PINK | trendi

My Fashion: Jabeen Zacharias

2008-05-15T11:17:00.000-07:00

കോര്‍പ്പറേറ്റ് മന്ദിരങ്ങളുടെ അകത്തളങ്ങള്‍ക്ക് മോടികൂട്ടുന്ന ഇന്റീരിയര്‍ ഡിസൈനര്‍ ജബീന്‍ സഖറിയാസിന് സ്വന്തമായി ചില ഫാഷന്‍ സങ്കല്‍പ്പങ്ങള്‍ ഉണ്ടാകാതെ തരമില്ലല്ലോ.

“ ഞാന്‍ എല്ലാത്തരം ഡ്രസുകളും ധരിക്കാറുണ്ട്. ഓരോ ഒക്കേഷനു ചേരുന്ന വിധത്തില്‍ ഡ്രസ് ചെയ്യുക എന്നതാണ് എന്റെ സ്റ്റൈല്‍. സാരി എനിക്കു നന്നായി ചേരുമെന്ന് എല്ലാവരും പറയാറുണ്ട്. എവിടെയെങ്കിലും സ്‌പീക്കറായി പോകേണ്ടിവരുമ്പോഴും കല്യാണങ്ങള്‍ക്കും ഒക്കെയാണ് ഞാന്‍ സാരി ഉടുക്കാറ്. മറ്റൊരു വിധത്തില്‍ പറഞ്ഞാല്‍ സീനിയോറിറ്റി തോന്നിക്കേണ്ട സന്ദര്‍ഭങ്ങളില്‍ സാരി പ്രിഫര്‍ ചെയ്യുന്നു.

സാധാരണയായി പാന്റും ഷര്‍ട്ടുമാണ് ഞാന്‍ ഇടാറ്. ഏതു സൈറ്റിലായാലും പോകാനും വരാനും എളുപ്പം ഈ ഡ്രസാണ്. എന്നാല്‍, കുറച്ച് പ്രായമായ, കണ്‍സര്‍വേറ്റീവായ, കുറച്ച് ഉള്‍നാട്ടിലുള്ള ക്ലൈന്റിനെ മീറ്റ് ചെയ്യേണ്ട അവസരത്തില്‍ സല്‍‌വാര്‍ ഇടും. ശരിയായ വേവ്‌ലങ്‌ത്തില്‍ ക്ലൈന്റിനോട് സംസാരിക്കണമെങ്കില്‍ , ഡ്രസും അതിന്റേതായ പങ്കു വഹിക്കുന്നുണ്ട്. ബേസിക്കായി പറഞ്ഞാല്‍ കാഷ്വല്‍ ഡ്രസുകളാണ് എനിക്കിഷ്‌ടം. എന്നാല്‍‍ ഞാനൊരു പ്രൊഫഷണലാണ് എന്ന ചിന്ത എന്റെ വസ്‌ത്രധാരണത്തില്‍ പ്രതിഫലിക്കാറുണ്ട്.”

ആഭരണങ്ങളോട് വലിയ ഭ്രമം ജബീനില്ല. “ സിമ്പിളായ ആഭരണങ്ങളോടാണ് താല്‍‌പര്യം. എന്റെ മക്കള്‍- ആതിരയും ഉത്തരയും ഐശ്വര്യയും ഡ്രസിനു മാച്ച് ചെയ്യുന്ന ഇയര്‍‌റിംഗ്‌സും ചെയിനും ഇട്ട് ഒരുങ്ങുന്നതു കാണാന്‍ എനിക്കൊത്തിരിയിഷ്‌ടമാണ്. ”

Pushpa M. / TEAM INDULEKHA

RELATED PAGE
» Stylish Interiors by Jabeen Zacharias

My Fashion: Beena Kannan

2008-05-13T02:10:00.000-07:00

മെറൂണില്‍ കസവിന്റെ വലിയ ഗോപുരങ്ങള്‍ തിളങ്ങുന്ന സാരി. കാതില്‍ വെള്ളകല്ലു പതിച്ച, വൃത്താകൃതിയിലുള്ള വലിയ കമ്മല്‍. മെറൂണ്‍ ത്രെഡില്‍ വലിയ ലോക്കറ്റുള്ള മാല. വിരലില്‍ പൂവിനോളം വലിയ മോതിരം. ബീന കണ്ണന്‍ ഈസ് സോ സ്‌റ്റൈലിഷ്. റിയാലിറ്റി ഷോക്കാരുടെ ഭാഷ കടമെടുത്താല്‍, ശീമാട്ടിയിലെ സാരി വിഭാഗത്തില്‍ കസ്‌റ്റമേഴ്‌സിനിടയില്‍ പറന്നു നടക്കുന്ന, ബീനയുടെ ‘എനര്‍ജി ലെവല്‍ ഈസ് ഹൈ’.

അടിമുടി എലഗന്റ് ആന്‍ഡ് സ്‌റ്റൈലിഷായ ബീന കണ്ണന്റെ സ്‌റ്റൈല്‍ മന്ത്രാസ് കേള്‍ക്കൂ.

ജീന്‍സ്, സാരി, സല്‍‌വാര്‍, പട്യാല.... എല്ലാം ധരിക്കാന്‍ എനിക്കിഷ്‌ടമാണ്. സാരിക്ക് ഒരു പ്രത്യേക ഭംഗിയുണ്ട്. സാരിയുടുത്താലും ഒരു പ്രത്യേക ഭംഗിയുണ്ട്. ഇടയ്‌ക്കെങ്കിലും സാരിയുടുത്ത് സ്‌റ്റൈലാകാനുള്ള അവസരം നഷ്‌ടപ്പെടുത്തരുതെന്നേ ലേഡീസിനോട് ഞാന്‍ പറയൂ.”

വലതു കൈവിരലിലെ വലിയ മോതിരത്തോട് പ്രത്യേക ഇഷ്‌ടമുണ്ടെന്ന് ബീന സമ്മതിക്കും. “ ഓരോ ഡ്രസിനും സ്യൂട്ടാകുന്ന വിധത്തില്‍ ആക്‌സസറീസ് ധരിക്കുകയാണ് പതിവ്. ചിലപ്പോള്‍ മൂഡനുസരിച്ച് “, ഒരു ചെറുചിരിയോടെ ബീന കൂട്ടിച്ചേര്‍ത്തു.”പിന്നെ പ്രായത്തിന് അനുസരിച്ചും”.
പ്രായത്തെക്കുറിച്ച് ബീന കണ്ണന്‍ പറഞ്ഞാല്‍ ഈ പ്രായക്കുറവിന്റെ രഹസ്യം ചോദിക്കാതിരിക്കുന്നതെങ്ങനെ?

“പ്രായത്തെ തോല്‍‌പ്പിക്കണമെങ്കില്‍ കുറച്ച് കഷ്‌ടപ്പെടുക തന്നെ വേണം. ഞാന്‍ ഡാന്‍‌സ് ചെയ്യാറുണ്ട്, എക്‌സര്‍സൈസ് ചെയ്യാറുണ്ട്. എത്ര തിരക്കാണെങ്കിലും കുറച്ചു നേരമെങ്കിലും എക്‌സര്‍സൈസ് ചെയ്യാന്‍ മാക്‌സിമം ശ്രദ്‌ധിക്കും.

Pushpa M. / TEAM INDULEKHA

RELATED PAGES
» My Money: Beena Kannan
» Trendi @ Seematti

Happy Mother's Day

2008-05-10T02:22:00.000-07:00

"M" is for the million things she gave me,
"O" means only that she's growing old,
"T" is for the tears she shed to save me,
"H" is for her heart of purest gold;
"E" is for her eyes, with love-light shining,
"R" means right, and right she'll always be,
Put them all together, they spell
'MOTHER" ....A word that means the world to me.

-Howard Johnson

മെയ് മാസത്തിലെ രണ്ടാമത്തെ ഞായറാഴ്ച എല്ലാ അമേരിക്കന്‍ അമ്മമാര്‍ക്കും സ്വപ്നതുല്യമായ ദിവസമാണ്. ദൂരദേശങ്ങളില്‍ നിന്നു പോലും മക്കള്‍ അമ്മയെ കാണാന്‍ വന്ന് സമ്മാനങ്ങള്‍കൊണ്ടും സ്നേഹം കൊണ്ടും വീര്‍പ്പുമുട്ടിക്കുന്ന ദിവസം. അമ്മമാരുടെ സ്വന്തമായ 'മദേര്‍സ് ഡേ' യെ വരവേല്‍ക്കാന്‍ എല്ലാ സന്നാഹങ്ങളോടും കൂടി ഷോപ്പുകളും മാളുകളും ഫാഷന്‍ എമ്പോറിയങ്ങളും ഒരുങ്ങിക്കഴിഞ്ഞു. മദേര്‍സ് ഡേ സ്പെഷ്യല്‍ കേക്കുകള്‍, പൂച്ചെണ്ടുകള്‍, കാര്‍ഡുകള്‍, ഡിസൈനര്‍ വസ്ത്രങ്ങള്‍ തുടങ്ങി ഡയമണ്ട് കളക്ഷന്‍സ് വരെ വിപണിയിലുണ്ട്. ഇക്കുറി മെയ് 11 നാണ് ഈ ആഘോഷം.

