shekon

2009-02-10T16:23:00.002-05:00

Kenòn:we’s takewennaté:ni okarahshón:’a nè:ne wátstha kaya’tarahstányon akaká:raton. Wa’ketshén:ri ne kí:ken karonwarà:ke, nè:ne tsi tkaya’tárha nityawé:non. Heroes yena’tónhkwa. Wa’tewáteratste ok wa’katerò:roke táhnon akwáh tsi wa’kenòn:we’ne. Tókat nonwén:ton sénha aonkenaktó:take, á:kehre kakarakwé:kon takewennaté:ni.

2009-01-16T15:11:00.004-05:00

Teyotonhwentsyóhon akwahró:ri ne teyó:ya’ks ne:ne wa’akyaterò:roke shisewente’kénha nè:ne “Slumdog Millionaire” yena’tónhkwa. Shayà:ta raksá:’a raorihwà:ke nè:ne Jamal ronwá:yats. Mumbai, India thanákenere táhnon akwáh í:ken tsi ró:tenht, né:’e aorì:wa slumdog ronwana’tónhkwa.

Wahaterahswí:yohste táhnon wahakwé:ni tahatkén:ni tsi wate’nikonhroryà:tha tsi tkaya’tárha nè:ne “Who Wants To Be A Millionaire?” yena’tónhkwa.

2009-01-15T16:15:00.005-05:00

Noyá:! Noyá:!

Karì:wehs tsi náhe wakhyá:ton ne kèn:tho táhnon é:so niyawén:'on nè:ne enwá:ton akathró:ri nek tsi nón:wa á:kehre ok takwatenonhwerá:ton í:se nè:ne sewarónhka ne Kanyen’kéha. Ayá:wenhse tsi akwé:kon skén:nen sewanonhtónnyon táhnon aetsyohseriyóhake ne 2009.

2008-06-19T12:23:00.001-04:00

click to enlarge

2008-06-02T23:56:00.002-04:00

click to enlarge

2008-06-02T23:47:00.000-04:00

click to enlarge

2008-05-30T11:51:00.001-04:00

click to enlarge

2008-05-28T10:49:00.000-04:00

click to enlarge

2008-05-24T22:07:00.003-04:00

click to enlarge

2007-04-08T21:27:00.000-04:00

Yà:yak niwáhsen wa’tkohserí:yake tóhkara niwén:take tsi náhe. Wahón:nehre tóhsa aonsonke’nikónrhen ne akwenhnísera ne akhwá:tsire é’tho káti wahatihnyó:ten ne kahswèn:karote ata’èn:rakon, ohén:ton tsi tyonkeninónhsote.
Wa’eyà:tarahste ne kahswèn:karote ne Yehnekiyohstha.

(Enkeranèn:takte ne kayà:tare ne kèn:tho ne ó:nen tenkhna’néta -- shé:kon í:wat ne yontya’tarahstáhkwa.)

Wa’ehsté:rihste ne tyotyerénhton nikahá:wi ne ó:nen wà:kken ne kahswèn:karote. (Yah ní:’i tewakhsteríhston.)

Akwé:kon ó:ya wahotiyéhson ne ó:nen wahatí:ken ne kahswèn:karote -- teyakwanonhsané:ken, teyakwatátenonhkwe táhnon rontóryes nè:ne wahontóhetste tsi tyonkeninónhsote.

Tókat yah tehonateryèn:tarahkwe to na’tewakohseriyà:kon, akwé:kon ronateryèn:tare nón:wa.

2007-02-25T22:39:00.000-05:00

Yonkwaterohrokhónhne ne teyó:yaks nè:ne Dreamgirls yena’tónhkwa ó:ya shiyò:karahs ne Yehnekiyohstha táhnon khe’kén:’a Dennise. Akwáh í:ken tsi wa’akwanòn:we’ne. Akwáh í:ken tsi ratiweyénhen tsi ronterennótha ne Beyonce, Eddie Murphy (tohske) táhnon nè:ne né:’e aonhá:’a tekhenòn:we’s -- Jennifer Hudson. (Ó:nen ok wa’tyontèn:tsha ne Oscar.)

