CINECLUBE PADRE FEIJOO

‘Antichrist’

2009-11-03T12:33:00.003+01:00

Esta é a nota de prensa que acabamos de enviar aos medios.

‘ANTICHRIST’, NO CICLO DE ESTREAS EN VERSIÓN ORIXINAL

Mañá, 4 de novembro, o Cineclube Padre Feijoo e Cinebox Ourense presentan o filme Antichrist, dirixido polo danés Lars Von Trier, dentro do ciclo «Estreas en Versión Orixinal 7: Cinema de novembro». O filme obtivo o Premio á mellor actriz (a francesa Charlotte Gainsbourg) no último Festival de Cannes. Os pases serán ás 20.30 e 23.00 horas, no Cinebox Ourense (Centro Comercial Ponte Vella); as entradas serán de 4,00 euros (3,00 euros no caso de estudantes con carné universitario).
Para o ciclo cóntase co apoio da Concellería de Cultura do Concello de Ourense, así como da Federación de Cineclubes de Galicia, da Secretaría Xeral de Medios da Xunta de Galicia e da Vicerreitoría do Campus de Ourense.
Antichrist supón unha nova polémica na carreira do controvertido director Lars Von Trier (seus son os filmes Europa, Rompiendo las olas, Bailar en la oscuridad ou Dogville), que nesa ocasión afronta unha moi persoal baixada aos infernos a modo de thriller ou mesmo filme de terror. Conta como unha parella sumida na dor se retira a unha cabana perdida no medio do bosque coa esperanza de que o contacto coa natureza cure os seus corazóns rotos e o seu cambaleante matrimonio. Mais a natureza segue o seu curso e as cousas comeza a ir de mal en peor.
Xenio para uns, farsante para outros, o realizador que impulsou no seu día o chamado «Movemento Dogma» non deixa ninguén indiferente.

Cinema de novembro

2009-10-30T08:31:00.003+01:00

NOVO CICLO DE ESTREAS EN VERSIÓN ORIXINAL:
CINEMA DE NOVEMBRO

Durante o mes de novembro, o Cineclube Padre Feijoo e Cinebox Ourense proxectarán tres filmes dentro do seu novo ciclo «Estreas en Versión Orixinal 7: Cinema de novembro». Trátase de tres títulos de temáticas e procedencias moi diferentes, pero que dalgunha forma tratan da relación da vida coa morte e viceversa, unha temática moi propia do mes de novembro e as súas celebracións, como o samaín.
Como o propio nome do ciclo indica, son películas proxectadas en versión orixinal con subtítulos en castelán. Para o ciclo cóntase co apoio da Concellería de Cultura do Concello de Ourense, así como da Federación de Cineclubes de Galicia, da Secretaría Xeral de Medios da Xunta de Galicia e da Vicerreitoría do Campus de Ourense.
O primeiro dos filmes será proxectado o próximo mércores, día 4 de novembro; trátase de Antichrist, o novo e polémico filme do danés Lars Von Trier, gañador do Premio á mellor actriz no Festival de Cannes deste ano. O mércores 18, chegará ao ciclo Despedidas (Okuribito), do xaponés Yôjirô Takita, que obtivo o Oscar ao Mellor filme de fala non inglesa na última edición dos premios da Academia norteamericana. Para terminar, o mércores 25 proxectarase Control, un filme británico dirixido polo afamado fotógrafo Anton Corbijn, acerca de Ian Curtis, o mítico líder do grupo musical Joy Division; a película obtivo numerosos premios, entre os que destacan tres no Festival de Cannes de 2007.
Todas as proxeccións serán novamente no Cinebox Ourense, no Centro Comercial Ponte Vella, ao prezo habitual de 4 euros (reducidos a 3 euros con carné universitario).

Ciclo Estreas en Versión Orixinal 7
Cinema de novembro

4/11/09: Antichrist
18/11/09: Despedidas
25/11/09: Control

Ciclo Estreas en Versión Orixinal 7: Cinema de novembro
Novembro 2009
Cinebox Ourense
Entrada: 4 euros (3 euros con carné universitario)
Versión Orixinal Subtitulada

Co apoio de:
Concellería de Cultura – Concello de Ourense
Federación de Cineclubes de Galicia
Secretaría Xeral de Medios – Xunta de Galicia
Vicerreitoría do Campus de Ourense

• Mércores 4 de novembro de 2009 • Cinebox Ourense, 20.30 e 23 h
Antichrist
Antichrist. Dinamarca/Alemaña/Francia/Italia/Suecia/Polonia, 2009. Cor, Duración: 105 min • Dirección e guión: Lars Von Trier • Produción: Meta Louise Foldager (Zentropa Entertainment, Zentropa International Köln, Slot Machine, Liberator Productions, Arte France Cinéma, Memfis Film International, Trollhättan Film, Lucky Red) • Fotografía: Anthony Dod Mantle • Montaxe: Anders Refn • Intérpretes: Interpretación: Willem Dafoe, Charlotte Gainsbourg • Estrea en Dinamarca: 20/5/2009 • Estrea en España: 21/8/2009. Versión orixinal en inglés con subtítulos en castelán.

• Festival de Cannes 2009: Mellor actriz (Charlotte Gainsbourg)
• Festival de Toronto 2009: Sección oficial
• Festival de Nova York 2009: Sección oficial
• Festival de Chicago 2009: Sección oficial

Web oficial (español): http://www.golem.es/antichrist

Web oficial (inglés): http://www.antichristthemovie.com

Unha parella sumida na dor retírase a unha cabana perdida no medio do bosque coa esperanza de que o contacto coa natureza cure os seus corazóns rotos e o seu cambaleante matrimonio. Mais a natureza segue o seu curso e as cousas comeza a ir de mal en peor.

• Mércores 18 de novembro de 2009 • Cinebox Ourense, 20.30 e 23 h
Despedidas
Okuribito. Xapón, 2008. Cor, 131 min. Dirección: Yôjirô Takita • Produción: Toshiaki Nakazawa, Toshihisa Watai (ContentFilm International, Shochiku Company, Departures Film Partners) • Guión: Kundo Koyama • Fotografía: Takeshi Hamada • Montaxe: Akimasa Kawashima • Música: Joe Hisaishi • Interpretación: Masahiro Motoki (Daigo Kobayashi), Ryoko Hirosue (Mika Kobayashi), Tsutomu Yamazaki (Shouei Sasaki), Tetta Sugimoto, Kimiko Yo (Yuriko), Takashi Sasano (Shokichi), Kazuko Yoshiyuki (Tsuyako) • Estrea no Xapón: 13/9/2008 • Estrea en España: 3/7/2009. Versión orixinal en xaponés con subtítulos en castelán.

• Oscar 2009 ao mellor filme de fala non inglesa
• Premios do Cinema Asiático 2009: Mellor actor (Masahiro Motoki)
• Premios da Academia Xaponesa do Cinema 2009: Mellor actor (Masahiro Motoki), Mellor fotografía (Takeshi Hamada), Mellor director (Yôjirô Takita), Mellor montaxe (Akimasa Kawashima), Mellor filme, Mellor iluminación (Hitoshi Takaya), Mellor guión (Kundo Koyama), Mellor son (Satoshi Ozaki, Osamu Onodera), Mellor actor secundario (Tsutomu Yamazaki), Mellor actriz secundaria (Kimiko Yo)
• Festival Mundial de Montreal 2008: Gran Premio das Américas

Web oficial (español): http://www.golem.es/despedidas

Web oficial (inglés): http://www.departures-themovie.com

Daigo Kobayashi, violonchelista dunha orquestra que se acaba de disolver, acaba vagando polas rúas sen traballo e sen demasiada esperanza. Por iso, decide regresar á súa cidade natal en compañía da súa esposa. Alí consegue un emprego como enterrador: limpa os corpos, colócaos no seu ataúde e envíaos ao outro mundo da mellor forma posíbel. Aínda que a súa esposa e os seus veciños ven con desagrado este posto, Daigo descubrirá neste ritual de morte a chispa vital que lle faltaba á súa propia vida.

• Mércores 25 de novembro de 2009 • Cinebox Ourense, 20.30 e 23 h
Control
Control. Reino Unido, 2007. Branco e negro, 122 min. Dirección: Anton Corbijn • Produción: Orian Williams, Anton Corbijn, Todd Eckert (NorthSee, Becker Films International) • Guión: Matt Greenhalgh, segundo a novela autobiográfica ‘Touching from a distance’, de Deborah Curtis • Fotografía: Martin Ruhe • Montaxe: Andrew Hulme • Música: Joy Division, New Order • Intérpretes: Sam Riley (Ian Curtis), Samantha Morton (Deborah Curtis), Alexandra Maria Lara (Annik Honoré), Joe Anderson (Peter Hook), James Anthony Pearson (Bernard Sumner), Toby Kebbell (Rob Gretton), Craig Parkinson (Tony Wilson), Harry Treadaway (Stephen Morris), Richard Bremmer (Kevin) • Estrea no Reino Unido: 5/10/2007 • Estrea en España: 8 Abril 2009. Versión orixinal en inglés con subtítulos en castelán.

• Festival de Cannes 2007: Mención Especial Caméra d’Or, Premio Label Europa Cinemas, Premio Regards Jeune
• Premios BAFTA 2008: Premio Carl Foreman (Matt Greenhalgh)
• Festival de Bratislava 2007: Mellor actor (Sam Riley)
• Premios do Cinema Independente Británico 2007: Mellor filme independente, Mellor director, Mellor actor ou actriz secundario (Toby Kebbell), Mellor debutante: Sam Riley, Premio Douglas Hickox (Anton Corbijn)
• Festival de Chicago 2007: Mellor actor (Sam Riley), Mellor guión (Matt Greenhalgh)
• Festival de Edimburgo 2007: Mellor interpretación británica (Sam Riley), Mellor novo filme británico
• Festival de Hamburgo 2007: Premio da Crítica
• Festival de Melbourne 2007: Premio do Público

Web oficial (español): http://www.avalonproductions.es/control

Web oficial (inglés): http://www.controlthemovie.com

Un percorrido polos últimos anos de Ian Curtis, o enigmático cantante líder da banda Joy Division (icono do post-punk inglés), até chegar ao seu tráxico suicidio en 1980: o conflito entre o grande amor que sente pola súa esposa e unha apaixonada relación coa súa amante; os seus ataques de epilepsia, que cada vez o deixan máis deteriorado; o seu incríbel talento e as súas impresionantes actuacións en directo.

