BNG Pontedeume

Sobre o novo Plan estatal

2009-11-06T08:30:00.001-01:00

Coa única abstención do PSOE, o Pleno do noso Concello aprobou a seguinte moción:

MOCIÓN DO GRUPO MUNICIPAL DO BNG NO CONCELLO DE PONTEDEUME RELATIVA AOS CRITERIOS A TER EN CONTA PARA A DISTRIBUCIÓN DO NOVO FONDO ESTATAL DE INVESTIMENTO LOCAL PARA O ANO 2010

EXPOSICIÓN DE MOTIVOS
No debate sobre o situación do Estado, o presidente do Goberno anunciou que os Orzamentos Xerais do Estado para o próximo ano 2010 contemplarán un novo Fondo de Investimento Local dotado de 5.000 millóns de euros, dedicado a investimentos en proxectos de sustentabilidade ambiental, tecnolóxicos e de investimento para centros sociais, especialmente relacionados coa dependencia. O novo decreto sobre este Fondo estaría aprobado en outubro de maneira que os concellos poderán acollerse a este fondo a partir do 1 de xaneiro de 2010.
Preocúpanlle aos concellos galegos cales van ser os criterios a seguir á hora de repartir os recursos do novo Fondo Local, dado o precedente do actual, no que se utilizou a poboación total como única variábel para estabelecer a asignación orzamentaria a cada concello. Dende o BNG consideramos que o Goberno do Estado debe ter presente outros factores que inflúen na variábel de poboación, como son a dispersión xeográfica, a implantación actual das novas tecnoloxías, ou a poboación maior de 65 anos.
A distribución da poboación no territorio galego caracterízase precisamente pola súa elevada dispersión, con poboacións concentradas en pequenos núcleos poboacionais que complican e fan máis custosos os servizos públicos a ofrecer aos seus veciños e veciñas. Circunstancia que obriga aos concellos galegos a realizar investimentos superiores aos que se realizan en territorios onde a poboación se concentra en grandes núcleos de poboación. O feito de contarmos cun gran número de núcleos de poboación obriga a un maior número de investimentos, xa que logo, os recursos que se asignen a cada concello deberán asignarse tendo en conta tamén esta realidade.
O novo Fondo Local anunciado dedicarase a investimentos en proxectos de sustentabilidade ambiental e tecnolóxicos. Polo tanto, o grao de introdución das novas tecnoloxías deberá ser unha variábel a ter en conta na distribución dos fondos.
De igual modo, o avellentamento da poboación debe ser outro dos factores a ter en conta á hora de ponderar a variábel de poboación, en especial cando unha das finalidades do Fondo Local son os investimentos en centros sociais, sobre todo os relacionados coa dependencia. Galiza posúe unha alta porcentaxe de poboación avellentada que tamén aumenta os gastos en servizos públicos de asistencia ás persoas maiores. Por iso é polo que tamén se debe ponderar o seu peso na variábel de poboación.

Por todo isto, o Grupo municipal do BNG no Concello de Pontedeume proponlle ao Pleno da Corporación municipal a adopción do seguintes

ACORDOS

1. Instar á Xunta de Galiza a demandar do Goberno do Estado que, á hora de distribuír o novo Fondo Estatal de Investimento Local para o ano 2010, se introduzan como criterios de reparto nos concellos a dispersión e o avellentamento da poboación, así como a introdución actual das novas tecnoloxías.
2. Dar traslado deste acordo ao presidente da Xunta de Galiza, así como aos grupos parlamentarios do Parlamento de Galiza.

Pontedeume, 16 de outubro de 2009

Incumprimentos nas obras da Escola de música

2009-11-06T08:26:00.001-01:00

MOCIÓN DO GRUPO MUNICIPAL DO BLOQUE NACIONALISTA GALEGO

SOBRE AS OBRAS DE REMODELACIÓN DA “ESCOLA DE MÚSICA”.

Para o Grupo municipal do BNG resultou sorprendente a forma de actuar da empresa adxudicataria da remodelación dos locais da escola de música, unha das intervencións máis importantes do Plan E no noso Concello. De se confirmaren as sospeitas, o alcance dos incumprimentos resulta unha auténtica ousadía e esixe que apliquemos o máximo rigor e control sobre a corrección das irregularidades que ha de acometer a empresa.

Temos a certeza de que as denuncias presentadas no Pleno de setembro polo noso Grupo, acompañadas dos correspondentes documentos gráficos, xa están a surtir efecto. Porén, o equipo de goberno municipal está na obriga de tratar o asunto coa debida transparencia, fornecendo de xeito inmediato a información necesaria a todos os Grupos desta Corporación, ben sexa por medio dunha reunión de Portavoces ou dunha Comisión de Obras.

O noso Grupo non limitou a “investigación” a unha recompilación de fotografías sobre a cuberta, os solos ou a carpintería en xeral. Por medio da aportación de diferentes testemuñas, estamos en disposición de ofrecer unha serie de datos concretos que consideramos relevantes, mesmo de contrastalos cos demais Grupos e, por suposto, cos técnicos.

Polas razóns anteditas é polo que o Grupo municipal do BNG somete a debate a presente moción e pide a aprobación do seguinte

ACORDO

O Pleno da Corporación insta ao Equipo de Goberno municipal a convocar unha reunión da Xunta de Portavoces, co obxecto de informar e aportar as aclaracións necesarias para garantizar que as obras que se executan no local destinado a “Escola de música” se adecuen ao contemplado no Proxecto.

Pontedeume, 16 de outubro de 2009

Sobre a recollida de voluminosos

2009-10-07T09:14:00.002-01:00

Este é o texto e os acordos da moción do BNG aprobada no último Pleno da Corporación (24/9/09). Unicamente votaron en contra -como vén sendo habitual- os concelleiros do PP, fronte aos 9 da oposición.

"A Sociedade Galega de Medio Ambiente (SOGAMA) comunicou que a partir do 1 de setembro de 2009 procederase ao cesamento da recepción de residuos voluminosos procedentes dos concellos adheridos.
O cesamento na prestación do servizo de retirada de residuos voluminosos por parte de SOGAMA, para o seu posterior tratamento, prodúcese de xeito unilateral, sen ningún tipo de negociación previa cos concellos afectados, que a partir do 1 de setembro terán que facerse cargo, individualmente, da recollida e entrega deste tipo de residuos a un xestor autorizado.
Con este anuncio, a Sociedade Galega de Medio Ambiente (SOGAMA) podería estar a incumprir as condicións pactadas cos concellos no momento da súa adhesión, sen que nin a Xunta nin a propia SOGAMA ofrezan ningunha solución alternativa e viábel aos Concellos afectados, que, ademais de ter que artellar sistemas de recollida, verán como os custes do tratamento destes residuos se incrementan de xeito exponencial.
A falla dun sistema homoxéneo para a retirada destes residuos, xunto co incremento significativo dos custes, precisamente nun momento no que como consecuencia da crise económica e das deficiencias do sistema de financiamento local as facenda municipais están a pasar por situacións moi difíciles, podería derivar na proliferación de vertedoiros incontrolados ou, no mellor dos casos, cando o tratamento se faga conforme á legalidade e por un xestor autorizado, no traslado do incremento dos custes ao recibo do lixo que terán que soportar os/as veciños/as dos concellos afectados.
Por iso solicitamos do Pleno da Corporación Municipal a adopción do seguinte

ACORDO
Instar á Xunta de Galiza e á Sociedade Galega de Medio Ambiente (SOGAMA) ao mantemento da recepción de residuos voluminosos procedentes dos municipios adheridos, nas condicións que o viña facendo até agora, para o seu posterior tratamento por un xestor autorizado e conforme á normativa vixente.
No seu defecto, instar á Xunta de Galiza a que aporte unha solución alternativa e viábel, que non supoña un incremento do recibo do lixo dos concellos afectados."

Para avanzarmos na seguridade vial na CP4803

2009-06-19T06:30:00.002-01:00

MOCIÓN QUE PRESENTA O GRUPO MUNICIPAL DO BNG
SOBRE O PROXECTO DE SEGURIDADE VIAL NA CP 4803

O proxecto de seguridade vial na CP 4803 entre Pontedeume e Miño foi no seu día considerado de crucial importancia para o noso Concello. O seu obxectivo é paliar a inseguridade e perigosidade que existe en varias zonas desta estrada provincial mediante a construción de beirarrúas, ademais doutros servizos propios dunha moderna travesía (abastecemento de auga, saneamento, pluviais, luminarias, etc.).

Como tal foi incluído no Plan de Travesías da Deputación Provincial no anterior mandato. Logo de varios trámites, incluído o relativo aos controis arqueolóxicos de patrimonio, atópase na crucial fase de solicitude de expropiación para a ocupación de terreos afectados, que corresponde á Xunta de Galiza, pero que non se ten autorizado, inexplicablemente, segundo puidemos constatar na propia Deputación.