Macy's ലും സ്പെഷ്യല്‍ ഡയമണ്ട് കളക്ഷന്‍സ് നിരന്നിട്ടുണ്ട്. റിംഗ്‌സ്, പെന്‍ഡന്റുകള്‍, ബ്രേസ്‌ലെറ്റുകള്‍, നെക്‌ലേസ്, ഇയര്‍ റിംഗ്‌സ് തുടങ്ങി സ്ത്രീകള്‍ക്കിഷ്ടമുള്ള ഏതുതരം ആഭരണവും ഡയമണ്ടിന്റെ എലെഗന്‍സ് ചേര്‍ത്ത് ഉപയോക്താക്കള്‍ക്ക് ലഭ്യം. ഡയമണ്ടിന്റെ പ്രത്യേകത അത് ഒരിക്കലും നശിക്കുന്നില്ല എന്നുള്ളതാണ്, അതുപോലെ തന്നെയാണ് മക്കള്‍ക്ക് അമ്മമാരോടുള്ള സ്നേഹവും. മുകളില്‍ പകര്‍ത്തിയ കവിതപോലെ സുന്ദരം.

ചിത്രത്തിലെ 'തുമ്പി'യുടെ ആകൃതിയിയിലുള്ള പെന്‍ഡന്റിന് (അമേതിസ്റ്റ് ന്റെ ഇളം പര്‍പ്പിള്‍ /ബോഡി'യില്‍ ഡയമണ്ട് ചിറകുകള്‍) വില $ 360, മദേര്‍സ് ഡെ സ്പെഷ്യല്‍ ഡിസ്കൌണ്ട് പ്രൈസ് $ 182.75. കാണാന്‍ വളരെ മനോഹരമായ ഈ തുമ്പി 14 കാരറ്റ് സ്വര്‍ണ്ണച്ചെയിനിലാണ് ലഭിക്കുക.

ഇയര്‍‌ റിംഗ്. സ്വര്‍ണ്ണവും ഡയമണ്ടും ഇടകലര്‍ന്ന ഇതിന് ഒറിജിനല്‍ പ്രൈസ് $ 700. സെയില്‍ പ്രൈസ് $ 297.50. യുണീക് ഡിസൈനിലുള്ള ഈ കമ്മല്‍ ഒരു എലഗന്റ് ലുക് സമ്മാനിക്കുമെന്നതില്‍ സംശയമില്ല.

വൈറ്റ് ഗോള്‍ഡില്‍ ഡയമണ്ട് വര്‍ക് ചെയ്തിരിക്കുന്ന ഈ മോതിരത്തിന് വില $ 400, സെയില്‍ പ്രൈസ് $ 271.15. ഇവയെല്ലാം മേസീസി ന്റെ എല്ലാ ഷോ റൂമുകളില്‍ നിന്നും അവരുടെ വെബ് സൈറ്റില്‍ നിന്നും വാങ്ങാം. (www.macys.com )

അമ്മമാരോടുള്ള സ്നേഹം സമ്മാനങ്ങള്‍ക്കതീതമെങ്കിലും അവരെ ആദരിക്കാന്‍ ഒരു ദിവസമുള്ളത് നല്ലതുതന്നെ. ലോകത്തിലെ എല്ലാ അമ്മമാര്‍ക്കും മദേര്‍സ് ഡേ ആശംസകള്‍..

Sreeja Balaraj / TEAM INDULEKHA

RELATED PAGES
» Life @ US
» Sreeja Balaraj

TRENDi @ Seematti

2008-05-06T22:30:00.000-07:00

ആന്റിക് കളക്ഷന്‍, ബ്രൈഡല്‍ മില്‍ക്കി വെഡ്ഡിംഗ് വെയര്‍ കളക്‌ഷന്‍... എന്നും പുതുമയുള്ള വസ്‌ത്രശേഖരം ശീമാട്ടിയിലുണ്ട്.

» MANDIRA BEDI in
Seematti Collections

“അണ്‍സീന്‍ മാസ്‌റ്റര്‍ പീസസ് എന്നാണ് ആന്റിക് കളക്ഷന് ഞങ്ങള്‍ പേരിട്ടിരിക്കുന്നത്. ഈ ഡിസൈന്‍സിന്റെ ഇത്രയും വലിയൊരു കളക്ഷന്‍ വേറെങ്ങും കാണില്ല. ഇത് ലൈറ്റ് വെയ്‌റ്റാണ്, സോഫ്‌റ്റാണ്, നോണ്‍ ക്രഷബിളുമാണ്. ” ഭംഗിയായി ഞൊറിഞ്ഞുടുത്തിരിക്കുന്ന മെറൂണില്‍ കസവുകളുള്ള സാരിയുടെ മുന്താണി ചുരുട്ടിക്കൂട്ടിയ ശേഷം ബീന കണ്ണന്‍ പറഞ്ഞു- ഒരു ചുളിവെങ്കിലും ഉണ്ടോ എന്നു നോക്കൂ. സത്യം, ചുളിവിന്റെ ‘ചു’ പോലും അതിലെങ്ങും കാണാനില്ല!

ആന്റിക് കളക്ഷനിലെ എക്‌സ്‌പെന്‍സീവ് ഇനങ്ങള്‍ക്ക് 25,000- 40,000 വരെയാ‍ണ് വില. വില കുറഞ്ഞ റേഞ്ചിലുള്ളവ 4000 മുതല്‍ കിട്ടുന്നു. 20,000 മുതല്‍ 40,000 വരെയാണ് വെഡ്ഡിംഗ് വെയര്‍ കളക്ഷനിലുള്ളത്. അതില്‍ ജൂട്ട്, പശ്‌മിന, ക്രേപ്പ് ഗോള്‍ഡന്‍ ലുക്കിംഗ് മെറ്റാലിക് തുടങ്ങി ഏതു ടൈപ്പും കിട്ടും.

ബോഡിയില്‍ നിറയെ പ്രിന്റുകളുള്ള സോഫ്‌റ്റായ സാമുദ്രികയുടെ ടെമ്പിള്‍ ഡിസൈന്‍, സിഗ് സാഗ് ഡിസൈന്‍, വട്ടത്തില്‍ വലിയ പ്രിന്റുകളുള്ളവ....സാരികള്‍ എല്ലാം ഒന്നിനൊന്നു വ്യത്യസ്‌തം. “എണ്‍പതു ശതമാനവും ഞങ്ങളുടെ ഇന്‍ ഹൌസ് ഡിസൈനേഴ്‌സ് ഡിസൈന്‍ ചെയ്യുന്നതാണ്. അതു കൊണ്ടു തന്നെ ഒരു പോലുള്ള രണ്ടു സാരികള്‍ ശീമാട്ടിയിലില്ല.” ബീന കണ്ണന്‍ ഉറപ്പു തരുന്നു. ഒറ്റവാക്കില്‍ പറഞ്ഞാല്‍ ഓള്‍ ട്രെന്റി ആന്റ് ലേറ്റസ്‌റ്റ്.

Pushpa M. / TEAM INDULEKHA

അടിപൊളി Aakhosh!!

2008-05-05T22:50:00.000-07:00

ഫാഷന്‍ ഡിസൈനിംഗ് എന്നാല്‍ എന്താണ് സംഭവം? ഗോഡ്‌സ് ഓണ്‍ കണ്‍‌ട്രിയില്‍ ഇതിനുത്തരം കൃത്യമായി അറിയാത്ത പ്രജകള്‍ ധാരാളമുണ്ട്. കൊല്ലത്തിനടുത്തുള്ള നിലമേല്‍ ഗ്രാമത്തിലും സംഭവത്തിന്റെ കിടപ്പുവശം ഇങ്ങനെയൊക്കെത്തന്നെ. റാമ്പ്, പ്രൊഫൈല്‍, ഗാര്‍മെന്റ് പ്രൊഡക്‌ഷന്‍ പോലുള്ള പദങ്ങള്‍ ഇവരുടെ ഡിക്ഷണറിയില്‍ ഖനനം ചെയ്താല്‍ പോലും കാണില്ല!!

» VISIT Studio by Aakhosh

ആ ഗ്രാമത്തില്‍ നിന്നൊരു പയ്യന്‍സിന് സാക്ഷാല്‍ ഫാബ് ഇന്ത്യയുടെ തിരുവനന്തപുരം സോണില്‍ ഡിസൈന്‍ കോ-ഓഡിനേഷന്‍ വിഭാഗത്തിലേക്ക് സെലക്ഷന്‍ കിട്ടിയിരിക്കുന്നു. പേര് ആഘോഷ് ഡി. പ്രസാദ്.

