Tierra de barrenaus

Bistius

2009-07-16T06:46:00.004Z

Bi ha debatz que surten de cabo ta cuan y que nunca no parix que baigan a rematar-se u a resolber-se de bella traza. Un d'istos ye o de como bestir-se en os puestos, rebilcau fa poco por Bono, qui, antiparti d'estar un radical nazionalcatolizista, parix que tamién ye en contra de que as treballadoras puedan fer o treballo suyo de trazas comodas.

Fa tiempos ya fazió a tana a un diputau obligando-le a meter-se truqueta. De todas ye conoixiu que sin truqueta no puetz estar esleixiu ta estar diputau ni prou que eixerzer-ne. Como ba a pensar dengun sin truqueta! Cuento que muitas pensoron en as añadas 60-70 que en 2010 a truqueta sería acotolada de tot, en estar una prenda de tot inutil amén d'incomoda. Guarda si yeran entibocadas t'a part d'alabez que encara se fa obligatoria (por achuste u por presión sozial) en muitismos puestos y treballos.

Agora Bono ha enrestiu contra que os treballadors d'o congreso español baigan con balons curtos u abarcas t'o treballo. Ye millor que, por ixas (de seguras que fresquimas) carreras de Madrid, se cuezan d'a calor. Qué ye ixo d'estar comoda!!!

Publicoron fa poco en El Periodico de Aragón (edizión papel, en a dichital no la i he trobada) una carata d'una muller que aplaudiba a carrañada de Bono y tornada a dezir tot ixo de que se yera trafucando libertat y libertinache. Ai, mama mía! En istas añadas y que encara bi aiga chent con ixos esquemas mentals...

Ampraus 028

2009-07-10T06:58:00.007Z

O millor d’a semana muere güe, dixando paso a Ampraus. Asobent no ye estau lo millor y bellas begadas nian ye estau d’a semana, asinas que, cuento que ye millor ixublidar-lo. Con tot y con ixo, como me fa goi, y ye bien fazil, de penchar articlos publicaus por otri, continaré con ixa dinamica. Agora será atemporal, pues no quiero obligar-me a cosa y menos de berano, que no feré que treballar, zorriar y trobar a faltar a Arale.

Arroba: L’articlo de Purnas sobre l’arroba me fazió muito goi en leyer-lo. Ye bien curioso y contrimuestra muitas cosas sobre os treballos d’istoriador y de periodista. Antimás he teniu eco dillá fablogilandia, lo que ye bien difizil. Norabuena, Chorche!

Botellada: Muitas begadas he pensau d’escribir sobre as botelladas. Mesmo puestar que lo aiga feito y no lo remere agora mesmo. Tamién sobre a parola botellada, que a tele española nos furtó. O caso ye que en La Enredadera lo han feito ya y muito millor que no ese puesto fer-lo yo. Un articlo repincho!

Nombrar en femenino: Fa bels diyas escribiba sobre fer serbir o femenino chenerico y o luengache masclista. En Tiempos de Desidias tamién i escriben y bi penchan un d’ixos correus que nos imbían de cabo ta cuan chent creyendo que nos ferá grazia. Por mensaches como ixe me he pasau a lo femenino...

Mularroya: Isto sí que estió lo millor d’a semana. Pencho lo binclo t’o blog de SOA-STA, pero cuento que ya abretz leyiu un d’o ziento d’articlos que s’han publicau sobre Mularroya. Que no tos etz enterau? Jibo! Aón bibitz?

Prou de tortura: Entre que belunas torturan animals en Iruña, atros preban d’esfender os dreitos suyos. Como no, en Catalunya, un d’os puestos más zibilizaus en iste tema. Cuanto nos cal aprender! Cal dezir que ye curioso (de bez que penible) as trestalladas que fan istos afers. Lo contrimuestra o feito que PSC, ERC y CiU aigan dau libertat de boto a los cargos suyos. Ixo no se fa guaire asobent. Ya sabetz que lo de los partius y a libertat no ba guaire en chunto...

Iste ye un binclo ta unatro bideo de lemurs que, no se porqué no me dixa embedear-lo...

http://www.youtube.com/watch?v=0CTgEP0SIVg

Cambeos

2009-07-10T06:21:00.008Z

Bi'n ha d'estrapaluzio cada begada que bella cosa cambea! Mesmo con dizir a escuchetes a belún que has pensau que cualcosa abría d'estar d'atra traza, ascape surten alparzeyos por totz os cabos y as rumors s'estendillan igual como o fuego por a gasolina. De camín surten tamién as creticas y as que refirman l'esbielle. Qui quieren que tot contine igual como d'antis y qui quieren refer-lo tot... D'eixemplos bi'n ha buen fascal. Bels cambeos de regles, han feito tremolar a Formula 1 fa poco. Un campionato de bien d'años, con asabelo de tradizión ye estau en momentos de rematar-se por un cambeo de regles. Os cambeos, tamién de regles en Magic, son probocando encara un tierratremo en l'uniberso magiquero. Bi'n ha que dizen que se remató Magic. Atras aucan con firme rudio os cambeos, asperando puyals de nuebas chobenas que enzeten "l'abentura de Magic: a Trobada".

Y ta qué imos a charrar de fablilandia. Malas que t'amanas a una be baixa, u calas bella t a la fin d'una parola, belunas pretan a chilar, ixorrontadas por a perda d'a gran tradizión (de menos de cuaranta años, en tot caso) d'a ortografía d'o 87. Qui quieren cambiar-la, d'atra man, parix que prengan bella malotía si escribes "unibersidá" u "autualmén". Como si escribir d'ixa zaborrera traza (en opinión d'otri, no pas yo, que m'importa igual como s'escriba l'aragonés) fuese o pior que le podese pasar a l'aragonés.

Muita d'a chent más mayor d'edat lo leban mesmo pior. Naixión en una España unica baixo lo mando de Franco, an que tot yera como él quereba. Con una tecnolochía cacana y isolaus culturalment d'Europa y d'o mundo. De bote y boleyo, be-te-me que s'han trobau con que muitas personas charraban d'atras trazas que no yeran l'español, que os manfloritas ya no son chent malauda y antimás se pueden casar, que bi ha atras relichions y mesmo chent que no'n tien... y asinas asinas, tot un mundo que, bellas begadas no plegan a entender. Pleno de trastes que fan cosas que nian esen puesto soniar.

Os cambeos, por si mesmos, no son buenos ni malos. Son cambeos. Cal analizar-los y mirar-se d'esmaxinar como será a suya aplicazión y que efectos positibos y negatibos tendrán, antis d'aplicar-los. Si ye posible se pueden prebar mientres bel tiempo y biyer si funzionan. Prou que cal parar cuenta d'ixa mazada que diz (en castellano) que os experimentos en casa y con augua de foraus.

Ta mosicar a dentrada, tos pencho un bideo de David Bowie de cuan más molaba.

Nombrar en femenino

2009-07-08T06:37:00.005Z

O luengache ye masclista. Sí, ye asinas. Si o masculino ye o chenero neutro ofizial en castellan (y en aragonés) dudo muito que sía simplament porque caleba eslexir-ne uno y salió ixe. En primeras, y fa muito tiempo, me parixeba un debat un poquet jauto. Ta yo os ombres y as mullers siempre somos estaus iguals ta tot y creigo que, alto u baixo, siempre he tratau a totz igual. A tamás, u chusto por aber estudiau a E.Ch.B en una escuela nomás ta ninos, malas que'n salié fazié muitismas más amigas que no amigos y, siempre goso fer más pacha con ellas que no con els. Odio fundament "a morfuga machota" que gosa aber-ie en os treballos u en que se chuntan cuatro masclos "d'os d'antismas", como ya he dito bella begada.

