugar de fantasía, cheo de beleza, encanto e importancia como é o Castro de Troña, un dos máis importantes, sen dúbida, de Pontevedra.

O programa é o que sigue:

Ás 11:30h, no Teleclube de Pías, charla sobre o Castro de Troña, duns 40 minutos de duración.
A continuación subiremos a pé ao Castro, para, a continuación, realizar unha visita guiada ao lugar.

Sobre ás 13:45h está previsto que remate a actividade.

Anímate! Participa e difunde a actividade entre os teus coñecidos. Vémonos en Troña!!

Debrúzate ao Castro de Troña: domingo 13 de Xullo

2008-06-23T08:35:00.000-07:00

Coñeces o Castro de Troña?? Foches algunha vez a unha visita guiada a un poboado castrexo??? Queres coñecer como vivía unha sociedade de fai miles de anos nun cruce de camiños como Troña????

Pois todo isto e moito máis no próximo Debrúzate a Troña, que celebraremos o próximo domingo 13 de Xullo. Será na mañá do domingo, actividade que se complementará cunha pequena charla introductoria.

Troña está agora, desgraciadamente, de actualidade. Movementos de terra no seu perímetro de protección puideron danar irremediablemente un lugar cun valor incalculable.

Son miles os visitantes do lugar ao longo de todo o ano, galegos e estranxeiros, que, atraídos pola importancia do Castro, acaban decepcionados, como se pode ver no libro de visitas, ante o espectáculo que ofrece o abandono, a maleza, as mimosas e os eucaliptos modificando a paisaxe natural do lugar, ...

Descubre Troña con nós.

Debrúzate ao Castro de Troña o próximo domingo 13 de Xullo.

Pronto colgaremos os horarios da xornada. Atentos ao blog!

Éxito do Debrúzate a Angoares

2008-06-10T01:46:00.000-07:00

Nunha fantástica tarde, máis de cincuenta persoas, percorreron os camiños e corredoiras de Angoares para descubrir un románico único no País, un fermoso río e os seus muíños, un Río cheo de luz que forma parte da Rede Natura 2000, ...

A visita a Angoares, unha pequena parroquia ao pé do Concello de Ponteareas, xuntou a ducias de persoas, de Ponteareas e de fóra, que camiñaron máis de tres horas pola zona atendendo ás explicacións da organización.

Visitouse a Igrexa de Angoares, punto de partida e remate do roteiro, incluíndo unha visita ao interior do templo, un exemplo do pulcro románico e con características únicas no País. Un fantástico arranque, un lugar cheo de encantos, reutilizado dende hai séculos, erixida no lugar no que no seu día houbo un mosteiro, como nos sinala tamén a toponimia do lugar.

Da igrexa ao Río Uma e á Ponte do Cabalón, un lugar fresco, fermoso, có paso da auga de fondo...

O paseo baixo os amieiros, carballos, freixos, abeleiras foi agradable, pasando polas numerosas levadas das que daban conta os numerosos muíños do lugar.

Ao chegar á desembocadura subimos polo Tea até o Castro de Angoares. Ponteareas estaba a tiro de pedra, pero moitos dos visitantes descoñecían que alí houbese un castro. Foron numerosas as preguntas que contestou Rafa Gutiérrez, ao pé do foxo do Castro, un exemplo do esforzo das sociedades da época.

Logo, de camiño á Igrexa pasamos xunto a tres petos de ánimas, deténdonos no último, no de A Abelleira, un peto sen dúbida singular polo que recolle a súa iconografía.

Xa era hora de rematar, logo de chegar de novo á Igrexa. Xa estamos traballando no próximo Debrúzate, en Xullo, para volver, despois de descansar en Agosto, en Setembro.

Debrúzate a Angoares

2008-06-03T02:02:00.000-07:00

O próximo sábado 7 de Xuño, con saída da Igrexa de Angoares ás 17h, dará comezo o segundo roteiro guiado enmarcado no Programa Debrúzate, que coorganizan Adenco, Galiza Nova e MZS.

O percorrido, dunha dificultade baixa e unhas tres horas de duración, acercará, unha vez máis, aos asistentes o noso patrimonio natural e cultural, desta vez na parroquia de Angoares, ao pé da Vila de Ponteareas e case descoñecida para a maioría dos seus habitantes.

O percorrido, partindo da Igrexa de Angoares, única no País pola súa estrutura, chegará ao Río Uma, na zona do Cabalón, lugar no que nos espera unha fermosa ponte de tres arcos e varios muíños. Río abaixo poderemos desfrutar dun Lugar de Interese Comunitario que forma parte da Rede Natura 2000, con multitude de muíños e paisaxes fermosísimas.

Na parte final do percorrido achegarémonos ao Castro de Angoares e aos petos de ánimas da parroquia, acabando o roteiro no mesmo punto de partida.

Esperámoste!