AMATWORK - 冇頭冇尾

漸入佳境

2006-07-31T15:37:00.000+08:00

小虎妹同細佬，不經不覺已經嚟咗我地公司四個禮拜喇，宜家佢地兩個可以話已經係熟晒地頭。由初頭只係係我檯底下活動，宜家已經係走均晒全公司。由初時只係係地面活動，到宜家係已經識得擒上檯，跳上凳或各人大脾，可以話真係活躍非常。

睇住佢兩隻Ｂ，由返嚟時唔夠一磅重，到宜家重咗一倍，由細佬有小小怕人，到宜家係人撩都玩一大餐，都係真係幾開心。至少冇養白Ｂ時咁有失敗感覺。可能佢地俾白Ｂ大隻得多啦，又識得食貓糧，唔駛成日餵奶，識得肚餓就食，急屎就去沙盤痾，都係比較容易處理。

兩隻Ｂ宜家都記得自己個名，不過就大家都好少叫小虎妹做小虎妹，多數都係叫ＢＢ，一叫佢佢走咗去邊到都識走出嚟，而細佬都係叫細佬，都認得自己個名。但就你叫小虎妹做ＢＢ，佢係會喵返嚟回應佢聽到，但細佬就未必識得。有時一隻出咗嚟喇，另一隻冇出嚟，如細佬出咗嚟，唔見小虎妹，就問佢："你家姐呢？你家姐去咗邊呀？"，佢知佢會走去果到喵佢出嚟，佢唔知呢，佢係會跟住你一齊搵，好搞嘢！另外就係，之前抱佢地，佢地都係會唔知你想做乜，有小小反抗，但宜家只要同佢講："抱抱好唔好呀？"，一係佢自己已經跳上你大脾，一係就會喵一聲坐定定，放軟手腳仔嚟等你抱佢上大脾。其實我都想佢地做一隻唔怕人嘅貓，好過見人周圍走咗去吧貓，點都開心啲！

基本上四個星期入面，都試咗好多嘢，例如同佢地剪指甲啦，出奇地唔算係好反抗，只係見另一隻係地下成日想落返地玩，一路剪一路郁身郁勢。另外就係用乾沖粉沖涼，初時係一倒落佢地個身到就走都走唔切，宜家就好啲，都走，但有時都會由得你舞。

不過兩隻衰Ｂ有時都幾偏食，放耐小小唔食，唔好食唔食，衰女小虎妹直頭用手係到撥話臭，例如佢問到啲去毛膏時，直頭係眼都瞇埋，用手係咁撥開，超搞笑。但冇嘅，初時都會就係，宜家唔食唔理你，咁佢地就會死死地氣照食，食下食下又習慣。但每朝早佢地都係好準時，一返到公司冇耐，就識得走埋嚟我到係咁喵我，做乜呢？梗係等食啦！話晒我係佢地米飯班主嗎！不過估唔到食唔算係佢地最大開銷，一兩個月都食唔晒我果一大包ＩＡＭＳ貓糧，都係八草嘢，買第啲就貴啲，但打算買返ＩＡＭＳ算。另外就係每日溝埋落啲貓糧到嘅偉嘉濕糧，一包都三個幾。但最貴係貓沙！一包紙沙三十零，但一包豆腐沙係要成九十銀！百二銀一包都有！另外就係防蚤藥水，一個月一支，兩隻要兩支，每盒三支一百八十大元，好肉赤。但為佢地健康冇乜計。

宜家最大問題係，幾時帶佢地打防疫針，其實佢地唔出街都唔駛打，我又滴咗防蚤藥水落佢地個身，只係要諗幾時帶佢地去"閹"！呢個係好嚴重嘅問題嚟，因為佢地兩隻都係女仔，做手術個過程比貓仔麻煩，好返時間亦長，又要同佢戴喇叭，又要帶佢返去拆線。以惠東呢個地頭，想帶佢地去獸醫到做呢件事確實有難度，因為呢到係冇獸醫，可能要帶佢地落深圳。麻煩。另外貓女做手術比貓仔做手術貴亦係一個問題嚟。ANYWAY，呢個費用都係走唔甩架喇，鬼叫我鍾意佢地，養佢地咩。

我地係TWINS!

2006-07-07T16:47:00.000+08:00

頭先佢地好乖咁坐定定俾我地嚟影相，於是乎就有張相喇！哈哈！

可惜嘅係我手震，遺憾遺憾，不過遲下可以再影過！

同大家分享一下！

佢叫細佬

2006-07-07T13:25:00.000+08:00

佢亦都係四姐弟中其中一員嚟。本來並冇打算湊埋佢返嚟，但係擒日聽同事講話另外一隻都車死埋，唉，我擒日夜晚係廠果到時，聽到貓叫聲，走去睇，見佢就坐係晏晝死埋果隻隔離，係到好慘咁叫，於是乎唯有抱埋佢上嚟啦。因為明顯啲大貓係唔理佢地。宜家四隻中，只係死淨佢同小虎妹兩隻。

佢就比較怕人少少，可能唔算太慣個地方同見到咁多人啦，不過小說妹都叫好照顧佢，所以都放心落嚟。但明顯佢有小小餓親，一則細過小虎妹一個碼，又瘦，所以佢成日係咁食嘢。希望佢快高長大啦。唔記得講，細佬應該係貓女嚟。其實我都未搞清楚佢地兩個啲性別。不過細佬係仔係女都係叫做細佬。係小虎妹如果搞清楚返係仔嚟呢，就改返叫做虎榮，唔係就保持不變。

擒日小虎妹上演一場捕鼠記。事緣小虎妹經常性走埋一堆紙箱果到入面坐，唔知佢做乜，我地又怕佢污糟，所以抱返佢出嚟，但佢又自己又爬返入去。後來為免佢又爬入去，所以決定搬晒啲紙箱，一搬開，原來入面係有一大堆老鼠屎係到！之後我一路搬一路掃，搬到其中一箱，突然一隻老鼠標出嚟，嚇到我呀！小虎妹冇追，但佢就係到周圍聞，似乎係想聞下邊到有老鼠氣味，準備隨時捉佢地。勁！

宜家小虎妹嚟咗我地工廠幾日，已經開始熟習環境，自己周圍走，不過就似乎仲未識得邊到係痾屎。希望佢地快啲學識用沙盤。小虎妹已經唔多驚高喇，夠膽係檯到跳落嚟，又跑得鬼咁快，証明佢應該身體幾健康，好事嚟！宜家係望佢地可以養得大啦，不過明顯我荷包就一定大出血喇。

新貓貓來了!