‘Vals con Bashir’, nas Xornadas de Banda Deseñada

2009-09-29T14:36:00.007+02:00

Dentro do programa das XXI Xornadas de Banda Deseñada de Ourense desenvólvese un ano máis a sección «Cinema e BD», dedicada á proxección en 35mm de filmes relacionados coa banda deseñada internacional, en estrea na cidade. Novamente, en colaboración co Cineclube Padre Feijoo e a Federación de Cineclubes de Galicia.
Así, nesta ocasión, o mércores 7 de outubro, ás 20.30 e 23 h proxectarase Vals con Bashir (Ari Folman, 2008). Trátase dun filme de animación sobre base documental, cuxo proxecto conta tamén cunha versión en cómic (asinada por Ari Folman e David Polonsky e editada en España por Salamandra). O filme Vals con Bashir foi presentado en Cannes 2008 e premiado no Festival de Xixón 2008; obtivo ademais o Globo de Ouro ao mellor filme de fala non inglesa e foi nomeado ao Oscar nesa mesma categoría.

As sesións serán no Cinebox Ourense (Centro Comercial Ponte Vella), con entrada única de 3 euros.

• Mércores 7 de outubro, 20.30 e 23 h: Vals con Bashir

Unha noite nun bar, un vello amigo conta ao director Ari que ten un pesadelo recorrente en que o perseguen 26 cans. Cada noite, o mesmo número de animais. Os dous homes chegan á conclusión de que ten que ver cunha misión que realizaron para o exército israelí durante a primeira guerra co Líbano a principios dos anos oitenta. Ari sorpréndese ante o feito de que non lembre nada dese período da súa vida. Intrigado, decide ver e falar con vellos amigos e antigos compañeiros dispersados polo mundo enteiro. Necesita saber a verdade acerca dese período e de si mesmo. Ari escarva cada vez máis e as súas lembranzas comezan a reaparecer mediante imaxes surrealistas...

Vals Im Bashir/Waltz with Bashir. Israel/Francia/Alemaña, 2008. Cor, 90 min. Dirección e guión: Ari Folman • Produción: Ari Folman, Yael Nahlieli, Serge Lalou, Gerhard Meixner, Roman Paul (Bridgit Folman Film Gang, Les Films d’Ici, Razor Film, Arte France) • Dirección artística: David Polonsky • Montaxe: Nili Feller • Música: Max Richter • Voces: Ori Sivan, Ronny Dayag, Shmuel Frenkel, Profesor Zahava Solomon, Ron Ben-Yishai, Dror Harazi, Miki Leon (Boaz Rein-Buskila), Yehezkel Lazarov (Carmi Cna’an) • Estrea en Israel: 12/6/2008; estrea en España: 20/2/2009. Versión orixinal en hebreo, alemán, inglés e árabe con subtítulos en castelán.
http://www.golem.es/valsconbashir/
http://www.waltzwithbashir.com/
Festival de Cannes 2008: Sección oficial
Festival de Xixón 2008: Mellor Longametraxe Xurado Novo
Globo de Ouro ao mellor filme de fala non inglesa
Nomeado ao Oscar ao mellor filme de fala non inglesa

Cinema ao Aire Libre

2009-08-10T12:42:00.002+02:00

O CINECLUBE PRESENTA TRES CICLOS DE CINEMA GALEGO AO AIRE LIBRE

O Cineclube Padre Feijoo programou para este verán tres ciclos de cinema galego, achegados pola Axencia Audiovisual Galega, dentro do seu programa «Cinemas Dixitais».
Os filmes serán proxectados ao aire libre, na praza de San Marcial (detrás do Museo Arqueolóxico Provincial de Ourense). En caso de existiren problemas climatolóxicos ou técnicos, as proxeccións realizaranse na Tetería-Bar Grándola, sita na mesma praza.
Os ciclos están organizados do seguinte xeito: a semana do 11 ao 14 de agosto, «Danza e vídeo experimental galego»; a semana do 18 ao 20 de agosto, «A guerra civil en Galicia»; e, por último, a semana do 25 ao 28 de agosto, «Curtas galegas en dúas dimensións».
Este é o calendario de proxeccións previstas:

11.08.2009 — Batea (1999), 22:00 h
12.08.2009 — Código (1988), 22:00 h
13.08.2009 — Danza na terra (2006), 22:00 h
14.08.2009 — Dous (2001), 22:00 h
14.08.2009 — Estiven en Galicia e lembreime de ti (2006), 20:00 h e 21:00
14.08.2009 — Katiuska (Os Corpos Agrícolas) (2006), 22:10 h
14.08.2009 — Tirapuxa (1996), 20:30 e 21:30 h
18.08.2009 — Alma esquecida (2006), 22:00 h
19.08.2009 — Cores (2007), 22:00 h
19.08.2009 — Ribadeo. 1936 (2007), 22:00 h
20.08.2009 — Minas (2003), 22:00 h
25.08.2009 — A flor máis grande do mundo (2006), 21:30 h
26.08.2009 — Alegrías de Puerta Tierra (1994), 21:30 h
26.08.2009 — Cuaderno de bitácora (1997), 21:34 h
27.08.2009 — Leo (2007), 21:30 h
28.08.2009 — Minotauromaquia (2004), 21:30 h

Para o mes de setembro, o Cineclube está a preparar unha semana sobre cinema documental.

‘La clase’

2009-04-28T11:16:00.004+02:00

Esta é a nota de prensa enviada hoxe aos medios (se queres recibir información sobre as actividades do Cineclube, únete ao grupo de correo en http://groups.google.es/group/cineclubepf)

‘LA CLASE’, PALMA DE OURO EN CANNES,
FINALIZA O CICLO DE ESTREAS EN VERSIÓN ORIXINAL

Mañá, mércores 29 de abril, o Cineclube Padre Feijoo e mais Cinebox Ourense presentan o filme francés La clase (Entre les murs), do director Laurent Cantet, que gañou a Palma de Ouro no Festival de Cannes de 2008. Os pases serán ás 20.30 e ás 23.00 horas, e terán lugar no Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario).
O filme está incluído no sexto ciclo «Estreas en Versión Orixinal», subtitulado nesta ocasión «Cinema actual». Para o ciclo cóntase coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.
La clase está baseado no libro homónimo —publicado por El Aleph en castelán e por Edicións Xerais en galego— de François Bégaudeau, que se interpreta a si mesmo na pantalla, co que, sendo un filme de ficción, mestura de forma maxistral o ton de documental.
O filme conta como François e os demais profesores se preparan para se enfrontar a un novo curso nun instituto situado nun barrio conflitivo. Cheos de boas intencións, desexosos de achegar a mellor educación aos seus alumnos, ármanse contra o desalento. Mais as culturas e as actitudes enfróntanse na aula, microcosmos da Francia contemporánea. A tremenda franqueza de François sorprende os seus alumnos, mais o seu estrito sentido da ética cambaléase cando os rapaces comezan a non aceptar os seus métodos.

‘Bienvenidos al Norte’

2009-04-21T12:20:00.005+02:00

Esta é a nota de prensa enviada hoxe aos medios (se queres recibir información sobre as actividades do Cineclube, únete ao grupo de correo en http://groups.google.es/group/cineclubepf)

‘BIENVENIDOS AL NORTE’, UN DOS GRANDES ÉXITOS EUROPEOS,
NO CICLO DE ESTREAS EN VERSIÓN ORIXINAL

Mañá, mércores 22 de abril, o Cineclube Padre Feijoo e mais Cinebox Ourense presentan o filme francés Bienvenidos al Norte (Bienvenue chez les Ch’tis), do director Dany Boon, unha comedia que constitúe un dos maiores éxitos cinematográficos das últimas temporadas en Francia e en media Europa. Os pases, que nesta ocasión serán excepcionalmente tres, ás 18.00, 20.30 e 23.00 horas, terán lugar no Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario).
O filme está incluído no sexto ciclo «Estreas en Versión Orixinal», subtitulado nesta ocasión «Cinema actual». Para o ciclo cóntase coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.
Bienvenidos al Norte conta a historia de Philippe Abrams, o encargado dunha oficina de correos na cidade de Salon-de-Provence, ao sur de Francia. Julie, a súa muller, padece episodios depresivos que converten a vida de Philippe nun verdadeiro inferno. Nun intento de animala, Philippe fai trampas para que o trasladen á Riviera francesa, mais é descuberto e enviado a unha pequena cidade no norte de Francia chamada Bergues. Os Abrams son o arquetipo da xente do sur que sente horror polo norte do país, un lugar inhóspito onde sempre vai frío, e que ten un dialecto arrevesado e incomprensíbel. Así que Philippe irá só ao seu destino.
Con este filme, o director Dany Boom pretende recuperar o cinema popular de calidade (el defíne Bienvenidos al Norte como «unha película popular de autor»), emulando grandes nomes da tradición fílmica francesa, como Jacques Tati.

‘Asfixia’

2009-04-14T12:43:00.007+02:00

Esta é a nota de prensa enviada hoxe aos medios (se queres recibir información sobre as actividades do Cineclube, únete ao grupo de correo en http://groups.google.es/group/cineclubepf)

‘ASFIXIA’, UNHA COMEDIA PROVOCATIVA
NO CICLO DE ESTREAS EN VERSIÓN ORIXINAL

Mañá, mércores 15 de abril, o Cineclube Padre Feijoo e mais Cinebox Ourense presentan o filme Asfixia (Choke), do director Clark Gregg, gañador do Premio Especial do Xurado en Sundance 2008. Os pases, ás 20.30 e 23.00 horas, terán lugar no Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario).
O filme está incluído no sexto ciclo «Estreas en Versión Orixinal», subtitulado nesta ocasión «Cinema actual». Para o ciclo cóntase coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.
Asfixia, baseada na novela homónima de Chuck Palahniuk, o polémico autor de obras como O club da loita (tamén levada ao cinema), foi definida pola crítica con frases como «comedia satírica-psicótica dunha mente luxuriosa», ou «groseira, irreverente, obscena, mais por riba de todo hilarante». O protagonista, Victor, dedícase a estafar a xente para sufragar o caro tratamento médico da súa nai. O seu traballo diario é representar o papel dun miserábel campesiño do século XVIII nun parque temático de carácter histórico, mentres está tratando de se recuperar da súa adicción ao sexo. Mais cando a súa nai, cada vez máis débil, insinúa poder revelar a identidade secreta do seu perdido pai, Victor recobra a esperanza de encontrar finalmente as respostas que estivo a buscar.
O Premio do Xurado no Festival de Sundance destacou o labor colectivo do equipo de actores do filme —en que, ademais de Sam Rockwell como protagonista, se conta con Anjelica Houston no papel da súa nai—. A película foi tamén escollida para inaugurar a edición de 2008 do Festival de Xixón, sempre caracterizado pola súa aposta polos filmes independentes máis innovadores.