O Goberno municipal debe compartir esta xusta demanda das parroquias de Boebre e Centroña. Malia todo, fíxose ben pouco por tratar de axilizar este asunto. Hai practicamente dous anos, o Alcalde, nun dos alardes de quen o arranxa todo, declarou rotundamente que o asunto”estaba desbloqueado”, literalmente, logo de manter unha entrevista na Deputación. O certo é que o asunto nunca estivo tan parado e estancado como neste tempo.

Por estes motivos o Grupo municipal do BNG no Concello de Pontedeume somete a debate esta moción e solicita a aprobación dos seguintes

ACORDOS
1º) O Pleno da Corporación insta ao goberno municipal a dirixirse á Deputación provincial –Presidente, Vicepresidente e Presidente da Comisión de Vías e Obras- para interesarse por este asunto e para que, á maior brevidade posibel, reiteren a solicitude á Xunta para autorizar a urxente ocupación de terreos afectados polo Proxecto de seguridade vial na CP 4803.

2º) No mesmo sentido, o Goberno local cursará unha invitación ao Presidente e/ou Vicepresidente da Deputación para unha recepción institucional no noso Concello, co obxecto de reafirmar o compromiso desta nova Corporación con esta actuación tan necesaria.

Pontedeume, 18 de xuño de 2009

Preguntas e rogos do Pleno de maio

2009-06-10T09:43:00.000-01:00

PREGUNTAS QUE PRESENTA O GRUPO MUNICIPAL DO BNG NO CONCELLO DE PONTEDEUME PARA A SÚA CONTESTACIÓN EN PLENO-MAIO 2009.

PRIMEIRA
O noso Grupo presentou unha solicitude o pasado día 21 para que, por parte do Grupo de Goberno, se transmita a información necesaria sobre o donativo económico que teñen recibido as arcas municipais. Concretamente sobre a cantidade e a identidade do doante. Esta é unha información a que teñen dereito os Grupos municipais e, só se se actúa de mala fe, por ambas as partes ou por unha delas, se persistirá na ocultación. Váisenos facilitar esta información aos Grupos que forman a Corporación?

SEGUNDA
Do pouco que transcendeu aquí no momento das nosas interpelacións sobre este asunto, afirmouse que tal cantidade tiña un “destino social ou humanitario” e que se faría un Informe e unha baremación por parte da Coordinación de Servizos Sociais e se informaría aos Grupos da oposición. Distribuíronse axudas, polo que sabemos, de xeito pouco “discrecional” (mulleres, persoas necesitadas, Asilo (¡)…) e, que nós saibamos, non se fixo con ningún criterio nin baremación. Poden aclararse estes asuntos por parte da(s) persoa(s) responsable(s) e facilitarse a avaliación e os/as beneficiarios/as das axudas?

TERCEIRA
Non imos deixar de insistir na pregunta sobre o PXOM –e vai para dous anos!- , sobre a presentación e exposición do mesmo. Da última vez, o responsable político remitiunos aos técnicos municipais e pouco avanzamos. Agora pode remitirnos, se o considera oportuno, ao Equipo redactor...Vai sobrado o tempo para a corrección dos supostos erros que están a retrasar a tramitación! Que razóns existen para chegarmos a esta situación, que está acabando coa paciencia de todos?

CUARTA
Vanse facer as necesarias reparacións e o mantemento mínimo da rúa do Picho para que se poida transitar por ela? Antes de levar a cabo obras maiores,pénsase ir reparando os socavóns, as lousas rotas, a colocación de rejillas, etc., ou deixarase que siga en deterioro permanente

QUINTA
Que resultados deu a entrevista sobre temas de educación co “superdelegado” provincial e que compromisos concretos se adquiriron?

SEXTA
Estase a insistir desde o Concello no necesario desbroce da maleza das marxes que a Deputación debe levar a cabo nas estradas da súa titularidade, en especial da estrada da costa?

SÉTIMA
Teñen a Alcaldía e o responsábel da área de Servizos Sociais feito unha avaliación do traballo realizado desde o servizo de Asesoría Xurídica á Muller? Temos indicios para pensar que os resultados desmerecen o labor que se fixo na etapa anterior; chama máis a atención, se cabe, porque as condicións son máis ventaxosas para a persoa que ocupa actualmente a praza: máis salario e tempo completo, todo grazas á axuda económica da consellaría de Traballo. Os resultados, pese a todo, non locen; é máis, houbo queixas de usuarias (e non a 1ª) por ausencia/desatención do posto de traballo, sen que desde a responsabilidade política nin técnica se fixese nada por corrixir. Isto semella un trato de favor con certo persoal, trato que non se dispensa a outros traballadores/as. Insistiremos máis sobre o asunto, pero interpelamos ao goberno para corrixir este tipo de actuacións. Queremos saber se están dispostos a entregar unha memoria sobre a actividade realizada, beneficiarias atendidas e todas as incidencias dignas de mención.

OITAVA
Mostrouse interese por parte do Goberno local por coñecer se houbo algún avance no asunto da construción do Enlace da AP-9 en Vidreiro? Insistiuse neste tema e houbo algún tipo de xestión con resultados?

Pontedeume, 26 de maio de 2009

Asdo. Manuel Rei Romeu,
PORTAVOZ MUNICIPAL DO BNG

ROGOS PLENO DE MAIO 09:

PRIMEIRO

Igual que se retiraron coches abandonados que ocupaban prazas de aparcamento, grazas, entre outras cousas á nosa insistência, tamén pedimos agora que se procure xestionar a retirada dun camionete, aparentemente abandonado desde hai meses, que está enfrente mesmo ao Parque Sarmiento, ocupando um lugar moi necesario para aparcamento.

SEGUNDO

Levamos tempo sufrindo a serie de baches que se concentran un pouco antes da Casa do Mar. Queremos deixar claro que sobrou tempo para arranxalos e pedimos que non se demore mais a reparación.

TERCEIRO

Queremos facer en voz alta unha reflexión que xá fixeron algunhas persoas amantes do noso Centro histórico. Queremos, xunto a elas chamar a atención sobre a desfiguración, a falta de estética e graza do enlousado da rua dos Ferreiros. Quizais debido á eliminación das beirarrúas, que si puideron marcarse sobre o relevo, sem elevarse de nível; quizais tamén ao ton monocorde... Algo hai que non queda como é debido. As ruas deste casco teñen , de tradición, um trazado, un deseño, unhas dimensións e unha proporcionalidade... Todo isto viuse alterado irremediabelmente, perdendomos o tradicional. Pedimos que se repeten os proxectos e as características fundacionais do noso Centro H.

CUARTO

Pregamos que se faga o desbrozado de zonas moi transitadas pólos veciños como son as beirarrúas a Olmo ou as beirarrúas do Paseo Castelao.

QUINTO

No mesmo sentido pedimos que se teña especial consideración, á hora de desbrozar, cos tramos viários que son moi estreitos e que, debido á maleza deste intre, dificultan enormemente o transitar por eles. É o caso do camiño de Cermuzo, tramo do chamado Camiño Inglés, polo que xa case non dan pasado nin os peregrinos de um en un de tanta silveira que cae dos lados.

SEXTO

Se non existe inconveniente maior, pedimos que se repare e poña em funcionamento o alumeado artístico da ponte, que tanto singulariza a imaxe nocturna da nosa Vila.

Dimisión da concelleira de Servizos Sociais

2009-06-01T07:43:00.001-01:00

NOTA DE PRENSA DO GRUPO MUNICIPAL DO BNG DE PONTEDEUME

Ante a dimisión da concelleira de Servizos Sociais e Sanidade Ruth García, o Grupo municipal do BNG fai as seguintes valoracións:

Esta dimisión é a “crónica dunha morte anunciada”, desde o momento en que dita concelleira foi destiuída/dimitíu da área de Ensino que, nas mans do sr. Crespo nada mellorou. A falta de valorar o extenso escrito presentado pola concelleira, o BNG achaca a dimisión a enfrentamentos e divisións internas, así como á falta de apoio cara a Servizos Sociais. Este Goberno sempre perseguíu o estancamento e o retroceso desta área
Unha vez máis queda de manifesto que este é un goberno en crise crónica, desde a ruptura co COE e a súa saída do goberno, o problema das dedicacións exclusivas, as colocacións a dedo, as contratacións “de palabra” a empresas amigas, etc. Curiosamente das catro persoas que forman o goberno en minoría, era a única muller a que non tiña dedicación exclusiva.
Cremos que se trata dun goberno despreocupado pola igualdade e nalgúns trazos moi machista –mesmo a lista das municipais ía encabezada por tres homes. Un ejemplo recente é o que estivo pasando co Servizo de Asesoría Xurídica á Muller, denunciado por nós no último Pleno.
Con este novo episodio vemos, de novo, a un goberno metido en trifulcas intestinas, incapaz de solucionar os problemas da xente; unicamente se fan amagos: persoal, limpeza, recollida de lixo, PXOM, etc.
Por outro lado, chama a atención que non dimita quen paractica o máis descarado trato de favor a empresas amigas ou quen se serve de empresas “proveedoras de servizos” para colocar a familiares. É o caso do concelleiro de Servizos, coa connivencia do sr. Alcalde, que colocou a unha familiar no pavillón municipal, facendo que a empresa que o xestiona, despedise a unha traballadora, tendo ademais que indemnizala, logo dunha denuncia na Maxistratura de Traballo. As primeiras dimisións tiñan que ser a do sr. Alcalde e a deste concelleiro.
O BNG denuncia enerxicamente que se use o Concello para beneficio persoal (dedicacións exclusivas, colocacións, favores a empresas). Tampouco se pode seguir arrastrando unha situación de crise permanente e apelamos polo diálogo dos Grupos da oposición (cinco) e por ofrecer unha alternativa.

