EMBLOQUE

Cultura comezará en setembro a rehabilitación do castelo de Naraío

2006-05-10T14:53:00.000+02:00

A Consellería de Cultura e Deporte investirá 156.722 euros para limpar e consolidar o castelo de Naraío e o seu contorno. A conselleira, Ánxela Bugallo, anunciou esta intervención durante a visita que realizou hoxe ao concello de San Sadurniño. As obras realizaranse ao longo deste ano e prolongaranse durante o 2007.

A intervención estará supervisada en todo momento por un servizo de arqueoloxía para comprobar a posible aparición de restos arqueolóxicos de interese e a selección de pezas arquitectónicas ou escultóricas que poidan aparecer neste castelo que data do século XII.

Os labores de limpeza consistirán no desbroce do montículo rochoso onde se atopa o castelo, do interior da fortaleza e da coroación dos muros. Os traballos permitirán sacar á luz os pequenos muros de contención e camiños de acceso que vaian aparecendo, de forma que se poida ver a estrutura do montículo. Neste sentido, o proxecto elaborado pola Dirección Xeral de Patrimonio inclúe a retirada de materiais de derrubes.

A limpeza tamén afectará aos muros, que se realizará a man dende a base ata o seu remate. Nesta fase agárdase atopar información sobre o tipo de construción, os materiais utilizados e tamén as fases nas que se construíu. Ao cabo, tanto nas ladeiras rochosas como nos muros tomaranse medidas para consolidar a edificación, repoñer sillares e apuntalar ocos.

A empresa EPTISA é a encargada da elaboración do Plan Xeral de Ordenamento Municipal (PXOM)

2006-03-23T20:03:00.000+01:00

A redacción do PXOM suporá un investimento de 128.988 euros

O Concello de San Sadurniño xa empezou o proceso para a redacción do Plan Xeral de Ordenación Municipal (PXOM), un documento urbanístico imprescindible para un correcto ordenamento do territorio municipal. Onde se poderá construír, cantas alturas, que terreo se destina a equipamentos ou como quedarán configurados os núcleos rurais son algunhas das cuestións que quedarán definidas no plan.

A empresa encargada de elaborar o planeamento urbanístico é EPTISA e ocuste total do seu traballo será de 128.988 euros. Unha das propostas que fixo o grupo municipal do BNG foi a de que todo o proceso de elaboración do PXOM fose transparente e participativo. Secundino García apuntou como prioritaria “a busca do máximo consenso posible e a participación de todos os veciños en algo tan trascendental como a definición do concello que queremos de cara ao futuro”.

Neste sentido, o grupo municipal do BNG anunciou o seu compromiso “para manter informada á cidadanía en todo momento sobre os pasos que se vaian dando”. Ademais, o Bloque tamén asegura que seguiría de preto o proceso de cara a poder formular as alegacións que sexan precisas cando comence a súa fase de exposición pública.

Co encargo da parte técnica do estudo do PXOM empeza un proceso que podería estar rematado antes de dous anos e tras o que se desbloqueará a posibilidade de construir en terreos clasificados agora como rústicos. O BNG estima que na maior parte dos casos se consolidarán os núcleos urbanos existentes e que incluso se ampliarán os seus límites. Desta maneira, segundo manifestou Manuel Varela, “eliminaríase un dos maiores atrancos para a fixación de xente nova no rural que a día de hoxe non atopa onde construír a súa primeira vivenda e se o fai é por un prezo prohibitivo”. Ademais, segundo o BNG, a existencia dun planeamento tamén é un factor decisivo para consolidar San Sadurniño como un polo de atracción de poboación procedente de Ferrol ou Narón “onde o chan, construído ou non, se está poñendo polas nubes”.

Con todo, Manuel Varela tamén advirte que polo momento todo son conxecturas e que a última palabra poderá dicirse cando o ordenamento estea aprobado. Aínda así o concelleiro afirma que o PXOM traerá aparellado un maior respecto pola paisaxe e o freo definitivo ao feísmo urbanístico “do que, por desgraza, aínda nos quedan moitos exemplos”.

