رغي إمرأه غير مطحونه

عين الحسود فيها عود يا حلاوه

2008-08-18T16:50:00.003-02:00

سلام عليكم

وحشتوني يا قوم وربنا انا حاسه انى عايشه من غير اكسجين

ما كنتش اعرف ان المدونه والرغي مهم اوي كده فى حياتي انا حاسه اني ما باعملش حاجه خالص مهمه كلها مهمات ميكانيكيه تفتقد الى الروح . blak work زي ما بيقولوا .

اولا اعتذر كل الاعتذار عن اني وعدتكم بالعوده واتكعبلت فى السكه ما عرفتش ارجع

ثانيا: عايزه اعرف مين المبارك ابو عين مدوره الى بصلي فى الشاشه الجديده يعترف اوام اوام عشان نخلص الليله دي

انا اشغل الكمبيوتر بتاعي بعد الشاشه الجديده يوووووووووم واحد ويسكت ساكت من يومهااااااااا؟؟؟ ده كلاااااااااام .

امال لو جبت كمبيوتر جديد كان جرالي ايه يا اخويا .

انا حاليا عند ماما والكمبيوتر بتاعي تحت الكشف والاصلاح يا رجع شغال يا ارميه فى الشارع واجيب واحد جديد عنوه بقى عشان انا خلاص قربت اطق .

وعلييييييييييييييييييه تقبلوا اعتذاري بقى عن المدونه واجازه من الرغي غير محدوده الموعد لحد ما ربنا يحلها من عنده قولوا اااااااااااااامين

وشكرا لكل الى سألوا عليا

وعين الحسود فيها عود وحصوه وملحه وكل حاجه تيجى على اد عينه

جهزوا ودانكم وخبوا عيالكم صبرني اهي جاتكوا ..... عدنا

2008-08-02T23:45:00.005-02:00

اخواني المدونين والمدونات عدنا بسلام الى ارض الوطن ولله الحمد

واحب اطمنكم عليا وعلى زمارة رقبة رضا الحمد لله كله تمام

الكمبيوتر بتاعي رجع لارض الوطن سالما ولله الحمد واشتغل بعد العذاب والضنا اينعم انا اتقلبت فى هارد وماوس وطابعه وشاشه

بس يعنى الحق يقال انا طلعت من الموضوع ده بشاشه جديده نوووووووووفي بالسلوفانه بتاعتها صحيح الماوس بتاعتي بقالها يجى خمس قرون اه ما انا طلعت اول ماوس شوفتها في حياتي على ما يحن عليا ابو رياض ويوصل للمخزن الى ورانا ويفتح المخزن ويعمل مجهود خارق للعاده ويجيبلي ماوس جديده من الى ما حدش عايز يشتريهم .

ومش مهم ياعم الطابعه والهارد التاني يلا حلال عليهم انشاله ما حدش حوش . اه اه لا حرام جابلي باد جديد للماوس عقبااااااااااااال الماوس يارب .

يلا احنا هانطمع بقى ولا ايه المهم ان انا الحمد لله عدت اليكم من جديد بافكر اعمل نيو لوك للمدونه بقى عشان نكسر الدنيا

وانتم بجد واحشني ومش عارفه عايشين ازاي انتم من غير ما اكل دماغكم رغي .

طبعا حصلتلى اشياء عديده ومريعه وشنيعه بافكر احكيهالكم بس دي عايزه كتاب والله . المهم هابقى احكيلكم على مقطفااات عشان ما اقدرش اخبي عليكم .

يومين كده يا كتاكيت اظبط نفسي وانزل البرامج بتاعتي واظبط عده الشغل واجيلكم بقى جهزوا وادنكم وخبوا عيالكوا صبرني اهي جاتكووووووو(اه طبعا مش عايزه اشوف عيال مش ناقصه صداااااااااااع)

سلوا وقتكم بقى واقروا عن حفصة بنت عمر بن الخطاب زوجة الرسول عليه الصلاة والسلام فى الرؤيه الاسلاميه خاصتي .

عيش ندل تموت مستور

2008-07-22T09:40:00.002-02:00

السلام عليكم

وربنا وحشتوني جدا جدا

شكرا اوي لكل الناس الى سألت عليا والى ما سألوش والى سألوا فى بالهم وقالوا الست دي راحت فين شكلها كلت دراع جوزها وهو قتلها .

احب اطمنكم على دراع جوزي وعليا

انا بس كل الحكايه انى عملت جدعه اه تخيلوا . مش عارفه مالها النداله يا اخويا

الحكايه ان جوزي احتاج كمبيوتر عشان الشغل ونظرا لاننا واخدين محل جديد والحكايه ملخبطه حبتين فأنا عملت جدعه بقى

وقلتله:ولا يهمك يا ابو رياض الكمبيوتر اهو خده مش مشكله بعدين نبقى نجيب واحد جديد بقى للبيت .

قالي :ا ممكن ابدا انا عارف انك ما تقدريش تعيشي من غير الرغي

قلتله :فداك الرغي وصاحبة الرغي يا ابو رياض ولا يهمك .

قوم الاخ بقى ما صدق وقام هووووب اخد الكمبيوتر .وبعدين بعد ما فكه بقى

قالي : قوليلي بالامانه بعد اد ايه هاتمسكي فى زمارة رقابتي وتقوليلى عايزه كمبيوتر .

قلتله : اخسسسسسسسس ليه كده بقى ما انا ادتهولك بنفس راضيه اهو .

قالي : لا انا بسأل بس عشان اعمل حسابي .

المهم يا اخواني اخدوا الكمبيوتر بتاعي حبيبى عشرة 7 سنين وودوه المحل وبعدين تاني يوم اتصل عليا رضا وقالي الكمبيوتر ما نفعش وكسفنا اخر كسفه وما اشتغلش

قلتله : اوباااااااااااا اكيد انتم عاملتوه وحش هاته تااااااااااني لما اشوف عملتم فيه ايه ؟؟؟؟؟؟؟؟؟

قالي هاجيبه وانا جاي انا هاروح اشتري واحد جديد للمحل واجيبلك بتاعك يا اختي .

شااااااااايفين اخرة الجدعه بقى

مش دي المشكللللللللله جابولي الجهاز وقعدت اركب فيه ساعه واطبطب عليه وشغلته واشتغل عااااااااادي بعدين انشغلت بقى وما فضيتش ارجعله تاني .