‘Estômago’

2009-03-31T16:28:00.005+02:00

Esta é a nota de prensa enviada hoxe aos medios (se queres recibir información sobre as actividades do Cineclube, únete ao grupo de correo en http://groups.google.es/group/cineclubepf)

‘ESTÔMAGO’, CINEMA BRASILEIRO
NO CICLO DE ESTREAS EN VERSIÓN ORIXINAL

Mañá, mércores 1 de abril, o Cineclube Padre Feijoo e mais Cinebox Ourense presentan o filme Estômago, do brasileiro Marcos Jorge, gañador da Espiga de Ouro da Seminci de Valladolid 2008. Os pases, ás 20.30 e 23.00 horas, terán lugar no Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario).
O filme está incluído no sexto ciclo «Estreas en Versión Orixinal», subtitulado nesta ocasión «Cinema actual». Para o ciclo cóntase coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.
Estômago conta a historia dun home, Raimundo Nonato, que chega á gran cidade coa esperanza de conseguir unha vida que lle permita comer e cear cada día. Consegue traballo nun bar, e alí descobre o seu talento innato para a cociña e transforma o lugar nun local de éxito. Giovanni, dono dun coñecido restaurante italiano, intúe os dotes de cociñeiro de Nonato e contrátao como axudante de cociña. A vida de Nonato muda e comeza a se afirmar socialmente: unha casa, roupa, novas relacións e, sobre todo, o amor dunha muller, Íria, unha prostituta de bo apetito, coa cal estabelece unha ancestral relación de sexo en troco de comida.
O filme estivo na sección oficial do Festival de Berlín 2008, e conseguiu numerosos galardóns internacionais, como os do Festival de Rotterdam, os do de Punta del Este ou os do do Rio de Janeiro.

Estreas en V. O. 6: «Cinema actual»

2009-03-27T08:49:00.005+01:00

Esta é a nota de prensa enviada hoxe aos medios (se queres recibir información sobre as actividades do Cineclube, únete ao grupo de correo en http://groups.google.es/group/cineclubepf)

O CINECLUBE PADRE FEIJOO E MAIS CINEBOX OURENSE
PROXECTARÁN CATRO FILMES DE ESTREA EN ABRIL

A programación do ciclo «Estreas en Versión Orixinal» para o mes abril, que presentan o Cineclube Padre Feijoo e Cinebox Ourense, vén precedida do éxito do ciclo correspondente ao mes de marzo. Se a asistencia de público é sempre moi notábel nas sesións organizadas conxuntamente polas dúas entidades, a do ciclo «Aquí e agora» marcou un novo punto de referencia, ao ter atraído 634 espectadores (máis de 100 de media por cada sesión).
O novo ciclo para abril, titulado «Cinema actual», está composto por outros catro títulos non menos atractivos: tres comedias e un drama. En todos os casos, como é habitual, filmes que se proxectan en versión orixinal con subtítulos en castelán. Para o ciclo cóntase, máis unha vez, co apoio da Federación de Cineclubes de Galicia, da Dirección Xeral de Comunicación Audiovisual da Xunta de Galicia e da Vicerreitoría do Campus de Ourense.
O primeiro dos filmes, previsto para o mércores 1 de abril, é o filme brasileiro Estômago, de Marcos Jorge, gañador de multitude de premios, entre os que están catro na Seminci de Valladolid 2008, incluído o máximo galardón, a Espiga de Ouro. O segundo será proxectado o 15 de abril: Asfixia (Choke), adaptación da novela do sempre polémico Chuck Palahniuk —o autor de O club da loita, tamén levada ao cinema—, dirixida neste caso por Clark Gregg; o filme conseguiu o Premio especial do xurado no Festival de Sundance 2008. O terceiro título, que se proxectará o 22 de abril, é Bienvenidos al Norte (Bienvenue chez les Ch’tis), de Dany Boon, o último grande éxito do cinema europeo, que recupera con acerto o cinema popular francés de nomes como Jacques Tati. Pechará o ciclo, o 29 de abril, o filme La clase (Entre les murs), dirixido polo prestixioso Laurent Cantet e gañador da Palma de Ouro en Cannes 2008.
Unha nova oportunidade, en fin, de gozar co cinema máis prestixioso en pantalla grande e en versión orixinal.

Ciclo Estreas en Versión Orixinal 6
Cinema actual

01-04-09 Estômago
15-04-09 Asfixia
22-04-09 Bienvenidos al Norte
29-04-09 La clase

Ciclo Estreas en Versión Orixinal 6: Cinema actual
Abril 2009
Cinebox Ourense
Entrada: 4 euros (3 euros con carné universitario)
Versión Orixinal Subtitulada

Co apoio de:
Federación de Cineclubes de Galicia
Dirección Xeral de Comunicación Audiovisual – Xunta de Galicia
Vicerreitoría do Campus de Ourense

• Mércores 1 de abril de 2009 • Cinebox Ourense, 20.30 e 23 h
Estômago
Estômago. Brasil/Italia, 2007. Cor, 112 min. Dirección: Marcos Jorge • Produción: Cláudia da Natividade, Fabrizio Donvito, Marco Cohen, Gabriele Muccino (Zencrane Filmes, Indiana Production Company) • Guión: Lusa Silvestre, Marcos Jorge, Cláudia da Natividade, Fabrizio Donvito, segundo un argumento de Lusa Silvestre e Marcos Jorge • Fotografía: Toca Seabra • Montaxe: Luca Alverdi • Música: Giovanni Venosta • Intérpretes: João Miguel (Raimundo Nonato), Fabiula Nascimento (Íria), Carlo Briani (Giovanni), Babu Santana (Bujiú), Zeca Cenovicz (Zulmiro), Paulo Miklos (Etcétera), Jean Pierre Noher (Duque), Alexander Sil (Lino), Marcel Szymanski (Valtão), Syd Correa (Boquenga), Rodrigo Ferrarini (Magrão) • Estrea no Brasil: 11/4/2008 • Estrea en España: 19 /12/2008. Versión orixinal en portugués con subtítulos en castelán.

• Festival Internacional do Rio de Janeiro 2007: Premio do público ao mellor filme, Premio Première Brasil ao mellor actor (João Miguel), Premio Première Brasil ao mellor director, Premio Especial do Xurado (Babu Santana)
• Festival de Cinema Latinoamericano de Biarritz 2008: Premio especial do xurado
• Premios Contigo Cinema 2008: Premio á mellor actriz secundaria (Fabiula Nascimento)
• Festival de Raindance 2008: Mellor longametraxe internacional
• Festival Internacional do Uruguai 2008: Mellor filme latinoamericano
• Festival de Punta del Este 2008: Mellor filme, Mención especial ao mellor actor (João Miguel)
• Festival de Berlín 2008: sección oficial
• Festival de Rotterdam 2008: Lions Award
• Seminci de Valladolid 2008: Espiga de Ouro ao mellor filme, Mellor novo director, Mellor actor (João Miguel), Premio da xuventude

Web oficial (portugués): http://www.estomagoofilme.com.br/

Raimundo Nonato chega á gran cidade coa esperanza de conseguir unha vida que lle permita comer e cear cada día. Consegue traballo nun bar, e alí descobre o seu talento innato para a cociña e transforma o lugar nun local de éxito. Giovanni, dono dun coñecido restaurante italiano, intúe os dotes de cociñeiro de Nonato e contrátao como axudante de cociña. A vida de Nonato muda e comeza a se afirmar socialmente: unha casa, roupa, novas relacións e, sobre todo, o amor dunha muller, Íria, unha prostituta de bo apetito, coa cal estabelece unha ancestral relación de sexo en troco de comida.

• Mércores 15 de abril de 2009 • Cinebox Ourense, 20.30 e 23 h
Asfixia
Choke. EUA, 2008. Cor, 92 min • Dirección: Clark Gregg • Produción: Beau Flynn, Tripp Vinson, Johnathan Dorfman, Temple Fennell (ATO Pictures, Aramid Entertainment Fund, Choke Film, Contrafilm) • Guión: Clark Gregg, segundo a novela de Chuck Palahniuk • Fotografía: Tim Orr • Montaxe: Joe Klotz • Música: Nathan Larson • Intérpretes: Sam Rockwell (Victor Mancini), Anjelica Huston (Ida Mancini), Kelly Macdonald (Paige), Brad William Henke (Denny), Jonah Bobo (Victor Mancini mozo), Bijou Phillips (Ursula), Gillian Jacobs (Cherry/Beth), Clark Gregg (lord High Charlie) • Estrea en EUA: 26/9/2008 • Estrea en España: 21/1/2008. Versión orixinal en inglés con subtítulos en castelán.

• Festival de Sundance 2008: Premio especial do xurado ao reparto (Sam Rockwell, Anjelica Huston, Kelly Macdonald, Brad William Henke)
• Festival de Xixón 2008: sesión inaugural

Web oficial (español): www.asfixialapelicula.es
Web oficial (inglés): www.foxsearchlight.com/choke

Victor dedícase a estafar a xente para sufragar o caro tratamento médico da súa nai. O seu traballo diario é representar o papel dun miserábel campesiño do século XVIII nun parque temático de carácter histórico, mentres está tratando de se recuperar da súa adicción ao sexo. Mais cando a súa nai, cada vez máis débil, insinúa poder revelar a identidade secreta do seu perdido pai, Victor recobra a esperanza de encontrar finalmente as respostas que estivo a buscar.

