Manuel L. Rodrigues

Tiempu de Nós - Humberto González

2009-11-14T03:21:00.000-08:00

Novas lecturas sobre a mesa. Hoxe achégovos un poema do escritor asturiano Humberto Gonzalez, extraído do seu libro "Tiempu de Nós". A Ría de Noia fixo que o momento fose axeitado.

Por se algún lector ten interese en mercar o poemario; o sítio é este, e para visitar o blog do autor picar aquí

Adurmióse

la pequeña ciudá burguesa,

arrepentida.

Les cayes esmorecieron.

Y un besu amargu

sumióse nel olvidu con elles;
cuando s´amatagaron los pasos
tres los pasaxes últimos
de la nada.

O Vaticano apúntase á moda New Age

2009-11-14T02:37:00.000-08:00

O Vaticano ergueu a cuestión da posibilidade de formas de vida alieníxenas nunha conferencia sobre astrobioloxía de catro días, que rematou o 10 de Novembro (2009), durante o cal un participante expresou a convicción de que tal divulgación está razoabelmente perto . "Mesmo, de non encontramos vida, a investigación ensinaranos cousas útiles e importantes do noso mundo", con "implicacións filosóficas e teolóxicas", palabras ditas polo director de prensa do "Observatório do Vaticano", José Gabriel Funes, este pasado martes, no final do seminário.

No debate, organizado para asinalar o "Ano Internacional da Astronomia", xuntáronse, a convite da "Academia Pontifícia de Ciencias", 30 cientistas, astrólogos, biólogos, físicos, xeólogos e químicos; sendo os convidados, especialistas nos seus respectivos eidos.

O Pai Chris Impey, un astrónomo da Universidade do Arizona, dixo que estaba confiante de que "en alguns anos - 5, 10 ou máis - se poderá atopar un modo de vida no universo (no sistema solar ou fora del)". Para apoiar as súas ideas, el enfatizou que o universo está feito de carbono, augaa e enerxía e que o mundo está cheo de produtos químicos. Acrescentou que "o progreso ten feito incríbeis avanzos na investigación dos planetas: en 1995, coñecíase un só planeta fora do sistema solar; e agora sabemos que hai máis de 400 ".

Enfin; compre, tamén, lembrar que o Vaticano é o único estado do mundo que recoñece oficialmente a existencia de "seres extraterrestres"... aínda que tamén son os que din que o preservativo é malo, que os homosexuais non deben casarse, etc.

Os 3 relevos do Museo de Lugo

2009-11-12T08:18:00.001-08:00

Ampla e sorprendente foi a visita ao Museo Provincial de Lugo. Ao longo das diversas entradas adicadas ao centro neste mesmo blog, pudemos comprobar a diversidade e importancia das moitas pezas que contén o edificio. Hoxe traiovos tres "medio relevos" que, polo marco no que están insertos, semella que orixinalmente pertencían á parte superior dun van; posibelmente xanela, aínda que, tamén entendo que se podería tratar de anacos dun "retablo de pedra" (podense apreciar os buratos que servirían para manter fixo os relevos á parede (??).

No primeiro, ollamos unha escena na que na marxe dereita aparece a Virxe co neno xunto con Xosé. Separados por unha estrela, vemos, na esquerda aos Reis Magos coas ofrendas a Xesús, un dos cales fica axeonllado, coa coroa no chan, ocupando a imaxe central.

O segundo é o que máis dúbidas trae. No lado esquerdo aparece Xesus Cristo crucificado, ao carón dun anxo que lle dá as costas. No lado dereito un personaxe, rodeado de motivos vexetais (a Virxe?), sostén un libro. Podería tratarse da Anunciación...

Finalmente, o terceiro relevo, fai unha clara referencia ao descenso da cruz. Podemos ver como varios personaxes suxeitan ao Cristo tras a súa morte.

Para poder ollar ben, con mellor detalle e a maior tamaño as ilustracións; basta con picar sobre as imaxes.