Tókat serennanòn:we’s nè:ne "rhythym and blues" (akwáh nè:ne ní:’i), é:so enhsenòn:we’ne ne Dreamgirls táhnon tókat áhsehre ahsaterò:roke, wa’konhretsyá:ron yoyákshne ahsaterohrókha. É:so nikarenni:yos í:kare ne teyó:yaks táhnon sénha yoyánere wahsonhtowanén:ke ayonterò:roke táhnon ayontahónhsatate tsi ní:yoht ne niwá:’a kaya’tárha tsi tisanónhsote.

2007-01-10T16:47:00.000-05:00

Niyà:tare ne yonkyén:’a ne kí:ken. Len nok Kitty ronwatí:yats. Wa’kheyà:tarahste shiyò:karahs ne ó:nen wahotiyén:ta’ne ne kahyatonhserí:yo. Ratitsyénhayens Ohsweken nón:we wahshakotí:yon ne kahyatonhserí:yo. Wa’tehshakotihrénhsaron ne yonkyén:’a ne ratitsyénhayens né:’e aorì:wa yà:yak niwáhsen niyohserá:ke nikarì:wehs rotinyà:kon.

Akwáh tsi wahotiryen’tí:yohste ne yonkyén:’a. Í:’i ó:ni. Wakatera’swí:yo ne káti shé:kon nónnhe, shé:kon tehyatatenorónhkwa táhnon shé:kon rotinyà:kon. Akwáh í:ken tsi wakatera’swí:yo.

2007-01-01T17:41:00.000-05:00

Wisk niwén:take nithó:yen ne riyateré:’a Tekatstaroken nè:ne rayà:tare.

Ó:ya shithetén:re wa’tyakenihthá:ren ne Zoe, nè:ne ro’nihsténha. Wa’onkhró:ri tsi kayé:ri yawén:re nikakentsherá:ke nihoya’tákste nón:wa. Yonehrákwat!
Tyóhtkon ratonhkárya’ks táhnon tyóhtkon tehatskà:hons. Thóha tyóhton nikakentsherá:ke nihoya’tákstehkwe shahanákerate. Yah teyehnén:yehs táhnon yah teyekowá:nen ne ro’nihsténha nek tsi akwáh í:ken tsi rakowá:nen ne ro’níha.

Ónhte í:kehre enhronkwe’towanénhake ne raksá:’a.

2006-11-23T19:27:00.001-05:00

Í:kehre akwayentérha’ne ne riyateré:’a nè:ne tà:rawe Tsi yenaktóhares yotohétston. Kheyén:’a Zoe wa’akowirayén:ta’ne tsi tyakenheyontayentáhkwa Vancouver nón:we. Akwáh tsi rakowá:nen ne raksá:’a – thóha tyóhton nikaken’thserá:ke nihoya’tákste. Rotera’swí:yo tsi yah tha’tetsyakyatyé:ren ní:’i. Julian Forrest wahonwanà:tonhkwe. Enyórhen’ne é’tho yenyákene ne Yehnekiyóhstha ne káti enwá:ton ahshakyatkenhsè:ra. Tenhinonhwerá:ton ne ó:nen enhí:ken e’thò:ne enhihsén:non ne raohsenna’ón:we – Tehastaró:ken.

2006-11-08T19:41:00.000-05:00

Karì:wehs - thóha tewenhnì:take - tsi náhe kenh wakhyá:ton. Né:'e aorì:wa akwáh í:ken tsi tewakeweyennhará:'on. Takatáhsawen akatenonhsón:ni. Kanonhsakétskwen nón:wa táhnon yoterhó:ron ne ahskwà:ke. Nón:wa, tká:konte akerhó:roke ahsonta’kéhson.
Táhnon ó:ni karì:wehs wakatéweyenhston tsi yakón:nis ne website. Táhnon nón:wa, wákhson ne website nè:ne Onkwawenna raotirihwà:ke (tsi nón:we kherihonnyén:nis). Satkenhsè:ra ne onkwawenna.info -- tsi nón:we enkhyá:ton oh niyohtonhátye ne yontaterihonnyennì:tha. Táhnon ó:ni satkenhsè:ra ne bb.onkwawenna.info – tsi nón:we enwá:ton "ayehthá:ren" ne onkwehonwenéha aorihwà:ke.

2006-09-14T22:22:00.000-04:00

"Yakotatén:ron" kena’tónhkwa ne wathroryahtáhkwa tsi tkaya’tárha nè:ne yonkyon’wéhskwani ayakyateró:roke ne Yehnekiyohstha. Cook Islands nón:we niyawen’onhátye. Tóhkara niwén:take tsi náhe, tewáhsen nihá:ti Wahstonhró:non é’tho nón:we wahatì:teron. Teyotonhwentsyóhon tahontkén:ni ne káti yeská:konte ón:kwe kawehnà:ke ayèn:seke. Nè:ne enyakotatenrónhake tenyontèn:tsha ne énhska million nikahwíhstake.