• Mércores 22 de abril de 2009 • Cinebox Ourense, 18, 20.30 e 23 h (tripla sesión)
Bienvenidos al norte
Bienvenue chez les Ch’tis. Francia, 2008. Cor, 106 min • Dirección: Dany Boon • Produción: Claude Berri, Jérôme Seydoux (Hirsch, Pathé, TF1 Films Production, Les Productions du Ch'timi, CRRAV Nord-Pas de Calais) • Guión: Dany Boon, Alexandre Charlot, Franck Magnier, segundo un argumento de Dany Boon • Fotografía: Pierre Aïm • Montaxe: Luc Barnier, Julie Delord • Música: Philippe Rombi • Intérpretes: Kad Merad (Philippe Abrams), Dany Boon (Antoine Bailleul), Zoé Félix (Julie Abrams), Anne Marivin (Annabelle Deconninck), Philippe Duquesne (Fabrice Canoli), Guy Lecluyse (Yann Vandernoout), Zinedine Soualem (Momo), Jérôme Commandeur (inspector Lebic), Stéphane Freiss (Jean), Line Renaud (Sra. Bailleul), Michel Galabru • Estrea en Francia: 27/2/2008 • Estrea en España: 9/1/2009 • Versión orixinal en francés con subtítulos en castelán.

• Premios César: nomeado ao mellor guión orixinal
• Premios do Cinema Europeo: nomeado ao premio do público

Web oficial (francés): http://www.chtinn.com/

Philippe Abrams é o encargado dunha oficina de correos na preciosa cidade de Salon-de-Provence, ao sur de Francia. Julie, a súa muller, padece episodios depresivos que converten a vida de Philippe nun verdadeiro inferno. Nun intento de animala, Philippe fai trampas para que o trasladen á Riviera francesa, mais é descuberto e enviado a unha pequena cidade no norte de Francia chamada Bergues. Os Abrams son o arquetipo da xente do sur que sente horror polo norte do país, un lugar inhóspito onde sempre vai frío, e que ten un dialecto arrevesado e incomprensíbel. Así que Philippe irá só ao seu destino.

• Mércores 29 de abril de 2009 • Cinebox Ourense, 20.30 e 23 h
La clase
Entre les murs. Francia, 2008. Cor, 128 min • Dirección: Laurent Cantet • Produción: Carole Scotta, Caroline Benjo, Barbara Letellier, Simon Arnal (Haut Et Court, France 2 Cinéma) •
Guión: Laurent Cantet, François Bégaudeau, Robin Campillo, segundo a novela de François Bégaudeau • Fotografía: Pierre Milon, Catherine Pujol, Georgi Lazarevski • Montaxe: Robin Campillo, Stéphanie Léger • Intérpretes: François Bégaudeau (François), Vincent Caire (Vincent), Olivier Dupeyron (Olivier), Patrick Dureuil (Patrick), Frédéric Faujas (Fred), Laura Baquela (Laura), Juliette Demaille (Juliette), Dalla Doucoure (Dalla), Esméralda Ouertani (Sandra), Franck Keïta (Souleymane), Wei Huang (Wei) • Estrea en Francia: 24/9/2008 • Estrea en España: 16/1/2009. Versión orixinal en francés con subtítulos en castelán.

• Festival de Cannes 2008: Palma de Ouro
• Festival de San Sebastián 2008: Sección Zabaltegi
• Oscars 2009: Nomeado como Mellor filme de fala non inglesa
• Premios Independent Spirit 2009: Mellor filme estranxeiro
• Premios Image 2009: Mellor filme estranxeiro
• Premios César 2009: Mellor guión adaptado
• Premios Lumière 2009: Mellor filme, Premio do público internacional

Web oficial (francés): http://entrelesmurs-lefilm.fr/site/
Web oficial (español): http://www.golem.es/laclase

François e os demais profesores prepáranse para se enfrontar a un novo curso nun instituto situado nun barrio conflitivo. Cheos de boas intencións, desexosos de achegar a mellor educación aos seus alumnos, ármanse contra o desalento. Mais as culturas e as actitudes enfróntanse na aula, microcosmos da Francia contemporánea. A tremenda franqueza de François sorprende os seus alumnos, mais o seu estrito sentido da ética cambaléase cando os rapaces comezan a non aceptar os seus métodos.

‘Los limoneros’

2009-03-24T09:25:00.003+01:00

Esta é a nota de prensa enviada hoxe aos medios (se queres recibir información sobre as actividades do Cineclube, únete ao grupo de correo en http://groups.google.es/group/cineclubepf)

‘LOS LIMONEROS’, NO CICLO DE ESTREAS EN VERSIÓN ORIXINAL

Mañá, mércores 25 de marzo, o Cineclube Padre Feijoo e mais Cinebox Ourense presentan o filme israelí Los limoneros (Etz limon), de Eran Riklis, gañador do Premio do Público no Festival de Berlín 2008. Os pases, ás 20.30 e 23.00 horas, terán lugar no Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario).
O filme está incluído no quinto ciclo «Estreas en Versión Orixinal», subtitulado nesta ocasión «Aquí e agora». Para o ciclo cóntase coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.
Película israelí crítica coa política do seu propio país, Los limoneros conta como Salma, unha viúva palestina, decide librar unha batalla contra o ministro de Defensa de Israel, cuxa casa linda co seu campo de limoeiros, na fronteira entre Israel e os Territorios Ocupados. A policía non tarda en decretar que as árbores de Salma representan unha auténtica ameaza para o ministro de Defensa e a súa familia, e ordena que se corten. Mais Salma decide loitar para salvar as súas árbores e a súa vida.
O diario Le Monde dicía ao respecto deste filme: «O director Eran Riklis realiza unha reflexión política e dá unha lección de humanismo a partir dunha ilustración metafórica da difícil convivencia entre israelís e palestinos».
Con este filme conclúe o quinto ciclo de Estreas en Versión Orixinal, mais a próxima semana comezará o ciclo número seis, coa película brasileira Estômago.

‘Gomorra’

2009-03-09T17:40:00.002+01:00

Esta é a nota de prensa enviada hoxe aos medios (se queres recibir información sobre as actividades do Cineclube, únete ao grupo de correo en http://groups.google.es/group/cineclubepf)

‘GOMORRA’ NO CICLO DE ESTREAS EN VERSIÓN ORIXINAL

Este mércores, 11 de marzo, o Cineclube Padre Feijoo e mais Cinebox Ourense presentan o filme Gomorra, de Matteo Garrone, gañador do Gran Premio do Festival de Cannes 2008. Os pases, ás 20.30 e 23.00 horas, terán lugar no Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario).
O filme está incluído no quinto ciclo «Estreas en Versión Orixinal», subtitulado nesta ocasión «Aquí e agora». Para o ciclo cóntase coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.
Gomorra está baseado na novela homónima de Roberto Saviano (que colaborou tamén no seu guión), e pon ao descuberto como funciona a Camorra nas provincias de Nápoles e Caserta; as normas desta organización afectan, dunha ou outra forma, a case todos os seus habitantes. O filme conta cinco historias que se entrecruzan nesta paisaxe violenta, neste mundo desapiadado, aparentemente afastado da realidade, mais ben enraizado nesa terra. Pola súa novela e o filme, Roberto Saviano vive ameazado de morte, e baixo protección policial.
A película emprega como secundarios moitos actores non profesionais sacados realmente dos ambientes que retrata (até o punto de teren sido tres deles detidos con posterioridade pola súa relación coas actividades mafiosas). Gomorra foi a gran gañadora dos Premios do Cinema Europeo 2008 (6 premios, entre os cales están o de mellor filme e mellor director), e foi nomeada para os Globos de Ouro como mellor filme estranxeiro.

‘Camino’

2009-03-03T12:10:00.004+01:00

Esta é a nota de prensa enviada hoxe aos medios (se queres recibir información sobre as actividades do Cineclube, únete ao grupo de correo en http://groups.google.es/group/cineclubepf)

‘CAMINO’ ABRE O NOVO CICLO DE ESTREAS

Mañá, mércores 4 de marzo, o Cineclube Padre Feijoo e mais Cinebox Ourense presentan o filme Camino, de Javier Fesser, gañador de 6 Premios Goya 2009. Os pases, ás 20.30 e 23.00 horas, terán lugar no Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario).
Con este filme comeza o quinto ciclo «Estreas en Versión Orixinal», subtitulado nesta ocasión «Aquí e agora». Para o ciclo cóntase coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.
A historia de Camino está ambientada en Pamplona, en 2001. Camino é unha nena de once anos, que vive os seus derradeiros momentos no cuarto dun hospital. Rodeada de familiares, amigos, sacerdotes e un número inusitado de persoal clínico, dá a todos un exemplo de morte serena e feliz. Nunha atmosfera de santidade, e cando parece que a morte é xa inevitábel, ocorre algo extraordinario no cuarto.
O filme está inspirado en feitos reais, e defínese como «unha aventura emocional en torno a una extraordinaria nena que se enfronta ao mesmo tempo a dous acontecementos que son completamente novos para ela: namorarse e morrer».
Segundo o director, o xermolo do filme foi o coñecemento dun feito real, e «o que comezou sendo un exhaustivo labor de documentación sobre moitos outros casos de “olor de santidade” e sobre o verdadeiro modo de operar do Opus Dei, acabou sendo un apaixonante traballo de investigación en torno aos sentimentos íntimos das persoas». A pesar da polémica causada pola película, Fesser afirma que «nada máis lonxe da intención do filme que marcar un camiño, sinalar a ninguén, ou decidir quen está no certo e quen non».
Camino participou na sección oficial do Festival de San Sebastián 2008, e obtivo tamén diversos dos premios José María Forqué, Sant Jordi e Gaudí.

