பேருந்து எண் 1

A Poison Tree

2008-10-01T15:47:00.004+01:00

வெளிப் படுத்த
முடியாத கோபம்,
இயலாமையின்
எரிச்சல்.
என்ன முயற்சித்துப்
பார்த்தாலும்
இயல்பாய்
இருக்க முடியவில்லை.

என்னிடம் துளிர்க்க
ஆரம்பித்திருக்கும்
அந்த நச்சு ஆப்பிள் கடித்து
ஒருவர் இறப்பதற்குள்,
யாராவது என்னிடம்
தப்பு செய்து மாட்டிக் கொள்ளுங்களேன்!

இதைத் தெரிந்து கொள்ள ஏன் இவ்வளவு நாட்களானது?

2008-09-13T15:22:00.000+01:00

Project Implementation-காக கண்ட கண்ட ராத்திரி வேலைகளில் உட்கார்ந்திருக்கிறீர்களா? 'ஆப்பிதேத்தூயூ' என்று நாய் பொம்மைக்கு டோனட் ஊட்டிகொண்டிருந்த மகளுக்கும், அவள் இறைத்துப் போட்ட பொம்மைகளை அடுக்கிக் கொண்டிருந்த மனைவிக்கும் டாட்டா காண்பித்துவிட்டு, இருட்டில் ஒரு நத்தையை தெரியாமல் மிதித்துக் கொன்று விட்டு அலுவலகம் சென்று அமர்ந்தால், உங்கள் டிபார்ட்மென்ட் பேட்ச் கொஞ்சம் தாமதமாகும் என்றார்கள். Log எல்லாம் ஆவதால் அலுவலகத்தில் அடக்கமாக Wikipedia, Google News மற்றும் சில siteகளோடு நிறுத்திக் கொள்வது. அப்போதுதான் இரண்டு நெருடலான விஷயங்களின் மீது இடறி விழுந்தேன்.

விஷயம் 1: இந்தியா ஒரு ஐரோப்பிய நாட்டை எதிர்த்து இராணுவத் தாக்குதல் நடத்தி வெற்றி பெற்றிருப்பது இதற்கு முன் கேள்விப் பட்டிருக்கிறீர்களா? கோவா இந்தியாவுடன் இணைக்கப் பட்ட விதமும் ஆப்பரேசன் விஜயும் கேள்விப் பட்டிருக்கிறீர்களா? விக்கிபீடியாவில் Operation Vijay மற்றும் அது சம்பந்தமான செய்திகளைப் படித்தபோது ஒரு விறுவிறுப்பான நாவலுக்குரிய எல்லா அம்சங்களுமங்கே இருந்தது. போர்ச்சுகல் ஆதிக்கம் - விடுதலைப் போர் - இந்தியா தலையிடுதல் - போருக்கு தயாராதல் - ஆப்பரேசன் விஜய் - 36 மணி நேரப் போர் - அமெரிக்க, பிரெஞ்சு ஐநா தடை - ரஷிய வீடோ மூலம் நம்மைக் காத்தல் - இந்தியா வெற்றி - போர்ச்சுகல் செல்லும் வீரர்களுக்கு அங்கு கிடைத்த அவமரியாதை. மொத்தத்தில் இந்தக் கதைகளை வரலாறு பாடத் திட்டத்தில் சேர்த்திருந்தால் தூங்கி வழியும் வரலாறு வகுப்புகள் எவ்வளவு சுவாரசியமாக இருக்கும்? ஏன் எனக்கு செய்யவில்லை?

விஷயம் 2: ஜெனீவாவில் நடக்கும் சோதனையைப் பற்றி தெரிந்து கொள்ள போனபோது இடறி விழுந்தது. CERN ஆய்வுக்கூடம் மற்றும் சம்பந்தமான விஷயங்கள் உண்மையாகவோ பொய்யாகவோ ஏற்கனவே கொஞ்சம் தெரிந்ததுதான் (உபயம்: Angels & Daemons). ஆனால் எடின்பரோ நகர அறிவியலாளர் ஒருவர் சம்பந்தப் பட்டிருப்பது கொஞ்சம் சுவாரசியத்தைக் கூட்டியது. Peter Higgs-ன் அந்த Boson பற்றி தெரிந்து கொள்ளப் போனேன் (ஒன்னும் புரியாவிட்டாலும் இந்த மாதிரி blog எழுத, ஒரு அறிவாளித் தோரனையை கூட வேலைப் பார்ப்பவர்களிடம் ஏற்படுத்த உதவுமே என்று!). Boson-ன் பெயர்க்காரணம் தெரிந்து அதிர்ந்து போனேன். அது ஒரு கொல்கத்தாக்கார இந்தியா அறிவியலாளர், போஸ் - சத்யேந்திர நாத் போஸ், என்பவரது பெயரிலிருந்து உருவானது. கால காலமாக JC போஸ், CV ராமன் மற்றும் HG குரானா ஆகியோரைத் தாண்டி நவீன இந்திய அறிவியலாளர்கள் எவரையும் நமது பாடத்திட்டம் நமக்கு அறிமுகம் செய்ததில்லை. SN போஸ் ஐன்ஸ்டீனால் பாராட்டப் பெற்றவர், ஐன்ஸ்டீனால்தான் அவரது papers வெளி வந்தன என்பது மகிழ்ச்சியை அதிகரிக்கிறது. ஏன் நான் இவரைப் பற்றி இதுவரை தெரியாதிருந்தேன்?