O BNG pón enriba da mesa o problema da inseguridade da nosa rede viaria

2006-03-23T19:47:00.000+01:00

A seguridade das pistas e estradas que sucan San Sadurniño é unha das principais preocupacións do BNG, e así o fixo saber o grupo municipal a través de varias mocións e rogos presentadas en pleno. Mellora na sinalización, colocación de espellos en cruces perigosos, o desbroce dalgúns tramos e unha campaña de educación vial para os rapaces son algunhas das propostas elaboradas polos nacionalistas.

Segundo manifestou o Bloque, o Concello carece dos medios necesarios para evitar que na súa rede viaria se produzan accidentes anque si se deberían tomar algunhas precaucións para que non cheguen a producirse. Unha das principais medidas que se deberían poñer en marcha é a de colocar máis sinais de tráfico indicando trazados perigosos e límites de velocidade.

Secundino García argumentou o razoamento do BNG coas peticións achegadas por varios veciños que demandan máis indicadores e, nalgúns casos, tamén espellos convexos para facilitar a incorporación a vías con mala visibilidade. Para García “moitas veces as preocupacións dos nosos veciños son estes pequenos problemas faciles de resolver”.

O BNG recoñeceu que nos últimos anos “houbo unha mellora considerable neste aspecto e en algúns casos por iniciativa do noso grupo”. O voceiro nacionalista levou a pleno a adopción de dous acordos que contribúan a ter estradas máis seguras. O primeiro deles solicitaba que se incluíse unha partida nos orzamentos municipais para colocar espellos en todos os cruces con pouca visibilidade e tamén sinais con límites de velocidade. A segunda proposta céntrase en que o Concello organice unhas xornadas de seguridade vial para que as nenas e os nenos aprendan a ser peóns e tamén futuros conductores máis prudentes.

A moción nacionalista foi aprobada por unanimidade, anque o PP condicionou o primeiro punto –o da colocación dos sinais e dos espellos- “ao previo estudo da situación actual e do custe da actuación”. Secundino Casal afirmou estar satisfeito co acordo acadado, aínda que matizou que a enmenda popular “está fóra de lugar, xa que á seguridade dos conductores e dos viandantes non se lle pode poñer prezo”.

Pola súa banda, Manuel Varela tamén presentou no primeiro pleno ordinario do ano dous rogos referidos á seguridade das estradas. No primeiro deles, o concelleiro do Bloque pediu que se estudase o cambio de lugar do sinal de ceda o paso que hai no cruce de Pereiras con Cabanas, na parroquia de Naraío.

Na actualidade o ceda o paso dalle preferencia aos coches que veñen desde Pereiras malia ser esta estrada a que soporta menos tráfico. Pola contra, os que veñen da parte de Cabanas camiño ao Eirexado deben deter a súa marcha a pesar de que esta é unha das principais vías de acceso a Naraío. “Parece lóxico que a estrada preferente debera ser a de máis circulación e non a outra, tal e como está hoxe. Esta situación foi a que nos levou a solicitar que se estude a posibilidade de que o sinal de ceda o paso se coloque para os vehículos que veñen desde o lugar de Pereiras”, aclarou Varela.

O BNG traballa para que o Pazo da Marquesa se converta nunha residencia para os anciáns

2006-03-22T14:20:00.000+01:00

Un dos grandes problemas de Galiza é o do avellentamento da poboación, sobre todo na zona rural. Neste sentido outro dos grandes problemas que existen é o de non dispoñer de prazas suficientes nos xeriátricos para atender a demanda. Hai poucas residencias e moitas delas teñen uns prezos prohibitivos. A nova política da Xunta promovida pola Vicepresidencia da Igualdade e o Benestar tenta poñerlle fin a esta eiva por medio da posta en marcha de novos centros para os nosos maiores onde máis falta fan: nos concellos rurais. O BNG local leva insistindo máis de cinco anos en que o Pazo da Marquesa é un emprazamento perfecto para este cometido.