Pontedeume, 30 de maio de 2009

Unha nova moción obrigará ao PP a entregar o Informe sobre gastos irregulares en Servizos

2009-05-27T09:44:00.002-01:00

MOCIÓN DO GRUPO MUNICIPAL DO BNG RELATIVA AO CUMPRIMENTO DUN ACORDO PLENARIO SOBRE GASTOS NA ÁREA DE SERVIZOS.

EXPOSICIÓN DE MOTIVOS

A finais de 2008, concretamente no Pleno do mes de novembro, esta Corporación aprobou, por unanimidade, unha moción presentada polo Grupo municipal do BNG na que se instaba ao Goberno a, por un lado, corrixir o excesivo gasto na área de Servizos –que sempre beneficia á mesma empresa- e, por outro, a elaborar e entregar un Informe de Intervención sobre a facturación da mencionada empresa, con especial atención á desproporcionada relación de facturas sobre “retirada de maleza dos Xardíns de Lombardero” o verán pasado.

Pese a respaldar co seu voto estes acordos, o PP e concretamente o sr. Alcalde, negáronse a facer entrega ou a permitir a lectura de dito Informe, xa elaborado ao pouco de adoptarmos como Pleno tales acordos. O sr. Alcalde, nun alarde democrático sen precedentes negou sistematicamente o acceso do noso Grupo a esta información e burlouse dun acordo plenário adoptado por unanimidade. Chegou a aducir, en sentencias ben peregrinas, que o Informe era moi longo e non tivera tempo a lelo.

Mentras tanto, todos os veciños/as observan que pouco se corrixiu neste xeito de realizar o gasto na área de Servizos e que axiña se volveu ás andadas: beneficiar aos do partido e beneficiar ás “empresas amigas”. Obstaculizar a entrega do mencionado Informe ate as últimas consecuencias só pon de manifesto que o resultado do mesmo non é do agrado do Grupo de Goberno e que algo se quere ocultar. Non podemos chegar a outra conclusión.

Por todas estas razóns o Grupo municipal do BLOQUE NACIONALISTA GALEGO propón ao Pleno a adopción do seguinte

ACORDO

Dando cumprimento ao anterior acordo plenario e ao da presente moción, a Alcaldía fará entrega aos Grupo políticos que o desexen, nesta semana ou na seguinte ao Pleno, do Informe sobre gastos na área de Servizos do teor que se propuxo.

Pontedeume, 21 de maio de 2009

O PP non entrega o Informe sobre os gastos na área de Servizos

2009-03-11T15:19:00.002-01:00

O goberno municipal do PP négase a facilitar o Informe sobre os escandalosos gastos na área de Servizos, sempre encargados a dedo á mesma empresa. Nos dous últimos Plenos, a pregunta do BNG, o Alcalde reiterou "que o Informe estaba feito, pero que era tan extenso que non tivera tempo a lelo" (literalmente). Esta actitude vén demostrar que algo se quere ocultar e pon de manifesto o pouco respeto que se ten polos acordos adoptados polo Pleno da Corporación. Recordamos que o PP tamén votou a favor.

Reproducimos a seguir o texto da moción aprobada a fins de 2008:

MOCIÓN DO GRUPO MUNICIPAL DO BNG NO CONCELLO DE PONTEDEUME

SOBRE ACLARACIÓN DE GASTOS EN SERVIZOS.

Temos constatado mes a mes os excesivos e, ao noso ver, inxustificados gastos que se foron producindo na área de Servizos. Paralelamente, tamén fomos advertindo neste Pleno de que se debía tomar medidas de corrección e contención do gasto nesta área. Por outro lado, a facturación deste período de goberno delata unha máis que escasa concorrencia de empresas, monopolizando toda esta clase de servizos a empresa CONSTRUMAGA.

É precisamente esta empresa a que segue a beneficiarse da prestación do Servizo de Recollida de Enseres Domésticos, que carece de contrato desde hai un ano e non sae a concurso, malia supor un importe de 27.000 € e acumulando sucesivos reparos de Intervención.

O seguimento destas actividades –de dominio público- lévanos á comprobación de que se trata dunha empresa para todo, non só especializada na recollida de enseres ou na “xestión de restos vexetais”. Desde traballos de mecánica (cambiar cazo de tractor, por exemplo), subministro de materiais de construción, corta de árbores, traballos de construción (cementar cemiterio, reparar tellado de Pavillón, colocación de xogos infantís, reparación de escolas), retirada de entullo, colocación de pancartas, reparacións de viais, etc.

Foi precisamente a raiz da cantidade de facturas por retirada de enseres e entullo da zona da Aurela ao Punto Limpo, que o noso Grupo solicitou a emisión dun Informe de Intervención que aclarase esta situación. O Goberno municipal tivo a ben negarnos esta información e prohibir a confección e entrega deste Informe. O equipo de goberno persiste na súa actitude, por máis que as advertencias ao respecto figuren xa no Informe da Conta Xeral. Estase recorrendo de continúo á empresa privada –non é nova a ansia privatizadora-, realizando traballos que entran dentro das funcións do cadro de persoal municipal, deteriorando de paso a súa imaxe, creando duplicidades e provocando un desdobramento do gasto.

O sucedido durante o mes de xuño deste mesmo ano, con reflexo nas facturas que se recollen no Decreto da Alcaldía nº 643, lévanos a solicitar do Goberno unha aclaración ao respecto, mediante Informe que se entregue a todos os Grupos aquí presentes. Existen, polo menos, sete facturas da empresa citada co epígrafe “Retirada de maleza dos Xardíns de Lombardero”, coincidentes na cantidade de 464 € e referidas a tan curto espazo de tempo, o que leva a pensar que produce máis maleza Lombardero que todo o resto do Concello xunto. Sería preciso, ademais de dispor das datas de realización dos traballos, contemplar que tipo de medios mecánicos e de transporte se empregan, así como as horas de traballo.

Por todas estas razóns, o Grupo municipal do BNG, considera oportuno someter a debate esta moción e solicitar dos demais Grupos a adopción dos seguintes

ACORDOS

Primeiro.- O Pleno da Corporación insta ao Goberno municipal a corrixir o gasto na área de Servizos, planificando mellor os traballos do cadro de persoal e, no seu caso, favorecendo a concorrencia de todas as empresas interesadas, en aras dunha maior equidade.

Segundo.- O Pleno require do Goberno municipal e dos servizos de Intervención un Informe aclaratorio da facturación desta empresa afecta á área de Servizos, Informe que, na maior brevidade posíbel, se entregará aos Grupos da Corporación do Concello de Pontedeume.

Concentración en apoio do pobo Palestino

2009-01-08T10:49:00.006-01:00

Dende o BNG facemos un chamamento a participar na concentración que se vai celebrar o venres 9 de Xaneiro ás 20:00 horas na Praza do Concello de Pontedeume. Con esta concentración preténdese mostrar o noso apoio ao pobo Palestino nestes momentos nos que está a sufrir unha brutal agresión por parte do estado israelí. A continuación reproducimos o manifesto que será leido na concentración:

GALIZA CON PALESTINA

Temos claro que os bombardeos e a invasión de Gaza,que por parte do Estado de Israel, se están a levar sobre do pobo palestino, non son actos de guerra, senón que son actos de terrorismo, que o sionismo comenzou nos anos corenta para conquerir instaurar o seu Estado e que dende 1948 que conseguiron ser reconocidos como tal Estado, non pararon de aterrorizar ao pobo palestino, buscando a súa liquidación por todolos medios, sexan bélicos ou mais sibilinamente como pode ser o paro ou a desnutrición.

Condenamos esta barbarie, donde o Estado xudeo coa sua poderosa maquinaria militar, masacra a unha poboación indefensa, primeiro pechándoa dentro dun gueto, arrodeandoa con un muro, e agora atacando a súa poboación indiscriminadamente.

Como galegos, sentimos que a loita que se dirime en Terras Palestinas, é producto dun diseño imperialista, onde o sionismo ten como obxetivo rematar con un pobo, e o diálogo e a diplomacia son adiados e mesmo as resolucións da ONU Israel non as cumple.

Solidarizámonos co pobo palestino, e facemos nosas, as suas arelas de conquerir a súa autodeterminación, sin a tutelaxe sionista. Pero o mesmo que condenamos o imperialismo sionista, queremos chamar a atención e condenar a postura da Unión Europea e do Estado Español, que diante da morte de centos de persoas inocentes, ou o que é o mesmo, de todo un pobo, non trata de parar esta barbarie, senón que miran para outra parte.

