Il blog dal Comitât 482

Cui ti dîs di no par une ore?

2009-07-02T19:02:00.003+02:00

Ai 30 di Jugn, ospit a Radio Spazio 103, il president de Zonte regjonâl Renzo Tondo al à declarât che il fat che il 64% dai gjenitôrs al vedi domandât di vê la lenghe furlane a scuele nol è masse significatîf. Il president de Regjon al à marcât di no jessi dacuardi cu la posizion dal condutôr su cheste cuestion e al à dite: “Se ti rive a cjase la letare 'vûstu il furlan?' Tu disis sì. Cui ti dîs di no par une ore... Nol è... [indicatîf]. Se tu fasis la stesse domande 'vûstu l'inglês o il todesc' ti disin di sì...”

Achì però no si fevele di sondaçs di opinion, ma des domandis fatis dai gjenitôrs al moment de preiscrizion. Che al vûl dî che, daûr de legjislazion dal stât (482/99), lis scuelis a àn di garantî almancul ai fîs di chestis personis l’insegnament de lenghe proprie dal Friûl. O pensìn che, tant che massim rapresentant istituzionâl di cheste Regjon, Tondo al varès di mostrâ plui atenzion pe volontât dai citadins e di ativâsi par che lis leçs a sedin rispietadis, ancje tal câs che nol sedi dacuardi cun lôr. Cul stes sisteme, si podarès dî che il fat che Tondo al sedi president de Regjon nol è masse significatîf; se ai furlans i fos stât domandât se a volevin president Obama o la Merkel la percentuâl di preferencis e sarès stade compagne...

Ancjemò une note prime di finî. La frase dal president de Regjon, inte version de ANSA par talian, e devente: “non vuol dire nulla; se la domanda fosse stata per l'inglese la percentuale sarebbe stata identica se non superiore.” Se no si è nancje bogns di fâ une traduzion cussì semplice e je propite vere che al covente plui furlan a scuele...

Campagne cuintri dal furlan: un altri atac cence mani

2009-06-18T19:12:00.005+02:00

Daspò de sentence de Cort Costituzionâl al à tornât a alçâ il cjâf il partît trasversâl dai antifurlans. Chest viaç al somee che la cuestion e sedi che si spindin masse bêçs pe lenghe furlane.

Tra i diviers atacs fats indenant, chel che une cierte stampe locâl (in particolâr il Messaggero Veneto) e à metût plui in evidence al è stât chel rivât dal conseîr regjonâl Pietro Colussi cuintri dal lavôr dal Grant Dizionari Bilengâl Talian – Furlan fat dal Centri Friûl Lenghe 2000 (consorzi formât di Universitât dal Friûl, Consorzi Universitari dal Friûl, Societât Filologjiche Furlane, Informazion Furlane soc. coop., Istitût Ladin Furlan “Pre Checo Placerean”, Circul Culturâl “Menocchio”, Union Scritôrs Furlans e Serling soc. coop.). Lis acusis a jerin di ritarts e di coscj masse alts, cundut che i timps di consegne a son simpri stâts rispietâts e i coscj di produzion a son stâts valutâts masse bas di esperts tant che il grant linguist e ex ministri Tullio De Mauro, ma ancje dal linguist Michele Cortelazzo citât dispès di cierts gjornaliscj in maniere pôc corete.

Ce rispueste aie dade la int al GDBTF? Il sît dal CFL2000 al è stât consultât plui di 200.000 voltis, plui o mancul 8.000 personis a àn vût a gratis il GDBTF in CD za tal 2005 e altris 5000 e passe lu àn scjariât, simpri a gratis, di Internet. Ancje la presentazion de seconde edizion dal CD, fate l'an passât, e à viodût la partecipazion di almancul uns 300 personis (te foto).

Duncje, rispiet a ce che al à dite Colussi, ma soredut chei gjornaliscj che a àn sglonfade la robe, il panorame al è pardabon un altri: finanziaments masse precaris e bas, une opare preseade in Friûl e a nivel talian e internazionâl, cjapade di esempli de universitât di Stocolm in colaborazion cul CNR di Pise, la universitât di Macerata e l'Istitût di Ricercje pes Lenghis de Finlande. Cun di fat, l’assessôr regjonâl Roberto Molinaro, che si è confrontât cui dirigjents de ARLeF e dal CFL2000, al à parât indaûr dutis chestis acusis cence fonde.