“സിനിമയും എന്റെ സ്വപ്നമാണ്. ഈയിടെ റിലീസായ ‘മലബാര്‍ വെഡ്ഡിംഗി’ ന്റെ അസിസ്റ്റന്റ് ഡ്രസ് ഡിസൈനറായിരുന്നു ഞാന്‍. ഇതിനു മുമ്പ് കേരളാപോലീസ് എന്ന സിനിമയിലും വര്‍ക്ക് ചെയ്‌തിട്ടുണ്ട്. മമ്മൂട്ടി നായകനാകുന്ന ‘പരുന്തി’ല്‍ നായിക ലക്ഷ്മി റായിക്കുവേണ്ട സ്‌കെച്ചസ് കൊടുത്തു കഴിഞ്ഞു.” പയ്യന്‍സ് പുലിക്കുട്ടിയാണെന്നു മനസിലായല്ലോ. നേരത്തെ ബാംഗ്ലൂരിലായിരുന്നപ്പോള്‍, അശോക് മിത്ര എന്ന ഫാഷന്‍ ഡിസൈനറുടെ അസിസ്‌റ്റന്റായി പരസ്യചിത്രങ്ങള്‍ ചെയ്‌തിട്ടുണ്ട്.

ക്രിയേറ്റീവ് ഡാന്‍സ് ബാന്റിന്റെ സ്‌റ്റൈലിസ്‌റ്റായിരുന്നു. കൊച്ചിയില്‍ അനീഷ് ഉപാസന എന്ന ഫാഷന്‍ ഫോട്ടോഗ്രാഫറുടെ അസിസ്‌റ്റന്റ്. അതായിരുന്നു സിനിമയിലേക്കുള്ള വഴി.
“ട്രഡീഷണല്‍ വിട്ടിട്ട് മാക്‌സിമം ക്രിയേറ്റീവായി ഡ്രസ് ചെയ്യാനാണ് എനിക്കിഷ്‌ടം. അതില്‍ത്തന്നെ ടീനേജേഴ്‌സിനുള്ള കാഷ്വല്‍‌സ് . അവരാണല്ലോ ഫാഷന്റെ പ്രചാരകര്‍.”

പാട്ട്, ഡാന്‍സ്‌, ചിത്രരചന എന്നു വേണ്ട കലോത്സവത്തില്‍ എല്ലാ വേദികളിലും തിളങ്ങി നിന്നിരുന്ന ആഘോഷ് പ്ലസ്‌ ടു കഴിഞ്ഞതേ തീരുമാനിച്ചു- ഒരു പ്രൊഫഷണല്‍ കോഴ്‌സില്‍ ചേര്‍ന്നാല്‍ മതി. അത് കലയുമായി ബന്ധമുള്ളതായിരിക്കും. അങ്ങനെ ചിന്തിച്ച് , ചിന്തിച്ച്, സംസ്‌ഥാന യുവജനോത്സവത്തില്‍ ഫാബ്രിക് പെയ്‌ന്റിംഗില്‍ രണ്ടു തവണ ഫസ്‌റ്റ് കിട്ടിയ ആഘോഷ് ഫാഷന്‍ ഡിസൈനിംഗ് തെരഞ്ഞെടുത്തു. ആഘോഷിന്റെ അച്‌ഛനും അമ്മയും മൂക്കത്തു വിരല്‍ വച്ചില്ല, മുഖം വീര്‍പ്പിച്ചില്ല. അങ്ങനെയാണ് മാംഗലൂരിലെ കരാവലി കോളജില്‍ ചേര്‍ന്നതും അത് കരിയറാക്കി ആഘോഷിക്കുന്നതും.

Pushpa M. / TEAM INDULEKHA

Aakhosh D. Prasad, Kochi
Phone: +91-98460-02921
Email: aaghoos@yahoo.co.in

Wow.. സ്റ്റൈലന്‍ Shoes!

2008-05-05T08:22:00.000-07:00

പാദങ്ങളെ സംരക്ഷിക്കുക എന്നത് ചെരിപ്പുകളുടെ രണ്ടാമത്തെ ജോലിയാണിപ്പോള്‍. ഫാഷന്റെ മായാപ്രപഞ്ചത്തില്‍ അവഗണിക്കാനാത്തവിധം കരുത്താര്‍ന്ന സാന്നിദ്ധ്യമാണ് ഇന്ന് പാദരക്ഷകള്‍. അതുകൊണ്ടുതന്നെ ഫാഷന്റെ ലോകോത്തര ബ്രാന്‍ഡുകളൊക്കെയും അവരുടെ വസ്ത്രങ്ങള്‍ക്കും മറ്റിനങ്ങള്‍ക്കും നല്‍കുന്ന അതേ പ്രാധാന്യം ചെരുപ്പുകള്‍ക്കും നല്‍കുന്നു.

എല്ലാ കാലങ്ങള്‍ക്കും പ്രത്യേകം തരം പാദരക്ഷകളുണ്ട്. ഉദാഹരണത്തിന് മഞ്ഞുപെയ്യുന്ന ഇടങ്ങളില്‍ ശിശിരകാലത്ത് ബൂട്ടുകള്‍ ഉപയോഗിക്കാതെ നിവൃത്തിയില്ല. വേനലിലാണെങ്കില്‍ പാദം അധികം മൂടിക്കളയാത്തതും കളര്‍ഫുള്‍ ആയതുമായ ചെരുപ്പുകളാണധികവും. മഴ പെയ്യുന്ന മാസങ്ങളില്‍ 'വാട്ടര്‍പ്രൂഫ്' അയ ചെരുപ്പുകള്‍ കൂടുതല്‍ വിപണിയിലെത്തുന്നു. പാര്‍ട്ടിവെയറുകളാകട്ടെ എല്ലാ കാലത്തും ഒരേ ഡിമാന്റ് നിലനിര്‍ത്തും.

ചെരുപ്പുകളെ ബൂട്ട്സ്, സാന്‍ഡല്‍‌സ്, ഷൂസ്, വീട്ടിനകത്ത് ഉപയോഗിക്കുന്നവ, കായിക മത്സരങ്ങള്‍ക്ക് ഉപയോഗിക്കുന്നവ എന്നിങ്ങനെയായി തരം തിരിക്കാം. ഹൈ ഹീല്‍‌സ്, ഫ്ലാറ്റ്, പ്ലാറ്റ്ഫോം, കാഷ്വല്‍‌സ്, ഫ്ലിപ് ഫ്ലോപ്സ് എന്നീ തരംതിരിവുകളും ഇവയിലുണ്ട്.

ചിത്രത്തിലെ ഹൈഹീല്‍ പാര്‍ട്ടിവെയര്‍ ഗെസ് പുറത്തിറക്കിയ 'ലിയാന' ടി സ്‌ട്രാപ് മോഡല്‍ . വില $ 99.00. മേസീസി ന്റെ എല്ലാ ഷോറൂമുകളിലും ലഭ്യം. ഓണ്‍‌ലൈന്‍ പര്‍ച്ചേസും നിലവിലുണ്ട്. ബ്ലാക്, ഗോള്‍ഡ് കളറുകള്‍.

രണ്ടാമത്തെ ചിത്രം സ്ത്രീകള്‍ക്കായുള്ള കാഷ്വല്‍ ചെരുപ്പിനുദാഹരണമാണ്. ബൈകേര്‍സ് വിപണിയില്‍ ഇറക്കിയ ഇതിന് വില $50.00 (Bikers Caliper (Style: 46487). ബൈകേര്‍സ് ഷോറൂമുകളിലും ഓണ്‍‌ലൈന്‍ പര്‍ച്ചേസും നിലവിലുണ്ട്. ഗൌചോ, നാചുറല്‍, ബ്ലാക് നിറങ്ങളില്‍ ലഭ്യം.

പുരുഷന്മാര്‍ക്കുള്ള സ്നീക്കേര്‍സ് . നൈകി വിപണിയിലിറക്കിയ ഇതിന് വില $140.00. നൈകി ഷോറൂമുകളിലും ഓണ്‍‌ലൈന്‍ ആയും വാങ്ങാം.

പാദരക്ഷകള്‍ തെരഞ്ഞെടുക്കുമ്പോള്‍ അവശ്യം ശ്രദ്ധിക്കേണ്ട ചിലകാര്യങ്ങള്‍:
1. കാലിന്റെ കൃത്യമായ അളവിലുള്ളവ വാങ്ങുക.
2. സ്കിന്‍ അലര്‍ജി ഉണ്ടാക്കുന്ന വസ്തുക്കള്‍ കൊണ്ട് നിര്‍മ്മിച്ചവ പൂര്‍ണ്ണമായും ഒഴിവാക്കുക.
3. ബെല്‍റ്റ് ധരിക്കുന്നുവെങ്കില്‍ അതേ നിറത്തിലുള്ള ഷൂസ്/ചെരുപ്പ് തെരഞ്ഞെടുക്കുക.
4. ജോഗിംഗ് ചെയ്യുന്നവര്‍ അതിനനുസൃതമായ അത്‌ലെറ്റിക് ഷൂസുകള്‍ ഉപയോഗിക്കുക.