E por iso que os aquí presentes pedimos.

1.- que se pare a matanza do pobo palestino no territorio de Gaza,

2.- e reclamamos que o Estado Español rompa as relacións con Israel, por non respetar o primeiro direito dun pobo que é o dereito a vivir-

PAREMOS A MATANZA DO POBO PALESTINO.

VIVA O POBO PALESTINO.

NON AO IMPERIALISMO SIONISTA.

Pontedeume 9 de Xaneiro do 2009

A desgraza de Pontedeume

2008-12-06T13:36:00.005-01:00

O PP de Galiza anda a criticar a miúdo que o Goberno da Xunta deixa de investir algunhas partidas consignadas nos Orzamentos. Os dirixentes do PP deberían saber que os seus correlixionarios de partido no Goberno municipal de Pontedeume están a axudar con afán desmedido neste labor que eles tanto critican. Desde que accederon ao poder, hai un ano e medio, decidiron pór o freo de man a todos os investimentos importantes que a Xunta de Galiza tiña comprometidos co anterior Goberno de Pontedeume.

Entre os máis avanzados, cómpre salientarmos a remodelación do Peirao (2.7 millóns de euros), ao que o PP se opuxo pedindo un recheo inviábel de 9.000 metros cadrados. Equipamentos sociais como o Centro de Día (renunciouse a dúas anualidades por importe de 800.000 €) e a Galescola (arredor de 600.000 €), para os que se segue a buscar terreos e, probabelmente terán que agardar á aprobación do PXOM. Mesmo a renuncia ás axudas para o Club de Piragüísmo: 150.000 € do 2007, 230.000 € do 2008 da Consellería de Cultura e Deportes e máis 90.000 € da Deputación provincial. Habería que engadir aínda a demora inxustificada do inicio da remodelación do Mercado Municipal, para o que volve a encargarse a redacción doutro Anteproxecto, que xa está feito.

Vendo tales feitos non sabemos xa se se trata de incompetencia ou de actuacións pérfidas e aleivosas.Sexa como for, o que non se pode permitir, cos tempos que corren, é ter paralizados máis de 5 millóns de euros en investimentos, o que supón máis da metade do importe do Orzamento municipal. Din desde o Goberno do PP que aspiran a superar os 10.000 habitantes censados. Malamente con esta política de non xestionar o que verdadeiramente interesa, poñendo trabas ás obras, equipamentos sociais e en suma aos servizos avanzados que van redundar na calidade de vida.

Preguntas presentadas polo BNG para a súa contestación no Pleno de novembro

2008-11-30T18:14:00.005-01:00

PRIMEIRA
Tendo en conta que rematou a tempada de colocación de terrazas e que o Concello, a raiz dunha sentencia de hai case dous anos, ten indicacións que aconsellan redactar unha ordenanza que regule este asunto, ao noso Grupo interésalle saber se se pensa levar a cabo?
SEGUNDA
A respecto dos traballos de demolición na praia de Ver e, na liña dunha anterior pregunta formulada aquí mesmo polo BNG, fíxose algunha xestión desde o equipo de goberno para coñecer que tipo de ordenación se pensa levar na zona, aportar suxerencias ao respecto e manter informada á Corporación municipal?
TERCEIRA
Os Grupo políticos municipais tiveron a comezos de outubro do presente ano unha pequena presentación dos traballos do PXOM, a cargo dun técnico da Consultora Galega. Naquela reunión estableceuse un calendario aproximado no que figuraba como data de entrada por Rexistro no Concello a finais dese mesmo mes, creándose unhas espectativas ao respecto. Non sabemos se os traballos están rematados ou non.
Mais, toda vez que non se cumpriron os prazos fixados para a consulta do PXOM, previa á elevación a Pleno, interesa saber se se conta con algunha novidade e previsión ao respecto e se vai ser máis atinada que as anteriores?
CUARTA
O Convenio para a elaboración das Bases da Oferta Pública de Emprego está cada día máis claro que non foi modelo de transparencia informativa nin ningún modelo de aforro. A través dun rogo do mes de setembro pedimos información clara, concisa e concreta e non evasivas. Hoxe, malia non facilitársenos as condicións do mencionado convenio, podemos saber, por medio de datos que son de dominio público, que se achegou aos 17.000 € , que non foi feito nas áreas de Dereito Público, como debera ser, senón pola área de organización de empresas e comercialización da Facultade de Administración e dirección de empresas de Lugo. Tamén podemos comprobar que a persoa responsable do traballo non é ningún especialista en organización dunha administración pública. Dada a celeridade da entrega do traballo con relación a sinatura do convenio dubidamos da envergadura do traballo (sen parangón coa RPT, desde logo!) e do valor arriba citado. Tamén, postos a dubidar, dubidamos de que a nosa Administración non dispoña dos medios axeitados para desenvolver esta tarefa, tal e como rezan as cláusulas dos modelos de convenio coa USC. Insistimos en que o goberno faga as oportunas matizacións o antes posibel, dea a coñecer este traballo, a letra do Convenio, así como se se pagaron os importes das supostas facturas.
QUINTA
As actividades para a mocidade non se incrementan nin melloran, segundo todos os indicios. Interesa saber ao BNG se se vai facer un esforzo por pór en marcha o programa de lecer Planet Club, polo menos desde o mes de Nadal, cando os mozos/as teñen máis tempo libre.
SEXTA
Cal é a día de hoxe a situación da concesión á empresa GALILANDIA, que segue a prestar os servizos de limpeza, portería, etc. no Centro municipal de maiores e no Pavillón deportivo da Casqueira? Cando ten ou tiña que ter saído a concurso público?
SÉTIMA
Unha vez que o Goberno municipal pasou a crise e realizou o traspaso da responsabilidade de Ensino ao concelleiro de Servizos e Obras, transcorrido tamén un tempo razoábel, interesa saber se se convocou ou se vai convocar o Consello Escolar Municipal no primeiro trimestre.
Pontedeume, 25 de novembro de 2008

Rogos do Pleno de novembro

2008-11-30T18:07:00.006-01:00

1. Insistimos co noso rogo de que cando se organice algún acto institucional se curse a correspondente invitación desde o Concello a Grupos e entidades sociais. Con máis motivo cando se trata dunha visita ou dun acto no que participa un cargo da Xunta de Galiza ou doutra Administración. Sucedeu xa varias veces, pero volveuse a repetir o pasado 17 deste mes, no acto da Directora Xeral de Promoción da Calidade da Vivenda, Dna. Encarna Otero. Resultado dabondo pobre para un acto de grande interese: 15 ou 16 persoas (4 do BNG, 4 do PP, algúns que outros arquitectos, e pouco máis), nin cartel anunciando nin nota de prensa...

2. Coñecemos a saturación de traballo que hai en Secretaría e tratamos de colaborar na medida das nosas posibilidades. Pero cremos necesario pedir que os Decretos de Alcaldía se poidan consultar cinco días antes do Pleno, como mínimo, para non entorpecer o noso labor.

3. O Concello ten feito concesión á empresa Galilandia do Centro Municipal de Maiores e do Pavillón da Casqueira, no que respecta á limpeza, conserxería, etc. O Concello, mentras tanto, non se desentende destas instalacións nin de vixilar a calidade dos servizos que se presta nelas. Os principios que rexen para todos os cidadáns e para a administración local deben ser respectados tamén desde a empresa, que nunca debe servir para practicar o nepotismo, para empregar a familiares e membros do partido. Iso nunca! Había satisfacción co traballo da persoa (muller e con familia) que estaba no Pavillón. Foi despedida arbitrariamente, con escusas de mal pagador; logo sabemos que é para “enchufar” a unha sobriña do concelleiro de Servizos, que xa cubrira o posto temporalmente nas vacacións. Os métodos de presión á empresa son deplorables, o desprezo que se ten polas familias é lamentable, a ética e os principios brillan pola súa ausencia. Esa é a forma de entender o poder; esa é a súa Lei!?

4. Pregamos que se limpen as beirarrúas da avda da Coruña.

5. No tellado dos Almacéns de Raxoi hai lixo por todas as partes e mesmo rodas (!).

6. Que se limpe a Fonte de xunto a parada de buses, onde hai auga estancada en estado de putrefacción, lixo dentro,...

7. Denunciamos a situación das fontes do Paseo Marítimo, que non botan auga e pedimos que se repoña.

8. Aínda que aprobamos xa hai un mes unha moción sobre a Estación de tren, nin se fixo unha mínima limpeza de de maleza e follas acumuladas, cousas que si pode acometer perfectamente o Concello. É un abandono absoluto!

9. Se se está a tempo, rogamos que se rectifiquen os proxectos para levar a electricidade ao Castelo e Breamo, facéndoos soterrados.

10. A falta de protocolo, ás veces raia o absurdo nos actos que organiza o Concello. Sen ir máis lonxe, o outro día nos actos do 25 de novembro, nos que intervén de derradeira unha Sra. de fóra do Concello – moi coñecida na casa do PP-, non o Alcalde (presente) e que, ademais “declara inaugurada a Exposición”, por certo e en plan monopolizador.