وبعدين آخر الليل طالعه بقى من عند ماما لقيتهم قاعدين فى الانتريه وشارين كمبيوتر جديد بيجمعوه وبعد شويه وانا قاعده كده اكتشفت انهم قلبونيييييييييييييييييييييي

ايوه مش كفايه انهم شحاتين وبيتأمروا لا قلبوني واخدوا الشاشه وقال اييييييييييييييه ما لقيوش الا شاشه كبييييييره فقالوا ناخد الصغيره ونجيبلك انتى الكبيره شوف الكرم يا جدع

بعد شويه اكتشفت ايضا انهم قلبوني فى احد الهاردين بتوعي حبايبي وقالي ابقى ستبيلك وندوز بقى على الهارد بتاعك اصل احنا خدنا واحد .

وكمان علقوا الماوس وقالي اصل الماوسات فى المخازن مش عارفين نوصلها دلوقتي هناخد ده حتى مكسوره ونبقى نجيبلك واحد جديد .

ومر على هذا الكلام يا اخوااااااااااااني اسبوع ولا حد جابلي شاشه ولا ماوس ولا حد عبرني

وطبعا دلوقتي لم باطلب اي طلب من جوزي حتى لو كان كيس عيش .

قوم يبصلي بصى غلب اه الى هي ينزل حواجبه لتحت كده وعنيه تضيق وشفايفه تتقلب ويقولي : طيب حاضر لو قدرت اديكى شااااايفه .

طبعا انا لسه لحد دلوقتي ما مسكتش فى زمارة رقابته بسبب الكمبيوتر ده لانى اساسا مش فاضيه الايام دي اصلا للكمبيوتر .

بالطبع انا باكتب دلوقتي وورايا دار حضانه مؤلف من ولادي وولاد اخواتي بالاضافه لاخواتي وماما وبابا عشان كده ما تفكروش انى هاعرف اكتب اي حاجه اكتر من الرغي الفاضي الى فوق ده وكتبته على 17 مره .

وان شاء الله هامسك فى زمارة رقابته بعد الافتتاح ما حدش يجى مافيش جاتوه . احنا الافتتاح بتاعنا هو اننا نفتح المحل ونقعد يعنى هههههههههههههههههههه ما لناش فى الحركات التانيه .

يلا بقى عشان الشاي على النار وابويا هاينام من غير ما يشرب الشاي . سلام عليكم ابقوا اسألوا عليا وعلى زمارة رقبة رضا .

فلووووسك ؟؟؟ ليه هو انا شوال بطاطا ؟؟؟!!!

2008-07-08T19:24:00.005-02:00

السلام عليكم

مش عارفه يا جماعه انا والله مش فلسانه رغي بس فلسانه وقت وصحه على الاخر عشان كده انا جبتلكم موضوع من ارشيف حياتي كنت كاتباه من زمان وافتكر نزلته فى منتدى انما اول مره انتم تشوفوه .

يلا هيا بنا نرغي ....

نتوقف شويه قدام هذه العباره : فلووووووووسك انتى بتقولي فلوسك ؟؟!!!! ليه يا هانم انتى متجوزه شوال بطاطا ؟؟؟

السؤال بقىىىىى:

لماذا حين تذكر الذمه الماليه المنفصله للزوجه يذكر بجانبها كلمتين :

( ليه انا مش راجل ولا ايه؟؟) او ( مافيش فرق بين الرجل ومراته)

حقيقى مش عارفه ايه الرابط بين الرجوله والذمه الماليه المنفصله للزوجه .

الرسول عليه الصلاة والسلام كان يتاجر بمال خديجه وعلى فكره كان يأخذ عن ذلك اجر .عااااادي يعنى مش كان بيتكسف من نفسه ولا بيقول انا مش راجل ولا حاجه

تفقدوا سيرة الرسول مع زوجاته تلاقي كل واحده فيهم كان لها فلوسها ومالها واملاكها عادي

ففي سفر الرسول للحج مع زوجاته حجة الوداع برك جمل صفيه بنت حيي و راح الرسول لزوجتة زينب بنت جحش( لأنها كانت غنيه ومعاها جمال كتير) قال لها افقيري اختك جملا فقالت : أنا افقر يهوديتك؟؟ طبعا الرسول زعل منها وخاصمها شهر بعد الحج ولما عفا عنها وراحلها اهدته جاريه هديه .

بصوا القصه دي مهمه اوي فى موضوعنا نوضحها بقى النقط

اولا: الرسول عليه الصلاة والسلام كانت لكل زوجه من زوجاته شأنها ومالها مافيش مشكله مش كان بيقولها مافيش فرق بين الرجل ومراته وياخد من فلوسها عادي او يخليها تصرف كده عادي

ده لما حب وهو مساااافر انه يستلف منها جمل استأذنها ومش بس كده وهى رفضضضضضضت . وهو زعل منها مش عشان هى عندها جمال منعتها منه هو عارف انها منعتها من صفيه غيره منها ونعتتها بالهوديه كمان مع انها كانت اسلمت ومع ذلك الرسول بعد ما خاصمها عفا عنها ما طلقهاش ولا هد الدنيا

ثانيا: لما صالحها اهدته جاريه يعنى برضه بعد الموقف ده ما زال معترف بمالها واملاكها ويقبل منها الهديه وهى لم تتنازل عن ثورتها لزوجها وقالتله بعد كده الى انت عايزه خده ومافيش فرق بينى وبينك على فكره احنا بنتكلم عن الرسول اشرف الخلق يارب نتكسف بقى كلمة مافيش فرق بين الرجل وزوجته دي مشطووووووبه

ولا سيما انها مش بتتقال لما تحب الزوجه تتصرف فى ممتلكات زوجها وامواله .لا بتتقال بس لما يكون هي بتدي لجوزها .

اما بقى حكاية انا مش راجل ولا ايه؟ الى بتتقال بمجرد ان الزوجه تشير مجرد اشاره ان لها مال دى بقى عز الاستهبال

لان ما حدش قال انها لما تساعدى فى المصاريف يبقى انت مش راجل لكن كمان ما حدش قال انك تنكر ده اطلاقا .

انا شوفت بنفسي بعض البيوت ماشيه ازاى واستغربت من الحال العجيب

هاقولكم مثال:واحد راح دور على عروسه واتجوزها وكانت بتشتغل وقالها ما تشتغليش شغلك ما يهمنيش

وهو فى الحقيقه رايح لها وعارف انا بتشتغل يعنى لو مش عايزها بتشتغل كان ممكن قال من الاول مش عايز دي اشوف غيرها

المهم بعدين هى قالت : ليه خساره

قالها :هو انتى يعنى بتاخدى كام ده مرتبك هايطلع نصه مواصلات ويبقوا ملاليم الباقي .