2006-07-05T16:29:00.000+08:00

上個月白B死咗，真係好唔開心，因為都真係好鍾意佢，又好錫佢，最後因為啲唔知點解嘅原因，咁就帶走咗佢生命。葬佢果時仲要係落雨天，真係倍感悲情。

今個星期二就放工果時，同事打電話嚟問我要唔要貓仔，話工廠樓下有好多隻貓仔係到，於是乎我就拿拿聲跑落去睇啦！就見到一個好慘嘅景況。

四兄弟姐妹嘅貓貓，其中一隻因為俾車車親，奄奄一息咁係到抽搐，另外果三隻貓仔見到咁，好驚咁縮埋一邊。於是乎我睇咗佢地三隻一陣，決定收養咗呢隻金黃色虎紋貓咪。其餘果兩隻我都好想收養埋，但公司一定唔俾，收養多一隻，淨返果隻就真係孤零零一個，所以決定放棄佢地。但我臨走前都餵咗佢地食嘢，同埋嘗試放佢地係有貓群經過嘅地方，希望其他貓會照顧佢地。之後我就搵咗一個地方，埋咗果隻死咗嘅貓貓。到到今日我再搵佢地另外兩隻已經唔見佢地，希望佢地好運啦。

講返我收養咗呢隻貓B，暫時我仲未決定到佢叫做虎榮定叫小虎妹，因為我仲未搞清楚佢係仔定女嚟，哈哈！不過是但啦！仔同女都冇所謂！佢比白B大隻一倍，亦都重好多，有肉。呢個亦都係我收養佢原因，佢係三隻中最大隻。由於佢都有返咁上下大，佢唔會學似白B咁叫做未開眼，亦都識得周圍走，自己識得玩，識得食貓糧，所以照顧佢理論上應該比白B簡單。

初初抱佢上OFFICE到，佢可能仲細，都唔係好識得話驚唔驚，走圍行行下。由於我已經冇晒果啲貓藥水俾佢滴，於是乎就同佢戴貓蚤帶先。係戴嘅過程中佢係完全冇反抗，真係由我武。於底佢之後，搞返好佢個竇，準備好貓糧，咁就叫做大工告成。

佢初初可能唔係咁熟我，所以有時佢捐咗埋一二邊，我想伸手抱佢出嚟時，佢係會"絲"我，即係扮惡果隻，不過到到今日，佢去咗啲地方一個驚，就已經係起勢叫我抱佢出返嚟。另外佢都幾醒目下，識得自己返竇到瞓覺，又自己識得爬入去沙盤，雖則唔知佢知唔知係個沙盤痾屎，但已經係一個好開始。

擒晚黑餵佢食貓糧時，佢初頭唔係好肯食，後來我餵咗佢食咗隻蝦，之後佢就好拿拿聲識得食貓糧，今日直頭自己識得行去佢個兜到食貓糧，食完又跳返入個竇瞓覺。睇嚟都好似易照顧過白B，至少唔駛定時定候餵佢奶先啦！

暫時嚟講，由於只係養咗一日，唔知佢情況點，例如多唔多蚤，又或者有冇生虫。我諗下星期返香港都要買返啲貓藥水同佢滴，之後遲小小要有佢去睇醫生檢查下。

希望白B在天之靈，會保祐呢隻貓咪健康成長啦！

白B死了。。。

2006-06-15T11:02:00.000+08:00

2006年6月1日，我同白B正式相遇。2006年6月15日，白B過世。

短短相遇半個月時間，有苦有樂，但我好肯定一點，樂比苦多。因為我覺得我養得佢，就一定要令佢健康快樂成長，唔可以因為佢賴小小屎尿就嫌棄佢。可惜，佢冇機會再睇呢個世界。白B長埋係泥土之下。

我係公司樓下個小花圃到掘窿，一邊掘，個天一邊落雨，就好似我嘅心情。我用毛巾將白B包好，放到窿入面，再將泥蓋上去。我將白B埋係公司樓下，係希望以後每日返工放工都可以去探下佢，知道佢就係附近。插上白B嘅墓碑，天突然就變落得好大雨，行起雷，週圍嘅車都防盜BB作響，就好似白B叫我抱佢時嘅叫聲一樣。。。

希望係白B記憶中，同我一齊嘅時光係快樂，而唔係痛苦回憶。希望再有機會，可以帶佢睇多啲呢個世界。。。

養貓不容易

2006-06-08T21:08:00.000+08:00

今日係同小白B相處一周紀念嘅日子！呢一個星期入面，令我明白到原來養貓並唔係朋友所講中咁簡單，咁容易。可能我同朋友唔同，佢地養嘅係有返咁上下大先湊返嚟養嘅貓B，我養嘅係真係只係得一兩個星期嘅貓B，所以分別可能變得相當大。

呢個星期入面，好多我本來擔心嘅事情都冇發生，例如因為之前冇貓奶餵佢飲煉奶佢都冇肚痾啦。又或者放佢係廠OFFICE到怕佢俾老鼠咬又冇發生到啦，星期日唔係公司會餓親佢啦。又或者有咩生虫病痛之類亦冇啦！感謝天主！

