«Diç que an Fuonte Aldé»

Pauliteiros

2008-06-04T22:31:00.003+01:00

La rapaziada de Fuonte Aldé fui a bater ls palos a la Almanha, stubiran alhá ua semana mas yá beniram.
A ber se hai algum que benga eiqui a cuntar cumo furam las cousas na terra de ls Mercedes, se la cerbeija era buona, quantos barrils traziran, quien arranjou namorada e tantas nubidades que deben tener que dezir.
Nós queriemos saber, mas naide mos diç nada!

SS. Trindade mais cedo

2008-05-25T12:59:00.003+01:00

L calendário Lhitúrgico ourienta-se por l'anho lhunar, tenendo como refrência la Páscoa. Assi, la Páscoa ye siempre no primeiro demingo seguinte a la primeira lhuna nuoba de l'eiquinócio de la Primabera, ou seia, a seguir al binte i un de Março, excepto se calhar na mesma data que la Judaica que passará para l demingo seguinte.
La última beç que la Trindade calhou tan cedo cumo este anho fui en 1913, hai exatamente 95 anhos i la próxima será an 2228 deiqui a 220 anhos.
Pra ls mais curjidosos, hai anhos an que calha inda mais cedo, 17 de Maio. La última beç que isto acunteciu fui an 1818 i la próxima será an 2285, deiqui a 277 anhos.

La Fiesta de la Trindade

2008-05-22T14:07:00.007+01:00

Diç que la fiesta de la Trindade este anho dou muito que falar num lhugar bezino. Diç que ls de Fuonte Aldé se adelantroran e faziram la fiesta mui cedo este anho.

Pus mui bien, agora para esses menos anformados que nun saben que la Trindade nun ten die cierto, mas que oubedece a ua regra que tamien nun conheço e ben registrada todos ls anhos nos calendários nas fiestas mobles. Mais práctico, se la Páscoa ye cedo, tamien será la Trindade que calha certico, uito demingos a seguir a este.

Mesmo assi i para que nun torne a haber confusones yá bou a deixar eiqui las datas para alguns anhos a seguir:

2009/06/07
2010/05/30
2011/06/10
2012/06/03
2013/05/26
2014/06/15
2015/05/31
2016/05/22
2017/06/11
2018/05/27
Haba outro que dé seguimento a esta sequência.
Oubi dezir, mas nun sei la orige de la anformaçon nin la fidelidade de la mesma, que só cada duzentos anhos ye que la Trindade calha a 18 de Maio.
Desafio a achar esta efeméride i a desmenti-la ou comproba-la.

PROBA DE BINOS

2008-05-22T12:42:00.003+01:00

La proba de binos que nas biesperas de l die de la Trindade tebimos acá fui um sucesso.
Hoube binte qualidades çferentes de bino, que la giente de Fuonte Aldé apresentou para la proba.
Ls probadores, giente antandida nesta matéria, eram cinco,uns enólogos, outros com muito conhecimento destas cousas, apuis de probar de todas las garrafas, deziram que de ua maneira giral todas las pingas estaban buonas e capazes de amborrachar se buirmos mais que la cuonta.
L Sr. Gilberto Pintado, um produtor de Freixo de Espada a la Cintura, que tamien fui probador, apresentou no final um filme a mostrar las artes de fazer bino e cumo se puode produzir e l tal bino biológico, l que hai que fazer para l certeficar e muito mais.
Só por curjidade, el até antramoços sembra na binha! Bede só: Antramoços andam siempre associados a la pinga, até las parreiras gustam dels!
La ACREFA promotora deste eibento oufereciu no fim ua merendica para toda la giente presente, bien regada cum la pinga que sobejou, todos la agaboran.
Las três melhores pingas de l lhugar son: la de Antonho Manuel, la de Zéfiro e la de tiu Flábio. Las outras cumo iá atrás dixe, tamien estan buiedeiras.

