每日一膠．荒謬的香港

為馬會增加五個賽馬日絕食？

2009-07-10T02:10:00.013+08:00

十多市民絕食25小時　抗議新馬季增賽馬日
2009-07-09HKT14:51
立法會議員黃成智與十多名市民在立法會外絕食25小時，抗議新馬季增加5個賽馬日。

黃成智表示，不滿政府未有諮詢市民及立法會就決定增加賽馬日。

他認為，以增加4千個職位及馬會收入減少為理由，並不合理；他又說，明早會在民政事務委員會提出動議，要求擱置增加賽馬日，並召開聽證會收集市民意見。

當雷曼苦主跳樓，都未有立法會議員為佢地絕食的時候，聽到黃成智居然為馬會只係增加五個賽馬日而絕食，真的 O 了嘴，不知所言。

想當年黃成智議員痛失立法會議席，長期都很同情佢；去到佢在《家暴條例》居然同道德塔利班企埋一齊，我都仲好尊重佢的宗教信仰；去到佢社工單野報錯，暗地都仲幫佢解圍，覺得佢只係無心之失；但係去到今次，我真係對黃成智議員－－作為一個立法會議員的政治判斷，深感懷疑。

如果香港一向禁止賭馬，突然開賭你去絕食，我可以理解；馬會如果係增加五十個賽馬日，你去絕食，我可以理解；但係馬會而家只係一年增加五日，點解要反對到去絕食呢？

沉迷賭博當然有害，世上有好多事情沉迷都一樣有害，賭博絕對唔似吸毒係生理的問題，而係心理的問題；我地呢個社會有無數人，都各有心理的問題，但卻以少數人自己造成的心理問題，當係生理的問題，而要禁止全部人的自由去做的話，呢個邏輯就極度有問題。

看見一個台灣的博客，講美國如何透過合法的賽車活動，去解決非法公路賽車的問題，而台灣卻反其道而行，只係識「禁制、禁制、再禁制」，再一次證明無論台灣香港定係大陸，中國膠式的思維永遠如一；點解外國會懂得用替代而安全的方法，去控制問題，而中國膠卻一味只識大叫禁止呢？點解人地會順人性而行，我地就個個都只能做「清教徒」，連諗都唔畀諗，睇都唔畀睇呢？

好啦，就當賭博真係好危險，一定要禁制啦，望一望香港最大的賭場係乜？香港最多人傾家蕩產係乜？絕對唔係馬會的賭馬，而係股票市場以及一切的衍生工具。

荒謬的係，當成街阿婆阿伯阿嬸阿叔，在每一間銀行前面狂按機，我想問點解從來冇一個立法會議員，敢去要求立法禁制呢個情況繼續落去？當雷曼搞出大頭佛，連七一都幾千幾萬人上街的時候，點解到今日，我都見唔到黃成智議員之流，去為佢地絕食，去要求政府強制立法監管這些名為投資，實為賭博的活動？

更荒謬的係，同樣係特區－－只係一水之隔的澳門，賭場愈開愈多，甚至在香港的公共交通工具上，大賣過海「享受」的廣告之時，點解我地的議員亦唔見開聲？點解冇人敢提出要強制立法禁止境外賭博？

其實就係邱騰華式的思維－－只在「抵抗力最弱」的地方動手，講得白一點，就係「只欺負沒有反抗能力的人」。就是這種心態做就民粹，就是這種心態導致次次都要核爆收場；因為表面上抵抗力最弱，往往只係短期；長期而言，呢種唔覺唔覺，屈埋屈埋的壓力一爆，永遠都只會一發而不可收拾。

傾家蕩產的過海多，定係在香港多？在股市傾家蕩產的多，定係馬會的多？我地荒謬的社會就係，開宗明義，明買明賣，健康監管，甚至係非謀利－－捐這麼多錢畀慈善團體的馬會，卻受到最多的投訴；反過來，好似搞「迷李老母」這類呃神騙鬼的東西，到今日都冇人敢提出立法－－例如禁止個人名義「短炒」，點解呢？

原因就係馬會好欺負，過海的賭場冇人敢惹；原因就係馬會好欺負，全港的大金融企業冇人敢惹；銀行靠乜賺錢呢？之前個個都吹係只做大客生意，「迷李老母」的事實證明連老弱傷殘一樣照呃，但係大家的目光去左邊？大家的論點係乜？平時唔賭錢的老弱傷殘被銀行呃，到今日都仲有人話雷曼苦主抵死；好啦，咁點解健康、合法、博彩額細的人自己去賭馬，開宗明義就係賭馬，卻有一大班人出來要為「增加五個博彩日」而去絕食呢？

我真係唔明，呢種邏輯係乜野邏輯。

伸延閱讀：
新投資產品：迷李老母推介

天山回憶

2009-07-08T17:03:00.004+08:00

看到烏魯木齊同室操戈，看到積壓在新疆的種族問題終於一發不可收拾，感到很悲哀很震驚。

經過今次的衝突之後，當維吾爾人殺完漢人，漢人又走去復仇之時，成件事就變為永不可解的死結；原本和平共處的希望，幾乎完全幻滅。

八十年代時，林忌曾居於新疆一個月；由天山北路到南路，登過上天山，亦坐過老式的蘇制軍機改裝而成的客機，看到的維吾爾人，純樸之至；家家半夜也打開大門而沒有劫匪，無論漢人與維吾爾人，雖然人人都是赤貧，可從來沒有漢回之分。

當年年紀小，多年來記憶中所及的，除了純樸的鄉情之外，當地的親友以吉普車接送上天山遊玩，不斷在絕壁旁邊走過，車輪不完全著地；走著走著，又死火了，又要落地推車；要不，單程路上遇見同樣的車輛，雙方就在窄無可窄的絕路上，勉強找空位通行。

上到天山，就在天湖旁，湖天一色的美景，遠方全是積雪的高峰，一切都美輪美奐；美中不足者，就是當地人紛紛隨地大小便，於是一步一驚心，唯恐中地雷。

看看地圖，唔好以為好多鐵路，黃色線係未建好的，只係「規劃」、「開始了動工」，要「建設大西部」，最少都三四十年，但中國共產黨仲有三四十年命嗎？

距離如此的遠，開發程度如此的低，再加上鄰國紛紛獨立自主，當幾個前蘇聯的加盟共和國獨立之後，各國都不約而同走去多黨制，如土庫曼也於 2008 年結束一黨專政之時，新疆的維吾爾族，要他們去擁抱遠在天邊的「中共沿海成就」，是否遠了一點點？

讀讀甚麼「中國文化」課本，讀讀那些天天談「中國文化愛好和平」的論述，就和否定其他家的價值一樣，我們那些偉大的「中國文化」專家認為，我們一點也不歧視外族，我們漢族一點也沒有大漢族主義，非常尊重他族的文化與權利。

持平點講句，中共的確已經好努力去處理少數民族的問題，但問題就係，本身共產黨就係爛透；對漢人爛透，漢人比較軟弱，沒有民族問題，沒有共嗚式的同情；但對外族？一方面出於文化上的歧視，另一方面就是互相之間的不信任與仇視，再加上荒謬的官商勾結腐爛問題，又邊有可能唔出事故？又邊有可能唔出問題？

瑞士一國就有四種國語，三分一人講法文，三分二人講德文與其他語言，如意大利文，但係人地一個國家四種語言，點解都可以立國幾百年？原因就係真正的自治，再加上聯邦制度，而非由一個大集權的中央去控制。

中國一日拒絕聯邦制度，拒絕真正的「一國幾制」自治，好似在香港咁，專搵弱智、無恥的荒謬代理人，結果就係只會永無寧日。（英國在英格蘭和蘇格蘭，從 1707 年以來都一直是一國兩制，可是臉不紅耳不熱的中國人，夠膽大讚係鄧小平「發明」的！okay，大家係歷史盲，okay，你贏哂！）

全民萬稅之七七事變

2009-07-07T05:11:00.011+08:00

當一眾「左派」還如在夢中，以為政府會給予他們夢寐以求的最低工資、最高工時等訴求的時候，他們卻沒有發現，特區政府在賣甚麼寶藥，而真正在背後偷笑的又是誰。

今天是七七事變，既是 1937 年的蘆溝橋事變，也是香港進入「全民萬稅」的開始；兩年前唐英年推行銷售稅失敗，一眾甚麼稅務學會、大商家一直憤憤不平，如今他們終於找到一位真正的代言人－－環境局局長邱騰華，因為假借環保之名，來推行「銷售稅」的計劃，一早已在政府的計劃之內。

不是說膠袋稅只收五毫子嗎？不是說唔用膠袋就唔使畀嗎？天真無邪的香港人，就好似二次大戰之前的英、法的政客一樣可愛純情；唔知大家有冇留意政府的咨詢文件？目前的膠袋稅只係第一步，之後萬稅的魔爪就會一步一步入侵各領域！由任何使用膠的貨品（如膠樽），到任何會造成污染的貨品（如早排邱騰華漏了口試水溫的五大類貨品回收費），那些自嗚清高，以為自己是環保鬥士的人，完全不知道政府就係睇中你地熱血愛環保的弱點，睇中你地借環保之名就會乜都應承的弱點，其實係變相達到銷售稅之目的。

世界每一個政府巧立名目開徵新稅的時候，都係用大堆美麗的包裝同藉口，事後收左錢又改善唔到，你估佢地會取消？落左袋的錢，咁容易會嘔出來？

其實來來去去都係咁多錢，原本銷售稅影響基層的錢，改頭換面變左包裝，以「環保之名」，其實又係收番咁多，原本政府用在環保的開支就大減，但係咦？點解咁多口口聲聲為基層的人，居然今次大力叫好？所以政府未利用大家「愛環保」的心，就好似平日成日想利用你地「愛國」的心一樣，去達到「擴闊稅基」囉。好彩仲有社民連投票反對膠袋稅，唔係我地真係會嘔血。

膠袋稅第一步一定會「失敗」－－點解？唔失敗政府又點會有藉口，去進一步「追收」呢？劇本早已寫好，遲些邱騰華就會出來講，因為一眾生產商走法律漏洞，因此佢要進一步封殺漏洞，一方面收膠袋稅，另一方面再追收生產商的額外回收費用；早排邱騰華爆出來如要在電子產品收「回收稅」，就係另一個例子；試問「環保份子」係唔係會拒用電腦？係唔係會拒絕上網？係唔係會拒看電視？係唔係會拒用洗衣機？係囉，所有貨品其實都係浪費；所有貨品最尾都可以全面開徵回收稅呀、浪費稅呀、包裝稅呀等項目，那麼唐英年兩年前做唔到的「全民萬稅 GST」，呃大家係環保用未做得到囉？好絕呀條橋，絕到很多自命為基層鬥士的朋友，都如在夢中，完全唔知發生咩事，仲以為係「環保德政」－－冇錯，係環保，不過唔係政府出錢，係把所有政府應出的環保開支，轉嫁落普羅大眾身上；於是政府就可以利用呢筆額外的收入，用來處理任何環保的建議；很快就會和大家說，「用者自付」，想環保些？畀多些吧！基層市民的重擔？唔緊要，我畀你最低工資！我畀你最高工時，你地快 d 全力支持環保！原本由商家稅款支付的環保費用，就全數轉嫁到基層市民身上！多謝全香港的基層鬥士為基層努力成功爭取！

左派的朋友就係活在夢中，因此唔相信最低工資會造成失業，就係唔相信最高工時會造成更多的外判，就係唔相信環保稅會等如 GST，荒謬至極的，係佢地口口聲聲話信唔過曾蔭權，信唔過保皇黨，信唔過今日的特區政府，叫政府落台叫得最大聲的就係佢地；但係只要對方轉一轉包裝，佢地就突然「信到十足十」，突然相信政府轉死性會益佢地，突然相信原來政府好有意思幫基層，突然相信政府會聽完佢地發音之後，會向最基層的市民利益靠攏，而唔係放棄原有的大商家官商勾結的利益集團。

讀者，我地係唔係發緊夢？當平日大大聲講「信佢一成，雙目失明」的又係佢地；當政府玩陰招，信到十足十的，又係佢地？點解佢地寧可信曾蔭權，寧可信曾蔭權最親信的邱騰華，寧可信忽然最低工資的梁振英，都唔信下平日同佢地一齊爭民主、自由、人權的我地？

單線思考的人，就係唔明白點解要搞膠袋稅；大家有冇諗過，最初抗拒 GST 最力的人係邊個？就係全香港的零售商戶；一大班「保育份子」，反對大集團，支持小商戶，有冇諗過 GST 會最打擊誰？就係小商戶。

香港仲有好多小商戶係「未電腦化」，好多連收銀機都冇；以往小商戶報稅，都係簡簡單單自己「申報」，好多時都係約數，而唔需要紀錄全日所有交易的。問題來了，在沒有收銀機的情況之下，如何紀錄膠袋稅？好快呢個問題就會變成，政府強制所有小商戶都強制裝收銀機，又或者強制佢地紀錄所有交易。

小商戶在全部交易都被政府紀錄之後，即時的反應就係交多了稅；佢地交多了的稅款，唔知又影唔影響佢地的生活呢？好多自命為基層代表的人，又知唔知道如果所有交易如實申報，會有幾多小商戶連捱都捱唔住貴租，要立即報笠呢？再加埋「最低工資」，你估第一個倒閉的是誰？是大集團定係小商戶呢？

小商戶唔識玩法律漏洞，只會老老實實收膠袋稅，再交膠稅袋；好囉好囉，百貨公司買其他野可以有膠袋？你估中產會唔會因此改變佢地的消費習慣，再轉去大商場、有膠袋的地方度買野呢？

當膠袋稅已成習慣，第二階段、第三階段，以至各行各業的額外「回收成本費」、「廢物處理費」就會陸續推出，最終買所有貨品都要交「回收稅」，唔知所有支持環保的基層市民，會唔會覺得呢種稅款係佢地的福音呢？

民怨四起？Wow! 到時以梁振英、唐英年等人，就會大大聲去同中產市民講，拿，我地做哂泛民要我地做的事，你地話支持民主好呀，而家衰哂就係聽泛民的話啦？你地仲要雙普選？你地仲敢選泛民做特首？你地仲敢畀泛民控制議會？

絕呀！畀個累到全街失業的最低工資（仲要係特衰政府版），再畀個全民萬稅 GST 環保複合體，一箭雙雕，既毀滅泛民的雙普選訴求，又毀滅所有基層團體的聲音，呢條絕橋，就係來自中國共產黨。

到時港人自港衰哂，佢地就執行曹二寶的「第二管治核心」計劃，話港人已經失去自治能力，所以由中央接管，唔知到時香港人會唔會拍手叫好呢？

佢地寧可信天開眼，寧可相信曾蔭權受上帝感動，寧可信梁振英良心發現，寧可信唐英年邱騰華係救世主，都唔願意相信一次又一次，判斷中共、土共陰謀正確o既我地。

祝大家好運！

回應「中大學生會」的荒謬聲明

2009-07-05T23:11:00.008+08:00

最近有個無神神針對黎智英、楊懷康、施永青、獅子山學會的聯署網頁，把香港官商勾結簡化為「自由經濟」的錯誤，有好多人自稱只係「小問題」，可是不但沒有為這「小問題」道歉更正，仲變本加厲，再以「中大學生會」的名義署名，再寫了一篇又長又悶，另外左右不分、自由與專制不分的文章。

讓我地過濾廢話，只搵佢地最錯誤的論點拿出來睇睇
「民主與左右－－香港的局面是奇怪的。被視為左派的竟是保守的親政府的黨派，而這個政府卻是個商人政府，由技術官僚和大商家共同成為香港的管治者，由政治到經濟都管制著我們的生活。」

有咩好奇怪呢？望望大陸，叫做共產黨的政黨，係親商人定係親人民？反問「中大學生會」一句，共產黨係「左派政黨」，定係「右派政黨」？唔知「中大學生會」你會點答呢？

中國共產黨點解會走上「市場經濟」的道路呢？唔知「中大學生會」是否反對鄧小平的「市場經濟道路」呢？點解最初「咁講理想」，咁「以人為本」，咁著重「財富再分配」的中國共產黨，到最終會山窮水盡，而走上「市場經濟」的道路？唔知「中大學生會」對呢個問題，會有咩答案呢？

「吊詭的是，自由經濟的擁抱者一方面說香港之困來源於官商勾結，一方面又提不出實際的方法去限制大地產商對我們的生活和公共空間的蠶食」

吊詭的是，當香港係官商勾結，大陸卻有更多的官商勾結，其實香港和大陸的官商勾結，兩者之間的分別是甚麼？當鄧小平進行改革之前，大陸冇商，但國企的腐敗腐化，唔係一樣咁嚴重咩？只係赤貧下的「比較平等」，其實要係黨員先有的特權，唔知「中大學生會」又有咩回應呢？