Sreeja Balaraj / TEAM INDULEKHA

RELATED PAGES
» Life @ US
» Sreeja Balaraj

Crafts: All the way from Gujarath

2008-05-04T09:41:00.001-07:00

കരകൌശലവസ്‌തുക്കളോട് കമ്പമുള്ളവര്‍, വള്ളവും ആനകളും ചിരട്ടത്തവികളും കണ്ട് മടുത്തവര്‍, മറുനാടന്‍ കരവിരുതുകള്‍ ഷോക്കേസില്‍ വയ്‌ക്കാന്‍ മോഹിക്കുന്നവര്‍.....

ഈ പറയുന്നതൊക്കെ എനിക്കും ചേരും എന്നു തോന്നുന്നെങ്കില്‍ എറണാകുളത്ത് ടി.ഡി. എം ഹാളിനടുത്തുള്ള വിമന്‍സ് അസോസിയേഷന്‍ ഹാളിലേക്കു ചെല്ലൂ. മെയ് 18 വരെ ഇവിടെ ഗുജറാത്തില്‍ നിന്നുള്ള കരകൌശല വസ്‌തുക്കളുടെ എക്‌സിബിഷന്‍ നടക്കുന്നു. അവിടെ പോകാന്‍ കഴിഞ്ഞില്ലെങ്കില്‍ മാര്‍ക്കറ്റ് റോഡിലെ ഗുജറാത്ത് എമ്പോറിയം സന്ദര്‍ശിക്കൂ.

ആസാം വുഡിലും റ്റീക്കിലും തീര്‍ത്തതാണ് കരകൌശലവസ്‌തുക്കള്‍. പേരു സൂചിപ്പിക്കുന്നതു പോലെ എല്ലാം കൈകൊണ്ട് നിര്‍മിച്ചവ. പ്രദര്‍ശന ഹാളില്‍, കാട്ടുവള്ളികള്‍ പിണഞ്ഞിരിക്കുന്നതു പോലെയുള്ള മൂന്നു കമ്പുകള്‍ കണ്ടാല്‍, ഇതെന്താണ് ‘സംഗതി’യെന്ന് ആരും ഒന്നു സംശയിക്കും. അതിന്റെ മൂന്നു കമ്പും അകത്തി കുത്തിനിര്‍ത്തിയാല്‍ കൌതുകമുള്ള ബൌള്‍ സ്‌റ്റാന്‍ഡായി. മുഖത്തിന്റെ കൊത്തുരൂപം വെറും ഷോപ്പീസാണെന്നു കരുതരുതേ. ആ മുഖത്ത് നിങ്ങളുടെ കണ്ണട സൂക്ഷിച്ചു വയ്‌ക്കാം. വില 135 രൂപ.

പണ്ട് പള്ളിക്കൂടത്തില്‍ പഠിച്ച കാലത്ത്, രസതന്ത്ര പുസ്‌തകത്തില്‍ കണ്ടിരുന്ന രൂപങ്ങള്‍ പോലുള്ളവ ഹെഡ് മസാജറാണ്. കയ്യും മുഖവും കാലും നടുവും പാദവും മസാജ് ചെയ്യാന്‍ വേറെ രൂപങ്ങള്‍. വില 90-180 രൂപ. പല വളയങ്ങള്‍ ഒട്ടിച്ചു കോര്‍ത്തുണ്ടാക്കിയതാണെന്ന് തോന്നിക്കുന്ന, ഒറ്റത്തടിയില്‍ തീര്‍ത്ത ഫ്രൂട്ട് സ്‌റ്റാന്റിന് 450 രൂപ.

ഗാര്‍ഡന്‍ ചെയറിന് 2250 രൂപ, ടീപ്പോയ്-3000 രൂപ, കോര്‍ണര്‍ സ്‌റ്റാന്‍ഡുകള്‍ക്ക് 200-5000 വരെ. 200-1300 രൂപയുടെ ജുവല്‍ ബോക്‌സ്. എന്തിന് 135 രൂപ കൊടുത്താല്‍ തടിയില്‍ തീര്‍ത്ത ജ്യൂസ് സ്‌ക്വീസര്‍ വരെ ഇവിടെക്കിട്ടും.

Gujarath Emporium, Market Road, Kochi-11

Pushpa M. / TEAM INDULEKHA

sunglass.....really cool !

2008-05-04T09:33:00.001-07:00

സൂര്യന്റെ അള്‍ട്രാവയലറ്റ് രശ്മികളില്‍ നിന്നും കണ്ണുകളെ രക്ഷിക്കാന്‍ ഒരു സണ്‍ഗ്ലാസ് ഉപയോഗിക്കുന്നത് നല്ലതുതന്നെ. സണ്‍ഗ്ലാസുകള്‍ ഇപ്പോള്‍ ആഡംബരത്തിന്റെ ലക്ഷണമെന്നതിലുപരി അവശ്യവസ്തുക്കളുടെ പട്ടികയിലും സ്ഥാനം പിടിച്ചിരിക്കുന്നു. ഉപഭോക്താവിന്റെ അഭിരുചിക്കനുസരിച്ച് വിവിധ മോഡലുകള്‍ ലഭ്യമാണ്.

ഫാഷനബിള്‍ ട്രെന്‍ഡുകള്‍ ഇഷ്ടമുള്ളവര്‍ക്ക് മോഡേണ്‍ വസ്ത്രങ്ങള്‍ക്കൊപ്പം ഡിസൈനര്‍ സണ്‍ഗ്ലാസ് കൂടി ധരിച്ചാല്‍ ഒരു 'കൂള്‍' ലുക് ഉണ്ടാകുമെന്നതില്‍ യാതൊരു സംശയവും വേണ്ട. മുഖത്തിന്റെ ആകൃതിക്കു യോജിക്കുംവിധമുള്ള മോഡലുകള്‍ തെരഞ്ഞെടുക്കാന്‍ പ്രത്യേകം ശ്രദ്ധിക്കുന്നത് നന്നായിരിക്കും. പുതിയ ഫാഷന്‍ രീതികളിലെ ഒഴിവാക്കാനാവാത്ത ഒരു ഘടകമായി ഇവ മാറിക്കഴിഞ്ഞു. ഇന്റര്‍ നാഷണല്‍ ഫാഷന്‍ മാസികകളിലെല്ലാം തന്നെ പുതിയ ഡിസൈനുകളെപ്പറ്റിയുള്ള വിവരണങ്ങള്‍ കാണാം. ഈ രംഗത്ത്, അതികായന്മാര്‍ റേയ് ബന്‍, പോളൊ, ദിയൊര്‍ ( ക്രിസ്റ്റിന്‍ ദിയൊര്‍), പ്രദ, ഗൂച്ചി, സില്‍ഹൂട്, ചാനെല്‍ തുടങ്ങിവരാണ്.

ഈ ചിത്രത്തിലുള്ളത് ദിയൊര്‍ പുറത്തിറത്തിയിട്ടുള്ള ഡിസൈനര്‍ സണ്‍ഗ്ലാസ് 'എയര്‍ സ്പീഡ്2' എന്ന മോഡലാണ്. സ്ത്രീകള്‍ക്കായുള്ള ഈ മോഡലില്‍ ഖാകി നിറമുള്ള പ്ലാസ്റ്റിക് ഫ്രെയിമിനോടൊപ്പം ബ്രൌണ്‍, ഗ്രേ എന്നീ ഷേഡുകളില്‍ ലഭിക്കുന്നു. വില റീട്ടയില്‍ $ 272. ഓണ്‍ലൈന്‍ വഴി ഡിസ്കൌണ്ട് റേറ്റില്‍ $ 234.

ഇതു റേയ് ബന്റെ പുരുഷന്മാര്‍ക്കുള്ള മോഡല്‍. വില $ 149. ഗ്രേയിഷ് ഗ്രീന്‍, ഗ്രേ, ബ്ലാക് എന്നീ നിറങ്ങളില്‍ ലഭ്യം.

സണ്‍ഗ്ലാസുകള്‍ കണ്ണുകളെ അല്‍ട്രാവയലറ്റ് രശ്മികളില്‍ നിന്ന് രക്ഷിക്കുന്നതിനൊപ്പം ഒരു 'മറ' കൂടി നല്‍കുന്നുവെന്ന് പറയാതെ വയ്യ. സ്റ്റൈലിനോടൊപ്പം അല്‍പ്പം പ്രൊട്ടക്‍ഷനും, അതാണ് സണ്‍ഗ്ലാസുകളെ ഇത്ര പോപ്പുലര്‍ ആക്കിയത്. സിനിമാതാരങ്ങളും ഷോ ബിസിനസുമായി ബന്ധമുള്ളവരും ആരാധകരുടെ കണ്ണില്‍ പെടാതിരിക്കാന്‍ വലിയ സണ്‍ഗ്ലാസുകള്‍ ധരിക്കുന്നതു കാണാം. ഒരു പരിധിവരെ ആളുകളുടെ തുറിച്ചുനോട്ടം ഒഴിവാക്കാമെന്നു ചുരുക്കം.