11. Rogamos que non fagan tanto o ridículo; Vdes. fixeron retroceder o uso do galego ás catacumbas, e ademais teñen un sustrato e un acento que os delata, tanto se pechan como se abren na pronuncia. Este é o respecto que teñen pola LNL e pola Ordenanza municipal; ao mellor é que hai leis de 1ª e leis de 2ª. Leis para pasarse polo forro.

12. Dada a situación de inseguridade que se xera, debido ás noticias de roubos en lugares próximos, pedimos que se constitúa ou que se poña a funcionar a Xunta Local de Seguridade.

13. Pregamos que no PEIM de Medio Rural, se teñan en conta as obras do POS que non puideron incluírse este ano e outras tamén necesarias como as dos camiños da Regueira en Andrade.

14. O Goberno inhibiuse completamente no problema das pintadas no Torreón. Non considerou preciso atallar o asunto a tempo. Agora podemos ver como aumentaron na fachada leste e como está completamente chea tamén a fachada norte de pintadas con sprai: corazóns, proclamas amorosas e doutros tipos.

15. No proxecto Modificado do Gas, pedimos que se axude na medida do posible aos veciños que se consideran afectados e precisan información para presentaren alegacións

Charla sobre o Sistema Galego de Benestar

2008-11-11T20:52:00.002-01:00

O BNG de Pontedeume organiza unha charla informativa sobre o Sistema Galego de Benestar. A charla contará coa participación de Tareixa Novo, Delegada Provincial da Vicepresidencia de Igualdade e Benestar, e será o vindeiro Martes, 18 novembro, ás 20 horas no Centro Municipal de Maiores de Pontedeume.

Dende o BNG vos convidamos a participar neste acto que estamos seguros será de gran interese.

Medidas de apoio ao transporte colectivo

2008-11-04T17:18:00.002-01:00

Este é o texto da moción debatida no Pleno do 30 de outubro e aprobada por unanimidade:

A situación que presenta a Estación de ferrocarril de Pontedeume, convertida nun sinxelo apeadoiro, é de abandono flagrante, debido ás propias decisións de RENFE –que acabou pechándoa- , ao uso abusivo e case exclusivo do transporte individual, obrigado a miúdo por unha mala planificación dos horarios de tren e ao escaso interese que ten mostrado o Concello por manter a zona integrada e mesmo adecentada. O tramo de rúa que discorre en paralelo ás instalacións da Estación, ao final da Avenida de Ferrol, e que dá acceso ao aparcadoiro desta, está cuberto de maleza e ramallada, que a cobre totalmente e a converte nun lugar marxinal, mesmo sinistro. As cunetas volvéronse lameiras e depósitos de lixo de todo tipo; a ambas as marxes hai anacos de entullo, bases de farolas, etc. Unido todo isto á desaparición das tres farolas que iluminaban este tramo de avenida e que se fan moi necesarias, alén das que existen na propia plataforma do apeadoiro.

Por outro lado, RENFE debe esforzarse por adaptar os horarios ás demandas dos potenciais usuarios, neste caso mozos/as estudantes e traballadores, que se desprazan a diario aos centros de ensino e traballo de Ferrol e a Coruña. Está demostrado que moitas persoas, que inicialmente se interesan por este tipo de transporte, acaban desistindo debido a pequenos desfases horarios, facilmente subsanables. É o caso de grupos de estudantes de Pontedeume, matriculados en Centros de ensino de Ferrol (Ciclos Formativos do Politécnico, do Sofía Casanova ou do Concepción Arenal; Bacharelato de Artes deste último, etc.), que teñen a entrada nestes Centros ás 8.30 horas e o tren A Coruña-Ferrol chega ás 8.35 h. Cun pequeno adianto de 10-15 minutos sería suficiente para poder seguir utilizando un tipo de transporte seguro, cómodo e asequible economicamente.

Desde o BNG cremos que é o momento de sumarnos ou esixir medidas e plans que subsanen estas carencias e melloren ou fagan atractivo o transporte público, sobre todo o ferroviario, agora que se está a falar tamén da creación dun servizo de cercanías e da creación dun ente xestor ferroviario galego, así como da mellora do trazado, que vai repercutir no tan necesario acurtamento do tempo dos traxectos. O transporte por estradas está cada vez máis conxestionado e Pontedeume sofre o problema a diario, co agravante de que comezamos unha travesía de crise económica e coa incertidume sempre do incremento dos combustíbeis, como pasou recentemente.

Son estas, entre outras, as razóns que moven ao Grupo municipal do BNG no Concello de Pontedeume a solicitar que se someta a debate esta moción e a pedir do Pleno da Corporación a adopción dos seguintes

ACORDOS

PRIMEIRO
O Pleno do Concello insta ao Goberno municipal a proceder á limpeza do tramo de rúa que dá acceso á Estación de ferrocarril, repoñendo a iluminación da mesma, se for preciso dotándoa cunha partida nos Orzamentos de 2009 e esixindo de RENFE un reforzo da mesma nas plataformas de embarque.

SEGUNDO
O Concello, co fin de paliar a saturación de tráfico que sufrimos, apoiará ou, de ser posíbel, promoverá campañas de utilización do transporte por camiño de ferro, tratando de coñecer as demandas horarias dos usuarios para seguidamente trasladalas a RENFE, á Consellería competente na materia (COTOPT) e á Comisión Comarcal do Transporte Metropolitano.

Chega a Pontedeume a Exposición Transformando Galiza!

2008-10-30T15:02:00.018-01:00

Esta exposición itinerante por todo o país ten como obxectivo dar a coñecer ó público os principais proxectos e iniciativas levadas a cabo polo BNG dende o goberno da Xunta de Galiza.
Terémola o sábado 1 de novembro en Pontedeume na Praza Rosalía de Castro, en horario de 10:00 a 14:00 horas e de 16:00 a 20:00 horas.

Valoración da reunión sobre o PXOM

2008-10-13T17:04:00.005-01:00

1. O Grupo municipal do BNG no Concello de Pontedeume, agradece ao Equipo Redactor do PXOM e mais ao equipo de goberno municipal a presentación que se lle fixo o xoves 2 de outubro aos Grupos da oposición. O BNG leva pedindo de xeito constante, ao longo dos últimos meses, que se dese información sobre o PXOM e que se axilice a súa tramitación ao máximo. Pese a todo, o goberno do PP e o responsabel da área de Urbanismo incumpriron por tres veces a previsión de datas para facer esta presentación, a primeira das cales ía ser para o mes de xuño.

2. O Grupo Municipal do BNG pedíu nesta reunión e pedirá (formalmente en sesión plenaria) que se facilite a información máis ampla posible a todos os veciños/as interesados a todos os niveis. Pedimos que, en canto entre por Rexistro, a fins deste mes de outubro, poidamos estudalo con detemento todos os Grupos da oposición, antes de levalo a Aprobación inicial.

3. Dada a importancia deste Documento, pedimos tamén que -unha vez que se eleve a Aprobación do Pleno, o máis axiña posible- no trámite de Exposición pública, segundo se comunicou previsibelmente entre decembro e xaneiro (2 meses), se lle dea ampla difusión, levándoo a todas as parroquias do Concello e a todos os ámbitos, onde haxa veciños interesados, tal e como se fixo no Avance do mesmo.

Recollemos a continuación a previsión de prazos que coidamos son de interese:
- A finais de outubro entrada no Concello por Rexistro.
- A seguir, todos os Grupo políticos terán quince días para analizalo.
- Logo elevarase a Pleno para a Aprobación Inicial por este órgano.
- De aprobarse, entrará na fase de EXPOSICIÓN PÚBLICA: sesenta días nos que se poderán presentar alegacións.

Preguntas do Pleno de setembro

2008-10-13T17:02:00.001-01:00

PRIMEIRA.
Ten decidido xa o goberno municipal encargar o proxecto de rehabilitación do Mercado Municipal á consultora MERCASA ou, de momento, aínda se está sopesando a decisión? Cales son os prós e os contras dun acordo como este?

SEGUNDA.
Dada a información aportada no seu día polo Goberno municipal a respecto das obras das rotondas, no sentido de que se realizaría unha delas ao longo do verán, e dada a situación do Parque sarmiento, cada día máis impresentable, o BNG interésase por saber se existe algunha novidade a respecto destas actuacións.

TERCEIRA.
Varias declaracións públicas do sr. Alcalde inciden na idea de que SE non se saca adiante o Centro de Día, a Galescola ou o Clube de Piragüísmo é porque os Grupos da oposición só poñen impedimentos e non queren traballar conxuntamente. Podería precisar máis en que consisten estes impedimentos?

CUARTA.
Observamos, ao igual que todos os veciños, que os pivotes hidráulicos, non moi agraciados por certo, do Centro Histórico funcionaron durante un tempo e, desde hai meses, deixaron de facelo. Cal é a razón de manter así esta situación?

QUINTA.
A respecto do Club de Piragüísmo e Vela, existíu algunha xestión máis, á parte das que coñecemos, para poder levalo a cabo ou seguimos resignados a continuar perdendo as axudas que aínda temos?