Elete al parlament european une candidade che e à sotscrit il document dal Comitât 482

2009-06-11T08:41:00.004+02:00

E je Debora Serracchiani dal Partît Democratic. Chi o podês cjatâ la sô adesion scrite al document preparât dal Comitât 482 pes elezions europeanis dal 2009.

Fâ confusion par sabotâ la tutele des lenghis minoritariis

2009-06-06T10:29:00.010+02:00

Chest al è un dai sprocs di chei che a vuelin che lis lenghis minoritariis a sparissin: dopo passadis lis leçs di tutele, in particolâr la 482, o viodìn che lis fuarcis contrariis ai dirits linguistics, in gjenerâl di ispirazion nazionaliste taliane, a justin la lôr tatiche.

Limitazion dai fonts economics, interpretazions des leçs une vore limitativis e salacor anticostituzionâls (ancje se dadis propit de Cort Costituzionâl) e confusion par gjavâ dignitât e dirits aes comunitâts che a fevelin une lenghe diferente dal talian. In chest cuadri articolât a jentrin dal sigûr i proviodiments in tutele dai dialets venits, sostignûts in particolâr di chei conseîrs regjonâi che si son batûts in maniere plui barbare cuintri de L. 29/2007 pe tutele e pe promozion de lenghe furlane, ma a son ancje altris azions, a nivel talian.

Tai prins doi coments di chest post us proponìn un document interessant, difondût in chescj dîs ancje dal CIRF de Universitât dal Friûl, che al mostre chescj elements:
- confusion tra lenghe e dialet, no par dâ plui tutele ai dialets, ma par gjavâ chê misare tutele che a àn aes lenghis minoritariis;
- riclams ripetûts ae Nazion Taliane, come se e fos menaçade des lenghis minoritariis, ma naturalmentri no dai dialets;
- la declarazion platade che lis lenghis minoritariis no son valôrs che a fasin part dal patrimoni de Nazion Taliane, e duncje no van sostignudis par no creâ divisions "etinichis";
- un atac ae dignitât di lenghe dal sart e dal furlan, par sbassâju al nivel di dialets;
- un atac cuintri dal standard linguistic des lenghis minoritariis (in chest câs cul pretest dal albanês) par mantignîlis intune mancjance di riferiment che e produsi la lôr assimilazion al talian;
- la declarazion di volê fâ clarece e distinzion, intant che al è clâr che si vûl fâ confusion e gjavâ fondis economichis ae tutele des lenghis minoritariis.
L'autôr di chescj atacs al è il calabrês Pierfranco Bruni, che si declare president dal "Istituto di Cultura delle Lingue del CSR", ent misteriôs che nol à nancje une pagjine web li che si puedi documentâsi su lis sôs bielis propuestis e iniziativis. Cun di plui Bruni al è funzionari dal Ministeri pai Bens e pes Ativitâts Culturâls.

Europe: 7 candidâts pai dirits linguistics

2009-05-31T07:35:00.006+02:00

A son siet i candidâts dal Friûl – VJ in corse pes elezions europeanis che a àn dât la lôr adesion ai ponts programatics fats indenant dal Comitât 482. Chest il cuadri che al è vignût fûr dal incuintri di vuê di buinore a Udin. A aderî a son stâts i candidâts: Igor Kocijančič (Lista Comunista e Anticapitalista), che al à partecipât al incuintri ancje par cont dai coleghis di liste Maria Pia Covre e Sergio Minutillo; Boris Pahor (Slovenska Skupnost / Union Slovene che e cor cu la SVP sudtirolese), che al è stât rapresentât dal conseîr regjonâl Igor Gabrovec; Debora Serracchiani (PD) che, impegnade inaltrò, e à aderît cuntun document che o cjatais achì; Gian Luigi Gigli (UDC), ancje lui cuntune adesion scrite e motivade che o podês lei achì; e Valeria Grillo (L’Autonomia), che e à puartât la sô adesion di persone a pene finît l’incuintri.

Altris candidâts a àn declarât la lôr poie aes bataiis a pro des lenghis minorizadis, ma cence dâ ancjemò une adesion formâl. Si fevele di: Igor Komel (Sinistra e Libertà), Luigi Ferone (L’Autonomia – Pensionati), e Maddalena Spagnolo (LN). Nissune rispueste, invezit, di chei altris candidâts…

Se cualchidun al à di rapresentâ il Friûl – VJ in Europe, o sperìn che al sedi un tra i candidâts a pro de bataie pai dirits linguistics.
Altris detais su la iniziative sul sît dal comitât.