Pero o tema ye o luengache. Creyeba que importaba igual fer serbir un chenero que no atro ta charrar. Que en istos diyas, fueras d'os cuatro fachas de siempre, a chent entendeba ixo. Como siempre, o mundo reyal me torna t'a reyalidat. En un d'os míos treballos se suposa que somos chent alto u baixo conzienziada con seguntes que cosas. Entre atras, a situazión d'a muller en os países en desembolique. Una d'as personas gosa contar de cabo ta cuan cuantas mullers y ombres somos ta poder referir-se a nusatras en femenino. Como demandando permiso. Si bi ha más mullers, nos nombra en femenino y sino, en masculino. Ixo cuan lo remera, que por un regular fa serbir o chenero masculino. Goso dizir-le que, a ixos efectos y tamién a atros, me considere muller, por diferents custions. Simplament considerar fer serbir o chenero femenino como chenerico parix que ya ye masiau reboluzionario, pues be-te-me que bels d'os treballadors ascape se metioron nierbudos y pretón a dezir que ixo yera una animalada pos a RAE deziba no se qué, que toda la bida s'eba dito tal y que mira-te tú. Encara no han dito a fatera ixa de "yo no soi ni masclista ni feminista" (una d'as faboritas d'Arale y mías) pero bel diya cuento que lo ferán. Prou que, a debandita treballadora nunca no cuenta si bi ha más ombres que muller cuan nos charra en masculino. Y como que me parix tan penible que bi aiga encara chent choben suposadament conzienziada y tot ixo que le faiga tanto miedo que se faiga serbir o chenero femenino ta charrar de todas nusatras, iste ye o zaguer articlo que escribo en masculino. Son muitas añadas charrando en masculino, asinas que regular que bel masculino calaré. Cuento que dengún no se'n alticamará y me sincusaretz por ixo.Si encara bi ha chent xorrontada porque digamos nusatras en cuenta de nusatros, prou que ye menister nombrar en femenino...

Toda la bida

2009-07-08T06:32:00.002Z

Un chiquet articlo adedico a tres parolas que odio: "Toda la bida...". Cuan una frase prenzipia asinas, ascape preto a tremolar. Por un regular qui la gomeca contina con bella faixistada u barbaridat. Atras begadas ye simplament ignoranzia, conserbadurismo, inmobilismo u simpla medrana a las cosas nuebas. A ilesia, u as ilesias, si tos n'estimatz más, les fa bien de goi ixas trazas de pensar. Custinar-lo tot de contino ye de royos, diaples y/u zientificos. Como cuasi tot, cal fer traduczión. Por un regular "Toda la bida X" gosa significar "No he conoixiu atra reyalidat que la que boi a esfender contino, soi feito a ixa reyalidat y no pienso fer mica poder por entender cualsiquier atra cosa que no sía ista". Encara que ye más cutiano en o güelament y en a chent de dreitas, a chobenalla y a chent de cuchas tamién sufren en buena mida ista pasa. Ta prenzipiar abríamos de sustituyir "Toda la bida" por "Toda la mía bida en os puestos an que he bibiu" y, con tot y con ixo, prebablement seríanos entibocaus. Contino pencho belunas d'as "toda la bida" que más a sobent he sentiu:

- Aquí toda la bida, s'ha charrau castellano.

- L'aragonés s'ha escrito (de tal traza)toda la bida.

- Toda la bida un matrimonio ye estau un ombre y una muller.

- Toda la bida bi ha abiu toros en [poblazión].

- Iste costumbre s'ha feito toda la bida.

- Isto s'ha feito asinas toda la bida.

Planning de berano

2009-06-28T15:29:00.003Z

L'atro diya un lector cutiano d'iste blog me dizió que ya no meteba todas as combocatorias borineras que gosaba de meter antismás y que, alabez, no s'enteraba de bellas cosetas. Asinas que, d'una bez, prebaré de meter tot lo bueno que tenemos iste berano, que no ye poco. De feito, ba a estar un gran berano.

A primer semana prenzipamos con o PIR, o festibal folk d'os Pirineus que podetz biyer o suyo programa aqui. Estiaño se ferá en Aragüés y Jasa, que ta yo ye o millor puesto ta fer-lo con totz os respetos t'Ansó y Echo. O programa ye mesmo pior que atros años, pero si ise t'o PIR por o programa suyo fería años que no i ese tornau.

A l'atra semana, prenzipiaremos a aber d'eslexir. D'una man, as fiestas teruelanas, que estiaño plegan con a polemica d'a mosica d'as barras en a carrera. D'atra un d'os conziertos d'o festibal d'o castiello de L'Aínsa. Tako y Azero, d'entre atros. Si o biernes tos sotz encara en Zaragoza, Jah'sta fa conzierto y si no los podetz biyer ixe diya tamién serán en o Pirineos Sur o 17 de Chulio.

Si tenetz prou rasmia, podetz prebar, en a terzer semana de Chulio, de fer l'animalada que teneba pensada yo. (A la fin no la feré por diferents custions). A ideya yera d'ir ta l'Aínsa o diya 17, an que bi ha un conziertazo de Macaco y Lamatumbá entre atros. (Qui no conoixcaz a Lamatumba charré d'els en iste articlo de fa bels meses.) Y prou que o sabado 18 cal estar en Artieda. Qui remeretz o festibal que fazió Chobenalla fa bels años en iste mesmo lugar, remeraretz una d'as más grans borinas feitas en iste país. Preixinatz que se ferá en ista edizión. Tot ba a millor, asperemos. Y m'ha dito un muixonet que tendremos un puesto dezent an que dormir.

..
A l'atra semana, o cabo de semana d'o 24-25 de Chulio podemos rematar o mes en l'Ariza Folk Festibal. As collas que i tañerán encara no son anunziadas, pero por lo que he sentiu bi irá o millor d'o millor. Continatz a la tisba que bi abrá muito más que no folk. Si no tos fa goi, iste cabo de semana tien un par d'alternatibas repinchas. Tres festibals, tres, s'han chuntau en un cabo de semana. Os que fan a competenzia a Ariza Folk ya tienen bels años de tradizión y son o Carrasca Rock d'Exulbe (Redolada d'Andorra - Sierra d'Arcos) y Lagatavajunto. Totz dos sobrebuens festibals que me fa duelo de perder-me.Con isto ya emos pasau tot lo mes de Chulio. Tamién se ferán bellas cosetas en Zaragoza y remeratz que si queretz que faiga publizidat de bella combocatoria podetz escribir a tierradebarrenaus@gmail.com.

O plan E y o parque Bruil

2009-06-28T15:24:00.002Z

O que ye pasando con o parque Bruil ye un eixemplo bien platero de como no se han de fer as cosas. Un eixemplo d'a manca de razionalidat d'o capitalismo. Debán d'a situazión de crisis muistisma chent ye esqueferada. Ye de dar que cal fer bella cosa y, como d'esmaxinazión no les ne sobra a los nuestros politicos, fan d'obra publica a fascals. Ixa ye a soluzión zaborrera d'a sozialdemocrazia. (A sozialdemocrazia ye zaborrera per sé, pero ixe ye unatro debat). Zaborrera, pero a meyo plazo consigue que muita chent contine bosando a ipoteca y minchando mientres bels meses más. Dica astí tot bien. Jusqu'a ici tout va bien, que deziba una zinta sobre un suizida...

Pero be-te-me que como que en Zaragoza no bi ha cosas que apañar, ban y pretan a obrar en o Parque Bruil. Bi ha milenta redoladas estricalladas de tot, plenas d'enronas, mal asfaltadas, casas en momentos d'esboldregar-se... de tot. Pero a bel agudo l'aganau de obrar en o Parque Bruil en o preto d'o berano. Y la rematadera, prenzipian as obras una semana antis d'as fiestas!

Por si tot ixo no estase prou (que'n ye), a informazión t'os bezins y usuarios d'o parque ye cacana, cuan bi'n ha. A la fin, charrin charran con uns y atros, nos emos enterau, si fa u no fa, d'a ideya que leban. Agora caldrá que opinemos y prou que imos a fer-lo. Diz, por eixemplo, que ban a respetar totz os arbols y que no ixarramarán mica. Pero en tasament una semana que leban treballando-ie, han tallau a metat d'as radizes d'un d'os arbols d'a carrera Asalto. Cal remerar que en o parque Bruil bi ha bien d'arbols singulars y de patrimonio natural y cultural que cal que sía proteixiu.Por agora, emos puesto fer-ie a chera, pero nos emos quedau sin parque t'o berano.