好了，講到尾就穿了，事實就係「官商勾結」，或者「官官勾結」，或者唔公平的制度，點解？去到尾的問題，根本同經濟左右無關，而係自由與專制，係有沒有民主制度的問題；至於腐敗，係法治的問題，可是「中大學生會」，卻把所有的問題，推去「自由」、推去市場經濟！

雖然上面幅圖嚴格來說，唔係「非常完全正確」，但指出了的問題就是，有一班人，把兩度空間視為一度空間，把自由與專制的分別，當作了簡單的左與右－－左就是對的，右就是錯的，膠到冇朋友。

民建聯係唔係左派？工聯會係唔係左派？共產黨係唔係左派？而家有班友，就係輸打贏要，明明呢 d 都係左派，佢地就賴落右派度，唔知「中大學生會」敢唔敢出一個聲明，說明中國共產黨唔係左派，係右派呢？

「一方面又提不出實際的方法去限制大地產商對我們的生活和公共空間的蠶食」－－原來方法就係廢除自由經濟，就可以「限制大地產商對我們的生活和公共空間的蠶食」？定係原來發一篇宣言，發幾個音就可以做得到？我地係唔係發緊夢？

乜在冇普選的情況之下，呢班自以為係「救世主」的「偉人」，以為發幾個音就可以做得到？定係佢地打算進行革命，去推翻現政權，去進行「土地改革」？

好啦，到香港有民主普選，反問一句佢地怕乜？佢地怕在普選之後，佢地的主張唔會得到市民的支持？定係去到尾，佢地講支持普選只係用口，真係做的時候，就要消滅左自由派先？乜「中大學生會」決定在「冇民主」的情況之下，打算用「廢話攻勢」，去「說服政府」消滅奸商？去「說服奸商」放下屠刀「立地成佛」？

我地係唔係見鬼？點解署名「中大學生會」的人可以寫一篇如此荒謬的文章？唔知中大學生覺得呢種智商的評論，代唔代表中大的學生？

「現時由大商家、大地產商把持的所謂「自由經濟」體系，其實是最非人性的制度！而低標準稅率和高地價政策，這些自由經濟理論的擁抱者最捍衛的政策，正正是做就今日經濟非人化困局的元凶」

荒謬！香港今日樓價貴到咁，絕對唔係因為「自由經濟」，而係因為中國共產黨的人為干預！在八十年代以前，香港的樓價絕對唔係天價！公屋係幾時開始推行的？乜推行公屋時候的香港，係「反對自由經濟」的香港咩？

香港樓價炒到咁貴，係正如曹仁超所講：「1984年7月中英聯合聲明草簽，限制香港政府賣地每年五十公頃，令香港住宅樓售價由1984年7月至1997年7月每呎由600元上升到每呎12000元，上升二十倍。」呢 d 有形之手干預市場做成的結果，居然佢地可以賴係「自由經濟」？朋友，你係唔係又「左右不分」呀？

「低標準稅率和高地價政策」係咩來呢？呢個係英國留下的制度，簡單來說就係用「間接稅」去取代「直接稅」，用高樓價去取代高稅率，在政治學上係促進社會穩定的制度；在 1984 年之前，香港的樓價從來唔係呢個天價；當年在大陸落來做冇學歷冇文憑做幾年野，都可以儲到錢買樓，呢個制度絕對唔係今日的制度；反問一句，由港英時代到今日，轉變左係乜？乜當年李嘉誠冇賣樓咩？乜當年香港奉行的係「社會主義」咩？乜香港當年唔係奉行「自由經濟」咩？點解當年香港行自由經濟唔見佢地大鬧特鬧，到今日佢地就話所有問題係「自由經濟」的錯？乜限制香港賣地引起的樓價上升二十倍，居然係「自由經濟」的錯？

「所謂的官商勾結的困局，根本是出在結構性的政經權力的過份集中。追求一個可以活得更幸福的社會，必須同時把現時過份集中的政治、經濟權力同時解放。宣言追求的，既不是大市場，亦不是大政府，而是大社會，讓權力歸於人民，讓社會大眾真真正正可以掌握未來發展的方向。」

好呀，大社會呀，地球上有冇一個咁樣的國家？
我地好敬佩，自稱「中大學生會」的文章發表者，在地球上發明左一套全新制的制度，就係可以在未有民主，亦反對自由經濟，亦唔係共產主義的「大社會主義」，呢項偉大的發明，如果係真，絕對可以得到諾貝爾和平獎。

但係睇下佢篇文章，乜原來寫幾隻字，講幾個「理想」，就等如一套「可行」的制度？佢大大聲說自由經濟支持者「提不出實際的方法」，原來佢篇廢話就係「實際方法」？原來大家叫叫口號，簽簽宣言，大叫「大社會主義萬歲」，個社會就會變成「大社會主義」？然後李嘉誠就會賣平樓，然後香港人的貧富問題就會消失？

見鬼了，我地係唔係遇到毛澤東轉世？乜佢地的行為咁似 1949 年之前的中國共產黨？把所有當年中華民國的錯，說成是腐敗的國民黨，結果土改了，結果人人平等了，結果消滅商人了，中國人有沒有變得更富強？土改、人民公社的結果是甚麼？

結果就係赤貧；呢班人最大的問題，就係唔讀歷史，唔識歷史，對前人犯過的錯誤完全唔知，自大到以為可以用幾句廢話，簡單地解決幾百年、幾千年人類社會都無法解決的問題，絕對係既自大又荒謬。

當佢地大聲疾呼，話左派唔等如共產黨，話左派唔一定支持專制之時，佢地又有冇反問過，乜支持自由經濟就一定係美國式的自由經濟主義？戰後的法國奉行的「戴高樂主義」，係法國的右派，唔知佢地又係唔係反對戴高樂式的右派？克林頓係美國民主黨的總統，佢在美國算係「新左派」，但係克林頓反對自由經濟咩？貝理雅係「新工黨」的英國首相，佢都係左派，但佢又反對自由經濟咩？

上面的所有例證，都再一次證明，有人連最基本的知識都唔讀，最基本的問題都搞唔清楚，就把「官商勾結」的專制政權腐敗問題，全部歸罪於「自由經濟」－－乜原來經濟「自由」點，就會造成腐敗？係唔係太自由先會「腐敗」？咁最唔自由的北韓，係唔係全世界最偉大的國家？乜原來「中大學生會」支持成龍的講法，想一齊移民北韓嗎？

大家覺得用民主制度去踢爆官商勾結實際，定係覺得推行「社會主義」，呼籲「以人為本」、呼籲「關心社會」、高叫「大社會萬歲萬歲萬萬歲」，可以解決「官商勾結」的問題？把稅率調高，把表面的樓價解低，原來就可以解決香港基層的問題？乜中大學生會原來係「全民萬稅」如銷售稅 GST 的支持者？原來提高稅率就可以解決香港基層的問題？

好啦，唔好又話我屈佢地，佢地只係講過「提高標準稅率」－－好想問，佢地識唔識法律？有邊條法律可以制止商人「移走」？唔好講搬去遠，只係搬去大陸好唔好？當香港提高標準稅率，你覺得 d 大地產商呀、奸商呀、衰商呀，係傻仔到會畀你加稅，定係用所有方法去搬走避稅？全世界有咁多個「避稅天堂」－－香港都幾乎被法國總統加落呢個名單上面，先有今日的繁榮，原來佢地認為加稅d 商家係傻仔，會唔識搬走的！

天才呀！可惜係天生的蠢才－－只不過，呢篇文居然係用「中大學生會」的名義發出的，中大學生，唔知你覺得呢篇文的智商，代唔代表你？

「香港七、八十年代的經濟起飛，不過是源於中國大陸正值改革開放，需求大增」－－從呢一段文字，好難令人不懷疑，呢位自稱「中大學生會」的人兄，係一位土共－－只有土共才會持呢種論調，證明左佢對香港係完全無知。

毛澤東幾時死？1976 年；鄧小平幾時上台？1978 年，佢幾時訪美？1979年；當鄧小平「開始」開放改革的時候，最起碼都要到八十年代頭，先有多少實際的動作，先有多少實際的經濟發展－－而且仲係非常谷底的發展；而呢位「中大學生會」居然，把香港自六、七十年代的經濟起飛，一筆抹殺；把七十年代香港已被稱為「亞洲四小龍」的經濟繁榮，居然話係「中國的需求」！

唔識歷史的中國人，篡改歷史的中國人又一例證－－乜七十年代香港的貨可以運上大陸賣？乜香港工業製品在七十年代賣去大陸？發開口夢呀？香港的繁榮至多話係「難民」人口增長係因為大陸，但關大陸的需求乜事？連呢 d 最基本的事實都唔知就想「改變世界」？仲敢用「中大學生會」名義，去丟盡中大學生的面？

福佳當奴勿當奴「Beat It 兩三次」影片發佈

2009-07-04T04:29:00.003+08:00

七月四日新文章：鑑賞力
七月三日新文章：由膠袋稅到全民萬稅
四萬人慶回歸？警方何在？

化作火箭擊中禮賓府
Oh Wow Wow Wow Wow Wow yeah
炸埋兩三次　有心情過一天不當奴！

四個矇契爭進禮賓府
神奇住埋十隻狗，Wow wow wow yeah
詐傻詐乞兒，佢心腸如鐵面亂噏！(我代表你我代表你我代表你我代表你！）
（亂噏廿三亂噏廿四亂噏廿五亂噏廿六亂噏廿七亂噏廿八信佢一成雙目失明信佢一成雙目失明）
鋪鋪搞笑恥笑失笑會癡線真心膠智低智反智快癡肺
狗官豬官衰官多到冇得計廢物廢物廢物 (送去堆填啦！)

一心洗劫打劫搶劫搏得米一班衰樣狗樣狠樣愛失禮
福佳不該 poor guy 應去搞喪禮禮成禮成禮成 (三鞠躬 Babe！)

信佢一次　雙眼會燒毀
民賤聯贈企鵝呵呵呵 yeah
有人嗌非禮！嘩！真人發花癲！亂屈！

CCTV CCTVB
袁大頭是隻狗 Wow wow wow (狗吠) yeah
控制人界真相狗噏傳頌香江勿當奴！草泥馬！勿當奴！草泥馬的！

鬼咁多廢拉多到甩肺！多咁多廢拉多到甩肺！
廢 Bow Tie, (Beat it) , Bow tie, (Beat it)
Donald doesn't represent me!

收下聲廢拉收下聲喂！收下聲廢拉收下聲喂！
廢 Bow Tie, (Beat it) , Bow tie, (Beat it)
Donald doesn't represent me!

鬼咁多廢拉多到甩肺！多太多廢拉多到甩肺！
廢 Bow Tie, (Beat it) , Bow tie, (Beat it)
Donald doesn't represent me!
收下聲廢拉收下聲喂！收下聲廢拉收下聲喂！

(前半乃「勿記」之最新廣告歌變化而成；後半則混合了 MJ 的 Beat it 變化而成）
MP3 7.1 新 update
MP3 打包下載
MP3 打包下載

七一晚上報導：晚上十一時十五分消息:黃世澤持食物到場支援現場人士，有警員突然搶去佢的食物，現正落口供控告差人搶劫。

晚上十時十三分消息：警方完全封鎖現場，打算武力清場

晚上九時消息：收到朋友通知，有年輕朋友圍在政府總部門外不肯散去，要求曾蔭權出來面對市民等，以及要求警方立即解釋，為何要評估泛民七一遊行人數、評估雷曼苦主人數、卻偏偏不評估「四萬人慶回歸」的官方數字？

現場朋友急需要各住市民的聲援及支持，以及基本食水、食物等！

鑑賞力

2009-07-04T03:06:00.006+08:00

經常聽到朋友問，為何香港沒有這樣，沒有哪樣，為甚麼同一件貨，質量在外地高這麼多？

舉例說，在兩大超市賣的生果如橙，比起外國所吃的質量，實在差天共地；本地超市賣的，差起上來可以外表超靚，呃過選生果的老手，但內部居然不知所謂，乾到死、咬不斷－－為甚麼在歐洲、在日本，這些事情很難發生？

就正如本地的電視台，七百萬人住的城市，為何只得兩個免費中文台？為何本地電視台製作的貨色奇差無比？為何本地的流行曲衰哂？為何本地電影全部江河日下？香港發生咩事？

當大家鬧爆製作單位的時候，有冇諗過問題係出在群眾自己？點解 CCTVB 到今日都仲有咁高收視？點解明明難睇到咁，都仲有咁多捧場客？係我地病左，定係主流觀眾病左呢？

再望下報紙，有幾多野係我地想睇的？有幾多言論係膠到冇朋友的？有幾多人係講野可以唔算數，事後走數又冇人追究的？

老前輩一向講：「最重要係運氣」－－年輕時不明白，近年開始有極深的體會，其實運氣在全世界都一樣咁重要，只不過在香港就特別重要－－點解？因為鑑賞力奇低。

因此，在香港生活的明顯好處，就係平野執到好野，因為冇人識貨也；絕大部份的膠人，都以為貴野先有好野，膠到最終的方法，就係佢地連分辨好醜的能力都冇，於是只係睇價錢牌－－價錢貴就好，價錢平就係渣，呢點睇下各大專賣「貴價貨」的「名牌」深有體會；同一套名牌，為何外國就真係賣緊好野，但香港就專賣垃圾呢？為何最垃圾的款式都送來香港、中國等地「傾銷」呢？

當時下有好多「有心人」大聲疾呼，覺得年輕人迷戀名牌的時候，佢地有冇諗過，呢種心理係邊度學番來的？未係家長本身囉；畀貴些就好、「專業」就好，免費野冇好野，因此一定要收得貴，冇料都要貴！

呢種現象在傳媒到好常見，例如某些「高貴」報紙，出文章都要「睇 title 」，出得 title 愈 high，就好似文章的質素越高一樣－－點解可以存在咁耐呢？因為讀者質素就係咁低，佢地連分辨好醜的能力都冇，只有睇：「因為佢大學讀電腦，所以佢係電腦人」；「因為佢係律師、因此佢識法律」.....

因為，佢地只能夠把人「分門別類」，你唔係人群心目中的，就會被歸類為「不能分類」，簡單而言，即係「唔係人」。

去到政治，就係「你係民主黨！」、「你係公民黨！」、「你係社民連！」，於是簡單的分類與標籤，就「解決」了問題；而另一種荒謬的分類方法，就係「我係無黨無派的中立人士！」好中立、好客觀、嘩！好 high 呀！

癡線......