Tivo que producirse un cambio de goberno na Xunta de Galiza e que o Bloque chegase ao poder para que o organismo autonómico mostrara sensibilidade ante as cuestións de interese social.

O BNG de San Sadurniño leva cinco anos propoñendo a utilización pública dos xardíns do Pazo da Marquesa e pedindo que se convertese o edificio en residencia para persoas maiores. En setembro do ano 2000, posteriormente en outubro do 2002 e en decembro do 2004, o BNG presentou mocións relacionadas con estes dous puntos que contaron co respaldo unánime do Pleno.

Neste tempo, os concelleiros nacionalistas incluso lle tiveron que dicir ao alcalde cales eran as portas nas que había que petar malia que a Xunta aínda estaba en mans do PP. En concreto explicóuselle ao grupo de goberno nun Pleno que a por aquel entón Conselleria de Familia, Xuventude, Deporte e Voluntariado, asumira novas competencias vinculadas cos maiores e coas persoas con discapacidade, antes pertecentes á Conselleria de Asuntos Sociais, Emprego e Relacións Laborais.

Entre os obxectivos que se marcara daquela a Xunta figuraba o de continuar desenvolvendo a Plan Galego de Persoas Maiores 2001-2006, co que se tentaba posibilitar que este colectivo unha vida independente no seu contorno natural. Este programa plurianual prevía un importante crecemento dos proxectos dirixidos a estas persoas e un aumento na oferta de prazas residenciais.

O cambio do goberno na Xunta trouxo aparellado un cambio de estratexia pero sen perder de vista os obxectivos e agora parece que o alcalde por fin se decata de que o BNG local e nacional estaban no bo camiño e que debe contar con el para levar adiante un proxecto coma o da rehabilitación do Pazo da Marquesa como residencia de anciáns.

De feito, en cumprimento das encomendas que lle fixo o Pleno a proposta do BNG, Constanino Bedoya reuniuse recentemente co Vicepresidente da Xunta, Anxo Quintana, para falaren das políticas de benestar social relacionadas cos maiores.

Neste sentido, o Vicepresidente da Xunta asinou recentemente con Caixa Galicia e Caixanova un convenio para a construción de cinco novos xeriátricos entre este ano e o que vén con máis de mil novas prazas e un investimento total de 35 millóns de euros.

Para non perder esta oportunidade que ofrece a nova política social do departamento dirixido polo nacionalista Anxo Quintana, os concelleiros do BNG pedíronlle ao acalde que organizara unha visita institucional á que asista a delegada provincial de Vicepresidencia, a tamén nacionalista Tereixa Novo para visitar o noso Concello e ver as instalacións do Pazo da Marquesa.

Desde o Grupo Municipal do BNG afirmaron que se o alcalde non atendia a súa petición nun tempo prudencial, seria o propio BNG quen realizara a invitación institucional. Ademais, o Bloque tamén instou ao alcalde a axilizar as negociacións para a cesión pública do Pazo.

O CONCELLO COLOCA UN PASO CANADENSE NA ABELLEIRA EN CONTRA DA VONTADE DOS VECIÑOS

2005-10-10T12:00:00.000+02:00

A grella posta no chan non serve para nada e causa ruidos molestos na zona

O pasado día 11 de febreiro, entrou por rexistro un escrito dun veciño do lugar da Abelleira -en Naraío- na que expoñia as súas queixas polos ruidos producidos pola instalación, por parte do Concello, dun paso para animais que cruza a pista municipal e a escasos 100 metros da súa vivenda. O Concello contestoulle que se trata dunha actuación tendente á mellora da seguridade vial, que os tubos non fan ruído e que o paso o pediran a maioría dos veciños. Dous meses despois volveu entrar un novo escrito suscrito por case tódolos veciños da zona solicitando a súa retirada. Para o BNG esta é unha nova cacicada “para beneficiar a algún amigo do grupo de goberno”

En contra do que o Concello defende, os veciños e veciñas do cordal do monte de Naraío manifestan que o paso só lles está a causar problemas. Ademais, e tamén en contra do manifestado polo Concello, nin saben de incidentes de tráfico nin pediron esta obra.