Tsi tyotáhsawe, kayé:ri nikenytóhkwake wahonnón:ni nè:ne thonnónhtons – wisk nihá:ti ratihnará:ken skéntyohkwa ón:ton, wisk nihá:ti ratihnahòn:tsi skéntyohkwa ón:ton, wisk nihá:ti teharikahratí:ronte skéntyohkwa ón:ton táhnon wisk nihá:ti "Latino" nihatiya’tò:ten skéntyohkwa ón:ton. Nè:ne thonnónhtons rón:nehre ne káti niya’teyonkwè:take ratiyà:tare – nek tsi yah ónhka onkwehón:we é’tho tehón:ne’s!

Yawehronhátye, shé:kon yakeninòn:we’s ne Yakotatén:ron. Yah thaón:ton í:’i akkwé:ni takatèn:tsha nek tsi orihwí:yo ki’ ná:’a, ónhte í:kehre ayekwé:ni tayontèn:tsha ne Yehnekiyohstha né:’e aorì:wa akwé:kon ayontatenòn:we’ne.

2006-09-06T21:11:00.000-04:00

Yonhwéntsyare ne kí:ken nè:ne wa’ketshén:ri karonwarà:ke Google Earth nón:we. Akwáh í:ken tsi kenòn:we’s ne Google Earth (earth.google.com). Enwá:ton wenhniserakwé:kon akatkà:rihte. Wa’ketshén:ri tsi nón:we tyakenì:teron ne Yehnekiyohstha. Enwá:ton ayontkáhtho tsi tyonkeninónhsote ne kèn:tho, atysà:kta nón:we. Enwá:ton ayontkáhtho entyè:ke nonká:ti tsi nón:we thatì:teron ne yonkyén:’a táhnon khe’kén:’a nok yontatyen’okón:’a. Tsi tkarahkwínekenhs nonká:ti enwá:ton ayontkáhtho tsi tyakonónhsote ne onkyarasé:’a nè:ne teyakwanonhsané:ken.

Sha’tewahsén:nen nón:we tsi tyonkeninónhsote nok yonkyen’néha, wa’kyà:tarahste tsi nón:we á:se enkatenonhsón:ni. Ó:nen tewakatáhsawe. Wa’akwahswen’kará:yen táhnon tóhkara niwahsónhtake wa’akyón:ni.

Yawentatokénhti nón:wa. Wa’onkwayó’ten thetén:re táhnon ohstón:ha wakya’tanón:waks (né:’e aorì:wa ohstón:ha tewakeksten’onhátye). Yawehronhátye, wenhniserí:yo nón:wa, e’thóhtsi aonkyo’ténhsera takahsónteron tsi katenonhsón:nis.

2006-09-06T01:27:00.000-04:00

Akwé:kon ronwayenté:ri ne Tony Soprano, nè:ne raya’takwe’ní:yo ne The Sopranos tsi tkaya’tárha. Tókat yah tetshyenté:ri ne raónha, enkwahró:ri ne kí:ken:

Soprano ronwatí:yats ne kahwá:tsire ne Tarienhá:ka nè:ne New Jersey ratinákere. Tony rotinyá:kon ne Carmella táhnon Anthony nok Meadow ronwatí:yats ne ronwatiyen’okón:’a.
Yah tehronkwe’tí:yo ne Tony – ranénhskwas táhnon shakóryos – nek tsi rohsté:rihst. Thiya’teká:konte tsi ok nahò:ten nihatyérha nè:ne yah teyoyánere nek tsi shé:kon ikhsteríhstha.

Raya’takwe’ní:yo ne kentyóhkwa ne ronnonkwe’táksens ne Tony táhnon ó:ya shithetén:re wahotitó:kenhse ne kentyohkwakwé:kon tsi rótewe ne shayà:ta nè:ne rayà:tare ne kentyóhkwa nè:ne Vito ronwá:yats. (Rótewe: shayà:ta nè:ne raon’wéhskwani ahotítahwe ne ó:ya rón:kwe.) Akwé:kon rotinehrákwen ahotitó:kenhse tsi rótewe ne Vito né:’e aorì:wa ronyá:kon táhnon roksà:tayen. Kentyohkwakwé:kon ronwatíhswenhs nè:ne ronátewe, akwé:kon rotina’khwén:’on táhnon akwé:kon rón:nehre ahonwáryo ne Vito, yah né:’e Tony.