Prou que quiero que a chent tienga treballo, pero cal fer as cosas con bella mica d'esmo. Si lo que cal ye simplament achustar chent se puede achustar chent ta no fer cosa. Sino que pregunten en Expoagua que achustó a zientos de pepos (personal polibalent) ta fer gambadas por a Expo. Regular que muitos se ferían firme contentos de treballar peteniando por o parque Bruil. Yo, por eixemplo.

O millor d'a semana 027

2009-06-21T15:54:00.004Z

O bico en fiestas. A la fin son prenzipiadas as fiestas d’a Madalena y parix que se podrá fer a chera de solstizio. Ta qui no lo sepatz, ixo no estió tan platero mientres a semana pasada. En momentos de prenzipiar as fiestas os bezins nos trobemos con o parque meyo cletau. Parti d’ixas cletas yeran chunto a l’espazio an que se ferá a chera. Preguntando a las autoridatz dengún no sabeba dezir-nos cosa segura. De “Parques y Jardines” ta “Servicios Públicos” y d’un cabo t’atro. O caso ye que encara no sabemos guaire bien o qué ferán en o parque. Parix seguro que ban a cambiar a traza de ruxiar-lo y os camins, pero poco más sabemos.
Antiparti d’a manca d’informazión, ye penible que en un parque se faigan obras mientres o berano. Igual como as carreras s’apañan de berano, si cal fer cosa en un parque, que se faiga en nobiembre que dengún no lo fa serbir. A rispuesta ye que as obras se son fendo con diners de o plan E ta creyar treballo y que han d’estar feitas antis d’abiento. Alabez a culpa será d’o conzello que no ha trobau garra atra obra en a ziudat que se pueda fer en berano. Fuens de parques y chardins, como informa Eraldo, mesmo han prebau de fer serbir a solidaridat con os treballadors como arma contra os bezins. Nusatros continaremos achuntando-nos todas as tardis ta reibindicar o parque. Si iste ye o conzepto de partizipazión ziudadana que tiene o conzello imos bien... Por tot isto cal que ista chera de San Chuan sia a rebutir de chent. Antiparti de porque ye una fiesta bien dibertida, porque estiaño cal que se beiga que somos muitos os usuarios d’o parque que queremos continar fendo-lo serbir y que tenemos o dreito d’opinar sobre o qué ferán astí.
Antimás d’iste afer cal remerar que continamos de fiestas dica o domingo benien. O programa lo podetz consultar aquí.

Desde Banarús. Se me adebantó en dos articlos en a mesma semana un bideo de Juan Carlos Moreno Cabrera y bellas fotos sobre as rondas negras italianas. D’o primer poco más que dizir-ne. En fa de goi ascuitar a ixe ombre! Ye tot un argumentario. D’o segundo parix una rispuesta a la pregunta de “La ola”. Isto podría tornar a pasar. Pues sí. Prou que sí. Y cal estar a la tisba pues muitos meyos de comunicazión son refirmando midas parellanas en toda Europa. Nomás cal biyer a cantidat de notizias que cheneran casos tipo Marta del Castillo. Qui no conoixcaz a notizia, aquí tenetz a bersión de Rebelión y de Público.

Biscarrués: Que como bien dizen ye un lugar, no pas un entibo. Continan as mobilizazions contra o entibo. Mientres toda a semana se fan charradas y actos ta informar y ta protestar contra ista sinrazón. O programa y muita más informazión lo podetz leyer en http://www.riogallego.org/.

Magic: Diz que cambiarán os regles con a plegada de M10, a nueba edizión basica. No he puesto leyer os cambios, pero ascuitando o programa de Magic Madrid, no me han feito mica goi. A más gran parti son fateras que no cambiarán guaire o chuego, pero as modificazions en a mecanica d’a fase de combate son penibles. Basicament, se rematón as pirulas tipo Fanatico Mogg u un simple Creiximiento chigant. Muito mal t’os siñors de WotC. Como bien dizen en o debandito programa, si Magic ye masiau difizil ta belún, que no i chugue. Imos ent'a Idiocrazia, remeratz-lo... A dificultat d’os regles y todas as posibilidatz que ixo da, ye una d’as grazias de Magic. Sin ixo o chuego se queda en baco. Asperemos que se lo piensen unatra bez u cambeen de camín d’opinión.

De bideos, tos ne pencho un de Mezquita de Jarque. Puestar que belúns bi beigatz a bel zorrizo bailando que se parix muito a un serbidor. Qué malo ye ixo de que tot o mundo tienga una camara de bideo!

O millor d'a semana 026

2009-06-14T20:58:00.009Z

Dos cosetas he bisto iste cabo de semana y bien diferents. La primer lo millor d’a semana y la segunda o más penible. Entre que aguardamos a la plegada d’as fiestas madaleneras, charremos d’o que organizan por atros cabos:

Tamborilé: Un granizo festibal. En nomás un diya consiguión achuntar un camatón d’actibidatz que no podiemos cuasi nian alentar. De maitins, entre partidas de borra y os puestos d’artesanía, pasemos un ratet sobrebueno. Ya de tardis, os gaiters d’Estercuel nos fazión bailar con un pasabillas por as carreras de Mezquita de Jarque. En rematar ya yeran prestos en a Plaza a “Banda de gaitas de boto aragonesas”. Que’n estió d’emozionant! Quinze gaiters quinze tañendo de bez. Acompañaus, antimás, por unos tabals bien pinchos. Con Brincadeira y Bandarra Street Orkestra nos fartemos de bailar. Con tot y con ixo encara teniemos rasmia ta chugar a balonzesto bel poquet. Y ixo que encara eba de prenzipiar Lurte, que, a tamás de l’aturada y d’os cambeos que han teniu, continan estando sobrebuenos. Dende aquí muitas felizidatz a la organizazión que lo fazió tot muito bien y nos cudió muito.

Mercau Goyesco: Cuantisma barra que cal tener! Ta qui no lo sepa, iste cabo de semana bi ha abiu en l’antiga arboleda de Macanaz, un clamau “Mercau goyesco”. Por tot ixo d’os sitios y tal, cuento que se fería. En que sentié que lo feban me pensé que yera una fatera de Belloch en bel pasote. Cuan i fue me trobé con o mercau meyebal que s’eba feito a semana pasada, cambiau de puesto. Pero sin disimular ni cosa. Os puestos igual como yeran a semana d’antis. Con a mesma chent bistida d’a mesma traza. Os mercaus meyebals no gosan tener guaire rigor istorica, pero ye que lo d’iste yera increyible. Mesmo trobemos uns colgallos de Hannah Montana. Muit d’o sieglo XIX, sí siñor.

Contacto y lo que quieratz en tierradebarrenaus@gmail.com

Berano turolense

2009-06-12T16:34:00.006Z

Como tantas atras begadas dende a probinzia turolense plegan buenas notizias. Prenzipia o berano y de bez a puenda de festibals cada cabo de semana. Estiaño prenzipiamos bien luego. Maitín, de feito. En Mezquita de Jarque se fa, por primer y asperemos que no zaguer año, o festibal Tamborilé. Tot ye muito bien organizau: chenta popular, zona d'acampada... En o blog d'o festibal dizen como plegar-ie, bi abrá una chenta popular y actibidatz u conziertos mientres tot lo diya... y a nuei. Pasatz-tos por o blog y fetz una güellada. Entre atros i podremos biyer y sentir a Lurte y a os Gaiteros d'Estercuel. Qué puede aber-ie millor ta enzetar o berano?

Sin tiempo ni t'alentar, o cabo de semana benién tornamos t'o Sur. Ista begada ye un festibal más que consagrau, o Poborina Folk, que se fa en o lugar de El Pobo, a o canto de Teruel. Me fa bergüeña dezir que nunca no i soi estau, pero ye d'ixos puestos que, por una razón u por atra, siempre me quedo sin ir-ie. Con tot y con ixo, he sentiu tantas y tantas istorietas d'ixe festibal que regular que ye buenizo de tot.