O BNG comprobou no sitio que o paso canadense é un absurdo. Colocouse no medio e medio do asfalto, deixando as beiras da estrada sen ningún tipo de valado, de tal maneira que os animais poden bordear o paso ao seu antollo. Quen teñen que pasar pola grella de tubos son os coches, o que provoca un ruido certamente forte.

O grupo nacionalista cré que o paso se construiu para controlar os cabalos que andan ceibos polo monte e neste sentido, o concelleiro Manuel Varela sinalou que “non é o Concello, con cartos públicos, o que tén que controlar ditos cabalos propiedade de algún particular, prexudicando á mayoría dos veciños e veciñas destes lugares. Pola contra, o deber do Concello deberia ser o comunicalles a súa obriga de ter controlados ditos animais”.

Segundo o representante do BNG esta situación deixa entrever “unha nova cacicada para beneficiar, posiblemente a algún amigo de algún membro do grupo de goberno. Se non é unha cacicada, dí o refrán que o rectificar é de sabios”.

Para o BNG a única rectificación sabia e válida é volver deixar a estrada tal e como estaba antes de facer o paso canadense.

O TELÉFONO E INTERNET, DOUS DOS CABALOS DE BATALLA DO BNG

2005-10-10T11:56:00.000+02:00

Os concellos rurais coma o noso son habitualmente os máis desfavorecidos cando se fala das tecnoloxías da comunicación. O acceso a internet e mesmo unha telefonía de calidade son servizos básicos dos que moita xente en San Sadurniño non dispón nin parece que teña trazas de dispoñer, a menos, claro está, que se lle aprete a quen hai que apretarlle: Telefónica.

Segundo ten comprobado o BNG de San Sadurniño, a baixa calidade do servizo que presta a compañía aféctalle principalmente aos veciños que solicitaron o cambio da liña despóis de teren cambiado de casa. De feito nas vivendas socias, no edificio da Avenida Marqués de Figueroa e en moitas casas de nova construción é onde máis están a notar o desinterese de Telefónica por atender ben aos seus aboados. Esta deixadez chega ao estremo de non atender sequera a quen pide que se lle dea de alta unha liña nova.

Outro dos grandes problemas que atopou o BNG logo de falar cos veciños foi o da imposibilidade de contratar liñas de acceso a internet con tecnoloxía ADSL. Nestes momentos esta é unha opción que só se lles ofrece aos usuarios do centro urbano. Nas parroquias a situación aínda é máis preocupante xa que hai casas que contan unicamente con conexións telefónicas TRAC –telefonía celular xa en desuso- que nin permiten falar por teléfono nin moito menos acceder á rede.

Ós veciños que teñen solicitado a instalación dun novo teléfono sin que por parte da Cía Telefónica se procedese a prestar dito servicio nin se lles fixase un prazo para facela.

Estas deficiencias no servicio telefónico impiden a modernización e competitividade dos autónomos asentados no noso concello. Os estudantes e a xente nova tamén está a sufrir este défice de servizos relacionados coas novas tecnoloxías.

O BNG de San Sadurniño solicitou que o Pleno acordase presionar a telefónica para que se solucionen os retrasos relacionados cos cambios de domicilio e coas solicitudes de novas liñas. Neste sentido tamén se considera prioritario substituír as liñas TRAC por outras máis modernas e que permitan un acceso a internet de calidade.
Ao entender do BNG estas demandas tamén se lle deben trasladar á Consellería de Innovación para que a Xunta coñeza a situación do noso concello e para que urxa a Telefónica a solventar todas estas carencias.

ALBERTE SOUTO, NOVO SECRETARIO XERAL DA CONSELLERÍA DE MEDIO RURAL

2005-10-10T11:52:00.000+02:00

Que haxa un novo alto cargo na Xunta non sería noticia se non fose porque este organismo por fin cambiou de cor logo de 16 anos e porque, por primeira vez, un veciño noso ten unha alta responsabilidade dentro do seu organigrama. E é que Alberte Souto, nado en Igrexafeita hai 33 anos, é desde este verán o nº 2 da Consellería de Medio Rural.