Vito roteryèn:tare tsi akwé:kon ronwatíhswenhs nè:ne ronatewe, táhnon hotina’khwen’ónhake. Tsi na’teho’nikónrhare tsi ahonwáryo, wahatáhsete othoré:ke nonká:ti.

Tyóhtkon tehontatkwénnyons ne ronnonkwe’táksens ne ó:nen tehontátkens táhnon yo’shátste wa’khsté:rihste ne ó:nen shayà:ta ronkwe’táksen wahorihwanón:tonhse ne Tony, "Entshekwénnyon ken ne Vito ne ó:nen tenthoké:tote?"

2006-08-29T21:53:00.000-04:00

Sheyatkáhtho ne kheyateré:’a! Tókat ó:ni etsheyatkáhtho ne riyateré:’a! Kayà:tare ne owirá:’a nè:ne enyakoyén:ta’ne ne kheyén:’a Zoe. Wa’ontatyà:tarahste ne owirá:’a ó:ya shisewén:te táhnon wa’onkwaténnyehte. Enwá:ton ayakotó:kenhse tókat raksá:’a tókat ó:ni yeksá:’a enkénhake nek tsi yah nón:wa té:yenhre ahshakotihró:ri.

Yah tewakè:ron akatkáhtho ne kayà:tare ne ó:nen onkyén:ta’ne nek tsi onkenehrá:ko ne ó:nen wa’onkena’tón:hahse ne Yehnekiyohstha. Yohnerákwat! Yakoyéhson! Yakotáhskats! Enwá:ton ayonttókha akwé:kon yekonhsà:ke nok yesnonhsà:ke! Wè:ne tsi yakaon’wéhskwani yeyà:takon ayèn:seke ne ako’nihsténha. Éntyenwe ne Kentenhkó:wa ne owirá:’a -- kheyateré:’a!

2006-08-27T22:50:00.000-04:00

Thonatáhsawe tehontkén:nis ne Minto Cup ne Six Nations Arrows Express. Tahontyé:renhte ne akwé:kon kentyóhkwahshón:’a Ontario nón:we ne Arrows tsi niwakennheskénha. E’thò:ne ó:nen wahshakotikwé:ni áhsen nikentyóhkwake nè:ne Kitchener-Waterloo, Orangeville táhnon Peterborough nithoné:non. Nón:wa tehontkén:nis ne áhsen nikentyóhkwake -- Peterborough, Edmonton nok Burnaby tsi tehonttsihkwa:’ékstha Ohsweken nón:we.

Tahontáhsawen tsi tehontkén:nis tewahsón:take tsi náhe. Burnaby nok Arrows wa’thontkén:ni táhnon Burnaby wahshakotikwé:ni ne Arrows 10-9. Tenshonttsihkwa:’eke á:re enyórhen’ne enyò:karahwe. Peterborough, nè:ne ó:nen shakotikwényon tewén:take tsi náhe, tenhontkén:ni.

Wa’akyateró:roke ó:ys shiyò:karahs ne Yehnekiyohstha táhnon enyakyaterorókha niya’tekahá:wi ne ó:nen tenhontsihkwá:’eke ne Arrows. Enyethihretsyá:ron ne Arrows né:’e aorì:wa yákenehre é’tho enyakenè:seke ne ó:nen tenhontèn:tsha ne Minto Cup.

Sewahkwíhsron Arrows!

2006-08-20T13:18:00.000-04:00

Karì:wehs tsi náhe wakhyá:ton ne kèn:tho, né:’e aorì:wa é:so niwakya’tawén:’on táhnon akwáh í:ken tsi tewakeweyennhá:rahkwe. (Wè:ne tsi yah tewakeyénnhare nón:wa.)

Tyoterénhton enkathró:ri ohstón:ha tsi na’á:wen’ne tsi rotinyá:kon ne kheyén:’a Zoe nok Marty. "Kanonhséhsne" U.B.C. nón:we wahotínyake. Átste wahotínyake táhnon akwáh í:ken tsi wenhniseriyóhne. Sha’tewahsén:nen Cree nihaonhwentsyò:ten ne Marty, nè:ne ronohá:’a wahaterihwahténtya’te tsi nihotirihò:ten ne Creehá:ka.