不過就有更多我諗唔到嘅事情發生。例如，原來貓仔唔識得自己急尿就要去痾，就算係周圍痾，你係要用紙巾掃佢咕咕仔(以我隻貓你係仔計啦...)，等佢忍唔住賴出嚟，同佢索尿，一日三次。仲有佢係唔識係貓沙盤到痾屎，如果你見到佢突然唔知做乜係到打冷震，見佢PAT PAT有所動作，就要拿拿聲抱佢落沙盤到喇，因為係佢想痾屎，唔係的話你就會成手屎(已中過招經驗之談...)。另外，就係佢痾完屎係唔會識得自己整返乾淨，好多時都會搞到佢自己成腳成尾都係屎，你就要完全付出一份慈愛之心，用毛巾同佢抺返乾淨佢，完全唔可以再顧忌自己抹到都係成手屎。講真佢第一次賴屎落我隻手到，同抱住佢時賴尿落我個身到，我真係有小小嬲，但係咁點唧，打佢佢都唔明你做乜，咪盞佢又係到叫，唔通掉佢落街咩，過幾日都習慣囉，日日返工第一件事，開完電腦就係同隻白B執佢係個竇到痾果啲屎，好在，我已經預已墊晒紙巾，都係同佢包起佢，掉落垃圾筒。

上個星期由於事出突然，所以都冇準備好咩貓食物，得返兩罐大貓食嘅貓罐頭，佢又唔識食，唯有餵住佢飲鷹嘜煉奶。今個星期返咗落香港，買咗貓奶粉，買咗包貓糧。貓糧佢要過多兩三個禮拜先食得，暫時就餵住佢飲貓奶。上個星期有小小亂咁開，今個星期就要學識計分量，每日餵佢都係飲1.5安士至2安士左右。經由星期一到今日星期四，佢大小便都已經正常返晒。另外之前個買嘅BB用奶咀，經我改良過，剪到佢多咗好多開口，白B亦都已經易飲咗好多，擒日同今日，每飲都飲成半安士幾奶，之後玩一大輪就已經大覺瞓，唔再成日係到叫喇。

暫時嚟講所謂同佢玩，都係放下佢落地由佢周圍行，不過佢都唔會行太遠，行多幾步就驚要搵我。有時就抱下佢上檯由佢搞我啲電腦呀，由佢聞聞下咁樣，但都要睇實，因為佢宜家眼仔發育未完成，佢睇唔清，會自己爬去檯邊，唔理隨時跌落嚟。基本上每日放佢出嚟走下，又餵佢飲幾啖奶，佢半個鐘唔駛就已經眼瞓要瞓覺，唔會再發生每隔十五分鐘嘈一次嘅情況。

宜家小白B體重係兩磅左右啦，希望佢兩星期後會增加一倍重量啦！總之呢，養BB貓真係唔容易啦！仲有好多嘢要學呢！

我的小白

2006-06-02T15:33:00.000+08:00

終於擁有我人生之中第一隻貓仔啦~!基本上我恨咗養貓都可以話係好耐喇，但奈何屋企人唔鍾意，唔俾養，所以一直都唔成事。後來係深圳自己住，都想養，不過就一則唔想買，二則放佢係屋企又好似唔係好放心，因為我都唔係成日係深圳屋企。宜家嚟到惠東做嘢，叫做多小小時間啦，本來想係宿舍到養，但因為大老闆反對（因為同埋佢地一齊住。），所以又唔養得。不過基於宜家OFFICE老鼠為患，所以我三老闆俾我係OFFICE到養。

之前其實見過兩隻想養，但點知等我係香港買好咗嘢上嚟時，就唔見咗佢地，好心痛。擒日返工果時，突然間同事走埋嚟俾咗箱嘢我，一開！原來係貓仔！即刻勁開心啦！不過亦都係一個辛苦時間開始。哈哈！

呢隻貓仔真係好細，我諗得兩三個星期咁大到，開咗眼，但仲係要餵奶果隻，唔識得食貓糧，所以之前買果啲貓糧全部冇用。另外仲有就係為貓貓準備好嘅貓廁所沙盆，亦都由於佢係唔識用沙盆，暫時都冇用。由於太急，又冇貓奶粉，唯有用住煉奶開水俾佢飲。

但餵佢飲奶都唔簡單，初時買個BB用奶樽過佢，佢都唔係好識咬，最後打電話返香港SPCA問，佢建議我用針筒（咁就梗係攞走個針頭啦！），終於都成功餵到喇！另外就係要買啲BABY FOOD過佢食啦，點都要捱到今個星期六返香港先可以買到貓奶粉。不過SPCA啲人話貓仔唔係食好多，所以每日餵小小都已經OK，唔駛擔心。

另外就係住嘅問題，由於唔可以帶佢返宿舍，一定要留係工廠，我係有啲擔心，驚佢俾老鼠咬，話晒佢都咁細個。不過有朋友話只要唔好留食物過夜，咁就唔怕老鼠會咬佢，不如擔心佢有病時養唔大仲好。同事都好熱心（某程度啦！嘿嘿！），整咗個木箱俾佢瞓覺。但係放咗佢一日，佢已經識得自己爬出嚟。之後我再用個高啲嘅紙箱再套住個木箱，佢今日已經識得自己爬出嚟，相當之勁！

由於小白係白貓嚟，所以乾淨好緊要！之前準備好嘅鐵線擦大派用場，擒日同佢係咁擦，擦咗一大堆黑色點點出嚟，可能係蚤又可能唔係。擦完再用濕毛巾同佢抺，乾淨晒啦宜家！最後同佢滴咗小小啲防蚤藥水，相信應該唔怕有蚤或寄生虫（不過SPCA細唔好同佢滴，要用SPARY好啲。
）。

宜家佢大部份時間都係瞓覺，唔瞓就係到嘈，一嘈就要我抱，一抱就唔嘈。唔抱一放返底佢又嘈又走埋嚟要抱，搞到我都唔知做公司嘢好定係抱佢好。不過其實放佢係竇到都得，但就要等佢自己叫到眼瞓先唔嘈。朋友叫我放個鐘係個竇到，貓仔聽到"的的打打"聲，會以為係心跳聲，有人陪，會易瞓著同安心瞓著好多，試過又真係WORK喎！我啲同事仲問我話放個鐘落去做乜，俾隻貓睇時間。哈哈！

宜家叫做照顧咗佢兩日啦，仲有好多嘢未識同佢搞住，一步步咁學啦，亦都唯有希望佢快啲大，可以幫手捉老鼠啦！

宜家誠徵各好友，贊助下小白嘅奶粉錢同玩具等等！哈哈！

差不多

2006-05-11T11:03:00.000+08:00

小時候讀書,讀過一篇課文叫"差不多先生",因為做人乜都差不多就算,所以叫差不多先生.而事實上,係我地身邊,都會有好多呢啲差不多先生嘅存在.