وفضل واخد موقف الى مش هامه فلوسها ولا عايزهم ولا يعنيه الامر وانه بيتفضل عليها ويسيبها تروح الشغل وتتبهدل ويطلع عينها وتموت فى نفسها كل يوم عشان تثبت انها غير مقصره فى بيتها عشان بتشتغل .

وبعدين هو ما بيجيبش سيرة مرتبها لكن هى بتصرفه فى البيت اكل وشرب ولبس مواصلات وقسط الثلاجه ووصل النور الى بيجى هو مش هنا وفاتورة التليفون الى هى بتدفعها وهى راجعه من الشغل وغيره وغيره.

وهو معاه مرتبه برضه بيصرفه بس بقى هما نفسهم يشتروا عربيه. فبيعمل دفتر فى البنك باسمه ويحوش فيه من مرتبه وبعدين بعد كام سنه يشتري عربيه من فلووووووووسه وطبعا باسمه !!!!

وهى تواااااااااصل الصرف على البيت بما فيه نفسها الى هو اصلا المفروض ان يصرف هو عليه .

ده غير انه طول عمرها لو حبت تشتري حاجه من فلوسها لازم تتحايل عليه يوافق لانه اصلا مش معترف ان لها فلوس هى بس بتصرف الفلوس ويقولك بكل فخرررررررر: انا مراتي بتشتغل من 30 سنه عمري ما خدت منها مليم ولا اعرف حاجه عن مرتبها .

طبعا اكيد مش بيلحق يشوفه ولا هى كمان يا عينى بتلحق تشوفه ولما يسلف صاحبه الي هو اكل عليه الفين جنيه قبل كده كانوا محوشنهم عشان يجيبوا غساله اتوماتيك تريحها وجابتها هى بالقسط من مرتبها.

قامت القيامه لما قالتله: تاااااني هاتسلف صاحبك الى اكل فلوسنا قبل كده؟؟

يقولها : انتى ماااالك فلوسي وانا حر فيهاااااااااا ده على اعتبار ان مافيش فرق بين الرجل وزوجته

وحاااااااااااجه تفرس

وعليه فان بعد 30 سنه كل ممتلكات الاسره هاتكون باسم جوزها واي اشاره منها ان لها فلوس يقولها خلااااااااااص بقيت انا ماليش كلمه وبقى لك فلوس ما كانوش مليمين دول الى انتى بتقبضيهم ( ويمكن يكون مرتبها بقى اكبر منه )

لكن برضه هو مصمم انه لا يعنيه فلوسها الى صرفتها عليه وولاده ومافيش مانع بعد كده يتجوز عليها بمدخراته برررررررضه

ده مثال يا جماعه مش كل الناس كده وحقيقى مهم اوي ان الزوجه يكون لها ذمه ماليه منفصله وده عادي جدا جدا وحتى لو كانت مش موظفه ومالهاش مصدر للمال وحتى لو كان مصدر مالها الوحيد مثلا هدايا من زوجها فما دام هديه خرجت من ذمته الماليه الى ذمتها الماليه ومن حقها التصرف فيها . حتى انه لو حصل خلع المسترد للزوج هو المهر فقط مش الهدايا .

وعموما انا مش شايفه ابدا ان ده ينقص من رجوله الشخص بالعكس ده يزيد منهاوالمفروض ان النساء العاملات الى بيتعتبروا ان مافيش فرق بين الرجل وزوجته يتقاسموا ممتلكات الاسره المستجده بعد الزواج مع الزوج مش استهبال هو.

وكمان من حقها اتخاذ قرارتها بشأن المال ده فى مساحه من الحريه لقرارتها خصوصا لو كانت بعيده عن الاسره يعنى لو واحده حبت تشتري مثلا ارض اظن ده قرار من حقها تاخده هو مالوش دخل الا بالنصيحه والمحبه انما عافيه لا.

وهافضل اقول طول عمري ما ضاع حق وراؤه مطاااااااالب الى لها حق تاخده قبل ان تصبح تضحيتك حق مكتسب لغيرك

وبعدين الحق حبيب الله وان كنت اخوات اتحاسبوا وان كنتم ازواج برضه اتحاسبوا . اتحاسبوا حساب حبايب ايه المشكله ؟؟؟!!!!

الانجليزى مافيش احسن منه .ولو انه فى الحقيقه مش انجليزى ولا حاجه ده لب الدين والشرع عندنا الوضوح وتحديد الحقوق والواجبات .

وعايزه رايكم واسفه للاطاله بس الى فى داء الرغي بقى وبعدين الموضوع خطيييييييييييييييييييييير

محمد رجع البيت الحمد لله

2008-07-07T18:39:00.002-02:00

السلام عليكم يا حبايبي يا حلوين

انا بس جايه على السريع اقولكم خبر الحمد لله كويس . محمد خرج من المستشفى اول امبارح طبعا مؤقتا لكن الحمد لله كل الناس بتقول ما دام خرج يبقى الخطر قل جدا وهو فعلا احسن كتير .

صحيح هو العلاج الكماوي يا حبيى بهدله وخلاه بقى جلد على عضم وشكله مقطع قلبي . فضلا عن رجله الى الدكتور الفالح الى اداله حقنه فى النخاع اصاب عصب رجله وعنده الم فيها جامد وبيعمل جلسات وما بيمشيش عليها . لكن طبعا الحمد لله قضى اخف من قضى

وهو راجع تاني القاهره بكره هايقعد هناك 4 ايام له كورس جديد كل يوم هايروح ياخد حقنه بس ويمشي . مع متابعات وتحاليل وكده .

وهايفضل فى متابعات كده تتباعد بتحسن الحاله ان شاء الله واملنا فى ربنا كبير . ودعواتكم معانا بقى ان ربنا يتم شفاه على خير هو وكل مرضى المسلمين يارب . ولا يكتب المرض اللعين ده على حد ابدا .

وكمان يا جماعه عايزه اعتذر للجميع على انى ما بقيتش ازورهم والله مضغوطه اوي اليومين دول ولسه قدامي كده شويه كمان حتى لسه التقيل جاي ورا .