SEXTA.
Dado que as obras do CEIP Couceiro Freijomil entran na súa fase final, parécenos conveniente seguir interesándonos pola ampliación da rúa Galera, na medida do posible e como un claro beneficio para o Peirao en xeral e os propios beneficiarios do Colexio. Hai visos de conseguir algo ao respecto?

SÉTIMA
Á vista da evolución dos feitos da OEP –política de feitos consumados e de mando y ordeno-, sen brindar a posibilidade de negociación aos traballadores dos criterios xerais da mesma, sen participación nin información, cando menos, das liñas básicas da elaboración de Bases da OEP..., PREGUNTAMOS: CANDO e QUE pensan negociar cos sindicatos e traballadores?

Rogos e queixas do Pleno de setembro

2008-10-13T16:59:00.004-01:00

1. Á vista da situación que presenta desde hai máis dun ano o inmoble nº 15 da Rúa de Porto, cunha casa afundida, restos de entullo de todo tipo e madeiras, con posibles riscos para as colindantes.., non se pode realizar algún tipo de aviso ou requerimento ao propietario?

2.Queremos felicitar ao Goberno municipal porque, por fin (!), tras dous ou tres incumprimentos de datas, e tras moito insistir, por fin se vai presentar aos Grupos municipais o PXOM. Lamentarmos que se perdesen tres meses de verán para avanzarmos nalgúns aspectos nos que si poderemos traballar conjuntamente.

3. Pedimos que se se fan obras e se subministra mobiliario novo para dependencias municipais que se teñan en conta as cadeiras onde senta o respectable que ten a ben asistir aos Plenos, incrementando o nº de ser posible, pois están completamente apolilladas. Non fai falte máis que mirar o chan debaixo delas.

4. Solicitamos que se inclúa algunha partida no próximos Orzamentos para soterrar cableado e retirar postes no entorno de monumentos e espazos de lecer, nomeadamente dous: o Xardín de Lombardero ao lado do Torreón e a Alameda de Raxoi, para os que xa existían Propostas de estimación de custos no Concello. Lamentamos –de ser así- que un Concello cun Centro Histórico como este, non se teña acollido ás axudas da Deputación para soterrar cables e retirar postes no entorno de monumentos históricos .

5. Aplaudimos que se faga un esforzo por recoller follas no Paseo Marítimo, pero pedimos que non se desatendan cuestións importantes como son:
- Rego do céspede.
- Conservación e corta da herba á altura da piscina.
- Abandono de ponlas de árbores derrancadas.
- Illas de lousas afundidas e rotas.
- Acumulación de lixo.
- Bancos e papeleiras rotas.
- Afección do teixo e lixo na base do mesmo.
- Lixo por todas partes.

6. Lamentamos que non se puxera ansia pola organización dunha charla de Medio Rural, concretamente sobre o BANTEGAL, a comezos de setembro: aínda que se pedíu colaboración do Concello, os carteis foron distribuídos unicamente por afiliados do BNG, ese día na Casa da Cultura non apareceu ninguén a abrir nin houbo presenza municipal. Seguro que, tratándose de recibir subvencións, estárán vdes. Máis ávidos.

7. Suibvención que recibiron de Medio Rural para realizar varios saneamentos, o camiño dos Loureiros a os Castros, o camiño da Campanilla a Ogrobe…, obras que adjudica e executa a propia Consellería. Na medida do posible, estando nós de acordo con estas obras, pedimos que no caso do camiño da Campanilla a Ogrobe se anchea, pois non dispón nin dos mínimops regulamentarios.

8. Pedimos unha mínima preocupación por rematar as obras para o bombeo de auga ao depósito do Castelo, con repercusións positivas en toda a zona alta de Pontedeume, incluído o Polígono de Vidreiro.

9. Facemos o rogo de que desde a PL e a área de Tráfico se estude a posibilidade de pintar unha raia amarela fronte ao Centro de saúde co obxecto de evitar o estacionamento e que a saída do aparcamento do mesmo teña máior visibilidade e sexa menos perigosa.

10. Pedimos que se limpen as silvas e lixo que existe nas beiras do mirador de Centroña.

11. Chegándonos información –por vez 1ª en todo o noso cargo- por parte de veciños da Urbanización Salgado Torres relativa ao baixo do BLOQUE 2, PORTAL 18, cedido no seu día polo Concello a HIDROELÉCTRICA DO ZARZO para instalar uns transformadores, sen que nunca chegase a tomar posesión e executar tal instalación..., cedido posteriormente a un grupo de veciños para formar unha asociación..., actualmente “semiabandonado”..., pedimos do Goberno municipal que se interese pola recuperación do mesmo para o patrimonio municipal e, no seu caso e nas condicións debidas, para o beneficio dos veciños.

12. Ás nosas preguntas dos meses de xullo e agosto sobre o suposto Convenio para a elaboración das Bases da OPE o Goberno contestou con VAGUEDADES, quizais porque as nosas preguntas pecaban de xenéricas. Imos rogar, de novo, que se facilite información CLARA, CONCISA E CONCRETA a todas as preguntas relativas ás condicións do mencionado Convenio, a saber: se o custo ronda os 15.000 € como se di por aí, se existía partida habilitada e foi autorizado o gasto, se se pagou a factura ou facturas da elaboración do traballo, que facultade/escola universitaria, que Departamento e que profesor(es) foron responsables do traballo

Anxo Quintana candidato do BNG á Xunta de Galiza!

2008-10-07T09:51:00.009-01:00

Un proxecto transformador,
un presidente para a nosa Nación!

Resposta dende Fomento á pregunta do BNG relativa ás obras da N-651 en Pontedeume

2008-09-28T16:18:00.005-01:00

Nunha resposta "evasiva", pouco convincente e mesmo malhumorada o Goberno Central asegura que as obras de construcción de dúas rotondas e de senllos pasos inferiores na N-651 ó seu paso por Pontedeume non producen ningún impacto medioambiental nin paisaxístico.

En concreto, o Ministerio de Fomento asegura que as dúas rotondas e os pasos inferiores peonís "fican por baixo da rasante, perfectamente integrados co entorno e non se producen impactos ambientais negativos". (!)

Porén, esta rotundidade ó negar impactos negativos choca coa afirmación que realiza a continuación o Ministerio de que as obras "non require a realización dun Estudo de Impacto Ambiental" e sostén que "non resulta necesario o trámite de información pública ao tratarse dunha obra de seguridade viaria".

Dende o BNG de Pontedeume consideramos ésta unha resposta cativa e que non é de recibo, cando a sociedade no seu conxunto e os partidos políticos teñen manifestado o seu rexeitamento á rotonda grande polo grave impacto que provocará. Cabe lembrar que Fomento tramitou todo o proxecto de maneira incorrecta, xa que sí afecta ao Camiño Inglés e o concello de Pontedeume nunca foi informado polo Ministerio sobre esta obra nos termos que ten que ser informada unha administración local, só recibiu un borrador.

Pregunta do deputado do BNG Francisco Jorquera á ministra de Fomento relativas á construcción de dúas glorietas e pasos subterráneos en Pontedeume

2008-09-28T15:25:00.009-01:00

A continuación recollemos a pregunta formulada a día 21 de abril do 2008 polo deputado do BNG e remitida á Mesa do Congreso:

Os veciños de Pontedeume veñen reclamando dende fai anos unha solución ó problema das retencións de tráfico na N-651 ó seu paso pola vila. A iniciativa do BNG o Congreso dos Deputados xa se ten pronunciado en varias ocasións a favor de buscar unha solución que sexa o menos agresiva posible dende o punto de vista paisaxístico e medioambiental.

A pesar distos antecedentes, o Ministerio de Fomento adxudicou o pasado 19 de febreiro á empresa Obras, Caminos y Asfaltos a construcción de dúas glorietas e sendos pasos subterráneos na N-651 ó seu paso por Pontedeume. En concreto, os traballos efectuaranse no kilómetro 20,3 da N-651: a primeira glorieta situarase no final da ponte que une Pontedeume e Cabanas, o mesmo lugar onde se construirán os pasos subterráneos, e a segunda fronte á estación de servicio do centro da localidade.

O proxecto do Ministerio de Fomento ten sido criticado polos veciños por non ter en conta o patrimonio histórico de Pontedeume e pola grave afectación que provocaría nesta vila medieval.

En concreto, os veciños acusan ó Ministerio de Fomento de non someter o proxecto a información pública para que os particulares e entidades interesadas poideran presentar alegacións.

Ademáis, critican que non se teña encargado un estudo de impacto ambiental e outro estudo sobre restos arqueolóxicos á Dirección Xeral de Patrimonio da Xunta de Galiza, especialmente necesario para as obras dos pasos subterráneos.

Tamén resulta moi cuestionable a construcción de túneles ó final da ponte de pedra, o que provocará un notable impacto paisaxístico. Por non falar dos problemas que os pasos subterráneos provocarán na rede de suministros de auga, o cableado eléctrico, os contedores subterráneos da Praza de España ou os colectores de augas residuais.