O complexo simbólico-funerario de Zoser

2009-11-11T02:58:00.001-08:00

Lembro unha longa discusión que tiven no seu momento con Bruno sobre o interese que espertaba unha ou outra cultura das denominadas clásicas. Mentres eu defendía, a morte, a Atenas de Pericles, Bruno escandalizábase ante a miña negativa de pór Exipto por diante de Grecia na tentativa de viaxe e coñecemento. Os meus argumentos, nada sólidos, afirmaban que "unha pirámide era unha pirámide" e se despoxabamos dita construcción de todo ese misterio pseudocientífico "unha pirámide voltaba ser unha pirámide" e máis nada. Ignorante de min...

Sucede que estes días ando ás voltas co "Complexo funerario de Zoser (Djoser)" e non podo facer menos que pedirlle desculpas, tanto a Bruno como a todos os amantes (ou non) da arte. Sen restarlle méritos ao meu edificio predilecto (o Partenón), debo recoñecer que unha pirámide é algo máis que "sillares" amontoados...

O primeiro gran gobernante da III Dinastía , o faraón Neterikhet Dyeser (Zoser) tivo ao seu servizo, como grande visir, xuíz supremo e portador do selo a un sábio arquitecto, coñecido polo nome de Imhotep (o que chega en paz). Entre as súas virtudes estaba a de ser médico, astrónomo e sacerdote. Pois ben; Imhotep foi o encargado da construcción do gran "complexo funerario", coñecido pola pirámide escalonada (superposición de mastabas que daría pé, nun futuro, ás pirámides tal e como as coñecemos hoxe).

O recinto garda forma rectangular e fica rodeado por unha longa muralla de caliza branca. Na mesma existen 13 portas falsas e un único portal de acceso formado por un pequeno van; que nos leva por un estreito corredor até a "sala hipóstila". Esta sala está formada por 40 belísimas columnas con fuste en forma de "feixe de canas" que, antigamente, sustentaban a cuberta. O pátio de Heb-Sed era o lugar onde o faraón demostraba ao seu pobo a súa excelente forma física. Neste lugar enterrábase (no festival do Heb-Sed) unha estatua que representaba ao faraón avellentado e, de seguido, entronizábase ao monarca remocicado, cinguíndolle a dobre coroa (símbolo da unificación do Alto e Baixo Exipto). Para representar dita unión de toda a terra do Nilo, no pátio, aínda se conservan parte das capelas adicadas a venerar os deuses dun e doutro Exipto. Estas capelas son macizas e non conteñen absolutamente nada no seu interior. Por fora son salientábeis as tres columnas adosadas que semellan sustentar a cornisa curva do teito.

Finalmente non podemos esquecer a "Mastaba das serpes", tamén chamada "Tumba sur" (posibelmente cenotafio), o "Templo funerario" co Serdab (pequena cámara con dous buratos polos que se pode observar a estatua sedente do faraón) e, como non, a "Pírámide escalonada"

Calexóns - 7 Lvvas

2009-11-11T02:09:00.000-08:00

Hoxe, 4ª feira (mércores), érgome con gañas da "mellor banda do mundo" e, na procura por youtube, atopo un fermosísimo video do grupo cun slide de fotografías entrementres soa o "calexóns". Intres para a memoria, a nostalxia (amada mocidade), xa sabedes...

Podedes descargar de balde todos os discos, vídeos e fotos de 7 LVVAS desde a súa propia páxina web (picar)

Nace "Acha Escrava Editora"

2009-11-10T03:33:00.000-08:00

A día de onte finalizáronse todos os trámites legais para o nacemento dun novo, moi modesto pero ilusionante, proxecto editorial. Acha Escrava será o nome da empresa en cuestión que terá sede en Noia e cuxo principal obxectivo será o da promoción do libro galego e en galego.

A pesares de entrar no mercado xunto con moitas outras empresas do sector, Acha Escrava non pretende competir con todas aquelas editoriais xa existentes, senón axudar a fortalecer o sistema literario galego aportando obras e escritores ao mesmo, que considere de valor.

Somos conscientes das nosas posibilidades, pero tamén das nosas ilusións...

A segunda edición do Antítese nativa; gañador do "XIV Premio de poesía Suso Vaamonde" (e que á súa vez incluirá un novo poemario, en ampliación), será o primeiro volume que se edite.