Contino un bideo de Lurte. En os relazionaus de Youtube i aparixen atras d'as collas que tañerán en Mezquita, por si tos cal bella cosa más t'animar-tos.

Nobedatz

2009-06-12T16:20:00.004Z

Dimpués d’istos pocos diyas de descanso, torno con muita rasmia, ganas de fer cosas y bellas nobedatz. A mía ideya cuan prenzipié con Tierra de Barrenaus yera basicament esbastar un ratet cada diya y aprofeitar ta espardir combocatorias y gomecar bellas ideyas que me dondiaban por l’esmo terne que terne. China chana Tierra de Barrenaus s’ha combertiu en cualcosa más ta yo. Muitos sé que me liyetz asobent. Atros, más de cabo ta cuan. Y atros simplament biyetz os bideos que pencho.

Lo que quiero agora ye dar-tos bella cosa más. Ta prenzipiar tos boi a ufrir una adreza electronica tierradebarrenaus@gmail.com que, dende agora será a d’o blog. Podetz imbiar-me-ie todas as combocatorias que quieratz u cualsiquier cosa que tos agane que publique u que esparda. Antimás, dende agora imbiaré de cabo ta cuan un boletín informatibo ta tot qui quiera. T’apuntar-se-ie imbiatz-me un mensache a o debandito correu indicando-ie que queretz rezibir o boletín. Que i saldrá? Pues as zaguers nobedatz de Tierra de Barrenaus, combocatorias de toda mena (culturals, politicas...), bideos de lemurs y asinas asinas.

A segunda nobedat ye una nueba cuenta de Flickr. Bella mena de Flickr de Barrenaus. Si belún no conoix ista web, ye basicament, un puesto an que penchar fotos. No soi guaire buen fotografo. De feito soi penible, pero me fa muitismo goi de tirar fotos de totz os puestos y mobidas que i soi. Asinas que talmén no i trobetz amanixers gloriosos, pero de seguras que i trobaretz fotos de manis siñaleras u puestos bien pinchos. Por agora bi ha tres albums tematicos: Aragón, an que pencharé fotos d’os puestos t’an que boi; Cultura aragonesa con mosica, tradizions y asinas asinas. Y Luitas, con fotos de toda mena de lutias sozials, culturals y politicas d’iste país y de dillá d’a güega.

Aspero que tos faigan goi as nobedatz y que las prenzipietz a fer serbir antis con antis. Asinas que ya podetz ir imbiando os buestros parixers t’a nueba adreza (tierradebarrenaus@gmail.com) y en bels pocos diyas prenzipiaré a imbiar info. Tos dixo con unatro bideo de lemurs. En primerías parix que ye un monchón, pero be-te-me que no! Que ye un lemur de berdat! Que'n ye de pincho! Igual como un mixín, pero en mono...

Bellas parolas sobre as eleczions

2009-06-12T15:17:00.005Z

A la fin plegó lo diya d’as botazions. Por primer bez en bels años lo asperaba con bella miqueta d’asperanza y de deleria. Talmén m’ese ilusionau masiau porque dimpués os resultaus son estaus los que totz conoixemos. Daré a mía ambiesta por partis:

- Españols: PP, PSOE y IU encantaus de conoixer-se. Os dos primers continan alto u baixo con a mesma cantidat de botos y de porzentaches. Ye berdat que o PP puya bel poquet y o PSOE baixa lo mesmo, pero rai. O boto zombi ye muito fidel. IU, con tasamen 1500 botos más, s’ha quedau en o terzer puesto. Grazias a o PAR que no se presentó y a CHA, que s’esboldrega de tot. Asinas que gana, pero solament por os zancochos d’otri. UPyD, o PP 2.0, pilla ixe cuarto puesto que me pienso que le dará representazión en as Cortes aragonesas en as autonomicas, si bi plegan. Si o partiu consigue superar o personalismo de Rosa Díez, ye una gran menaza t’os dreitos indibiduals y colectibos de totz, asinas que caldrá estar a la tisba. O discurso d’a Ejpaña friendly ba chupindo a muitos chobens. Y cal remerar que en Aragón, lo que millor funziona en as urnas ye l’anticatalanismo.

- CHA: D’escusas, ya no les ne queda. O partiu s’esboldrega y prou. A carrera la eban perdida fa tiempo. No ir t’os debatz que t’ufren, como o de l’Arrebato u lo d’a Enredadera, no aduya a recuperar-la. Fer anunzios electorals igual como si bendeses un champú tampoco no lo fa. A la fin, estar un PSOE cachirulero, no funziona. Si a chent querese botar a lo PSOE u a lo PAR, botará a lo PSOE u a lo PAR y no a un mezclallo rarizo, que antimás se chunta con radicals independentistas un diya y forachita independentistas d’o partiu unatro. A consecuenzia de tot isto: a metat de botos. A terzer fuerza agora ye a zinquena. A tamás de tot, me fa pena. CHA estió una bez l’asperanza d’iste país. Agora no tien rasmia ni o mensache, ni a organizazión y s’han cazegau en un laberinto que no saben guaire bien por do salir-ne. Y de dimisions, prou que ni fablar-ne!

- IISP: Bien y mal. A berdat ye que en Aragón m’asperaba más botos. A lo menos ixos 3000 soniaus, ixos 3000 independentistas que se suposa que bi ha. Talmén m’ese feito masiadas sobatidas mentals u isto de bibir entre fablilandia y lo país d’os indepes m’alueña masiau d’o penible mundo reyal. A parti buena ye que ye naixiu y ha prenzipiau a treballar un prochecto que aspero que baiga muito más allá que istas eleczions. Por lo que he sentiu ye asinas. IISP no remata aquí. Cal aprender d’as errors que s’han feito en iste país antismas y costruyir un d’entre todas ixe nuevo prochecto que tanto nos cal.

- Atros: M’enfuelgo d’os botos que ha conseguiu PACMA. Encara que no creigo guaire en os partius monotematicos (nomás feministas u nomas animalistas, por eixemplo) siempre ye millor, en a mía opinión que no botar. Ixos más de mil botos podesen aber iu t’atros partius que refirman a tortura.

A dreita no disimulada (DN, AES, Falanges...) creixen masiau. Y ixo que son trestallaus de tot, que si s’arroclasen arredol d’una sola lista... Encara no ye ta tener medrana, pero cal continar a la tisba.

En resumen, Aragón contina estando un país d’españols, como bien dizen por atros cabos. Continaremos treballando.

+info: tierradebarrenaus@gmail.com

De reflexión

2009-06-03T07:39:00.004Z

Contino bibo. Lo primer de tot. O millor d'a semana no ha puesto arribar ista semana, pero prometo un millor d'a quinzena u lo que calga... A custión ye que, por diferents istorietas soi una mica aqueferau y d'atra man, soi parando bellas cosetas nuebas ta iste fablog. Asinas que mientres bels diyas más isto continará bien quedo. Aprofitatz ta reflexionar, si ye que tos cal. En iste binclo d'a Enredadera podetz ascuitar o debat que bi abió entre IISP, IA, IU y abstenzionistas. Bi estió combidada CHA pero no i fuón. Que gabachetz! Tamién tos dixo penchau más abaixo o zaguer bideo de IISP. Ta qui ya tienga lo boto dezidiu, u pueda reflexionar mientres ye de borina, bi'n ha una bien buena y por una buena causa en Pina de Ebro. O cartel ye penchau como imachen alto y la info la tenetz aqui. Que baiga bueno y nos biyemos con nobedatz dimpués d'as eleczions!

Bideo sobre luengas

2009-05-29T07:19:00.002Z

Contina a campaña de bideos y me he gronxiau asabelo con iste que han penchau en Cucha Independentista. Nomás dos parolas en madaleno pueden definir-lo: Brut y Tuet. Ta que faigatz un buen rato...