公司新產品試模,左右兩邊小節位置跟本就唔對稱,質問開模部,"差唔多啦,係咁架喇,咁咪仲好,呢啲嘢冇人睇到啦!"

另一件新產品試色,顏色強差人意,"差唔多啦,係咁色咁上下啦...."

點解乜事情都要差不多呢?的確,差唔多呢句說話好容易講,但問題你理唔理解到背後個原因.

試新產品左右唔對稱,你睇得出,佢就要改模,一改模佢地就要差不多重新做過,所以佢地要用差唔多嚟形容,強行要你接受.

但問題我就偏偏唔接受.

同事話,你做設計,冇權話事.我心諗,你都痴痴地線,個設計係我做出嚟,我覺得同我個設計唔同,而本身根本就係做模嘅技術犯錯,我點解唔出得聲話?當然,多多少少係因為果個做模阿頭,份人霸道,你講多幾句佢就話:"我地係做唔到架喇!",所以以後都冇人敢同佢正面指出問題,亦所以個問題越嚟越惡化.

做設計如果唔執著,乜都係差唔多算,不如唔好做,乜都一個四方盒就算.做得設計就應該要有要求!所以我嚟咁耐,佢地就覺得我多多要求咁耐.而事實上係,唔係我有要求,係佢地跟本就連市場最低要求能力都未去到,所以先覺得人地多要求.

如果乜都係差唔多就算,佢地人工都可以差唔多就算啦,唔駛食咁飽,著咁好啦,差唔多就算啦!要乜嘢求唧,橫掂做嘢都係差唔多,你學乜人要求有質素先!?

包袱

2006-05-04T21:38:00.000+08:00

睇到朋友BLOG一篇文,關於到佢地雜誌文章,因為內容唔夠好而被網友狠批,佢講出自己必入面感受而被批評.個人對於感受都幾深.

不單止作為一個前新聞工作者感受,亦都係多年做過多個BBS及新聞組嘅版主感受.

通常你去到某一個"高"工作位置,尤其係關係到訊息發佈問題,如記者,板主等,你差唔多就等如係"代表"咗果一間報館或BBS(人地以為),只要你言論上有小小唔夠持平,偏坦,就一定係你嘅錯嚟.

就好似我搞BBS咁,間唔中就有人會嘈,點解上次我點樣點樣講嘢你扣我分,但呀某某你唔扣佢!啊!你偏坦佢!你唔啱!你無論點解釋個情況不同,只要你唔扣返某某分,就係你偏坦,係你唔啱,你同果個人好朋友啲!講乜都冇用.

等如今次呢件事,一個同事為另一個同事處境,講出心入面感受,但因為佢地大家係同一間公司.就一定係佢錯.

令我想起一件事:天地不容

小弟就係曾經係果間雜誌地到做.當日因為呢件事,搞到成間公司執,我好唔好彩地落公司樓下時,因為撞到個舊同事講咗兩句,俾成班記者圍攻我問我,我當時答咗一句:"喂,你收到張相我唔信你唔出呀!間間報紙雜誌一樣咁啦!"結果第二日報章圖文寫住話我地雜誌社死不悔改,員工都係咁.

首先,我冇份處理果張相,第二,果張相根本就唔係我地雜誌社專有,事實上好多間都收到兼夾唔少報館雜誌都諗住登.只係我地行先死先咗先.而死唔去嘅人,就大字話我地報館風格有問題,好事者更係覺得全雜誌人都抵死,執咗佢只可以怪佢地跟錯老闆.喂!我地冇權話登唔登張相喎!更甚係,你係到大大聲聲話我地貼時,張相一早已經係網上面大把人流傳緊!你死唔去就話我地!?唔係呀化!?更甚者,我地呀大老闆根本就冇睇過張相添!問題係當時有個編輯未等清楚個法律意見就去馬,咁死都係死果個編輯唧!

但係就係因為你係果間公司到做,所以人家覺得呢件事就應該係你負責任.咩都係你唔啱!

當然,係呢件事上面,我覺得果個編輯係有佢錯.但係行入面,唔搏,又邊到有機會上到位呢?(事實上的悲哀)我地亦都係因為佢,所以曾經幾次公司升書請食飯派錢添.咁我係咪係呢個時間應該走出嚟指住個編輯話:屌!正PK編輯嚟!累街坊!

我更唔鍾意佢極我都唔會講得出囉.

當然,我冇我果位朋友咁好彩,仲有機會同果位編輯傾偈嘅機會,但如果我再見到佢,我亦都唔會話咩責備佢累街坊.話晒大家係同一間公司,大家係合作,雜誌係一整體,真係甘苦同享,本書好大家一齊好,本書唔好只有大家一齊受,冇咁嘅諗法大家好難可以合作到.真係再見到佢,我都只係會同佢講:下次聽埋律師點講先出啦...

問題只係出面嘅世界嘅人唔會咁諗,你本雜誌有一兩篇文章唔得,你成本誌雜啲人都係咁垃圾.你間公司擺出嚟啲PRODUCT唔得,就係你間公司唔掂,入面啲人唔得CREATIVE.就算你入面有幾多好勁好勤力好好嘅員工,佢地都會一下只抹殺晒.出面世界嘅人只會睇到一個整體.當然,果件事之後我有諗過我當時係咪應該唔出聲,唔講嘢,但諗深一層,我唔出聲講,我唔會知道原來呢個傳媒世界原來有咁多偽善人.呢個亦都係我以後都唔再做新聞工作者嘅原因之一.