O profesorado organízase para coller o temón a prol da lingua

2009-11-10T02:17:00.001-08:00

O plan de traballo que se fixa a asociación inclúe unha campaña de sensibilización dirixida á comunidade escolar coa que pretenden "combater os prexuízos" ao respecto da lingua e favorecer que o alumnado "sinta fachenda" de falar galego. Ademais, proxectan programas de intercambio entre estudantes ou fomento do galego nas novas tecnoloxías, entre outras actividades que levarán a cabo, láianse, "a pesar dos recortes dos apoios institucionais". (picar para seguir lendo)

Baile Átha Cliath - Alberte Momán

2009-11-08T03:20:00.000-08:00

Un libro para a fin de semana: Baile Átha Cliath do poeta ferrolán Alberte Momán Noval.

Merqueino fai xa un par de meses na Libraría Couceiro de Compostela e adiqueille estes últimos días parte do tempo reservado a disfrutar coa lectura. Con toda a sinceridade teño que admitir a grata sorpresa que tiven ao pasar os meus ollos polas páxinas do libro... Deixovos un poema coa intención de que xuzguedes por vos mesmos.

vibro coas cadeiras do suburbio
esparexéndose sobre a cintura duns pantalóns
cinguidos ao corpo

se cadra
coas pernas grosas por baixo dunha minisaia
montrando a condición dun suburbio nostálxico
dos berros das crianzas
xogando a existir entre as súas paredes

A "Pedra rosetta" e a escritura en Exipto

2009-11-05T08:43:00.000-08:00

En todas as modalidades artísticas dunha gran parte das culturas do mundo, o uso complementario da escritura acompañou, desde tempos antigos, ás distintas obras, adquirindo un protagonismo determinante. No Exipto coexistiron tres tipos de escritura: a xeroglífica, a hierática e a demótica, as cales foron executadas polos escribas con pinceis en diversos tipos de soporte, preferentemento o papiro.

A beleza coa que foron esculpidos e tintados a multiplicidade de signos figurativos que compoñen a escritura xeroglífica constitue de por si mesma hunha das principais características que aumentan a calidade das distintas obras e completan o seu significado. Este complexo sistema de escritura foi descifrado grazas ao descobremento dunha lousa (supostamente de basalto preto), coñecida co nome de "Pedra Rosetta", polas tropas napoleónicas mentres facían unhas manobras militares no Delta do Nilo. Esta laxe, que se atopa no British Museum de Londres, contén unha inscripción trilingüe en escritura xeroglífica, en demótica e en carácteres gregos. Jean François Champollión puido descifrar e reconstruir, desta pedra, o alfabeto exipcio no ano 1822 d.C.. Este trascendental descobremento permitiu ler os antigos textos e inscripcións exipcias e botar un raio de luz sobre a cronoloxía das distintas dinastías, achegando, deste xeito, a occidente de forma científica esta ancestral cultura. A súa beleza non deixa indiferente a ninguén.

O Castro de Baroña

2009-11-04T02:29:00.000-08:00

Un tal "Xanma" tivo a oportuna decisión de achegarse até o Castro de Baroña co gallo de facer unha brevísima "reportaxe caseira" sobre o xacemento arqueolóxico e os seus arredores. Polo seu interese paso a colalo no blog:

Fernando de Macedo

2009-11-03T07:20:00.001-08:00

Hoxe traio versos dun poeta co que ando estes días tras a procura de autores de Sao Tomé. O seu nome é Fernando de Macedo, e o poema ten por título "Chovem lágrimas a sul" ...para que despois non se diga que o territorio non influe, non só na economía e forma de vida dos habitantes, senón, tamén, no seu subconsciente (colectivo). Os escritores Saotomenses expresan a sensación do acabamento, da derrota... quizais tamén da esperanza; nun intre no que a súa casa non era súa, e é que esta lingua non debeu chegar tan lonxe, como moitas outras...

Chovem lágrimas a sul.

Veio o tempo da derruba

chegou Joao Potóbó

os mistérios sao esventradas

caem penas d´ossóbó.