就係因為連食橙的人都分唔出橙味，所以香港超市賣的橙，成日都可以冇橙味；就係因為飲果汁的人分唔出有冇果汁味，所以由大陸到香港，唔係賣假果汁，就係賣大量溝水的果汁。點解成街都係假貨？因為呢度的人連真同假都唔識分，咁點解要賣真野畀你呢？有條傻佬願意畀一樣價錢買假貨，你可以賺多十倍，點解唔賺？當成街都係假貨，咁點解仲有傻佬賣真貨？

就好似最靚的名牌點解唔肯入大陸生產？因為你做得愈多，人地就抄得你愈多，最後佢用假贏你真的，成本只係百分一。當你做真野都係倒貼果時，索性乜都唔做囉，唔做最好，因為最少佢冇得抄你。

曾幾何時，有一個人兄，佢好浪漫地深信，只有堅持自己，堅持賣真貨，始終會有識貨之人；可是呢位人兄最近發現，識貨之人實在太少，迷戀假貨的人實在太多；人地賣假貨發達，你賣真貨則蝕本倒貼，結果會點？結果就連呢位人兄都決定轉身而去，你地買飽垃圾佢啦。

於是乎，成街都得番假貨，呢 d 就叫做「劣幣驅逐良幣」，點解香港各行各業行行仆直？原因就係畀錢買野的，全部都係傻佬，可以畀人呃；雖然呃得多可能佢都會走，但轉個名，改頭換面，又另立名目呃過，一樣照上當。

前排林行止寫了篇文講香港的縮水樓，情況就係最明顯的例子－－當香港人洗幾百萬、幾千萬去做人生最大的投資時，佢地都可以掛住望個會所，望個假廣告「嘩！歐洲豪門景呀」，但唔識分間隔，唔識分用料，連最基本搵把尺度實用面積，搵計數機計下管理費合唔合理都唔做，你話又點會唔無法無天呢？

所以上海未賣緊成幢跌落來樓；所以大陸可以賣「紙牆」樓，因為一眾膠人可以聽到「新樓」兩個字，就乜都唔理畀咁多錢買，所以我地個民族就成為了專用垃圾貨的民族，因為畀垃圾你都買，點解要畀靚野你用？點解要畀高質素的貨畀你？試下去歐洲？試下去美國？呃得到都畀人告到甩褲啦，何況你估外國似香港咁多傻佬？

又例如娛樂版恥笑「走音歌王歌后」，笑下啦，眾人中目中的「歌神」、「天后」，去到外國都係三四班的貨色囉今時今日，點解會咁呢？由「四大天王」開始，乜香港仲有「樂壇」咩？

睇番六、七、八十年代的香港舊野，成日感到好唏噓，因為當年的香港絕非如此；連李小龍一個「武師」，的內涵都多過今日的所謂「精英」許多時，你就知道點解當年香港可以衝出國際，今日只可以「背靠大陸」。

就好似《Beat it 兩三次》中，一大堆廢拉阻住地球轉，點解？因為要廢到咁，都仲有傻佬覺得佢地唔係廢，都仲有曾鈺成之流出來大大聲：「好多人都唔知北極冇企鵝啦！好多立法會議員都唔知啦。」

如果係真，再一次證明香港的立法會係垃圾會；如果係假，亦證明左香港的立法會中人連最基本的質疑都唔會做－－佢地屈你，未出問卷玩番佢囉，點解冇人做呢？

就係冇人做... 就係好多野都冇人做，因此迫到一些唔想做的人，都勉強出來做；當你勉強出來之後，仲要有人老羞成怒，大大聲屈你：「佢都係想搏上位之嘛」。

要搏上位，企出來當眾搏啦；就係唔出來都有人講你搏，成班膠人「道聽途說」，「聽聞」、「覺得」就算數，把你冇做過的事，信到十足；把同你無關的事，入哂你數，把你做的事，全盤否定，當係其他人做的－－例如，Title 大些的人；例如，名氣大些的人。

這就是「江山一代自有人才出」與「冇人才」的對比，就係因為唔識貨，冇鑑賞力，所以最後得番垃圾；Sorry，冇好野唔係因為冇人才，而係「上頭」連最基本的分辨能力都冇。

當走音你都聽唔出，點解要執靚佢呢？當唱 live 走音都分唔出，點解要練歌呢？當咪嘴都冇人知，又點解要唱？－－所以在外國走音被人笑到面黃，香港就成街都係走音囉。

所以謝天華要演幾十年先有人欣賞佢演技，所以 Michael Jackson 要死左大家先懷念佢；試下上星期五之前改首 MJ 的歌？成班友會出來恥笑你：「1982 年的歌你都仲改？Out 唔 Out D 呀？」

事實就係，因為 MJ 死左啦，所以潮流興 MJ；因此即使佢做的事情乜都冇變過，明明過氣都會時興；時興就會令質數提升一百倍、一千倍，這就是潮流的力量！

當失去了，大家才會有「少少珍惜」；在膠港，失去左果時大家仲傻更更：「咦？點解好似有少少唔同左？」「有咩唔同呀？」「唔好咁敏感啦！你神經病！」

早排重睇 N 年前為左睇 kong u 入場睇果套《玻璃之城》，黎明講左句：「香港冇癮呀......」

細個睇時唔明，今日明啦。

所以見親朋友，都係果句：「走得就走，唔好返來，呢度冇希望......」

即使中共倒台在即，即使民主來香港，結果只係一場大亂的開始，而唔係大亂的終結，情況就好似法國大革命，推倒了暴君，但來者將會係一亂大混亂時期，因為呢十幾廿年的停滯，已經把未來的好年華全部「透支完畢」。

最近聽到一班「德高望重」的老前輩在擔心香港後繼無人，其實這個擔心是白擔心，反問一句：「你們又做了些甚麼，去扶持有才能的接班人？」

就好似戴高樂搞「自由法國」把法國由谷底復興，大家都以為佢受到好多前輩的鼓勵、支持、支援，對唔住，其實係百無；有好多年輕網友和我討論時都唔明白，例如點解好多「好明顯」的事情，都不如理想發展時，林忌回應：「做事之難，難以想像」－－舉例說，只係三個人坐埋去做一件事，在香港已經難過登天，何況係......

唔單止百無，佢地背後仲要中傷當事人，仲要偷的橋當係自己的，仲要所謂有正義的路人，亦對呢 d 事情仲不聞不問漠不關心，就好似內地見人行劫非禮強姦，好幾次都有好多人無動於衷一樣。

最明顯的例子，就係香港的業主立案法團；明明大家業主一人出一分力，問題就可以解決，但永遠都畀衰人騎劫，因為好多人是非不明，黑白不分，專愛衰人，然後畀人呃，都係「其他人」的錯。

大家一齊仆直囉，最過癮係係掟一個核子彈一齊爆炸，人肉炸彈，就係咁樣來的。

呢個就係今日無助年輕人的寫照，大家就係等緊果個唔怕死的死士，一齊掟炸彈核爆－－如果造得到任何形式的「核子彈」的話。

呢個就係人類在歷史點解一直重覆犯錯的原因，每隔一段時期，就會有班膠人膠到冇朋友，要搞到衰到革命。

最過癮係，幾千年、上萬年的歷史，到今日都仲有堆膠人深信，唔需要有任何制度，單靠廢話就可以「勸誘」人類向善。

都係果句：「走得就走，唔好返來，呢度冇希望......」

由膠袋稅到全民萬稅

2009-07-03T22:03:00.011+08:00

邱騰華：不擔心商舖獲豁免範圍濫派免費膠袋
2009-07-03HKT18:26
本港由下星期二起徵收膠袋費，環境局局長邱騰華表示，現時難以預計可以減少膠袋的數目，當局日後會派人到堆填區實地點算膠袋數量。

邱騰華接受本台專訪時又說，不擔心受規管商舖內獲豁免的範圍，出現濫派免費膠袋的情況。而在實施初期，環保署會協助商戶，以及向市民解釋法例。

好一個「現時難以預計可以減少膠袋的數目」！漏口啦！漏口啦！原來偉大的環境局局長在推行一個政策之前，係連預計的結果都冇呀！再一次證明被林忌評為膠到冇朋友的人，真係一件「真心膠」，對於一個政策的推行，連最基本的估計都冇？連目標係乜都冇？教小朋友返學，都要目標為本啦，你搞咁大場勞民傷財的「偉大環保計劃」，連最基本的預計減少浪費數量都冇？咁環境局使乜請你做呀？你收咁高人工一個月連最基本的野都可以冇做？

比起林瑞麟局長，起碼林瑞麟局長交足貨－－叫得做「人肉錄音機」或者「人肉 MP3」，佢真係做到一個錄音機的效果，佢真係肯畀大家指住佢來鬧而「任鬧唔嬲」；邱騰華？而家叫佢搞環保，佢除了識「強制」，除了識「收錢」之外佢做到乜野？咁耐以來佢除左呢兩招之外，做過乜野？呢兩招求其街邊搵條友，就算叫最後生的「局長助理」都識啦？使唔使搵佢做呢？使唔使浪費地球資源，畀幾十萬佢一個月去做呢份工呢？呢幾十萬捐畀慈善團體，係唔係減少浪費地球資源呢？

比起邱騰華其他「膠到冇朋友」的政策，原本膠袋稅已經係算「冇咁膠」的政策，但係邱局長自己愈描愈黑，令大家發現原來佢「硬膠政策」背後，亦係荒謬到極點；第一，執行一個政策，點可以連最基本的目標都冇？你五毫子收費的政策係點訂出來的？你唔係有一個明確的目標，憑乜野去決定五毫子？憑乜野去決定一個如此影響民生的政策？而家唔係玩泥沙，唔係砌積木，唔係可以今日五毫，聽日三毫，後日兩蚊，而係一個影響無數行業，影響無數民生的基本政策！應該一蚊就一蚊，而唔係五毫！應唔唔收就唔收，唔係試下點再決定！邱騰華可以連預計減少幾多膠袋都冇一個目標同數字，就胡亂去制訂一個關乎咁多人的政策？再一次證明，由頭落尾邱騰華唔係為環保，而係只係「為做而做」－－為左證明佢有做野，為左證明佢做左野，於是就唔理三七廿一，做左先算；衰左？到時佢「高升」左啦？衰左？你班議員大佬投票支持，最尾又賴番落你地度囉！衰左？再賴落低層的公務員度囉，話佢地執法不力，唔係佢的錯，明冇？

「膠袋徵費於下月7日起正式實施，環保局已安排本港約3000間將會徵費的商舖，本月底起陸續在收銀處展示一個綠色標誌，提醒消費者每索取一個有手挽膠袋就須繳付5毫子。已有商戶計劃走法律罅，例如以毋須徵費的紙袋、無手挽膠袋取代有手挽膠袋，環境局局長邱騰華強調，徵費是「千呼萬喚始出來」，得到社會廣泛共識，故取巧只會令消費者反感，呼籲商戶要有社會責任。 (商報)19/6/2009」

第二，香港仲係唔係行《普通法》的地方？普通法的精神，就係冇禁止的事就可以做；而家用膠袋唔係殺人放火，唔係「不合道德」的事情，亦唔係一條殘舊的法律，因為時代轉變而多左「法律罅」，畀咁多時間，畀咁高人工，邱騰華局長你收錢來做乜？唔係收錢來畀你制訂一條可行而值得推行的法律嗎？如果未推行就會有「法律罅」，係唔係再一次證明邱騰華思慮不周呢？乜法律係用來玩泥沙朝令夕改的嗎？乜法律唔係應該諗清諗楚，度好哂先推行的嗎？當未推行就有漏洞，係唔係應該執好左先出街，而唔係係度朝令夕改玩市民呢？乜有急切性未執好就胡亂推行咩？如果有，係唔係應該禁止用膠袋，而唔係不痛不癢地，收五毫子？定係邱騰華好想推廣「五毛黨」？所以想成街都係「五毛黨」？

烏干達新例　使用膠袋囚 3年 2009年06月13日 (09:22 pm)

外電報道，烏干達政府宣佈由明年起，任何人一旦被發現使用膠袋，可被判囚 3年或罰款。當局另禁止銷售及使用膠袋，又下令所有膠袋生產商清盤

從烏干達的例子可以再一次證明，邱騰華根本唔係搞環保；如果目標真係想禁絕膠袋減少浪費，學烏干達囉，一齊禁止膠袋的製造同使用，點解邱騰華唔咁樣做呢？拿，如果邱騰華話：「因為未有迫切性」，咁未唔好做住先囉，等佢諗好成個計劃，減少幾多膠袋先推出係唔係？特膠政府連烏干達都不如！

拿，一方面佢又唔禁膠袋，另一方面又連預計可以減到幾多都計唔到，事實再一次證明，邱騰華搞膠袋稅根本唔係真心為環保！佢係為左「為搞而搞」，為左證明佢做局長的價值，於是學董建華的衰野，乜都唔理大堆頭做左先算，衰左唔認數仲賴落其他人度，就係呢種啦；另一方面，佢係要幫唐英年手，用膠袋稅變相搞 GST 銷售稅；呢樣賤招就係學落左台的倫敦市長利文斯通－－最初講電子道路收費係為左減少塞車，搞完一輪又塞番哂之後，佢就話係為左減少廢氣，於是 2008 年佢終於落左台！

「邱騰華表示，開始膠袋徵費後，如果代用購物袋數目太多，或者消費者用完即棄，即是未能攺變生活習慣；並指出，這計劃其實可以再推廣至其他包裝物料。」

今日環境話為左膠袋收你五毫子，效果唔得就加到一蚊，再唔得就兩蚊；大家避稅就巧立名目，乜都收稅，最終所有物料都係浪費，所有物料都要收稅，幾年後就全民萬稅，原來消售稅 GST 就係借「環保」的名目來落實！

唔明？今日就膠袋稅，聽日就話你食飯要收「膠盒費」，後日就話你去廁所要收「額外排污費」－－咩呀？掉垃圾要錢o架，去廁所排出去又係要錢o架，連呼吸都會排放二氧化炭，搞搞下就成功為政府用另類手法搞「全民萬稅」！

用收錢來決定誰可以浪費，呢種就係社會上最不公義的事情；點解有錢佬可以浪費膠袋，而窮人就唔得？點解有錢佬可以開法拉利燒油，窮人就唔得？搞「電子道路收費」－－點解有錢佬先可以開車入中環？點解有錢佬畀錢就可以請司機在車廂內不人道曝曬去停車熄匙，窮人就日日守法都驚有一日因為搵唔到路於是停左車而被無故受罰？

講到尾呢種「窮人含忍」的不義邏輯，就係對基層最大的壓迫！這種不公不義的問題，就係濫用干預、濫用公權力的荒謬壓迫政策，其實就係「官商勾結」的最高層次－－背後的邏輯就係有錢就可以打橫行，冇錢你就做次等人啦！

偏偏無數自稱「左派」，以「不公義」為題反對自由經濟的人，卻對呢種最不公、最不義的問題視若無睹－－在佢地心目中，干預完死人，佢地一點都不關心，最關心就係「做少左野」－－用「有形之手」去殺人、去謀殺，佢地冇興趣去反對；佢地最關心的，就係一個人「自然死」、「冇人理而死」，明冇？

香港應該立法「謀殺合法化」－－畀有錢佬合法畀錢殺人、「自然死」就要畀「屍體稅」！因為燒屍體、埋屍體都會製造廢氣！

四萬人慶回歸？警方何在？

2009-07-01T18:35:00.011+08:00

4萬人參加慶祝回歸十二周年巡遊
2009-07-01HKT12:00

多支巡遊隊伍穿梭銅鑼灣街道
巡遊人士手持中國國旗及香港特區區旗
香港回歸十二周年，多個團體合辦慶祝回歸巡遊，有4萬人參加，巡遊隊伍由大球場出發，經銅鑼灣及灣仔，到灣仔中旅社附近終點站。

行政長官曾蔭權以及多名特區官員出席起步禮，預計所有隊伍中午過後完成巡遊活動

咦？大會公佈四萬人就報四萬人拿？警方呢？警方死左去邊？點解雷曼苦主自稱二萬五，警方都仲要話得四千？而家因為有曾蔭權參加的，警方就收左皮？李少光去左邊？點解李少光唔敢公佈警方的數字？

七一只得兩萬幾由維園出發，慶回歸就有四萬幾喎！香港警察的公信力，特區政府的公信力就係因為呢 d 弱智式的造假，當市民係弱智？

最過癮係果 d 成日挑戰泛民聚會人數的「學者」，佢地只係對「否定」泛民的數字有興趣，對否定政府數字係冇興趣的；係囉，點解呢？呢 d 未係佢地口中的「為反而反」囉！公共的政府報大數佢地冇興趣，只係對私人團體有興趣，明冇？

讀者報料：今朝大球場三萬個位都坐唔滿，只得三分之二左右，有埋座位，今次唔使靠估啦？點解警方唔公佈係兩萬人？點解政府虛報一倍，冇學者出來質疑「每座位坐得一個人」的「大道理」？如果四萬人，係唔係應該爆左球場？李少光何在？學者何在呢？

更過癮係商台，學埋大公文匯的「第九時間報導新聞」方法，把上午的舊聞當係新聞，等過左七一遊行的晚黑七點去報一次，同警方唔報朝早人數「分工合作」，果然係所有媒體一般和諧。

改名做 CCRHK 啦！

《福佳當奴勿當奴》預告片

2009-06-28T19:39:00.013+08:00

《福佳當奴勿當奴》將一片分為三

第一套係正戲的短片，由五大演員真人上演，排名不分先後，有陳淑莊扮演「當奴待應」，袁彌明、陳巧文演「勿當奴員工」，賴恩慈與兩歲半小妹妹擔任顧客。

第二套係回歸《福佳》系列的傳統歌舞片，加入紀念 MJ Michael Jackson 的環節，一眾膠官將大演硬膠舞步，配合群星演唱的改歌面世

第三套就係呢套預告片，由於冇時間再剪，片段有少許重覆，多多包涵。
七一前正式上市

上星期四壹周刊報導：
上周末晚上，葵涌某所工廠大廈正進行「秘密倒曾」活動，「疑犯」包括公民黨立法會議員陳淑莊、爭取西藏宗教自由的港大女生陳巧文，及轉做才女的前落選港姐袁彌明，原來三人正拍攝號召七一遊行的短片。