II-SP en Zaragoza y en Youtube

2009-05-28T07:08:00.005Z

Se ba amanando o diya d'as eleczions y II-SP ferá o suyo acto zentral en Zaragoza iste sabado a las 20 en a Plaza San Bruno. Talmén m'entiboque. Correchitz-me os biellos d'o lugar, pero me pienso que ye a primer begada que se fa un acto independentista -d'ista grandaria- en puenda electoral en Aragón. L'acto será, como no, un conzierto con procheczions de bideos y interbenzions politicas. Bi tañerán Prau y Rebel Spell - con o disco encara rusién - amás de Noise & Oi! y Zoko Selektah. Como siempre toda a info la podetz trobar en o blog de Cucha Independentista.

Antimás, en istas semanas han iu surtindo arrienda bideos, beluns d'els muito buenos. A los carrañaus de siempre se i han adibiu atros que se fa a mofla de Rubalcaba y d'atros en clau d'umor que siempre fa bien de goi. Contino tos ne pencho tres, de seriosos y d'os atros. Podetz trobar-ne un fascal más en Cucha Independentista u en YouTube, que, en no controlar meyos de comunicazión ye estando o nuestro. Entalto o rete!

O millor d'a semana 025

2009-05-26T07:30:00.004Z

A semana d’a ¿relegalizazión? ¿desilegalizazión? Quemisió. Una semana rara. Lo de Iniziatiba Internazionalista ye ta pensar-ie y muito. Porqué l’han dixau presentar-se y, porque en primeras la ilegalizón? Cuento que no ye porque funzione a chustizia española, asinas que caldrá continar pensando-ie. Más entabán lo feré... A info sobre II ye de fazil trobar en o blog suyo u en lo de Cucha Independentista que son sobrebuenos y rebuten d’informazión. Asinas que yo charraré d’atras cosas, que tamién pasan por istas y atras tierras.

Catolicos: Taaaaaaan fazil lo dixan.... En tot lo mundo funzionan igual. En Italia portan esvasticas. En Irlanda paran cuenta que os mosens que han estau abataniando, biolando abusando d’a catrinalla dende fa decadas. Manimenos a ilesia contina terne que terne con que os omosecsuals ban contranatura y fan que as familias sigan en periglo. A unica conducta sexual contra a naturaleza d’os sers umanos ye no fer sexo, asinas que qui tien una malotía? Fa nomás 19 años a omosexualidat estió quitada d’o listau de malotías. Cuan se i ficará o “mosenismo”? A yo m’importa igual lo que faiga cadagún. Si bi ha barrenaus que no quieren fer foriquetas, mientres no faigan mal a dengún, como si les da por coleczionar güeñas. O pior de tot ye que ista chentuzia s’adedica a dezir cómo, con qui y ta qué emos de fer foriquetas a resta. Y mesmo bi ha qui les fa caso y nos diz a la resta que no tenemos moral.

Asustante: D’acollonar. Por muito menos que no isto estiemos fendo-nos a mofla d’Esperanza Aguirre tot un año. A cruzada contra a Cultura enzetada por os corsarios d’a $GA€ y continada por l’actual Ministra de Cultura plega en puestos periglosos. A la nueba ministra le parix asustante que os libros sigan de baldes. Prou que’n ye. Que s’imbente parolas rai, pero que os libros sían de baldes ye asabelo perigloso. Y si la chent leyese? Qué podría pasar? Mesmo podría dixar de mercar a basuera que meten bien bistera en os repalmars de El Corte Inglés. Ta lo mío prochecto de cabo de carrera abié de consultar más de doszientas fuens. Muitas d’ellas lo fazié en o rete. Ye de dar que soi un periglo y que soi furtando arrienda diners a, por eixemplo, Ignacio Jordan de Asso. D’atra man, no beigo yo a la chent que nos fa goyo de leyer, fendo-lo en u ordinador. Cosa no puede sustituyir a un libro. A lo menos por agora.

Concierto contra la tortura: Zaragoza rebelde quiere estar muito más que no o libro, a exposizión y a web. Iste cabo de semana lo contrimostran fendo un conzierto sobrebueno que o esquilmen suyo será t'ASAPA. Contra a tortura polizial en garcholas y tozineras.

El ultimo aragonés vivo: Ye un curto que m’imbión bien majo y que pencho contino. Ta fer-se unas risetas.

Ilegalizazión I (freaky version)

2009-05-19T07:39:00.007Z

A ilegalizazión de Iniziatiba Internazionalista dixó asabelas sensazions. As dos principals estioron tristura d’una man y rabia d’atra. Como soi un friki, por si belún no’n eba parau cuenta, remeré fa poco a eszena d’a constituzión d’o Imperio Galactico y as parolas de Padme "So this is how liberty dies... with thunderous applause." (Asinas que asinas ye como a libertat muere... con una tronada d'aplausos). Asinas continan matando a libertat, entre tronadas y tronadas d'aplausos meyaticos y politicos. Abaixo podetz biyer a eszena ta remerar-la u biyer-la los que no sigatz frikis. Prenzipiatz en o minuto 1:04 dica o 3:30 alto u baixo.

Atro escritor que m’ha feito goi de leyer a suya opinión ye Santiago Alba, que publicó en Gara l’articlo que pencho contino, amprau d’o blog de Cucha Independentista. Bisitatz ixe blog porque i son penchando arrienda articlos bien intresans sobre o tema. Cuasi no adubo a leyer-ne totz.

“Es una historia conocida: en 1630, en Milán, un sospechoso, denunciado por un honrado ciudadano, es detenido y torturado y, tras negar inicialmente la acusación, acaba por confesar su delito. Bajo tortura, denuncia también a su barbero, cómplice de la atrocidad, y éste a su vez denuncia a otros hombres, poniendo al descubierto toda una cadena de monstruosos malhechores que comienza, o concluye, en un caballero de nombre Padilla, jefe de la campaña de terror. Una vez condenados y ejecutados, sobre las ruinas de la casa del barbero se alzó una columna admonitoria que recordaba la infame acción de los reos y advertía eternamente a los malvados sobre las consecuencias de semejante tropelía. ¿Qué habían hecho? Se les consideraba untori, es decir, “untadores” siniestros que habían propagado la peste por la ciudad depositando en las paredes y en los objetos la sustancia contaminante que transmitía la enfermedad. Sólo en 1778, bajo el empuje luminoso de la Ilustración, la columna fue derribada, considerando la época nueva –la de Montesquieu, Verri y Beccaria- que la infamia no residía en los condenados sino en los magistrados que los juzgaron y en los ciudadanos amedrentados e ignorantes que ayudaron a convertir la locura, la superstición y el absolutismo en un procedimiento natural.
Esta historia real del Antiguo Régimen, recogida en 1840 por el italiano Alessandro Manzoni, es desgraciadamente muy actual. Según la Abogacía General del Estado –es decir, según el gobierno del reino de España- Alfonso Sastre, el dramaturgo vivo más importante del mundo, es un untore y su solo nombre (mientras él trabaja en sus obras de teatro encerrado en su habitación) es capaz de contaminar todo lo que linda con él, de Hondarribia a Tierra del Fuego. Contaminado por sus “conexiones personales” del pasado, su presencia como cabeza de lista en la candidatura de Iniciativa Internacionalista es hasta tal punto contaminante que debe ser inmediatamente privado de sus derechos ciudadanos junto a sus compañeros de grupo y junto a sus potenciales votantes. En este galope de regreso a la pre-modernidad, la lógica es ya –desgraciadamente- conocida: no es que presentarse a unas elecciones europeas sea un delito; no es que no se le permita presentarse por haber cometido un delito: es que su existencia misma es delictiva. “Intenciones”, “analogías”, “concomitancias”, toda la sutil obra del Derecho, levantada pacientemente durante siglos, sucumbe entre aplausos a esta atmósfera primitiva y sacrificial de miasmas oscuras transmitidas, como la gripe porcina, con o sin voluntad, en una onda expansiva ininterrumpida. Las nociones de enfermedad y pecado –mortales los dos- sustituyen a la de delito, prueba, presunción de inocencia, responsabilidad individual. De hasta qué punto “la defensa de la democracia” –con Savater y Rosa Díez a la cabeza- se ha deslizado ya en el mundo medieval, obscurantista, prehistórico, del farmakón y la magia negra da buena prueba el hecho de que, si quisiera, Alfonso Sastre no podría cambiar de opinión: es sólo el resultado de sus “conexiones personales” y el comienzo, a su vez, de conexiones potencialmente tan amplias que a partir de su nombre, en el delirio antijurídico de las analogías y las concomitancias, se podría impugnar o ilegalizar cualquier lista en la que hubiese algún lector de Escuadra hacia la muerte.
La conjetura de que Batasuna iba a pedir el voto para II y la presencia en sus listas de un excandidato de ANV, una fuerza entonces legal pero ilegalizada a posteriori, ha activado la enésima impugnación de una fuerza electoral que, con casi toda seguridad, no podrá concurrir el próximo 7 de junio a las elecciones europeas. En 1630 se hacían las cosas así; en 2009, en el reino de España, también. En 1630, los procesos abiertos contra los untori formaban parte de la lógica pre-ilustrada del Antiguo Régimen; en 2009, los procesos abiertos contra los untori se quieren hacer pasar por normalidad democrática y de Derecho. Gente inteligente, gente sesuda, gente honorable, respetada e influyente, gente fuera de toda sospecha, gente rica y gente poderosa –como en el Milán de la peste- tendrá algún día que rendir cuentas ante los ciudadanos por esta doble fechoría: la de restablecer el Antiguo Régimen y la de hacerlo, además, nombrando el derecho y la Democracia.
Así las cosas, sugiero –y lo hago en serio- que Batasuna, fuente de todas las miasmas, poderosísima varita de contagiar infamia, convoque una rueda de prensa y pida públicamente el voto para el PP y/o para el PSOE. ¿Quedarán manchados nuestros dos principales partidos? ¿Se pedirá su ilegalización? Por supuesto que no, pero de esa manera al menos quedará claro que, desencadenada fuera del derecho, esta lógica medieval es hasta tal punto medieval –y está tan fuera del derecho- que ni siquiera es lógica: es puro ejercicio de soberanía religiosa o, lo que es lo mismo, arbitrariedad paranoica de un Santo Oficio en su lucha contra el Mal.
Porque lo que ya ha quedado claro, en cualquier caso, es que el oscurantismo, la manipulación, el desprecio por las reglas del juego y la injusticia son infinitamente más contagiosos que la peste –y mucho más, claro, que la conciencia de la democracia y la libertad.”
Santiago Alba Rico