Incuintri public dal Comitât 482 cui candidâts aes elezions europeanis

2009-05-29T07:26:00.002+02:00

Par sensibilizâ il mont politic regjonâl su la situazion dai dirits linguistics in Friûl - V. J., sabide ai 30 di Mai aes 11.30 inte sale Pasolini dal palaç gnûf de Regjon (Udin) il Comitât 482 al fasarà un incuintri public cui candidâts dal Friûl-V.J. aes elezions pal Parlament european. Dopo di cheste iniziative a son in program altris incuintris cui politics regjonâi e i parlamentârs elets in Friûl-V.J.

Doman il Comitât 482 su Onde Furlane

2009-05-25T19:11:00.004+02:00

La conference stampe di vuê e sarà trasmetude doman martars ai 26 di Mai su Radio Onde Furlane aes 8.30 e aes 12.30. Il file audio de conference stampe al sarà ancje publicât in curt sul sît dal Comitât 482.

Conference stampe e gnûf comunicât dal Comitât 482

2009-05-25T17:40:00.011+02:00

Vuê il Comitât 482 al à tignût une conference stampe inte sede di Onde Furlane a Udin par ilustrâ la sô posizion in mert al tai dai fonts pe leç 482 e ae sentence de Cort Costituzionâls su la leç regjonâl 29. Chi o podês cjatâ il test dal comunicât dât fûr intant de conference stampe ("Dirits linguistics sot atac: resisti al è necessari").

Par no finî intune risierve

2009-05-23T16:42:00.004+02:00

La Cort Costituzionâl, ae fin, e à dite la sô in mert ai comis de leç regjonâl sul furlan che a jerin stâts impugnâts dal guvier talian. Par savênt di plui, o podês cjatâ achì il test de sentence.
La leç regjonâl su la lenghe furlane e veve chê di superâ chei pidiments pratics che si veve cjatât par meti in vore la 482/99. Cumò al coventarà cjatâ altris sistemis par superâju.
Ciert al è che cierts passaçs de sentence si fâs fature a glotiju. Al pâr cuasi che a vedin voie di sierânus tune risierve. Il probleme al è che inte storie dal Friûl al è plui facil cjatâ republichis libaris che no risiervis... e, alore, nus tocjarà fâ ce che i furlans a san fâ miôr, ven a dî: resisti.
O vin resistût par secui, o resistarìn ancjemò!

Conference stampe dal Comitât 482

2009-05-22T19:06:00.004+02:00

Lunis ai 25 di Mai a Udin e sarà la conference stampe di presentazion dal rapuart su la situazion dai dirits linguistics de minorance furlane prontât dal Comitât 482 che al è za stât mandât al Ministeri dal interni talian e al Comitât european che al à il compit di controlâ la metude in vore de Convenzion Cuadri pe Protezion des Minorancis Nazionâls. La conference stampe e sarà regjistrade di Radio Onde Furlane e e vignarà trasmetude cuntun speciâl di pueste.

Par tignî vive la flame di pre Checo Placerean

2009-05-06T22:07:00.014+02:00

Vuê dopodimisdì, alì de sale dal Consei de Provincie di Udin, l’Istitût Ladin Furlan “Pre Checo Placerean”, un dai membris fondadôrs dal Comitât 482, al à presentât la gnove version dal sît internet de associazion, che si pues cjatâlu achì.
Il sît, rignuvît te sô muse e tai contignûts, al informe su lis ativitâts davueltis dal Istitût e al ufrìs un archivi informatic dedicât a pre Checo Placerean cun notis su la sô vite e cuntune selezion impuartante dai siei scrits (che e larà a insiorâsi cul timp).
Juste par dânt une cerce, o proponìn achì un tocut dal scrit «La realtà etnico-culturale del popolo friulano» (1977): “Il Friûl al è un popul ancjemò vîf e vivarôs, ma pressât di un tentatîf di colonizazion che al è in vore. La cussience de sô origjinalitât nazionâl e dâ segnâi di disveâsi. La democrazie - chê vere - no varès di cancelâ i piçui, ma di difindiju. Dut câs, si spere che la Europe, se no la Italie, e cjatarà il mût di judâlu a decolonizâsi, e a rivâ al nivel di colaboradôr, no di servidôr. E la disgracie dal taramot no lu coparà - cemût che cierts cjâfs lu bramin cence dîlu - compagn che lis vueris mondiâls cui 40.000 e plui muarts no son rivadis a mandâlu par aiar.” Ta chest 6 di Mai, a 33 agns dal Orcolat, o podìn propite dî che pre Checo le veve imbrocade su la capacitât di reazion dai furlans al taramot, ma bisugne ancjemò lavorâ par fâ deventâ realtât il rest de sô prevision.