唔理解嘅人,咪繼續由佢誤解囉,因為佢地都已經有既定諗法.甚至不少人係混水摸魚,乘機抽水添!現實社會就係咁!只有話係學聰明,下次見到呢啲人時,會知道點應付,更甚者,提醒自己下次唔好衰係呢啲人手上.

延伸閱讀：http://gensanworld.com/blog/

公司文化

2006-05-03T15:45:00.000+08:00

基本上,每一間公司都有一個共通文化,就係"推卸責任".每一個部門之間,都認為自己冇錯,係人地個部門錯.我公司亦都唔例外.

今年去睇GIFT SHOW,公司亦都有擺到BOOTH.我作為公司設計部主管(實際上整個部門都係得我,我同我),都係應該去睇下.去到自己公司個BOOTH,我真係雙眼跌出嚟咁濟.係慘不忍睹嘅求其,部份位置只可以用吉嚟形容.我自己睇過咁多SHOW,自己亦試過幫公司搞BOOTH,如果我作為一個觀眾,我覺得我公司個BOOTH係完全唔可以接受!我問SALES,搞乜鬼個BOOTH咁樣,佢地答我話冇時間,好忙.我偶爾聽到佢地SALES之間講,佢地今年係要搵有潛質嘅客為主.但如果我作為客,我真係完全唔會有興趣去你個BOOTH到傾生意.慘不忍睹得令我擔心公司前途.奈何係,老闆唔會嚟睇SHOW,個BOOTH擺到成一PAT屎咁都唔會有人知(除咗SALES自己知).我諗緊返到公司,最後又係CALL唔到客返嚟,佢地會點解釋...

"工程部報價貴,設計部冇新設計!"

基本上我都估到佢係咁答.

我作為公司設計師,對公司冇新ITEM呢個講法係好質疑,因為事實上我地唔係冇!係有!但SALES通常都係借報價貴嚟推卻呢個責任問題.我自問自己嚟咗呢間公司半年到,設計ITEM都至少二三十樣(當然,唔止佢賣果O的,仲有好多條LINE),自上一個內地設計員走後,就一直都請唔到第個返嚟幫手,係我只有一樣手情況下,我覺得我都已經好盡人事.

奈何公司工程部,亦都有佢問題存在.能力弱係其一,經驗淺亦係因素.佢地根本上好多嘢都唔識做,就算你俾晒資料佢地,佢地都唔識做.唔識做,佢地好簡單:"做唔到!"就算,唔會諗點改善,唔會諗點解人地做到我地做唔到.佢地解釋好簡單:"SALES都冇單!開埋十九幾套模先得果一兩百單,梗係唔同佢做啦!"結果就當然係拎出去出面俾人做,咁價錢咪自然貴囉.完全係一個惡性循環嚟.

公司本身有幾個PRODUCT LINE,做GIFT一類東西只係其中一樣.但現時公司最大問題係太依重另一條LINE,食粥食飯都係靠佢,萬一果條LINE人地遲小小找數,大家都冇糧出!

我曾經問過下同事對冇糧出,遲出糧意見.佢地竟然係可以用"習以為常"形容.大家都唔去諗點解會出現呢個問題,大家只係會話,只要有糧出就理得佢.可悲.

同公司其中一位老闆傾,大家都好清楚知道呢個根本就係一個惡性循環,但奈何大老闆唔理.結果咪做成擺一個一PAT屎嘅BOOTH出現,甚至我唔去的話,佢可以講句:"工程部報價貴,設計部冇新DESIGN."因為根本就冇人知到佢地擺SHOW擺成點,連老闆都係唔關心.SALES果個冇心,做果個亦都冇心,咁點可以扭轉困局呢?大家都只係麻醉自己講,冇糧出,遲下出返就得啦,唔炒我就得啦...最後就變成公司文化.

可能我比較多口,亦比較八掛,我對呢啲問題真係好睇唔過眼.但作為一個設計,我可以點做!?唯有做好自己設計,落多啲力去搵齊晒資料俾佢地,等佢地冇藉口.但似終道高一呎,魔高一丈,要卸始終有方法卸.問題只係講幾時我頂佢地唔順咁解.

煙鏟

2006-05-02T17:00:00.000+08:00

細個時,見老豆食煙,好唔鍾意,因為覺得煙唔好,對身體唔好,又臭,所以唔鍾意老豆食.更諗過好多方法去証明俾老豆睇食煙唔好.例如搵張FILTER嚟抽睇下張紙幾快黑,又或者消極地放臭煙粉落啲煙到等老豆一食中招.不過似乎都唔係好有用.

仲記得果時曾經好無知地咁問食煙嘅大人:點解要食煙先得架?

果時果個人答案係:你細路仔,未食過煙又點會明白點解要食煙先得架!?

到到後來大專,本住想知下,解構下點解要食煙,所以嘗試咗第一支煙.但一直都唔係有癮,只係有時想扮下多愁善感,引下人注意,先會食下煙.到到後期係去卡拉OK,人地食我又食支,好似大家個氣紛好啲.但都係果句,冇買煙習慣,亦都冇乜癮.

後來自己搬出嚟住,一個人係深圳,十蚊包煙,就開始食,之後就有買煙習慣.到到宜家,一日一包煙好似已經係必然,冇煙食果日,除非係香港屋企,唔係真係一定會食煙,冇錢買煙果日除外.已經覺得自己有癮.

以前唔明白點解要食煙,宜家明白好多.可能係一種習慣,當你自己一個人果時,又或者係自己一個工作果時,諗緊嘢,你會覺得有支煙,好似有啲世藝,又或者係好似冇啲嘢陪住你去消磨時間.有時等朋友,會食支煙,一支煙燒兩三分鐘,一支煙,兩支煙...頂你!等你我食咗半包煙喇!