Estreas en V. O. 5: «Aquí e agora»

2009-02-20T12:20:00.008+01:00

Esta é a nota de prensa enviada hoxe ao medios (se queres recibir información sobre as actividades do Cineclube, únete ao grupo de correo en http://groups.google.es/group/cineclubepf)

O CINECLUBE PADRE FEIJOO E CINEBOX OURENSE PRESENTAN
NOVOS FILMES DE ESTREA PARA MARZO E ABRIL

Durante os meses de marzo e abril, o Cineclube Padre Feijoo e Cinebox Ourense proxectarán dous novos ciclos da serie «Estreas en Versión Orixinal». O primeiro deles, correspondente a marzo, recibe o subtítulo de «Aquí e agora», pola actualidade temática dos filmes que o compoñen.
Trátase de tres películas precedidas de premios e unha certa polémica. En todos os casos, son filmes que se proxectan en versión orixinal con subtítulos en castelán, excepto o primeiro deles, que ten como versión orixinal precisamente a española. Para o ciclo cóntase novamente co apoio da Federación de Cineclubes de Galicia, da Dirección Xeral de Comunicación Audiovisual da Xunta de Galicia e da Vicerreitoría do Campus de Ourense.
O primeiro dos filmes, previsto para o mércores 4 de marzo, é Camino, de Javier Fesser, gañadora de seis premios Goya 2009, incluídos os de Mellor filme, Mellor director e Mellor guión orixinal. O segundo, para o 11 de marzo, será Gomorra, adaptación do libro homónimo de Roberto Saviano sobre a camorra napolitana, que dirixiu Matteo Garrone e que conseguiu o Gran Premio do Festival de Cannes 2008. O terceiro título, que se proxectará o 25 de marzo, é Los limoneros (Etz limon), un filme moi crítico coa política israelí no conflito dos Territorios Ocupados, e que obtivo o Premio do Público da sección Panorama do Festival de Berlín 2008.
En breve comunicaremos tamén o programa de proxeccións previsto para o mes de abril; de momento, podemos adiantar que están confirmados os títulos Estômago, filme brasileiro gañador da Espiga de Ouro da Seminici de Valladolid, e La clase (Entre les murs), Palma de Ouro no Festival de Cannes.

Ciclo Estreas en Versión Orixinal 5: Aquí e agora
Marzo 2009
Cinebox Ourense
Entrada: 4 euros (3 euros con carné universitario)
Versión Orixinal Subtitulada

Co apoio de:
Federación de Cineclubes de Galicia
Dirección Xeral de Comunicación Audiovisual – Xunta de Galicia
Vicerreitoría do Campus de Ourense

• Mércores, 4 de marzo de 2009 • Cinebox Ourense, 20.30 e 23 h
Camino
Camino. España, 2008. Cor, 143 min • Dirección e guión: Javier Fesser • Produción: Luis Manso, Jaume Roures (Películas Pendelton, Mediapro) • Fotografía: Alex Catalán • Montaxe: Javier Fesser • Música: Rafa Arnau, Mario Gosálvez • Intérpretes: Nerea Camacho (Camino), Carmen Elías (Gloria), Mariano Venancio (José), Manuela Vellés (Nuria), Ana Gracia (Inés), Lola Casamayor (tía Marita), Lucas Manzano (Cuco), Pepe Ocio (don Miguel Ángel), Claudia Ortero (Begoña), Jordi Dauder (don Luis), Emilio Gavira (Mr. Meebles), Miriam Raya (Elena) • Estrea en España: 17/10/2008. Versión orixinal en castelán.
• Festival de San Sebastián 2008: sección oficial
• Premios José María Forqué 2008: Mellor filme
• Premios Sant Jordi 2008: Mellor filme español, Mellor actriz española (Carme Elías)
• Premios Gaudí 2008: Mellor filme europeo
• Premios Goya 2009: Mellor filme, Mellor director, Mellor actriz (Carme Elías), Mellor actor de reparto (Jordi Dauder), Mellor actriz revelación (Nerea Camacho), Mellor guión orixinal

Web oficial: http://www.caminolapelicula.com

Pamplona, xuño de 2001. Camino, unha nena de once anos, vive os seus derradeiros momentos no cuarto dun hospital. Rodeada de familiares, amigos, sacerdotes e un número inusitado de persoal clínico, dá a todos un exemplo de morte serena e feliz. Nunha atmosfera de santidade, e cando parece que a morte é xa inevitábel, ocorre algo extraordinario no cuarto. Inspirado en feitos reais, o filme é unha aventura emocional en torno a una extraordinaria nena que se enfronta ao mesmo tempo a dous acontecementos que son completamente novos para ela: namorarse e morrer.

• Mércores, 11 de marzo de 2009 • Cinebox Ourense, 20.30 e 23 h
Gomorra
Gomorra. Italia, 2008. Cor, 135 min • Dirección: Matteo Garrone • Produción: Domenico Procacci (Fandango, Rai Cinema) •Guión: Maurizio Braucci, Ugo Chiti, Gianni Di Gregorio, Matteo Garrone, Massimo Gaudioso, Roberto Saviano, segundo a novela de Roberto Saviano • Fotografía: Marco Onorato • Montaxe: Marco Spoletini • Intérpretes: Toni Servillo (Franco), Gianfelice Imparato (Don Ciro), Maria Nazionale (Maria), Salvatore Cantalupo (Pasquale), Gigio Morra (Iavarone), Salvatore Abruzzese (Totò), Marco Macor (Marco), Ciro Petrone (Ciro), Carmine Paternoster (Roberto), Zhang Ronghua (Xian), Simone Sacchettino (Simone) • Estrea en Italia: 16/5/2008 • Estrea en España: 14/11/2008 • Versión orixinal en italiano con subtítulos en castelán.

• Festival de Cannes 2008: Gran Premio do Festival
• Festival de Chicago 2008: Hugo de Prata ao mellor guión
• Premios do Cinema Europeo 2008: Mellor actor (Toni Servillo), Mellor fotografía, Mellor director, Mellor filme, Mellor guión
• Globos de Ouro 2008: Nomeado como mellor filme estranxeiro
• Festival de Múnic 2008: Premio Arri-Zeiss
• Premios Satellite 2008: Mellor filme de lingua non inglesa

Web oficial (italiano): http://www.mymovies.it/gomorra

Poder, odio e sangue. Estes son os «valores» a que teñen que se enfrontar cada día os habitantes das provincias de Nápoles e Caserta. Case nunca se pode escoller, case sempre se está obrigado a obedecer as regras da Camorra, e só os máis afortunados poden pensar en levar unha vida «normal». Cinco historias entrecrúzanse nesta paisaxe violenta, un mundo desapiadado, aparentemente afastado da realidade, mais ben enraizado nesa terra.

• Mércores, 25 de marzo de 2009 • Cinebox Ourense, 20.30 e 23 h
Los limoneros
Etz limon. Israel/Alemaña/Francia, 2008. Cor, 106 min • Dirección: Eran Riklis • Produción: Bettina Brokemper, Antoine de Clermont-Tonnerre, Michael Eckelt, Eran Riklis (Eran Riklis Productions, MACT Productions, Riva Film, Heimatfilm) • Guión: Suha Arraf, Eran Riklis • Fotografía: Rainer Klausmann • Montaxe: Tova Ascher • Música: Habib Shehadeh Hanna • Interpretación: Hiam Abbass (Salma Zidane), Ali Suliman (Ziad Daud), Doron Tavory (Navon), Rona Lipaz Michael (Mira Navon), Tarik Copti (Abu Hussam), Amos Lavie (capitán Jacob), Amnon Wolf (Leibowitz), Smadar Yaaron (Tamar Gera), Ayelet Robinson (Shelly) • Estrea en Israel: 27/3/2008 • Estrea en España: 3/10/2008 • Versión orixinal en árabe, hebreo, francés e inglés con subtítulos en castelán.

• Festival de San Sebastián 2008: Sección oficial
• Festival de Berlín 2008: Premio do Público (Sección Panorama)
• Premios da Academia Israelí do Cinema: Mellor actriz (Hiam Abbass)

• Web oficial (hebreo e inglés): http://www.lemontreemovie.com/

• Web oficial (español): http://www.golem.es/loslimoneros

Salma, unha viúva palestina, decide librar unha batalla contra o ministro de Defensa de Israel, cuxa casa linda co seu campo de limoeiros, na fronteira entre Israel e os Territorios Ocupados. A policía non tarda en decretar que as árbores de Salma representan unha auténtica ameaza para o ministro de Defensa e a súa familia, e ordena que se corten. Mais Salma decide loitar para salvar as súas árbores e a súa vida.

Proxección especial de ‘A fala do cacique’

2009-01-09T09:48:00.004+01:00

Estrea de ‘A fala do cacique’

O próximo martes, 13 de xaneiro de 2009, en única sesión ás 20:30 h, no salón de actos da Biblioteca Pública (rúa Concello, 11, Ourense), proxectarase o filme documental A fala do cacique (Brasil-Alemaña, 2007), de Márcia Gomes de Oliveira Suchanek e Norbert Gregor Suchanek, autores de diversos documentais. Ambos estarán na sesión para presentar o filme e falar co público.

A fala do cacique expón a situación dun dos pobos indíxenas do Brasil, os guarani mbyá. Tradicionalmente nómades, viven na rexión da Mata Atlântica. Nos últimos 30 anos, o Goberno brasileiro construíu dúas centrais nucleares (Angra 1 e Angra 2) no seu territorio, ao sur do Rio de Janeiro, sen comunicárllelo aos guarani mbyá. Actualmente, no ano 2008, o Goberno está a construír outra central nuclear (Angra 3) neste mesmo lugar. Este documental mostra a aldea guarani mbyá, chamada Sapukai, situada preto das centrais nucleares brasileiras. O cerne do filme é a fala precisa do cacique guarani mbyá Verá Mirim, de 94 anos, sobre a súa aldea, sobre a ecoloxía e sobre a enerxía nuclear. A intención deste documental é dar voz aos pobos indíxenas esquecidos do Brasil.

A actividade esta organizada por Amarante e Verdegaia, coa colaboración do Cineclube Padre Feijoo.

‘Garage’

2008-12-16T09:58:00.002+01:00

Esta é a nota de prensa enviada hoxe ao medios (se queres recibir información sobre as actividades do Cineclube, únete ao grupo de correo en http://groups.google.es/group/cineclubepf)

‘GARAGE’, A NOVA SORPRESA DO CINEMA IRLANDÉS,
PON FIN AO CICLO DE ESTREAS EN VERSIÓN ORIXINAL

Mañá, mércores 17 de decembro, o Cineclube Padre Feijoo e mais Cinebox Ourense presentan o filme Garage, do irlandés Lenny Abrahamson, que obtivo o Premio CICAE na Quincena dos Realizadores do Festival de Cannes de 2007. Os pases, ás 20.30 e 23.00 horas, terán lugar no Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario).
O filme é o derradeiro do cuarto ciclo «Estreas en Versión Orixinal», subtitulado nesta ocasión «Da comedia ao drama». Para o ciclo cóntase coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.
Garage conta a historia de Josie, un home que leva toda a vida traballando como encargado dunha ruinosa gasolineira no medio oeste irlandés. É introvertido e solitario, bastante optimista e, dunha maneira rara, feliz. Mais, de repente, a chegada de David á gasolineira traerá unha serie de mudanzas á súa até agora tranquila e monótona vida. O filme segue a optimista viaxe de Josie en busca do amor, e da aprobación dos demais.
Garage é a segunda colaboración entre o director Lenny Abrahamson e o guionista Mark O’Halloran, creadores en 2004 da multipremiada comedia negra Adam & Paul. Trátase, segundo os seus autores, dunha «traxicomedia asombrosa e hipnótica», cuxo estilo se podería definir como «pequeno slapstick» ou «slapstick tráxico». A película conseguiu media ducia de importantes premios internacionais, e catro dos Premios do Cinema e a Televisión Irlandeses (IFTA): mellor actor, mellor director, mellor guión e mellor filme.