Sreeja Balaraj / TEAM INDULEKHA

RELATED PAGES
» Life @ US
» Sreeja Balaraj

Mix 'n' Match Styles @ Mantra

2008-05-02T12:19:00.000-07:00

ഡിസൈനര്‍ ശാലിനി ജെയിംസിന്റെ മന്ത്രയില്‍ ഗാര്‍മെന്റ്സ് അടുക്കിവച്ചിരിക്കുന്നതിനു പോലും ഒരു ഡിസൈനര്‍ ലുക്കാണ്. ഷോറൂമുകളിലെ ചുമരുകളില്‍ അങ്ങിങ്ങായുള്ള ഷെല്‍‌ഫുകളില്‍ വര്‍ണവൈവിധ്യങ്ങളുടെ ചെറുതുരുത്തുകള്‍.

“കോട്ടണ്‍ വസ്‌ത്രങ്ങളാണ് എന്റെ സിഗ്‌നേച്ചര്‍ സ്‌റ്റൈല്‍. കസ്‌റ്റമര്‍ക്കു വേണ്ടുന്ന ടൈപ്പെല്ലാം ഒരുക്കാന്‍ ശ്രമിക്കാതെ, സ്വന്തം കൈമുദ്രയുള്ള ഡിസൈനര്‍ വെയര്‍ തയാറാക്കുക, അവ കസ്‌റ്റമര്‍ക്ക് പ്രിയങ്കരമാക്കുക. അതാണ് ഡിസൈനറുടെ വിജയം. അതിന് കസ്‌റ്റമറുടെ പള്‍സ് അറിയുകയും വേണം.” പ്രതിവര്‍ഷം 60 ലക്ഷം രൂപ ടേണ്‍ ഓവറുള്ള മന്ത്ര ഗാര്‍മെന്റ്സിന്റെ ഉടമയും ഡിസൈനറുമായ ശാലിനി പറയുന്നു.

“റെഡിമെയ്‌ഡ് അല്ല റെഡി റ്റു വെയര്‍ ആണ് എന്റെ കണ്‍സപ്‌റ്റ്. സാധാരണ റെഡിമെയ്‌ഡില്‍ നിന്നു വ്യത്യസ്‌തമായി കട്ട്, ഫിറ്റ്, ഫിനിഷ്, ഫോള്‍ എന്നിവയില്‍ ഞാന്‍ കൂടുതല്‍ ശ്രദ്‌ധിക്കും. അതു കൊണ്ട് ഇട്ടു നോക്കുമ്പോള്‍ ‘നന്നായിരിക്കുന്നല്ലോ ’ എന്ന തോന്നല്‍ കസ്‌റ്റമര്‍ക്ക് ഉണ്ടാകാം. എക്‌സ്‌ട്രാ സ്മോള്‍ മുതല്‍ എക്‌സ്‌ട്രാ ലാര്‍ജ് വരെ അഞ്ച് സൈസില്‍ മന്ത്രഗാര്‍മെന്റ്സ് ലഭിക്കും. റീപ്പിറ്റഡ് കസ്‌റ്റമേഴ്‌സ് എനിക്ക് ധാരാളമുണ്ട്. അവര്‍ പറഞ്ഞറിഞ്ഞിട്ട് , അവരുടെ ഡ്രസ് കണ്ടിട്ട് ഒക്കെ വരുന്നവര്‍ വേറെ. ” വിവിധ മാധ്യമങ്ങളില്‍ നിന്നു കിട്ടിയിട്ടുള്ള കവറേജും ബിസിനസിന്റെ വളര്‍ച്ചയില്‍ സഹായകമായിട്ടുണ്ടെന്ന് ശാലിനി. മെറ്റീരിയല്‍ സെലക്‌ട് ചെയ്യാന്‍ ശാലിനി ഇന്ത്യയൊട്ടുക്ക് യാത്ര ചെയ്യാറുണ്ട്.

മന്ത്രയ്‌ക്ക് കൊച്ചിയിലും തിരുവനന്തപുരത്തുമായി നാലു ഷോപ്പുകളുണ്ട്. സെറ്റല്ല, മിക്‌സ് ആന്‍ഡ് മാച്ച് വെയറുകളാണ് മന്ത്രയുടേത്. ടോപ്പ്, കുര്‍ത്ത, കുര്‍ത്തി, ബോട്ടം, ദുപ്പട്ട ഇവയില്‍ നിന്ന് നമുക്ക് ഇഷ്‌ടമുള്ള പാറ്റേണും നിറങ്ങളും ഡിസൈനും നോക്കി മാച്ച് ചെയ്യുന്നവ സിലക്‌ട് ചെയ്‌ത് ധരിക്കാം. 800 മുതല്‍ 2000 വരെയുള്ള റേഞ്ചില്‍ ഈ പീസുകള്‍ കിട്ടും. അതെ, മന്ത്ര ബ്രാന്‍‌ഡ് ശാലിനി ഡിസൈന്‍ ചെയ്യുമ്പോള്‍, അതെങ്ങനെ അണിയണമെന്ന് നമുക്ക് ഡിസൈന്‍ ചെയ്യാം, ഡിസൈഡ് ചെയ്യാം.

Shalini James
Mantra, Pearl Complex, Near Reliance Webworld, Palarivattam, Kochi-25
Phone: 91-484-3042166, 91-3201497

Pushpa M. / TEAM INDULEKHA

Tangle Tamer 4 Kids

2008-05-02T12:00:00.000-07:00

ഭംഗിയുള്ള തലമുടി പലതരത്തില്‍ ചീകിക്കെട്ടി സ്റ്റൈലില്‍ സ്കൂളില്‍ പോകാന്‍ മിക്കവാറും എല്ലാ പെണ്‍കുട്ടികള്‍ക്കും ഇഷ്ടമാണ്. എന്നാല്‍ ഇതിനൊക്കെ മുന്‍പെ കുട്ടികള്‍ കരഞ്ഞുവിളിക്കുന്ന ഒരു കാര്യമുണ്ട്. തലമുടിയിലെ ജട കളയുന്ന സമയം. ചീപ്പിനുള്ളില്‍ കുടുങ്ങുന്ന ജട, സമയക്കുറവ് മൂലം അമ്മമാര്‍ വലിച്ചെടുക്കുമ്പോള്‍ കുട്ടികള്‍ ജീവനും കൊണ്ട് പായും. അല്ലെങ്കില്‍ ഉറക്കെ നിലവിളിക്കും. ഒരു സുഹൃത്തിനോട് ഇതേപ്പറ്റി സംസാരിച്ചപ്പോള്‍ അവര്‍ പറഞ്ഞുതന്ന മാര്‍ഗ്ഗമാണ് ലോറിയല്‍ റ്റാങ്കിള്‍ റ്റെയ്മര്‍ (LOreal Kids Tangle Tamer, Burst of Sweet Pear - 9 Oz) എന്ന പ്രോഡക്റ്റിനെപ്പറ്റി. 9 ഔണ്‍സ് കൊള്ളുന്ന പ്ലാസ്റ്റിക് ബോട്ടിലില്‍ ലഭിക്കുന്ന ഇതിന് നല്ലൊരു സുഗന്ധമുണ്ട്. വില ലോക്കല്‍ ഗ്രോസറി സ്റ്റോറുകളില്‍ $2.99, ഇ ബേയില്‍ $2.49.

കുട്ടികള്‍ക്കിഷ്ടമുള്ള നിറമാണ് ഈ ബോട്ടിലിന്. ഇത് തലമുടിയില്‍ സ്പ്രേ ചെയ്തിട്ട് മുടി ചീകിയാല്‍ ജട മുഴുവനും നീങ്ങിക്കിട്ടും. തന്മൂലം കുട്ടികളുടെ 'ജട' സംബന്ധിയായ കരച്ചിലുകള്‍ ഒഴിവാകും, വില കുറവാണെന്ന ഗുണവും. നനഞ്ഞ മുടിയിലോ ഉണങ്ങിയ മുടിയിലോ സ്പ്രേ ചെയ്യാവുന്നതാണ്.
രാവിലെ ഇപ്പോള്‍ അവളുടെ കരച്ചിലും ദേഷ്യപ്പെടലും ഇല്ല. തനിയെ മുടിയൊക്കെ ചീകിയിട്ട് സ്കൂളില്‍ പൊയ്ക്കോളും.