Stât e nazion, dôs robis diferentis

2009-04-23T10:02:00.003+02:00

Doi agns indaûr nus lassave pre Toni Beline, un om e un predi libar e mestri di libertât. Vuê o volìn ricuardâlu cun cheste sô riflession su la diference fra stât e nazion.

"Il stât al à une colegance politiche; pal solit il plui fuart che al rivave adore di montâ su la sente e di fâ stâ sot chei altris. Al à parentât cu la prepotence. La nazion, o nazionalitât, invezit e je une comunance di popul, lenghe, usancis, di storie, di anime. E à parentât cu la culture. Cualchi volte stât e nazion a puedin vê i stes confins; come in Islande. Par solit no. E alore, dentri e sot dal prepotent, a vivin lis nazionalitâts. Che a àn ancje lôr une sô gjerarchie. La nazionalitât plui grande e fâs di parone e chês altris a son tibiadis e scjafoiadis parcè che a son plui piçulis e plui espostis. E al ven da se che la nazionalitât plui fuarte e cîr di rivâ adore di jessi la uniche copant chês altris. Il stât talian al à simpri batût che o sin in Italie e, par conseguence, che o sin talians e duncje o vin di cjacarâ par talian. Cheste logjiche di cjocs e je une grande bale fassiste che i grancj e i siôrs e i predis e i mestris le àn simpri ripetude. E je vere che o sin in Italie, ma no par chel che o sin talians. La nestre nazionalitât e reste chê furlane e, partant, in base ancje ae costituzion taliane, o vin dirit, di doprâ la nestre lenghe a scuele e dapardut. "

Usgnot a Visepente e vignarà celebrade une messe in ricuart di pre Toni.

3 di Avrîl : fieste pal popul furlan

2009-04-02T08:44:00.005+02:00

Vuê, ai 3 di Avrîl, e je la Fieste de Patrie dal Friûl, une fieste volude di pre Checo Placerean intai agns '70 par ricuardâ il moment storic che il Friûl al à vût une sô indipendence. Il program des manifestazions de fieste pal 2009 lu cjatais achì. Nô o volìn celebrâ chest aniversari cun cheste citazion di un libri di pre Toni Beline: "Lis primis celebrazions dal 3 di Avrîl lis à tacadis pre Checo tai prins agns Setante. No vin mai vude grande fole, ma si leve jù a Aquilee contents come paschis a celebrâ, a ricuardâ, a ringraziâ, a domandâ. A domandâ di cjapâ in man almancul par une volte il nestri distin, di tornâ a cjerçâ tune maniere gnove e nestre la libertât vude e pierdude secui indaûr. Une libertât regalade e je simpri a riscjo. Une libertât no sudade si le piert cence inacuarzisi. Soredut al è facil confondi la libertât cu la mancjance di sclavitût. Cuant che un popul nol comande te sô tiere nol è libar, cuant che un popul nol pues studiâ te sô lenghe nol è libar, cuant che un popul no pues decidi dal so distin nol è libar, cuant che un popul sotan no si inecuarç di jessi sotan parcè che lu an incjocât o indurmidît o scanât, nol è libar..."

Modulistiche bilengâl in linie

2009-03-23T07:33:00.005+01:00

La direzion regjonâl de Agjenzie pes Jentradis e fâs savê che a son a disposizion in linie sul so sît i modei pe compilazion de declarazion dai redits 2009 in version bilengâl (talian-sloven). Sul sît de agjenzie si cjatin ancje lis versions par inglês, todesc e francês. E je une buine notizie, ma e sarès ore passade che la modulistiche e vegni preparade ancje intes versions di chês altris minorancis linguistichis ricognossudis dal stât talian (furlans, sarts, ocitans, ladins e vie indenant) ....