Souto ten nas súas mans a organización interna da antiga Consellería de Politica Agroalimentaria, á que agora o goberno bipartito tamén lle engadiu a xestión dos recursos forestais.

Este veciño noso –anque agora non viva aquí debemos seguir téndoo por tal- é avogado e leva máis de dez anos envolto no mundo político e sindical, amáis de ser un fondo coñecedor do mundo agrario por cuestións familiares e tamén pola súa formación.

Comezou a súa andaina colaborando nas actividades do BNG de San Sadurniño e mesmo foi integrante das listas ás eleccións municipais. Este labor desenvolveuno de forma simultánea co de avogado do Sindicato Labrego Galego en Lugo.

Logo do seu paso polo sindicalismo agrario, Souto comezou a traballar como asesor legal na Fundación Galiza Sempre, adscrita ao proxecto nacionalista galego. Neste tempo tamén formou parte do consello local do BNG no concello de Oroso e, posteriormente, do do concello de Ames, onde reside na actualidade.

Alberte Souto está casado e ten unha filla. Tanto el como a súa compañeira teñen a familia en Igrexafeita e pasan tódalas fins de semana e as vacacións cos seus. Para máis referenzas, contámosvos que Souto é curmán do exalcalde Manuel J. Lamas e é fillo dun coñecido tratante de gando de Igrexafeita.

O CONCELLO DE NEDA PARCHEA A MEDIAS A ESTRADA DE ACCESO A NARAÍO

2005-10-10T09:27:00.000+02:00

Parece que a nova aparecida no Diario de Ferrol hai unhas semanas fixo algo de efecto entre os xestores do Concello de Neda. Como saberedes o BNG de San Sadurniño leva protestando varios meses polo mal estado da estrada que vai desde a Cobeluda ata Naraío. Varios baches obrigaban –e ainda obrigan nalgúns tramos- a pasar moi a modiño para non desfacer os baixos dos vehículos. Algúns mesmo van dár a volta pola antiga estrada das Pontes para entrar ou saír de Naraío.

Curiosamente, dous días despóis de que o Bloque denunciase no xornal ferrolán esta situación o Concello parcheou sen xeito nin maneira os buratos máis grandes. Pero aínda falta traballo por facer para que a estrada quede amañada por completo.

Por detrás da deixadez do Concello de Neda para reparar esta pista -que só lle dá servizo aos veciños de Naraío- podería estar o litixio que mantén co Concello de San Sadurniño por mor da definición dos lindes entrámbolos municipios. Aínda que os límites xa están establecidos, parece que Neda entra no xogo das "vendettas" por causa do bocado de territorio que lle comeu San Sadurniño tralas novas partixas.

Case un mes despois da reparación de urxencia aínda quedan por tapar varios baches sen que, polo momento, o Concello de Neda aclarase se ten ou non intención de solucionar este problema.

O CAPELO CONVÉRTESE NUN VERTEDOIRO DE ENTULLOS

2005-10-10T09:18:00.000+02:00

O BNG solicítalle ao Concello que investigue o caso

A fábrica de ladrillos de Freixeiro é xa historia. Cerámicas Arzúa, que permanecía pechada desde hai varios anos, foi derrubada para deixarlle sitio á imparable expansión demográfica do concello de Narón. A demolición xerou centos de toneladas de escombro que, no canto de ser tratadas como se debe, viñeron parar á canteira do Capelo en Igrexafeita.

Na semana do 20 ao 26 de xuño, o BNG comprobou que unha cantidade importante de camións transladaban material de escombro ata as instalacións da empresa “CANTEIRAS CUIÑA” en Igrexafeita. Logo de investigar a procedencia e mailo destino dos camións chegouse á conclusión de que o material de escombro provén das obras de derrube que se fixeron na antiga fábrica CERÁMICAS ARZÚA instalada no concello de Narón.

O BNG tamén descubriu que no Concello de San Sadurniño non existe constancia de solicitude ou licenza para que Cuíña faga este tipo de vertidos e por iso se cré que se estar a facer “dun xeito totalmente ilegal”.