En definitiva, a opción escollida por Fomento non é a mellor. Unha solución alternativa ó problema do tráfico rodado polo centro de Pontedeume pasaría pola construcción dun enlace coa autopista AP-9 na parroquia de Andrade, á altura do Vidrieiro, e establecer unha circunvalación libre de peaxe. Esta opción, que no seu día foi asumida polo entón Secretario Xeral de Infraestructuras, Emilio Pérez Touriño, permitiría dotar das conexións necesarias ó polígono industrial de Vidreiro, hoxe prácticamente ocupado.

Ademáis, serviría para aliviar o elevado volume de tráfico que vai xerar a macrourbanización de MARTINSA-FADESA (1500 vivendas) e en xeral toda a "sobrecarga urbanística" de Miño. Neste sentido, hai que destacar que os concellos de Pontedeume e Miño teñen realizado xestións conxuntas ó respecto e a inmobiliaria MARTINSA-FADESA asumeu costear a maior parte da inversión na construcción do enlace de Vidreiro.

Outra solución alternativa sería a liberalización da peaxe no tramo de autopista que une Fene e Campolongo.

É por todo o que antecede que se presentan as seguintes preguntas:

¿Coñece o Goberno o grave impacto paisaxístico e medioambiental que van provocar as obras que o Ministerio de Fomento está acometendo na N-651 á altura de Pontedeume?

¿Ten sometido o proxecto a información pública durante ó menos un mes? En caso contrario ¿por que motivo?

¿Por que non encargou o Ministerio un estudo de impacto ambiental?

¿Non cre necesario o Goberno realizar un estudo que descarte a existencia de restos arqueolóxicos, necesario nunha vila medieval como Pontedeume?

¿Ten encargado o Goberno dito estudo a Patrimonio?

Dados os importantes problemas que poden provocar as obras dos túneis na infraestructura urbana da vila ¿Ten informado o Ministerio ó Concello de Pontedeume?

¿Está disposto o Goberno a iniciar un diálogo cos veciños e o concello para buscar unha alternativa con menor impacto paisaxístico e medioambiental?

¿Non cre o Goberno que a mellor alternativa pasa pola construcción do enlace de Vidrieiro?

¿Non cre o Goberno necesario aplicar unha liberación da peaxe no tramo da autopista que une Fene e Campolongo, o que evitaría o problema do tráfico rodado da N-651 que atravesa o centro da vila?

Francisco X. Jorquera, 21 de abril de 2008

Deputado por A Coruña (BNG)

Rogos e preguntas do Pleno de xullo

2008-08-15T18:01:00.001-01:00

1. Rogamos que –se non se iniciou a súa limpeza a día de hoxe- se proceda a limpar canto antes a maleza que invade as beirarrúas da avenida Castelao en Vilar e a dos macizos de Olmo. Do mesmo xeito –e é a segunda vez que o advertimos- que non volva a repetirse este “abandono deliberado”, que só arranxan a golpe de crítica pública.

2. Fíxose un rebacheo “un tanto chapuceiro” do camiño que baixa á par de Vidreiro, pero que non vai durar moito. Queremos reiterar que, en canto haxa, posibilidade se considere prioritario e faga o arranxo xeral, pois viven persoas maiores e circúlase con dificultade (menos beirarrúas das rúas Betanzos e Fene).

3. Da mesma maneira é moi necesario o rebacheo inmediato ou a reparación a fondo da pista que dá acceso á praia, Igrexa e cemiterio de Centroña, que está desfeita á altura destes últimos.

4. A conservación da práctica totalidade das marquesinas, case todas elas novas, deixa bastante que desexar: invádenas as silvas, rodéaas o lixo, algunhas perderon a cuberta (A Regueira en Andrade)... É preciso requerir unha mellor conservación periódica.

5. Chégannos noticias dunha viaxe a Zaragoza que está a organizar o Concello (non nos parece mal). Pero pedimos rigor e austeridade –máis dados os tempos que corren- en canto ao emprego do diñeiro público, sendo previsible que algúns cargos públicos, sexan da cor que sexan, teñan a tentación de aproveitar a ocasión.

6. Despois do fracaso, constatado desde diferentes puntos de vista (nenos/as, pais e nais), da privatización dos dous campamentos de verán, que tiveron unha acollida media por debaixo do cincuenta % con relación á de edicións anteriores, rogamos que se reconsidere esta opción e se opte non pola comodidade, senón por esforzarse en chegar ao maior número de nenos e nenas. O Concello conta neste sentido con experiencias moi enriquecidas e con recursos suficientes. Só é cuestión de vontade.

7. No reparto de alimentos de finais de xuño, ás portas de Servizos Sociais houbo xente agardando parte da mañá inutilmente, pois estaba ausente, segundo se constatou, o responsable do reparto e non se achegou ninguén a dar ningun tipo de explicacións. É unha falta de consideración e respeto que non debe volver a repetirse!

8. Recibimos queixas da reparación de fugas de auga potable na urbanización Salgado Torres, á altura do portal 10, que, pese a todo, seguiron reproducíndose.

9. Á altura da mesma, no edificio en estrutura abandonado, hai puntais con risco de caída sobre coches e transeúntes da beiravía colindante. Pregamos que se faga un requerimento ao propietario ou que se retiren polo Concello.

10. Pedimos que se contemple a entrada doutra ambulancia no CH cando non pode estar a que presta servizo aquí, en caso dunha incidencia, e despois das 21 h.

11. Por máis que rogamos e solicitamos por activa e por pasiva un informe de intervención sobre a recollida de enseres e outros servizos que presta a empresa Construmaga, a Alcaldía empeñouse en negárnolo. Pedímolo nós e pedíuno o PSOE. Unha reacción asi ante algo tan sinxelo, DELÁTAOS; calquera minimamente inteliXente pode supoÑer que ALGO TEÑEN QUE ENCUBRIR. Para nós supón un aliciente e unha maior motivación no control que estamos a facer.

12. Producíuse o inicio dunhas obras (non sabemos ben a que Plan responden) á altura das Angustias, pechando a rúa dos Ferreiros e provocando problemas para a carga e descarga. Pedimos que, en casos así, se avise aos establecementos con antelación.

13. As situacións de desorde no tráfico reprodúcense empeorando na praza do Conde, no inicio da avda. de Ferrol, en Ricardo Sánchez, nas avdas. de Saavedra Meneses, Torreón e Lombardero...; os coches aparcan en sitios cada vez máis insopeitados. Hai unha política de laissez faire, e de deixar pasar. Pedimos algo máis de orde.

14. A pesar de provocar un furado máis no deficit do servizo de recollida de lixo coa contratación dun servizo paralelo no verán, a mala recollida persiste tanto nas parroquias como na Vila. Parece que están empeñados en agrandar a desfeita sen dar atopado unha solución satisfactoria.

PREGUNTAS :
PRIMEIRA. Hai constancia por parte do noso Grupo, segundo comprobamos nun Decreto, dun contrato coa USC para a elaboración de Bases da Oferta de Emprego Público. Ao respecto, interesámonos polas seguintes cuestións: Houbo avances de cara á constitución da Mesa Xeral de Negociación? Cales son as condicións xerais do mencionado Convenio? Vaise informar ao respecto aos representantes dos traballadores e darlle participación no proceso?

SEGUNDA. Todos os que agardan pola presentación do PXOM, comproban estupefactos como se incumpre a previsión anunciada neste Pleno por parte do responsábel de Urbanismo, de facela efectiva a comezos deste verán. Por terceira ou cuarta vez, o BNG interésase polas circunstancias que están a dilatar a súa presentacións aos Grupos. Ao mesmo tempo, solicitamos que se faga unha nova proposta de datas, aínda que sexa a título orientativo.

TERCEIRA. Fixéronse peticións por parte do noso Grupo de reunión da Xunta de Voceiros para tratar sobre a contaminación no río Eume e coñecer unha mínima información necesaria: causas, consecuencias e plans de actuación para a recuperación do mesmo. Cales son as razóns de que o goberno municipal faga caso omiso? A consellería de medio ambiente anunciou a creación dunha comisión de seguimento con Política Territorial e o Concello das Pontes. Non consideran necesario estar representados?

CUARTA. Varios desaxustes no alumeado público, algúns deles ben recentes, leváronnos a pensar na duración do contrato de mantemento eléctrico. Cal é a situación ao respecto na actualidade e cales son as previsións?

QUINTA. A campaña sobre o Botellón limpo ou cívico, presentada con moito aparato mediático e moito marketing, non pasa moito diso e da colocación dunha pancarta uns días na Casa da Cultura. Nin unha presentación ás entidades, nin unha presentación aos Grupos... Cal está a ser a incidencia da mesma? Cales son as medidas espectaculares previstas?

SEXTA. Puidemos ler na prensa algo que se parecía a unha xustificación de todas as ocupacións e servizos varios que presta unha “empresa easpecializada”. Se existir, cal é o contido e as condicións dun contrato con esa empresa para a recollida de restos vexetais, tamén anunciado a bombo e platillo nos medios?