Scree dal an academic de Universitât dal Friûl

2009-03-14T17:42:00.004+01:00

In ocasion de scree dal an academic de Universitât dal Friûl, il Comitât pe Autonomie e il Rilanç dal Friul al fâs sintî la sô vôs sul tentatîf di condizionâ e ridusi la autonomie de Universitât doprant il strument de fondazion uniche regjonâl. Tal prin coment l'intervent complet.

Su la strade di une leç regjonâl ancje pal todesc

2009-03-11T17:24:00.002+01:00

“Fâ buine une leç par promovi e par difindi lis varietâts gjermanichis feveladis inte nestre regjon”. Chest al jere il prin pont dal document “Pai dirits linguistics in Friûl – Vignesie Julie 2008-2013” che il Comitât 482 al veve presentât ai candidâts in corse pes elezions regjonâls dal Avrîl dal an passât.

Vuê di matine un grup di conseîrs regjonâi dal centri diestre al à presentade la propueste di leç par tutelâ e promovi lis minorancis di lenghe todescje de nestre regjon. Al è un pas impuartant che al va propit inte direzion che o vevin proponût. Par chest si à di disi grazie massime al vicepresident dal grup consiliâr dal PdL, Franco Baritussio (te foto), che su chest teme si à simpri mostrât une vore cjalt e che al è il prin firmatari de propueste.

Cumò o sperìn che la propueste e puedi lâ indenant cence masse pidiments cemût che, magari cussì no, i veve tocjât al disen di leç pal furlan. Dut câs, prime di rivâ al esam dal Consei, al è impuartant scoltâ ce che a disaran lis realtâts associativis che ta chescj agns a son stadis in prime linie intal difindi e intal promovi lis varietâts todescjis dal Friûl. Cun di fat, a son propit lôr che, se al ves di coventâ, a puedin dâ conseis impuartants par miorâ il test.

Sui vot di Març

2009-03-08T22:12:00.006+01:00

Marilenghe. Mari patrie. Mari tiere. A son peraulis là che cul zontâ “mari”, in plui di incressi il sens di afiet par ce che a rapresentin, si va marcâ cun plui fuarce il lôr aspiet feminin. Dut câs, ce che si vûl fâ intindi cu lis peraulis al è dispès lontan de realtât. In chest, magari cussì no, il riclam al feminin, al sune inmò plui induvinât.

Cun di fat, pes lenghis, pe tiere e, chel istès, pes feminis, si fevele tant di rispiet e di avualiance, ma cuant che si passe ai fats la situazion e mude. E nol covente lâ in paîs lontans par viodilu. Denant di une façade fate di dirits compagns par dutis e par ducj, masse voltis si plate la discriminazion.

Par chest fevelâ di dirits al à ancjemò sens. Seino dirits linguistics e nazionâi, come che si à fat ai 27 di Fevrâr, seino dirits des feminis come che si fâs vuê ai 8 di Març. Cu la cussience, però, che i dirits a valin simpri e no dome une dì par an e che, nol baste fevelâ di lôr, mi si à ancje di metiju in vore.

Nomenât il gnûf Comitât Tecnic Sientific de ARLeF

2009-03-04T21:07:00.005+01:00

Cu la nomine dal gnûf Comitât Tecnic Sientific de ARLeF – la Agjenzie Regjonâl pe Lenghe Furlane – si varès di jessi rivâts insom cul procès di rignuviment dai orghins istituzionâi regjonâi che a àn di viodi de politiche linguistiche pal furlan. Un procès che, nus somee, al vedi domandât un tic masse timp. Ancje par chel, cumò al è impuartant no pierdint altri e metisi daurman a lavorâ par svilupâ lis politichis pe lenghe furlane daûr di ce che za e previôt la 482/99, ma ancje poiantsi su la gnove leç regjonâl sul furlan.
I fasìn duncje i nestris auguris di bon lavôr ai gnûfs membris dal CTS de ARLeF: Donato Toffoli e Piera Rizzolati pe planificazion linguistiche; Alessandra Burelli e Pierino Donada pe didatiche; William Cisilino e Luca Peresson pai mieçs di comunicazion; e Maria Carminati pe produzion artistiche, musicâl, e multimediâl.