Ainda que nun principio os escombros poden considerarse como inertes, o BNG considera que “calquera operación de almacenamento, xestión ou eliminación, será preceptiva a correspondente autorización administrativa”. Ademáis, segundo o concelleiro do grupo municipal do BNG Manuel Varela “é moi posible que estes residuos, malia parecer inertes, conteñan elementos tóxicos ou perigosos para o medio ambiente ao proceder dunha fábrica onde existian fornos para a elaboración das cerámicas, polo que se deberían controlar e xestionar segundo a Lei e dun xeito moito máis estricto”.

En relación con este asunto, o BNG solicitoulle ao Pleno que o Concello investigase se os vertidos do Capelo se axustan á legalidade no sentido de cerciorarse sobre se o lugar é idóneo e sobre se a empresa Canteiras Cuíña tén autorización para tratar os resíduos..

O BNG tamén pediu en Pleno que o Concello lle notifique o caso ás Consellerias de Medio Ambiente e Industria “para que realicen as comprobacións oportunas de cara a determinar a posible existencia de infraccións administrativas ou posibles delitos contra o medio ambiente”.

O PP "TRAGA" COAS CONDICIÓNS DA CASA DE ALBA PARA A CESIÓN DO CASTELO DE NARAÍO

2005-09-28T16:51:00.000+02:00

O BNG reunirase coa conselleira de Cultura para solicitarlle axudas de cara á rehabilitación da fortaleza

A historia do castelo de Naraío é o conto de nunca acabar. Expoliado durante séculos para aproveitar as súas pedras e comesto polos toxos, espera agora que se lle dea solución ao seu estado de abandono. Desde o 1995 o BNG presentou ducias de peticións, preguntas e mocións perante o Concello, a Xunta e mesmo o Parlamento do Estado para saber cal era a situación deste exemplo de patrimonio esmorecente e para demandar a súa recuperación. A posible solución chegou este mesmo ano coa proposta de cesión do castelo por parte da casa de Alba. Porén na oferta hai trampa: o concello sería usufructuario durante trinta anos sen garantías por escrito de prórroga e, ademáis, o acordo impide optar ás subvencións ministeriais con cargo ao 1% cultural.

En abril deste ano apareceu nun xornal galego unha reportaxe na que se recollía que o castelo de Naraio era o último edificio medieval en Galiza que a Casa de Alba tiña previsto cederlle a unha Administración Pública.

O día primeiro de xuño entrou no rexistro deste Concello un borrador da escritura de cesión de usufructo do Castelo de Naraio por parte da Fundación Casa de Alba. Xunto con ela viña unha carta asinada polo Vicepresidente da Fundación, Carlos Fitz-James Stuart, e dirixida ao alcalde, Constantino Bedoya, comunicándolle que proximamente contactarían co Concello para concretar as datas para a sinatura da cesión.

Ata aquí todo perfecto. Porén, logo dunha revisión exhaustiva das condicións propostas pola Casa de Alba, o BNG considera que o acordo non é tan bo como semella. Segundo o concelleiro Manuel Varela "os gastos derivados da cesión serán por conta do Concello, obrigase tamén ao Concello a tramitar o correspondente expedente de dominio para inmatricular o Castelo no Rexistro de Propiedade a favor da Fundación". Ademáis, segundo indica o concelleiro do BNG, "o Concello terá que asumir todos os gastos que xenere dito expedente e, por se fose pouco, a cesión do usufructo do Castelo é por un prazo de tan só trinta anos".

O BNG de San Sadurniño tamén se pregunta se "son estas as negociacións que realizou o Sr. Alcalde". Manuel Varela lévalle facendo un seguemento rigoroso ao asunto do castelo desde hai máis de dez anos. Varela sinala que o trasfondo deste mal acordo vén propiciado polo incumprimento sistemático da Lei do Patrimonio Cultural de Galiza
que lles esixe aos propietarios de bens catalogados como patrimonio a conservalos, coidalos e protexelos para asegurar a súa integridade e evitar a súa perda.
O concelleiro do BNG cita a lei cando se refire a que "o incumprimento das obrigas de protección e conservación será causa de interese social para a expropiación forzosa dos bens declarados e catalogados pola Administración competente".