Vem em nome do progresso

clareira em mato aberto,

na miragem do cacau

chamam ao escravo liberto.

Corta depressa machim
que a liberdade tem prazo,
vêm outros a caminho
nasce o dia com atraso.
Sente-se a bruma do mar
Sete Pedras estao à vista
chovem lágrimas a sul
enevoando a conquista.

O consumo arqueolóxico

2009-11-02T01:48:00.000-08:00

O Plan de protección do Castro de Baroña terá que agardar. Os grupos da oposición no concello de Porto do Son, gobernado polo PP, obrigaron a deixar sobre a mesa a aprobación definitiva deste proxecto xa que acusan o alcalde, Manuel Tomé, de non ter negociado co propietario do terreo no que se pretende situar o centro de interpretación. Tamén está previsto facer unha explanada para aparcadoiro, cartaces informativas, sinalización, proxecto de atracción turística, etc, etc, etc. Ollade; nin un só euro para "protección" "vixiancia" ou "control das visitas". Xa sabedes: milleiros de turijtaj gabeando polas pedras e estragando os restos arqueolóxicos. Enfin... (máis unha vez) Picar para seguir lendo.

...no Museo Provincial de Lugo

2009-11-01T03:53:00.000-08:00

Case non pudemos sacar fotografías na nosa visita ao Museo Provincial de Lugo. Soamente o claustro románico era o permitido para poder gardar nas nosas tarxetas dixitais, as diversas e impresionantes imaxes... Podedes ollar algúns reloxos de sol, esculturas diversas, cadaleitos, estelas romanas, algúns fustes, outros tantos capiteis soltos e as fermosísimas columnas xeminadas sobre as que descansan os arcos (de medio punto) do conxunto arquitectónico.

O famosísimo torque de Burela (entre outros), o pucho con ás, os mosaicos, ou a incribel estela funeraria romana, son algunhas das xoias das que non pudemos traer reportaxe gráfica, pero que fican no centro para todos os amantes da cultura en xeral. Importante: Fotos suxeitas a dereitos de autor (picar para consultar)

O colisionador de hadróns, a prensa e a miña sorpresa

2009-11-01T02:58:00.001-08:00

Hoxe érgome cunha nova do "The new york times" que fai que os meus ollos se abran dun xeito sorprendente. Non se me meteu un lixo baixo a pálpebra, non... A nova relata o seguinte: "Holger Bech Nielsen, do Niels Bohr Institute in Copenhagen e Masao Ninomiya do Yukawa Institute for Theoretical Physics in Kyoto, cientistas e parte do CERN propuxeron que o LHC podería estar sendo saboteado desde o futuro polo propio ser humano que coñecería moi ben os efectos desta máquina para o planeta e, por suposto, para o futuro".

Na portada facíase referencia á noticia mais, a mesma, amplíase na sección "space & cosmos". (picar para ler) Alguén me pode explicar algo???

Non hai mal que por ben non veña

2009-10-29T02:40:00.000-07:00

A Humanidade tal e como se coñece hoxe sufrirá un colapso nos próximos 30 ou 40 anos e "todas" as especies acabarán a final deste século se o cambio climático se mantén ao ritmo actual, segundo advertiu o presidente da Foundation on Economic Trends, Jeremy Rifkin. As predicións dos científicos do IV Informe do Panel Intergobernamental de Cambio Climático da ONU (IPCC, polas súas siglas en inglés) apuntan a un aumento de 3 graos centígrados da temperatura, o que faría volver o Planeta a un estadío climático de hai 3 millóns dos anos, de xeito que "clima, flora e fauna serán distintos". Se a suba fose de 6 graos, como outros predín, sería "a fin da civilización humana". (picar para ler máis)

------------------------------------------------------------------------------------------------

Exipto na época das pirámides - Antonio Pérez Largacha

2009-10-29T02:29:00.000-07:00

Recoñezo que teño o blog lixeiramente abandonado. Estes días os estudos non dan tregua, o traballo é máis intenso ca nunca e o papeleo da editorial (xa falarei disto nunha vindeira entrada) lévame o pouco tempo que teño. Nembargantes os libros non deixan de pasar pola miña mesa... O último, co que estou na actualidade mor do grao, é unha obra de Alianza Editorial sobre o "Exipto na época das pirámides" de Antonio Pérez Largacha, e é que a Civilización exípcia quizais é algo máis que pirámides, xeroglíficos e momias (ou múmias)