لكن اول ما اقدر ان شاء الله هاجي ازوركم وابوسكم واحده واحده اه البوس عند البنات بس الرجاله زي بعضه ممكن نقولهم سلام عليكم

والبوست الجديد ساحاول جاهده بعد هذا اليوم العصيب اخلصه وانزله النهارده او مكره الصمح على الاكثر .

وادعولي يا جدعان اصل انا قربت اخلص من الناس دي خلاص .

الاخ تقليدى ولا شواريعي ؟؟؟

2008-06-30T12:23:00.009-02:00

السلام عليكم يا حلوين :

وحشتوني وحشتوني لحد اخر اغنية ورده . نأسف على تأخير البوست الجديد نظرا لانشغالنا بتجبيس يد المدعو خالد وتوابع ذلك من زن ورخامه وما الى ذلك مستمرين الى وقتنا هذا .

ندخل فى الرغي . فاكرين لما انا كنت عامله استطلاع راي على المدونه هنا على الجواز التقليدى والجواز الى مش تقليدى ؟؟ أه بتاع الصالونات والانتريهات ده .

طبعا ما حدش ا ساسا شارك فيه غير عدد صغنن يلا مش مهم الا ان النتايج الى حد ما واقعيه .

فاكرين الكتاكيت ؟؟ كتاكيت فى مخ الشعب البوست القديم بتاعي . كان فى منهم كتكوت كبييييير عن الزواج التقليدى وقلنا ده عايز بوست لوحده .

انا بقى دايما اتسأل سؤال لطيف جدا لما اقول اني متجوزه على الشات يعنى او حتى عموما فى الحياه العامه .

الا وهو :

انتى متجوزه جواز صالونات(باكره الكلمه دي اوي ) ولا عن حب ؟؟؟

قوم اجاوب انا وانا هاطق من السؤال وصاحبه : الاثنين يا فندم .

يقولي: ازاي يعنى الاثنين

اقوله: حضرتك انا اتخطبت 3 سنين حبينا قبل الجواز لما قلنا بس ولا تفتكر لازم نحب فى الشوارع والطرقات العامه عشان يبقى الجواز عن حب .

وهاتك يا رشاش كلام فى وش السائل . من فرستي بقى .

لان انا مش عارفه ايه وجه التعارض بين الزواج الى بيقولوا عليه تقليدى وبين الحب ؟؟؟

يعنى ايه الى يمنع ان اثنين يتجوزوا بعض بالطريقه التقليديه ويحبوا بعض فى نفس ذات الوقت ؟؟؟

وايه خلى الحب قاصر على الصرمحه فى الشوارع ؟؟؟

ومين الى قال ان مافيش حب بيجى بعد الجواز ؟؟؟

اه وكمالة العباره الهبله دي :

تلاقي البت ولا الواد بيبربشوا كده ويقولك : هو ما بيبقاش حب ده بيبقى تعود عشره انما الحب مش ممكن يجى بعد الجواز ؟؟؟

السؤال هو ليييييييييييييييييييييه ؟؟؟ حد يدينى مبرر واحد للكلام ده غير انها مجرد كتاكيت فى مخ الشعب غذاها الاعلام المريض بتاعنا .

سؤال تاني بقى عشان علامات الاستفهام عندي بوفره النهارده .

هو ايه الفرق بين الحالتين الآتيتين :

الاولى : واحد شاف واحده او العكس فى اي مكان فى الدنيا الكليه الشغل الشارع بلكونة الجيران المهم انه انطس فى نواضره وشافها . وعجبته وقعد يسبلها اسبوع على ما شافته عشان نظرها ضعيف .وهووووب نظره وكلمه وابتسامه ..... وبقى في لااااااااموووووووووغ (اي حب ولكن بالفرنسيه ) .

ويمكن بعد كده بقى بسنتين تلاته نحنحه وسنسه بفكروا يتخطبوا وجايز تكمل ويتجوزوا .

وساعتها برضه فى احتمالين يا ينجحوا فى الجوازه ويستمر الحب . يا تنكشف الاقنعه ويبقى الجواز فاشل سواء انتهى ولا استمر لكن طبعا احتمال فشله وارد . لا وارد جدا .

الثانيه : ان واحد ربنا نفخ فى صورته كده وكبر وبقى راجل ا لحمد لله وبيعتمد على نفسه ويقدر يتجوز (مش عيل لسه فى الكليه اول امبارح كان بيقول على السكر اوكر وبياخد مصروفه من اهله ) وبعدين لما وصل لهذه المرحله قوم الست والدته رشحتله بنت الجيران

قالها: لا يا ماما دي حوله . غيره

مامته :طب بنت خالتك ؟

قال المحروس : لا يا ماما دى شبه خالتي بس على اسمر زي ا بوها

مامته: مالها خالتك يا واد دي زي القمر انت الخسران ......بس خلاص لقيتها فاكر بنت خالة ابوك الى كانت ساكنه فى مدغشقر ؟؟؟

محروس : ايوه مالها يا ماما دى متجوزه من زمان .

مامته : يا ابنى مش هى بنتها سميحه .

محروس : يا ماما بنتها ايه دي من دور اولادي ده انا كنت باشيلها وهى مولوده .

مامته : يا ابنى لا دي بقى عروسه . ده اصغر منك بسبع سنين بس .

محروس : معقووووووله طب انا ما شوفتهاش وهى لسه فى الحضانه . بس هى كانت حلوه مش عارف بقى الخراط وصل لحد فين معاها احسن يطلع خراط احول يا ماما .

مامته : لا يا محروس عيب عليك . انا شوفتها قريب فى فرح فواكه بنت عمتك حلوه وطويله وبيضا وزي الفل .وبعدين يا سيدى هاخلي اختك تبقى تاخدها وتخرج وتبقى انت تشوفها مالكش دعوه .

محروس : ماشي ياماما جوووووو اون .

وهوب المباحثات اشتغلت وشافها وعجبته وشافته وعجبها كل ده مبدأيا وبعدين العيلتين اتفقوا وهما منشكحين والخطوبه تمت والحياه وردي

وقربوا من بعض اكتر فى هدوء ومباركة الجميع ورضا ربهم عليهم . وحبوا بعض (وجايز لا برضه عادي ) ويمكن يكملوا ويمكن لا برررررررضه عادي .

ولو ربنا سهل واتجوزوا خلاص . برضه قدامهم حاجه من اثنين يا نجاح وحب اكتر واكبر يا فشل ومافيش حب بح خلاص .

الضامن هو الله بقى .