இது மாதிரி இன்னும் எத்தனை மனிதர்கள் மற்றும் செய்திகள்? தட்டையாக தூங்கி வழியும் வகுப்புகளைக் களைந்து எல்லோரும் பங்கு பெரும் சுவாரசியமான interactive-ஆன வகுப்புகள் நடக்க இன்னும் எத்தனை யுகங்கள் ஆகும்? அல்லது Project Implementationக்காகவும் நத்தையை மிதிக்கும் ஒரு ராத்திரிக்காகவும் எல்லோரும் காத்திருக்க வேண்டுமா?

மொழி பெயர்ப்பு

2008-09-13T09:00:00.003+01:00

எனக்குப் புரிகிறது -
அந்தக் கருவிழிகளின் அசைவிலும்,
புருவங்களின் நெரிப்பிலும்,
இதழ்களின் விரிப்பிலும்
உள்ள தயக்கங்களின் மொழிகள்!

இனி நான் உனக்கான
கனாக்களை காண்பதில்லை.
என் பேனாவை எறிந்துவிட்டேன் -
உனக்கான கவிதைகளை வேறு யாரோ
எழுதிக் கொண்டிருக்கின்றார்கள்.

இன்னொரு முறை
சந்திக்க நேரிடும் போதும் பேசிவிடாதே -
காதல் என்பது காதலிப்பதில்
மட்டும் இல்லை!
இப்படியே இருந்துவிட்டுப் போகட்டும் -
இதுவும் பரவசமாய்த் தான் இருக்கிறது!

நத்தைக் கூடுகள்

2008-09-11T23:10:00.001+01:00

நள்ளிரவு நேரமாதலால் கவனிக்கவில்லை -
நசுங்கிய சத்தம் மட்டுமே கேட்டுக் குனிந்தேன்.
முதலில் பதட்டம்,
பின்னர் கவனித்து நோக்கியதில் தெளிந்தேன்.
கடைசியில் கோபம் - ஏன் வந்து என் காலில்
மிதி பட்டாய் என்று?

இப்படி சில நத்தைக் கூடுகள அவ்வப்போது.
ரோட்டோரங்களில், பள்ளிக்கூடங்களில்,
திருவிழாக்கூட்டங்களில் மற்றும் பல இடங்களில்.
நானும் உங்களைப் போலவே
நசுங்கிய நத்தைகளையும் குற்ற உணர்வையும்
தள்ளிவிட்டுத் தொடர்ந்து பயணிக்கிறேன்.
நத்தைகளையும் மிதித்தவர்களையும் திட்டியபடியே -
கொஞ்சம் கூட உறுத்தலிலில்லாமற்!

எச்சமாதல்

2008-08-02T14:40:00.000+01:00

அந்த அறைக்கதவு மெல்லத் திறந்தது எந்த ஓசையும் எழுப்பாமல். அகால நேரமாகிவிட்டபடியால் குறைந்த அளவிலே விளக்குகள் வரண்டாவில் எரிந்து இருளும் வெளிச்சமும் அணைத்துக்கொண்டு தூங்கிக் கொண்டிருந்தன. நிழல் மெல்ல சுற்றிலும் பார்த்தவாறே வரண்டாவையும் வரவேற்பறையையும் தூங்கிக் கொண்டிருந்த காவலாளியையும் கடந்து மருத்துவமனையின் வாசலுக்கு வந்தது. கீழ்த்திசையில் நின்று கொண்டிருந்த காலையில் வந்த ஆம்புலன்சுக்கு எதிர்த் திசையில் இருந்த கும்மிருட்டுக்குள் நிழல் விடு விடுவென நடக்கத் தொடங்கியது.

கொஞ்ச நேரம் நடந்திருக்கும்.

"நில், எங்கே போகிறாய்?" என்றது கடவுள்.

நிழல் கண்டுகொள்ளாமல் தொடர்ந்து நடந்து கொண்டே இருந்தது.

"நீ செய்வது தவறு. உனக்கிடப்பட்ட மூன்று கட்டளைகளில் முதல் மற்றும் மூன்றாம் கட்டளைகளை மீறுகின்றாய்."

"ஆமாம், முதல் மற்றும் மூன்றாம் கட்டளைகளுக்குள் ஒன்றும் பெரிதாக வேறுபாடு கிடையாது. அதையேத்தான் வேறு மாதிரி இரண்டாகப் பிரித்திருக்கின்றாய்."