PROBAS DE BINOS

2008-04-09T19:07:00.002+01:00

Se quejirdes saber mais nubidades de la nuossa terrica, teneis que bejitar l sítio: www.acrefa.pt e encontrareis nubidades que bos ban a anteressar, mormiente a quien adora l dius Baco

La única Cumpratiba adonde inda ye proibido fumar

2008-03-19T20:49:00.007Z

Dius mos deia uas buonas i chenas de salude nuites!
Cumo todos sabeis, zde 1 de Janeiro que nun se pode fumar an tabernas i outros sítios que tal, onde un bebe uas buonas copadas e lhougo apetece fumar (àqueilhes que fuman, claro).
Mas la berdade ye que an todas las associatibas culturales de la region se puode fumar, cun jinelas abiertas, cerradas, cun postigos ó sien cinzeiros. L que nun fai falta ye las boladeiras essas que tiran l'aire para fuora. Un de ls eisemplos melhores, para que beiades, ye, nun siendo ua associativa cultural mas que dinamiza l cumbibio cun las ties, l'Atalaia Bar an Miranda. Cumo todos sabeis, aquilho d'atrás era ua casa de boer cerbeija i fazer fumeiro, i agora apuis de las nuobas leis, cuntinua a ser ua fábrica de fumeiro, mas agora certificada pola ASAE. Las bolineiras alhá stán cumo d'atrás, guardadas nas caixas, para que nun se stráguen (sabeis que son caras).
Isto nun ye bien ua nuoba de Fuonte Aldé, mas ten algo que ber, porque na ACREFA you bien beio alguns que quieren fumar, i cuitadicos, ban alhá pal friu, custa-les tanto chiçcar ls cigarros.. Apuis trémen tanto que ls cigarros quedan a meio fumar. La pruoba ye ir a la antrada i ber las priscas todas que por alhá speran la hora de morrer.
You sou a fabor que nun se puoda fumar alhi, ou que pul menos haba ua maneira de botar l fumo para fuora, que se nota bien que l'aire se respira bien melhor. Por isso, respeitando la outoridade que me fui apuntada cumo un de ls Admenistradores de l nuosso blog de Nuobidades, declaro que eiqui NESTE BLOG PUODE-SE FUMAR!!!

...Claro stá que stais todos sujeitos a las leis ampuostas ne l lhugar adonde l steiades a ler... Nun se puode tener tudo...

Nuobidades nuobidades....

2008-03-18T01:15:00.002Z

Diç que yá se passou un més anteiro zde la última beç que purqui se screbiu. L antigo anónimo buolbiu solo para dezir todo cuntento: "L blog morriu"
Pus esso nun ye berdade, i eiqui stá la pruoba. Nun ye grande cousa, mas stou a amparar la nuossa redaçon para que nun se sbarrolhe, a ber se ben ende outro(s) para que nun quede cansado.
Pus cumo bos alhembrais, l anho passado, pula misma altura passou-se l mismo, e dessa beç tube que cuntar que nun habie nada de nuobo na nuossa tierra pequenhica, pus se era berdade....

Nun bou agora a bolber a dezirbos que Tartamon cuntinua cun las mismas botas de l tiempo de ls bornais, porque isso yá todos l sabeis.
Bou-bos a dar dues nuobidades: La purmeira, que tenemos outro cunterrâneo, tamien screbidor deiqui, eimigrado pa la Spanha, a biber la buona bida que nuestros hermanos mos oufrecen a quien queira. Aparte deste rapaç, yá teniamos outro ne Republica Checa, i outro an Spanha. Stou solo a falar de ls de la mocidade casadeira agora.
La outra nuobidade ye que tenemos acá a bibir un cigano. Tengo muito respeito pula sue etnia cumo la de todas las etnias que hai ne l mundo, mas stando acá isto tan fraco de nuobidades, hai que scarbar por qualquiera cousa.... Anton diç que l cigano stá a bibir alhá para riba, nua casa de berdade. La rezon ye porque agora l coreto sirbe de curralada para poner ls rachones que Luis lhieba para la Cupratiba. L coreto era, cumo todos sabeis, la penson de un inchente de familias que benian purqui a fazer l que la sue bida ls mandaba, i agora passou a curral de lheinha. Yá nien hai giente que rouba rachones nien pitas, nada... Cumo stá la nuossa tierra de zambolbida!

Antruido an Fuonte Aldé

2008-02-06T22:55:00.000Z

Diç que an Fuonte Aldé tamien se fai l'Antruido, mas nun ye só diç que, proba-lo la grande fiesta que onte se fiç no café de la Associaçon.