Desclasificación OVNI (ufo) do goberno brasileiro

2009-10-27T04:54:00.000-07:00

Fai uns meses decidimos adicar parte deste blogue á ciencia ficción, máis en concreto a certas "space óperas" e á súa influencia na literatura. No meu caso en particular, teño que recoñecer que obras de H.G. Wells ou C.S. Lewis influíron, de xeito definitivo, nalgúns dos poemas do Antítese nativa.

Entre a procura e a desidia, a aventura achégame até a ficción máis real; aquela do misterio, das testemuñas, do troco de escenario e da guerra dos mundos desde un micrófono. Axudado por todo isto descubro que o Goberno do Brasil acaba de desclasificar máis de 2.200 páxinas de antigos documentos secretos de OVNIS, entre eles o famosísimo caso do 19 de Maio de 1986, cando uns 21 obxectos esféricos de máis de 100 metros de diámetro foron -segundo fontes militares- detectados por radares e descubertos por pilotos de aviación civil. Para poder ollalos compre picar aquí.

III Muiñada en Outes

2009-10-26T02:04:00.000-07:00

Este 26 de Outubro comezan as "Xornadas de exaltación do patrimonio cultural - III Muiñada" coa inauguración dunha exposición de fotos antigas e a conferencia "O valor histórico da fotografía" por Clodio Gonzalez Perez.

Os actos, organizados pola asociación "Terra de Outes" terán lugar até o día 31 na Casa da Cultura da Serra.

Entre moitos outros, falarase de teatro, escritores, lerase poesía, proxectaranse curtametraxes, presentaranse revistas e haberá, a maiores, un campionato de trompos e un magosto popular. Ramón Blanco, membro do Colectivo Sacou falará o xoves (5ª feira) ás 20:00 sobre o ano no que lle adicaron o Día das Letras Galegas a Francisco Añón. Para os interesados; a entrada é de balde... e realmente paga moito a pena.

Novidades televisivas

2009-10-25T05:25:00.001-07:00

Se fosemos indíxenas americanos... que sentiríamos ese 12 de Outubro de 1492 ao ver tres naves arribando na nosa terra? Quizais o medo de ollar eses monstros con tronos que posteriormente exterminaron ao pobo que aquí vivía, ou o someteron, ou lle impuxeron un deus cruel en nome de España e das súas maxestades católicas... Se acaso... hai peixes máis grandes neste xigantesco océano.

A serie promete, de principio, se temos en conta a primeira e maxestuosa versión. Xa veremos.

Novo video da manifestación de QUEREMOS GALEGO

2009-10-24T01:49:00.000-07:00

Acabo de achar, case por casualidade, o novo video da manifestación que este pasado 18 de Outubro de 2009 encheu as rúas do Casco Histórico de Compostela. Segundo os organizadores 100.000 persoas. Segundo a policía, 50.000. A manifestación máis grande pola defensa do Idioma que tivo lugar neste país. Ollade a reportaxe:

Exposicións de Castelao e Brocos en Compostela

2009-10-23T01:32:00.001-07:00

A Sede Fundación Caixa Galicia de Santiago de Compostela acolle unha selección de debuxos do ilustre e polifacético intelectual Afonso Daniel Rodríguez Castelao, unha das figuras máis relevantes da historia de Galicia do século XX. En Cousas da Vida, publicadas entre 1922 e 1924 nas páxinas do xornal vigués Galicia, Castelao, a través da conxunción entre o debuxo e o texto, móstranos a Galicia agraria, o caciquismo, o drama da emigración e a xente da terra e do mar, criticando a realidade do momento. Temas tratados con tenrura e un fino trazo humorístico e satírico despréndese dos seus debuxos, moi expresivos debido á súa graza para a síntese da liña. “Debuxos de Castelao. Colección Caixa Galicia” é o nome que recibe esta mostra que poderemos visitar do 12 de agosto ao 25 de outubro en Santiago de Compostela. Ademais poderemos visitar no mesmo edificio “Debuxos de Brocos. Colección Caixa Galicia”, unha mostra do artista compostelán que recolle unha magnífica selección da súa obra, reunida na colección de arte da entidade financeira.