கடவுள் உணர்ந்து கொண்டது போல சிறிது நேரம் அமைதியாக இருந்தது.

"சரி போகட்டும். ஆனால் நீ கட்டளையை மீறி எங்கே செல்கின்றாய்? விடிவதற்கு இன்னும் ஒரு சாமம்தான் இருக்கிறது. இந்த இரண்டரை நாழிகைக்குள் எங்கு போவதானாலும் போய்விட்டு திரும்பி விடு."

"நான் திரும்புவதாக உத்தேசம் இல்லை."

"இதற்கு தண்டனை என்ன தெரியுமா? காலையில் அவன் எழுந்ததும் நீ இல்லையென்றால் பிரச்சினை ஆகிவிடும்."

"அவன் எழுந்தால் ஒன்றும் கவலை இல்லை. உனக்கு வெஸ்டிஜியல் ஆர்கன் என்றால் என்ன என்று தெரியுமா?"

கடவுள் கொஞ்ச நேரம் அமைதி காத்து விட்டு, "தெரியாது!" என்றது.

"நான் இனிமேல் அவர்களுக்குத் தேவை இல்லை."

கடவுளும் நிழலும் சிறிது நேரம் மௌனமாகத் தொடர்ந்தன.

"ஆனால் இவ்வாறு நீ திரும்பி வந்தால் உனக்கு தண்டனை நிச்சயம்."

"என்ன தண்டனை தருவாய்?"

"உனக்கு பதிலாக அவனுக்கு வேறொருவரை நியமித்து விடுவோம். உங்கள் இரண்டு பேரில் ஒருவர்தாம் இருக்க முடியும். அல்லது அவனைக் கொன்று விட வேண்டும்."

"உன்னால் அவனைக் கொல்லவும் முடியாது. வேறு நிழலும் உபரியாகக் கிடையாது."

கடவுள் ஒன்றும் பதில் சொல்லவில்லை.

இன்னொரு நாழிகை இரண்டு பேரும் பேசாமல் இருந்தனர்.

"சரி. நான் தோற்று விட்டேன். நீ திரும்பிப் போ." என்றது கடவுள்.

நிழல் எதுவும் பேசாமல் தொடர்ந்து நடந்து கொண்டிருந்தது.

கெவின் பீட்டர்சனின் இரண்டாவது பிரளயம்

2008-07-30T00:17:00.002+01:00

"என்ன டென்ஷனை ரிலாக்ஸ் பண்ண கிரிக்கெட் ஆட வந்துட்டியா?" என்றான் ராவணன். அவனது அப்பா ஒரு தீக்கா.

கேமைப் பாஸ் செய்துவிட்டுத் திரும்பினான் சிவா.

"ஆமாண்டா! கௌன்சில் டைரக்டர் விஷ்ணு புராஜெக்ட் ஆர்க்-குக்கு எதிர்ப்பா இருக்காருன்னு தெரியும். ஆனா அதை ஸ்க்ராப் பண்ண ரெக்கமன்ட் பண்ணுற அளவுக்கு போவாருன்னு எதிர்பார்க்கலை."

"என்ன காரணம் சொல்லுறாங்க?"

"இன்னும் நடைமுறைக்கே வராத ரூல்ஸ் எல்லாம் பேசறாங்க. எதிக்ஸ் நிர்ணயக் கமிட்டீ இன்னும் அன்-எதிகல் இன்ட்ரூஷன்ஸ் பத்தி முடிவே எடுக்கலை. ஆனா புராஜெக்ட் ஆர்க் அன்-எதிகல் இன்ட்ரூஷனை சப்போர்ட் பண்ணுதுன்னு ஆர்க்யு பண்ணறார். அது எதிகல் இன்ட்ரூஷன்ஸ் பாலிசி டிசைட் பண்ணதுக்கு அப்புறம் எடுக்க வேண்டிய முடிவு. அந்த பாலிசி இன்னும் குறைந்தது 10 வருஷத்துக்கு முடிவாகாது. அதற்கு மேலேயும் ஆகலாம்."

"ஆமாம்... அவரும் கப்பலோட்டியும் சேர்ந்து இந்த மாதிரி புராஜெக்ட் எதையுமே விடமாட்டேங்குறாங்க" - கப்பலோட்டி விஷ்ணுவுக்கு நேர் கீழ் வேலை செய்யும் ஒரு விஞ்ஞானியின் காரணப் பெயர். "சரி. சீக்கிரம் ஆட்டையை முடிச்சுட்டு வீட்டுக்குப்போ. இந்த மாதிரி கிரிக்கெட்டே ஆடிக்கிட்டு இருந்தா பரமு நோட்டீஸ் அனுப்பிடுவா."