Ne ó:nen wahshakohró:ri ne káti rotinyá:kon, táhnon nikarihwéhsha ká:ron tsi niyó:re wa’thnikwénnyon, wa’eyà:tarahste ne kí:ken ne akhtsikhè:ta:

Tékeni tewen’nyá:wer niyákyon e’tho yeyákwe’skwe – Teyonkenirihwayá:kon Yehnekiyohstha, yonkyén:’a, khekén’okón:’a Marilyn, Brenda nok Velma, táhnon tóhkara nihá:ti kheyonhwaten’okón:’a. Táhnon ó:ni, é:so nihá:ti ne Waglislahró:non yehón:ne’skwe. (E’tho wa’onnákerate ne Zoe táhnon é’tho nihoné:non ne ako’nihsténha akohwá:tsire.) Táhnon é:so nihá:ti ne Marty tehontátenonhkwe – ronwayén:’a, tehontate’kén:’a táhnon ronarase’okón:’a. Táhnon é:so nihá:ti ne ronatenrohshón:’a ne Zoe nok Marty.

Thó:ha ratikwé:kon ne Waglisahró:non ratitsyayé:nas tsi ronnehkwa. Niya’tekéntysake tahatíhawe táhnon wahatí:rihte ne káti tayakwatskà:ton tsi rotinyá:kon. Akwáh í:ken tsi yawekon’òn:ne.

Ne ó:nen akwé:kon wa’akwakhwén:ta’ne, táhnon ne ó:nen akwé:kon wahatíhsa tsi rotíhthare, tayakwatáhsawen tsi teyakwanonnyáhkwa. Yah tehonwatinhá:’on ne kentyóhkwa ne ronterennótha Marty nok Zoe. Niweyénhen tsi yaterennótha ne Zoe nok Marty (raya’takwe’niyóhne ne Marty nè:ne rotyohkwayén:tahkwe nè:ne Breach of Trust rana’tónhkwa). E’tho káti é:so nihá:ti ne ronatenronhsón:’a wahonterennó:ten shiwahsón:te. Táhnon ó:ni skarén:na nè:ne kanoronhkwà:tshera aorihwà:ke skáhne wahyaterennó:ten ne Marty nok Zoe – akwáh nè:ne Sawatis Ohwihsta nok ró:ne June Carter:

2006-08-03T21:25:00.000-04:00

Teyontyerónnyons nè:ne Sarah Carter yontátyats yeyà:tare. Karonwarà:ke wa'ketshén:ri, gofugyourself.typepad.com/ nón:we. (Skaweyentetáhkwen nonká:ti ne kèn:tho, wakhyá:ton ne kahsennahshón:’a nè:ne kahyatonhserahshón:’a nè:ne karonwarà:ke né:’e aonhá:’a tkenòn:we’s. Ehtà:ke nón:we aotihsén:na kahyá:ton.)

Tekeniyáhsen tekenón:kwe kenihyá:tons ne "Go Fug Yourself" táhnon í:kehre aesewató:kenhse tsi niyohsté:rihst nen’ né:’e. Niya’tewenhniserá:ke kenirákwas ne kayà:tare ne yeya’taséha nè:ne yakohsennowá:nen (nek tsi yah tekheyenté:ri ne Sarah Carter) táhnon yonon’wéhskwani akenì:ron tsi niwahétken ne akohkwénnya nè:ne yakotstonhátye. Ne kèn:tho, wa’kenihsté:rihste ne Sarah akotya’tánha táhnon akotyà:tawi. Akwáh í:ken tsi yohsté:rihst nè:ne Sarah akorihwà:ke táhnon akwé:kon ó:ya nè:ne yotihyá:ton. (Enwá:ton akate’nyén:ten takewennaté:ni ne Sarah akorihwà:ke, nek tsi sénha ayohsteríhstake ayontaterihónnyen ne o’seronni’kéha.)

E’thótsi ahsátkenhse ne aotihyatónhsera -- tóhske ki’ wáhi enhsenòn:we’ne.

2006-07-25T23:09:00.001-04:00

Kheksténha nok ronwa’kén:’a Don niyà:tare ne kí:ken. Skayà:ta otsi’era’kó:wa ráhawe ne Don nè:ne wa’akwayé:na kanyatarà:ke ákta tsi thanákere Washington State nón:we. Skáhne thnì:teron Don táhnon rohtsí:’a Rick. É’tho wa’akhinatarè:nahse shisewente’kénha.