Deixo-bos eiqui dous retratos que eilustran un cachico l que se bibiu na nuite de Antruido.

Antruidos para todos ls gustos; ua princesa, que le dórun outra nomeada mas ye carnabal!, un galharó, la mesma cousa, até parece que ye acente!, capuchicos burmeilhos, palhaços, bruxas, gaijas pimponaças com tetas de farrapo bien puostas, un cuznheiro i muito mais. Música apropiada pal eifeito cun famoso "Di Jei", parece-me que ye assi que se diç, muitas fitas e balones i tamien un raio de papelecos redondicos mais chatos que l catano i animaçon a la farta.

Todos ls Antruidos tebírun dreito a prémio que la ACREFA patrocinou i apuis de séria butaçon, doran-le l pormeiro prémio a Susana 2008, que sin dúbida fui la mais pimpona cumo podeis ber neste retrato.

Mas ast'anho l'Antruido, apesar de star bien animado, deixou ua marca negatiba, ua falta amperdonable!

Pu la pormeira beç an tantos e tantos anhos, quebrórun la tradiçon; nun fazírun ls casamentos. Que falta de respeito por aqueilhes que desde siempre ls benen fazendo i por las rapazas que ficórun toda la nuite a scuitar quien l'habie calhado este anho.

Speremos que isto nun se repita.

Chegou l Carnabal! I cumo manda la tradiçon, ls casamientos!

2008-02-01T23:18:00.001Z

Diç que ben ende l Carnabal, fiesta guapa i bouba adonde toda la giente se deberte, antes de benir la Quaresma (para ls nuossos ledores católicos, ls 40 dies de reflexon i penitência, para que saban l calendário lhitúrgico, mas para ls nuossos ledores futeboleiros, nun stamos a falar eiqui de FCP nien outras nobelas que tales).
Cumo tuodos ls nuossos cunterrâneos saben, este ye un die mui amportante an Fuonte Aldé (sien cuntar que ye l die que le dá la coraige a uns de se mostraren al mundo cumo gostában de ser, uns ties, outros palhaços, etc etc). Él ye amportante para la nuossa tierra porque, cumo bós sabeis, él hai un inchente de homes acá, la maioria solteiros, que ban zde ls dieç anhos anté als quarenta!
Ls bielhos yá habian pensado nisso hai uns séclos d'atrás, i fazirun la tradiçon de ls Casamientos de Carnabal. Homes solteiros casan-se nesse die cun ties solteiras, i passa-se la nuite toda a bozear-los pulas rues, para que mismo ne l suonho queden a saber cun quien se casórun. Él tamien cuontan las biúdas i biúdos. L que ls bielhos d'antigamente querian era que pur lo menos dous ou trés pares ampeçássen ende, i apuis se chegassen alantre i fazissen casamiento cumo Dius manda, mas nun anda fácel....
Chega-se anté al punto de casar tius cun todo menos rapazas, que ye cousa que pouco abunda an Fuonte Aldé. Stou-me a lhembrar de l outro d'alhá arriba que l casan siempre cun la armana de la canhota, por eisemplo. Cumo quiera, para ser çfrente, este anho queda cun la armanda de la dreita, bamos a ber. Hai outros que ls casan cun las pipas, amores eiternos de ua bida anteira de boémias.
Para quien nun ye d'acá, hai que dezir que ls casadores son ls de dezuito anhos, salen cun uas chouriças e garrafones para que les benga la eimaginaçon i nun téngan frio, i ala a bozear a las puortas de las casas!
Buona suorte para eilhes! I para nós tamien, que mos deixen bien casados.....

Matáncias

2008-01-20T19:11:00.000Z

L poema yá nun ye nuobo, pode até ser que yá haba quien l conheça, mas hai muitos mais que nun l conheçan.

Screbi-lo an 1995

MATÁNCIAS

Lhougo a la pormanhanica
inda las teilhas stan brancas
you deitado en mie camica
yá uobie uas chamancas.

-Será tiu Foustino?
pergunto-le you a la tie.
-El querie matá'l cuchino
mal se fazisse de die.

-Scuita!... stan a chamar!
-lhebanta-te que ye tie Custância!
hoije fai-mos madrugar
por bias de la matância.