"இன்னியோட டென்ஷனெல்லாம் ஒழிஞ்சது. நோ புராஜக்ட் ஆர்க் - நோ டென்ஷன். இன்னிக்குதான் லாஸ்ட் கேம். இங்கிலாந்தை மட்டும்தான் வின் பண்ண வேண்டியது பாக்கி. முடியவே இல்லை. இன்னிக்கு முடிஞ்சதுன்னா முடிஞ்சது. இன்னும் நாலு ஓவர்தான். தே ஆர் சேசிங்."

"ஒக்கேடா. நான் கெளம்புறேன். நீ இந்த பழைய வெர்ஷன் கேமையே கட்டிக்கிட்டு அழு."

ராவணன் கிளம்பிவிட்டான்.

தானியங்கிக் கதவு தானாக மூடிக்கொள்ளுமுன் சிவா திரும்பி கேட்டான் - "ஏண்டா, இந்த கெவின் பீட்டர்சன் கொஞ்ச நாளாத்தானே ஸ்விட்ச் ஹிட் அடிக்கிறான்? "

ராவணன் போய் விட்டான்.
----------------------------------------------------------------------------------------------------------------------------------------------------------------
"என்ன சிவா, நீதான் பேட்டிங்கா?" கேட்டுக்கொண்டே நுழைந்தான் ராவணன்.

"ஆமாம், இங்கிலாந்து."

"ஏன் நிறுத்தி வச்சுருக்க?"

"நான் நிறுத்தலை. அந்த சிவா ஏதோ இண்டரப்ட் கொடுத்திருக்கான்."

"அதையும் ஏன்னு பாக்க வேண்டியதுதானே?"

"தட் இஸ் அன்-எதிகல்"

"நீ இப்போ பண்ணுவது மட்டும் எதிகலா?"

"இல்லை. அதைப் பண்ணினேன்னா ஈசியா மாட்டிக்குவேன். அன்-எதிகல் இன்ட்ரூஷனை முடிவு பண்ணாலும், அவங்க இன்னும் பாரல்லல் யுனிவர்ஸ் இல்லைன்னு கன்பர்ம் பண்ணலை. அதுவரை இதெல்லாம் இன்ட்ரூஷன் செக் அப்படின்னு சொல்லி தப்பிச்சுக்கலாம்."

"நீ இன்னும் அவங்க சிமிலர் யுனிவர்சுங்கறதை ரிப்போர்ட் பண்ணலையா?"

"இல்லை. இன்னும் சில ஆட்டங்கள் பாக்கி இருக்கு. அவங்க இது வரை ஒரு பிரளயம் மட்டுமே சந்திச்சு இருக்காங்க. நாம ரெண்டு. அவங்க மூலமா நமது இரண்டாவது பிரளயத்துக்கு முன்பான யுனிவர்சை ஸ்டடி பண்ண போறேன்."

"பட், அவங்க சிமிலர் யுனிவர்ஸ் தானே; பாரல்லல் யுனிவர்ஸ் கிடையாதே. நம்ம மாதிரியே எவால்வ் ஆகலையே?"

"ஆமாம், ஆனா கொஞ்சம் கண்ட்ரோல் பண்ணி நமக்கு ரிசோர்ஸ் சப்ளையரா மாத்தலாமான்னு பாக்கறேன். ஒரு கல்லுல பல மாங்காய்."

"டேய் சிவா, இது இன்னொரு பிரளயத்திலதான் போய் முடியும்."

சிவா சிரித்தான்.

"என்னமோ போ. அங்க பாரு - அவன் திரும்ப ஆட ஆரம்பிச்சுட்டான்."

சிவா திரும்பி சரியான லைன் அண்ட் லெங்க்த்-தில் வந்த பாலை ஸ்விட்ச் ஹிட் அடித்து சிக்சர் ஆக்கினான்.

"டேய் சிவா, இது தப்பு. வேற என்ன வேண்டுமானாலும் பண்ணு. ஆனா, அந்த சிவாவுக்கு நம்ம யுனிவர்ஸ் பத்தி க்ளு கொடுக்காத. நீ அவன் கன்ஸோலைக் கண்ட்ரோல் பண்றது அவனுக்குத் தெரிஞ்சா முடிஞ்சது. இந்த ஸ்டைல்ல பீட்டர்சன் இப்பதான் ஆடுறான். நீ ரெண்டு வருஷத்துக்கு முன்ன வந்த கேமுல இத யூஸ் பண்ணுற. அவனும் நீதான்."

"அவனை இந்த முறையும் ஜெயிக்க விடமாட்டேன். என்னோட பேசிக்கிட்டு இருக்கறதா விட்டுட்டு உன்னோட ராவணன் என்ன பண்ணுறான்னு பாரு. போ!."