Sreeja Balaraj / TEAM INDULEKHA

RELATED PAGES
» Life @ US
» Sreeja Balaraj

My Fashion: Kavya Madhavan

2008-05-02T01:50:00.000-07:00

കാവ്യ മാധവന് ഫാഷനും ഷോപ്പിംഗും കുടുംബകാര്യമാണ്. അച്‌ഛന്‍ മാധവനും അമ്മ ശ്യാമളയും ഫാഷന്‍ ഡിസൈനര്‍ കൂടിയായ ചേട്ടന്‍ മിഥുനും ബെസ്‌റ്റ് ഫ്രണ്ട് നീലുവും സമയാസമയങ്ങളില്‍ നല്‍കുന്ന എക്‌സ്പര്‍ട്ട് ഒപ്പീനിയന്‍ ഇക്കാര്യത്തില്‍ അത്യന്താപേക്ഷിതമാണ്.

» KAVYA MADHAVAN GALLERY

കാവ്യയുടെ ഇഷ്‌ടവേഷം സാരിയും ചുരിദാറും. “പക്വത തോന്നണമെങ്കില്‍ സാരിയുടുക്കണം. അതുകൊണ്ട് പൊതു പരിപാടികള്‍ക്കു പോകുമ്പോള്‍ ഞാന്‍ മിക്കവാറും സാരിയുടുക്കും. എനിക്ക് ഒതുങ്ങിക്കിടക്കുന്ന സാരികളാണ് ചേരുന്നത്. കൂടുതലും അത്തരം സാരികള്‍ വാങ്ങും.” ‘സദാനന്ദന്റെ സമയ’ത്തില്‍ അഭിനയിക്കുന്നതിനായി സാരിയുടുത്തു നടക്കാന്‍ പഠിപ്പിക്കുമ്പോള്‍ അമ്മ പോലും കരുതിയിട്ടുണ്ടാവില്ല മകളിങ്ങനെയൊരു സാരിക്കമ്പക്കാരിയാകുമെന്ന്.

ചുരിദാറാണ് കാവ്യയ്‌ക്ക് ഏറ്റവും കം‌ഫര്‍ട്ടബിള്‍ വേഷം. കൂടുതല്‍ ധരിക്കാറുള്ളതും അതു തന്നെ. ചുരീബോട്ടമാണെങ്കില്‍ ഇറക്കം കൂടിയ ടോപ്പ്, നീ ലെംഗ്‌ത് ടോപ്പിനൊപ്പം പട്യാല ബോട്ടമോ സാധാരണ ബോട്ടമോ വേണം, മെറ്റീരിയലിന് ആവശ്യത്തിന് കനം വേണം എന്നിങ്ങനെ ചില നിര്‍ബന്ധങ്ങളുണ്ടീ നീലേശ്വരംകാരിക്ക്. സ്‌റ്റിച്ച് ചെയ്യിക്കുന്ന ചുരിദാറും ഉപയോഗിക്കും.ജീന്‍സ്‌ ധരിക്കുന്നത് ലൊക്കേഷനിലേക്കുള്ള യാത്രകളില്‍. മലയാളത്തിന്റെ ശാലീനസുന്ദരി സെറ്റുമുണ്ടുകള്‍ ധാരാളമായി വാങ്ങാറുണ്ട്. എന്തിനെന്നോ- ഫോട്ടോസെഷനുകള്‍ക്കു വേണ്ടി.

“ഡ്രസിനു ചേരുന്ന ആക്‌സസറീസും ചെരിപ്പും ബാഗും ഉപയോഗിക്കാന്‍ ഞാന്‍ ശ്രദ്ധിക്കാറുണ്ട്. ആഭരണങ്ങള്‍ മിക്‌സ് ആന്‍ഡ് മാച്ച് ചെയ്‌തും ഞാന്‍ ഉപയോഗിക്കും. സാരിയുടുത്താല്‍ നിറയെ വളയിടുന്നതാണ് എനിക്കിഷ്‌‌ടം. ഇക്കാര്യത്തില്‍ ഞാന്‍ ഫാഷന്‍ മാത്രം നോക്കാറില്ല. എന്റെ താല്പര്യത്തിന് അനുസരിച്ച് ആക്‌സസറീസ് ഉപയോഗിക്കും.”

Pushpa M. / TEAM INDULEKHA

RELATED PAGES
» Kavya Madhavan Collection

നെറ്റില്‍ ഒരു pet

2008-05-02T01:09:00.000-07:00

ഞായറാഴ്ച സുഹൃത്തിന്റെ വീട്ടില്‍ പോയപ്പോള്‍ കണ്ട കാഴ്ച, അവിടത്തെ ചെറിയ കുട്ടി തറയില്‍ ഉരുണ്ട് കരയുന്നു. കാരണം തിരക്കിയപ്പോള്‍ മനസ്സിലായി കുട്ടിക്ക് ഒരു 'പെറ്റ് ' വേണം. പട്ടിയോ പൂച്ചയോ സ്വര്‍ണ്ണമീനോ അണ്ണാനോ ആമയോ തത്തയോ അങ്ങനെ എന്തെങ്കിലും. സുഹൃത്തിനാണെങ്കില്‍ ജോലിത്തിരക്കുണ്ട് പിന്നെ കുട്ടികളുടെ കാര്യം , വീട്ടുകാര്യം. അതിനിടയ്ക്ക് ഈ മാതിരി തലവേദനകളില്‍ യാതൊരു താത്‌പര്യവും ഇല്ല. മാത്രമല്ല ചെറിയ അപാര്‍ട്മെന്റില്‍ താമസിക്കുമ്പോള്‍ മനുഷ്യര്‍ക്ക് നേരെ ചൊവ്വേ നിന്നു തിരിയാനിടമില്ല, പിന്നെയല്ലേ 'പെറ്റ്സ്'. ഒടുവില്‍ കാര്യം സോള്‍‌വ്ഡ് ആയത് 'വെബ്‌കിന്‍സ് ‘ വഴി. പരാമസ് മാളിലെ കേബി ടോയ്‌സില്‍ നിന്ന് അറേബ്യന്‍ ഹോഴ്‌സിനെ കുട്ടിക്ക് വാങ്ങിച്ചുകൊടുത്തു. സംഗതി വെര്‍ച്വല്‍ ആണെന്ന് മാത്രം. വിലയും കുറവ് , 15 ഡോളറില്‍ താഴെ.

ഇന്റെര്‍നെറ്റില്‍ നിന്ന് പെറ്റ് ആനിമല്‍‌സിനെ ദത്തെടുക്കുന്ന രീതിയാണിത്. എട്ടു ഡിജിറ്റുകളുള്ള കോഡ് രേഖപ്പെടുത്തിയ സ്റ്റഫ് ചെയ്ത ടോയ്സ് ചില സൈറ്റുകള്‍ വിപണിയില്‍ ഇറക്കുന്നു. അവ വാങ്ങി ആ സൈറ്റില്‍ കോഡ് ചേര്‍ക്കുന്നതോടെ നമുക്ക് അവിടെ വെര്‍ച്വല്‍ ആയി അതേ പെറ്റിനെ കിട്ടുന്നു. പിന്നീട് നമുക്ക് അതിനനുവദിച്ച് കിട്ടിയിരിക്കുന്ന റൂം മോടിപിടിപ്പിക്കാം, ഗെയിംസ് കളിച്ച് 'കിന്‍കാഷ്' ( വെര്‍ച്വല്‍ പണം) സമ്പാദിച്ച് പെറ്റിനു വേണ്ട കാര്യങ്ങള്‍ വാങ്ങിക്കാം..അങ്ങനെ നമ്മള്‍ ഒരു വളര്‍ത്തുമൃഗത്തിനുവേണ്ടി ചെയ്യുന്ന എല്ലാം വെര്‍ച്വല്‍ ആയി ചെയ്യാം.
ഇത് നല്‍കുന്ന പ്രധാന സൈറ്റുകള്‍ webkins.com, shiningstar. com എന്നിവയാണ്. മിക്കവാറും എല്ലാ ടോയ് ഷോപ്പുകളിലും ഓണ്‍‌ലൈനായും ഇവ ലഭിക്കും.

വീട് അലങ്കോലമാകില്ല, കുട്ടികള്‍ക്ക് സന്തോഷം, മാസാമാസം വെറ്ററിനറി ഡോക്റ്ററുടെ അടുത്ത് പോകണ്ട, അവ നമ്മളെ ഉപദ്രവിക്കുമോ എന്ന ഭയം വേണ്ട, അലര്‍ജിയുണ്ടാകുമെന്ന പേടിയും വേണ്ട. കുട്ടികള്‍ നെറ്റിന് അടിമകളാകാതെ ശ്രദ്ധിക്കണമെന്നു മാത്രം.