Las facas stan aguçadas
la cuorda ten l nuolo dado
las palhas stan bien guardadas
l talho stá porparado.

Na curteilha stá l cuchino
sperando la triste suorte,
de ser preso pul çufino
e arrastrado pa la muorte.

Pegamos no probe bicho
cada un por onde l calha
i l sangre sal lhougo en spicho
al spetar-le la nabalha.

Ben tie Custancia a correr
trai un barrenhon nas manos,
l sangre stá-se a perder
i eilha quier fazer chabianos.

Ronca i scoucenha tamien
i pensa l probe animal
todo l'anho a tratar-me bien
i fáien-me agora este mal.

Para chamuscá'l cuchino
fai cada un l sou fachuqueiro
de ls cuolmos que tiu Foustino
tenie colgados no palheiro

Un tira las caçcanhetas
apuis de bien chamuscadas
i you meti-las nas jaquetas
qu'habie pu'lhi çpinduradas.

L cuchino staba cebado
tenie buono toucinico...
-Las bóbedas de Fuont'al Prado
quemiu-las todas él solico!...

- Ten buonas tripas tamien!
- i ls lhagartos que balientes!...
quando tiran para bien
quedan cuntentas las gientes.

I agora pra nuosso sustento
bamos assar las tanrrielhas
i até l gato stá cuntento
que se mos roça nas canielhas.

Las tanrrielhas stan salgadas
i la pinga nuoba apetece
apuis de buonas copadas
senti-mos como yá calece.

"Merenda quemida, cumpanhia çfeita."
la nuossa yá stá quemida.
i cada um aprobeita
para s'ir a la sue bida.

Ua fraga nadadeira

2008-01-16T20:05:00.000Z

Diç que la tierra de ls fenóminos ye l'Entroncamiento. You nin sei adonde queda isso, l mais abaixo que cheguei fue a Griegos, ua beç que fui alhá a falar cun tie Isaura Palhaua e nun fue mais adelantre porque dizen que Griegos ye l cabo de l mundo, de maneira que tube miedo que se andebisse mais caísse en algun perçpício e apuis quien bos cuntaba isso se naide iba a ber! e assi sendo, quedei-me pu'lhi.

Buono, nun ye de Griegos e menos de l'Entroncamento que you quiero falar mas si de la nuossa tierra.

L'outro die, iba you a Touçaplaio e quedei abismado, un fenómino acá!!! nesta nuossa terrica! Mirai solo l que bos bou a cuntar: na lhagona de la Lhameira, ua fraga a nadar! ua fraga!!! - si, essa que bedes ne l retrato, que nun quiero que me chameis mintiroso, - mas l mais curjidoso ye que sirbie de barco e lhebaba a cabalho dues ciguonhas pu'la lhagona arriba e la usaban cumo l'aptcie e pa'l que l'aptcie, - entandeis! - nun sei para adonde iban, se la fraga ye deilhas, se la tenen alugada, ou se ye por'i de algum ser doutro mundo? - agora bei-se tanta cousa na troubison, - porque de Fuonte Aldé nun ye, senão yá se sabie!

Birei a casa nistante a bescar la retratadeira e para mal de ls mius pecados las ciguonhas yá s'habien desambarcado e andabam pu'l meios de las yerbas a rezungar ua cu'la outra, mas lá fraga yá iba outra beç pu'la lhagona abaixo cumo la podeis ber.

L purmeiro cuncerto de Paulo i Marco Meirinhos

2008-01-16T15:33:00.000Z

Diç que fui l purmeiro cuncerto de ls dous. Marco cantou. Paulo nó.
Yá fui hai cerca duns 30 anhos datrás, an Bragancia. Mas este cuncerto nun le saliu nada bien a Paulo. Anquanto que Marco staba todo cuntento a cantar, Paulo nun cunseguie purque staba mui apertadico para mudar l'auga a las azeitunas...
Pur isso yá bedes, artistas de Fuonte Aldé, de ls alrededores e de afuora: antes de ir a fazer algo de muita responsablidade, ir siempre a la casa de banho.

Lhiçon nº 37: Cumo scunder ua segadeira

2008-01-05T15:09:00.000Z

Eiqui neste fetugrafie cunseguimos ber un monton de teilhas:

Mas, se mos chegamos mais acerca, podemos çcubrir ua segadeira scundida cun las teilhas!