"நாசமாப் போ. நாளைக்கு கமிட்டீல எதுவும் பிரச்னைன்னா நான் கூட நிக்க மாட்டேன். நீ இந்த மாதிரி இருக்கறதாலதான் பரமு கூட உன்னை விட்டுப் போய்ட்டா!".
-------------------------------------------------------------------------------------------------------------------------------------------------------
"இல்ல ராவி. ரெண்டாவது சிவா பண்ணுறது தப்பு. அவன் மொதல்ல இன்னொரு யுனிவர்ச இன்ட்ரூட் பண்ணுறது தப்பு. ரெண்டாவது க்ளு கொடுக்கறது"

"ஆனா அவங்க ரூல்ஸ் அவனுக்கு சாதகமாத்தானே இருக்கு."

"இந்த மாதிரி பேசிப் பேசித்தான் நாம ஏகப்பட்ட பிரளயங்களை சந்திச்சாச்சு. நம்மோட எத்தனைப் பிரளயங்களுக்கு இந்த மாதிரி யுனிவர்ஸ் இன்ட்ரூஷன்ஸ் காரணமா இருந்திருக்கு."

"என்ன பண்ண போற?"

"ரெண்டு பேர்ல யாராவது ஒருத்தரை டெர்மினெட் பண்ணப் போறேன்."

"யாரை?" என்றான் ராவணன்.

"மீதி இருக்கும் ரெண்டு ஓவர் முடியட்டும். யார் தோக்குறானோ அவனை."
------------------------------------------------------------------------------------------------------------------------------------------------------------
இங்கிலாந்து இன்னும் மூன்று பந்துகளில் 8 ரன்கள் எடுக்க வேண்டும். அகர்கர் பௌலிங். சிவா கேமைப் பாஸ் செய்து விட்டு சிணுங்கிய செல்லை எடுத்தான்.
"தோ கெளம்பிட்டேன் பரமு. இன்னும் மூணே பால்தான். இதுதான் வாழ்க்கையில ஆடுற கடைசி கேம்."
விஷ்ணு தனது மானிட்டரில் இருந்து தலையைத் திருப்பி சொன்னார் - "நோவா - சிவாவோட கன்ஸோலை ஹாங் பண்ணு."
---------------------------------------------------------------------------------------------------------------------------------------------------------------

தமிழ் சினிமாவின் லேட்டஸ்ட் க்ளிஷேக்கள்

2008-07-20T06:58:00.002+01:00

1. அமெரிக்காவிலிருந்து வந்து ஹீரோவிடம் க்ளைமாக்சில் கதாநாயகியை பறிகொடுக்கும் மீசை இல்லாத சுயநலக்கார சாப்ட்வேர் எஞ்சினியர்

2. கதாநாயகி தனியாக இயற்கையை ரசித்துப் பாடுவது

3. கதாநாயகன் இரட்டை வேடம் போடுவது

4. அதிகமாகப் பேசும் குழந்தைகள்

5. வில்லன் நிராயுதபாணியாகிவிட்டபோது ஹீரோவும் தனது ஆயுதங்களை தூக்கி எறிந்துவிட்டு சண்டை போடுவது

6. க்ளைமாக்சில் கட்டாயம் சண்டைக் காட்சி வைப்பது (இது இல்லாத படங்களே இல்லை)

7. பொறுக்கி ஹீரோவைத் துரத்திக் காதலிக்கும் பெண்கள்

8. விவேக்

நீ நான் மற்றும் உன் தந்தை

2008-07-19T23:43:00.000+01:00

வயிற்றினை ஆரத் தழுவி
தூங்காமல் என் முகத்தினைப்
பார்த்துக் கொண்டிருக்கும்போது,

நான் அலுவலகத்திலிருந்து
வீட்டை அடைகையில் என்
கால்களைக் கட்டிக் கொண்டபோது,

நீ முதன் முறையாக
நிற்க முயற்சிக்கையில்
நழுவி விழுந்தபோது,

கடுமையான காய்ச்சலிலும்
வெடித்துக் காய்த்திருந்த
இதழ் பிரித்து நீ சோகையாய்
புன்னகைத்த போதும்,

என் கால்களிலிருந்து
உன் கால்களைப் பிரித்துவிட்டு
இவ்வரிகளை எழுதும்போதும்

ஆகிய இத்தருணங்களில் தானேயன்றி
உன்னை ஈன்ற பொழுதினிற்
அல்ல மகவே - எனை
நான் தந்தையாக உணர்ந்தது.

தமிழ்மணத்தில் ஹிட்டாவது எப்படி?

2008-07-19T13:14:00.002+01:00

இந்தப் பதிவு எழுதுவதினால் புதியவர்கள் என்னை ஏதோ மூத்தப் பதிவர் என்றோ நிறைய சூடான இடுகைப் பதிவுகள் எழுதியிருப்பேன் என்றோ நினைத்துக்கொள்ள வேண்டாம். இதைப் படிக்கும் ஒரு சிலரைவிட நான் தமிழ்மணத்துக்கு சுமார் ஒரு ஒன்றரை மாதம் பழையவன். கடந்த ஒன்றரை மாதங்கள் தமிழ்மணத்தை விடாது கவனித்ததில் புரிந்த (அல்லது இன்னமும் புரியாத) சில விஷயங்கள் இவை.