Sreeja Balaraj / TEAM INDULEKHA

RELATED PAGES
» Life @ US
» Sreeja Balaraj

My Fashion: Padmapriya

2008-04-30T01:24:00.000-07:00

ബോള്‍ഡ് ആന്‍ഡ് ബ്യൂട്ടിഫുള്‍ പത്മപ്രിയയ്‌ക്ക് ആകാശത്തിന്‍ കീഴില്‍ എന്തിനെക്കുറിച്ചും സ്വന്തമായ അഭിപ്രായമുണ്ട്. ഫാഷനെക്കുറിച്ച് പദ്മപ്രിയ പറയുന്നതു കേള്‍ക്കുക.

“ഒരാള്‍ ആരാണെന്നും എന്താണെന്നും പ്രതിഫലിപ്പിക്കാന്‍ ഫാഷനു കഴിയും. ഫാഷനിലൂടെ നമ്മുടെ അന്തസത്തയെ നമ്മള്‍ വെളിപ്പെടുത്തുകയാണ്. മറ്റുള്ളവര്‍ക്ക് നമ്മളെക്കുറിച്ച് പൂര്‍ണമായ ചിത്രം നല്‍കുന്നതില്‍ നാം അണിയുന്നവയ്‌ക്ക് പങ്കുണ്ട്.”

» PADMAPRIYA GALLERY

സാധാരണ നടിമാരില്‍ നിന്നു വ്യത്യസ്‌തമായി പൊതുവേദികളില്‍ പോലും മിനിമം മേക്കപ്പോടെ പ്രത്യക്ഷപ്പെടുന്ന, ബസ് യാത്ര ചെയ്യുന്ന പത്മപ്രിയ, ഫാഷനിലെ ഇഷ്‌ടാനിഷ്‌ടങ്ങളെക്കുറിച്ച് പറയുന്നു.

ഇഷ്‌ടവേഷം: മൂഡിന് അനുസരിച്ച് ഇഷ്‌ടവേഷം മാറിക്കൊണ്ടിരിക്കും. കാരണം ഞാന്‍ അങ്ങേയറ്റം ഇന്‍ഡിവിജുവലിസ്റ്റാണ്. വുമന്‍ ഓഫ് എക്‌സ്‌ട്രീം എന്നു പറയാം. എന്റെ മൂഡ് വസ്‌ത്രധാരണത്തില്‍ പ്രതിഫലിക്കുന്നു. അങ്ങനെ നോക്കിയാല്‍ ഞാന്‍ എന്റെ മനോഭാവങ്ങളെയാണ് അണിയുന്നത് എന്നു പറയാം.

ഇഷ്‌ടബ്രാന്റ് / ഷോപ്പ്: വഴിയോരക്കച്ചടക്കാര്‍ മുതല്‍ കരകൌശലവിദഗ്‌ധര്‍ മുതല്‍ വെസ്‌റ്റേണ്‍ ബ്രാന്റ് Gucci വരെ എനിക്കിഷ്‌ടമാണ്. അവരെയൊക്കെ ഞാന്‍ സ്‌നേഹിക്കുന്നു. അവര്‍ക്കെല്ലാം അവരുടേതായ ഭാഷയുണ്ട്. അതണിയാന്‍ ഞാന്‍ ഇഷ്‌ടപ്പെടുന്നു. അതു കൊണ്ടു തന്നെ ഇക്കാര്യത്തില്‍ ഫേവറിറ്റിസമില്ല.

മാച്ചിംഗ് ആക്‌സസറീസ്: ലെസ് ഈസ് മോര്‍

ഇഷ്‌ട ആഭരണങ്ങള്‍: ഡയമണ്ടിലും പ്ലാറ്റിനത്തിലും ഉള്ളതെന്തും തീര്‍ച്ചയായും ഇഷ്‌ടമാണ്. അടുത്തതായി ജങ്ക് വെയറും കല്ലുപതിച്ച ഗോള്‍ഡ് വെയറും. പക്ഷേ, അവ എത്രയും ചെറുതായിരിക്കണം, ഒട്ടും അരോചകമാകാനും പാടില്ല.

Pushpa M. / TEAM INDULEKHA

RELATED PAGES
» Padmapriya Collection

Glitzy Jodha Akbar Collection

2008-04-29T01:05:00.000-07:00

ആത്മധൈര്യത്തിന്റെയും ധീരതയുടെയും സൌന്ദര്യത്തിന്റെയും പ്രതീകമായ രജപുത്രവനിതയുടെ ആഭരണങ്ങള്‍ എങ്ങനെ ആയിരുന്നിരിക്കണം? തീര്‍ച്ചയായും അവ കുലീനവും ഉറപ്പുള്ളതുമായിരിക്കുമെന്ന് ആര്‍ക്കാണ് ഊഹിക്കാന്‍ കഴിയാത്തത്.

MORE DESIGNS @
PINK GALLERY

എറണാകുളത്ത് എം. ജി റോഡില്‍ പദ്മ ജംഗ്‌ഷനിലുള്ള തനിഷ്‌ക് ഷോറൂമില്‍ ജോദ്ധാ അക്‌ബര്‍ കളക്ഷന്‍ ആഭരണങ്ങള്‍ ഒരുക്കിയിരിക്കുന്നു. ഭാരമേറിയതും വലിപ്പമേറിയതുമാണ് ഇവ.ഹോസൂറിലെ പണിക്കാര്‍ കൈകൊണ്ടു നിര്‍മിച്ച ഈ ആഭരണങ്ങളില്‍ ഉപയോഗിച്ചിരിക്കുന്നത് അണ്‍കട്ട് പ്രെഷ്യസ് സ്‌റ്റോണ്‍സാണ്.

കട്ട് ചെയ്യാത്തതിനാല്‍ അവയ്‌ക്ക് പല വലിപ്പവും ആകൃതിയുമാണ്. പക്ഷേ, വീതിയേറിയൊരു നെക്‌ലേസില്‍, വലിയൊരു കമ്മലില്‍ ഒരുമിച്ചു സെറ്റ് ചെയ്‌തിരിക്കുന്നതു കണ്ടാല്‍ എന്തൊരു ഭംഗിയാണ്.

കട്ട് ചെയ്യാത്ത വജ്രക്കല്ലുകള്‍ പതിച്ച, അരക്കിലോ സ്വര്‍ണത്തില്‍ തീര്‍ത്ത ഈ നെക്‌ലേസ് നോക്കൂ. വജ്രത്തിളക്കവും സ്വര്‍ണത്തിളക്കവും മത്സരിക്കുന്ന ഈ മാല സ്വന്തമാക്കണമെങ്കില്‍ 22 ലക്ഷം മുടക്കണം. ജോദ്ധ അക്‍ബറില്‍ ഐശ്വര്യ റായ് അണിഞ്ഞ ചുവന്ന കല്ലു പതിച്ച, ആഭരണത്തിന് 200- 300 ഗ്രാം തൂക്കം വരും. വില 18 ലക്ഷം. ഒരു ലക്ഷം രൂപ വരുന്നതും ഇക്കൂട്ടത്തിലെ സിം‌പിള്‍ എന്നു പറയാവുന്നതുമായ ആഭരണങ്ങള്‍ക്ക് ഓര്‍ഡര്‍ നല്‍കാന്‍ പെണ്‍‌മനസ് മടിക്കുന്നത്രേ.

Tanishq
40/9351, M G Road , Padma Junction, Kochi - 35.
Phone: +91-484-2360808, +91-9847044284
Fax: +91-484-2360303
E-mail: btqcoc@tanishqmail.com
www.tanishq.co.in

Pushpa M. / TEAM INDULEKHA

RELATED PAGE
» Aiswarya Rai in Choker Bali

Sudha's Exquisite Temple Jewellery

2008-04-28T09:34:00.000-07:00

ദേവത, ഗാന്ധാരി, ചാരുലത, പാഞ്ചാലി....തെറ്റിദ്ധരിക്കരുതേ, ഇതൊന്നും സീരിയല്‍പ്പേരല്ല. ഈ ചിത്രത്തില്‍ കാണുന്ന ടെമ്പിള്‍ ജുവലറി കളക്ഷനിലെ ആഭരണങ്ങള്‍ക്ക് സുധാ ബാലചന്ദ്രന്‍ കൊടുത്ത പേരുകളാണ്. എറണാകുളം സെന്റ് തെരേസാസിലെ സുന്ദരിക്കുട്ടികളുടെ പ്രിയപ്പെട്ട മലയാളം മിസ്സിന്റെ ഇഷ്‌ടങ്ങളിലൊന്നാണ് ടെമ്പിള്‍ ജുവലറി ഡിസൈനിംഗും വില്‍പ്പനയും.