Ye un eisemplo de l'arte de la camuflaige que se puode ancuntrar an Fuonte Aldé. Ambulbendo algo cun cousas de l sou alrededor, puode-se scunder l que un quejir.

Pul fin, la Cena de ls Bigotes!

2007-12-31T16:06:00.000Z

Diç que staba a tardar un cacho buono a poner eiqui ls retratos de ls bigotudos... Pus nien ye tarde nien ye cedo, ye hoije mismo que las pongo! Nun penseis que fui porque l testo que eiqui scribo tenia que ser mui eilaborado, ye solo porque la anternet de la nuossa tierra nun andaba bien. Andubirun-la a poupar tanto tanto, que ya nien serbia sequiera quaijque pal Strábian.
Anton, falando de la Cena de ls Bigotes, fui un sucesso! Cunseguimos ajuntar uns buonos 20 bigotes mirandeses! Diç que inda quedórun uns que nun podirun benir, porque staban loinge, cumo João i Miguel de ls Burros, i anté Peixoto de ls Dazkarieh staba para benir, you ye que l dixe que nun balia la pena fazer tantos quilometros, que benia de Coimbra.
Yá sabeis, ls prémios staban alhá para oumenagiar ls bigotes mais galanes, i, sien spanto para naide, fúrun eilegidos pur ounanimidade, ls belos bigotes de ZéLu, que apresentaba un bigote de l tipo handlebar, mui bien cuidado, yá que l dito yá nun cortaba ls pelos hai uns 3 meses! Apuis an segundo quedou Alex, cun un bigote horseshoe eilegante, cun las stençones laterales afinadas cumo a un home galante se quier. Pul fin, an terceiro lhugar fui Paulo, esse lhebaba tamien un bigote tipo horseshoe quaijque imperial, tal era la lhargura del pelos. Un bigote que anté fui mui agabado puls sous garotos! Hai que fazer refrência al bigote de André, garoto quaijque sien pélos inda, i por 2 meses que l botou adubo para creceren, inda assi mal se l bian, mas fui a la cena.
Apuis de la cena, que fui ne l Molino cun buona chicha i inda melhor bino, salimos até l'Intalaia, a passear ls bigotes. Alhá çcutimos culs locales a ber l que achaban de ls nuossos pélos, uns dezirun que se habian juntado a nós, mas nun lo souberan a tiempo, outros que pal anhos stán cun nós. Uas rapazas ancantórun-se culs bigotes, i outras nun gustórun (cumo quiera nun stan habituadas a uns bons pélos ne ls homes.. - cumo quiera culpa de cousas mafarricas cumo ls Morangos cun Çúcre).
Cumporbou-se, fui un sucesso, i pal anho hai más i cun mais giente! Solo Fuonte Aldé para fazer cousas que naide mais s'alhembra!
Habemos de alhebantar de nuobo la cultura de ls bigotes. Él habien alhá uns que sien les quedaban bien!

Diç que hai cinema

2007-12-26T00:38:00.001Z

N'l próximo die 30 yê eixebido "La matancia d'l cochino" na ACReFA, stá marcada para ampeçar a las 21:00 i tem la duraçon de 30 minutos. Toda la giente stá cumbidada. Aparecei e debertibos un cacho.

Diç que ya ai sitio pra la cena d´ls bigotes

2007-12-19T17:06:00.000Z

La cena d´ls bogotes bai a ser nel "Moinho" an Miranda del Douro. L custo sera de diez ouros com bino até que todos l chegan cun dedo, porque cun la sede nun se brinca!!! A ber se aperece muita gente cun bountade de besuntar sou bigote. Era bouno que las personas que ban a la cena, mos deixarem un dito a dezir, pra depuis anformar ls homes del restaurante quantos bamos a ser.

Diç que....

2007-12-18T15:26:00.000Z

Retrato stórico dels anhos 50 an Fuonte Aldé!