反串扮曾蔭權特首的陳淑莊戴上微禿假髮，穿著大兩碼的男人西裝，再結上煲呔。劇情說她是快餐店「勿當奴」的老闆，以「普選樂園餐」做幌子呃飯食，她邊化妝，邊學煲呔表情：「最緊要上唇向上蹺，有少少似徐小鳳，但郁動冇咁多；個頭微微向上抬，語氣要輕佻，好似睇唔起人咁就最似。」她在Youtube翻看完煲呔的「六四論」，即對著鏡頭學他語無倫次：「我既意見代表全香港『勿當奴』意見、全世界、全宇宙……我要做好呢份工、呢份工……唔會同你狗噏辯論……」

袁彌明飾演「勿當奴」侍應，專送贈品，包括代表政制事務局林瑞麟肖像的「人肉錄音機」、政務司司長唐英年的「糖果」。去年在立法會選舉廣告片中自稱「Reginababy」的葉劉淑儀，也被製成吹氣公仔，她更想出「食夠廿三條薯條有得送」的對白，諷刺葉劉曾推銷廿三條惡法。

袁彌明身上的「勿當奴」戲服由陳巧文製作，陳憶述：「我兩星期前知道要拍呢段片，去咗麥當奴兩次，記低佢哋套制服的顏色同袖位，然後去旺角二手舖買材料，做咗兩日。」她買了紅白雙間的短袖衫，將中間的布剪成兩個手袖；又將鮮黃色的連身裙剪成外套，再於袋口縫上家中找到的紅布，她說：「我手工唔好，有些係自己縫，但好多係用雙面膠紙、扣針連埋一齊。」

這晚她也要飾演侍應，她拿起道具晃來晃去說：「試吓呢部人肉錄音機，阿爺講乜佢講乜。」又將嘴角靠近「林瑞麟」臉龐，佯裝傾慕叫道：「好神奇架！」接著又大讚「唐英年糖果」會「吊吊fing」，表情豐富，連攝影師都大讚她經驗雖少，但表演出色。原來陳巧文在英國中學有修讀戲劇，會考成績取B：「當時上堂會比二十分鐘準備，幾個同學即時諗個短故事，用最少的道具，仲要演出。我亦做過學校舞台劇，不過番來香港冇再做過。」

自零三年起年年參加七一遊行的陳巧文，今次粉墨登場號召上街，但她講明自己不是倒曾：「曾蔭權同董建華只係阿爺的吹氣公仔，即使下台，第二個都會一樣，所以我係要爭取普選。我哋冇雙普選時，雙腳就係改變政局的唯一方法。」

這段《福佳當奴勿當奴》短片由網民林忌和Freeman製作，○七年兩人將回歸十周年主題曲《始終有你》改編成《福佳始終有你》，嘲弄煲呔曾及前民建聯主席馬力，在Youtube半年內有過百萬點擊率。今次林忌找來三位美女登場，他說：「希望視覺效果完美，正如拍戲都一定會搵上得鏡的演員，佢地三個（四個）都係靚女，而且又會去遊行（當然希望可以加分。）」

Charles Mok 的現場拍攝相片

人為何而活？

2009-06-28T12:03:00.008+08:00

(星島日報報道)援交歪風持續，網上討論區有少女公然臚列「賣身」收費詳情，更有少女因援交而沉淪毒海。有機構上月以問卷形式訪問近三千名中學生，了解他們對援交看法。調查發現，有近百分之五的受訪學生表示自己有可能參與援交活動，當中有近半為來自名校的第一組別（Band 1）學生，半數受訪學生亦更認為援交很平常，是一種「互相利用、各取所需的社交生活」。負責調查的機構指結果反映年輕人的價值觀出現扭曲，名校生成績佳不等於道德水平高。

　香港性教育、研究及治療專業協會為了解中學生對援交的看法，於今年五月，以問卷形式訪問二千九百多名中一至中六的學生，當中五成三屬女學生。調查發現百分之四點六受訪中學生認為「自己有可能參加援交」，當中以Band 1名校生佔最多，達百分之二、Band2學生佔零點九個百分點，其餘百分之一點九為成績較差的Band 3學生。

　　調查亦問及受訪中學生有意參加援交的原因，有八成七受訪中學生表示，參加援交的目的是為了賺錢消費，如購買名牌手袋，亦有近半數人表示喜歡收受對方送贈的名貴禮物，四成多認為援交可以讓他們尋回被寵愛的感覺。

前篇：

經過中共、土共長年累月不停造假之後，首先對呢 d 調查一定抱有最大的疑心，第一，呢個會係乜水？睇佢網頁乜都冇講，我地亦唔知，亦唔方便做評論；第二，就算個調查係真，個方法有冇出錯？定係 Band 1 學生覺得你個問卷好膠，於是就亂填？四點六的中學生認為「有可能參加援交」－－係男仔可能，定係女仔可能？有冇性別的數據？可能的意思係有男同學認為「有女學生肯同你援交我就上」，定係有女同學認為：「咦？我的外表都有人想同我援交？好呀，貼錢我都願呀」。

質疑完，然後就要指出援交一點都唔出奇；點解？問下人為乜而活？問下曾蔭權，佢答你國家的經濟發展好繁榮，所以佢代表香港人，所以大家應該忘記六四；問下由上而下的一眾官員、自稱「愛國」的議員，佢地為左名利、權位、經濟利益，可以出賣良心良知（如果仲有的話），所以問人為乜而活，仲有一個跟進的問題，就係出賣靈魂可恥點，定係出賣肉體可恥點？定係兩者都出賣可恥一點？

相比起呢班土共出賣良知，出賣香港人，援交的錯誰者為重，誰者為輕？係囉，問下點解全香港九成九的傳媒呀、中立人士呀，一講到援交呢類問題，就立即大聲責難，但對果班高堂之上呃神騙鬼，更加埋沒良知、良心，更加「反人類」的一眾人渣，卻都輕輕放過呢？

如果為左錢去出賣良心良知加肉體冇問題，咁點解只係出賣肉體就有問題？

如果一個人真心覺得出賣肉體冇所謂，點解大家要質疑佢覺得有所謂？
因為嫁個有錢人，呃自己良心話自己鍾意佢，就高尚些？一個人為左錢而「愛上一個人」，行為就值得全港傳媒報導？

後篇：

人究竟為何而活？當呢 d 傳媒大大聲質問援交人士的時候，有冇問問自己呢？你地又為左乜而活？記者你為左份人工，為左你自己的生活，寫埋哂 d 違背良心的報導，自己又會唔會慚愧？

如果你唔會慚愧，點解又要援交的人覺得慚愧？

最過癮的，有班「反對自由市場」的人士，把「為乜而活」的問題，大大聲挑出來質問黎智英、楊懷康、施永青以及獅子山學會！最奇怪的，就係兩大老闆黎智英、施永青，永別係蘋果同 AM 730 的老闆，兩人都偏偏大茶飯唔食，卻走去被喻為累人「傾家蕩產」的辦報，而佢地的報紙仲肯撐下言論自由，為乜而活，你唔係去問土共，卻走去問佢地？

如果話包容援交、包括市場主導係可恥，咁包容慌言，包容出賣良心良知靈魂的，係乜？
兩者最唔同的，就係前者赤裸裸承認人性的「市場主導自由」，而後者就係中國人最愛講一套、做一套的偽君子。

人究竟為何而活？好偉大呀－－只要付出的不是你，就最好了！

人之所以係人，就係首先把自己視為「高人一等」，或者「高禽獸一等」，用一大堆大話，去包裝自己與眾不同。

科學證明，孟子所講的「人禽之辨」，由頭到尾都係發開口夢；人就係動物，咩人有惻隱之心，動物都有，兩者本質絕無不同，只係智力上的分別。中國的聖人就係科學盲，於是走上了歪路，以為人係與眾不同的，以為人性係善良，可以戰勝邪惡，以為靠人為干預人性，可以做得比起大自然的市場力量好。

最大的邪惡就係人的本身；大自然遠比起人類善良，靠會腐化的人性去更正大自然，結果只會係更腐化、更邪惡。只有承認人性本惡，只有承認人係自私的，只有善用市場自私自利的法則，制度才可能長治久安；凡違反呢個定律的，絕不能持久。

靠聖人？靠明君？靠一片好心？靠得住咩？只有靠市場的力量！唔相信自由市場，又點解相信民主？民主制度就係最大的自由市場，亦係行之最有效的自由市場！

大家講慣左「民主、自由」，經常當係兩件事－－係，在形容「民主制度」與「言論自由」的時候，的確係兩件事，但民主制度的本質，就係用自由市場的法則，去讓人民、讓群眾自行選擇。

當然市場有時會癡 Q 線，正如民主制度下一樣有時會癡 Q 線一樣，因為人本身就係癡 Q 線的動物，把人視為「超人」，視為永遠理性，當然係最癡 Q 線的假設。當人有病，當然要食藥，食藥就係人為干預；但當人冇事的時候，下下干預似乜？食咁多維他命，吸收到呀？日日食藥，有冇病呀？冇病都當有病咁食？呢d 就真係癡 Q 線啦。

民主制度最可貴，又或者自由市場最可貴的係乜？就係透過可行的制度，去自行調節。下下干預，搞軍事政變？搞革命？冇病呀？

有，就係有人有病，所以佢地選擇用革命去推翻「暴政」，結果得出來的結果，係十倍、百倍、千倍的暴政，上世紀全世界有一半就係癡 Q 左，走去相信理想，走去迷戀人為干預的共產社會主義、希特拉的國家社會主義，結果....
.......................

當大家提到西歐、北歐的例子之前，又問下自己，佢地歷史係點樣發展的？係先有自由民主，再有社會主義，定係先有社會主義，再有自由民主？

在未有自由民主之前，想搞社會主義？又或者認為社會主義，比起自由民主更加重要？這種倒轉先後因果的做法，就好似大陸想唔改政制，只改經濟一樣，只能一時，絕不能長久。

沒有民主，就沒有民生，明冇？陳方安生呢一句說話，就係智慧的代表作。
可惜，知音人實在太少，包括泛民中人......

當政制扭曲至此，一個不健全的假民主制度，就係滋生民粹的制度；點樣先可以和平理性？相信自由市場，相信人民的選擇，當一切先決條件如常，民主就係最好的制度－－因為只有選票，才可以制衡大財團，同樣亦可以制衡過度的福利主義－－因此，要搞社會主義，要學北歐、法蘭西，先決條件就係把香港建設成為民主的社會。

土共最愛問：「港英時代點解冇民主卻有民生？」－－因為英國政府有民主，而中共卻沒有民主，香港又唔係國家，乜土共支持港獨咩？

人為乜而生存？追求真善美？對，大家都同意「應該」係追求真善美。

問題係，當人性醜陋到極無謂、極無聊的時候，當有 99% 的人都係無聊人的時候，我地應該點？強制佢地追求真善美？送哂唔合資格的人去集中營？

「把人還畀人」？就係把人性的醜陋還畀人－－市場係死物，人性才是真理，市場就是人性的真理，順人性而為之，先可以順勢而行；視市場為死敵，抽離人性逆天行事，就必然失敗告終。

原來黎智英統治香港！

2009-06-27T23:07:00.010+08:00

Facebook 有個膠都廢時畀的 group，上面寫住：「諸如黎智英、楊懷康、施永青及獅子山學會諸君，這些自由市場的信徒，對這些事實一定不同意。但在你們砌詞反駁前，請先回答以下問題：人，究竟為何而活？人，只是一部盡力掙錢的機器和一隻只要有錢花便滿足的消費動物嗎？經濟發展究竟又為了甚麼？一種只有讓少數人得享好處的經濟發展，我們要來做甚麼？」

睇到呢段文字，林忌好想笑－－究竟統治香港的係左派的共產黨，係勾結共產黨等的有錢佬如李氏集團，定係黎智英呢？

係囉，點解香港而家咁不公，呢班友仔唔係把矛頭指向政府，唔係把矛頭指向共產黨，卻把矛頭指向在傳媒界人工高、待遇好的壹集團？

乜原來香港今日的問題係「自由市場」？癡左線呀？係有人又有人收左錢，要全力抹黑黎智英呀、獅子山學會呀？反對自由市場？我地要在香港推行一國一制－－共產主義嗎？

最過癮係，歷史已經解答左呢班膠人的問題－－共產主義證明由始至終都係失敗中的失敗，今日的民主、自由、法治的體制，絕對唔係因為「理想」而「計劃」出來，而係自由市場下的力量，才「自我誕生」出來；英國的民主議會，係歷史「自由市場」的意外，而唔係有一個偉人，去「設計誕生」－－由護國公克倫威爾，到英國國會同英皇之間的權鬥，由頭落尾都係權力鬥爭，而唔係佢地自我幻想的「哲學」。

英國的法治制度－－普通法的誕生，就係十二世紀英國國王亨利二世為左稅收－－錢，臭到無可再臭的錢，為左增加自己的收入，而可以有錢去收買地方的封建勢力，於是提供「法治服務」－－ writ ，成立國王的法庭，去為人民仲裁－－仲裁的代價，就係要交稅！為左錢，因此英國國王願意成立法庭；由於只有可靠些、公正些的「自由市場制度」下，人民才肯接受法庭的仲裁，因此法庭、法律透過歷史的自由市場而完善，因此才有普通法的誕生！普通法，係因為「理想」而誕生的嗎？呢班膠人有冇讀過歷史？

歷史再證明，滿口仁義道德的「救世主」，出埋的只有毛澤東、史大林之流的人渣；再唔係，就係孔子、孟子只識得「之乎者也」的膠人，除左留下一大堆偉論之外，只係人生的失敗者！在香港，肯堅持言論自由又能夠自我生存的報紙，只得一份，就係黎智英的蘋果日報；肯堅持言論自由又能夠生存的主流雜誌，亦只得一份，果份就叫壹周刊。因此，佢地呢班人就好不滿黎智英、楊懷康等的做法，因此好想佢地收檔，因此要搞個 group 來反對佢地？

「人，究竟為何而活？人，只是一部盡力掙錢的機器和一隻只要有錢花便滿足的消費動物嗎？經濟發展究竟又為了甚麼？一種只有讓少數人得享好處的經濟發展，我們要來做甚麼？」

－－係囉，因此黎智英應該去賺更多的錢，第一件事就係投靠中共，換來入大陸的機遇；又或者學下其他滿口仁義道德的傳媒，一齊口是心非，口口聲聲反對自由市場，實際上就擁抱大陸－－這些滿口不在乎的錢的人，只有兩種，第一種就係假貨，其實佢地就係最愛錢，第一個投降的人；而第二種，就係弱智，因為用佢地的方法，只會永永遠遠，被佢地最憎的人踩在地底一世，而佢地又死不認錯，堅持太陽應該由西邊升起才對－－唔好要錢，廢除人性的自私，好理想，好夢幻，但係智商只得三歲。

冇民主、冇自由，搞社會主義結果係乜？

1. 共產黨有中國特色的社會主義
2. 納粹德國的國家社會主義。

為左社會主義，佢地係唔係應該爭左民主先來講呢？
定係佢地眼中，即使走共產黨極權主義的路都唔緊要，因此要打倒自由派先？

定係有人收左錢，要用經濟理由，去抹黑目前僅存而有戰鬥力的民主右派呢？劉 x 強呢頭搞聯署，呢邊又立即有人出來聯署針對壹集團？望下長毛被屈非禮果段片，大家應有體會。

最低工資的雙重標準

2009-06-25T14:10:00.004+08:00

張建宗就《最低工資條例草案》與傳媒的談話內容（中文部分）：

「第二點我們要考慮到，這亦是一個很重要的考慮，留宿家庭傭工享有所謂的非現金權益。這些非現金權益是甚麼？由於他們住在僱主家中，一般來說，他們享有免費住宿，水、電、煤全部都不用支付；由於他們住在僱主家中，亦是上班的地方，可以省卻交通開支，這是他們獨特的地方。香港目前有二十五萬多的外傭，他們的情況大家都很清楚。他們有免費膳食，僱主提供膳食或膳食津貼，標準僱傭合約規定要提供膳食或膳食津貼，同時免費醫療，正是僱主要負擔的，及往返原居地的雜費等。在七零年代開始，為加強外傭的保障，我們已有「規定最低工資」，目前的水平為三千五百八十元。基於這些理據，我們覺得需要豁免留宿家庭傭工，因為在操作上很難計算工時，以及他們有所謂的非現金權益，這其實是工資，只是不以錢去表達，但有非現金的表達。我們徵詢了法律意見，這個做法完全有法律理據支持。」

睇到呢度，林忌真係好想笑；每一個賊犯法，都有一大堆理由，每一個人渣殺人放火，都有一大堆理由，而我睇到呢度，就真係好想講：「嘩！希特拉殺猶太人，都好有理由－－因為猶太人比較低劣呀！」