ايه بقى الفرق بين الحب فى الحالتين ؟؟؟ وايه يمنع ان محروس يحب سميحه ؟؟؟؟ ماهما برضه اتقابلوا يوما لاول مره ؟؟؟ وبعدين اعجبوا ببعض وبعدين قالوا ياهادي واتخطبوا وبعدين اتجوزوا !!!! ايه بقى ؟؟؟؟

وايه يخلي الحب فى الشوارع اقوى من الحب فى البيوت ؟؟؟!!!!

ومين يقول ان ماشي مع واحده ( سوري فى التعبير بس باحب اقوله عشان هى دي الحقيقه من غير تجميل ) هايقدر يعرفها اكتر من الى خاطب واحده ؟؟؟

بالعكس على الاقل الى خاطب واحده سأل على اهلها وسأل عليها قبل ما يتنيل يطب فى الحب وكمان بيدخل بيتهم ويقرأ ما بين السطور .

الحكايه مش محتاجه كل ده . والحب مش كائن هلامي . ودائما وابدا اقول ان الى اوله غلط اخره غلط برضه .

وان الحب بيتولد فى البيوت مش فى الشوارع . وبيعيش وبيكبر فى البيوت .

اما الى فى الشوارع هو هبل فى هبل ليس الا .

واي حد يقول ان الحب مش ممكن يجى بعد الجواز ده يبقى اصلا ما يعرفش لا الجواز ولا الحب .

الجواز ممكن يعيش من غير حب . لكن الحب مش ممكن يعيش ولا اصلا يعد حب مكتمل الجوانب من غير جواز .

واحتمال الفشل واااااااارد فى جميع المراحل سواء مع عيلين هبل لسه بيعطفوا فى الجامعه . او اثنين متجوزين بقالهم عشرين سنه .

الضامن هو الله والتوفيق بتاع ربنا فعلا . احنا بناخد بالاسباب واحنا بنختار .

ونختار الى قلبنا ارتاحله .

وقبل كل كده نكون بينا وبين ربنا عمار مش خواء . وكمان نكون احنا نفسنا كويسين عشان فعلا الطيبون للطيبات .

عايز تتجوز حد كويس خليك انت كويس الاول .

مش المقياس ابدا التقليدى والى مش تقليدى . المقياس للنجاح والفشل للزواج حاجات تانيه كتير اوي ما لهاش دعوه ببداية الحب كان ايه .

لكن احدى اسباب الفشل هي البدايه الغلط . وسؤال رفيع لكل واحد (ماشي مع واحده والعكس ) تفتكر بعد ما عرفتها لمده سنه مثلا ولا حتى شهور بدون علم اهلها(ابوها يعنى) مش امها الى بتستهبل . تفتكر هى كذبت كام مره على اهلها عشان تكلمك وتعرفك؟؟؟ اهلها الى ربوها!!!! طب ابقى اسأل نفسك بقى هاتبقى تكذب عليك اد ايه . وصدق اولا تصدق هاتكذب عليك يا ضنايا والله .

وكفايه كده عشان حاسه فى ناس فرفرت فى ايدى خلاص

شكرا لحسن استماعكم لرغينا

شوفوا البوست الاخير فى الرؤيه الاسلاميه من خبب امرأه على زوجها

ياولاد يا ولاد ...ايه يه ؟؟ ... تعالوا تعالوا ...(ستر الله)

2008-06-23T10:28:00.005-02:00

تحديث مهم : شوفوا البوست بتاعي عند فرنسا والرايق والضاحكون

بعنوان

يا سعااااااد..... انا ركبت ميكروباظ يا سعااااد

==============================================================

السلام عليكم

شوفوا يا ساده يا كرام تأكيدا لمبدأ الرغي العام في المدونه انا قررت انى احكيلكم حواديت .
ابله فضيله ؟؟!!! مالها ابله فضيله.
بس لا احنا هانبقى حواديت كبار شويه بس حواديت برضه .

والموضوع ده جه على بالي لان انا عندي حواديت كتيره جدا جدا يا جماعه
امال يعنى انا رغايه ببلاش؟؟؟
عندي مخزون رغي مش بطال وحواديت وقصص زي الفل ومن ارض الواقع لسه ما بدأتش الف قصص .

ندخل على الرغي بقى :
اولا القصه الى انا هاقولهالكهم دي من بريد الجمعه عشان انا متابعه الباب ده من قديم الازل من ايام عبد الوهاب مطاوع الله يرحمه .
هى تقريبا كانت نازله باسم( ستر الله) بس انا مش عارفه اجيبها من الموقع فاحكيهالكم باسلوبي انا .

القصه عن لسان صاحبها :
يقول انه رجل فى الخامسه والاربعين من عمره . وانه بيقدم قصته دي مش عشان حاجه الا انه بيحاول انه ينصح الناس الى يمكن يكونوا زيه ايام زمان .
هو نشأ فى أسره متوسطه الحال كافحوا عشان يربوه هو واخواته وعلموهم تعليم عالي . متدينين كلهم ماعادا هو .
حتى الصلاه ما كانش بيصلي الا صلاة الجمعه بس ولان ابوه كان بيصر على انه ينزل معاهم يصلي .
واتخرج من الجامعه وكان عنده دايما تطلعات ماديه كبيره . واشتغل فى شركه يملكها رجل اعمال كبير . وكان ناجح فى شغله جدا .
وانخرط فى فساد متقع . (متقع واخدين بالكم ) المهم الاخ بيقول انه كان بيروح كباريهات وسهرات مش تمام وعلاقات نسائيه وشرب خمور وكل حاجه وحشه ما خلاش حضرته . بيقول ما كنتش بافرق بين صديقه وقريبه وجاره ولا اي حد (حاجه زباله يعنى ) وبالنسبه للخمور كان شايف انه سلوك يتصل بالحضاره .
ويلغي الفوارق بينه وبين من يجالسهم من علية القوم .

وبالفعل بقى صديق مقرب من مدير الشركه الى كان فيها وقعد فى القعدات الزباله دي مع ناس ما كانش يحلم ابدا انه يشوفهم اصلا .

وكان عايش حياته بالطول والعرض ما كانش في حاجه بتنغص عليه حياته المقرفه دي الا رجوعه كل يوم البيت فجرا يلاقى والدته قاعده بتصلي الفجر فيروح يقبلها وهى تدعيله بالهدايه
وتسأله:مش هاتصلي الفجر يا ابنى .
يرد عليها وهو نص فايق: ايوه طبعا .
ويدخل اوضته يترمي زي ا لقله على السرير ويتخمد ينام .