MdaS024

2009-05-17T20:43:00.006Z

A semana que remata ha rebutiu d’actos an que l’aragonés ye estau present. Bien en o zentro, bien más de bislai, pero present. Una semana goyosa y trista de bez, pos a las buenas notizias en l’aragonesismo cultural se i adiben malas, y bien malas, en o pulitico.

Manifestazión por as luengas d’Aragón: Una manifestazión bien maja, (y capazera) que, manimenos, en os meyos de comunicazión no ha teniu guaire presenzia. Podetz leyer todas as notizias en a triga de binclos que ha feito Estricalla. De bergüeña l’articlo en l’Eraldo con o comentario de “el "reconocimiento legal de las tres lenguas de Aragón", que consideran son el castellano, el catalán y el aragonés.”. Remeratz como charraban fa poco d'a manifestazión d'a FACAO. Me quedo con o buen ambient que bi abió y a cantidat de chent que nos i chuntemos. Que ixo, en fablilandia ya ye bien difizil. Cuento que cal felizitar a la organizazión pues tot lo que se fazió dimpués con a barra, os entropans, a mosica, o teyatro y asinas asinas estió prou bien pensau. Pena de trobar-me tan canso que abié de jopar enta casa... De diez. Asperemos que toda a rasmia emplegada tienga fruitos y faiga buena onra ta l’aragonés toda ista mobilizazión.

Iniziatiba Internazionalista: O suenio que nos quieren estricallar. A candidatura ilegalizada, se presentó en Zaragoza o sabado de tardis. A cambra an que se fazió se quedó chicorrona de tot. Toz os posientos se plenón y mesmo muita chent abió de biyer-la quillaus en a zaguer ringlera. Trobé l’acto una mica jauto, pero cuento que l’inte no yera guaire bueno. Totz nos sabebanos ilegalizaus y ixo no anima guaire. Con tot y con ixo, como se i dizió, isto no ye que o prenzipio de cualcosa que puestar muito buena.

Bilingüismos: Os que no nos dixan botar, asobent se dizen esfensors d’o bilingüismo. Y asobent son monolingües, en castellano prou que sí. Ixe ye o caso de Mayor Oreja que, en una charradeta de tasamen tres minutos consiguió dixar bien platera a suya ideya de bilingüismo. Agora entiengo millor o suyo conzepto de democrazia.

Ta rematar, un bideo de lemurs. Primer de toda una serie que iré penchando china chana. Debán d'as rebaixadas suyas, lemurs y luita!

Mani y presentazión

2009-05-13T20:35:00.004Z

Cuento que ya ye una mica tardi y no daré brenca notizia, pero cal que totz os fablogs charren d'a manifestazión u a lo menos penchen o cartel. Con tot y con ixo siempre puestar que bi aiga bel espisguardau que encara no aiga bisto os cartels, leyiu os blogs u sentiu o charrar de tot fablilandia y dillá que no dixan de charrar-ne. Ya sabetz que o 16 ye o nuestro diya. O diya d'a esfensa d'as nuestras luengas. Talment siga a más important manifestazión por l'aragonés en as zaguers decadas, asinas que cal que se nos beiga platerament. En o costau menos important politicament pero no pas sentimentalment, ye una sobrebuena oportunidat ta chuntar-se y fer un buen socalze en aragonés (u catalán) dimpués d'a mani.

O diya d'antis, que ixo sí que s'ha espardiu un poquet menos, se ferá unatra presentazión de l'academia. Será a las 11 en l'aula Magna d'a Facultat de Filosofiya y Letras. Sin restar importanzia a la resta que han feito, en ista ocasión y debán d'a istoria d'a relazión d'a unibersidat ¿aragonesa? con l'aragonés, también ye un important inte an que cal que sigamos totz os que puedan. Antiparti d'a parti más seriosa (parolas d'o rector, d'o president, d'o bizeconseller y asinas asinas) se i ferán bels bideos de parladors patrimonials.

Asinas que o biernes enchegaz o chip de l'aragonés que ya no tos caldrá amortar-lo en un buen ratet!

No nos los mereixemos

2009-05-10T16:23:00.005Z

Lo d’a Espluca de Chaves me plegó en l’alma. Siempre, dende ninón, me ha feito muito duelo enronar o pasau. O nuestro y o d’otri, que tot ye d’a umanidat. Cuento que ixa ye una d’as razons por as que escribo isto en aragonés y lo charro siempre que puedo. No conoixeba a debandita espluca y ixo ya ye ta fer-se-ne. En cualsiquier atro país la esen teniu “entre cotons”, bien cudiada y dando-se bien de bamba. A unibersidat ese feito milenta estudios y bi abría cursas turisticas t’a redolada, zentros d’interpretazión y botigas con monchons. Manimenos en o país nuestro remanió ixuplidad aintro d’un cletau ta cazataires.

Alabez, y debán ‘da manca d’intrés y ixubliu cheneral d’o patrimonio aragonés proposo que no se nos dixe chestionar-ne mica. Y astí ba la mía alternatiba:

L’aragonés, luenga sin mica proteczión, en as tres pedretas y en momentos d’acotolar-se que la chestione o PNV. Iba a meter o gubierno basco, pero millor pensau, cuasi que no. Os biens d’a Franja millor que continen en Lleida que si los trayemos talmént los faigamos serbir ta calentar o Pilar cremando-los. O Vidal Mayor tamién cal que contine en California. An se trobará millor esfendiu que baixo lo gubierno de Chuache? Si belún gosa amanar-se-ie, t’a silla electrica y au! Ordesa y tot lo Pirineu que lo chestione Franzia u España que no i fan cosa y ixo siempre ye bueno. Malas que belún fa cosa astí, i dixa buen chandrío. O teyatro Fleta, que le’n den a Mari Cruz Soriano , Marianico el Corto y Joaquín Carbonell. Pior que a $GA€ no pueden estar.... u sí? L’Ebro, dende Zaragoza ent’o naiximiento t’os cantabros, y ent’a mar t’os catalans. A biyer si belún lo escosca u a lo menos dixan de chitar-ie mierda. Os papels de Salamanca, si bel diya los trayen, puestar que o PAR faiga un concurso d’origami, asinas que tamién millor que i continen.