或者有啲人會買部PSP係等嘅過程中消磨時間,但始終都唔及食煙,鍾意就點一支開始,唔鍾意就整熄佢終止.你係打頭D果三分鐘過程,突然你朋友過嚟你搏到最搏命果一下,叫你停一停我諗你都會用粗口問候佢.

有時候,食煙可能係同朋友溝通一種方式,大家係沉默無語嘅時間,大家點支煙,至少唔會覺得果個空間好似好沉悶.

係現時咩辦公室禁煙情況下,食煙又有另一個原因:偷懶.如果你得閒行開去咗個窗到望風景,你老闆只會話你係偷懶,罪無可恕.但係如果你食住支煙,係果支煙燒緊個過程中,你老闆就算係見到,最多都係話:"食完支煙過嚟有事做.",你老闆最多都係覺得你因為有煙癮,所以食支煙,如果你老闆係吸煙一族,分分鐘可能同你一齊坐底食返支一齊偷下懶添.食煙變成咗偷懶藉口,仲要因為唔可以係位到食,所以你可以離開你果個工作位置去偷懶嘅方法.至少,你話想出去行下透下氣你老闆實話你,你話出去食支煙你老闆覺得你會食完支煙會返嚟...不過呢支煙可能係食咗半個鐘頭.

食煙係唔好,自己知道,不過亦都好似唔係好想擺脫果一種消磨時間嘅方法.所以好多人話,食煙係心癮大於有煙癮,其實呢句說話都係冇錯.

被遺忘的人

2006-05-02T16:03:00.000+08:00

如果我每一個朋友,佢地都有一個將要被遺忘嘅朋友LIST的話,我諗我應該都會係佢地嘅TOP LIST到.就算要計我最好朋友果幾個,我諗我都仍然會係佢地被遺忘嘅TOP LIST.

即係同學仔舊同事結婚等等,個個都請係冇請你(還好,唔駛做人情慳返!),又或者係咁唔好突然打俾佢佢先醒起有你存在,同你講:"咁呀,不如你嚟幫我影相啦!"

當然,現實就冇咁慘,呢排好多朋友結婚都有叫我去飲,我最後冇去咁解.不過係呢個咁講俾面社會,你唔去就即係話:下次唔搵你.所以我做咗咁多年人,未試過有朋友會係我生日果日會打嚟同我講生日快樂,通常大家都係唔記得.反而朋友生日去唱K去玩就有.自己生日真係自己過囉!

數下手指,計知心朋友,我諗十隻手指數埋都係...太多.的確,朋友來去匆匆,可能某一段時間好好朋友,但過咗一段時間,大家就會開始唔會搵大家,好少話會有約出嚟食飯果種.最多只係某一日某一個時間,係喎,呀邊個邊個可能係到喎!咁先會醒起搵下人家.好似最近係會展有SHOW,就會諗起大學某幾個同學,唔知會唔會見到佢地呢?果日我係SHOW到,一路行,都聽唔少人係到講電話話:"喂喂!你仲係咪某某公司到做呀?我行緊SHOW睇下見唔見到你嗎!"好似每年個SHOW除咗係俾人做交易會,亦都係尋找舊朋友,舊同事嘅日子嚟.

不過真係見到面,寒喧幾句,有幾多真係會好有心咁會之後食飯聯絡落去呢?

可能我做人都係比較獨行俠,唔係咁鍾意成班人去呢到去果到,反而自己一個覺得開心好多,鍾意去邊就去邊,唔駛等邊個先可以去邊到食飯,唔駛等邊個先可以去睇邊一套戲.不過諗深一層,其實可能係我同人地個頻率根本唔啱,即係唔啱CHANNEL.我個人都係比較自我.

好似工作咁,唔係話同人玩唔埋,但係我會覺得自己一個做會比成班人做有效率得多.至少衰咗唔駛話BLAME邊個邊個先.但現實世界總係要玩群體遊戲,你唔得群體感覺就係好怪.

諗起公司有個同事,公司有飯局永遠都唔會出現,公司去玩永遠都唔會去玩.連公司每日午飯晚飯都唔會參與.大家嘅感覺就係覺得佢好怪.但係佢又會同到我傾偈,因為大家都有一個共通語言:攝影.所以每日都總係會有傾到偈,同我還叫做合作到.但同其他同事佢就真係好似夾唔埋,好多時做事真係公事公辦,冇私交可言.

其實可能係自己啲HOBBY成日都轉,呢一排可能做乜,下一排又唔想做喇.又或者係朋友大家走嘅路越嚟越唔同,所以大家已經再冇共通話題.而我就更加唔識得點樣係冇共通話題情況下,開一個新話題講,所以變成越嚟越唔會聯絡.有時都會覺得自己原來把口多,但係其實係唔係幾識同人地溝通.結果,就成為咗被遺忘LIST入面一群...

當然,部份朋友會記得我,但可能佢地因為冇同我UPDATE住,所以佢地個紀錄都係:"咦!?乜你唔係係某某報到做記者咩?"

我轉返做DESIGN好耐喇...

電影與我

2006-05-02T11:47:00.000+08:00

今年某日,去睇一場電影節戲時,遇上一個舊同事.佢當時問咗我一個問題:今年電影節你買咗幾多場戲嚟睇呀?

當時我嘅反應真係好似有啲唔識答,因為每年電影節睇戲,都係女朋友買飛,佢買乜,我睇乜,真係冇乜特別話去買乜.但唔知點解每年睇親電影節戲,都一定會撞到舊朋友,舊同事.但基本上每年電影節SABU啲戲我都會睇,好似已經係常客.不過呢個唔係最怪,最怪係我明明大學副修電影評論,但唔知點解大學之後就已經係極少會自己主動去買戲飛睇,冇咗大專大學時,一套戲都可以睇七次嘅衝動.

自問自己又唔係唔鍾意睇戲,但你叫我去攞五十蚊出嚟睇套戲,我又真係好似唔多捨得.又或者可能選擇太多掛.選擇多嘅意思唔係指好多戲揀,係唔睇戲仲有好多其他事情做,寧願做第啲事都唔會去睇戲.又或者係唔覺得邊套戲我好想或好值得去睇.