SÉTIMA. Ten coñecemento o Goberno ou o reponsable da área pertinente da existencia dun auténtico almacén de lixo detrás do armario dos semáforos ao inicio da rúa dos Ferreiros? Este armario sufriu recentemente avarías e algún incendio, poñendo en perigo o inmoble colindante. Ninguén se decatou do perigo latente e ordenou limpalo?

OITAVA. Temos visto hai meses ás solicitudes ao Programa de Emprego da Consellería de Traballo que formulou o equipo de goberno; hai algún resultado comunicado oficialmente?

NOVENA. A teor dun acordo adoptado neste Pleno sobre as instalacións de Piragüísmo, interésanos saber se houbo contacto algún co arquitecto redactor do Proxecto.

DÉCIMA. O cambio de ubicación da Ambulancia que habitualmente presta os seus servizos no noso Concello, supuxo unha aparente precariedade en canto á visualización e sinalización da mesma. Por que se retrasa tanto a execución da regulamentaria sinalización?

Preguntas do Pleno de maio

2008-06-08T16:25:00.002-01:00

PRIMEIRA.- Do inicio, hai unhas semanas, das obras de construción das rotondas, tivo coñecemento o goberno municipal, a través da Demarcación de Estradas ou da propia empresa adxudicataria? Houbo solicitude de ocupación de vía pública? Chegouse a algún tipo de acordo na dirección de deixar para despois do verán as obras da rotonda principal, dados os problemas coas autorizacións, e acometer a rotonda do inicio da avda. Ricardo Sánchez?

SEGUNDA.- Entre as incidencias sobre o patrimonio municipal das rotondas figura a previsible retirada das esculturas zoomorfas. Fáganse ou non as rotondas, non cren os membros do goberno que este é un momento axeitado para pedir asesoramento dos técnicos de Patrimonio da Consellería de Cultura e Deporte que orienten a realización dunhas réplicas para o aire libre, que continúen a servir de reclamo á entrada da Vila e retirar, se é o caso, as orixinais para algún recinto apropiado e singular do Concello? Deuse algún paso ao respecto ou confíase o traslado á Demarcación de Estradas?

TERCEIRA:- Non acabamos de ver a luz ao final do túnel da tramitación pola que pasa o PXOM. Despois dun ano da chegada do Informe, os traballos de adecuación a el –xa encargados polo anterior Goberno- teñen que estar máis que concluídos. Son certas informacións que aseguran que o Goberno está retendo o Plan para presentalo cando considere oportuno? Cando se vai reunir aos Grupos para para presentárllelo? Cando se preve facer a Exposición pública?

CUARTA.- Temos constancia da existencia dunha resolución da Consellería de Traballo pola que se acorda dar de baixa o FOREMDES como centro asociado da mesma. E isto exactamente así? A que se debe e cal é a responsabilidade política? Cales son as consecuencias que acarrexa esta resolución para o Concello?

QUINTA.- A pavimentación das marxes de aparcamento na avenida Ricardo Sánchez estaba previsto realizala por parte da empresa que fixo as obras na AC-144.Ten coñecemento disto o goberno local? Ten pensado facer unha limpeza das mesmas e reclamar a reparación prevista?

SEXTA.- Dado que hai semanas empezaron as demolicións en Ver, estamos interesados en saber se o goberno iniciou os oportunos contactos para coñecer os plans do Ministerio de Medio Ambiente para a ordenación da zona e a súa recuperación medioambiental, concretamente no relativo á instalación de depuradora nos terreos adquiridos por dito Ministerio, mellora de accesos á praia, etc.

SÉTIMA.- Ten pensado o equipo de Goberno confeccionar unha ordenanza que regule a instalación de terrazas?

OITAVA.- O tráfego mes a mes de retirada de enseres ou de entullo da Aurela ao Punto Limpo, feito sempre pola mesma empresa que se ocupa da retirada mensual dos enseres domésticos está a xerar un custe adicional que dispara o do propio contrato feito por esta empresa. Pedimos que se nos aclare se non está incluído no propio contrato. En segundo lugar, que se elabore e se nos facilite un Informe-avaliación de todos estes movementos económicos desde Intervención. E finalmente que se adopten controis habituais sobre os verquidos na Aurela.

NOVENA.- Houbo algún tipo de utilización do camión grande de recollida de lixo por parte de persoas alleas ao persoal de Servizo de Limpeza municipal, concretamente a fin de semana do 10 de maio e outras? Que tipo de problemas está a ter periódicamente este camión, os máis recentes, esta mesma semana?

Pontedeume, 27 de maio de 2008

INSTALACIÓNS DEPORTIVAS DE PIRAGÜÍSMO E VELA

2008-06-04T20:03:00.004-01:00

Este é o texto da moción, aprobada no Pleno do mes de maio:

"Desde o BNG de Pontedeume non acabamos de ver claras as intencións do equipo de goberno municipal a respecto das instalacións de piragüísmo e vela. Non imos entrar aquí en disquisicións sobre como foi levado dito proceso até chegar á situación que se chegou. Pero, o certo é que a día de hoxe, de persistir esta actitude, corremos un grave risco de perder definitivamente a totalidade de importantes subvencións para tal fin, debido á indecisión e á lentitude exasperante do Goberno do Concello. De feito xa se perdeu a anualidade de 2007 de 150.000 €, outorgada pola Dirección Xeral para o Deporte e xa se pediu prórroga á Deputación do convenio suscrito co ente provincial.

Nós faremos todo o posíbel por adoptar unha visión de futuro e unha postura construtiva, contribuíndo coa nosa mediación a que se manteñan os apoios institucionais da Consellería de Cultura e Deporte e da Deputación – no seu momento logrados con moito esforzo, por certo-. Pero pedimos un cambio de actitude por parte do Goberno Municipal, cumprindo as directrices e as instrucións que, por activa e por pasiva, se deron desde a Dirección Xeral para o Deporte e desde a Delegación Provincial e que pasan basicamente por realizar un modificado do Proxecto e presentalo o antes posíbel. Do contrario, e xa temos sobradas evidencias, deduciremos que o equipo de goberno do PP non está de acordo co Proxecto nin coa ubicación da instalación, propiciando maniobras dilatorias e aprazando decisións que xa deberán estar tomadas.

Sobra dicir que as actividades náuticas, nomeadamente as de piragüísmo, está sumamente enraizadas entre os nosos deportes e as nosas xentes, sobre todo os máis novos, e contan cunha proxección do máis relevante, grazas ao labor senlleiro do Club “Firrete”. Non hai argumentos de peso para contradicir a ubicación proposta, considerada por todos a máis idónea nin para desaproveitar a concesión feita no seu momento por Portos de Galiza.

Teimar na idea de desviar estas subvencións para proxectos diferentes, aínda que relacionados con esta finalidade, é unha manifesta irresponsabilidade que conlevaría a perda de todos os apoios mencionados.

Por todas estas razóns, o BNG somete á consideración do Pleno o debate desta moción e a aprobación do seguinte

ACORDO

O Pleno da Corporación municipal insta ao Goberno municipal a retomar os contactos co(s) arquitecto(s) redactor(es) do Proxecto de instalacións de piragüísmo e vela para acometer un modificado do mesmo (“un proxecto máis sinxelo”) e presentalo, á maior brevidade posíbel, ante a Dirección Xeral para o Deporte, cumprindo os prazos estipulados para 2008.

Pontedeume, 27 de maio de 2008

.

Non ENCE nas Pontes

2008-05-26T14:12:00.002-01:00

A respecto do debate público que se está a dar sobre o traslado de Ence e as especulacións sobre unha hipotética ubicación no Concello das Pontes, O Consello local do BNG de Pontedeume manifesta que nos opoñemos e nos opoñeremos con todos os nosos medios e con todas as nosas forzas. Polo de agora, desde a Alcaldía das Pontes, desde a de Ferrol, desde a Consellería de Medio Ambiente..., déronse razóns a prol da ubicación nese Concello do complexo pasteiro. Agora imos dar nós as razóns que nos moven a rexeitar a consumación desta tentativa, que consideramos unha hipoteca medioambiental e unha "voadura controlada" para o Parque Natural das Fragas do Eume, o río Eume e a Ría de Ares-Betanzos.

Non pode ser de recibo que as nosas máximas autoridades en materia de medio ambiente estean a defender tan alegremente e a promover de xeito descarado un proxecto como este, obviando que o Parque Natural do Eume é un dos poucos restos de ecosistemas representativos da biodiversidade atlántica europea. Que debemos camiñar -e nós así o esixiremos!- cara á recuperación dun río como o Eume que era un monumento natural e que ten grandes posibilidades polos valores ecolóxicos que atesoura; por certo, do que tamén bebemos a auga día a día. Que debemos, asemade, recuperar unha ría moi degradada, entre outras cousas, precisamente polos verquidos dos restos da mina, e que pode volver a ser fonte de riqueza no futuro como xa foi no pasado.

Aínda que só fosen especulacións, o debate está aberto e as posturas están claras. Agardamos que a decisión que tome o Goberno galego e as forzas políticas que o sustentan sexa tomada con criterio e sensatez. Se así non for, nós non imos quedar parados!