我地就係呢篇文聞到呢陣味－－講咁多廢話，完全係因為一旦最低工資實行，政府無法避免一個好核突的問題－－賓妹係唔係人？泰妹係唔係人？如果香港人有最低工資，點解佢地冇？但如果佢地有，佢地的人工係唔係要定得低過中國人？如果係的話，我地會唔會被人踢爆係歧視？如果被人踢爆係歧視，會唔會被人告上法庭？

因此為左冇咁明顯歧視，於是除了「外籍留宿家庭傭工」之外，勉強再加入「本地留宿家庭傭工」（好偉大呀呢個政府！連「留宿」呢點都諗埋，有幾多個「本地」的「家庭傭工」會「留宿」呢？）

「留宿家庭傭工享有所謂的非現金權益。這些非現金權益是甚麼？」－－例如廿四小時都要隨時候命，好似唔少醫生呀，消防員呀，佢地都要隨時 standby 的，不如以後取消果 d 咩候命津貼啦，原來政府認為係「非現金權益」來的呀！！

「由於他們住在僱主家中，一般來說，他們享有免費住宿，水、電、煤全部都不用支付；由於他們住在僱主家中，亦是上班的地方，可以省卻交通開支，這是他們獨特的地方。香港目前有二十五萬多的外傭，他們的情況大家都很清楚。他們有免費膳食，僱主提供膳食或膳食津貼，標準僱傭合約規定要提供膳食或膳食津貼，同時免費醫療，正是僱主要負擔的，及往返原居地的雜費等。
」－－大陸的非人生活工廠，為左用盡每一分工人的時間（西方幾百年前都係咁），都會強迫員工留宿，住在細到不能再細的房仔之中，就同香港的外僱的「住宿」、「水、電、煤」接近！嘩，如果「包食宿」就可以係轄免理由，以後好多工種好似管理員呀，都可以「包食宿」o架，例如廿四小時都包哂，叫佢坐廿四小時在更亭囉，任佢瞓八個鐘都得，超偉大呀，政府係唔係同我地講，呢 d 都可以轄免呢？

定係講到尾，要「留宿家庭傭工」先可以轄免呢？人少少認左佢啦，其實都只係轄免外傭囉，明冇？因為外傭人工一高，市民實嘈，嘈就唔通過，因此，為左香港人自己的正義，我地就要把外傭定為「非人」，唔保障佢地啦，明冇？為左唔好咁明顯，所以就要搵一大堆昆三歲細路的藉口，明冇？

香港人的人格分裂真係好過癮；有好多議員大佬話要搞「最高工時」，望下自己議員辦事處，有幾多人實行緊「最高工時」先？香港人口口聲聲追求「最低工資」，今日外傭「更低的最低工資」推行了咁多年，例如印傭的收入，普遍都係遠低於最低工資的價錢，點解冇人執法？點解執法唔到？點解冇乜香港人會為佢地出頭？中國人口口聲聲「律己以嚴，待人以寬」，對唔住幾千年來我地永遠都係倒轉，永遠「律人以嚴，待己以寬」，永遠自己做乜，都可以創作一大堆理由同藉口，如果當對外傭的最低工資，都可以搞出無法執法，多數人實收少過法例的時候，政府憑乜野講佢地可以第時做得到？如果推行「最低工資」係為左「公義」的時候，我地憑乜野歧視外傭，強分工種而唔包括佢地的工作？這是公義嗎？

「基於這些理據，我們覺得需要豁免留宿家庭傭工，因為在操作上很難計算工時，以及他們有所謂的非現金權益，這其實是工資，只是不以錢去表達，但有非現金的表達。」－－再一次，張建宗局長為左講大話而講大話，為左自欺欺人而呃神騙鬼，明明外傭「留宿」係負擔，係工作的一部份，佢可以講到係「非現金的權益」；明明外傭要廿四小時候命，係一種「超高工時」，佢地可以講到係對外傭的「愛戴」，強把歧視說為福利，強把「剝削」說為「著數」，幾時我地學埋納粹黨政府的所作所為，把「集中營」說為「幸福營」？把「毒氣房」說為「衛生消毒洗澡」呢又？

政府「向納粹出發」！

2009-06-24T16:27:00.005+08:00

「三三四推行　議員促檢討智障生18歲離校是否違法
2009-06-22HKT13:57
新高中學制將於今年9月正式推行，教育局計劃在新學年開始，規定智障學童年滿18歲便要離校。
立法會通過動議，要求政府立即取消規限18歲或以上學童，須通過審查才獲得資助的限制，讓有學習需要的智障學童可以繼續學業，又要求給予一年時間進行諮詢，以及檢討有關的年齡限制，是否有違反法例之嫌。」

特膠政府經常帶頭犯法，今次又一例證；香港法例 487 章《殘疾歧視條例》24 條有關教育的條文，已經規定了「任何教育機構如在以下方面或藉以下做法歧視殘疾人士，即屬違法─(1)(a) 拒絕或沒有接受該人的入學申請；或(1)(b) 在準備讓該人入學的條款或條件上。(2)(a)不讓或限制該學生接觸該教育機構提供的利益、服務或設施；(2)(b)開除該學生的學籍；或 (2)(c)使該學生遭受任何其他不利。

1. 20 歲上限的歧視
在進行《三三四改革》前的制度，特膠政府已經長期歧視呢班智障學生－－特膠政府對普通學生沒有年齡限制，即使留班、遲入學等原因，政府可以任由學生讀中學，即使廿幾三十歲，都可以完成學業為止；但凡係「智障學生」，政府一到廿歲就一定踢走佢地，你話呢個咩世界呢？

歧視性的則例－－香港的資助學校資助則例

主流學校的中學生－－沒有年齡限制
特殊學校的中學生－－上限 20 歲 (2007 年版 15.2 (III)

2. 18 歲以上的程序歧視
根據 02-03 年起教育局的「特殊教育需要－－智障兒童學校延伸教育計劃」，名為延伸實為縮短，以往 18 歲的智障學生讀書唔需要申請，經過「延伸」之後，就需要向教署申請審批，才可以「留校」。

當然，「主流學生」係唔需要申請，就可以無限期讀落去的－－我地見到，愈有「生理需要」留班的學生，政府就趕走佢；反而「非生理需要」的留班學生，政府就被佢地無限期讀落去！嘩！消滅弱等人種呀！我地的特區政府變左納粹呀？

更絕的係，最初政府搞「伸延」的時候，有九成 18 歲以上的智障學生都得到批准留校，去到今年就大部份申請都不准留校，果然特區政府正向「納粹再出發」。

3. 18 歲的分班歧視
在特殊學校內，政府撥款資助以十個學生為一班，但政府卻當 18 歲以上的學生唔係人，因此佢地係唔會得到「分班」的資則；簡單而言，就係一班 10 個人，但 18 歲以上的唔計數，於是零頭多出的 18 歲學生，係唔會得到任何資源去分班－－例如 18 歲以下的學生有 99 個，就最多可以分 10 班， 18 歲的學生於是只可以收一個，因為其他的零頭係唔會得到政府撥款的。

政府搞新高中學制，再一次遺忘左呢班智障學生，政府仲成日扮乜野叫企業請智障人士？

《殘疾歧視條例》36 條寫到明，條例適用於政府－－政府如在執行其職能或行使其權力時歧視殘疾人士，即屬違法。

大家明白點解近年立法，政府乜都要「轄免權」啦？因為呢個政府機關係無恥到不得了，就和那些香港納粹黨一樣，係專門欺負弱者的法西斯！

周街都可以屈人非禮呀！

2009-06-21T22:24:00.002+08:00

社民連長毛幫季詩傑助選，被屈非禮 (一)

全程有 camera 影住，都可以有個女人走來主動狂搞長毛，然後再見到差佬時大叫畀人非禮，呢個係世界呢？咁樣男人未好危險？

警方睇完呢套片，會唔會控告呢位女性「浪費警力罪」、「阻差辦公」呢？

終於明白點解日本的男性要求設立「男性車廂」了，因為對住呢班衝上來搞你再然後大叫非禮的仆街，次次選舉都可以有一大堆，佢地收左幾多安家費呢？我地香港警方對呢班人坐視不理，係唔係變相鼓勵某些垃圾政黨出動呢 d 卑鄙的手法呢？

再一次，遇到民建聯，又有阿嬸衝出來搞泛民的人，然後大叫非禮！

好危險呀！香港周街都有人「主動非禮」呀！

支持最低工資的極左膠文

2009-06-20T01:12:00.012+08:00

「反最低工資的極右劣文
週五, 2009-06-19 14:07 — paulymh

反最低工資的極右劣文

市場原教旨總有一大堆反對幫助基層的籍口，這次也不例外，他們這次又再把自己高舉私有化做成的惡果推到最低工資頭上了。不過這次這篇東西邏輯謬誤和毫無理據可言的口號太多了，連正常的人看了這種文宣也不會信，所以這是劣文，不是範文。還有，這作者和黃世澤一樣，一向喜歡把自己不喜歡的東西和民建聯混在一起來夾帶論點：讓人有錯覺，民建聯壞，所以被作者和民建聯放在一起的也是壞的。

還有，這作者和黃世澤一樣，一向喜歡把自己不喜歡的東西和民建聯混在一起來夾帶論點：讓人有錯覺，民建聯壞，所以被作者和民建聯放在一起的也是壞的。」

超有娛樂性！口口聲聲說人地「劣」，因為拉埋民建聯來講；佢自己呢？我地攻擊民建聯呢個組織，係為左公義？佢就人身攻擊，一開波就拉埋「黃世澤」來講；佢好唔順我拉埋民建聯來講，咁用番佢果招，拉一個「相同派系」的人來講囉，睇來我應該將呢位 paulymh 拉埋同曾鈺成來講先符合佢心水了，因為用佢的邏輯，大家都係極左派嘛。

對，有睇過陶君行講左派右派的朋友，都應該知道咩係經濟左派，咩係經濟右派；林忌再右，都有排未到「極右」；但係 paulymh 為左抹黑我呢，就無視我 blog 上九百幾篇文章中，有幾多篇關心基層的文章，全香港得我一個死追爛追六十五歲以上保安員問題的我，在佢呢位「極左」眼中，都仲要係「極右」－－原來凡反對最低工資，就係「極右」！獨立媒體登出這種水平的文章，真係令人聯想起梁安琪小姐，應該介紹佢睇睇。

在 Paulymh 大發偉論話領匯裁員同最低工資無關之前，唔知佢有冇搵領匯求證過呢？最起碼林忌有朋友在該機構任職，知道兩者的關係，偏偏呢位 paulymh 呢位「極左派」，為左符合佢心目中的幻想，就要漠視現實，把圓的說成是方的！

「從明報的新聞，我們可以看出，領匯推行自動化、由三更制改至兩更制的原因，不是最低工資，而是為了增加領匯的利潤，而領匯為甚麼要增加利潤？還不是政府為了私有化而私有化，賤賣資產，把公屋商戶賤價賣給領匯，迷信"私有化會比在政府手上好"？」

好神奇呀！原來在 Paulymh 的眼中，原來領匯做乜，都只係為左一個目的「為了增加領匯的利潤」，果然係偉大的「阿媽係女人」理論；Paulymh 下次見到有女士話覺得 bb 好可愛，想生仔的時候，佢應該第一時間衝過去大鬧：「車！你講大話，你生仔只係為左傳宗接代之嘛！」

呢位膠人膠到就係，呀，你明知下午要運動，所以你早餐食多左野，佢就大大聲出來鬧你：「咩呀，食野係為左填充人體所需養份之嘛！同運動有咩關呀？」你邏輯謬誤！你毫無理據！

癡 Q 線，鬼唔知呢個終極目的呀？鬼唔知你食飯係為左填肚呀？鬼唔知渴望性行為都係為左生仔呀？乜原來每一件事只可以擁有一個目的咋？

在呢堆極左派眼中，原來領匯裁員就「只係為左增加利潤」－－原來最低工資唔會令企業成本上升，企業成本上升左，佢地的利潤就唔會減少呀？原來間間企業咁有「遠見」去「增加利潤」，就弱智到唔知最低工資會增加佢地成本，咁佢地反乜呢？係囉，點解又要講到佢地邪惡欺負打工仔，但佢地又弱智到唔識為左規避最低工資的成本，而走去裁員呢？Paulymh，你除左識得人身攻擊之外，你答到 d 乜呢？

你估投資機械唔使錢？管理維修機器唔使錢？點解全歐洲搞自動化？點解日本連拉麵店收銀都自動化？點解美國華盛頓的超市收銀都自動化？原因就係最低工資－－人工高就用機械，人工低就請人，呢個最基本、最簡單的 demand supply 理論，可能在呢位「極左派」眼中，可能係唔存在的。

係囉，呢 d 所謂「極左派」，就真係同民建聯一樣，係一些假幫助基層的左派；對於民建聯出賣打工仔，佢地唔會追究o架！當我地窮追民建聯當年支持領匯私有化的責任之時，佢地唔單止唔會支持，仲會反過來標籤我地係「極右派」－－點解呢？乜 Paulymh 對民建聯當年搞私有化的行動，一點感覺都沒有嗎？乜我地追殺民建聯令佢感到好不快嗎？Paulymh，乜你入左民建聯咩？

原來在佢眼中，幫助基層的唯一武器就係「最低工資」，原來唔支持呢項弱智政策，就一定係「極右派」，哦，咁政府呀，一些大老闆話支持的就一定唔係右派啦！勁呀！原來反對最低工資就會變成「極右派」！

「不過這次這篇東西邏輯謬誤和毫無理據可言的口號太多了，連正常的人看了這種文宣也不會信，所以這是劣文，不是範文。」－－看來，大部份人在你的眼中都不大正常了，去睇醫生吧！

民建聯成功爭取領匯上市大裁員！

2009-06-17T20:23:00.007+08:00

熱烈慶賀！民建聯成功爭取領匯上市大裁員！！停車場自動化大減人手，最低工資一立法，裁得更多！恭喜！！立法殺人放火式係唔需要負責的！！

有野睇！有野睇，大家一齊來睇下呢班土共幾咁無恥？嘩！佢地敢出來抗議領匯大裁員呀！睇下報導的傳媒，同佢地幾年前大力提倡領匯上市的口吻，可以一百八十度轉變呀！乜香港變左無恥之港咩？

立法規管保安員的歲數，六十五歲以上的保安只餘下最殘最舊的單幢式唐樓，可供佢地付出勞力腳骨力！在未搞清楚成件事之前，胡亂通過領匯私有化，結果上市後就立即大幅加租！好啦，成班膠人搞衰哂，仲唔夠衰，要強制立法最低工資！型呀！停車場立即搞自動化，大幅裁員！

我地呢班明明智商不足，卻無知到以為自己好得的膠人，你地膠夠未？中國膠果種無知到極點的規管天性，乜都要管，但就冇料去管；自以為自己用哂所有心機，結果一樣被無情打敗！

由王安石變法至今，無數的膠人被身邊的人吹捧兩句，就當左自己係神，以為靠一兩條膠 law 去無限量糾正社會的問題－－ Sorry，糾正問題一向係最難做的事情，冇料的人以為可以粗粗疏疏，以為可以好似 1+1=2 咁就去改革，人工咁易賺呀？唔需要用腦，坐係度時間夠長，就可以解決到問題嗎？你估炒股票呀？

係囉，好少數之嘛，停車場的看更咁少，自動化炒囉！香港就係有班膠人活在石器年代，唔記得科技係日新月異；廿年前冇八達通咩？廿年前有咁多自動機器咩？咩話，你班友去旅行都只係去亞洲？唔怪得啦，有冇見過歐洲的自動餐廳？由派食物到買野都係自動化o架！有冇見過歐洲的油站？一個員工都可以冇o架！有冇見過人地的停車場？係唔需要人o架！有冇去過日本的八景島？鐵路站都可以全自動化，冇司機，亦冇站長o架！最低工資？好呀，機器平過人，點解唔用機器？你估管理層的商人，會長期好似香港呢班原始人一樣咁原始，到今日都仲用紙用筆？到今日都覺得用電腦好麻煩？

政府都開始出 d 賤人，好似邱騰華之流，扮哂親泛民，同你班友扼扼手，拉拉關係，落兩句嘴頭，成班政治白癡就信到十足十，以為佢真係搞環保－－佢搞的只係 A 貨環保，既減唔到排，但求有 d 野搞下，勞民傷財之餘，衰起上來搞臭環保的名，佢拍拍屁股就高升其他政策局，有雞碎咁多的功勞，就可以吹到一百分！橫掂出事都係幾年後的事！失敗就係賴議員弱智咋！