讀大學時,明顯係日本電影狂熱者,更爛嘅日本片都照睇可也,VCD更係一大堆,亦都係POV常客.後來POV冇咗,大學畢咗業,就真係好似同電影接近絕緣.可能讀書時,有一大班人睇完戲會討論,會講下套戲點樣點樣,講啲乜,表達啲乜,但宜家好似冇人同我講,所以冇咗果種興趣.以前真係睇完一套戲會有好多嘢講,宜家睇完真係冇乜想講,睇完就算.

有時睇返自己屋企個書櫃,原來以前買落咁多電影書.亦記得以前曾經講過話想做編劇.宜家好似都已經不了了之囉.

反而一啲平常唔會講戲嘅朋友,對電影熱情好似咁多年都係如一,年年電影節都會買飛睇,就算佢唔知套片講乜,佢都照買嚟睇,純粹為ENJOY個過程.可能讀書時太強逼自己去解構套戲,變咗去到後期未必咁ENJOY套戲.反而睇得最多戲果時係真係ENJOY套戲果時,睇七次<情書>因為想睇中山美穗.宜家睇戲,未必會揀一套咩大片,可能純因為見到有阿嬌,有長澤亞美,於是乎就會去睇,睇完基本上睇咗乜呢?

"嗯....阿嬌把聲好嘈下......"

百病纏身

2006-05-02T11:33:00.000+08:00

好似自從中學畢業之後,身體都未好過.唔係鼻敏感引致大傷風,就係肚痾.基本上好似係連住.總之就係唔傷風流鼻水果日就一定會肚痛肚痾.

平時每一日基本上除咗食飯,就一定係要食傷風藥.只要有一日唔食傷風藥呢,亦都代表住果一兩日之內就實會大傷風,從不例外.

其實平時自己著衫都已經好小心,寧帶多件衫,都唔想因為凍親搞到大傷風.但最唔明嘅係,夏天都冇開冷氣,都係一樣會大傷風,我都好唔明.究竟係咪身體上已經習慣有藥控制住,冇藥就唔掂.有啲似食白粉道友咁,果日冇上電就會口水鼻涕一齊嚟.過份依賴藥物?

出面買藥又係奇怪,其實大部份牌子傷風感冒藥,個有效成份都係類似,只係劑量不一.但唔知點解係要食某一個牌子先可以唔流鼻水,食另一個牌子就算你食晒食排鼻水都係照流.我都好唔明,心理作用定係生理作用呢?

呢一排決定要開始試下盡量戒食西藥,試下飲中藥,希望可以唔駛下下依靠藥物,唔係真係買藥食貴過食飯.

MUJI AWARD

2006-05-02T03:27:00.000+08:00

好耐冇參加設計比賽,可能係碰唔啱,又或者係錯過咗唔出奇.係新公司做咗一段時間,可能覺得發揮空間大咗,亦都開始想參加返設計比賽,奈何又未見到有咩好設計比賽.

今日去開無印,見到有個設計比賽,主題上都幾切合我宜家公司要開發嘅嘢,所以都打算參加.

不過都有幾個問題要考慮:
1.公司會唔會SUPPORT?
2.SALES會點諗?賣唔賣得?
3.工程部會唔會肯做個手辦俾我?

呢啲問題都係未做未知.但感覺上好似覺得唔似以前參加設計比賽咁自由.我話乜就乜,我要乜設計就乜設計.始終呢個係代表公司,兼夾贏咗個設計歸無印喎!真係得名同獎金!但點都好啦,希望呢個可以作為公司一個新方向啦.

團隊精神

2006-05-02T02:52:00.000+08:00

基本上,人多嘅地方,自然就意見多.尤其係工作環境之中,各人為咗自己生存空間,都會各施各法去維護自己,唔俾人食到埋自己身到.

現時工作嘅公司,每日工作唔算最繁忙.最繁忙係應付每一個部門.每個部門為咗自己生存,都出盡方法去話第個部門不是.如SALES部門,永遠都係只係話工程部報價貴,令佢地賣唔到貨.工程部就永遠都話採購搵唔到最平報價,咁佢地點報平啲.生產部又淨係識得嘈話生產點麻煩,多咗幾多毫子.我身為設計部阿頭,唔駛講就梗係俾人話我冇新產品啦.

如果可以俾我一個個批評佢地的話....

SALES,永遠都係話人地錯,人地冇新產品,人地報價貴.但佢地永遠都係冇市場方向,設計埋成幾十款東西,就算係屎(唔係我設計啦!卸一卸責先!哈哈!)都有方法SELL啦!一日叫人開模開模唔駛錢一樣,但屎都SELL唔出.真係SALE唔出屎喇.問佢地市場嘢:我唔知呀!你話俾我知嗎!

採購,永遠都係只搵一間就算.搵多間都唔得.做完貨又唔會繼續去格價,搞到生產成本高上不落,離晒大譜.最抵死係搞錯咗佢地係會同你講:差唔多唧,我又唔覺得有唔同喎!

工程部,唔肯創新,最好唔好係咁難搞嘢,難搞就一句推晒話唔做就算.所以永遠都係冇進步

模具部,又係,難小小就唔做.

不過最難講都係我自己....設計部...竟然可以半年之內仲未請得返DESIGNER嚟幫我手,設計部係可以得我自己一個人,好嘢!

最根本問題,我諗係公司,唔係好重視人力資源,又或者係大陸文化已經入主咗公司:有錢有得講,冇錢冇得講掛.

係大家都根本上冇任何金錢利誘同鼓勵,兼夾支持下,點創新呢?最慘係SALES又係好似做又三十六,唔做又三十六.睇返今年佢地擺SHOW個BOOTH,如果我係老闆我真係會嬲到拆咗個BOOTH!忙還忙,擺到個BOOTH只可以用慘不忍睹嚟形容!完全冇擺BOOTH嘅SENSE!真係嘔血死.仲要話今個SHOW係搵一啲有心買貨客.我心諗,嘩,你擺成咁,想有客至奇呀!真係倒米.