وفضل كده سنين لحد لما والده توفاه الله . وحضر دفن ابوه ونزل القبر . بعدها وقف مع نفسه وقال انا ممكن اموت وانا كده ؟؟؟؟؟!!!!!!

وتاب واستقام سبحانه مسبب الاسباب . واخد والدته وراحوا عملوا عمره . وكانت ولدته رغم حزنها والمها على والده فرحانه بتوبته جدا .
ولما رجعوا من العمره فاتحته فى انها تجوزه ورشحتله بنت قريبتهم ذات خلق وجمال .
وهو فرح بها ووافق وتم الزواج سريعا جدا . وكان فى الوقت ده ساب الشركه وعمل لنفسه مكتب خاص .
وسبحان الله فتحت له ابواب الرزق واشتغل كويس جدا وبعد الجواز ربنا كرمه ببنت زي القمر واغدق عليه من خيراته . وانتقلوا لشقه تانيه اكبر وربنا رزقهم بطفل كمان .
ومرت خمس سنين من الزواج السعيد والحياه النظيفه الهادئه الهانئه .
وفى يوم اسود ما طلعلوش شمس : دخلت عليه واحده المكتب عميله فى شغل يعنى .
على حد قوله وتعبيره القوي جدا والصادق جدا : ما أن رأيتها اشتيهيتها . (تعبير فى رايي يعبر عن حيوانية المشاعر ودنوها مش عشان كلمة شهوه ولكن عشان الرابط الوحيد هو الشهوه ) . ودخل معها فى علاقه محرمه وبعد كام شهر زهق منها وسابها ولكن على حد قوله برضه : كان قد فتح باب الخطيئه .

وعادت ريما لعادتها القديمه . نساء وخمور وعبث بلا نهايه . واخد شقه فى مدينه جديده بعيد عن العين اسماها هو وكر الشيطان .
وطبعا مراته حست بتغيراته دي لكن كانت كاتمه فى نفسها لحد لما شرب خمر فى البيت رفضت وعملت ثوره
وقالتله انها مش هاتعيش فى بيت لا تدخله الملائكه هى وولادها . وانصاع لها وما بقاش يشرب خمر فى البيت .
وكان كل خوفه ان امه تعرف لانه كان حاسس ان وجوده فى الدنيا وستر ربنا عليه كله بسبب دعائها له .

وانه كان عشان يشيل الاحساس بالذنب الى عنده كان بيعمل خير كتير وصدقات ويساعد ناس كتير ( فى رايي انا اسمه تخدير الضمير )

وفى مره من ذات المرات قابل فتاه فى حفله كانت جميله ومثقفه ملفته جدا ......... الخ .

اتعرف عليها وحاول معاها كتير وبيقولك الشهاده لله كانت عصيه وقعد يتحايل عليها يجى اسبووووووووعين بحالهم . لحد ما وافقت تروحله الشقه بتاعته .
(عصيه واسبوعين ؟؟؟ امال لو ما كانتش عصيه كانت راحت امته ... قرررررررررف)

المهم راح يستناها فى الشقه واتصلت عليه وقالتله قدامي ربع ساعه واوصل واهو انشكح اخر انشكحاح بقى ومرت الربع ساعه ونص ساعه وساعتين .
اتصل عليها ما ردتش اتصل تاني واحد رد عليه .
وسأله: انت تعرف صاحبة التليفون ده .
قاله: ايوه في ايه ؟
قاله :هى عملت حادثه دلوقتي ونقلناها المستشفى .
اخد منه عنوان المستشفى ونزل يجري راح لها .
لقى جو قلق فى المستشفى ونظرات غريبه من الممرضات والدكاتره .
فقلق وسأل الدكتور هو في ايه ؟؟؟هى اصابتها ايه بالظبط .
الدكتور انفرد به وقاله : هى عندها كسور متعدده واصابات كتير وفى الحقيقه هى نزفت دم كتير .
واحنا جينا ننقل لها دم فلازم نحلل لها الاول عشان ما يكونش عندها حاجه وبعد كده تقاضينا وتقول احنا نقلنلها المرض .
وفى الحقيقه احنا حللنا لها وطلع عندها ايييييييييييييدز
قاله : ايدز ؟؟؟؟ايدز ايه انت بتهرج ؟؟؟؟؟؟؟؟؟؟؟؟؟!!!!!!!!!

بيقول : ما عرفتش دفعت فلوس المستشفى ازاي وكلمت اهلها جولها وروحت الشقه تاني (وكر الشيطان ) . وقعدت ابكي مش عارف مده اد ايه .
ودار فى دماغي حاجات كتير اهمها انى كان فاضلي ربع ساعه ويبقى عندي ا يدز ؟؟
البنت دي ما كانتش تعرف ان عندها ايدز!!!! وانا ما كنتش هاعرف وكن هانقله لزوجتي . ونموت انا والمسكينه مراتي بفضيحه نسيبها لولادنا يآسوا منها .

وبعدين راح لزوجته واترمى فى حضنها يبكي ويعتذر لها . وهى كمان كانت بتبكي ومش عارفه الحكايه ايه . واتوضا وصلى هو مراته وولاده .
وخدهم وراح لامه بكي فى حضنها واستسمحها .

وتاب وأناب وبطل كل حاجه غلط واستقام اخر استقامه واعتذر لكل حد اذاه وطلب منه السماح وحاول يرجع كل حق لصاحبه ويتصدق كتير ويستغفر كتير .
وبقاله على كده سنتين لكن عذاب ضميره شغال لسه على ما اذنب فى حق ربه ونفسه واهله .

وبالنسبه للبنت العصيه دي – قال عصيه قاااال- بيقول انها لما عرفت حقيقى مرضها جالها شلل واهلها اشفقوا عليها وخدوها فى مستشفى بره بعيد عن الاجواء .
وهو باعت قصته حتى يعتبر من هم على حاله قبل التوبه او اقل او اكثر . ويذكرهم انه قد لا يكون هناك وقت للتوبه .

توته توته خلصت الحدوته .حلوه ولا ملتوته ؟؟؟؟

يلا عايزه رأيكم فى القصه ورأيكم فى حكاية الحواديت دي نكمل ولا ايه ؟؟

شوفوا الجزء التاني من شارب الخمر على الرؤيه الاسلاميه

كن بلطجيا .... تكن مرموقا

2008-06-18T09:11:00.004-02:00

ايها الناس افيقوا واستيقظوا :

اها فوقوا معايا بقى كده عشان انا مبقووووووقه(قريبة مفقوعه ) على الاخر .شوفوا بقى انا كل ما احاول اغير مود الاكتئاب بتاعي مافيش فايده .