恭喜，恭喜，事實擺在眼前－－領匯大炒保安員，大裁停車場管理員，就係最好的例證，證明議員的硬膠想法幾咁弱智；而無知人士之外，仲有一班福佳－－佢地就係民建聯的福佳啦，打著為基層的旗號，轉個頭就走打著保衛弱智炒機家的旗號，嘩！鬥臭鄭經翰呀，鄭大奸禁止領匯上市呀！呢班福佳去左邊？一個一個捉去分屍啦！工聯會王國興之流，你同民建聯果班幫領匯上市的福佳坐埋一齊，咦？乜你有半分良知o架咩仲？你同工人去示威果時，你有冇 0.000001 分的羞恥之心？

香港地就係一個咁反智的社會，2004 年鄭經翰為領匯食死貓，到今日都冇幾多人敢同佢公開平反； 2005 年鄭經翰的政治顧問黃世澤，在搞網台事件又係被王 x 然、x 政廿一等人迫食死貓，今日果班友唔係潛左水就自己反哂檯啦，又係冇人會為佢出來平反。

到小弟啦，2007 年我為反對勞永樂參加泛民補選，又被人狂鬧；兩個月唔到，勞永樂退埋出泛民的政黨啦，事後亦沒有半條友向我道歉。早兩日陳偉業就四川撥款講的說話，咦？乜同林忌一年前講的說話咁似？

殺人放火金腰帶呀！修橋搭路無屍骸呀！是旦啦，香港人就係呢種質素；你堅持原則，你堅守真理，就預左橫屍街頭啦！

在橫屍街頭之前，無論如何林忌仍要作出呼籲，泛民在灣仔鵝頸區的選民，支持季斯傑打敗民建聯！民主唔係選賢任能，因此季斯傑好唔好唔關我地事，最緊要佢唔係代表緊最無恥的政黨民建聯！今個星期日，作為泛民的支持者，就應該出來投佢票！

漢奸再出發宣言 hkrestart.com

2009-06-17T04:33:00.009+08:00

收到高登讀者報料，有位不知名的網友在見完劉廼強的《香港再出發》宣言之後，感到熱血沸騰，就好似食左洪教主的仙丹，又或者好似近日班o靚仔索左 K 咁，感到唔做 d 野唔得，因此佢忍唔住，立即打開個網站註冊，參考《香港再出發》的 hkrestart.net，立即註冊左個 hkrestart.com，取其諧音漢 (hon) 奸 (kan) 再出發也！

計牌面，漢奸輸哂！你話啦，漢奸邊有錢去賣九份報紙的全版廣告先？除非高登網友公開籌旗，在蘋果日報賣全版廣告串爆劉廼強之外，又邊有可能同果班真漢奸鬥？要知道真假漢奸難辨，《漢奸再出發》宣言名為漢奸，卻為愛港者；果 d 《香港再出發》宣言，名為愛港，實為漢奸－－注意第 4.1 條「愛國就是愛實質上代表中國的中華人民共和國」－－呢條原則就好似當年納粹德國，要向希特拉元首效忠的元首原則一樣－－因為德國元首係希特拉，所以愛德國，就要愛德國元首的希特拉一模一樣，分別只係中國共產黨有更多領導人而已！數典忘宗的漢人，走去死抱著前蘇聯共產主義大腿的外族殖民統治，你話劉廼強之流唔係漢奸，唔係港奸，係乜？

最過癮係《漢奸再出發》宣言連捐款戶口都改埋，細心一查發現，原來《漢奸再出發》的發起人，呼籲把錢捐畀支聯會！就同代訂大紀元一樣，擁有異曲同工之妙！你諗下，萬一有 d 漢奸真係真心膠，走去捐畀支聯會，咁就真係好笑啦！

開始個垃圾網站去支持梁振英選特首？連最基本的管理、資訊科技知識都冇的土共，立即遇到認真討論的漢奸；結果被玩到瞓係度－－土共未好鍾意偷人 domain，抄人橋嘛？記得當年我地搞《福佳始終有你》，有人就玩眼高手低《整死香港有你》，今次上得山多終遇虎，變成有熱血網友倒轉佢成個宣言，由頭漢奸到底，真係應真失禮死人啦－－咁的料子都想做特首？收皮啦！

最過癮係《香港》原版而家唔畀人簽名，但《漢奸》版卻任簽唔嬲，相信好快《漢奸》版的累積簽名人數，一定超過劉廼強果個！

偽君子報又登了一篇《張志剛﹕解決中共政權是否港台的責任？》－－張志剛原來又係漢奸，在 1989 年的時候，居然做左蘇聯同華沙公約國家的間諜！要記得之從 1979 年鄧小平訪美之後，中國緊抱美國的大腿，聯合去對抗蘇聯呢個邪惡帝國，包括在 1980 年一齊聯手杯葛莫斯科奧運，成為一時佳話；蘇聯呢個「蘇修主義者」，以及佢傀儡的《華沙公約國》，一齊於進入 90 年代之際咸包散！嘩！中共的外交大勝利呀！呢班契弟華沙公約共產主義國家，唔投靠北京，走去做蘇聯的走狗，於是一鋪香哂！仲唔係中國的勝利？中國同美國聯手打敗蘇修主義者，有咩唔好？點解張志剛之流，對國家的敵人念念不忘？對國家的敵人被打敗咁睇唔過眼？乜張志剛好憎恨中共政權咩？點解中共的敵人被打敗，佢居然唔係慶祝，卻走去寫文上偽君子報鬧我地跟隨黨路線的香港電台？

事實證明，張志剛、劉廼強呢班人才是真正的漢奸－－有漢人唔做，走去死守蘇聯殖民主義者留下的共產主義，明目張膽要香港人賣國，一齊數典忘宗去做賣國賊！於是有熱血網友改寫 hkrestart，幫呢班加埋幾百歲、幾千歲的阿伯一齊「阿伯再出發」，真係大快人心！

劉廼強，馬力約你落去飲茶呀！

香港再出發之納粹黨宣言

2009-06-16T10:00:00.004+08:00

基本法委員會委員劉迺強、中央政策組前成員王卓琪昨日宣佈，會在今日於九份報章刊登「香港再出發宣言」，內容包括「認識祖國」、「愛國愛港」、「社會和諧」等。

據了解，有關行動獲中聯辦支持，目的是在政改諮詢報告年底推出前半年，盡力向外「洗腦」，藉組織種種活動與平台，製造和諧、團結氣氛，使市民和泛民在壓力下，接受年底出爐的假普選方案。劉迺強昨日被問到有沒有中方人士事先了解今次行動時，拒作正面回應。
王卓琪昨日講述宣言「愛國愛港」內容，認為港人「要多啲講和諧」，批評港人近年「只識鬧政府」、「不斷內耗」，指「政府做得唔好，市民其實有責任」，認為港人應該積極支持政府施政。

睇完呢篇《香港再出發》宣言，第一個感覺就係成篇文又長又累贅，充滿大量廢話；在遣詞用字方面，極度大陸官方口吻，再一次證明寫呢篇文的人，個腦由頭落尾都係充滿中共黨的思維，特別係果班死唔去的阿伯級別－－中共極左派的思想，再一次原型畢露。

呢篇極瘋狂的宣言中，最令人髮指的，係一段有如納粹黨宣言的段落：「但是中國是一個實實在在的實體政權；中華人民共和國是我們的祖國。香港與中國整體在文化、歷史、地理、經濟都榮辱與共，不可分割；香港和整個中國的利益長遠而言，完全一致。愛香港，不可能不愛中國；愛國就是愛實質上代表中國的中華人民共和國。」

呢段文字的邏輯，就好似生在伊拉克，就要愛侯賽因的伊拉克；生在阿富汗，就要愛塔利班的阿富汗；生在德國，就要愛納粹黨希特拉的德國；生在蘇聯，即使生在蘇聯的加盟共和國，都要和蘇聯「不可分割」、「完全一致」，而要熱愛一個所謂代表國家的政權－－即使呢個政權係幾邪惡、幾不代表民意、幾殘暴，都要愛。

再一次證明劉迺強、王卓琪唔係地球人－－佢地生在地球，卻唔愛地球；不斷要把中國從地球中分裂出去，而不把中國當係地球不可分割的一部份，行遠 D ，返去冥王星啦！明明全地球的共識係民主、自由、人權、法治，而呢班人渣的共識卻係要搞獨裁、專制、反個人權利的納粹式政權；而在接受納粹的現實仲唔夠，仲要你愛納粹！要把個人腦部的思想自由都毀滅！呢班人由始至終都係中共的「四人幫」餘孽，同江青之流毫無分別，送番去大陸都嫌荒謬，卻在香港大大聲對港人指指點點。

六十年代土共暴動，七十年代香港都冇共識，有親共，有親台，亦有親英，偏偏香港的經濟一直起飛；可是今日土共卻把所有管治十二年似垃圾的所作所為，歸咎於市民唔夠愛國，簡單而言就係衰左仲要姓賴。

「香港深受移民社會的過客心態、西方自由思想及個人主義的影響，對社會整體利益，尤其是長期利益不夠重視。這種取向優點在於發揮競爭力，靈活善變；但是過份重視個人利益的最大化，個人或個體利益凌架社會利益，不願意為社會付出代價，是香港社會及環境劣質化的根由。在個人和集體利益之間，我們需要另一個平衡點。」

不知所謂之至的如上文的垃圾廢話，我地新一代的香港人，絕大部份都係土生土長，在這至「阿伯再出發」的廢話宣言當中，有冇當過我地年輕一代係人？定係在佢地眼中，佢地就係香港人，而我地呢班在香港土生土長的後生仔，就唔係香港人？

深受移民社會過客心態影響的，就係呢班人渣；佢地賺香港人的錢，吸香港人的血，廿幾年間卻只係走去抱中共的大腿，把香港賣給中共獨裁者仲唔夠，仲要把香港人的思想、靈魂、西方留下來的自由與法治消滅。

「對社會整體利益，尤其是長期利益不夠重視。」－－社會長期的利益，就係今日發達國家的普世價值－－民主、自由、人權、法治，偏偏事實擺在眼前，呢班人渣可以黑說成白，白說成黑，乜「家長國家」係全世界的潮流咩？乜發達的係北韓、古巴等共產國家咩？視個人利益的最大化－－就係香港呢班奸商，不願意付出代價，就係唔願意接受民主的洗禮，繼續要搞官商勾結的集團，繼續要把香港人踩在地下，去擁抱大陸的太子黨。

劉迺強出招，就係為左梁振英選 2012 特首鋪路；最近林忌收到鄭重警告，話土共有幾個集團要選特首，為左選到而將會不擇手段，再卑鄙、再無恥、再黑暗的手段都會使出，就好似澳門，又或者第三世界的軍政權一樣。

如果事情真係咁樣發生，你願意去阻止他們嗎？
香港人，你願意去用盡你一切的努力，去拯救香港嗎？

定係我地畀劉迺強呢班仆街睇死，我地香港人只係地底泥，佢地可以為所欲為？

如果有一天，每日一膠消失了，只有一個可能性－－就是版主遇害了；大家應該知道做些甚麼嗎？

劉迺強，你係唔係暗示我地香港人要流血？係唔係要血洗中環，去強迫香港人投共？

叫企鵝張國鈞考常識

2009-06-15T09:50:00.007+08:00

隔牆有耳：曾鈺成盲撐企鵝男
2009年06月15日

做立法會主席後被迫「封口」，甚少機會表演辯才嘅民記曾鈺成，噚日難得被問到佢點睇早排民記新副主席張國鈞，早前喺電台電視節目一舉成名，發表「北極企鵝多」偉論，即時表演辯才反插傳媒，話「記者都會寫錯字」，咁係唔係唔應該做記者，仲叫大家唔應該對呢位張副主席「過份苛責」，認為唔少人都講錯嘢，又話唔少立法會議員同讀者都唔知北極係咪真係「人少企鵝多」，包括埋佢自己。

「我哋成日都講錯嘢」

曾鈺成又話，唔少人掛住笑呢位民記新副主席嘅「企鵝論」，「忘記佢說話嘅道理」，認為咁樣真係好唔值得，呼籲傳媒唔應該擴大呢種文化。曾主席又話，其實早前已經同班新人開班，講到教佢哋發言前要多做研究，就算政黨研究部準備好發言稿，發言前每一字每一句，都應該自己搵番原文睇睇，詞語睇唔明就要查到明先好用，認為民記日後培訓要加強，但就話明唔排除日後會繼續有人講錯嘢，「我哋成日都講錯嘢啦」。

垃圾會人少弱智多
曾鈺成作為垃圾會主席，呃完香港人一次又一次，明明張國鈞連北極有冇企鵝都搞唔清楚，佢可以說成係佢「講錯」－－識就話講錯，唔識講咩錯？講北極主權爭議，拉去講企鵝做乜？搞 GAG？冇料到走去搞 GAG？這樣的常識走去上港台做政治評論？我地憤怒都唔畀？

作為前校長，曾鈺成居然話「唔少立法會議員同讀者都唔知北極係咪真係人少企鵝多，包括埋佢自己。」－－有見及此，再一次證明我地香港的制度好反智，反智到連最基本的地球常識，都有前校長、垃圾會主席可以大大聲顛倒黑白是非，恬不知恥地話自己唔識！如果香港的立法會議員，代表香港人的代表都可以弱智到呢個地步，佢地根本冇資格代表香港人！

拿拿拿，我地立法會乜鬼都好鍾意立法強制人地，因此林忌在此要求，我地的立法會議員要主動報考常識基準試！如果常識唔合格，就自動禁制自己，唔准去開會！如果連呢 D 咁普通小學生的知識都唔識，唔怪得專立埋 D 膠法啦！

成班土共成日話要加開功能組別，不如下次開「弱能界」、「無恥界」、「企鵝界」代表啦，正如曾鈺成所講，我相信立法會議員都冇乜人知呢幾個組別的意思O架啦！一隻企鵝張國鈞唔識，你走去老屈全部立法會議員唔識？曾鈺成有冇權代表立法會議員？

我地作為選民，我地有權知道代表緊我地的立法會議員，究竟有冇常識！曾鈺成的講法唔代表我，我相信更佢講法唔代表多數的立法會議員！因此，林忌希望大家搞一個 FACEBOOK GROUP，向全體立法會議員發出嚴正聲明及問卷，質問佢地知唔知北極人少企鵝多，以證實曾鈺成的講法！結果將會在網上以及有意的傳媒公佈！

請大家踴躍支持！

Facebook Group: 要求全體立法會議員公開交待，識唔識北極人多定係企鵝多？

我想問曾鈺成: 不如你問全香港7百萬人，有幾多個人唔知企鵝住喺邊

旺角道唔出事先奇

2009-06-14T10:47:00.014+08:00

旺角兩死車禍　苦主控訴司機謀殺
車死人仲咁囂張 2009年06月14日

【本報訊】「成架小巴鏟上行人路，簡直係謀殺！」一輛綠色專線小巴前晚在旺角鏟上行人路造成十名女途人兩死八傷慘劇，死傷者家人昨指摘肇事司機罔顧人命，行為不負責任。可是，冷血司機被警員帶上警車問話時，竟無視自己的惡行，對着記者豎起大拇指，態度囂張。他事後被警方以「危險駕駛導致他人死亡」罪名拘捕，後准以一萬元保釋。可憐死者家人含淚哭訴：「你畀唔畀得番個女我呀！」　

據稱，這名綽號「矮腳虎」的小巴司機，平日「開車好狼」，駕駛今次行走旺角至落馬洲通宵線的小巴已有四年。香港公共小巴車主司機協進會秘書長黎銘洪則指他一向駕駛紀錄良好。現場有傳肇事司機日間駕駛另一線小巴，令人懷疑他「日做夜做」以致精神欠佳而肇禍。

睇完呢單新聞，林忌好不安；不安唔係因為有人死得好慘，亦唔係因為有人好囂張，而係擔心我地有冇屈錯好人，擔心我地的社會係唔係感性大哂。

睇下上址張地圖，一架小巴由小路轉出大路，被巴士撞完之後衝上行人路撞死人；有目擊者話見到架小巴好高速，加上小路出大路，應該係小路讓車，所以警方拉左個小巴司機，係合理的安排；但問題係，係唔係因為警方的「合理安排」，責任就只在於小巴司機呢？案情就係咁簡單，一點疑點都沒有嗎？

在開過車的朋友都知道，香港呢 d 轉九十度的小路出大路，係冇可能超速過彎的；就算用飛仔車，要咁樣掟九十度由小路轉出大路，最多都係做 50km 左右的速度－－亦即合法時速；無論架車再快，無論個司機點狼，由小路出大路幾乎無法超速，否則就應該唔係被架巴士撞上行人路，而係佢自己失控成架翻轉左，呢個係一個最基本的科學問題。

換轉係小巴，一架小巴高速掟彎再狼，你又試下跟下 d 專線小巴望下佢轉彎時會有幾快？對唔住，你坐在入面會感覺掟得好急，但係望下時速顯示，其實通常最多都係 30km 左右，因為講句難聽些，這些小巴的避震好差，根本唔容許司機可以掟得好快。

咁點解會發生意外呢？相信係小巴望唔到巴士，巴士亦望唔到小巴；小路轉出大路，往往係盲點式的死位，小巴司機個頭轉向右邊望路，再轉番去前面，如果再果一秒咁不幸有大車飛入來切線，係真係可以睇唔到的。

掉番轉頭，架巴士掟入慢線又有冇睇清楚呢？經常在路面開車的朋友應該好清楚，香港好多巴士司機，恃住自己架車大，係唔會望鏡就咁 cut 線的；更常見的係，呢類小路出大路，明明畫左黃格，亦即唔准停車等待，可是好多巴士司機一於少理法律，成架大車停在黃格前，於是小路內的司機就長期被封，塞到阿媽都唔認得，但係再一次，警方對呢類黃格停車的執法－－特別係對職業司機的執法，一於少理以至網開一面，於是潛規則就變成，大家鬥快搶位，好似賽車手咁先搶個位塞住，否則手車慢到唔使開，老闆唔炒你就奇。

因此，小巴之所以飛上行人路，最大可能性係被巴士撞完之後完全失控，有學過物理 Momentum 的就知道，一架大車撞落一架細車，架細車接受左大車的撞擊力之後，會加速撞飛；再撞車之後發生巨響，未立即引來途人目擊；目擊的結果，未係架小巴高速撞上行人路囉，咁你話架小巴高速，係因為被巴士撞，定係因為佢自己可以似車神咁高速掟彎先？就算你話佢轉得太快，但要佢「超速」－－超過法定的每小時 50 公里，現實根本冇乜可能！唔信，不妨搵泛民的車神－－鄭家富議員去飛下，睇下佢掟彎果時掟唔掟到時速 50km 而唔炒？

再假設小巴真係好高速，咁反而冇乜可能會撞上行人路，因為小巴的速度高的話，有兩個可能性
1. 架小巴未轉夠 45 度 2. 架小巴轉過 45 度。

可能性 1 的結果：撞擊後打橫撞向馬路中心，而唔係衝上行人路－－因為小巴向前的衝力唔會完全消失。 (有學過 Vector 的朋友應該明白)
可能性 2a 的結果：如果小巴速度高，巴士必定要速度比小巴更高，才可以撞到小巴－－如果小巴超速 50km 以上，咁巴士就要更超速先可以撞到佢。
可能性 2b 的結果：小巴同巴士同時以接近 50km 行駛，而巴士切線撞向小巴，才造成小巴撞向行人路。

當然最大可能性係架小巴司機冇睇清楚唔讓路，但客觀上仲有一個可能性，就係架大巴突然急速切線－－由於路面好多條行車線，唔能夠排除係架小巴司機進入左視線死角睇唔到的可能性。

因此，如果以小巴平日高速，就屈佢轉彎都係高速；以平時小巴司機狼死，就去屈呢個小巴司機同樣狼死，就係好不負責任的「未審先判」假設啦！何況仲有司機協進會的秘書長作證，話呢個司機的駕駛紀錄一向都良好，咁點解大家係唔係都覺得呢個小巴司機係殺人兇手先？『據稱，這名綽號「矮腳虎」的小巴司機，平日開車好狼』－－邊個據稱可以唔開名咁唔負責任呢？佢叫「矮腳虎」就狼 D？如果佢外號叫「慢烏龜」，就唔會係兇手？

眾所周知，中國人改花名係鍾意誇張；有一分都講成十分，叫「旺角劉華」可能只係佢鍾意劉華，而唔係佢有任何一忽似劉華；反之冇人會叫自己做「慢烏龜」！唔通由今日起，為左保障自己起見，人人都要改個膠花名，萬一有事就同傳媒報料：「記者大人，其實我叫慢烏龜，其實我叫大笨牛，所以我唔可能飛車o架！」

不妨問問林忌的朋友，咁多年以來，當大家問到林忌全香港最危險的道路係邊度，林忌都只得一個答案－－就係今次發生意外的旺角道！車從四方八面來，全部車都超狼，小巴唔望衝出來、巴士唔望切來切去，一切就切三四條線，後面的飛仔車係咁追住你尾，全部人都唔會讓，再加上燈位設計有問題，成日狂塞亂塞。

發生咁大件事，主流意見冇人去檢討路面設計，仲要有專家聲稱路面設計冇問題！「業界指讓線路面設計有問題專家不同意」－－運輸署發言人表示，一直有改善旺角區的交通，其中由西洋菜南街往旺角道方向，由兩線行車改由單線行車，目的是控制汽車流量、迫使司機慢駛及讓路等，以確保行人安全。

鬼唔知阿媽係女人？鬼唔知你地的「目的」係乜？但係 work 唔 work 先得o架？而家事實證明唔 work，你地仲乜表示都冇？係囉，都係有人衰囉，你地完全唔需要檢討！亦唔需要負責任！業界的一定全部都係衰人啦！

呢 d 專家的腦部，梗係唔明白點解要有兩線－－因為巴士經常停在黃格，而佢地就以為有黃格巴士就唔會停；如果有兩線，小巴仲可以在殘餘的黃格位走出去，但只得一線，警方又唔執法，結果就係一塞塞十世。

我地偉大城市的硬道理就係，停黃格犯法冇人理，但係一講到「速度」，就成班硬膠就唔理現實大叫：「好危險！一定係超速！」－－就好似百幾年前開始發明鐵路，大堆膠人話速度會殺人一樣，反科學到癡線！

冇錯，這裏就是膠港－－唔講邏輯、唔講道理、唔講理智的城市。

明光社與黃賭毒

2009-06-13T12:11:00.010+08:00

明光社常常迴避其政治取向，一直以來明光社採取親共立場，打著基督徒的旗幟，卻和獨裁政權勾結，看看佢地今個星期的「一週新聞精選」，大家又會有開心大發現！

在明光社的一週新聞精選，很奇怪原來明光社基督徒關心的，原來只有這四種類的事 1. 傳媒 2. 性 3.博彩 4. 生命與倫理；乜原來基督徒唔係最關心上帝的嗎？點解唔係關心神學，唔係關心全世界基督徒的新聞，卻去關心「傳媒、性、博彩」？

咩叫「生命與倫理」呢？看看明光社精選的三則新聞就可一清二楚，就係狂徒掟鏹水彈，就係索 K 吸毒！以上精選的十二則新聞，沒有一則和宗教有關！乜佢地唔係提倡政治同宗教分開咩？一日到黑關心的原來都係時事？點解同民建聯呀、呂志偉果 d 青年乜乜網絡關心的題目咁相似？乜明光社做左政黨咩？

仲有，十二篇報導都幾乎全部係黃、賭、毒，乜明光社做左黃、賭、毒新聞的收集者？ d 露骨案情報導畀基督徒睇完，會特別興奮嗎？唔係話新聞太多呢 d 鹽花式的報導咩？乜唔係話睇完色情會更咸濕？作為基督徒，日日睇精選新聞就係強姦、非禮、叫雞、吸毒與色情短片的新聞，有病呀？正常人睇新聞會專睇呢 d 嗎？明光社的讀者專睇呢 d 新聞o架？

乜唔係話香港傳媒太多呢 d 報導唔健康咩？乜唔係話呢 d 色情資訊睇多得會心理唔平衡，不能自控咩？咁點解明光社專門「精選」呢 d 新聞呢？蔡生佢地睇完會興奮？唔好再叫咩「一週精選新聞」啦，改名做「明光社一週淫賤新聞精選」啦！

六四新聞唔睇，家國大事唔留意，世界大事都唔理，原來一星期內全世界的基督徒都冇新聞，只得香港的咸濕、淫賤、吸毒的新聞？明光社信奉的係上帝定係撒旦？

再看看明光社選擇的報社，有大公、有東方、太陽、成報，唔使講的就係明報同星島；我到今日都好記得，幾年前有篇太陽報的頭條係「咬乳頭乜乜物物」！當然尊重自由主義的我地，都一向好欣賞太陽報敢作敢為的作風，但係明光社都推介太陽報？明光社都推介東方？乜明光社唔係對呢幾份銷量最高，卻內容最露骨自由的報紙睇唔過眼的嗎？乜原來明光社選擇性失明，最憎就係蘋果，東方太陽就冇問題？點解呢？你信唔信同政治立場無關？明光社，唔知你地會唔會推介學校訂閱東方太陽呢？

好啦，再欣賞下明光社推介新聞第一則，有關傳媒的星島日報《過濾色情資訊惹網民疑慮》！呢篇文章的親共程度就來去到最高級別，當全中國網民鬧爆「綠壩—花季護航」呢套政治審查軟件，唔單止政治審查，仲有木馬、有保安漏洞，連 BBC 都報埋出來，話「綠壩」都導致黑客入侵的危險的時候，明光社卻選擇相信星島，選擇最親共的報導－－『政府今次花四千多萬元向軟件開發商購得一年使用權，讓家長免費享用，「德政」卻遭受到多方質疑，難免不服氣。』、「關注私隱保障中外皆然」、『中國政府鼓勵「綠色上網」，要求全國學校等機構要安裝這套過濾軟件，當有關命令去到私人上網的小天地，就算是一片好心，也容易引起敏感反應。消費者購得電腦後，其實可以卸除這個軟件，但網民仍然擔心會否留下「木馬」程式，由此可見如何建立互信，才是推行政策的關鍵。』

就是嘛，明光社引述的「精選新聞」真的非常「精選」，當全世界討論《綠壩》時都提到政治審查、言論審查的時候，明光社可以當睇唔到，可以當唔存在！唔怪得，佢地從來都唔擔心色情過濾會變政治過濾、言論自由過濾，因為佢地根本當後兩者的問題不存在！

當中共政府用色情過濾之名，來做言論審查、政治審查的時候，明光社對此沒有一句批判，連新聞精選都搵黨的喉舌，因此要我地網民相信明光社的動機和中共不同，你信嗎？

明光社和中共做一樣的事－－就係以「反色情」為名，去「過濾」網絡，明光社和中共一樣，對政治審查問題隻字不提，明光社的新聞精選，會選大公東方太陽，卻不會選蘋果；以上的事實證明，網民說「色情過濾」係「網絡廿三條」，絕對係有理據的擔心！

搞過濾軟件，就係扼殺香港人言論自由的網絡廿三條！

傑出窮人系列？

2009-06-12T01:42:00.007+08:00

香港電台搞緊個新節目，叫做「傑出窮人系列」；其最令人諗到個頭爆的，就係一個叫做《窮富翁大作戰》的招募計劃，目的係「你將以指定嘅基層身份生活一星期，有機會去茶餐廳打工，仲可能要去地盤擔擔抬抬。養尊處優嘅你，有冇信心可以打好呢份工呢?」

其實呢個節目為左乜？賣弄窮人生活可憐的一面呢？還是為作官方台為政府的「最低工資」計劃造勢？拿拿拿，如果港台搵到政府高官來做呢個節目，例如曾特首呀、唐膠年呀、John Tsang 去試下做呢個節目，我就舉腳支持；但搵中產市民去過赤貧的生活，其實港台想 sell 乜？ Sell 「我要發達！」、「搵錢大哂」、定係「有錢大過天」？

港台的 facebook 寫:「貧賤家庭係咪一定百事哀？喺呢一個星期入面，單憑500蚊生活費，你可唔可以運用你嘅智慧同創意，將舊錢變大？點樣改善家人生活質素，齊齊活得有尊嚴?」好似好有意思喎，運用「智慧」同「創意」，將舊錢變大？但講來講去，一個最政治敏感的問題，就係知識就係金錢；唔單止知識用在搵工，用在收入方面，事實就係知識都一樣可以用在慳錢；舉例說，一個識自己砌機，自己維修電腦，自己燒焊駁電線，自己維修家電的家人，比起連換個燈都唔識的可憐人，係唔係會慳多好多錢呢？一個自己識得搵快樂，例如去行山，去運動，對比起屈在家中日日睇電視的可憐人，又係唔係健康得多，最終在醫療費用大大減少呢？

如果用一些強制人士的邏輯，點解我地唔去強制 d 窮人學到識為止？點解我地唔強制禁止佢地接受垃圾娛樂，而要一齊佢地去參加「修身、齊家、治國、平天下」的偉大理想？強制鬧交刑事化，強制打交處死，強制賭錢坐十年監囉！當代社會的現實死結就係，一方面我地要同情弱者，但另一方面我地又縱容弱者，這就是左派和右派永永遠遠不會停止的爭論，而事實就係，兩邊都有道理，因為的確有些人係好慘，而另外有些人係實在唔抵幫。

就好似有人提出話幫低收入家庭畀上網費，幫低收入家庭買電腦等，一望落去就知道提出意見的人士，係自己唔識電腦的朋友－－錢，可以買到知識咩？得，隨時用十倍囉；你畀五千銀畀我地去買電腦，仲耐用過你畀五萬銀畀電腦無知的人去買電腦，問題係用者唔識，亦永遠學唔識果時，我地係唔係花十倍的錢，在唔識的人身上？對果 d 識的人，又公唔公道？如果唔識就係硬道理，政府就會出手幫，咁我點解要咁辛苦去學？不如我又一齊坐係度，等政府救啦好唔好？

但反之，冇知識與冇錢一樣，都係低下階層悲哀而無法走出的死局；當一個家庭的父母是專業人士，佢地唔使請外傭，佢地教仔唔使補習，佢地有哂關係網絡，鋪定所有最好的路畀仔女，但反之當一個家庭係草根，小朋友不但百無，仲隨時面對永無寧日的家庭糾紛！生而不公，係人世間最悲哀的一回事，但問題係，我地可唔可以把問題簡化到用錢就能夠解決？係唔係畀左錢，成件事就完呢？畀左錢之後的連鎖反應，佢地有冇諗過？

幫助人有好多種方式，可是我們的社會到今日都只係單純地感性－－做義工，好偉大呀！你落手落腳去幫老人家，當然係好事；但反之，你能夠改革個制度，令社會更公平公正，幫得到的人會唔會更多呢？舉例說，當今日《保安員條例》仍然禁止 65 歲以上的老人家從事「非唐樓」、「非單幢式樓宇」的看更的時候，你點解唔去解決？你點解唔去改革？RTHK，你點解唔去做專輯探討呢個問題？卻走去做窮人的猴子戲呢？

老人家無所事事，屈悶在家中，佢地都仲想為社會盡力，簡單而言在一流保安設備的樓宇做下看更睇頭睇尾，點解要用法律禁止佢？點解要迫佢地去申領綜援冇野做，唔識打發時間的時候，衰點講句係等死？

對，人類就是感情的動物，為何「殺人放火金腰帶，修橋搭路無屍骸」呢？因為殺完人，放完火，只要捐佢身家的一億分之一出來，就會被封為「善長仁翁」；反之勞心勞力，爭取真理，真真正正做實事的，我地就覺得呢 d 叫「搞搞震」、「搏出位」、「好大政治野心」、「冷血」、「把救災拉上自己的政治企圖」。

結果係點，正如五千年的中國社會，永遠都有無數的義工，永遠都有無數的大善人，但卻出不了幾個改變社會的哲學家、法學家、政治家、歷史學家、經濟學家。我地的硬膠社會，就係重腳輕頭，以為按按腳，就可以醫 cancer，救一兩個窮人，就可以改變社會的不公，以為靠加加減減，例如立一條硬膠最低工資法律，就可以救萬民於水深火熱！反對的，簡直就係「社會的敗類」呀！

好浪漫，但係好唔真實；朋友，你今年幾歲？

土共致力消滅廣東話

2009-06-11T00:01:00.001+08:00

文匯報：廣東話教學不可取 [2009-06-09] 曾淵滄博士

教育局終於決定讓全港中學自行決定以什麼語言來教學，相信，今後多數的中學會努力嘗試以英文英語教學，因為多數家長會認為學好英語是重要的。

林忌曰：冇人話反對英文教學喎，以往又英又中一樣學得好好，係全靠你文匯大公支持的董建華所支持搞的母語教學搞到衰哂之嘛，邊個愈改愈衰愈改愈錯？冇香港良心陳方安生，連一百間英中都不保啦今日，你班契弟當時又唔出聲？

學好英語的確是重要，因為至今為止，全港大學的主要教學語言是英語，學不好英語進不了大學，讓子女進大學是每一個家長的願望。

林忌曰：一早都咁講啦，咁點解要搞語言分班？

反對的人仍然有，反對者依然以「母語是學習知識的最佳語文」為理由，並說這是世界公認的道理。

林忌曰：用咩語言教學，係老師、學生、家長三方自行決定的事，係共產遺毒制度下乜都要規管，先搞到今日咁反智。

冇人反對英文教學喎，係有人要硬性規定咩人用咩教；因材施教唔係老師的權利與責任嗎？點解要由中央去指指點點？用英文教學，以及廣東話學中文，係兩件事，班契弟就講到係一件事咁！

方言教學效果未必最佳

我的母語是閩南語，我在新加坡長大、受教育，打從我進入幼稚園開始，就沒有以母語學習，從幼稚園開始，新加坡的學校只以華語（即普通話）及英語教學，而學習的結果是成功的。今日，我與新加坡的兄弟姐妹談話時仍然用閩南語，但是，我沒有能力以閩南語讀一篇中文的文章，但無所謂，也沒有必要，只要我有能力以華語讀一篇中文的文章就夠了。我來香港22年，廣東語也算流利，當然發音不準，同樣的，因為從來沒有用廣東話學中文，也無法用廣東話讀一篇中文文章，甚至無法以廣東話唱歌，但也無所謂，也不重要，生活所需的只是一般的口語，一般的交談語言。

林忌曰：曾淵滄博士，你博士係咩學科呢？係唔係語言學呢？你發音之前有冇問過語言學的專家呢？你用博士之名來發音，有冇考慮過你的發音反唔反映到你的學歷呢？

廣東話係方言，係中國共產黨為打壓地方文化的一種政治行為；廣東話有八千萬至上億的使用者，比起歐洲大部份語言的用者都更多；咩叫方言？咩叫語言？方言同語言最的大分別係乜野？科學上兩者有冇咩大分別？除了政治決定之外，強把廣東話叫為方語，強把普通話說為語言，係一種弱智的行為，唔識語言學就來亂發音，曾淵滄博士你以為自己做左博士，就係萬能專家？

今日，全世界可能只有香港還在用方言，即廣東話來教學，特別是小學階段，這是不可取的，這是香港人自大的表現，這是限制香港人向內地發展、與內地來的旅客交流、做生意的機會，語言的學習越早越好。

林忌曰：對呀，因為全世界可能只有廣東話呢種成億人講的語言，才會被迫降格成為方言；在被迫降格之後，仲要被曾博士呢類「專家」二次傷害，因為降格左成為方言，就「冇資格」成為教學語言。

簡單而言，用佢的邏輯就係咁，先宣佈曾博士係「次人類」，因此「次人類」發音就真係世界「首創」啦！因為世界上只得佢一個「次人類」咁大把，所以發音就係「大新聞」啦！嘩！

好一個「全世界可能只有香港還在用方言，即廣東話來教學」－－我地不如又來一個「全世界可能只有香港還在使用地方貨幣－－即港幣來交易－－這是香港人自大的表現，這是限制香港人向內地發展、與內地來的旅客交流、做生意的機會，因此廢左港幣呀笨。

係囉，廢左港幣行美金，我支持！廢左中文用英文，我都支持，用曾淵滄博士的語言偉論，點解要用中文？這是限制香港人向全世界發展、與全世界旅客交流、做生意的機會，因此我建議廢除中文，全面採用英文。

今日，許多香港人也知道學習普通話的重要，但是，年紀大了的人學習語言的能力差了，香港回歸近12年，特區政府一直不願意正視全民學普通話的課題，一直誤以為以母語，即廣東話來學習是最佳的學習知識方法，這對香港長遠的發展來說是絕對不利的。

林忌曰：年紀大了的人學習語言的能力差了－－咁未學歐洲，細細個就幾種語言教學囉，唔止教英文，仲應該教埋法文、拉丁文、德文，語言專家講三歲前學係最好的，既然全世界的大學，全世界的學術文獻都係用英文為主，點解我地要用普通話？曾淵滄博士你可唔可以用一個學術上的理由回答一下呢？

現在，海峽兩岸和解，我們可以預見將來兩岸的關係會比內地與香港的關係更密切，道理就是語言，兩岸人民都講普通話，溝通容易，香港人與內地的溝通就有問題。

香港太小了，香港人一定要走出香港、走向世界要學英語、走向內地要學普通話，這是刻不容緩的時候了。

林忌曰：香港人口比起很多歐洲國家都要多；講廣東話接近一億的人口，比起歐洲十幾個小國加埋都仲要多，就係呢 d 唔識廣東話，唔尊重廣東話，唔尊重香港文化的偽香港人，就好似之前果個曹景行，才會要致力消滅香港文化的廣東話為目標。

就是嘛，如果要和世界接軌，點解唔全面廢除中文呢？學新加玻全面英文教學囉，搞咩普通話教學？你有冇病呀曾淵滄博士？

當然，我也明白，多年來香港語文教育問題一直無法解決的一個相當關鍵是教師，大量教師沒有能力以流利的英語教學，大量教師也不懂普通話，這些人肯定會反對一切改變，因為會影響他們的飯碗。

但是，變還是應該變，只要不影響現有教師的飯碗，一步一步慢慢的變，是可能的。

林忌曰：不知所謂的推論，我建議廢除所有香港的金融制度，全面引進美國制度！把曾淵滄博士呢類阻力太大，幾種語言都唔準音的飯碗打爛吧！香港金融制度的死結，就係太多不知所謂的財經敗類！呢一點絕對比起把責任推畀教師正確，你話係唔係？

伸延閱讀：曹景行還是不行
欣賞曾淵滄博士硬撐葉劉的宣傳片

邱騰華的「環保建港聯盟」

2009-06-10T17:31:00.010+08:00

有很多熱愛環保，也熱愛民主的朋友不明白，為何林忌對邱騰華局長有如此之大的反感；其實由始至終，林忌仍然堅持對事而不對人，問題係邱騰華的態度就好似廿三條中的葉劉一樣，因此我才要企硬反對到底。

用一個比喻去說明，就係乜「民主建港聯盟」（今日叫做民主建港協進聯盟）冇話自己爭取民主咩？民建聯一樣口口聲聲說自己係爭取民主，一樣提出一些「政改方案」，去「追求民主」；例如 2005 年泛民投反對票的「政退方案」，一樣增加了民主的代表性，一樣有廢除委任區議員，咁點解泛民要反對到底呢？點解泛民寧可要冇「政改」，都要投反對票呢？原因就係呢個所謂「政改」，其實係「政退」，表面上進步的方案，只係在一些無關痛癢，甚至係包括糖衣毒藥的方案（如增加立法會議員的數目，卻不改變直選與功能組別的比例），因此有不如無！

相同的問題出現在環保，我地見到邱騰華的所作所為，就好似民建聯在民主問題上的所作所為一樣；真真正正需要佢做的，佢就好似民建聯一樣唔做；假環保的假議題，佢就樣樣都全力做，仲偏要做過龍；舉例說，真正要減廢氣，係唔係應該由珠三角的工廠開始？係唔係應該由兩電的排放開始？如果講路邊廢氣，係唔係應該由最多廢氣排放的柴油車開始？偏偏由始至終，上述所有最重要的事項，邱騰華避得就避，正如民建聯在普選的問題上面一樣，當聽唔到當睇唔見，反之，專就一些冇用的事項來「大搞特搞」－－立法強制停車熄匙呢個議題，就正正係一個假環保的議題，搞得到都減唔到 1% 廢氣，更過半數機會製造更多廢氣，偏偏佢就要向虎山行，就同民建聯同你講，要增加「立法會議席」去「增加民主代表性」一樣，信佢一成，雙目失明！

一次、兩次、有 Guts 的環保團體都企出來大大聲鬧爆邱騰華－－「環境局長邱騰華日前接受《明報》記者查詢時拒絕環保團體的要求，理由是二氧化碳並非污染物，只是一種會造成溫室效應的氣體。邱騰華對環境問題的無知，令人感到訝異！」、「綠色和平4名成員，向出席立法會空氣質素指標議案辯論的環境局局長邱騰華表達不滿，指責他在修訂空氣質素指標時，漠視公眾健康。綠色和平即場送上防毒面罩予邱局長，並當面要求他公開回應政府為何罔顧市民性命安全，拒絕以世界衛生組織終極標準量度香港空氣污染。」－－你話減廢氣，係唔係應該用科學的標準去監察呢？你話一個連世衛組標準都唔用的邱騰華係愛環保，所以去企硬推行「強制立法停車熄匙」？你信佢？你信佢一成，就真係同信 X 建聯一樣，雙目失明啦。

「東方：港府推出《產品環保責任條例》，繼膠袋後，電視機、雪櫃、冷氣機、洗衣機及電腦五類電器將成下個受規管的產品，年底將諮詢公眾。據悉，港府上周向環諮會簡介有關計劃，初步構思向該五類的電器入口商或代理商，徵收約每件電器成本的百分之一至五。回收模式包括「以舊換新」，即零售商送貨時須回收一件舊電器，或在各區設回收點收集有標誌的舊電器，而入口商每回收及處理一件舊電器，可向港府索取處理費。現時全港約三百至四百個電器代理及入口商。」

睇下呢個新法例又有邊一忽環保？乜環保唔係減輕排放咩？舊電器高能源消耗－－例如雪櫃、冷氣機，而家政府唔係鼓勵減少能源消耗，卻反其道而行，去罰那些舊換新的消費者？癡線o架？不如罰埋埋換新車呀笨？換新車都要回收呀笨？人人用舊科技，排放多些廢氣，燒多些能源，呢個就係邱騰華局長的目的啦！

再一次證明，邱騰華係一件完全冇科學頭腦的中式規管膠；你勉強可以話年輕人成日換手機浪費，我唔討論呢樣野係唔係浪費先，但你有冇見過香港人以「換雪櫃」、「換冷氣」為樂？有幾多香港人以冷氣機、雪櫃作為潮野係咁換先？如果冷氣機、雪櫃老化，第一個問題係乜？就係唔凍；唔凍的結果會做乜？係唔係「停櫃熄機」呀？係唔係唔凍果時就「停冷氣熄機」呀？定係開大些，用多些能源？從一個咁簡單的問題已經可以看得出邱騰華的智商，規管市民換冷氣、換雪櫃的結果，就係用冇雪種又開大些，唔夠力就買大匹數的系統，邱騰華係為環保，定係為左電力公司而出力呢你話？負責任的環保組織，你地有冇諗過邱騰華係倒緊你地米？

講到電子產品如電腦、手機等等，玩得呢 d 野的年輕人都知道，二手有好高的回收價；連街邊的陀地都走去做回收手機，電腦二手零件的交易更係多如牛毛，有需求，有二手轉讓再用，邱騰華要規管 d 乜？唔好話香港人用完，仲有第 N 手轉口返大陸等未發達的地方去作最後的轉售，關邱騰華乜事？有囉，佢呢類唔知米貴，唔識科技，自己開政府 3000cc 的燒油車的契弟，佢就或者唔會走去放去二手網站囉，真正的玩家－－那些成日換的，個個發左達呀？有人回收都唔賣要掟去堆填呀？

香港真正要做回收的，就係膠樽，就係垃圾分類，呢 d 最重要的事佢唔做，走去做不知所謂的回收電器？佢有冇病呀？你如果相信佢，你又有冇病呀？民主普選唔做，走去話增加立法會議席，畀你增加到一萬個又點？唔改功能組別比例，會民主左咩？今日香港的環保問題的關鍵－－由堆填、分類、去到減排，呢 d 最重要的事情邱騰華都唔做，專做冇腦的垃圾工程，而又有一班冇腦思考的香港人黑白是非都唔分，把假環保就等同假民主一樣，當係真的，咁你話會唔會衰到貼地？

支持邱騰華的「環保建港聯盟」，就等如支持「民主建港聯盟」一樣，不但名不符實，仲係完全相反；問題就係，作為泛民有腦支持者的你，會唔會用大腦去思考？

民建聯成功爭取北極企鵝多

2009-06-09T21:12:00.014+08:00

咩話？民建聯副主席、青年民建聯主席張國鈞上港台節目《左右紅藍綠》，大談北極企鵝多的心得：「一直以來，北極都係一個非常寧靜的地方，人少企鵝多」唔係嘛？我只係知道，一直以來，民建聯都係一個非常之硬膠，「人」少弱智多的地方－－點解？你睇下佢地千挑萬選的年輕才俊，唔係 Try my breast，就係真心膠到以為北極有企鵝的天才！張國鈞律師，你唔係連北極冇企鵝都唔知嘛？

拿拿拿，你話北極「有企鵝」，我都勉強姑且聽住先，因為有一隻，都可以叫做有；雖然野生冇，但你點知神通廣大，擁有無窮大勢力的民建聯會唔會派「神棍八號」由南極運企鵝去登陸北極先？之不過問題就係，你話北極人少企鵝多呢，咁你就死梗啦；張國鈞律師首先要先證明，北極的企鵝多過人，之後佢更要證明，比起人口來說，企鵝在數量上佔多數！張國鈞律師你話點證明呢呵？我真係才疏學淺學極都唔識；不過，由於土共陣營一向死都可以講番生，例如六四死左咁多人，都可以減到得番廿三人，以佢地的創作能力，你話南北極倒轉又有幾難呢呵？

節目真係講緊北極，偏偏有人冇料又要東拉西扯，無神神爆隻企鵝出來獻世笑大人個口；更過癮係，一眾土共連英文都唔識睇，用英文維基講北半球勉強都有少量 Galápagos Penguin 的資料，把北半球當係北極，把「有企鵝」當係「企鵝多」，威盡全香港。

唔怪得知成班友話年輕人唔掂－－梗唔掂啦，選才俊都係得呢種質素，唯一解釋就係物以類聚，以往「時勢造英雄」，狗屎垃圾都可以出來猴子稱大王，今時今日千挑萬選的「青年民建聯主席」，原來連基本科學常識都冇，可以錯到連南極都當係北極，然後就 9up 一大堆垃圾去做政治評論－－乜香港電台咁冇料，錯到咁都冇人發現可以出街呀？乜民建聯上上下下都咁冇料，要出面畀人笑到面黃先知自己膠左呀？

開心大發現：馬力為師　信心十足
張國鈞自告奮勇，當然不會「無備而戰」，原來他早從畢業開始，已參與母校校友會運作，對校政早已了如指掌。近日更銳意在教育界廣交朋友，恭聽學界訴求，務求「炮製」民建聯教育大計。加上在「師徒制」下，得到馬力主席作為他的「指路明燈」，難怪他對未來工作信心「爆棚」，「依家差不多馬生去匯教育場合我都跟住去。佢早前仲約o既港島區校長做地區諮詢，我都會去學野。」

早於選舉時已有幸與馬力攜手合作，張國鈞高興自己又獲「偷師」良機。「馬生有一種學術書生匯感覺，諗野方面好細密，佢真係好有心搞好教育政策，我相信我可以學到好多野。」不過師傅大病初癒，「徒弟」當然義不容辭，主動「招架」傳媒的「追魂call」。「馬生都叫我把握機會，仲話我會多 D 機會曝光！」

唔怪得知啦，原來張國鈞係有「材子」之稱的馬力的偉大徒弟，果然係兩師徒都一表人才！師傅就話要搵隻豬去畀坦克碌下，徒弟就認為「六四是一宗悲劇，但認為現時不是適當時候總結事件，相信歷史會作出評價。」而家仲大大聲話「北極人少企鵝多」添，真係信佢一成，雙眼失明，同佢個黨一樣咁「堅定」，不如搵隻北極企鵝去碌下呀？北極人少企鵝多？張國鈞你見鬼呀！你師傅話佢o係阿鼻地獄好慘，叫緊你落去陪佢呀！　你係唔係最近發夢成日見到馬力呀張國鈞？

路遙知馬力，企鵝張國鈞－－政壇傳聞馬力如果在生，今日民建聯的局長助理就唔係徐英偉，而係張國鈞；事實證明，如果連張國鈞都係這樣的水平，咁「次選」的徐英偉係咩貨色？唔怪得佢會同另一位民建聯的前副主席一樣的政治智慧，手持加拿大護照去加入政府啦！

伸延閱讀：
維園見！（張國鈞偉論重溫）
Try our breast 陳克勤再早抖篇
克勤 Try our breast X Reginababy, she bangs!
「福佳始終有你」影像版

Facebook Group:
青年民建聯主席張國鈞話北極有好多企鵝 ! 促請民建聯舉辦「北極企鵝觀賞團」由佢擔任團長陳克勤帶領搓企鵝胸!