Cuento que d’alfayas aragonesas me’n dixo arrienda. Iz pensando en qui podría chestionar o Mudejar, San Chuan d’a Peña, o castiello de Lobarre .... Bi ha proposas?

Tres luengas y dos bideos. MdaS 023

2009-05-10T10:49:00.004Z

En plegando o diya, o gran, diya d’a manifestazión d’as tres luengas, qué millor que charrar un poquet de cadaguna.

Aragonés: Encara contina bibo y me pienso que l’intrés d’os aragoneses por a suya cultura no retacula. Ye berdat que as clases continan con alto u baixo a mesma chent que fa diez años, pero cada diya bi ha menos refús sozial enta l’aragonés, y os aragoneses chino chano ban tenendo as cosas más plateras. A lo menos l’antroponimia aragonesa parix que perbibirá u ixo ye d’o que charraba iste articlo d’o 20 minutos. Ye curioso, porque en a edizión de papel o titular lo feban con Jesús y Chesús, que por ixo me trucó lo ficazio. Os nombres aragoneses parix que son de moda. Prou que a chent de l’aragonesismo a los ninos y ninas suyos les mete os nombres en aragonés, pero tamién muitisma atra chent y cada diya se biyen más Ixeyas, Izarbes, Loriens y Lizers.

Catalán: De tot lo que os bloggers publicamos, a más gran parti son custions informatibas u articlos prou zaborreros. Manimenos de cabo ta cuan trobas articlos como iste en Lo finestró del Gràcia, sobrebuenos sobre o catalán y os FACAOS. Ye d’ixos que se pueden fer serbir mientres fa muitos años ta esplicar o empandullo lingüistico aragonés a qui no sabe cosa sobre as luengas d’Aragón. Igual como foi serbir tamién aquel mitico “L’aragonés nieu zanzera”.

Castellano: A luenga de l’imperio, como ya dizió Nebrija, y que o rei aseguró que nunca no s’imposó a dengún. Iste articlo de Publico sobre Hernán Cortés fazió muito mal a os españolistas y se contrimuestra leyendo os comentarios que i han meso. A cantidat de barbaridatz que i dizen ye ta ixorrontar-se. Si l’articlo ese estau más furo y no pas solament descriptibo, talmén esen ilegalizau o periodico... En que remeras un poquet como s'espardió a luenga y a cultura española bi ha tantos que tremolan...

De cabo d’articlo tos pencho dos bideos. Un an que se bei o prenzipio d’a baixada de nabatas por a Galliguera y l’atro o bideo d’a nueba canta de Mallacán que cuento que abretz bisto ya totz pero que prou que cal penchar ta espardir-lo bella mica.

Seleczions

2009-05-04T07:32:00.006Z

D’entre todas as reibindicazions de l’aragonesismo, a d’as seleczions (trigas?) nazionals siempre m’ha pareixiu d’as menos importants. Cuento que ye porque ta yo l’esporte nunca no ye estau mica important. Manimenos, dimpués de biyer y analizar un poquet a importanzia simbolica y sozial que tien a seleczión española t’o nazionalismo español, me pienso que abré de refirmar más ixa reibindicazión.

Tot isto lo pensé por diferents situazions bibidas que me trucón o ficazio. A primer estió charrando con a mia chirmana. Charrín charrán surtió l’afer d’a seleczión española que chugaba contra quemisió qui ixa nueit. Cuento que fazié un zeño de fastio u simplament de manca d’intrés de tot, pues me dizió “mozet, no sabeba que o tuyo nazionalismo plegase tan luen”. M’eba bisto en manis de toda mena. Conoix alto u baixo bien as ideyas mias y d’os colectibos que i yera t’a part d’alabez, pero lo que más radical de tot le pareixió estió que no refirmase a la seleczión española.

A segunda me pasó fa poco, sentindo a radio en o treballo. Por un regular i tenemos a SER. Yera un 1 d’abril y se feban 70 años dende que os nazionalistas españols (no imbento cosa, que s’autodefiniban asinas) ganón a Guerra Zibil Española y prenzipión cuaranta años de dictadura, rebaixadas y ultracatollizismo. Por un regular tiengo a radio con o bolumen baixet. Ixe diya, de bote y boleyo, en rematar “o parte”, un chilo bien fuerte de Viva España! Me fazió blincar d’a silla. Cuasi m’acubillo debaixo d’a mesa. Que me’n fazió de miedo! Ya me pensabaque enrestiban unatra begada. Pero beteme que no yera que un progre d’a SER animando a la seleczión y limpio chilar españoladas, dica que cambié lo dial en no poder estomacar-lo. Ta que dimpués digan d’a COPE...

A zaguera ye simplamen una canta de Lendakaris Muertos, que conoixié grazias a una nueit de borina con Octubre17 (entre atros) fa bels meses. I charran d’a ipocresía de bels bascos-bascos que se dan bando d’estar-ne más que no dengún y dimpués animan a la seleczión española. Si ixe mesmo poder tien efectos mesmo en Euskal-Herria ye ta fer-se-ne. Podrá bel diya a seleczión aragonesa fer o mesmo efecto en a soziedat aragonesa? Y más important, ixo ye de deseyar? Creigo que os siñals son importants, pero o futbol, muito asoben arrocla arredol suyo a muita chent fanatica que ye imposible de razonar con els. No ye ixa a nazión que quiero y esfiendo.

Tanimientres me quedaré con a chambreta d’a botiga de Purnas: Dos seleczions: l’aragonesa y a que chugue contra España.

O millor d'a semana 022

2009-05-03T08:44:00.005Z

Dimpués de l’aturada d’a semana pasada torno a fer MdaS o domingo y con a estructura “normal”. Como encara teneba bellas cosetas que escribir y no podié fer-lo, iste post quedará una mica antigo, pero prometo actualizar-me antis con antis.

NHC y los meyos: Charré d’a manifestazión azientifica y ultranazionalista d’os NHC fa bels diyas por l’articlo que les adedicó lo Heraldo. Un eixemplo de cómo no abría de fer as cosas un periodista imparzial. Que más que un articlo parixeba un pasquín de Falange. Bels diyas dimpués leyé a bersión d’o Periodico de Aragón, que, sin estar una alfaya, ye millor que no l’atro. Nomás cal contimparar as dos notizietas.

Transchenicos: A manifestazión en Zaragoza contra os transchenicos, que se fazió o mesmo diya que a d’os de NHC contra o catalán, y que, como ye de dar, i arrocló a muitisma más chent, estió un exito. No sé si tendrá efectos en as almenistrazions, pero a lo menos a chent nos ha bisto y ha feito preguntas. Ye l’eixemplo d’una compañera de treballo que me demandó informazión. Mirando-ne trobé, antimás de l’articlo que fazió Publico sobre a mani, ista pachina mexicana, que me fazió muito goi por a suya simplizidat. Un sobrebuen puesto an que informar-se sobre l’afer d’os transchenicos.

Cucha Independentista: Dimpués d’un par d’eleczions an que boté por botar, sin guaire gana u mesmo con mala gana, a la fin me torna a fer bella mica de deleria ir a botar. A candidatura Iniziatiba Internazionalista, que en Aragón tien a la rezién naixida Cucha Independentista, cada begada me fa más goi. En leyer os comunicaus suyos y ir conoixendo a la chent que bi ye, m’agana más de botar-les. Antimás por primer begada no botaré en Corazonistas, que me feba asabelo de fastio d’ir-ie. Como m’empadroné, ya boto en o Pedro de Luna, que cuento que no pudirá a mosén.
Como deziba Aragonando, toda a blogosfera nazional ye charrando de Cucha Independentista y yo no seré qui no lo faiga, pues me pienso que ye a notizia -y l’asperanza- de l’año. Asperemos que isto pueda continar dillá d’as eleczions europeyas. Dende güe, antimás bi abrá un binclo permanent t’a web suya an que goso de meter os binclos (a la dreita tuya, amigo lector).