حصلي موقف امبارح من ساعتها وانا عندي احباط واكتئاب وخوف ورعب وكل حاجه . هاحكيلكم عليه عشان انتم عارفين ما بيجليش نوم من غير ما اصدعكم .

امبارح الساعه 11 مساءا قلت ايه ويا ريتنى ما قلت احنا ننام بدري النهارده مره من نفسنا . كان خالد عايز ينام والبنات ناموا بالفعل ورضا جاي من القاهره شبه نايم . وانا كمان كنت هاموت وانام .حيث انى اليوم الى قبله كنت مطبقه 24 ساعه من غير نوم .

المهم انا يا اخوانا قلت الكلمه دي من هنا لرضا وقالي بسلامته : هو احنا وش ذلك برضه .

يااادوب شربت كوباية الشاي .

ولقيت تليفون ماما تعبت اوي انزلي اديها حقنه .نزلت جري اديتها حقنه وقعدت معاها قوووووووم وانا ركبي سايبه من تعب ماما اصلا .

سمعت خناقه بره فى الشارع كالعااااااااده طنشت شويه وبعدين خرجت بصيت ومعايا رضا وبابا واختي ولقينا زعيق شويه وبعدين هديت الامور وقفنا رنغي واذ فجأة وقفت عربيه كده قدام بيتنا ونزل منها واحده ست كده متشرده ومعاها 3 عيال انا اول ما شوفتهم مش عارفه ليه عرفت انهم جايين للخناقه . وتحول الامر الى شله من البلطجيه شالين اسلحه مختلفه اتعرفت عليها بمساعده ابو رياض (سنجه - سيف - مطاوي ) ودول اصحاب فرش الفاكهه الى في الشارع . وشله تانيه من الصعايده اصحاب المقله ومعاهم شوم وعصيان وما الى ذلك ويقال ان كان فى كمان طبنجه يا بوي .

بس طاحوا في بعض وبعدين وقفوا قدام بعض وسط ذهول وازبهلال من الناس كلها الى طلعوا جري كلهم بعيد عن الشكله لما شافوا الاسلحه الى بتلمع دي

والى حصل ان كل واحد وقف يكسر

اه يكسر كل حاجه

عربيات ومحلات وكل حاجه كل واحد قاصد حاجه الطرف التاني ومش مهم مين يجى فى السطه بقى تكسير وتخريب فى الشارع كله .

شارعنا شارع رئيسي رايح جاي وقف طبعا العربيات على الصفين يستنوا التكسير يخلص .

وصاحبتكم بقى قلبها خفيف بقيت واقفه اعيط ومنهاره تمام من المنظر المرعب وجريت كلمت الشرطه ما عرفتش اقولهم ايه اول ماردوا عليا . قلتلهم انتم فين الله يخرب بيوتكم سايبين الدنيا والعه وقاعدين .

طبعا الي رد عليا ما عجبوش كلامي .

الشرطه جت بعد حوالي ساعه من لما اتصلنا عليهم رغم ان القسم على اول الشارع . ولما جم كل العيال طلعت تجري الى كانوا شايلين اسلحه . وخدوا معاهم شويه عيال كده . مالهمش اي لازمه

وكل الى قدروا عليه ولاد ال ...... ان في واحد منهم بن نفس ال ........ وقف يشتم فى الناس الى واقفين فى الشارع من بعيد شتيمه قذره جدا . ويقولهم واقفين هنا ليه .

الى ربنا قدره عليهم كان نفسي اوي يبصلي فوق ويقولي واقفين هنا ليه عشان كنت ساعتها حدفته باي حاجه فى خلقة اهله.عشان بدل ما يروح يشوف خيبتة وخيبة الي مشغلينه جاي يزعق فى الناس الى مزعورين .

طبعا عربية بابا كانت تحت . اول لما بدأ الضرب ده بابا حاول ينزل يشيل العربيه لكن انا بوست ايده عشان ما ينزلش وافق بالعافيه وبالفعل على ما رجعنا البلكونه كانت العربيه ازازها راح . طبعا فداه المهم كا جاش فيه حاجه .

عارفين انا مش مركزه ومش عارفه اقول الكلام كويس لكن انا كنت مرعوبه بجد وخايفه اوي وقعدت ادعي على الى ماسكين البلد والشرطه الى ما عادتش بتحمي الشعب . وعلى الخيبه الى احنا فيها .

تخيلوا انا لما اتصلت اول مره على الشرطه ادتنى مشغول كتير . تليفون الطواري مشغول شوفوا الحلاوه ؟؟؟!!!!

تخيلوا كمان انهم قالوا لبابا احنا اتأخرناا صل الشارع كان مقفول . وطبعا لان الشارع طويييييييييييل يتمشى فى 3 دقايق كله على بعضه على رجليهم ما عرفوش يوصلوا للاخناقه الى قافله الشارع اصلا .

تخيلوا المنظر بقى ان البلطجيه دول مين ؟؟؟ ده مراقب موقف الميكروباصات بتاعة الارياف الى في شارعنا . واخواته .

هما كانو اصلا مبلطجين فى الشارع وفارضين اتوات على الناس .

قووووووووووم الحكومه عينته رسميا عشان بدل ما يلم ايتاوات لنفسه بس يلم كمان للحكومه

وأأأأأأأأأأأأأه يا حكومه

والى حصل ان بتاع المقله قاعد فى المحل ده عافيه عقده خلص وقاعد بلطجه كده والمحاكم شغاله بقالها سنه .

وقاعد محمي فى عم البلطجي الى فارش فاكهه قدامه . بقياده الاخت المصون لحضرة مراقب الموقف بلطجي الحته .

ووقعوا فى بعض بقى ا لاثنين ونعاني احنا الويلات .

بتهيئلي ان عصر فتوات الشوارع والبلطجيه عائد او عاد لا محاله . على فكره بالفعل رجب ده عامل اتاوايت على كل الى بيعدى من الشارع حتى .

ده غير اتاوات الموقف نفسه . وسط الموقف ده خفت وقلت خلاااااص احنا بقينا ما لناش ديه وما لناش كبير ومافيش حاجه هاتحكمنا

بجد اتعقدت واحبط جدا واعصابي باظت خااااااااالص .