‘Tropa de elite’

2008-12-09T13:41:00.002+01:00

Esta é a nota de prensa enviada hoxe ao medios (se queres recibir información sobre as actividades do Cineclube, únete ao grupo de correo en http://groups.google.es/group/cineclubepf

‘TROPA DE ELITE’: O BRASIL MÁIS CONFLITIVO
NO CICLO DE ESTREAS EN VERSIÓN ORIXINAL

Mañá, mércores 10 de decembro, o Cineclube Padre Feijoo e mais Cinebox Ourense presentan o filme Tropa de Elite, do brasileiro José Padilha, que obtivo o Oso de Ouro no Festival de Berlín 2008. Os pases, ás 20.30 e 23.00 horas, terán lugar no Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario).
Prosegue deste xeito o cuarto ciclo «Estreas en Versión Orixinal», subtitulado nesta ocasión «Da comedia ao drama». Para o ciclo cóntase coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.
Tropa de Elite está ambientada no Rio de Janeiro en 1997. Conta como a Nascimento, capitán do BOPE (Batalhão de Operações Policiais Especiais), a tropa de elite da Policía do Rio, lle é asignado o mando dun dos grupos que teñen a misión de «pacificar» as favelas do ‘morro’ de Turano, debido á visita de Xoán Paulo II, quen vai instalarse nunha zona próxima. O capitán, baixo unha presión constante, comeza a notar os efectos do estrés. Ten que executar as ordes recibidas, en canto tenta encontrar un substituto, xa que a súa muller está nos seus últimos días de embarazo e lle pide constantemente que abandone a primeira liña do Batalhão.
Proxecto nacido inicialmente como documental, Tropa de Elite conta no formato de ficción como actúa en realidade a policía brasileira na loita contra as bandas de delincuentes que pululan polas favelas. O filme, ademais de numerosos premios, como os «BR» do cinema brasileiro, obtivo o Oso de Ouro do Festival de Berlín, nunha edición en que o xurado estivo presidido por Costa-Gavras, o que pon o acento na súa condición de filme político e de denuncia.

‘Honeydripper Blues Bar’

2008-12-02T10:26:00.003+01:00

Esta é a nota de prensa enviada hoxe ao medios (se queres recibir información sobre as actividades do Cineclube, únete ao grupo de correo en http://groups.google.es/group/cineclubepf

‘HONEYDRIPPER BLUES BAR’: CINEMA E MÚSICA
NO CICLO DE ESTREAS EN VERSIÓN ORIXINAL

Mañá, mércores 3 de decembro, o Cineclube Padre Feijoo e mais Cinebox Ourense presentan o filme Honeydripper Blues Bar (Honeydripper), do norteamericano John Sayles, que obtivo o Premio ao mellor guión no Festival de San Sebastián 2007. Os pases, ás 20.30 e 23.00 horas, terán lugar no Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario).
Continúa así o cuarto ciclo «Estreas en Versión Orixinal», subtitulado nesta ocasión «Da comedia ao drama». Para o ciclo cóntase coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.
Honeydripper Blues Bar conta unha historia ambientada na Alabama rural de 1950. Tyrone, pianista e dono dun pequeno bar, espera salvar o seu local da ruína contratando o máis famoso guitarrista de blues do momento, Guitar Sam. Cando chega o día da actuación, o músico non aparece no tren en que debía chegar. Tyrone terá que buscar unha solución para non perder a grande oportunidade de mudar a súa sorte.
John Sayles, o realizador de Casa de los babys ou Lone Star, dirixe esta película interpretada por Danny Glover no papel protagonista. A crítica ten escrito dela que é «un conto melancólico e vibrante, tan contaxioso e infalíbel como os tres acordes do rock and roll» (Ricardo Aldarondo, Fotogramas) e unha «cálida homenaxe ao blues rural» (Ángel S. Harguindey, El País).

‘Yo serví al rey de Inglaterra’

2008-11-25T10:12:00.003+01:00

Esta é a nota de prensa enviada hoxe ao medios (se queres recibir información sobre as actividades do Cineclube, únete ao grupo de correo en http://groups.google.es/group/cineclubepf)

‘YO SERVÍ AL REY DE INGLATERRA’ ABRE O
CUARTO CICLO DE ESTREAS EN VERSIÓN ORIXINAL

Mañá, mércores 26 de novembro, o Cineclube Padre Feijoo e mais Cinebox Ourense presentan o filme Yo serví al rey de Inglaterra (Obsluhoval jsem anglického krále), do checo Jirí Menzel, que obtivo o Premio da Crítica Internacional no Festival de Berlín en 2007. Os pases, ás 20.30 e 23.00 horas, terán lugar no Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario).
Con este filme comeza o cuarto ciclo «Estreas en Versión Orixinal», subtitulado nesta ocasión «Da comedia ao drama». Para o ciclo cóntase coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.
Yo serví al rey de Inglaterra conta a historia dun camareiro provinciano moi ambicioso, que quere converterse en millonario. Para tal fin, pretende escoitar e observar todo, e utilizar todo o que escoitou e observou. Con esa convicción e un desexo irrefreábel de compracer a todo o mundo, axiña abandona o seu primeiro emprego, nun pub, por un bordel de luxo e, finalmente, por un elegante restaurante art nouveau de Praga. Cando chega o final da década de 1930, as cousas comezan a mudar: Hitler ocupa Sudetenland e está a dividir Checoslovaquia.
Jirí Menzel, director de clásicos como Trens rigorosamente vixiados, volve inspirarse, por sexta vez na súa carreira, na obra do falecido escritor checo Bohumil Hrabal. «O seu sentido do humor e a súa adornada forma de narrar varios episodios da vida dun aprendiz ambicioso ofrecían infinidade de momentos que estiven encantado de rodar», afirma o realizador. A novela, editada en España por Destino, é para Menzel «un dos seus maiores logros, unha visión do mundo moderno e dunha parte da historia do século XX reflectidas na vida dun home.» Ademais de triunfar nos galardóns da cinematografía checa (gañou catro «Leóns Checos»), o filme levou o premio ao mellor filme no Festival de Comedia de Peñíscola e o premio da Fipresci (a asociación da crítica internacional) no Festival de Berlín de 2007.

Estreas en Versión Orixinal 4

2008-11-19T10:11:00.006+01:00

O CINECLUBE PADRE FEIJOO E CINEBOX OURENSE PRESENTAN
O CUARTO CICLO DE ESTREAS EN VERSIÓN ORIXINAL

Durante as próximas semanas (a última de novembro e as tres primeiras de decembro), o Cineclube Padre Feijoo e Cinebox Ourense proxectarán catro filmes dentro do seu novo ciclo «Estreas en Versión Orixinal 4: Da comedia ao drama». Catro títulos de procedencias moi diversas, premiados en diferentes festivais, e que van, como se indica, desde a comedia con toques dramáticos até o drama social. En todos os casos, trátase de filmes que se proxectan en versión orixinal con subtítulos en castelán. Para o ciclo cóntase novamente co apoio da Federación de Cineclubes de Galicia, da Dirección Xeral de Comunicación Audiovisual da Xunta de Galicia e da Vicerreitoría do Campus de Ourense.
O primeiro dos títulos, previsto para o mércores 26 de novembro, é Yo serví al rey de Inglaterra, do checo Jirí Menzel —director de clásicos como Trenes rigurosamente vigilados—, que obtivo o Premio da Crítica Internacional no Festival de Berlín en 2007. O segundo, para o 3 de decembro, será Honeydripper Blues Bar, unha película que retrata o ambiente musical dun bar de blues na Alabama dos anos cincuenta, a cargo do cineasta John Sayles (director de filmes como Lone Star ou Casa de los Babys); o filme conseguiu o Premio ao mellor guión no Festival de San Sebastián.
O terceiro título, que se proxectará o 10 de decembro, é Tropa de elite, un filme brasileiro dirixido por José Padilha, que narra os problemas ocasionados polo narcotráfico nas favelas do Rio de Janeiro, e que conseguiu o Oso de Ouro no Festival de Berlín. Por último, o 17 de decembro chegará Garage, unha nova sorpresa da cinematografía irlandesa; trátase dun filme dirixido por Lenny Abrahamson que gañou, entre outros, o Premio CICAE da prestixiosa Quincena dos Realizadores do Festival de Cannes.
Cúmprese un ano de colaboración do Cineclube cos Cinebox Ourense, que se concretou en catro ciclos ademais deste (tres da serie «Estreas en Versión Orixinal» e un de «Cinema e BD», dentro das Xornadas de Banda Deseñada), nos cales a resposta do público ten sido moi boa, mesmo superando as expectativas dos organizadores. Esas 24 proxeccións xa efectuadas, aínda que estean lonxe do ritmo normalizado que permitiría contar cunha sala pública, fan que o Cineclube e o Cinebox nos congratulemos polo éxito conseguido.