Ánxel Fole

2009-10-22T01:10:00.001-07:00

Outro personaxe co que nos retramos, en Lugo, foi Ánxel Fole; un escritor que cultivou todos os xéneros literarios (narrativa, poesía, teatro e ensaio), aínda que a súa sona venlle fundamentalmente dos seus libros de contos. Na súa narrativa, herdeira de Álvaro Cunqueiro, Castelao e Otero Pedrayo, Fole presenta a xeografía dos lugares de montaña nos que viviu, así como os traballos, costumes, diversións, etc. dos seus habitantes a mediados do século XX. A lingua dos seus relatos recolle a fala popular e inclúe abundantes dialectalismos, peculiares das zonas onde sitúa os feitos que conta. Os seus escritos achegan unha información etnográfica e antropolóxica fundamental do medio rural galego antes da chegada da mecanización. Os contos de Fole caracterízanse polo seu humor e polos temas esotéricos e misteriosos, ó xeito da narrativa oral tradicional galega

Máis información sobre o autor na páxina web da "Biblioteca Virtual Galega" (picar)

Astrónomos descobren 32 planetas fora do Sistema Solar

2009-10-21T01:08:00.000-07:00

Astrónomos anunciaron nesta pasada segunda-feira (19, luns) a descoberta de 32 novos exoplanetas - así chamados por estaren fora do Sistema Solar. Segundo os cientistas, os exoplanetas teñen tamaños que varian de cinco veces a masa da Terra a até entre cinco a dez veces a masa de Xúpiter, o maior planeta do noso sistema.

A descoberta - que eleva o número de exoplanetas coñecidos para máis de 400 - deixou aos astrónomos entusiasmados porque indica que pode haber inúmeros planetas de pouca masa para os padrons astronómicos, como a Terra, na nosa galáxia. (picar para ler máis)

Voltan os vellos tempos á TVG

2009-10-19T06:46:00.000-07:00

Do blog do "levantador de minas" extraio o seguinte comentario e video:

"Impresionante foi a resposta dos manifestantes ao que semellaba ser un acto demagóxico do Telexornal. Antes de que a Quintana se enchese por enésima vez para dar lugar ao derradeiro mitin da exitosa xornada de protesta, o reporteiro da TVG estaba xa a anunciar a disolución total do acto. O vídeo que apresentamos representa o que aconteceu antes de que máis unha vez a praza se enchese para escoitar tres inspiradas intervencións e unha nova interpretación do Hino Galego".

Tentar pode que o tentaran, pero coido eu que non o conseguiron. Pode ser que os tempos nos que Fraga convencía ao pobo levandoos de churrascada xa ficaron mortos para sempre... Hai días nos que me sinto orgulloso de ser galego, ben é certo que poucos, pero este foi un deles.

Avante!! Avante!! Avante!!!

2009-10-18T11:59:00.000-07:00

Unha marcha histórica, tanto polo número de participantes -maior que na anterior, do 17 de maio, e que os organizadores estiman en 100 mil persoas- como pola súa pluralidade ideolóxica, con representantes de todos os partidos políticos e sindicatos. Todos con dúas reivindicacións comúns: exixir "o dereito a vivir en galego" e protestar pola política lingüística do Goberno que preside Alberto Núñez Feijoo.

A marcha -histórica, plural e cun discurso máis positivo e aberto- terá continuidade coa recollida de sinaturas por vilas e cidades para unha iniciativa lexislativa popular. Fortes asubíos para a cobertura da TVG que conectou en directo xusto cando a xente comezaba a liscar da praza. A pesares das tentativas da televisión autonómica por captar imaxes da praza medio baleira, a marea humana fixo imposibel o seu acometido. Maís información en Vieiros ou Xornal de Galicia