De feito, a Lei de Patrimonio Cultural de Galiza prevé sancións de entre 60.000 e 150.000 euros para os propietarios de bens que incumpran o seu deber de conservación. Segundo Varela "esta é a vergoñenta situación na que se atopa o indefenso patrimonio cultural galego, para logo virnos estos “dubidosos” propietarios a cedernos por un tempo irrisorio un elemento do noso patrimonio para que con cartos públicos llelo amañemos". Así e todo, Varela tamén indicou que a día de hoxe "hai a seguridade de que os novos responsables da Consellaría de Cultura -que está xestionada polo BNG- lle poñan freo a esta situación".

Entre as esixencias que o grupo municipal do BNG lle fixo ao alcalde de San Sadurniño no pleno celebrado no mes de xuño están a de que "reconsidere este documento -en referenza ao acordo de cesión redactado pola casa de Alba- para non hipotecar o futuro do castelo de Naraío".
Ademáis, o BNG tamén solicitou o acordo plenario para que Concello realizase as xestións oportunas de cara a que a cesión de usos do castelo sexa indefinida ou, alomenos, por un periodo de cen anos.

Finalmente o PP desestimou a proposta dos concelleiros do BNG e acordou seguir adiante co convenio nos termos en que o redactou a Fundación Casa de Alba. Manuel Varela laiouse da decisión tomada pola maioría "popular" manifestando que "esta é unha mostra máis da incapacidade negociaciadora dos que están a des-gobernar San Sadurniño".

Varela tamén engadiu que a cesión do castelo por trinta anos " podería impedir que o Concello conte coas subvencións que os Ministerios de Cultura e Fomento conceden con cargo ao 1% cultural para a rehabilitación de castelos, xa que estas só se conceden para bens de titulariedade pública ou cedidos por un tempo superior a cincuenta anos".

A pesares da “lamentable negociación do Sr. Alcalde e o seu grupo”, o BNG non deixa de traballar e tentará conseguir axudas doutras administracións públicas. Este concelleiro afirma que próximamente haberá unha reunión entre concelleiros do BNG de San Sadurniño e os responsables da Consellaria de Cultura –da que é titular a nacionalista Anxela Bugallo- e na que se tratará sobre a financiación para unha actuación “de urxencia“ neste importante Patrimonio Cultural.

15 ANOS DUNHA PROMESA INCUMPRIDA

2005-09-28T16:47:00.000+02:00

O BNG presenta unha moción para que o polígono industrial sexa unha realidade

Desde que o actual grupo de goberno municipal accedeu ao poder en San Sadurniño, mediante unha moción de censura, prometeu sempre que puido a construción dun poligono industrial. Isto foi precisamente o seu principal argumento para xustificar a moción de censura. Decia textualmente o PP no seu programa electoral para as municipais do 1991: “Realizar la infraestructura y planificación del polígono industrial de San Sadurniño; parcelación, calles, alumbrado, etc., y ampliación de los accesos.” “... todo lo que no sea esto, será negarse al progreso, a la posibilidad de grandes inversiones, a la creación de puestos de trabajo fijos y estables en las empresas ubicadas en el POLIGONO INDUSTRIAL de San Sadurniño, que se llevará a cabo en la próxima legislatura entre la XUNTA y un gobierno del PP bien constituido en mayoría” “...No te dejes engañar por promesas sin fundamento. El polígono industrial de San sadurniño solo se realizará plenamente entre la XUNTA y un gobierno del PP en el municipio.” Pasaron máis de 14 anos desde que o PP afirmaba tan categoricamente que eles eran os salvadores e siguen a prometer esta infraestrutura cos mesmos argumentos: que a maioria absoluta do PP é a única garantia para ter un polígono industrial. Afortunadamente corren novos ventos en Galiza e o PP xa non ten maioría absoluta na Xunta.