Mundialet Antirrazista: Qui me conoix dende fa menos de quinze años, puestar que nunca no m’aiga bisto fer esporte. Talmén peteniar por os mons u menar a bizi, pero ixo ta yo no ye que mober-se d’un cabo enta atro, asinas que no lo cuento como esporte. Manimenos, iste cabo de semana tendretz a oportunidat de biyer-me chugando a futbol. Y tot porque s’ha organizau un Munidalet Antirrazista. Bueniza ideya. Ya se i han apuntau una patacada d’equipos y, biyendo os nombres, regular que feremos buenas risas. Os partius se chugarán o 9 de mayo en o C.D.M ACTUR, asinas que, chuguez u no, pasatz-tos-ie que i feretz un buen ratet.

Alara Renaixida: Con isto d’a crisis, no he puesto chugar a Magic (nian mercar-me cartas) dende a presentazión de Conflux. Contino sin tener diners, pero una presentazión ye una presentazión, asinas que ista tardi tornaré a chugar en o booster d’as launch parties de Alara Renaixida. No m’ha bagau de leyer guaire o suyo listau, asinas que boi cuasi en coritatis, pero como ya sabetz, a yo con chugar ya ye prou. Que si nomás querese ganar ya lo ese dixau fa tiempos.

Ta rematar tos remero que podetz continar partizipando en a frikiencuesta, que sé que lo etz leyiu y no dezitz cosa, so boques!

Cronica d'o puen. MdaS 021

2009-04-30T06:59:00.010Z

Una semana rariza a pasada. Pocos diyas de treballo, ziento de mobidas... Asinas que guaire no he puesto leyer. Prenzipión os actos o miercols de nueis con a XI Borina por l’aragonés. A tamás d’estar bispra de puen y de coinzidir con o conzierto de Tako, o Meta rebutió de chent. Se i penchoron todas as falordias presentadas t’o concurso d’a II Trobada de fabloggers. Una borina bien pincha que remató bien tardi. A l’atro’l diya, en rebellar-nos marchemos a fer una gambadeta por o Paseu Independenzia a biyer os puestos de libros. Pocas nobedatz intresans i biyemos. Con tot y con ixo bellas cosetas sí que i trobé. Y bien pinchas. O Diczionario de terminos cheograficos de Chesus Casaus y Pascual Miguel ye a primer. Ya lebaba muito tiempo asperando-lo y poder a la fin alparziar-lo me fazió firme goi.

Zaragoza, Ciudad sumergida, me sorprendió asabelo. Conoixeba a l’autor suyo, Eduardo Laborda, y parti d’a suya obra pictorica, pero no pas o libro suyo. Si podetz bel diya, fez-le una golladeta y, más que más, si tenetz a oportunidat de charrar con l’autor, que tos rezentará arrienda istorias curiosas.
O terzer libro que me fazió goi lo presentoron de tardis en a debantadera d’a nueba siede intergalactica d’a
Biblioteca Frida Kahlo en Cantín y Gamboa. Ye Zaragoza Rebelde y se composa de un buen fascal de testos sobre os mobimientos sozials en A Inmortal entre 1975 y 2000. Un pasau inmediato que cal conoixer u no ixuplidar. Iste libro, antimás, ye parti d’un prochecto que tamién incluye dos exposizions y una pachina web.
En ixa mesma debantadera se presentó tamién a librería asoziatiba
La Pantera Rossa, que’n he charrau ya bella begada y o “Rinconcico Zapatista”, un puesto en a siede nueba d’a Biblioteca adedicau de tot a la reboluzión zapatista de Chiapas.
Entre os actos que programó a Frida Kahlo, podiemos trobar un chiquet ratet ta bisitar a barra organizada por o BIC, que dión bel poquet de conteniu a ixe esbafau San Chorche. Tot un luixo de poder biyer un cado independentista en a Pza San Bruno, firme bistero. Cada diya, l’independentismo s’amaga y s'abergüeña menos.

Tot isto y encara no yera plegau lo cabo de semana!. En rematar a chornada d’o biernes fuyiemos ent’o mont, t’as Chornadas d’o Galligo. O sabado de maitins dondiemos por a Galliguera y dimpués de chentar estiemos biyendo como feban a nabata en a placha de Morillo. Estiaño l’adibión unatro trampo asinas que bi eba bella poca de medrana por si s’entrascaba en bel puesto. De tardis tamién estiemos biyendo os mallos d’Agüero y a ermita d’o lugar con una portada majisma y muito bien coserbada. Iste lugar, que encara no conoixeba parix estar una alfaya de raso. Se i conserba l’aragonés alto u baixo bien, bi ha güeitres de diferens menas y atras abes y, amás d’a debandita ermita, os mallos suyos son firme impresionans. Una redolada repolida.
En Ayerbe, en plegando a nueit, se feba una ferieta ta tastar os “liquidos d’o Mediterraneo”. Por 5 € podebas tastar tres menas de bin d’a redolada, un plato de mondongo y queso y azeite y miel. Sobrebuena ideya ta fer conoixer toz ixos productos. Ya o domingo, a nabata eba de baixar. Entre que feban os zaguers apaños, chent d’a organizazión nos esplanicó una mica a istoria y bellas istorietas de nabatas y nabaters. Como ye de dar tot se mezcloteyó con a reibindicazión d’a bida d’os ríos y prou que d’as riberas suyas y os suyos abitadors, umanos y no umanos. Podetz trobar unformazión sobre o prochecto d’entibo aquí, pero si de berdat queretz conoixer l’afer, pasatz-tos-ie y preguntatz porque de camín tos esplicarán bien tot lo que calga.

Un buenizo pseudopuen ta remerar-lo. Unatro año torno a pensar-me de puyar tamién ta Laspuña que astí baixan por a Zinca. Será ta cabo Mayo asinas que talmén nos i trobemos. Y si no regular que l’año benién en a Galliguera.

Frikiencuesta

2009-04-19T21:07:00.004Z

Fa un par de semanas Arale me regaló una maqueta chicorrona d'un Ala X (X Wing Fighter) de Star Wars. Ye asabelo de pincho y mesmo tien un monchonet de Luke y unatro de R2. En un diya que no yera Kurt, o nuestro mixín por casa, aprofité ta montar-la, pues sabeba que si i ese estau s'ese minchau todas as piezetas... O caso ye que dimpués de montar l'ala X, biyé un capitol de Galactica, estrel de baralla. Y preté a pensar. L'ala X siempre m'eba feito arrienda goyo como caza espazial, pero o Viper de Galactica tamién ye bien pincho. Antimás iste parix una miqueta más rapedo de maniobrabilidat. Ye de dar que mesmo Starbuck ye muito millor personache que no Luke, que siempre he pensau que ye d'as piors cosas de Star Wars. Con tot y con ixo, un Ala X ye, y siempre será, un Ala X. Un clasicazo d'os cazas espazials capable mesmo de fer esboldregar una Estrela d'a Muerte. Y ixo sí que no lo podría fer un Viper....

Asinas que, debán d'iste dandalo que tiengo, tos proposo a los lectors frikis d'iste blog a benién pregunta: Qué caza espazial ye millor y porqué? L'Ala -X de Star Wars u o Viper de Galactica? Podez escribir a buestra respuesta como comentario. O regalo será una biera a benién begada que tos beiga. (Nafarroako y o Diaple d'o Gadget ya sabez que tenez a obligazión moral de responder). Ta los que no los conoxcaz tos dixo penchaus contino dos bideos an que salen en aczión os dos. Alto ye una foto d'o mio Ala X montau. Y grazias a Arale! De seguras que toz os lectors d'o blog tamién te agradixerán o regalo...

Vipers:

Ala X: