Suañandu na Rede

Quizais mañá...

2009-02-19T19:29:00.003+01:00

Levo tanto tempo soñando os teus bicos que o día que sexan realidade só poderán decepcionarme.

Imaxínoche xalundes, cabo min, pronunciando paseniño tódalas palabras que nunca me dirás e os bos momentos que endexamáis viviremos xuntos. Dígomo acotío, son un iluso, un soñador, pero prefiro iso, esa perfecta historia que dibuxo na miña imaxinación cando levanto a fronte alonxándome de soporíferas liñas que versan sobre o meu amor ás palabras, esa perfecta historia que aparta a parva realidade coa que tropezo cada vez que xurde do meu interior a máis mínima vontade de achegarme a ti e dar comezo a outra páxina que pasar.

Hai un ano que decidín dexar atrás esas sensacións que fan de min tódolo contrario ao que quixera ser abofé, secasí, ao cabo sempre chegas tu a contraxeito, e por máis que procuro evitarche ou pasar a rentes das túas fermosas formas, só consigo esvarar arreo no negro chan dos teus ollos, isos que sempre escapan dos meus.

Hoxe amor, tras longos meses da túa doce presencia, quedo coa esperanza de atopar o intre perfecto no que teña a forza abonda para empezar a nosa pequena historia, esa que temos que escribir ti e eu, a mesma historia que se mestura con leccións de filoloxía nas tardes que rematan coa túa marcha, cando fico só e vexo que outra oportunidade pasou...

Quen sabe, quizais mañá...

Los Versos Grises

2009-02-16T17:13:00.002+01:00

Cul corazón valeiru caleyu

pur requeixos yá vistos, nun hai destín,

las caras d'antias, las de siempres, sumienun

nel intre en qu'alcontronun outra más nueva qu'amirar.

Y bulle n'esta tiesta l'anoxu a l'apatía,

a tentar de clisar estos gueyos cunu que yá vienun

peru tamién sumienun las arrancadeiras pa faer camín

anguañu sólu y sonce, quixera afuxir d'esti fueyu

mas n'él alcuentru'l veiru que precisu y refugu.

Agora, eiquí, nu fondeiru

quixera desaniciar tol camín recorríu,

escoyer outru carreiru que me desameza

d'esta riestra de fechizos podres que desanician

tolu que nun sou nin sedréi

Xa rematei os exames!!

2009-02-14T22:17:00.003+01:00

Uf, canto tempo sen escribir...

A verdade é que xa non lembraba nin que tiña un blogue. Foron tantas as cousas que pasaron desde o último post, tantos feitos dos que podería falar que... prefiro non facelo. Un dos motivos polos que non tiven tempo para actualizar foron os exames, levo preparándoos desde setembro, estudando tódolo que puiden, e grazas a Deus... si, saliron ben! ;) (agás literatura muahaha).

Deica en adiante, con máis tempo libre e un pouco de inspiración... procurarei dar sinais de vida a miúdo (cantas veces fixen esa promesa?).

Saúdos á xente que segue pasando por equí!.

Xairu.info agora tamén en galego

2008-11-20T18:45:00.002+01:00

Como iste curso unha das mías asinaturas é Lingua e Literatura Galega I, teño a intención de publicar alguns dos meus escritos en galego para practicar un pouco mais e non quedarme solo co que vexo nos apuntes, básicamente porque como aínda non teño moito xeito nesta fala, mentras escribo xúrdenme moitas dúbidas al respecto de palabras que non coñezo, e asina oblígome a busca-las no diccionario e afondar no meu vocabulario.

Se algún dos lectores diste blog é galego-falante ou ten un bo nivel nesta lingua... que non se curte á hora de pegarme un pescozón polos errores que poda cometer (imaxino que niste post xa habrá uns cantos... xD).

Saúdos ;)

14 versos suañaos

2008-10-10T16:29:00.002+02:00

Asperu asoberviáu la escuridá
pur ver cumu s'amata el sol bermeyu
qu'enxuga llárimas cunas que mueyu
las fueyas nas qu'amuesu la verdá

Palabras d'amor, de felicidá
cunas qu'alita un sentimientu vieyu
que tenta d'esconder el mieu deseyu
de veme afalagáu pula piedá

Peru ye tarde, la campana suena,
las lletras nun ufiertan salvación
al que pur corazón tien una truena

y nagua pur romper esa cadena,
correr llibre, chumbase na visión
qu'imaxinóu tan lluenxe de la pena

26

2008-10-03T10:29:00.002+02:00

Cumu me dixu un amigín na sua felicitación...

"14 años para los 40, a que es jodido!".

Uff...

Atrás, nu tiempu

2008-10-02T16:59:00.007+02:00

Acuruxáu, baixu la cobertura del andanciu, afalagáu pur un cientu de cantares que nun son estraños, puedu empontigame tiempu atrás a tardes soleyeiras d'hibiernu que quixera revivir, peru... ¿cúmu revivir dalgu que nunca nun esistíu?.

Lluenxe, tras los praos que quedan a mandreita, destacan murias bermeyas y cardosas qu'aveiran milentamil historias que recuerdu pesia que nunca nun fui parte d'eillas. Sólu yía mocedá ayena que nagua pur ser propia, atremetiendu escontra los años cumu si pudieran desfaer camín.

Los viejos sueños eran buenos sueños.
No se cumplieron pero me alegro de haberlos tenido.

Y este sea un buen principio...

2008-10-01T19:38:00.005+02:00

Imaxinu que somos muitas las presonas que pasemos la nuesa adolescencia suañandu una vida de película, una vida na que dieramos exemplu recorriendu pasu ente pasu'l camín ata'l mal postreiru semandu tras de nós un cientu de guelgas tiznadas de la nuesa sensibilidá ya bonfaer. N'esti intre, tras los años ya la esperiencia, tengu la sensación de que sólu me queda la sonce tranquilidá d'una vida acomodada ya inestable pur un puñáu de circunstancias, ya la disgracia de tar condanáu a revivir indefinidamente l'inevitable fracasu nu tercer deseyu más común ente la caterma.

Ya d'esmenu chegas tú, ya ensin que me da tiempu a apistañar debrucas tou aqueillu que yá entamaba acaronxase outra vuelta pula monotonía d'unas tardes de branu llargas enforma. Chiquesti estos llabios afalada pula repotente artificialidá de las mias palabras, y agora, sele que sele, tentas d'arrincar la mia mazcara, esa cuna que va tiempu escondí lu que sou en rialidá, ya lu ciertu yía que tengu miéu, miéu de que tras d'eilla sólu alcuentres un ruín migayu de lu qu'entrambos quixeramos afayar en rialidá. Sicasí...

...puede que no, puede que todo cambie,

que los días que tienen que venir

abran ventanas a la esperanza.

Este puede ser un buen comienzo,

este puede ser un buen principio...

muahahahahahah

2008-09-12T09:16:00.002+02:00

Sí, tou d'alcuerdu xD

Dichosa Nodicia...

2008-08-18T20:23:00.009+02:00

Nos últimos días creyóuse un espolín curiosu cuna noticia de que'l Conceyu de Chozas d'Abaixu quier que se reconoza la Nodicia de Kesos cumu'l primer documento escritu en llingua castellana. Unos dicen que si ye castellán, outros que si ye llïonés, y dalgún apalumbáu ata pensará que ye dalguna clas de gallegu. En fin, cumu tengu tiempu y ganas, pueis aproveitaréi p'amosare la mia oupinión.

Presonalmente creyu que tamos partiendu d'un erru fundamental, que ye tentare de definir esti documentu en base a las llinguas romances cunas que cuntamos anguañu na Península Ibérica, y ye un erru purque la Nodicia de Kesos nun ye'l primer escritu en denguna d'eillas. Esti documentu nun ye más qu'un protorromance, un llatín mal escritu, ou un primer pasu escritu del llatín a outra cousa que, senciellamente nun se puede definire purque nun tien dengún rasgu qu'amuese cun claridá la sua pertenencia a denguna de las llinguas esistentes guei. Vamos, que pur sere podría sere castellán, llïonés, asturianu, gallegu, rumanu, catalán ou sardu. Agora bien, si la cousa ye aneciare cun qué ye ou qué nun ye, pueis nestoncias hemos tener en cuenta la fecha na que fou escrita y el llugar nel que fou escrita, y esi llugar n'esa fecha... taba dientru del domiñu llinguísticu llïonés.

Si tantos "filólogos de prestixu" tan encerricaos en dicire publicamente qu'esu ye castellán, los sous intereses presonales tendrán, you podría tamién tirame a lu fácil y dicire qu'esu ye llïonés y puntu, peru senciellamente sedría tracamundiare la verdá, ou cumu se diz más coloquialmente MEN-TI-RE.

¡Ciao!.

Décima

2008-08-10T02:24:00.004+02:00

Agarduñéstime'l branu
tras d'acuriosame l'alma,
enchenándume de calma
ya d'esperanzas en vanu.
Fermosos intres d'antanu,
mil sonrisas ya miradas
cun beisos remisturadas
qu'esnalan cual volandeira,
afuxendu d'esta eira
erma de ruines pisadas.

¡Free Tibet!

2008-08-09T14:43:00.008+02:00

Nel día d'ayeri escomezonun los Xuegos Olímpicos más polémicos de la historia, poru, quixera aproveichare pa unviar un mensax a tolos lleutores d'esti piqueñu requeixu en llingua llïonesa.

Que naide nun esqueiza que'l propiu país qu'entama esta edición nun ye'l miyor exemplu d'espíritu olímpicu qu'esista, antigual, la sua política ye ditatorial ya imperialista, amás de tare desaniciandu un pueblu milenariu cumu'l Tibet, patrimoñu de tolos ciudadanos del mundu y parte mui bien d'importante de la cultura universal. Pur estu, y purque ye inaceutable qu'en plenu sieglu XXI sigan esistiendu situaciones cumu esta nel mundu, Xairu.info guei glaya:

¡FREE TIBET!

Las Arribes del Douru

2008-08-04T17:55:00.010+02:00

Diba tantu que sintiera falare maraviellas de Las Arribes que taba que morría pur visitar esti requeixu del mieu país, asina que decidí apuntame a la escursión entamada pula Conceyería de Cultura Llïonesa dientru de la campaña "Reinu de Llión · Descubri un País", basada en deillos viaxes a llugares nos que la cultura llïonesa ta presente.

Las Arribes del Douru tan allugadas na parte más noroucidental de Salamanca, allá n'onde'l Douru creya una fronteira natural ente Hespaña y Pertual. Trátase d'un chuscu microclima mediterrániu nel que la vida s'abre camín cun fuercia, poru, amás de facer un calorón qu'afuega, puedes alcontrare naranxales, pescales ya inclusu plataneiros. El gran atrautivu d'esta zona ye ensin dubia dala'l gran cañón pul que flui'l Douru camín de la sua desembocadura, un paisax incomparable y que de xuru nun deixa indiferente a naide.

El viax fizu la sua primer parada nel conceyu de Vilvestre, un piqueñu pueblín na llinde cun Pertual nel que ficimos una visita a los puntos d'interes turísticu principales cumu son el miradeiru (quedéi ensin palabras, un auténticu regalu pa los gueyos), la eigrexa, ou'l museyu arquiolóxicu. Tras estu, empobinémosnos p'hacia l'embarcadeiru n'onde xantaríamos ata que chegara'l barcu que nos llevaría nún trayeutu fluvial ata Aldeadávila, llugar en que'l catamarán ha dare la vuelta purque'l ríu deixa de sere navegable. Pesia que'l tramu horariu ente las dúas y las cuatru y media la tarde fou bien abegosu pul calor y la imposibilidá de chumbase nel augua (sucia enforma), el trayeutu en barcu fizu de la escursión dalgu inesqueicible.

Cun una duración de cuasi dúas horas, y esfrutandu de la fauna y flora de la zona dende'l miyor puntu de vista posible, el ríu Douru, pudimos sentinos rialmente insinificantes, cumu renacuayos en mediu de las xigantescas coteiras que s'abrían a babor y estribor. El paisax, práuticamente virxe pues ye inacesible dende tierra, yera d'un verde que rellumaba pulas rayadas y que sólu yera escureciu pur momentos baixu'l vuelu de Butres y galfarros. Interesamente amás yera'l feichu de que la embarcación cuntara cun bar y aire acondicionáu, carauterísticas que nos fizun esqueicere los 40 graos que facían del esterior un paraisu llïonés caliente cumu l'avernu, y digu llïonés principalmente pul gran llabor que fizu'l gía desplicándunos las carauterísticas poblacionales, culturales, etnográficas ya históricas que faen d'esta fasteira ún de los puntos más prestosos dientru del continuum cultural cisastur.

En conclusión, outru fermosu llugar qu'encamientu visitar a tol que ye preste la cultura llïonesa y tolas maraviellas xïográficas que'l nuesu país puede ufiertare. Esu sí, llevái augua... mueita agua.

Augua

2008-08-01T21:42:00.004+02:00

Acaba yá'l tiempu, esmurez la chama,
el miéu qu'esbaria , chegóu yá la mare
y anubre'l mieu cuerpu amoláu que sana,
agora sou ríu que'l monte ha baixare,
sou l'augua xelada que sele s'arrama
nun suañu seruendu del qu'hei espertare
nel bierzu de siempres, vieya y fría cama,
que canda d'esmenu las ganas d'amare

y abrazu cun fuercia l'arume que queda
dulces pingas d'aliendu y seda...

Alendandu país...

2008-07-28T20:15:00.006+02:00

El cielu vese más azul en Cabreira, quiciás purque cuasi puede toucase cunos deos...

Esti fou'l segundu fin de selmana consecutivu que m'averéi a esta fasteira del País Llïonés y la verdá que pulas ganas quedaba allá a vivire. Son deillas cousas las que vas escubriendu a la que tiras pulos carreiros d'esta fermosa tierra, peru si hei quedame cun dalgu d'esti últimu viax... ye cuna satisfaición de que las personas que nos acompañonun de xuru que quedonun cuna sonce guelga de los bonos momentos pasaos ente esas montañas.

La ruta que ficimos esti domingu nun fou mui diferente de la feicha l'anterior. Llión - Corporales - Trueitas - Encinéu - Trueitiellas - Ribadellagu - Rueidenore - Llión. De lu fermosu que ye Corporales yá falara en posts anteriores, peru una de las cousas que más me clisonun d'esta escapadina fou el treichu de carreteira ente Iruela y Quintaniella de Llousada, nel transitu de Cabreira Alta a Baixa, paisax incomparable que percorrimos y qu'acabóu cun una prestosísima xanta n'Encinéu arrodiaos de l'arquiteutura pizarreira más tradicional. Destacable fou l'amabilidá de los habitantes y el poder ascuchare la llingua llïonesa na voz d'un falante qu'allegróu la xornada y fizu garrare fuercias pa lu que quedaba d'eilla.

Dexandu atrás Cabreira y tras un breve chapuzón nel llagu de Senabria chegemos a Rueidenore, población que xunta Peñalba de Sayagu pa min ye la más fermosa del País Llïonés. Dixebráu en dous conceyos, ún allugáu nel estáu portués (mueitu miyor cuidáu en tolos aspeutos) y outru nel hespañol, esti llugar cunta cun tolas carauterísticas qu'un pueblu tradicional llïonés ha tenere: Casas de pizarra cun corredor, eigrexa, ríu, cais bien estreichas, cimiteriu... y un paisax encantador. Na vertiente hespañola ye especialmente graciosa la toponimia, el nome ouficial del pueblu ye "Rihonor de Castilla", un topónimu inventáu que los propios paisanos refugan frontalmente, de feichu fou Manolo, un entrañable habitante, el que nos cuntóu cumu'l nome rial de la población ye "Rueidenore de Cima", siendu'l conceyu de la zona pertuesa "Rueidenore de Baixu".

Cumu chegemos un poucu tarde y yá taba escureciendu, nun pudi sacare fotos potables d'esti pueblín, sicasí... da igual. Nun hai semeya que faiga xusticia a llugares d'esti xeitu. Rueidenore entra tan adientru que yá nun sal, l'aire qu'aliendas allá, emburriáu pur ventolines y perfumáu de yerba y xanas, sana l'ánima y fechiza los gueyos de maneira que yá nun quieren ver outra cousa.

Nun va ni un día que fui... y yá tou que muerru pur volvere. Si tenéis oucasión tirái p'allá, rialmente paga la pena.

Cuidáivos amigines.

A Sagrariu

2008-07-24T12:43:00.006+02:00

Peru que bien que falades
la nuesa llingua en Cabreira
en La Baña, en Corporales
Trueitiellas ou Llousadiella

¡Oyes tú! ¡mocicu! ¡Apriesa!
éichaye al llume outru palu
que dixu tía Sagrariu
qu'esti iviernu vien bien malu

que yá nun hai filandones
d'esos que tantu prestaban
nun queda xente nu pueblu
los cabreireses marcharan

qu'antias al escurecere
mozos y mozas baillaban
peru guei d'arrincar berzas
las dúas piernas tan cansas

Díxume que nun va mueitu
cuandu la nueite chegaba
cuntaban cuentos ya historias,
mientras sonaba la gaita

guei cumu tenemos tele
y la xente xoven falta
yá nun hai pa quien filare
a la que Mariya canta

Cuídese tía Sagrariu
que feliz taréi de vela
cuandu vuelva a esti pueblicu
de los montes de Cabreira

y me diga vusté allegre
ente pizarras y teitos
¡Qué fulgacián sos mocicu
cun venticincu años feitos!

De Tsaciana a Cabreira...

2008-07-21T16:46:00.008+02:00

Diba bien de tiempu que nun escribía, quiciás purque nun había que cuntare. Esti fin de selmana tocóu viaxar un poucu, el sábadu fici un piqueñu percorríu pur Tsuna, Babia y Tsaciana, visitandu llugares tan fermosos cumu Tsumaxu y esfrutandu de sol, branas, tsavadeiros, cabanas, augua, vida y vaqueiros. Las amigas que m'acompañonun nun vían más que montañas y vacas mentantu you nun yera a contenere la emoción pul gran valor y sinificáu del conxuntu etnográficu que tenía delantre los mieus gueyos. Cousas de la vida...

Ayeri, pesia que taba bien cansu de tantu coche, Xuan convencéume pa viaxar un poucu más, n'esta oucasión pur Cabreira. Corporales ye ún d'esos llugares a los que cuandu chegas el tiempu para, y pa bien ou pa mal lu que dexesti atrás yá nun tien importancia. A la que caleyas ente pizarra, fala, llume y madeira, la tiesta queda en blancu, los pensamientos vuelan y sientes cumu dalgu dientru de ti eicha raices na tierra que pisas, cumu suplicandu que nun te separes d'eilla. N'esi mismu pueblu fou n'onde emplegéi esta llingua na qu'escribu cun una vecina que cun pena cuntaba cumu yá cuasi nun quedan habitantes, nin ganáu, nin ganas de facere filandones. Mentantu eilla falaba nun tuvi claru si las ganas que m'entronun de chorare yeran pulas cousas que dicía, ou pula llingua na que las dicía, esa misma llingua que tanta xente diz que nun esiste ou qu'inventamos.

Darréu d'esi momentu que yá nunca nun s'esborriará de la mia tiesta marchemos pa Trueitiellas, n'onde arrodiaos de la más fermosa arquiteutura llïonesa garremos las fuercias abondas pa sigir ata Senabria. Ensin dubia dala n'esi trayeutu contempléi'l paisax más fermosu que nunca nun viera, amirandu tola Cabreira dende arriba, cumu si tuviera na cima'l mundu. Que suerte tenere dalgu tan fermosu tan cerquina de casa... Y tras curvas y más curvas fou yá sentáu xunta l'augua, nel llagu, ente las montañas senabresas, n'onde sonréi pensandu lu arguyosu que tou y taréi de sere llïonés, dalgu pulu que nunca nun pidiréi perdon.

Gracias Xuan, hai qu'entamare la prósima ;)

Naide sabe que te piensu

2008-05-30T00:35:00.002+02:00

Naide sabe que te piensu
qu'esfueyu cada alborada
maldiciendu tolas torgas
que nos fieren y separtan

que recuerdu aqueillos llabios
nos qu'antias diban surdiendu
palabras, beisos, amores
emburriaos pul tou aliendu

los llabios que yá nun beisan
los llabios que yá nun falan
que yá son sólu alcordancia
que nun mentían, qu'amaban

los mismos que yeran puertas
de la tua llingua de xana
que llambéu las mias feridas
esas qu'outra vuelta sangran

Naide sabe que te piensu
que diría ata l'avernu
pur escubrir cumu ayeri
los misterios del tou cuerpu

Dulce

2008-05-28T18:04:00.004+02:00

Chegóu a min d'esmenu, ente palabras escritas y endolcada en comprensión, llamentos del pasáu y una riestra de suaños pur cumplire. Imaxinéila nidia, sonce, y cuandu la cortesía diou pasu a la confianza pudi comprebare que nun taba equivocáu. Cuna seguranza guañada de las arrancadeiras del inespertu, creyamos dalgu tan fermosu, tan asperáu pur dambos que rellumaba clisandu tolos suaños de la xente que nos arrodiaba. Amor, esa piqueña historia, la que sabemos tú y you, yera tan perfeuta que fizu surdire de min la pïor de las sensaciones, el miéu del suañador qu'atarrez espertare de sópitu, deixandu atras tolas cousas que siempre naguóu y de las que nun tuvu tiempu pa despedise.

Mismu que'l futbolista al que yi pitan un tiru de penal inxustu nel cabeiru minutu de la final que llevaba años queriendu ganare, comprebéi cúmu pula mor de milenta historias ayenas a nós nas que you nun podía facere gota, perdía aqueillu que tantu quería cuna misma facilidá que dificultá costóu ganalu, y cumu nun podía sere d'outra miente, pronunciandu las cansinas frases que s'usan nel páutu tácitu del adióus.

Guei amor, pasu páxina quedándume cunos bonos momentos que vivimos y quedonun pur vivire, cul beisu que la inseguranza tantu fizu asperare, y pur supuestu cuna efímera satisfaición del qu'alcuentra lu que llevaba buscandu tola vida. Sólu queda pur pidire que'l destín seya'l noyu nel que s'axunten outra vuelta los nuesos caminos, agora separtaos ensin un claru purquéi.

Vai cun Dious dulce.

blogs, blogs, blogs...

2008-05-23T23:35:00.004+02:00

Somos tan piqueños... tan insinificantes... cumu granos d'arena en mitá'l desiertu. Las personas que facemos usu del arma chamada escritura al traviés de blogs, los que compartimos las nuesas ideyas cun tola comunidá internauta pecamos d'egocentrismu. Creyemos que los nuesos escritos pueden tener interés pa toda esa xente que naufraga más que navega, ensín chegar a la conclusión de que los nuesos sentimientos, las nuesas opiniones, las historias que vivimos, las cousas que nos asoceden, y en definitiva la nuesa vida, nun tien pa la sociedá mayor importancia de la que tien pa nós la vida de los demás individuos.

You sólu escribu pur ser ún más de los qu'emburrian esti pesáu carru que tien escritu llingua llïonesa na matrícula. Puedu ufiertare palabras, nada más. Y nun quieru engañame, nun quieru pensare que lu que vivu n'esti momentu, que los feichos que torgan la mia felicidá son del interés de naide aparte de min mismu. Nin you nin naide ye especial purque las cousas vaigan mal, asina qu'esta nueiche nun añediréi más tinta a los ríos y ríos que ya fonun escritos dende cuantayá faciendu de los blogs un pañuelu nel qu'enxugare llárimas, purque lu que tou viviendu you yá fou y sedrá vivíu pur mueitos más.

Héi sere fuerte, yá pasara.

Y darréu las palabras... el mieu escritoriu en Ubuntu, con apariencia MacOS. Prestosu asgaya :)

¡Ubuntu!

2008-05-22T10:37:00.003+02:00

Pues bien, tras tentalu deillas vueltas ensín ésitu, paez qu'al fin algaméi pasame a Linux, y ye que rïalmente Ubuntu Hardy Heron furrula.

Llevu yá unos cuantos días cun esta distribución y dende la istalación dica guei amosóume facilidá d'usu, estabilidá, y en definitiva qu'hai vida más allá de Microsoft. Pesia que sigu calteniendu una partición cun Windows (sobrutóu purque deixar atrás Photoshop, Illustrator y Dreamweaver p'avezame a Gimp, Sodipodi y Kompozer nun puede facelu d'un día pa outru) yá práuticamente sólu faigu usu de Linux pa las xeiras más comunes a nivel d'usuariu (ofimática, mensaxería, internet, películas, torrents, etc). Las tres carauterísticas que más m'abluconun d'Ubuntu fonun ensín dubia dala la facilidá d'istalación (sigiente, sigiente, sigiente, sigiente), la rapidez d'execución de procesos y tamién de furrulamientu d'Internet, las posibilidaes qu'ufierta l'interfaz gráficu (tolos escritorios que quieras, y un entornu d'animación y 3D que carrula a la perfeición na pataca que tengu pur PC), y el feichu de que tolas aplicaciones de Windows a las que tamos avezaos tienen su "ximielgu" en Linux. Estu aparte de qu'Ubuntu ye un bon S.O., de baldre, ensín virus y que pulu que pudi comprebare cunta cun ca días más usuarios aconceyaos en comunidaes internautas que se desviven eichándute un gabitu cuandu surden dubias y torgas.

En conclusión, que si vos presta la ideya d'adentravos nel mundu del software llibre, Ubuntu ye un bon xeitu de facelu, amás si nun tais seguros al 100% podéis baixar el live cd y arrancar el vuesu pc cun Ubuntu ensín istalalu, vamos lu típicu de prebar ensín compromisu. De xuru que nun vos arrepentiréis, agora sólu falta qu'unos cuantos nos pongamos a la xeira pa tornalu a la llingua llïonesa.

Saludos ;-)

P.D.: Guei escoyemos nuevu reutor (asperemos que'l nuevu nos quite tolas "Penas" que llevamos arrastras yá ochu años).

Hello World!

2008-03-13T19:59:00.005+01:00

Mueitu tiempu va dende la cabeira entrada qu'espublizara. Entamóu un añu nuevu y cun deillas novedaes. Un bon amigu díxume una vuelta, que los 25 ye la miyor edá que se puede tenere, que'l cuartu de sieglu ye'l momentu en que tolas cousas entaman dire bien, ou a lu menos miyor de lu que diban, y pur suerte... seique tenga razón.

A lu cabeiru nos mieus escritos siempres falaba d'esi fautor X que faltaba na ecuación de la mia vida, pueis bien, cuasi cuasi podría dicire que lu atopéi, y quixera creyere que yá nun sufriréi nunca más el desgaste d'andar a la geta'l mismu. Y pa quéi vamos engañanos, si yá nun escribu tantu sedrá purque yá nun tengu l'afogante necesidá de compartire cun quien seya las carencias que torgaban la mia felicidá.

Mueitas novedaes, nuevas aficiones. Durante estos meses, pur unas cousas ou pur outras y cul sofitu d'un par de llibros, adeprendí tamién habilidaes que fizun de min una presona mueitu más sociable. Perdí pesu y ganéi la capacidá d'algamare pa bien l'atención de cualisquier desconocí@ durante'l tiempu que you naguara. Y quéi puedu dicire... ye maxa, ye cuasi un superpoder. El métodu furrula.

Guei, cul llïonés nos colexos ca día más cerca de la normalización, y un ayuntamientu que torna facere llïonesismu peru del de verdá, sólu puedu dibuxar una sonrisa y alendar bien fondu naguandu purque las cousas sigan asina, bien.

Cumu prometiera outras milentamil vueltas... tentaréi d'escribire davezu.

Beisos.

Wanted!

2008-01-06T12:22:00.000+01:00

Prestosu ou non? xD Fai'l tóu en glassgiant.

Suañéi

2007-12-27T12:26:00.000+01:00

Suañéi que t'agarraba de la cintura paseyándute a l'antigua, qu'afalagaba esos llabios cunos qu'axeitas el dulce acentu de las túas palabras, suañéi que t'apresentaba a la mía familia, y a los mieus amigos, y a tola mía xente, y dispues corría gayoleiru pur milentamil caleyas glayandu'l tou nome....

Espertéi y sigí ilusionandume pesia que ca día tas más lluenxe...

La vida ye una selmana...

2007-11-27T18:00:00.000+01:00

Cumu vien siendu yá un vezu diariu, nesta gris tarde de seruenda caleyéi los estreichos requeixos que faen de ti un llugar inesqueicible pa tol que clisa los sous geyos cunas dulces formas que t'axeitan. Llentamente y atusandu'l vientu qu'arrinca vieyas historias de las ásperas piedras que te creyonun, baxéi los pisales d'esa escura caleya que m'empobinaban p'hacia la plaza.

Cuasi nun tenía afincáu'l primer pasu sobru la calzada romana cuandu milentamil alcordancias españonun na mía tiesta, faciendu guañare nesa vacía plaza miles de presonas ansiosas d'alendar outra vuelta l'arume a inciensu y cera, y asina fechizase cul pasu de cientos de solombras que selemente y tramu a tramu, alluman las túas cais cun una sonce lluz de tradición y raseos, al compás d'un tambor que ruempe'l cálidu silenciu de la primaveira. Y fou nesi intre cuandu una vuelta más cayí na conclusión de que la vida ye una selmana, y cúmu non de lu llarga que ye l'aspera, tan llarga cumu curtios son esos siete días.

Guei, la mar d'intres na que me fundu face de min un ánima ca vuelta más vieya, un ánima que sólu algama rexuvenecer al menos pur un tiempu cuandu arrodiada pulas presonas qu'ama, una muyer morena cul calabre del sou fiyu ente los brazos altraviesa'l pórticu d'El Mercáu. Y ente segundu y segundu qu'asperu a qu'esa imaxe deya alientu outra vuelta a los sentimientos más ocultos qu'abellugu, consuelu esti espíritu cansu y yermu d'impaciencia cun esas dúas palabras que son a reconfortalu:

Yá chegará...