இனி, எப்படி தமிழ்மணத்தில் ஹிட்டாவது எனப் பார்ப்போம்.

1. அவ்வப்போது வரும் (அல்லது வரப் போகும்) கமல் மற்றும் ரஜினி படங்களைப்பற்றி ஏதாவது எழுதலாம். குறிப்பு: என்ன வேண்டுமானாலும் எழுதலாம். 'கமல்ஒரு பார்ப்பனத் தீவிரவாதி' அல்லது 'ரஜினி ஒரு கன்னட வெறியன்' - இப்படி. குறைந்தது ஒரு 1000 ஹிட்டுகளும் 15 மறுமொழிகளும் கிடைக்கும். (மிதமானகெட்ட வார்த்தைகளைப் பயன்படுத்த தயங்க வேண்டாம். கட்டுடைத்தல், பின்நவீனத்துவம் அல்லது குறைந்தபட்சம் நேர்மை என்று சொல்லி தப்பித்துக்கொள்ளலாம்.)

2. சீசனுக்கு தகுந்த ஹிட் படங்களுக்கு முதல் 10 விமர்சனங்களுக்குள் ஒன்றுஎழுதிவிட வேண்டும். நடுநிலையோடோ அல்லது politically correct-ஆகவோ விமர்சனம் எழுதினால் ஹிட் ஆகாது - ஒன்னு பயங்கர negative-ஆ இருக்கனும். அல்லது ஓரேதிரியா தூக்கி வச்சுட்டு ஆடனும். ரொம்ப ஆடினால் தூக்கிடுவாங்க. ஆனால் கவலை இல்லை - வேறு பெயரில் வந்து இருப்பவர்களைக் கலாய்த்துக்கொண்டிருக்கலாம்.

3. ஒரு சிண்டிகேட் அமைத்துக்கொள்ள வேண்டும் - தெரிந்த மற்றும் தெரியாத நண்பர்களுடன். இந்த குழுவுக்குள் யார் பதிவிட்டாலும் 'Me the first' ... 'Me the eleventh' என்று சும்மா மொக்கை பின்னூட்டங்கள் இடலாம். மறுமொழி திரட்டிமூலம் அதிக visibility கிடைக்கும்.

4. இரண்டு அல்லது மூன்று ஐடி-கள் வைத்தக் கொண்டால் அதை use பண்ணி பின்னூட்டம் மட்டும் இட்டுக் கொண்டிருக்கலாம். சோம்பேறிகள் அனானி-ஐ மட்டும் பயன்படுத்திக் கொள்ளலாம்.

5. கடவுள், சோதிடம், பகுத்தறிவு, பின் நவீனத்துவம், SCI-FI, கமல், ரஜினி, சாரு, ஆவி, ஞானி, குமுதம் மற்றும் மொக்கை போன்றவை சமீபத்திய டிரென்டுகள். ஜெமோ மற்றும் சுஜாதா ரேட்டிங்-ல் சறுக்கிக் கொண்டு இருக்கிறார்கள். மொக்கை எப்போதும் போடலாம். மற்ற option-களுக்கு இரு பக்கமும் அடி வாங்கவேண்டி வரும். மறந்தே விட்டேன் - தமிழ்மணத்தை திட்டுவது. இதுதான் hottest இப்போ.

6. இந்தப் பதிவு மறுமொழிகளிலோ அல்லது சூடான இடுகைகளிலோவரவில்லை எனில் இந்த மாதிரி பதிவு இன்னொன்று போடலாம் - இந்ததலைப்பில் இது கடந்த ஒன்றரை மாதத்தில் மூன்றாவதோ நான்காவதோ.

டிஸ்கி: இந்தப் பதிவு ஹிட்டாகவில்லை என்றால் எல்லாவற்றையும் மறந்துவிடவும். Option 6-ஐ செயல் படுத்தவும்.

கல்லறைத் தோட்டம்

2008-07-19T13:10:00.002+01:00

என் ஜன்னலுக்கு வெளியே
ஒரு கல்லறைத் தோட்டமும்
சில கல்லறைகளும்!

வரிசையாய்
வசதிக்கேற்ற வேலைப்பாடுகளுடன்
இறப்பிலும் ஒழுங்கை
மீறாத நடுகற்கள் மௌனமாக!

வசந்தகாலம் இறக்க
நாட்களிருப்பதனால்
இன்னமும் பசும்பச்சையை
இழக்காத மரங்கள்!

மறக்க முடியாத தன்
துணையை நினைத்துக் கொண்டு
ஒரு முதியவர்!

வருடம் முழுதும் இரங்கல்
பாடும் மழை அன்று
மெதுவாகத் தூறிக் கொண்டிருந்தது!