2007-12-07T11:02:00.000Z

Chamai ls bezinos al computador i bede quei bos pongo eiqui!!!
Un díes staba cun míe madrina (Tíe Dárida del Soto) i teníe alhá uns retratos d'atrás. You tengo por hábito scanear retratos antigos (meter retratos no cumputador) "para mais tarde recordar".
L retrato que eiqui bos apresento, terá sido feito pula década de 50 a la puorta de la eigreija, bei-se del lhado dreito l Padre Mourinho inda nuobo. I se el stá nuobo neste retrato, eimaginai ls outros...
Buscai caras coicidas i dai-le ls nomes a ber quen stá i quen ia nun stá.
PS: Se bos puodo dar un cunseilho, tentai "digitalizar" ls retratos antigos que tengades i un díe destes fazermos ua sposiçon an Fuonte Alde.

L Rezosa 2007!!!

2007-12-06T15:59:00.000Z

Diç que stá a chegar un de ls grandes eibentos de Fuonte Aldé! L Rezosa, cumo sabeis, ue un marco na cultura mirandesa, fui neste festibal que se fizo l purmeiro Ancontro de Gueiteiros, yá alhá bai l anho de 1997, para dar un eisemplo.
Pus este anho bai-se a fazer la Matança de l Cuchino, para todo l pobo ber, ajudar e comer ne l fin. Mas nun ye solo isto - Ua notificaçon special para ls que ban alhá solo pur la chicha, anchen l bandulho i scapan-se mi deprissa cumo beniran. Este anho ban-se a fazer uas poucas de oufecinas, siempre cun la cultura mirandesa de mote.
Bai a haber: ua oufecina de danças de pauliteiros, puls dançadores de Fuonte Aldé, ua oufecina de Gaita Mirandesa, de Fraita Pastoril i Tamboril, i tamien de Caixa de Guerra. Yá sabeis que isto todo nun ye solo para las gientes de Fuonte Aldé, mas si para todos ls que s'ateressaren pula Cultura Mirandesa. Quien quejir d'aprender de raiç o quien quejir aperfeiçoar un cachico mas la sue técnica an qualquiera ua destas cousas que apareçca, que ye bienbenido!

E AGORA, PARA UA COUSA CUMPLETAMENTE ÇFRENTE, LS BIGOTES!!!
Cumo nun podie deixar de ser, deixo eiqui ua pequeinha nuoba, tamien apegada al Rezosa, porque bamos ancuntrar alhá un anchente de rapazes barbudos, que até parece que ls ciganos se mudórun tuodos para Funte Aldé. Mas nun ye nada dixo, ye purque la rapaziada stá a deixar crecer ls pélos para la Grande Cena de ls Bigotes!
E anton deixo-bos eiqui mais ua lhigaçon, para ls que inda nun se decidírun pur qual bigote scolher, de la AMI. Nun se trata eiqui de la Agência Médica Internacional, mas si de la American Moustache Institute, que ye ua Associaçon Nacional Amaricana pula preserbaçon de ls bigotes. Neste sítio podreis ber todos ls tipos de bigotes catalogados, na secçon Moustache Styles.
Yá faltan apenas dues semanas para la cena, quien quejir benir a la cena i inda nun ten pélos nas bentas, ten agora la ouportonidade, para que medren inda cun un cachico de tiempo. Quedará assi un bigote de garoto, bá, mas indo cuonta.

Bigotes de Dali

2007-12-03T16:28:00.000Z

Salbador Dali (ou Deilhi an mirandés) fui un amportande pintor Catalan, coincido pul sou trabalho Surrealista.
L trabalho del dá nas bistas pula grandeza de mezclas de figuras stranhas.
Tenie un recoincido gusto por maneiras algo achabascadas para que toda la giente l mirasse. A las bezes aborrie até ls que gustaban del. Outras bezes era a mode dua china no çapato i chegaba a ancomodar ls críticos, ua beç que la sue maneira de star superaba l sou trabalho.

Un bun eisemplo de bigote!!!

Eisemplares de ls nuossos tiempos

2007-11-26T22:59:00.000Z

Diç que l die 22 de Dezembre bai anton a ser un die (ou melhor ua nuite) an que bamos amostrar ls bigotes.
Pus you num sei cumo irei a fazer... se tire ls pelos de l queixo i ls cole pur ambaixo de l nariç, ou se deixe crecer mesmo uns berdadeiros! Pur bia de las dúbedas ya andube a ber se iba tirando uas eideias eiqui outras aculhá e para bos botar ua mano, deixo-bos tamien uns eisemplares bien guapos de ls nuossos tiempos.