والبت اختي سألتنى سؤال مهم اوي برضه : قالتلى يا لهوي كل ده من شوية عيال بلطجيه امال الى بيصحوا يلاقوا الدبابات بتضرب فى الشوارع بيعملوا . حقيقى بيعملوا اييييييييييييييييه .

عرفت حاجه واحده بقى انك عشان تاخد حقك وعشان تعيش لازم تبقى بلطجي اها كن بلطجيا ....تكون مرموقا .

فين الامن والامان ؟؟؟

فين الامن المستتب ؟.؟؟

فين الشرطه ودوريتها ؟؟؟

فين حاميها ؟؟؟

فين الكبير ؟؟؟

فين المدير بتاع القاعده دي ؟؟

فييييييييييييييييييييييييييييييييييييييين

فين الحكم فين الحكومه وفين المسؤولين عننا .

حقيقى واسفاه . فكرت جديا فى الهجره حقيقى

زهقت وتعبت وخفت خفت اوي يا جماعه ...

وكفايه كده عشان زهقتوني يووووووووه اقصد زهقتكم

ياريتني كنت عنزه عمريه ولا ...خروفايه استراليه

2008-06-13T16:05:00.005-02:00

السلام عليكم يا ايها المدونين والمدونات والزائرين والزائرات وبعد :

الاول احب اقول لكل الي تعاطف مع مبتلانا فى محمد وكل الى دعالنا ودعا لمحمد بالشفا متشكره جدا جدا وربنا يجعل الدعاء مقبول ان شاء الله ويرد عليكم بالخير باذن الله وحقيقى ممتنه لكم جميعا ولاهتمامكم
واطمنكم على محمد الحمد لله هو بيتحسن والدكاتره بيقولوا انت التحاليل فيها تقدم ملموس فعلا من العلاج وانه هايخرج من المستشفى بعد عشره ايام على الاكثر .ويبقى متابعه بعد كده تتباعد تدريجيا . وتاني شكرا لكم جميعا .

نعود بقى مره تانيه للرغي عشان كفايه عليكم كده اكتئاب مني هحاول اكون مش مش مكتئبه .

الحقيقه انا فى حاجه كده دايما باقولها لنفسي وقلت ابطل اكلم نفسي بقى عشان مش حلو علشاني ممكن تقلب معايا جنان اكتر من كده .

انتم عارفين ان انا غاويه دعبسه فى الكتب والموضوعات والى باوصله من الدعبسه دي باكتبها واحفظها عندي . وكان منها شوية قصص كده كنت قريتهم من حياة عمر بن الخطاب رضي الله عنه . شوفوا بقى بس بالراحله على اعصابكم

عن على بن ابى طال انه رأى عمر يجرى وراء بعير فسأله الى اين يا امير المؤمنين .فقال عمر :بعير ند من ابل الصدقه اطلبه. يقول على : لقد اتعبت الذين سيجيئون بعدك . فيجيبه عمر : والذى بعث محمد بالحق لو أن عنزا ذهبت بشاطيء الفرات لأخذ بها عمر يوم القيامه.

تعديل : توضيحا للروايه السابقه هانقولها بلدي عشان خاطر المؤسسه الخيخيه اعترض : الموضوع ان الحاج علي ده بيقول ان شاف عمر بن الخطاب بيجري ورا جمل من جمال الصدقه فقاله على فين يا امير المؤمنين قاله : ده جمل شطح من جمال الصدقه رايح اجيبه . فاقاله علي : انت هاتتعب ال هايجي من بعدك يا عمر ( يعنى عشان مش هايعرفوا يعملوا زيه ) فعمر بيحلف بالله الذى بعث محمد بالحق ان لو معزه راحت كده ولا كده بشاطيء الفرات ( اخر الدنيا يعنى ) عمر يتحاسب عليها يوم القيامه .

طب بذمتكم مش نفسكم تبقوا معزه من معيز عمر تلاقوا حد يحمل همكم وهو فى اخر الدنيا ؟؟

كل ما اعدي على القصه دي اقول يا حلاوه هو فى كده ؟؟ امال احنا ليه يعنى خير اللهم اجعله خير ما حدش سائل فينا ؟؟

متفرقين على الارض يمينا ويسارا وما حدش معبرنا الى فى معتقل والى فى سجن والى مش لاقي ياكل حتى الى مش فى اخر الدنيا الى فى البلد نفسها برضه ما حدش بيفكر فيهم اصلااااا . نفسي حد يفكر فينا يا جماعه كأننا معزه من معيز عمر كتير ولا ايه ؟؟؟

فى نفس ذات الوقت بقى يا كتاكيت لما اقرا القصه دي افتكر خبر كده كنت قريته السنه الى فاتت قبل العيد الكبير فى الجرنال . والله ما اول ما قريته رجعت قريته تاني واقول ايه ده هو بصحيح ولا ايه ؟؟؟

اليكم بقى الخبر بس الى المراره عنده فيها مشاكل يحاسب على نفسه وصحته :

استراليا ترسل لجنه لمعاينة الاحوال عندنا فى مصر والتأكد من اننا هانعامل الخرفان بتاعتها الى بنستوردها منهم كويس قبل الدبح وبعد الدبح ..!!!!!!!!!!!!! وكمالة الخبر بقى انهم الحمد لله لقونا مؤدبين ومحترمين وولاد ناس وبنكرم الخرفان ونعاملهم احسن معامله ومشيوا من عندنا وهما بيقولوا زي بعضه هانجيبلكم خرفان السنه الجايه وعليكم خير !!!!

طب بالذمه مش حرام عليهم ينشروا الخبر ده فى الجرنال ؟؟؟ ايه تقليب المواجع ده ؟؟؟ ما تخلوا الناس فى حالها ساكته وصابره على نفسها . مش كفايه ان احنا هانتنيل نجيب خرفان من بره . مع عندنا منهم كتيييييييير يا ابويا وقاعدين وكابسين على مراوحنا والواحد فيهم بقى اد الجموسه من كتر ما كل من لحمنا ؟؟؟

طب احنا ما حدش ليه بيفكر فينا يا ولاد مش برضه انتم زيي نفسكم تبقوا عنزه من عنزات عمر او خروفايه استرالي ؟؟؟

بس كده كفايه عشان العيال سايباهم فى البانيو زمانهم باشوا .

شوفوا اخر موضوعات الرؤيه الاسلاميه المتواضعه

شارب الخمر (الجزء الأول )