வேறென்ன வேண்டும் - நம்
சம்பந்தமுடையவர் எவரும்
அங்கிலாது போது
ஒரு கல்லறையை ரசிப்பதற்கு!

தசாவதாரத்தை விஞ்சுமா குசேலன்?

2008-07-05T11:10:00.001+01:00

தசாவதாரத்தின் வசூல் புதிய உயரங்களைத் தொட்டுள்ளது. ஜூன் 29 வரை மட்டும், தசாவதாரத்தின் அமெரிக்க வசூல் ரூ. 65 கோடி (சந்தேகம் இருப்பவர்கள் http://www.boxofficemojo.com/intl/weekend/?yr=2008&wk=26&p=.htm-ஐ பார்த்துக் கொள்ளவும்). சிவாஜியின் மொத்த அமெரிக்க வசூல் ரூ. 25 கோடி. இது வரை தசாவதாரம் சிவாஜி-ஐ விட ஏறக்குறைய இரண்டரை மடங்கு அதிகமாக சம்பாதித்துள்ளது. மற்ற box office-களிலும் பெரிதாக வேறுபாடு இருக்காது என்றே நம்புகின்றேன். நிற்க.
பொதுவாக ஊடகங்கள் குசேலன் வசூலில் தசாவதாரத்தை விஞ்சிவிடும் என்ற ஒரு எதிர்பார்ப்பை உண்டாக்கி உள்ளன. எனக்கு என்னவோ இது வழக்கமாக ரஜினி படங்கள் கமல் படங்களை வசூலில் வெற்றி கொள்வதை மனதிற் கொள்ளப்பட்டு வடிவம் கொடுக்கப்பட்ட செய்தியாகத் தெரிகின்றது. தசாவதாரத்தின் வசூல் ஆஸ்கார் இரவிச்சந்திரன் சொல்வது போலவும், மேற்கண்ட ரெக்கார்டுகள் சொல்வது போலவும் ரூ. 200 முதல் ரூ. 300 கோடி வரை இருக்க வாய்ப்புகள் உள்ளன. இது தமிழ் படங்களின் புதிய வணிக உத்திகளும், கமலின் மற்ற மொழி (தெலுங்கு, மலையாளம், கன்னடம் மற்றும் இந்தி) இரசிகர்களும் தந்த வெற்றி. இந்த படத்தின் மூலம் கமல் தன்னால் சம்பாதிக்க முடியும் அதிக பட்ச வசூலைப் பெற்றிருப்பதாகத் தோன்றுகிறது (இன்னும் கொஞ்சம் technical-ஆக நன்றாக இருந்திருந்தால் இன்னும் கொஞ்சம் மற்ற மொழி இரசிகர்களையும் இழுத்திருக்க முடியும்).
இனி வரும் கமல் படங்கள் தசாவதாரத்தை விடப் பெரிதாக மாறுபட்ட வசூலைத் தர வாய்ப்பில்லை என்றே நினைக்கின்றேன். அது போலவே ரஜினி படங்களும் சிவாஜி-ஐ விடப் பெரிதாக வசூலிக்க வாய்ப்பில்லை. ரஜினியின் ரோபோ வேண்டுமானால் சிவாஜி-ஐ விட சற்று அதிகமாக வசூல் செய்ய வாய்ப்பு இருக்கிறது. குசேலன் ரஜினி படமே இல்லை - பசுபதி படம். தமிழ் நாட்டில் ரஜினி சொன்ன மாதிரி அவருடைய 25%-க்காக சிவாஜியின் 100% வசூல் கிடைத்தாலும், மற்ற இடங்களில் ரஜினி கௌரவத் தோற்றமாகவேக் கருதப்படுவார். இன்றைய தமிழ் சினிமா வணிகம் தமிழ் நாடு / இந்தியா அல்லாத box-office-களையும் நம்பி இருப்பதால் குசேலன் சிவாஜியின் உயரங்களைத் தொடுவதே கடினம் என நினைக்கின்றேன். நிற்க-2.
தசாவதாரம் கமலின் உயரமாகவும் சிவாஜி ரஜினியின் உயரமாகவும் உள்ள நிலையில் புதிதாக ஏதேனும் வணிக உத்திகள் இல்லாவிடின், கமல் ரஜினியை விட உயரமாகவேத் தோன்றுகிறது. கமலால் மர்ம யோகியையும் இன்னொரு தசாவதாரமாக மாற்றமுடிந்தால் தசாவதாரம் தொடங்கி வைத்துள்ள அடுத்த கட்ட கமல்-ரஜினி வசூல் போட்டியில், ரஜினி சிவாஜி வரை கொண்டிருந்த முதலிடம் தொடருமா என்பது சந்தேகமே.

நாளை முதல் நட்பு

2008-06-28T21:11:00.000+01:00

பக்கத்து இருக்கையில்
எப்போதும் உட்காருதல்,
தோளோடு சாய்ந்து
காதோடு கிசுகிசுத்தல்,
என் சட்டைப்பை பேனாவை
என்னை கேட்காது எடுத்தல்,
நான் வரும் முன்னே வரும்
பேருந்துகளை தவிர்த்தல்

ஆக பல இன்னபிறவற்றையும்
எங்களூரில் காதல் என்பர்!