27 di Fevrâr: Zornade Furlane dai Dirits

2009-02-26T10:13:00.003+01:00

Ancje chest an il Comitât 482 al propon une riflession pe Zornade Furlane dai Dirits, che e cole ai 27 di Fevrâr. Cun di fat, ta cheste date, si ricuarde la Joibe Grasse dal 1511 cuant che si impià il plui grant riviel popolâr inte storie dal Friûl. Si trate di un episodi storic che, se cjalât cence prejudizis, al mostre ben trop che lis comunitâts furlanis i tignissin ai lôr dirits e ce che a jerin prontis a fâ par difindiju.
Tal prin coment (ma ancje sul sît dal Comitât) us proponìn la version integrâl dal comunicât che il Comitât al à dât fûr pe ocasion: une riflession che e vûl meti prin di dut in vuaite sul pericul reâl pai furlans, ma ancje par slovens e todescs dal Friûl, di fâ dai pas indaûr intal cjamp dai dirits linguistics.
La Zornade Furlane dai Dirits e ven celebrade cuntun dì interie di programazion speciâl ancje di Radio Onde Furlane, che achì si pues viodi in detai il program.
La foto e mostre un lavôr di Tonino Cragnolini, artist furlan che al riviel de Joibe Grasse dal 1511 i à dedicât diviersis des sôs oparis.

Il comizi in lenghe sarde di Renato Soru

2009-02-24T08:54:00.006+01:00

Ai 13 di Fevrâr Renato Soru (te foto), candidât ae presidence de regjon Sardegne, intant de sô campagne eletorâl al à tignût un comizi in lenghe sarde. O ripuartìn achì chest passaç voltât par furlan: "il sart nol è une lenghe minôr, e je une lenghe preziose, une vore preziose. E je une biele lenghe, e je une lenghe che i à permetût ai paris e aes maris di tirâ sù i fîs, che nus à permetût di discuti, di lavorâ, di tirâse fûr, di cjantâ la ninenane ai frutins, nus à permetût di volê ben e cualchi volte di scombati. E je une lenghe impuartante che no vin di pierdi, e o crôt che o vin fat ben in chescj agns, pe prime volte, a ribelâsi e a dî: sâstu, e je une robe gnove... pe prime volte la regjon e fevele par sart". Intal prin coment o cjatais dut il comizi di Soru.

Timps luncs pe sentence de Cort Costituzionâl su la leç 29

2009-02-03T18:57:00.005+01:00

Come che nus dîs lenghe.net ai 30 di Zenâr si è metût adun pe prime volte il Consei di Aministrazion de ARLeF. In chê ocasion l'assessôr ae culture Molinaro al à dit che la Regjon e cirarà di “doprâ i istitûts de leç 29 (la gnove leç di tutele de lenghe furlane n.d.r.) che no àn bisugne di regolaments di metude in vore” ancje parcè che i "timps di rispueste de Cort Costituzionâl a laran pes lungjis”. Dal moment che Stât talian nol pues plui dineâ i dirits des minorancis, come che al à fat par passe 50 agns, al pâr che al fasi di dut par slungjâ i timps prime di molâ une vere tutele e duncje par mantignî in vore il stât atuâl di aparteheid linguistiche de lenghe furlane e di chês altris lenghis minorizadis.

Vanzums de vuere frede

2009-02-03T18:53:00.002+01:00

Cualchi zornade indaûr si è davuelte a Sant Pieri une cunvigne su la impuartance de lenghe proprie di un teritori pal so svilup economic, massime par chel turistic. E je stade la ocasion par confrontâ esperiencis diviersis e, tra chestis, ancje chê de Val di Resie. A presentâ cheste esperience e je stade Luigia Negro (te foto), presidente dal circul Rozajanski Dum e operadore culturâl che di agns e je in prime linie inte difese e inte promozion dal rosean. Magari cussì no, un grup di lôr – simpri chei che ben si ju cognòs – al à profitât di chê ocasion par agredîle verbalmentri.
Denant di chest at incivîl, o puartìn la nestre solidarietât a Luigia che o savìn cun trop impegn e cun trops sacrificis che e puartade indenant la sô ativitât. O vin ancje di denunciâ la clime di intimidazion che e ven puartade indenant cuintri di chei che, come Luigia, a àn lavorât cui fats e no cu lis cjacaris pe lôr lenghe e pe lôr culture. Cualchidun, forsit, al à nostalgjie pe clime che si viveve in Val di Resie e tes valadis slovenis de provincie di Udin ai timps de vuere frede. Nô dal sigûr no le vin.