Rotihón:wayen táhnon Don yahshonkwaya’ténhawe ayakwayé:na ne otsi’era’kó:wa. Onktó:kenhse ne káti yah tewatyè:sen. Wenhniserakwé:kon kanyatarà:ke yeyákwe’skwe. Thóha énhska tewen’nyáwe nikón:ti wa’akwayé:na táhnon ne ok ne wisk nikón:ti wa’akwaterá:ko. Teyotonhwentsyóhon awèn:ke yaonsayonkwá:ti á:re ne aorì:wa sótsi nikonnà:sas.

Yah tewatè:sen ayeyé:na ne otsi’era’ó:wa nek tsi tó:kenhske ón:we yawékon.

2006-07-19T20:21:00.000-04:00

Wa'akwakwátho tsi nón:we wa’ontatya’táta ne Pauline Johnson shiyákwe’skwe Vancouver nón:we ne kheksténha nok ako’nihsténha ó:ya shithetén:re. Yonén:yote é’tho nón:we nè:ne shakotihsennaráhston nakohsén:na táhnon shakotiya’taráhston yekónhshne onenyà:ke. Yon’wè:sen é’tho nón:we.

Ne ok ne nikarihwéhsha yeyákwe’skwe e’thò:ne Wahstonhronòn:ke tayákwehte, tsi tkaná:tayen nè:ne Marysville yena’tónhkwa. (Shé:kon kenh yákwe’s nón:wa.) Kén:’en nì:teron ne tehniyáhsen tehyatate’kén:’a ne Yehnekiyohstha, nè:ne Rick nok Donny ronwatí:yats. Kenh tayakhiya’ténhawe ó:ni ne Yehnekiyohstha ako’nihsténha táhnon akwé:kon ronatshennón:ni taonsahontátken á:re.

Yakhón:ni ne onenhstóhkwa nón:wa ne aktsikhè:ta, nè:ne akwáh í:ken tsi roné:kahs ne Rick nok Donny. Enyórhen’ne enyakwate’nyén:ten ayakwayé:ne ne otsi’era’kó:wa nè:ne awèn:ke kontinákere.

Yah nón:wa thaón:ton takahnanéta ne kaya’tarónnyon nè:ne wa’kyà:tarahste ne ó:nen wahotínyake ne Zoe nok Marty ó:ya shithtetén:re. Enkwahró:ri oh niyohtòn:ne táhnon enkwana’tón:hahse ne kaya’tarónnyon ne ó:nen yénskewe á:re.

2006-07-15T00:28:00.000-04:00

Vancouver yenyákene ne kheksténha enyórhen’ne. Enyakhiyaterò:roke ayakónyake ne kheyén:’a Zoe. Enhotínyake shayà:ta nè:ne Marty ronwá:yats nè:ne skáhne tehnì:teron áhsen niyohserá:ke nikarì:wehs. Saskatchewan nithawé:non táhnon sha’tewashén:nen Cree nihaonhwentsyò:ten. Ronkwe’tí:yo táhnon akwáh í:ken tsi rinòn:we’s. Ó:nen roti’nikonhrí:yo ne tehniyáhsen táhnon ónhte í:kehre enhonatshennonníhake.

Tsi Yenaktóhares okarahsnéha yenyákenewe é’tho nón:we. (Sonke’nikónrhen – Yehnekiyohstha ako’nihsténha ó:ni é’tho yén:yen.)

Ayá:wenhs ne káti enwá:ton ohstón:ha akatoríshen ne Yawentatokenhtì:ke né:’e aorì:wa akwáh tsi tewakhwihshenhé:yon. (Tewén:take nikarì:wehs wa’kherihónnyen Kawenniyo nón:we tsi niwenhníserehs, e’thò:ne teyotonhwentsyóhon aonkyó’tenhsera Onkwawenna nón:we.)

E’thò:ne Yawententá:’on niwenhniserò:ten, enhotínyake ne Zoe nok Marty. (Yah teyotón:hon ahyatenníha ne kanónhsa tsi na’tekyatentátere.) E’tho yénkhawe ne yontya’tarahstáhkwa táhnon énkyehste ne kaya’tarónnyon ne ó:nen shé:kon á:re enskhyá:ton ne kèn:tho.