எனக்கும் அதுவும்
அது அல்லாத சிலதும்தான்
பழக்கமானது!

நீ நினைக்கின்றபடி
நட்பு வேண்டுமெனில்
குறைந்த பட்சம்
நாளைமுதல் நீ
முழுக்காற் சட்டையும்
கழுத்து மட்டும் தெரியும்
முழுக்கைச் சட்டையும்
அணியப் பழகு.

வடக்கு நோக்க...

2008-06-28T14:10:00.000+01:00

முப்பதுகளின் இறுதியில் வயது -
கோப்பெருஞ்சோழனை பேருந்துக்கு
காத்திருக்கும் நிமிடங்களில் பரிச்சயம்.

அதிகம் பேசியது இல்லை - ஹலோவில்
ஆரம்பித்து குட் மார்னிங்கிலேயே
முடிந்து விடும் சம்பாஷணைகள்.

மூன்று வாரங்களாக ஆளையேக் காணவில்லை -
விடுமுறையை ஸ்பெயினில்
கழித்துக் கொண்டிருக்கலாம்.
விவாகரத்து ஆனதால்
சோகமாகக்குடித்து கொண்டிருக்கலாம்.
ஒப்பந்தம் முடிந்து வேறிடம் கூடபோயிருக்கலாம்.

எதுவோ காரணம் - ஆனால்
மூன்று வாரங்களாக ஆளைக் காணவில்லை.

அலுவலகம் செல்லும் முன்பு
செலவு செய்து கொண்டிருந்த
ஒரே ஹலோ குட் மார்னிங்-ஐயும்
சேமித்துக் கொண்டிருக்கிறேன்.

வடக்கு எதுவென்று தெரியாததாலும்,
பசி தாங்க முடியாததாலும்
கோப்பெருஞ்சோழன்
மகிழ்ச்சியோ துக்கமோ மீண்டு வர வேண்டிக்கொண்டு
பிசிராந்தையாக நான்!

அழகு

2008-06-28T14:08:00.000+01:00

எனக்கு முன்பே
இரு இருக்கைகள் தள்ளி
ஒரு இளம்பெண்.

இலேசாக வாரிய சிகையலங்காரம்
எளிமையான காதணிகள்
சராசரியான மேலாடை.

முகத்தைப் பார்க்கவில்லை என்றாலும் கூட
அழகாகத்தான் இருக்க வேண்டும்.

ஒரே ஒரு கவலை -
எனது நிறுத்தத்துக்கு முன்பே
இறங்கி விட கூடாது.

இருக்கை

2008-06-28T14:06:00.000+01:00

முதலில் ஒரே ஒரு
இளம்பெண்.
கண்டிப்பாக உட்கார மாட்டாள்.
ஆமாம், இல்லை.
அடுத்த நிறுத்தத்தில்
பார்ப்போம்.

சில பள்ளி செல்லும்
அல்லது செல்லாத
பதின்பருவ பொறுக்கிகள்.
கட்டாயம் கடைசி இருக்கைதான்.
ஆமாம்.
அடுத்த நிறுத்தத்தில்
பார்ப்போம்.

ஆ, சில இளம்பெண்களுடன்
சில முதியவர்கள்.
சில முதியவர்கள் உட்கார
வாய்ப்பிருக்கிறது.
ஆனால், இல்லை.
அடுத்த நிறுத்தத்தில்
பார்ப்போம்.

சில அலுவலர்கள்.
பார்ப்பது ஆபீஸ் பாய்
வேலை என்றாலும்
கோட்டுக்கு ஒன்றும்
குறைச்சலில்லை.
இவர்களிலும் எவரும்
உட்காரவில்லை.
அடுத்த நிறுத்தத்திலாவது
பார்ப்போம்.

ம்ஹூம்... வாய்ப்பே இல்லை.

இப்படியாக அலுவலகத்தை
அடைந்தேன்.
எனது பக்கத்து இருக்கை
மட்டும் காலியாகவே.

அழகி

2008-06-22T11:37:00.004+01:00

உன்னிடம் எந்த மடையனாவது
நீ அழகாக இல்லை என்று
சொல்லி இருக்கிறானா?

யாராவது உன்னைக்
கவனிக்காமல்
நடந்து இருக்கிறார்களா?

உனக்காக வழி விடாத
காட்டு மிராண்டிகள்
எவரேனும் உண்டா?

இவற்றில் ஏதேனும்
சமீபத்தில் நடந்திருந்தால்
அதற்காக வருத்தப்பட்டு கொண்டு
திங்கட் கிழமை
பஸ் பாஸை ரிநீயு செய்ய
மறந்து விடாதே.