Ciclo Estreas en Versión Orixinal 4
Da comedia ao drama

Ciclo Estreas en Versión Orixinal 4: Da comedia ao drama
Novembro-decembro 2008
Cinebox Ourense
Entrada: 4 euros (3 euros con carné universitario)
Versión Orixinal Subtitulada

Co apoio de:
Federación de Cineclubes de Galicia
Dirección Xeral de Comunicación Audiovisual – Xunta de Galicia
Vicerreitoría do Campus de Ourense

26-11-08 Yo serví al rey de Inglaterra

03-12-08 Honeydripper Blues Bar

10-12-08 Tropa de elite

17-12-08 Garage

• Mércores 26 de novembro de 2008 • Cinebox Ourense, 20.30 e 23 h
Yo serví al rey de Inglaterra
Obsluhoval jsem anglického krále. República Checa/Eslovaquia, 2006. Cor, 120 min. Dirección: Jiří Menzel • Produción: Rudolf Biermann (AQS, Barrandov Studios, Magic Box Slovakia, TV Nova, UPP) • Guión: Jiří Menzel, segundo a novela de Bohumil Hrabal • Fotografía: Jaromír Šofr • Montaxe: Jiří Brožek • Música: Aleš Březina • Intérpretes: Ivan Barnev (Jan Dítě, novo), Oldřich Kaiser (Jan Dítě, vello), Julia Jentsch (Lisa), Martin Huba (Skřivánek), Marián Labuda (Walden), Milan Lasica (profesor), Josef Abrhám (Brandejs), Jiří Lábus (director do hotel), Jaromír Dulava (Karel) • Estrea na República Checa: 11/1/2007 • Estrea en España: 18/7/2008 • Versión orixinal en checo con subtítulos en castelán.

• Web oficial (checo e inglés): http://www.anglickykral.cz/

• Festival de Berlín 2007: Premio da crítica internacional (Fipresci)
• Leóns Checos 2007: Mellor filme, Mellor director, Mellor fotografía, Mellor actor secundario (Martin Huba)
• Festival de Comedia de Peñíscola 2008: Mellor filme
• Festival de Sofía 2007: Premio do público

Jan Dítě é camareiro provinciano moi ambicioso; quere converterse en millonario e sabe como conseguilo: escoitándoo todo e observándoo todo, e utilizando todo o que escoitou e observou. Con esa convicción e un desexo irrefreábel de compracer a todo o mundo, axiña abandona o seu primeiro emprego, nun pub, por un bordel de luxo e, finalmente, por un elegante restaurante art nouveau de Praga. Pero agora chegou o final da década de 1930, e as cousas están mudando: Hitler ocupou Sudetenland e está a dividir Checoslovaquia.

• Mércores, 3 de decembro de 2008 • Cinebox Ourense, 20.30 e 23 h
Honeydripper Blues Bar
Honeydripper. EUA, 2007. Cor, 123 min. Dirección e guión: John Sayles • Produción: Maggie Renzi (Anarchist’s Convention Films, Honeydripper Films) • Fotografía: Dick Pope • Montaxe: John Sayles • Música: Mason Daring • Intérpretes: Danny Glover (Tyrone Purvis), Lisa Gay Hamilton (Delilah), Yaya DaCosta (China Doll), Charles S. Dutton (Maceo), Mary Steenburgen (Amanda Winship), Vondie Curtis Hall (Slick), Gary Clark Jr. (Sonny Blake), Dra. Mable John (Bertha Mae), Stacy Keach (sheriff Pugh), Absalom Adams (Lonnie) • Estrea en EUA: 28/12/2007 • Estrea en España: 16/5/2008 • Versión orixinal en inglés con subtítulos en castelán.

• Web oficial (inglés): http://honeydripper-movie.com
• Web oficial (español): http://www.golem.es/honeydripper

• Festival de San Sebastián 2007: Premio ao mellor guión

Na Alabama rural de 1950, Tyrone, pianista e dono dun pequeno bar, espera salvar o seu local da ruína contratando o máis famoso guitarrista de blues do momento, Guitar Sam. Cando chega o día da actuación, o músico non aparece no tren en que debía chegar. Tyrone terá que buscar unha solución para non perder a grande oportunidade de mudar a súa sorte.

• Mércores, 10 de decembro de 2008 • Cinebox Ourense, 20.30 e 23 h
Tropa de élite
Tropa de elite. Brasil, 2007. Cor, 115 min. Dirección: José Padilha • Produción: Marcos Prado, José Padilha (Zazen Produções, Posto 9, Feijão Filmes, The Weinstein Company) • Guión: José Padilha, Rodrigo Pimentel, Bráulio Mantovani • Fotografía: Lula Carvalho • Montaxe: Daniel Rezende • Música: Pedro Bromfman • Intérpretes: Wagner Moura (capitán Nascimento), André Ramiro (André Matias), Caio Junqueira (Neto), Milhem Cortaz (capitán Fábio), Fernanda Machado (Maria), Maria Ribeiro (Rosane), Paulo Vilela (Edu), Fernanda de Freitas (Roberta), André Mauro (Rodrigues), Fábio Lago (Baiano) • Estrea no Brasil: 12/10/2007 • Estrea en España: 18/7/2008 • Versión orixinal en portugués, con subtítulos en castelán.

• Web oficial (portugués): http://www.tropadeeliteofilme.com.br
• Web oficial (español): http://www.brasilelite.com

• Festival de Berlín 2007: Oso de Ouro
• Grande Prêmio BR do Cinema Brasileiro 2008: Mellor actor (Wagner Moura), Mellor actor secundario (Milhem Cortaz), Mellor fotografía, Mellor director, Mellor montaxe – ficción, Mellor maquillaxe, Mellor son, Mellores efectos especiais
• Festival de Cinema Latinoamericano de Lima 2008: Premio do público
• Premios da Asociación de Críticos de São Paulo 2008: Mellor director, Mellor montaxe

Rio de Janeiro, 1997. A Nascimento, capitán do BOPE (Batalhão de Operações Policiais Especiais), a tropa de elite da Policía do Rio, élle asignado o mando dun dos grupos que teñen a misión de «pacificar» as favelas do ‘morro’ de Turano, debido á visita de Xoán Paulo II, quen vai instalarse nunha zona próxima. O capitán, baixo unha presión constante, comeza a notar os efectos do estrés. Ten que executar as ordes recibidas, en canto tenta encontrar un substituto, xa que a súa muller está nos seus últimos días de embarazo e lle pide constantemente que abandone a primeira liña do Batalhão.

• Mércores, 17 de decembro de 2008 • Cinebox Ourense, 20.30 e 23 h
Garage
Garage. Irlanda, 2007. Cor, 85 min. Dirección: Lenny Abrahamson • Produción: Ed Guiney (Element Pictures, Broadcasting Commission of Ireland, Bórd Scannán na hÉireann, Film4, Radio Telefís Éireann) • Guión: Mark O’Halloran • Fotografía: Peter Robertson • Montaxe: Isobel Stephenson • Música: Stephen Rennicks • Intérpretes: Pat Shortt (Josie), Anne-Marie Duff (Carmel), Conor Ryan (David), Don Wycherley (Breffni), Andrew Bennett (Sully), Michael Denis Conway (Garda), Tom Hickey (Sr. Skerrit), George Costigan (Dan), John Keogh (Sr. Gallagher) • Estrea en Irlanda: 5/10/2007 • Estrea en España: 18/7/2008. Versión orixinal en inglés con subtítulos en castelán.

• Web oficial (inglés): http://www.garagethefilm.com
• Web oficial (español): http://www.avalonproductions.es/garage

• Festival de Cannes – Quincena dos Realizadores 2007: Premio CICAE
• Festival de Bratislava 2007: Mención especial Premio Ecuménico
• Festival de Cinema Británico de Dinard 2007: Premio Coup de Cœur
• Premios do Cinema e a Televisión Irlandeses (IFTA) 2008: Mellor actor principal (Pat Shortt), Mellor director, Mellor filme, Mellor guión
• Festival de Cinema de Comedia de Monte-Carlo 2007: Mellor actor (Pat Shortt)
• Festival de Cinema Xove de Turín 2007: Mellor filme, Mellor filme internacional

Josie leva toda a vida traballando como encargado dunha ruinosa gasolineira no medio oeste irlandés. É introvertido e solitario, bastante optimista e, dunha maneira rara, feliz. Mais, de repente, a chegada de David á gasolineira traerá unha serie de mudanzas á súa até agora tranquila e monótona vida. David e Josie agrádanse e non tardan en conectar. De boas a boas, aquel adulto solitario vese reflectido no rapaz, e non dubidará en sentar con el, e con otros rapaces da súa idade, a beber cervexas nas vías do tren. Carmel, que traballa nunha tenda na cidade e que sempre tratou ben a Josie, comeza a descubrir sentimentos moi intensos que non é capaz de definir, e que terminan facendo perigar a súa relación con Josie.

‘Persépolis’

2008-10-07T13:00:00.005+02:00

Esta é a nota de prensa enviada hoxe ao medios (se queres recibir información sobre as actividades do Cineclube, únete ao grupo de correo en http://groups.google.es/group/cineclubepf)

‘Persépolis’, nas Xornadas de Banda Deseñada

Mañá, mércores 8 de outubro de 2008, dentro do programa das XX Xornadas de Banda Deseñada de Ourense, proxectarase, en estrea en Ourense, o filme Persépolis, de Marjane Satrapi e Vincent Paronnaud. As sesións, no Cinebox Ourense (C. C. Ponte Vella), serán ás 20.30 e 23 h. A entrada é de 3 euros.

Persépolis é a adaptación a cinema da coñecida novela gráfica homónima de Marjane Satrapi, quen codirixe a adaptación xunto con Vincent Paronnaud. Entre outros galardóns, recibiu o Premio do Xurado no Festival de Cannes.
Conta a historia dunha nena que medra no Irán da Revolución Islámica. A través dos seus ollos vemos como as esperanzas do seu pobo quedan rotas cando os fundamentalistas toman o poder. Intelixente e sen medo, Marjane engana os «gardiáns sociais» e descobre o punk, Abba e Iron Maiden. Mais cando o seu tío é executado sen piedade e as bombas caen arredor de Teherán na guerra entre Irán e Iraq, o medo diario que rodea a súa vida é palpábel.

‘El castillo ambulante’

2008-09-30T17:13:00.003+02:00

Esta é a nota de prensa enviada hoxe aos medios:

‘EL CASTILLO AMBULANTE’, DE HAYAO MIYAZAKI, NO CINECLUBE

Dentro do programa das XX Xornadas de Banda Deseñada de Ourense proxectarase, nas salas Cinebox, mañá mércores 1 de outubro, ás 20.30 e ás 23 h, o filme xaponés de animación El castillo ambulante, do director Hayao Miyazaki (autor das premiadas La princesa Mononoke e El viaje de Chihiro, entre outras). As entradas terán un prezo de 3 euros. A proxección será en versión orixinal subtitulada.
El castilo ambulante, que adapta a novela homónima de Diana Wynne Jones, conta a historia Sophie, unha rapaza que traballa nunha tenda de sombreiros, que un día coñece o mago Howl, un mozo con poderes extraordinarios e extremadamente sedutor. O encontro entre ambos non pasa desapercibido para a Bruxa das Landas, quen odia visceralmente a Howl. Cando Sophie volve á tenda, a Bruxa, facéndose pasar por unha clienta, engánaa e enfeitízaa, transformándoa nunha anciá de 90 anos que non pode revelar a súa verdadeira identidade.
O filme foi candidato ao Oscar como mellor filme animado e gañou no Festival de Venecia a Osella de Ouro. Até agora permanecía inédito nas pantallas comerciais ourensás.