公司就係呢個問題下,搞到銀根短缺,成日都遲出糧.老闆大前提係:你對公司有信心咪留係到囉,冇咪走囉.

我係到諗,呢間公司仲叫有冇前途呢?定係只係我自己睇唔過眼呢?其實我又唔係老闆,關我屁事咩.但我至少感覺唔到大家係有種團結感覺,想做好一件事真係好難.

離家出走

2006-05-02T02:11:00.000+08:00

記憶中識咁多朋友,好似冇乜邊幾個係唔想自己搬出嚟住,想有自己空間,最緊要係唔好受老媽子氣.甚至身邊有不少朋友係因為唔想同老豆老母一齊住,所以要拿拿聲去結婚搬出去住.

唔知點解,我對搬出去住嘅慾望唔係好大,正確啲講係就算結咗婚,我都想同阿爸阿媽住.我阿媽對住我呢份"孝心"嘅詮譯係"因為想搵人同你執頭執尾嗎!",佢就叫我結咗婚就要有咁遠住咁遠,唔好同佢住,隔離屋都唔好.

又或者可能我又唔係未試過搬出去住,試過係深圳東莞到工作,自己一個係深圳到住,果種味道,日日返到屋企望住四面牆,都唔知做乜,又唔睇電視...就算宜家每星期五日半係惠東宿舍到,我都係有種想返屋企對住阿媽嘅感覺.就算俾佢鬧下,都開心過係宿舍對住老闆,仲要俾佢捉你陪佢打麻雀.

阿媽最近學識用電腦,識得上網,又學埋倉頡,搞到我阿爸都要學埋一份.我同阿媽講得閒ICQ下我啦.我阿媽一句彈埋嚟:見到你仲嫌鬧唔夠呀?咁難得你唔係到仲要我係網上面鬧你呀!你都痴線!

或者我可能天生都係MOTHER BOY,都係走唔出阿媽嘅五指山.寧願俾阿媽鬧.

但我又唔係未試過想離家出走喎,亦都衰到試過寫埋信諗住話離家出走,同阿媽講話當生少個咁濟.不過最後又係冇成事.讀大專時亦都諗過自己搬出嚟住,最後又係冇錢唔成事.反而宜家唔係咁想搬出去住呢,就要一星期咁多日住宿舍.可能人就係咁賤格,要試過冇屋企人溫暖,先知到老豆老母好.

不過亦都有人話,要試下自己搬出去住,先會成長,先會知到憂柴憂米,驚冇錢供屋,驚冇錢交電費,咁先會識得慳.但我見通常都係越嚟越豪多過係會識慳,可能我識錯朋友掛.

呢半年係宿舍到瞓,每個晚上都係會瞓下醒下,半夢半醒.有時候瞓瞓下發夢,會以為自己係屋企,到打開雙眼時,突然望到眼前東西:"咦!!?我係邊到呀!?!",驚魂過後:"挑!咪宿舍囉!"覺得自己真係好掛住屋企張床.但係當我返到屋企瞓時,我又唔知點解,覺得瞓唔慣,覺得好似已經唔係自己熟識果張床,瞓完第日頸都痛埋.可能其實所謂果份掛住,只係習慣問題.就如屋企搬新屋初期,唔知點解出地鐵站會自動行去舊屋方向,行到去樓下先醒起:搬咗屋喇痴線仔!

勞工法例

2006-05-02T01:47:00.000+08:00

從我中學畢業開始,搵暑期工又好,長工又好,我一直都以為病假果日係有薪假期,只要有醫生紙,就可以有錢收返.但原來勞工法例係冇!要嚟放唔知四日以上有醫生紙,先有得攞返好似八十個巴仙人工.原來病假有錢收,係公司福利,唔係勞工法例,我都係上一兩個月先知.

另外,原來公司拖你一日人工唔俾,你都可以計佢利息,息口係年利率十點幾.至於即係每日幾多呢,我讀書數學成績差,唔識計,你計到話我知.我淨係知我之前係某大傳媒做,佢第一個月扼我話未出到CHEQUE下個月出俾我,原來我係可以追返佢利息!我唔知!蝕息!不過問題係,你試用期都未過,你夠唔夠膽同佢講:喂!你未計返息俾我喎呀會計小姐!

我諗講勞工法例,打工仔唔係去到生死存亡,要同老闆鬥一番果時,都唔會走去睇下.

秘密

2006-05-02T01:36:00.000+08:00

人總係有好多秘密.但所謂秘密,理論上都應該係得自己知,唔應該會俾第二個人知道,咁先稱得上係秘密.但係人類就係咁,如果自己有一個秘密,好多時都係好唔忍得住要同人分享,尤其係自己覺得好威果隻秘密.所以做賊好多時都係因為衰自己多口而衰收尾.我成日都係到諗,我收埋咁多秘密,到底邊一日會唔小心自己爆響口爆咗出嚟呢?發覺通常你同朋友講:"秘密嚟架!唔好同人講呀!",到最後都係唔知點解會從某個人口中聽返呢個秘密.可能大家都係覺得秘密係要嚟爆,唔爆俾人知唔好玩,又或者唔咁做點可以玩起某個人,話晒佢咁多秘密俾人爆.

反而有時覺得,秘咩密唧,咪講你知囉,不過講完你知唔好同人講,唔係因為秘密,係因為我唔鍾意話俾邊個邊個知,又或者係唔可以俾得呀邊個知.咁講完反而果件事真係可以守得密好多.可能因為唔同秘密,同你講得本死無大害,你咪爆囉.

所以話,秘密呢兩個字,只可以存在於文字中,我同你講秘密,果個就已經唔係秘密嚟.所以如果話睇個人BLOG係想睇秘密,講得出嚟就唔係秘咩密啦!唔通我會話你知我......咩咩咩咩!