Mirai i ide tirando eideias.

Diç que tamien quien ten bigotes bebe siempre dues bezes!

Anton bai a star bonita la cousa bai, nun bos digo nada!!!!!!

Buonas eideias pra bigotes

2007-11-26T10:13:00.000Z

Eiqui bos deixo uas buonas eideias que fui tirando an Burgos por sítios adonde passei neste fim de semana.

Las patilhas só poderan ser tenidas cumo anfeite de la penuige facial, nunca substituindo ls bigotes.

Cumbido-boas a que fagades cumo you i ajudeis quien ten dificuldades an se decidir pur um stilo único i oureginal. Para isso fazei uas fotos i mandai-las als admnistradores deste blog que seran publicadas denistante.

La Cena de ls Bigotes! - die 22 de Dezembre

2007-11-17T22:35:00.000Z

Diç que yá stá marcado i oufecializado! Die 22 de Dezembre dá-se l purmeiro ancontro de bigotes de l praino para todos: ninos e bielhos, rapazes i rapazas, zde que tengan pêlos nas bentas, nomeadamente abaixo de l nariç i pur riba de l beiço superior.
Stá a ser ourganizado pula Mocidade de Fuonte Aldé, i stan todos cumbidados, mas tenen que lhebar essa peluje nas beiças, nien que tengan que cortar pelos de las partes fodengas o doutro sitio pal pegar ne l sítio. Pur isso ya screbí la nuoba eiqui agora para que toda la giente tenga tempo de ls fazer crecer, mismo ls que la tenen menos sembrada nas bentas.
Cumo sabeis, l bigote ye storia an Miranda, Pertugal, Spanha i todo, até habie ua tie famosa por las postas que fazie, que tenie uns bigotes que ampunhan respeito a qualquiera home de barba rija.
Bamos a recordar essas stórias d'atrás, rebibé-las i renobá-las. L bigote queda scolha de l freguês, quier seia cumo Charlie Chaplin, Salvador Dali, Village People, 3 Mosqueteiros, Freddie Mercury, Cardeal Richelieu, George Michael, Frank Zappa, ZZTop, Hulk Hogan, Buffalo Bill, cigano, marroquino, chinês, cowboy, etc... bós sabeis l que quereis fazer culs bossos pélos. Quien quejir cumpletar l retrato cun adereços a cundizer tamien puode.
Mas atençon, nun se admiten bigotes de ditadores, cumo Hitler, Salazar o Fidel Castro! Teoricamente l bigote de Hitler era 3 melimetros mais streito de cada lhado que l de tiu Chaplin, tiu Salazar tenia "bigote feito", e l de tiu Fidel ye barba. Esses son ls trés bigotes que nun se queren.
Apuis de todo splicado, queda dezir que bai haber ua Comisson Bigotista de Abaliaçon de Bigotes para nomear l prémio "Bentas Mais Guapas!", que bai a scolher l bigote mais oureginal. Iremos apuis pal Intalaia a beilar toda la nuite i a mostrar cumo son ls homes de barba rija!
Ls anteressados an partecipar que falen cumigo, o culs outros eilementos ourganizadores de la mocidade. Speramos cuntar tamien culs bigotes stóricos de l praino, cumo l de tiu Desidério!
Biban ls bigotes!!!

Ls gueiteiros stan purparados

2007-11-16T09:57:00.000Z

Diç que ls gueiteiros andan a afinar las gaitas para quando l nino nacer. L bispo ya biu la música de las garrafas i diç que nun tenen bon sonido pa drumir l nino. Las gaitas son mais lindas para fazer la fiesta i chamar giente. Quando l nino crecer, apuis si, tamien puode tocar las garrafas.

L Pauliteiro Sonecas!

2007-11-12T14:47:00.000Z

I agora, a ber l'outro dançador de la família, l dançador Sonecas! Cumo sabeis na stória de la Branca de Niebe habia un que staba siempre a deixar-se dromir!
Cumo quiera serie por beilar tanto... ou anton por que la nuite d'atrás fui mi cumprida i bien regada! Diamantes?! Nó... solo palos i cerbeijas!