Cinema e BD

2008-09-26T17:05:00.002+02:00

Dentro do programa das XX Xornadas de Banda Deseñada de Ourense haberá proxeccións de cinema en pantalla grande, coa colaboración das salas Cinebox e do Cineclube Padre Feijoo. Serán dous filmes inéditos nas salas comerciais da cidade: o mércores 1 (20.30 e 23 h), El castillo ambulante, do xenial director Hayao Miyazaki (tamén autor de cómic), e o mércores 8 (20.30 e 23 h), Persépolis, codirixida pola autora da BD homónima en que se basea, Marjane Satrapi. Ambos os filmes foron gañadores de diferentes premios, ademais de teren sido nomeados para os Oscar na categoría de película de animación: El castillo ambulante recibiu a Osella de Ouro no Festival de Venecia, e Persépolis o Premio do Xurado no Festival de Cannes.

• Mércores 1 de outubro, 20.30 e 23 h: El castillo ambulante, de Hayao Miyazaki

Miyazaki, autor de manga e director de cinema (Nausicaä no Val do Vento e Porco Rosso son mangas e filmes seus) trae esta película gañadora da Osella de Ouro no Festival de Venecia e candidata ao óscar ao mellor filme de animación.

Hauru no ugoku shiro. Xapón, 2004. Cor, 119 min · Dirección: Hayao Miyazaki · Produción: Toshio Suzuki (Tokuma Shoten, Studio Ghibli, Nippon Television Network, Dentsu, Buena Vista Home Entertainment, Mitsubishi, Toho) · Guión: Hayao Miyazaki, baseado na novela de Diana Wynne Jones · Música: Joe Hisaishi · Fotografía: Okui Atsushi · Montaxe: Takeshi Seyama. Voces: Chieko Baisho (Sofî), Takuya Kimura (Hauru), Akihiro Miwa (Arechi no Majo), Tatsuya Gashuin (Karushifâ), Ryunosuke Kamiki (Marukuru), Mitsunori Isaki (Koshô), Yo Oizumi (Kakashi), Akio Ôtsuka (Kokuô), Daijiro Harada (Hin), Haruko Kato (Sariman) · Estrea no Xapón: 20/11/2004; estrea en España: 3/3/2006. Versión orixinal en xaponés subtitulada en castelán.

Máis información: http://www.labutaca.net/films/30/howlsmovingcastle.htm

• Mércores 8 de outubro, 20.30 e 23 h: Persépolis, de Marjane Satrapi e Vincent Paronnaud

Marjane Satrapi codirixe a adaptación da súa obra máis coñecida, a autobiografía da súa nenez no Irán da revolución e a súa adolescencia e xuventude en Europa. Premio do Xurado no Festival de Cannes.
Persepolis. Francia, 2007. Cor, 95 min. Dirección: Marjane Satrapi e Vincent Paronnaud · Produción: Marc-Antoine Robert, Xavier Rigault (2.4.7. Films) · Guión: Marjane Satrapi, Vincent Paronnaud, baseado nas novelas gráficas de Marjane Satrapi · Montaje: Stéphane Roche · Música: Olivier Bernet · Voces: Chiara Mastroianni (Marjane adolescente e adulta), Catherine Deneuve (Tadji, nai de Marjane), Danielle Darrieux (avoa), Simon Abkarian (Ebi, pai de Marjane), Gabrielle Lopes (Marjane nena), François Jerosme (tío Anouche). Estrea en Francia: 27/6/2007; estrea en España: 31/10/2007. Versión orixinal en francés subtitulada en castelán.

Web oficial en castelán: http://www.persepolislapelicula.es/

‘En un mundo libre...’

2008-06-17T16:17:00.003+02:00

Esta é a nota que enviamos hoxe aos medios.

Se queres recibir información de próximas actividades do Cineclube, apúntate en http://groups.google.com/group/cineclubepf ou escríbenos a cineclubepf@gmail.com

‘EN UN MUNDO LIBRE...’ PECHA O CICLO DE CINEMA SOCIAL

Mañá mércores 18 de xuño de 2008, o Cineclube Padre Feijoo e Cinebox Ourense continuarán co ciclo «Estreas en versión orixinal 3: Cinema Social» coa coprodución En un mundo libre... (It’s A Free World..., 2007), dirixida polo británico Ken Loach. Os pases, ás 20.30 e 23.00 horas, terán lugar no Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario). Para este ciclo cóntase novamente coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.
En un mundo libre... conta a historia de Angie, unha muller chea de enerxía, enxeño e ambición. Despois de quedar sen traballo, tenta refacerse e demostrar o que vale: Angie e a súa compañeira de piso deciden ser as súas propias xefas, e abren unha axencia de traballo temporal para traballadores inmigrantes, que actúa nun mundo inestábel en que o traballo é barato e as leis só serven para ser ignoradas.
O director Ken Loach segue a axitar as conciencias de Gran Bretaña co seu cinema. Agora céntrase na situación laboral dos inmigrantes. «Ao seu chámaselle traballo flexíbel, que é un concepto estupendo para as persoas que dan emprego, mais nada bo para quen traballa», explica o cineasta, interesado na evolución laboral da sociedade inglesa. Moi atento á súa vontade de reflectir a realidade que o rodea, o seu relato ten unha clara intención: «Mostrar un cambio na concienciación social que defende a idea de que estamos sos e non temos responsabilidades cara ao resto do mundo. Un estado que nos leva de regreso aos anos de Margaret Thatcher».

‘This Is England’

2008-06-10T11:03:00.001+02:00

‘THIS IS ENGLAND’, NO CICLO DE CINEMA SOCIAL

Mañá mércores 11 de xuño de 2008, o Cineclube Padre Feijoo e Cinebox Ourense continuarán co ciclo «Estreas en versión orixinal 3: Cinema Social» co filme británico This is England (2006), dirixido por Shane Meadows. Os pases, ás 20.30 e 23.00 horas, terán lugar no Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario). Para este ciclo cóntase novamente coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.
This is England sitúanos na Inglaterra de principios dos oitenta. Shaun, de 12 anos, é un neno solitario cuxo pai morreu en combate na guerra das Malvinas e que crece nunha aldea costeira moi gris. No transcurso das vacacións, encontra novos modelos masculinos cando o «adoptan» os cabezas rapadas locais. Cos seus novos amigos, Shaun encontra un mundo de festas, coñece o seu primeiro amor e descobre os encantos das botas Dr. Martins. É entón cando coñece a Combo, un skinhead racista, maior ca el, que acaba de saír do cárcere. Mentres a banda de Combo acosa as minorías étnicas locais, todo parece preparado para o arranque dun proceso de maduración que levará a Shaun da inocencia á experiencia.
Galardoada, entre outros, nos festivais de Xixón e Londres, e nos premios Bafta (da Academia Británica do Cinema), This is England supón, en palabras do crítico Jordi Costa en Fotogramas, «un mirar cara atrás sen ira, mais coa ollada limpa de nostalxias, que desvela as dinámicas de subsolo da Gran Bretaña thatcherista, onde a Guerra das Malvinas deixou algo máis que baixas e infectou un inconsciente colectivo que supuraría un incendiado nacionalismo».

‘All The Invisible Children’

2008-06-03T10:02:00.003+02:00

Esta á a nota de prensa enviada hoxe aos medios. Se queres recibir información puntual no teu e-mail, escríbenos a cineclubepf@gmail.com

COMEZA O CICLO DE CINEMA SOCIAL
CON ‘ALL THE INVISIBLE CHILDREN’

Mañá mércores 4 de xuño de 2008, o Cineclube Padre Feijoo e Cinebox Ourense darán comezo ao ciclo «Estreas en versión orixinal 3: Cinema Social» co filme All the invisible children (2005), dirixido por oito realizadores de distintos países, entre os que se encontran Ridley Scott, Emir Kusturica, Spike Lee e John Woo. Os pases, ás 20.30 e 23.00 horas, terán lugar no Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario). Para este ciclo cóntase novamente coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.
All the invisible children [«Todos os nenos invisíbeis»] é unha iniciativa que reúne varios dos directores máis recoñecidos do mundo para retratar as historias de loita e adversidade de sete nenos anónimos arredor do mundo. Así, coñecemos a Tanza, un neno soldado en África; a Uroš, a punto de saír dun reformatorio xuvenil en Serbia; a Blanca, unha adolescente de Brooklyn de pais drogadictos, que acaba descubrindo que é seropositiva; a Bilu e João, que sobreviven como ‘meninos da rua’ en São Paulo; a Jonathan, un fotógrafo de prensa desilusionado, que redescobre a esencia da vida a través da infancia; a Ciro e o seu amigo Bertucciello, que asaltan en Nápoles un condutor para roubarlle o seu rolex e emprenden unha fuxida cara a unha infancia verdadeira; por último, a Song Song e Little Cat, dúas nenas que viven dúas vidas paralelas en circunstancias opostas nunha cidade chinesa.
O filme, feito en apoio das actividades de Unicef, conta cos realizadores Kátia Lund (co-directora do afamado filme brasileiro Cidade de Deus), Mehdi Charef (director francés de orixe alxeriana, gañador de varios premios en Cannes), Stefano Venerusso (axudante de dirección en producións como Gangs of New York e El cartero y Pablo Neruda), Emir Kusturica (afamado director de filmes como El tiempo de los gitanos ou Underground), Ridley Scott (non menos coñecido autor de filmes como Blade Runner ou Thelma e Louise), neste caso coa súa filla Jordan Scott (directora de dúas curtametraxes, a dirixir agora a súa primeira longa), e John Woo (director chinés de persoais filmes de acción, primeiro en Hong Kong e posteriormente en Hollywood).