MORE DESIGNS @ PINK GALLERY

“നാഗര്‍കോവിലിലെ ഗ്രാമങ്ങളിലെ ആഭരണപ്പണിക്കാര്‍- കലാകാരന്മാരെന്നേ ഞാനവരെ പറയാറുള്ളൂ. അവരാണ് ഇവ ഉണ്ടാക്കുന്നത്. ആ ബേസിക് ഡിസൈന്‍ നിലനിര്‍ത്തിക്കൊണ്ട് ഞാന്‍ പല ഡിസൈനുകളും ചെയ്യിക്കുന്നുണ്ട്. സത്യത്തില്‍ ഇതിനൊന്നും ആദ്യം പേരില്ലായിരുന്നു. പണിക്കാര്‍ക്ക് ഡിസൈന്‍ പറഞ്ഞുകൊടുക്കാനും കസ്‌റ്റമേഴ്‌സില്‍ നിന്ന് ഓര്‍ഡര്‍ എടുക്കാനുമുള്ള എളുപ്പത്തിന് ഞാന്‍ പേരിട്ടതാണ്. ” സുധ പറയുന്നു.

പാരമ്പര്യത്തനിമയും പ്രൌഢഭംഗിയുമാണ് ടെമ്പിള്‍ ജൂവലറിയുടെ പ്രത്യേകത. കൈ കൊണ്ടാ‍ണ് ഇവ പണിയുന്നത്. കടുംനിറങ്ങളില്‍ പോളിഷ് ചെയ്യാത്ത, അണ്‍കട്ട് സെമിപ്രെഷ്യസ് സ്‌റ്റോണ്‍സാണ് ഇതിലുള്ളത്. വെള്ളിയില്‍ പണിത്, 24 കാരറ്റ് തനിത്തങ്കം പൂശി ഫിനിഷ് ചെയ്യുന്നു.

പഴയകാലത്ത് രാജകുടുംബങ്ങളില്‍ ഉണ്ടായിരുന്ന, അമ്പലങ്ങളില്‍ ദേവീദേവന്മാരെ അണിയിച്ചിരുന്ന ടെമ്പിള്‍ ജുവലറി കളക്ഷന്‍ സ്വന്തമാക്കണമെങ്കില്‍ കാശല്‍‌പം പൊടിക്കണം. ഒരു മാലയ്‌ക്ക് ആയിരം മുതല്‍ പതിനായിരം രൂപ വരെ വില വരും. കമ്മലുകള്‍ 300-1500 വരെയുള്ള റേഞ്ചില്‍ കിട്ടും.കല്ലും വര്‍ക്കും കൂടുന്നതിന് അനുസരിച്ച് വില കൂടും. കമ്മല്‍, വള, ലോക്കറ്റ്, മോതിരം ..... എന്തും ഈ ഫാഷനില്‍ കിട്ടും. ഇനിയിവ, സ്വര്‍ണത്തില്‍ ചെയ്യിക്കണമെങ്കില്‍ അഞ്ചു പവന്‍ മാലയ്‌ക്ക് ഇന്നത്തെ വിലയനുസരിച്ച് ഒരു ലക്ഷം രൂപ കൊടുക്കേണ്ടിവരും.

പാരമ്പര്യവിരുദ്‌ധരാണ് നിങ്ങളുടെ കൂട്ടുകാരെങ്കില്‍ ‘ഇതൊക്കെയിട്ട് ഡാന്‍സ് കളിക്കാന്‍ പോകുന്നോ ’ എന്ന് വിലക്കിയേക്കാം. എന്നാല്‍, ടെമ്പിള്‍ ഡിസൈന്‍ വര്‍ക്കുള്ള സാരിയുടുക്കുമ്പോള്‍, കേരളാസാരിയും പട്ടുപാവാടയും അണിയുമ്പോള്‍ ടെമ്പിള്‍ ജുവലറി കൂടിയുണ്ടെങ്കില്‍ ആ സ്റ്റൈലൊന്നു വേറെ.

Sudha Balachandran
9 C, Manimeda, Autumn Dale (SI Properties Flat), Vidya Nagar, Ernakulam - 20
Phone: +91-481- 2323372, +91-9447048194
Email: sootymani@rediffmail.com, sootymani@hotmail.com

Pushpa M. / TEAM INDULEKHA

Zeritta's Wedding Gowns

2008-04-02T23:20:00.000-07:00

കേരളപ്പിറവിക്കും വിശേഷാവസരങ്ങളിലും മാത്രം സാരിയുടുക്കുന്ന പെണ്‍കുട്ടി, സ്വന്തം വിവാഹനാളില്‍, അള്‍ത്താരയ്‌ക്കു മുന്നില്‍, ആയിരം കണ്ണുകള്‍ക്കു നടുവില്‍ ഏതു വേഷത്തില്‍ പ്രത്യക്ഷപ്പെടാനാണിഷ്‌ടപ്പെടുക. അമ്മയുടെയും അമ്മായിയുടെയും കല്യാണ ആല്‍ബത്തിലുള്ള അതേ വെള്ളസാരിയേക്കാള്‍, അവളെ മാലാഖയാക്കുന്ന ഗൌണുകള്‍ക്ക് പ്രിയം കൂടുന്നു.

എറണാകുളത്ത് മാര്‍ക്കറ്റ് റോഡിലെ ഫോണിക്‌സില്‍ സെറിറ്റ ഗൌണ്‍ ഒരുക്കുന്ന തിരക്കിലാണ്. ‘എറണാകുളത്തു നിന്നു മാത്രമല്ല, മറ്റു ജില്ലകളില്‍ നിന്നും ഓര്‍ഡര്‍ കിട്ടാറുണ്ട്. പ്രത്യേകിച്ച് തൃശൂരില്‍ നിന്ന്. മുമ്പൊക്കെ ആംഗ്ലോ ഇന്ത്യന്‍സ് മാത്രമായിരുന്നു കല്യാണത്തിന് ഗൌണ്‍ ചെയ്യിച്ചിരുന്നത്. ഇപ്പോള്‍ എല്ലാ ക്രിസ്‌ത്യന്‍സും വരാറുണ്ട്. ’ആംഗ്ലോ ഇന്ത്യനായ സെറിറ്റ പറയുന്നു.

ഇം‌പോര്‍ട്ടഡ് സാറ്റിന്‍ തുണിയിലാണ് സെറിറ്റ ഗൌണ്‍ ചെയ്യുന്നത്. അതിനു വീതി കൂടുതലുണ്ട് എന്നതു തന്നെ കാര്യം. നെറ്റ്, ഓര്‍ഗന്‍സാ, ഗ്ലാസ്, ബീഡ്‌സ്.... എല്ലാം ഗൌണ്‍ മനോഹരമാക്കാന്‍ ഉപയോഗിക്കുന്നു. 8000-40,000 വരെയുള്ള ഗൌണുകള്‍ സെറിറ്റ ഡിസൈന്‍ ചെയ്യുന്നുണ്ട്. പിന്നിലേക്ക് കിടക്കുന്ന ട്രെയിലിന്റെ നീളം കൂടുന്നതിനനുസരിച്ചും പണിത്തരങ്ങള്‍ക്കനുസരിച്ചും വില കൂടുന്നു.

ഗൌണിട്ട മണവാട്ടി പരമ്പരാഗത ആഭരണങ്ങളിട്ടാല്‍ വെസ്‌റ്റേണ്‍ ലുക്ക് വരില്ലെന്ന് സെറിറ്റ. ‘ഡയമണ്ടോ വൈറ്റ് ഗോള്‍ഡോ ആണ് ഗൌണിനൊപ്പം യോജിക്കുന്നത്.

ഗൌണിനു പുറമേ സാരിയും മറ്റും ഡിസൈന്‍ ചെയ്യുന്ന സെറിറ്റ നല്ലൊരു വെഡ്‌ഡിംഗ് പ്ലാനറാണ് ഏല്‍പ്പിച്ചാല്‍ ഉപ്പു തൊട്ട് കര്‍പ്പൂരം വരെ ഒരുക്കിക്കൊടുക്കും. ട്രഡീഷണല്‍, വെസ്‌റ്റേണ്‍, മുഗള്‍ എന്നിങ്ങനെ ഏതു തരത്തിലും സ്‌റ്റേജ് ഡെക്കറേഷന്‍ ചെയ്‌തു കൊടുക്കും. തീം വെഡ്‌ഡിംഗിന് 5 മുതല്‍ 30 ലക്ഷം വരെ ചാര്‍ജുണ്ട്.

Zeritta
Fonix, Market Road, Kochi.
Phone: +91-484-2394374, 6532596, +91-9846143006
E-mail: fonixflorist@rediffmail.com

Pushpa M. / TEAM INDULEKHA

TOP TEN @ PiNK

2007-06-28T11:33:00.001-07:00

1. My Fashion: Kavya Madhavan
2. My Fashion: Padmapriya
3. Aakhosh @ Studio
4. My Money: Beena Kannan
5. Mandira Bedi 4 Seemaatti
6. sunglass.....really cool!
7. അടിപൊളി Aakhosh
8. Shalini @ Mantra
9. Wow.. സ്റ്റൈലന്‍ Shoes!
10. Portfolio: Eugine Pandala

(Statistics by Google Analytics)

TOP TEN is based on the traffic data of indulekha.com for the last two weeks. Factors determine the rank: number of unique visits to a page, number of repeated visits, total time spent on each page and comments received.