Desde que no ano 95 o BNG acadou representación na Corporación Municipal o Alcalde xa tivo que respostar a varias preguntas referidas a este asunto, feitas polos concelleiros deste grupo político. As resposta sempre foi a mesma malia o paso do tempo: “As xestións están ben encamiñadas”.

O concelleiro do BNG Secundino García considera que este tema, como todo o relacionado coa planificación do territorio, "é prioritario no labor político que hai que levar a cabo no seo da Corporación Municipal. Conseguir que San Sadurniño se dote de chan público donde asentar empresas é un dos retos máis importantes que temos. É tamén unha vella aspiración de toda a xente. Os que temos o deber e a responsabilidade de representar a todo o pobo temos a obriga de non defraudalo".

Neste sentido, o concelleiro do BNG presentou unha moción para que se debata este asunto no Pleno. "Queremos -asegura García- que o Alcalde lles explique, a todos os concelleiros, todas as xestións feitas desde que ocupa ese cargo". Segundo Secundino García, a intención desta moción é a de "saber se todas as promesas feitas por Bedoya eran só propaganda ou se ten algo que poida demostrar documentalmente que a Xunta de Galiza tiña o compromiso adquirido e que non o realizou".

Para o BNG as respostas a estas interrogantes son fundamentais para saber "cal é o punto do que se parte", logo de que o PP pasase á oposición na Xunta tralas eleccións autonómicas. Secundino García considera fundamental saber "se a Xunta tiña compromisos adquiridos ou non".

O grupo municipal do BNG tamén cré imprescindible "deixarse de promesas e propaganda e poñerse a traballar". De feito, este grupo expresou xa a súa disposición para conquerir o obxectivo da industrialización do concello "dunha vez por todas".

En relación con esta teima, o BNG elevou ao Pleno a proposta de solicitarlle á Consellaría de Industria unha xuntanza urxente á que acuda un membro de cada grupo político con representación no concello. Cómpre lembrar que o novo conselleiro de Innovación e Industria é o nacionalista Fernando Blanco, algo que, a xuízo de Secundino García, "vai supoñer un cambio radical na política ao respecto dos sectores produtivos deste país. San Sadurniño poderá aproveitar este novo rumbo sempre e cando o PP deixe a un lado os seus intereses partidarios e bote man da boa sintonía que existe entre o grupo municipal do BNG e o novo goberno da Xunta".

Tarde, mal e á rastro...

2005-09-16T09:41:00.000+02:00

Parece que a nova aparecida no Diario de Ferrol esta semana fixo algo de efecto entre os xestores do Concello de Neda. Como saberedes o BNG de San Sadurniño leva protestando varios meses polo mal estado da estrada que vai desde a Cobeluda ata Narahío. Varios baches obrigan aos conductores a pasar moi a modiño para non desfacer os baixos dos seus coches. Algúns mesmo van dár a volta pola Fontela para entrar ou saír de Narahío.

Curiosamente, dous días despóis de que o Bloque denunciase no xornal ferrolán esta situación o Concello parcheou sen xeito nin maneira os buratos máis grandes. Pero aínda falta traballo por facer para que a estrada quede amañada por completo.

Por detrás da deixadez do Concello de Neda para reparar esta pista -que só lle dá servizo aos veciños de Naraío- podería estar o litixio que mantén co Concello de San Sadurniño por mor da definición dos lindes entrámbolos municipios. Aínda que os límites xa están establecidos, parece que Neda entra no xogo das "vendettas" por causa do bocado de territorio que lle comeu San Sadurniño tralas novas partixas.

Namentras, quen sofre a situación é a xente de Naraío.

Botamos a andar...

2005-09-16T00:02:00.000+02:00

Este é o blog do BNG de San Sadurniño. Desde hoxe mesmo aquí atoparás aquelas inciativas e actuacións que desenvolven os teus representantes no Concello.

Tamén terás cumprida conta de todo o que ocorre, tanto o bo coma o malo. Esperamos serche de axuda e cambiar a túa visión da realidade do territorio no que nos toca vivir.

Benvido.