Sanitât par furlan

2009-01-31T16:40:00.004+01:00

Si è davuelt vinars ai 30 di Zenâr li de sede de Regjon a Udin un incuintri di presentazion dai progjets in lenghe minoritarie inmaneâts in chescj agns de Aziende Sanitarie n.4. A rivuart de impuartance dal ûs des lenghis minorizadis inte sanitât o ripuartìn un biel intervent dal dotôr Guglielmo Pitzalis: Cuant che si fevele di salût , al ven naturâl doprâ la lenghe locâl come lenghe dal cûr, uniche che pues esprimi ad in plen dut ce che la persone e prove e e sint dentri di se cuant che a va dal miedi: tal rapuart cui miedis e cui infermîrs podê fevelâ par furlan al gjave la pôre, al jude a sopuartâ il dolôr di contâ sensazions e sintiments di dentri di se, cuasi come se la complicitât di une lenghe segrete e vierzi la puarte de empatie di un cun chel altri e alore si pues contâsi propit dut. Se curâ il mâl al vûl dî cjapâsi a cûr il malât come se al fos dutun anime e cuarp, par judâlu intun percors di vuarison no dome biologjiche, o varìn di imparâ a no rompi chest fîl e fâ cressi la nestre lenghe par doprâ cun coretece la “traduzion” intune diagnosi e intune terapie sientifiche de malatie che la persone nus conte.
Dal sigûr al sarès biel no inmalâsi ma lis predicjis no bastin soredut se a samein nassudis di fûr de nestre esperience di vite sociâl, se no tegnin cont dai valôrs ancje simbolics des robis e des peraulis che o doprìn par clamâlis: o sin daûr a imparâ a doprâ il furlan pe informazion e pe educazion sanitarie, pe promozion de salût, ven a stâi par un “biel vivi”. Fâ vuê sanitât par furlan (ma ancje in cualsisei altre lenghe piçule o grande e di cualsisei bande dal mont) al vûl dî meti in vore ogni dì i dirits garantîts dai principis fondamentâi de nestre costituzion (articui 3 e 6 e 32) tal spirt di une medisine democratiche e popolâr poiade su la fonde de cognossince sientifiche e des relazions umanis.

Bretagne e Friûl, politics a confront...

2009-01-25T13:46:00.003+01:00

Intant che i nestris politics regjonâi si divertissin a tirâ fûr ideis almancul discutibilis su la "tutele" des varietâts dialetâls dal talian e no si movin par meti in vore la gnove leç regjonâl su la lenghe furlane, in Bretagne la classe politiche locâl dute interie e domande la gjestion totâl des risorsis umanis e economichis che a coventin pal insegnament de lenghe bretone, come che nus informe il blog di internazionalitari, une biele diference no ise vere?

Tutele par ducj, tutele par nissun

2009-01-22T18:31:00.004+01:00

E je stade presentade îr ae stampe la propueste di leç su la “valorizzazione e la promozione dei dialetti e degli idiomi storici veneti del Friuli Venezia Giulia” fate indenant dal grup “Italia dei Valori – Cittadini” in Consei regjonâl, prin firmatari Pietro Colussi. La propueste e rive daspò di chês fatis indenant tal Setembar dal an passât su “Tutela, valorizzazione e promozione del patrimonio linguistico e culturale del Friuli Venezia Giulia”, prin firmatari Piero Camber intune cun conseîrs dal PdL, de UDC, e dai Pensionâts, e su “Tutela, valorizzazione e promozione degli idiomi e dialetti storici veneti del Friuli Venezia Giulia”presentade de Lenghe Nord, prin firmatari Federico Razzini.

Ducj a sigurin che si trate di iniziativis par difindi e promovi la pluralitât culturâl e linguistiche de nestre regjon e che no si trate di fâi cuintri a di nissun (e, cjale câs, si cite simpri la lenghe furlane. Se e je pardabon cussì, parcè nissun di lôr si è fat sintî par pretindi il rispiet des leçs che za a son, a tacâ de 482/99 e de 38/01, che di agns a son violadis? Parcè no disino nuie sul tai progressîf des risorsis pe 482? Parcè no intervegnino par meti in vore la gnove leç sul furlan (di fat, no je la impugnazion di cualchi articul a blocâle, ma la mancjance di regolaments)? Al ven il suspiet che, cul tutelâ ducj, si ponti in realtât a no tutelâ nissun...

La cjarte linguistiche dal Friûl che us proponìn achì e rive dal blog di Sandri Carrozzo.

Intai prins doi coments o cjatais i articui publicâts vuê dal Gazzettino sul argoment.